أبتسمي مِنْأجل قَلب يَهـوىٰ رُؤيَتـك فَرِحه ..♡
>>>>>>>>>>>>>>>>>>>>>>>>>>
فهد : احبج "درابين گلبي" انتِ
ضليت صافنه عليه وجسمي يرتعش وارجف حسيت هبط ضغطي .. شنو يحبني؟
ابتسم وگال : شبيج معتي
كمت من يمة بسرعة لبست شالي
صاح بضحكه : وين وين
حجيت واني ارجف: ها حروح لخواتي
سحبني من ايديناتي حيل وهو يباوعلي : شبيج هاا شبيج ؟؟
بنان : شنو شبية حروح اني
فهد : متروحين
بنان : ليش
فهد : اهووو يابه انتِ هم صايرة مثل ياسر تخربين اللحظات الرومانسية مو معترفلج وفرحان تكول حروح لخواتي
باوعت عليه بتردد وسألته : يعني انتَ تحبني ؟
فهد : لا احب الحايط .. ولو تدرين الحايط احسن منج
باوعت عليه بعصبية : شقصدك يعني تستهزء
ضحك وگال : أنتِ تحبيني لو لا
بنان : هااا
فهد : وجعااا
كمت من يمه بسرعه واني ارجف ماعرف شسوي من الصدمه .. شنو يحبني شديحجي هذا ؟
رجلية بادت حسيت صخنت كلسع اتذكر هذيج اللحظه بطني توجعني ركضت كبل للباب اريد افتحها ماكو متنفتح
انداريت لفهد واني ابجي : شبيهاا متنفتح هاي
اباوع عليه ميت ضحك حسيت تنرفزت حيل ومن قهرتي كمت ابچي واعت بالباب : انفتحي انفتحي
ضحك وگال : تخبلت البنيه
بنان : فهدد
طلع المفاتيح من يمه وگال : يمي المفاتيح شعندج طالعه ؟
ضلت دموعي تنزل اسمع صوت خطواته جاية علية !
كعدت بالكاع وكمت ابجي بالزايد
فهد : هسه مدافتهم يعني على شنو تبجين واني شسويت
بنان : سلامتك كُلشي مسويت
فهد : بوسه واعتراف
بنان : وخر وخر فهددد
بجيت حيل وكلتله : يعني مادرييي احس مادري شبية انتَ ليش هيج سويت اصلا احس گلبي حيطلع
رأسا حضني وعلى وجهه ابتسامه : من علامات الحب هاي بويه
ضليت اريد اوخر وابجي حتى احس لساني أنربط مدري شبية وشصارلي لحد ما همس بأذني : شليتيني شل
حسيت گلبي حينفجر مداعرف شسوي واني اسمع هل كلمات
رأسا باوعت عليه ودموعي تنزل معرف شسوي ولا أعرف مشاعري جانت كلها بخربطة .. هو يحبني بس اني ما اعرف اي او لا !
مسحت دموعي وكلتله : بعد لتسوي هيج وياي تمام
فهد : لا والله عود بكيفهاا
بنان : فهد
فهد : مو بكيفج بكيفي اني بعد شايفه انتِ
باوعت عليه بعصبية : شنو هاي فهد انت مو هيج وياي مجنت هيجي
فهد : لان أنتِ غبية اني اكثر من مرة كاعد والمح وصخام بعينج وأنتِ ولا يمج اصلا انتي بعالم واني بعالم
بنان : شنو غبية اني غبية ؟؟
فهد : اي لان صارلي فتره المح الج وانتِ ولا يمج
درت وجهي بصدمه احس السبلت كام مينطي هوا بارد حارر وامسح بوجهي واسترجع كلشي فعلاً اللي كاله كلشي صحيح معرفت شسوي لحد مكال
_ بنان انتي تحبيني مثل ما اني احبج ؟
احس الدنيا وخمت رأسا هبط ضغطي وطحت بالكاع هو ركض كبل راح جابلي مي وضل يطش على وجهي واني لحد الان احس دا احلم شنو فهد يحبني مدا اصدك !
ف هو رأسا وداني على الفراش وكلي : ديلا عيني يلا شحجيت اني وهيج صرتي استغفر الله
درت وجهي وكلتله : حنام
ف هو اجه يريد ينام يمي
بنان : حتنام هنا ؟
فهد : لعد وين
رأسا درت ظهري وغطيت راسي واسمعه يضحك عليه ويكول
_ يلا العافيات درجات
عصرت البطانيه والدمعه بعيني وگلبي يدك سريع
فهد يحبني !
_______
روان
كعدنا الصبح وريم هم كعدت بدلنا دوام ونزلنا جوا لكينا مثل كل مرة خالة رحاب كاعده وحسن يريد يروح للدوام
والريوك منصوب شفنا همام نازل مستعجل
ريم : هيووو المحامي تعال اكل
همام : ماريد مالحك بعد حروح
ريم : بكيفك
حسن : همام كضه عمره ركض ركض
رحاب : وانت عساس ما كضيته ركض ركض ولا شايف لا مرتك ولا بنتك تروح الصبح ترجع بالليل
ريم : بساميرررر
رحاب : دا احجي الصدك اني
حسن : الله كريم .. وين فهد
هو گال وين فهد وفهد نزل ولابس ملابس الدوام ووراه بنان
رأسا ابتسمت لمنظرهم الحلوو
رحاب : خير يمة وين حتروح مو على أساس عندك اجازه
اجه كعد يمنا ؏ السفرة وگال : يمه يا اجازه خلصت 3 ايام واليوم الرابع ف هسه راح ارجع للبصرة اكمل شغلي ومؤمل هم ويايه
روان همست لريم : راح نتأخر وين الامير الوسيم
ريم : شمدريني هذا اذا ميكشخ ويتعطر واهمشي الساعه الفضية ميتحمل
روان : امممم من حلاته هو شنو اصلاا
ريم : ها ها روان اكولههه
روان : لتخبثين
ريم : ما اخبث
روان : انجبي
جتي علينا بنان كالت : وين رزان
روان : عفناها نايمه مثل كل مرة
بنان : لعد شلون خل تكعد تاكل
ريم : هي بكل مرة تعاند خليها فد شوية هسه وين دنيا صبح شيكعدهاا ؟
بنان : اوف ميخالف
گال فهد : وين ياسر ؟
ريم : عفية فهد صيحه راح يخبلنا بس يتأخر ويأخرنا وياه
ثواني وفهد كام يعيط عليه ويصيح لحد ما نزل يركض ويعدل بشعره
ياسر : اكول شعري حلو ؟ ترا ما مشطته يعني هاهيه شسوي عود موده وهيج
فهد : خما نسيت الساعه الفضية ؟
ياسر : لا عمي وين اكدر انساها
فهد : ديلا امشي ولي أخذ البنات للمدرسة حيتأخرون بسببك وراهن امتحانات
باوعلنا وابتسم : اي اخذهن ليش لا امشوا عمي
كام فهد يعيب عليه : عمي عمي لازك طلعت روحي بهاي
ياسر : شعليك انت محد طالب رأيك على ضرب البارحه ما اتوقع اصالحك اني لحد الان زعلان حروح للكلية عود راضيني
فهد : واني حروح للبصره فيعني لا اراضيك ولا تراضيني فولي مني يمي ؟
ياسر : هوه اني ادري بروحي مكرود محد يراضيني
عاطت رحاب : عزا بعينكم روحو تأخرتوا شكد تسولفون امشوا يلا لا اكعدلكم زوزو تقضي عليكم
كام ياسر وأخذنا ورحنا للمدرسة
_____________
بنان
ورا ما طلعوا ياسر والبنات ضل فهد الاخير شفته اجاه اتصال من مؤمل وگال اله اني ؏ شارع انتظرك
باوعلي وعيونه تلمع أخذني ع صفحه وكالي بهمس : لتنسين ترا اني احبج .. من ارجع انتظر ردج فعندج منا ل اسبوع
ارتبكت وصرت ارجف وگلبي يدك يدك
ابتسم وكالي : مراح تودعيني زوجتي العزيزه
بنان : الله وياك تروح وترجع بالسلامه
اجه حضني حيل ورها دار ظهره وطلع حسيت گلبي انقبض اول مرة يودعني هيج
صعدت للغرفة اباوع عليها وابجي
ايدي ترجف وحلبي حسيته يطلع من مكانه رأسا ركضت شربت الدوا ودموعي على خدي عشرة عشرة وابجي
رأسا نمت بسبب الدوا ومحسيت ؏ اي شي
_________________
روان
اول مصعدنا بالسيارة بدت سوالف ياسر الي متخلص
كام يحجي : ما لكيتن غير فهد تكولوله
ريم : انتَ غير تتأخر ما عدنا غير هذا الحل عبالك رايح عرس
ياسر : اي عرس وبكيفي ماريد تدخلين خوش
شو هذا طب شعل اغنية مال تورط لزمت راسي وگلت
_ هم رجعناااا من صباحيات الله اغاني
اباوع عليه يضحك ويغني : تورط گلبي في حبك تورط اي والله تورط ورطه جبيره ما منها رجعة
ضحكت عليه وهو عايش جو ولا يمنا إلى أن عاطت ريم
ريم : ياسرررر ديربالك لياخذك الواهس وتودينا لجامعتك
ياسر : لتخافين صح اني مخبل بس مو لهل درجه
ريم : لا والله واثق كُلش
روان : هسه انت طفي هاي الاغاني مو انخبصنا
ريم : هي بس انخبصنا احس السيارة انهجمت
روان : يلا ياسر طفيييي
ياسر : بكيفي ترا يلا انجبن
روان : اني انجبببب
ريم : انيييييي ؟
ياسر : لا محد كعدن وسكتن
باوعت عليه هذا طالع حلو اليوم خاف يشوفنه البنات وينعجبن بي ما اتحمل جنت جايبة وياي بطل مي ف حبيت أخبث هذيج المره بمدينة الالعاب بالغلط وكعت ؏ ريم هسه اجه دور ياسر هيهيهيهي اني أعلمك
هو احنه واصلين للمدرسة اصلا فقررت أخبث خوش خباثه
فتحت بطل المي وريم توها نازله ف اني جبيته عليه منورا
هو شهك بسرعه واندار علية واني اضحك عليه
ياسر : رواااان شلون هيج تسوين بابا وراي دوام راحت ام الكشخههه
روان : اي اي حتى تعرف بعدين شلون تكشخ
باوعتله صفح وهو متعصب علية بس ما عيط يخاف على مشاعرييي الرنانه
نزلت بغرور سويتله ب ايدي بيباي وهو متخبل مني
ركضت ورا ريم وطبينا للمدرسة .. هاي اخر ايام راح تجي امتحانات اخر السنه ونخلص من المدرسة
_____
رزان
فزيت الصبح من كابوس مزعج
كلش تأذيت هاي الليلة وبجيت هواي حسيت راسي ينقلع ومناك هو مخيط ف كلش تأذيت
نزلت دموعي واني اتذكر شسوه بية فراس ومصطفئ
صح همه هسه بسجن بس صارت عندي خوفه مو طبيعيه
من خوفتي كمت حتى اروح لغرفة بنان واضل يمها لان ريم وروان هيج وقت بالمدرسة ومحد يضل يمي
رأسا لبست شالي وطلعت
دا امشي ودموعي تنزل بدون ما ادري
حسيت ب ايد انمدت وجرتني حيل ما احس غير طبيت بغرفة الولد نسد الباب وصار بوجهي ايهم
انصدمت من عنده ف كلتله : انت شلون هيج تسوي
ايهم : شسويت ؟
رزان : ها لعد هاي الحركه شيسموها .. وخر ايهم خلي اطلع
ايهم : متطلعين الا تنطيني ردج !
رزان : اي رد انتَ عن شنو دتحجيي
ايهم : هاا نسيتي سالفة البارحه
رزان : لا يعني مو ما نسيتها بس اكيد لازم افكر هيج بلمح البصر راح اكول اي موافقه اكيد لا وبعدين انتَ شلون الك نفس تاخذ وحده مريضه نفسياً ؟
ايهم : شوفي ميهمني مريضه نفسياً وعقليا من الاخير اريد اكلج حجاية
رزان : شنو ؟
ايهم : رزان اني احبج
رزان : شنوو
ايهم : شنو شنو ليش اني شداحجي الماني قابل
معرفت اجاوب ضليت ساكته
باوع عليه وگال : اكيد اعرف تفكيرج وراح تكولين هذا شحب بية وليش الا اني واني مريضه ومدري ايش .. هذا تفكير ميهمني وشتحجين احجي اني من صدك احبج وحبيتج من زمان اصلا بس مجنت أبين الج .. بس اقبلي عرض الزواج واني راح اضل وياج خطوه بخطوه والعلاج اكيد راح تتغيرين من بعده .. بس وافقي
كل ميكول كلمه احس اريد اوكع مادري الموقف كله حرجني بي ومعرفت شجاوب وشكول
رد علية : والله صدكيني حتى دراسة اخليج تكملين وكُلشي بنفسج اسويه الج .. متعرفين شكد احبج
رأسا انداريت دا افتح الباب اريد اطلع گال : انتظر ردج اليوم تمام ؟
باوعت عليه معرفت شكول يمه يعني ايهم يحبني !
طكيتها بركضه لغرفة بنان وهو واكف يم غرفته يباوع علية
دفعت الباب واتنفس بسرعه لكيت مريم يم بنان وفرح هم يمهم
كامت بنان علية : شبيج رزان بيج شي ؟
ومريم كالت : امشي اخذج غسلي وجهج اصفر ونزلي نتريك
أشرت الها : لا لا مو شغلة تغسيل بس جيت على بنان
هي هم خطيه مكالت شي كالت لعد اني وفرح ننزل نتريك جوا يم زوزو
ضليت يم بنان وحدنا ردت بس احجيلها : بنان عفية مادري شكول
بنان : ليش شبيج شصاير ؟
رزان : ماعرف
بنان : شنو ماعرف دحجي
رزان: باعي ايهم ابن عمو زياد
بنان : شبي ؟
رزان : باعي
بنان : لج كضيتيها باعي وباعي دحجي وفضيني شبي جلسة علاج خاف
رزان : لاا ولج كلي احبج ومدري شنو وكالي اتزوجج مدري شنو وانتظر جوابج بالليل
ابتسمت بنان وكالت : صدك ايهم هيج كال ؟
رزان : شبيج لعد اني ليش جيتج
بنان : عرفته يحبج
رزان : شلون
بنان : من جابج فهد وهاي جان واكف وحده يم الباب وصافن عليج وعيونه تلمع .. عرفته يحبج بس غلست
رزان : عزااااااا اني شو مادري
بنان : طبعاً شمدريج اذا هو ممبين ايشي الج
رزان : هم صدك .. بس شعجبه بية شو حتى مريضه و شكلي عادي مو هذيج الحلا
بنان : الإنسان مو بشكله الانسان بشخصيته واخلاقه
وانتِ مو مريضه مو هياتج دتحجين وياي
رزان : بس تجيني حالات
بنان: راح يعالجج ايهم
رزان : يعني هسه انتي شتكولين
بنان : شكول ؟
رزان : شبيج اقصد رأيج لان والله حايرة احس گلبي يدك سريع بس اشوفه مدري شيصير بية .. اخاف منه
ضحكت وكلتلي : خاف تحبي
رزان : مادري ماعرف اصلا اني ما جنت مهتمه اله اعتبره اخوية مثل ياسر وهمام وفهد بس سؤال
بنان : اي جواب
رزان : انتي من حبيتي فهد شنية مشاعرج ؟
بنان : ها ؟
رزان : شنو ها اني شكلت .. دا اسأل عن مشاعر الحب يعني مادري والله هي شلون تصير غير انتِ عايشتها ومتزوجه وصخام بعيني
بنان : شوفي مادري اني والله بس انتي شتحسين
رزان : خرب مااا احس مااعرف شداحس يعني بس ساعديني احس گلبي يدك من اشوفه واريد ابجي مادري ليش
بنان : دكومي استهدي بالرحمن بعدين نشوف هاي السالفه وية ايهم عود احجي ويا .. خلي ننزل ناكل
رزان : شلووون ماريد هسه الكاه جوا
بنان : بس بيبي تريد تشوفج
رزان : مادري شلون هسه
بنان : يابه هي شنو دنزلي والله هاي حلوة علموده متنزلين
رزان : اي اي انتي صيري بمكاني يلا تعاي احجي علية
سحبتني بنان من ايدي : معليج منازله عليه انتي قابل تضلين معتكفه على روحج هيج !
___________
بنان
بعد ما نزلت جوا وية رزان وهاي رزان مكلوبة طماطه اول مرة هي تحجي وياي مثل قبل وتسألني لان هاي الفترة كلش تدمرت نفسيتها
ف لكينا ايهم كاعد يم زوزو وخالة رحاب وديحجيلهم عن الخارج كعدنه يمه سوالفه تونس بس رزان كعدت يم مريم على صفحه
كال ايهم : شوفو اليوم ماعندي دوام بالعياده فشنو راح ادوخكم شوية اتحملوني اصلا سوالفي حلوه مو صح زوزو
زوزو : والله ثم والله اذا كلت زوزو اكسر العكاز على راسك الجنه راس بصل يا ايهم علمود التافهين هذولة بسيطه خل يجي زياد واني اكوله
ايهم : لا يمعوده يا زياد غير نروح خبر كان
بنان : كان واخواتها
ايهم : انتِ الظاهر هم انعديتي
بنان : اصلا شنو انت مجنت هيج من اجيت
ايهم : اي اي صدك وين رزان
انداريت عليها هو رأسا صارت عيونه عليها
كالت زوزو : ها ايهم شتريد من رزان
ايهم : ولا شي
زوزو : ولا شي ها ؟
ايهم : هاي شنو لازم ممصدكتني
زوزو : افكر اصدكك
ايهم : شو كالبة علية
حطت ايد على ايد وكالت : اممممم .. لتكول زوزو والله تعرف شسوي
ايهم : خوش خوش
جتي خالة رحاب كعدت : ما بقى شي نكوم نسوي غدا راح يجون كلهم نبدي نحضر اني وياج
بنان : بكيفج خالة
كمنا نحضر بدينا نسوي بالغدا وفرح جوا ايدناتي تلعب
كالت : عمو فهد ماهوا
بنان : راح لشغله
فرح : لعد شوكت يجي ؟
بنان : بعد كم يوم يجي هههه ليش شتسوين بي
فرح : مادري اليد اشوفه
بنان : عود ندك ونحجي ويا بالتليفون
فرح : اي
كملنا الغدا بعدها رزان ما لكيتها راحت فوك يمكن
منحس غير دخلوا جماعة 39
ياسر و ريم و روان وكل واحد خلقته مكلوبه
رحت ركض عليهم : هاي شبيكم
روان : مادري
ياسر كبل راح صعد ويعيط : هسهه انزل لحد ياكل قبل لا اجي
صاحت ريم : لتخاااف موهنديس ياسر بعدنه ممبدلين حتى يفكر بس بطنه شوفي
بنان : الاكل جاهز دننتظركم احنه وهمام هم بعده مجاي
ريم جرت روان وطكوها بركضه ليفوك وزوزو تصيح : مال الغسل كل وحده بكد الهايشه تركض
بقيت بس اني وحدي صعدت ليفوك على تليفوني دكيت على فهد اشوفه وين صار
جاوبني - ها شلونج
- اني زينه انتَ شلونك ؟ وصلت لو لا
- اي وصلنا
بعدين تذكرت مؤمل يمه محبيت اطول وياه : تمام توصل بالسلامه
- الله يسلمج
نهيت الاتصال بضوجه محجيت ويا زين
رحت على رزان شفت البنات يمها كاعدات وديسولفون
بنان : رزان تنزلين جوا ناكل ؟
رزان : لا ما أشتهي
بنان : ميصير موزين شبيج مخبلة
رزان : ما اريد حبابة لحد يضغط علية
باوعت عليها روان بعصبية وگالت : انتي ضلي ضلي هيجي لحد متموتين
رزان : اوفففف عوفونيييي
أشرت للبنات حتى ننزل نتغدا وجانوا الكل موجودين
اني عرفت رزان ليش متقبل علمود ايهم يمكن
كعدنا نتغدا ياسر كال : زوزو ليش ما اشتريلج تليفون
ايهم : اي اتخيلها تكعد تلعب بي .. شكلها يطلع بيرفكت
همام : دسكت انت ابو بيرفكت اي زوزو شتكولين هاي فكرتي بس ياسر باكها
ياسر : يا حيوان زوزو والله هذا جذاب
همام كرص ياسر : انجب نعال معليج زوزو فكرتي هذا يجذب تدرين بي
ياسر : مدااااااا اجذب والله انتَ الجذاب
عاطت زوزو: ولكم كاااافي دوختوني ما اقبل احد يحجي ع الاكل لا اموتكم بذات انتوا الاثنين همام وياسر يلا كافي
روان وريم يتهامسن ويضحكن
عاط ياسر : على شنووو تضحكن
همام : على محد
ياسر : انجبببب
ايهم : هم رجعنااا
زوزو : رحاب سويلج جارة وي ولدج المخابيل
رحاب : نوديهم يم ايهم تستقبلهم ؟
ايهم : كفيلج الله من اول جلسة انهزم من العياده
_________
ريم
مثل كل مرة جنت كاعده بالغرفه وية البنات ونسولف ونضحك بعدين اجتي كعدت يمنا رزان وكالت
_اجيت أخذ رأيكم بموضوع
روان : يا ستار شنهي
ريم : ايييي شنو ؟
رزان : باعو ما ادري شحجي يعني
روان : دحجي
رزان : ايهم طلع يحبني و هاي شسمه يريد يتقدملي
ريم : احللللللفي !
رزان : والله
روان. : جذب
رزان : والله مداجذب صدك داحجي مدا اتشاقه هو هيج وكالي اريد اعرف رأيج بالليل شسوي اني مداعرف ولهيج ما نزلت جوا
روان : عزاااااا يمةة صدك ؟
رزان : اي اي والله شبيكم بس يعني مادري
ريم : امداج شنو مادري يعني هسه انتي شتحسين
رزان : ما احس
روان : شنو ماعندج مشاعر قابل شبيج بابا يعني نقصد انوا بس تشوفي شيصير بيج
رزان : مادري گلبي يدك سريع وتجيني البجية
ريم : اهمداج يا بجية لج يحبجججج شفايتلي الحجارة العندي تحجي وتصخم بس هذا لا اتكلم لا اسمع لا أرى
رزان : منو مؤمل قصدج
ريم : ايييي لعد منو غير مؤمل
روان : انجبوا هسه انتي شنو راح تردين اله ؟ توافقين ؟؟؟ توافقين وتعوفين تؤامج
رزان : حبابه لحد توترني لا ابجي
ريم : شوف شوف توترني يا توتر عيوني لجججج يحبج ثوووله
روان : اكلج شبيج خبصتينا كلسع وعايطه لج يحبج خل البنية نشوف رأيها شتحس شتصخم تريده لا
رزان : هو انتوا نطيتوني مجال ! حبابة اي وحده منكم تجيبلي مي عطشت حيل مدري شبية
روان : من الخجل عمري
ريم : اني حنزل جوا لعد هسه اجي
فرحت لرزان حيل يمكن اذا تقبل بـ ايهم يغير حياتها ونظريتها وترجع مثل الاول واحسن
نزلت جوا لكيت همام واكف ولازم بطنه وحاط ايده على رأسه .. ركضت عليه وكلتله : همام شبيك !
مجاوبني بس بالكوة لازم نفسه
عيطت عليه : شببييييك همام
طاح على ركبه واتقيئ كلشي
من صدمتي من الموقف معرفت شسوي اله رأسا عيطت بعلو صوتي وبدت دموعي تنزل خوف عليه : يمهههه تعالووو
جوي الولد ركضوا عليه وهو مثل الدايخ ومو واعي على اي شي
رأسا شالوه ياسر وأيهم وركضوا لسيارة وبقوا امي وابوية وعمي يغلطون عليهم لان ما أخذوهم وزوزو تعيط هم وتكول امشوا ودوني
ومحد يعرف وين ودوه اصلا
صرت ادك ادك على ياسر ماكو اخر شي إيست دكيت على ايهم كلت بلكي موجود اني جنت ادك من تليفون بابا عليهم رد علية عاد : الو ها عمو
رأسا كلت : ايهم اني ريم حباب شلونه همام والله صرنا دم عليه وعمو وبابا صايرين اعصاب وحركوا الدنيا ليش ما اخذتوهم وياكم
ايهم : لا لا كوليلهم زين بس عنده التهاب بمعدته
ريم : تمام يلا باي
سديت التلفون وكلتلهم : لتخافون مابي شي هذا ايهم حجى وياي هسه يكول زين بس عنده التهاب بمعدته
كلهم تحمدوا اله وبين عليهم الراحه اباوع لامي تبجي تبجي عليه طبعاااا تحب ولدها تموت عليهم
رحت كعدت يم روان والبنات : اني شلون خايفه على همام .. موقفه صعب كدامييي يمههه ردت اموت واني اشوفه هيجي
بنان : خطية
ريم : اوففف
_____________
ياسر
واكفين بالمستشفى وية ايهم بباب غرفة المكرود همام اللي مادري وين صفى بي الدهر
صحت على ايهم : تعال هيو هذا اخوي شبي
ايهم : هاي فوك متخاف عليه المسكين خطيهه
ياسر : ديلا يلا كافي انجب شبي ؟
ايهم : التهاب بمعدته مدري شنو
ياسر : انت غير دكتور
ايهم : اني طبيب نفسي يا اخي
ياسر : اي ديلا كافي تتفيك
ايهم : شو انجب
ياسر : انتَ انجب .. شوكت نشوفه ؟
ايهم : مادري ديشكلوله كانونه ومغذي
ياسر : شو دوخر هي كانونه تهي بهي وخالني انتظر
دفرت باب الغرفه وفتت عيطت على همام : وكعت كلوبنا حمام عبالي بيك شي
باوعت على همام خازرني شفت بنية دتسوي بالمغذي ترخصت من عدنا وطلعت
فتحت عيوني ع همام : يااا شفت ايهم الي ان شفته ؟
ايهم : يعني لازم يروح بالك بعيد البنية ما سوت شي بس شكلت المغذي اله وطلعت شنو الغلط بالموضوع
ياسر : لك مشفته شلون يباوعلها ها همام هاااااا
عاط علينا بتعب : انجبوا كافي عاد اني بيا حال وانتوا وين اصلا اني ما اتزوج وحده فاهيه مثل هاي
ايهم : ها واني شعليه تعيط علينا ؟
همام : اهووو شبيكم دكافي احس دايخ وانتوا دتلحون علية
________
هُمام
جنت كاعد والدوخه لازمتني وكلسع احس بدوخه وضعي ابدا مو تمام
دخلت بنية صغيرة اتوقع توها متخرجه
ف دتشكل الكانونه الية واني روحي طالعه
شو فجأه ماشوف غير الدم من ايدي صار نافورة
عيطت عليها : هاي شنووو
هي حجت بخوف : انتظر دقايق هسه بس اجيب كطن
باوعت عليها مبين عليها فاهيه
عيطت مرة ثانيه : ضبي ايدج بابا شنو هل فهاوة هاي
رجعت مرة ثانية مخنزرة علية كأنما ما عجبها الوضع وعدلت بيها وانكطع الدم
باوعت علية مرة ثانيه : لتحكم عن الماقبلك من نظرة
همام : بس اني مكلت شي كلت ضبي ايدج
- لا بس كلت شنو هل فهاوة
همام : اي صدك أنتِ فاهية مدا اجذب
- ضل مُصر
بهل أثناء دخلوا الهكسوس وياسر جفص جفصه بكد راسه .. مكدر يتحمل ويلزم لسانه ويكول همام لازم يكول حمام سولة بحلگه خلاني اشوط كدام البنية ادور تونا متعاركين وهذا فشلني
ضلت هي تشكل المغذي وتباوعلي صفح واني ادور على غفلة اريد ازوع
ورا ما حجو ياسر و ايهم ياسر كال بضوجه : دقيقهه امي دتدك علية
طلع ياسر واسمع صوته يلعلع ويخطب كأنما كاعد ببيته وعنده عادي ابد ما عنده مسؤولية
ايهم ورا دقايق كال عمي يدك علية وطلع
كل واحد طلع برا يسولف ضليت وحدي
طبت علية مرة ثانية هاي الفاهيه وتباوع صفح فوكاها معاجبها
واني سبحان الله يعني رايد اتفشل فشلة من هاي الزينه
معدتي كلبت ومتحملت رأسا دنكت راسي بالكاع وتقيأت
جتي علية تركض وشايله كلينس وايدها ترجف ومتعرف شتسوي كالت : هاي لان الدوه بدأ مفعوله ف عادي
حسيت وراها بدوخه فضيعه ردت بس انام
وميت من الفشله ادور هذولة ما همه بگلبي اسب واغلط عليهم وهمه ماكو ردت انتحر بلحظتها
راحت جابتلي مي فوكاها
تشكرتها لان صدك ساعدتني : شكراً الج هواي هواي ومن فضلج تكدرين تصيحيلي الولد الواكفين بالباب
هزت راسها وراحت طبوا علية
كال ياسر : ها همام حلالك الوضع لازم
همام : اكل نعل يا جلب وانت ايهم شنو تعوفوني وحدي تدري انت شصار هسه اكيد لا انتوا بدال ما تساعدوني تفشلوني
ياسر : دسكت لك وانجب شنو نفشلك ترا جنه مخبوصين برا والبيت كله دك علينا يعني برأيك شنسوي هااا ؟
ايهم : هسه انيييي شعلية منبصيني بكل موضوع رحمه لدينكم دكافي مو بزعنا وطكت رواحتنا
همام : هسه اريد اطلع
ايهم : ميصير لازم يخلص المغذي
همام : ارررريد اطلع
ياسر : صار حمام
ايهم : دنجبو محد يطلع إلى أن يخلص المغذي يلا عود
همام : اهوووو شلون شغلة وياكم انتوا اريد اطلع دشوفو مابية شي مااااابية شييييييي
ياسر : لا لا حبيبي أنت مريض .. هو شنو بس خل يخلص المغذي
______
فهد
كاعدين بالحر متجمعين كلنا برا نسولف ؏ الملفات واحد ياخذ رأي الثاني
احنه گ مجموعه نفسنا مؤمل و هادي وحميد و بعد كم واحد من معارفنا
ما احس غير ع مي ينزل ع راسي التفتت شفته مؤمل كاعد على بنيد الهمر ويتمضحك ويجبجب علية
لزمته بعصبية : حيووووان بطل سوالفك هاي
مؤمل : هسه شسويت هي الدنيا حارة
فهد : ولا تتغير
مؤمل : شو وخر وراي شغل انت ماوصيك ضل مسلت عود وعوفني
صلخته على ظهره : دنجب لك
مؤمل : استغفر الله انت شكد نفسية يا اخي الله يساعد هذيج الوحده شلون متحملتك .. هسه فد يوم تهج بليلة ضلمة
هو حجى هاي الكلمات ركض كدامي ويضحك علية ركضت ورا اريد الزمه مينلزم اخر شي جلبت بي وكعتله ضرب ضرب ضرب لحد ما صاح التوبه
مؤمل : حروح اشتكي عليك
فهد : شحدك
مؤمل : دوكف شبيك فهد شسمه يعني ردت احاجيك بموضوع عن الحلال والحرام
فهد : اي احجي مو كدامك اني
مؤمل : شوف يعني مادري تذكر هذيج المرة من كلتلك احب وحده وامي تريد تزوجني بت خالتي
فهد : اي ؟
مؤمل : مو هاي شسمه .. احمم بسم الله شوف اخي العزيز تدري بية اني احبك واحنه عشرة عمر وبيناتنا زاد وملح
فهد : اييييي دحجي هذا الحجي وراه فدشي
مؤمل : اني اريد اتقدم لأختك ريم على سنة الله ورسوله
فتح عيونه فهد : شنوو
مؤمل : شبيك انصدمت تقدمت لأختك ؟
فهد : دقيقه
مؤمل : لتبالغ عيوني
فهد : انجب بس شلون انت مو عساس امك تريد تأخذلك بت خالتك
مؤمل : حاجيتها واقتنعت لان عرفت اختك وهي شايفتها
فهد : دقيقة دقيقة مؤمل ؟ البنية الي انت تحبها هي ريم ؟؟؟؟
مؤمل : لعد جدي غير هي
كفخه حيل وكلتله : الادبسزز العار كدامي تحجي بأختي اني أعلمك لو تموت ما انطيها الك
مؤمل : عوف الشقه ترا دا احجي وياك موضوع جدي
فهد : ما انطيها
مؤمل : لا فهد انجب
فهد : من تتأدب افكر عود والجواب حيكون لا
مؤمل : فهد اموتككك وربك ترا والله إذا متنطيني اختك اخطفها ومتشوفها ونعيش عيشة سعيده وهي تنساكم
فهد : انجب حيوان يحجي ؏ اختي هذيج المرة واحبها وشايفها واني عبالي من كرايبك حيوان مو بيدك بس اصبرلي اني أعلمك
مؤمل : اذا متنطيني اختك ترى افرش واكعد بباب البيت وانام واكعد وعادي انتوا حديقتكم جبيرة يكفي بيها الفراش
فهد : وخر لك وخر شدهتني نعال خل اخلص شغلي واني أعلمك جلببببب يحب اخت ويحجي بيها كدامي
______________
بنان
جان البيت بحالة قلقه ورا ما راح همام وهوسه وخبصه
ورا كم ساعه صارت الدنيا عصر اجوي الولد جايبين همام بالكوة يمشي والكانونه بيده ومغذي وحالته حاله
سلمنا عليه وأخذوا خوش رزاله من عمو محمد وعمو زياد وزوزو كاعده بالعكاز تضرب بياسر
اخر شي ريم جانت يمهم كاعده
اخذت البنات لغرفتي وكعدنا نسولف
رزان كالت : اني خايفه هو يريد جوابي بالليل شلون !
روان : وافقي
رزان : شلوون اوافق احس نفسي ضايعه
باوعت لرزان وكلتلها : رزان باوعي عليه .. من وجهة نظري اني اكول لازم توافقين اول شي ايهم انسان مثقف وجبير ودكتور يعني يكدر يساعدج واكو امل تكملين دراستج وهو كلج هذا الشي هو مو قاصر ابد وهم حلو يعني وشخصيه بس هذي وجهة نظري اني وبس
روان : والله اني اكول مثل مكالت بنان يعني وجهة نظري مثلها
رزان : بس شلون اني استحي اكوله شنو وين احنه حتى اجاوبه اني استحي .. ياريت لو بابا وماما عايشين
بنان : لتكولين هيج راح ابجي .. اعتبريني اني امج واني اروح احجي ويه ايهم
رزان : لا شلون
روان : لا اني احجي ويا ترى عادي
بنان : اثنينه نفس الشي
بنان : روان بقى شكد لأخير السنه
روان : هاي كم يوم حنداوم هيج 3 ايام ورا اسبوع امتحانات اخير السنه
بنان : شلونها درجاتج ناجحه لو لا
روان : لا زينه احسن من بداية السنه
بنان : تمام
رزان : بنان سؤال
بنان: كولي
رزان : اني حلوه ؟
بنان : تخبلين
رزان : احس نفسي محلوه
بنان : ولج شنو محلوه غير تموتين شوف العيون والشعر كل هاي ومحلوه
رزان : ما ادري دافكر شعجبه بيه مثلا يعني وهم شغله اني مريضه يعني هواي حيلكي صعوبه ويايه
بنان: لو صدك ميريدج جان مكلج بس مبين يحبج ولتفكرين هيج تفكير تمام انتِ كُلشي مابيج خوش وفتره وتعدي وترجعين مثل الاول واحسن هم وانتِ افضل بس يرجع تروحين وتحجين وياه وتفهمي
رزان : تمام
_____________________
روان
بعد العشا الي محد تعشا بس كم واحد من عدنا بسبب همه مقهورين على همام
كل واحد نفسه مسدوده الا ياسر يكول عرج ميطخه
ورا ما خلصنا صارت الدنيا ليل ف صعدنا فوك كل واحد لغرفته
غرفة ياسر والولد بصفنا ف شافني وهو مبتسم تقرب علية زايد : عبالج نسيت سواية اليوم
روان : شنو يا سواية
ياسر : يا يا خطية يا عيني
روان : هااا ألمي اي ليش شكو ؟
ياسر : ماكو شي ..هيهيهي تغارين علية بس صبري اني اعلمج اطلعها بيج سالفة ألمي
روان : عوف سالفة ألمي عبالك نسيت سالفة الخمسميه
ياسر : عمي عوفي سالفة الخمسمية والرقم مال يوسف العندج
روان : يا طلابة يوسف المتخلص
ياسر : اي مدا اجذب ترى
روان : خطية متجذب
ياسر : اي صدك شلونج
روان : زينه وانتَ
ياسر : لا زين اليوم اني
روان : ليششش مو همام خطية
ياسر : يا حمام بابا .. شوفي روان يعني اريد اكلج شي
روان : اي شنوو ؟
ياسر : اني بس اتخرج ترى اخطبج معلية سادس ووزاري صخام مالتج معلية خوش ؟
روان : لا والله منو يكول اني اقبل
ياسر: تقبلين لا اكسر راسج
روان : اوي عنيف كلش
ياسر : لا والله
روان :. لاصدك ياسر شنو ازوج اني وراي سادس عفية وين اكدر
ياسر : شبيج بابا غير هاي شسمه يعني اقريج اني هم كولي ياسر ميفهم
روان : لا والله تفهم زين انت حتى افتهمت عليك
ياسر : احمم اي عمي طبعاً
روان : اهووو رجعنا للغرور
ياسر : عمي واني شحاجي
روان : بطل عمي عمي عمي عمييييي شكد تكول عمي ياسر شكد
ياسر : ها يعني متحبيها
روان : لا احبها حيل هم
ياسر : لعد لتحجين عليها عمي هي الحياة هي الاستقرار
روان : سخيف وخر خل افوت لحد يجي يشوف التفاهه هاي مالتك
ياسر : هيهيههييهي اي فوتي ليش لاا
ابتسمت اله : اي ديلا روح خاف يشوفنك
ياسر : احبچ طركاعتي
روان : مو بكديييي
ياسر : يمههه گلبييي مدا اتحمل روان انتِ متأكده هاي أنتِ
روان : لا الجني وووووو
ياسر : روحي روحي احبجججججج
ابتسمت اله ورحت
_________________
رزان
جنت كاعده بالصاله نزلت جوا حتى اكل
شفت ايهم جاي علية كلت هاهيه رزان اقري على روحج السلام .. غصيت باللكمه كدامه وضليت اكح
وهو يكول : اسم الله اسم الله
ارتبكت من وجوده توقعت بنان راح تحجي وياه
جابلي مي شربته وكلي : ها شلونج
من كلي شلونج ضحكت : شلوني يعني شوفة عينك
ايهم : هم مشتهيه باچه
رزان : اي اكيد بكل وقت اشتهيها
ضحك وكال : تمام
ضلينا لدقايق ساكتين كلت اللههه غلس
ورا شوية كالي : ما فكرتي ؟
باوعتله بتوتر وكلتله : مادري يعني
ايهم : رزان اي لو لا ؟
رزان : شوف يعني اني حجيت ويه خواتي وهاي بس يعني ما اعرف شكول
ايهم : شتكولين ما كلتلج احجي علم الذرة بس ( اي لو لا ؟)
كلبي نبضاته تسارعت اباوع على وجهي عركت ضليت ساكته هو ايس عباله ما قبلت توه يريد يكوم حجيت والدموع بعيني : اي موافقه اني
ابتهج وجهه وكام يضحك والا شوية احسه يريد ياكلني
وضل يحجي وياي : والله احبج انطي فرصه لنفسج أنتِ اصلا متعرفين ايشي لحد الآن .. اعيشج أميرة والله
دموعي نزلت وكمت ابجي : مادري ايهم مادري شلون اقبل شلون اتزوج احس الماضي وكلشي صار وياي وين ماروح بعقلي ماما الهام والذكريات وحتى جمال وفراس
كلشي وفوكاها قبل يومين شصار احس اريد اكطع روحي ما اريد اعيش
باوعلي وكال : مو كلتلج الصبح .. اني راح اعوضج عن كل اللي راح وكل الي فات وكلشي صار وياج نصلحه
الدنيا متوكف على بشر لو على فد شي معين
شال ايده وبدا يمسح بدموعي : كافي يلا لتبجين اهم شي عرفت ردج
هو سوا هاي الحركه رأسا فلتت صعدت فوك واسمعه يضحك واني دموعي تزيد حتى رجلية مكدر اشيلها
______________________
بنان
كاعده بالغرفه وصافنه ومفتقده فهد ودافكر عن الي حجاه ويايه ومداصدك معقوله يحبني زين اني احبه هم بس ليش مداكدر احجي ليش اكو شي مني يرفض هل فكره لحد ما شفت اجاني اتصال من
"فهد" جابوته وگلت
_ ها هلو فهد
فهد : مشتاقتيلي
بدون ما استوعب گلت : اكيد شلون لعد
فهد : يمهه الحُب يمهه متكدرين بدوني
بنان : هاا شنو
فهد : سلامتج ديلا فتحي كاميرا خلي شويه اتأمل واخذ طاقه من شكلج الجميل
كمزت وگلت : لا لا
فهد : ليش
بنان : مو هسه حالتي حاله ومكفشه
ضحك وگال : القاضي راضي معليج خلي اشوفج
بنان : مو فهد
فهد : انجبي وفتحي
بنان : يلا حفتح امري لله
فتحت وجان يتلكاني بأبتسامه وگال
_ الله دباع الجمال
نزلت راسي وضحكت وگلت : فهدد
فهد : اووي استحت
بنان : يلا هاك هياتني مو شفتني يلا هاهيه اريد انام
فهد : اي نامي احد لازمج
بنان : اي لعد يلا خلي اطفي الكاميرا
فهد : لا عيني لا خلي الكاميرا گبال وجهج ونامي
بنان : شلون صايره هاي
فهد : جذب بويه ولي نامي هوه انتِ تذكرين النوم بس تشوفيني الي يسمعج يكول اني مو نوم
بنان : لاا بس مو نعست
فهد : يلا هينه روحي نامي ويصير خير بعدين تعوضيني بسيطه دخلي ارجع
بنان : مفتهمت
فهد "غمز" وگال : بعدين تعرفين
وسد الاتصال ورها گبل رحت لفيت راسي ونمت
_______________________
ورا منمت كعدت الصبح مثل كل عاده اعرف روان وريم ياخذهم ياسر بس هل مرة ع رزان جتي علية تبجي
بنان : شبيج ولج ليش تبجين
رزان : وافقت البارحه على ايهم
ضحكت وكلتلها : خربببب دباعع هسه تبجين علمود قبلتي
رزان : مادري لان كلتله اني احس فشلة والله
بنان : دكعدي لج يا فشلة هو شوكت يتقدم رسمي
رزان : لج مادريي
بنان : لعددد شتدرين
رزان : مادري والله يعني اني بس قبلت هو غير هل ايام يحاجي عمو محمد
بنان : هم صح
رزان : لو ابوية موجود جان راحله
بنان : اوف الله يرحمه .. هسه بس يجي فهد اكوله ياخذنا على ماما الهام ولأهلنا لنجف
رزان : صدككك
بنان : اي والله فهد ميقصر ياخذنا
رزان : اي
بنان : هسه يلا اسكتي ليش تبجين مو وافقتي
رزان : خايفه
بنان : ليش تخافين لج افرحي ايهم يحبج ومدام يحبج انسي كل هل خوف هذا تمام
هزت راسها : زين شلون
بنان : استغفر الله رزان والتالي وياج
رزان : اوي شبيج يلا هاهيه .. هو خما موجود جوا؟
بنان : قبل شوية تريكت ما جان موجود
رزان : يعني بالعياده .. اوففف احس مادري استحي اذا اشوفه
بنان : ههههههَ عادي عيوني عادي
بهاي الأثناء دكت خاله احلام علية
استغربت اتصالها صارلها هواي مداكه : ها خالة شلونج
- زينه الحمد لله خاله انتوا شلونكم روان شلونها
- كلنا زينين " استغربت سؤالها بالذات عن روان "
- شلونكم انتوا بيبيتكم وام فهد
- الحمد لله
- اكول خاله هي روان هسه بالمدرسة مو؟
- اي خاله
- شوكت ترجع ؟
- ليش خالة رايده منها شي ؟
- ها لا والله بس هيج دا اسأل .. احنه راح نجي
- صدك هلا بيكم
ضلينا نسولف قرابة نص ساعه وسديت الاتصال منها واني مستغربة شتسوي بروان
بعدها نزلت اني ورزان نسوي غدا وية خالة رحاب وبهاي الأثناء جوي روان وريم وياسر وياهم يمشي ويقلد عليهم
وراهم اجه همام نفس التصنيف اليومي وزوزو كاعدتلهم ع الوحده
ورا ما تغدينا اندكت الباب طلعت جاية خالتي رحبنا بيها بس الي انصدمنا من عنده انوا مجاية وحدها جاية وية اخوانها يعني اخوان ماما الهام جانت عركه بيناتهم وميحجون وية ماما الهام وابوهم و اثنين من اخوان ابوهم
كلنا انصدمنا رأسا عمو محمد أخذ الولد كلهم للصاله
والنسوان ضلينا بالهول يم زوزو .. حتى كوثر بنتها هم جاية
ضلت تسولف ويانه ومواضيع عاديه وكلسع روان تهمس : هاي شعدهم جايين
بنان ؛ مادري والله علمي علمج
ريم : شو هواي جايين
رزان : يمةة خفت خاف صاير شي
روان : كضيتي عمرج خايفه
اخر شي كالت خالة احلام : روان حبيبتي شلونج
روان باوعتلنا ب استغراب وردت : تمام الحمد لله
حجت احلام : اني ما اريد اطول الموضوع اكثر من هيج اني جاية اطلب ايد روان لـ ابني يوسف ..
نهاية البارت
يتبع ..
(لاتنسوا التصويت)
7.nldn حسابنا الانستا
أن شاء الله يعجبكم البارت 💖 .
إلى اللقاء يا أعز العابرين في قلبي ♡.
الكاتبات دينا & نور
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!