مُغرَم بشعرُك الاسود،
و أهوىٰ عيونكِ
و عُقدَة حاجبيَك،
و ضحكتُك القَمرية
مُغرَم جداً .
>>>>>>>>>>>>>>>>>
بنان
كعدت من النوم احس نفسي تلعب كمت بسرعه للحمام تقيئت شفت وجهي اصفر غسلت بس احس بطني دتتأكل وگلبي كام يوجعني واختنكت حيل رحت للغرفة حتئ اجيب الدوه فتحت لكيت فهد نايم رحت حتئ اخذ الدوه لكيته خلصان ما اكدر اكعد فهد حتئ اكول اله بعد الي سواه وبعد متحملت اختنكت حيل ومنا بطني دتأذيني ..
لبست بسرعه گلت قريبه صيدليه وما اتأخر طلعت بسرعه گلت اجيب علاجي وارجع قبل ميكعدون
طلعت واني رجلي ما اعرف شلون حاملتني بالكوه دامشي يمكن الي يطخني هسه اتخربط عليه وصلت تقريباً يم الصيدلية وبعد ما اتحملت انتهيت حتئ مشي مداكدر امشي و الشارع بي ناس بس قليل
كعدت علئ رصيف بس اريد اخذلي نفس احس الهوه نكطع ومنا بطني دتموتني كمت ابجي علئ وجع بطني وخايفه ليصير شي بأبني ودابجي علئ ضيم الي اني بي ...
اباوع علئ الناس تمر مني يمي تباوعلي بس محد اجه لحد ما اشوف اجت مره جبيرة بالعمر وگالت
_ شبيج كاعده هنا ودتبجين
باوعت عليها واني ابجي وبالكوه احجي وگلت : خاله بطنيي دتوجعني ومداكدر اتنفس
_ ليش شبيج وشطلعج من الصبح اهلج وين
اتنفس بالكوه گلت : خاله اجيت داجيب دوه بس متحملت ، اهخخ بطنيي
اجت كعدت وخلت ايده علئ راسي وطلعت مي وشربتني وكامت تغسل بوجهي وگالت
_ ماعندج رقم احد من اهلج
الآلم زاد عندي وگمت اكول : اهخخ بطنيي يمههه مداتحملل
_ شبيج انتِ حامل ؟
هزيت راسي وگلت : ايي
_ صخام خاف الطفل راح ولج
هيه گالت هيج ولزمت بطني وگمت ابجي بالزايد وگلت : لاا شنو راح يمههه ابني
_ ولج هسه رايح اكيد زين اكو دم دينزل منج
بنان : ما ادريي ما ادريي
_ شلون قهر هذا هسه ما عندج رقم من احد اهلج موبايلج وين
بالكوه اتنفس وگلت : موبايلي موجود بس مابي شحن
_ يعني اكو وحده تطلع بدون شحن وزوجج وين شلون يخليج تطلعين وحدج
احس عيوني حينسدن ودوخه قويه صارت عندي جان تكول
_ ولج لتنهمدين هسه ما حافظه رقم احد من اهلج
بنان : لاا
_ هسه هاي شلون سالفه كومي كومي تندلين بيتكم وين
بنان : ما اكدر امشي
لزمتني حيل من ايدي وگالت : لعد جان بيج حيل من طلعتي وحدج
تأذيت من لزمتها بس مجان عندي قوه اسوي شي گلت
_ خاله دتأذيني
_ هسه شلون سالفه هاي
حسيت نفسي راح يغمئ عليه شو ما اشوف غير فهد اجه يركض عليه بسرعه ورها محسيت علئ شي
________________
روان
نزلت وگلت الهم الكل كام يدور مره ثانيه وفهد تخبل وصار يعيط ويكول
_ شلون بيها اني شلون كم مره كايلها لتطلعين وحدج وين راحت هسه
زوزو : علئ كيفيك يمهه ضغطك ليرتفع
فهد : راح تخبل والله وين راحت هايي
ياسر : يعني انتو دورتوا ملكيتوها
روان : اي والله دورنه بس ماكووو بنان
فهد : زين محجت گالت حطلع هيج مكان حروح
روان : لا
بسرعه راح صعد فوك ونزل اخذ سويج السياره ديطلع رادوا يجون ويا الولد بس مقبل جان يكول ياسر
_ زين خلي اروح اني وياك
فهد : تعال ياسر
اول مسمعت هيج بسرعه رحت ركض صعدت فوك اخدتلي صايه من صايات ريم ورحت لحكتهم
ياسر : شكو وين؟
روان : عفيه خلي اجي وياكم
ياسر : وين تجيننن روان
روان : عفيه ما اتحمل اضل
ياسر : هسه نجي نجيبها شعندج جايه
روان : مااا اريد اجي
ياسر : ماكووو
روان : شبيك ياسررر اريد اجيي
جان يعيط فهد بصوت عالي وگال : وينكك ياسررر
ياسر : مو هاي تريد تجي
فهد : هسه اني بيا حال وانتو جاي تتعاركون
روان : اريد اجيي وياكم عفيهه
فهد : هسه خليها تجي واذا تعاي روان
بسرعه رحت صعدت بسياره وياهم مشوا وكُل الطريق فهد بس يعيط ويكول
_ بس لو اعرف وين راحت شكد احجي اكللها لطلعين لتروحين بس ميفيد ميفيد اعناااد
ياسر : بس اعصابك هسه نلكها وين تروح قابل
فهد : شنو اعصابي شنوو هاي مو اول مره سويها واصلا هيه ما ادري صاير شحجي وياها وخر فهد وخررر
اباوع عليه صاير اعصاب واني كُل بالي يمها وين راحت و هيه منا حامل طول الطريق واني اقرا ايات بگلبي ..
فهد : ويم الكيها هاا وين الكيهاا شلون بيها اني شلوننن حتخبلنييييي
ياسر : عمي بسس اعصابك
فهد : انلصم هيه ضلت اعصاب صار بيها شي اني بذاك الوكت وين انطيي وجهي هاا وين انطيييي
روان : هيه اصلا من بارحه بليل جانت ضايجه ما ادري علئ شنوو وهسه ماكوو خاف صار عليها شي
ياسر : هسه شبيكم متشائمين تفائلوا
دنمشيي وجان اباوع علئ طريق جان المح بنان وبصفها مره جان اعيط
_ هياته هياته
ياسر : شكوو
روان : هذيج مو بنان ذيجه بنان
فهد : وينهاا
روان : ذيجهه
وكف السيارة بسرعة فهد ونزل ركض واحنه وراه اول مشفتها جانت كاعده علئ الرصيف اول ماوصلنه لكيناها مغمي عليها ..
راح فهد بسرعة عليها كام يرش عليها مي بس ماكو مدتصحئ بسرعه شالها وسئل المره بعصبية
_ شبيها ليش هيج
_ واني شمدريني اول مشفته هيج وجانت تبجيي
بسرعه راح فهد اخذ بنان وراح يركبها بسيارة جان تكول هل مره
_ شنو جانت مهزومه من رجلها يمهه يمهه بنات هل وكت ينخاف منهن
اباوع عليها احنه بيا حال وهاي هيج تحجي جان اريد عليها بعصبية
_ انتو شنو شبيج شكبرج صيرين وتحجين هيج علئ العالم بدون متعرفين شبيها وتحللين بكيفج هاا
_ شلون السان زفررر واحنه شكلنهه قابل
روان : هوه شنو شكلتي البنيه حتموت وانتِ جاي تحللين بكيفج متخافين الله تقبلين هيج ينحجيي علئ بناتجج
_ قابل بناتي يطلعن بدونن رجولتهن
روان : وانتِ شعليج طلعت وي رجلها وحده شعليجج شدخلجج تحللين بكيفج شنووو
ياسر : شكوو روان شديصير
روان : دشوف هاي شلون دتحلل صدك ناس متستحي
_ واحنه شحجينه وياج كبيتي عليه علمود حجينه الصدك بس هوه مو صوجكم صوج الي وكف يمها
_ ما اكول غير حسبي الله ونعم الوكيل عليج تمام
ياسر : تعاي روان عوفيهاا
جرني وبسرعه رحنه بسياره وخليت راس بنان علئ بحضني واباوع عليها وجهها اصفر انعصر گلبي عليها ..
وفهد بسرعة صار يسوق جان يكول ياسر
_ توديها للمستشفئ موو
فهد : اييي لعد وينن ، روان مصحت
روان : لا بعدها مغمي عليها اووف يربي شلون قهرر
الطريق كُله محد حجه شي بس انتبه علئ فهد عيون صارت حمر بوياي بس يصير عصبي ميتحاجه ..
وصلنه للمستشفئ فهد شال بنان وصار يركض بيها واحنه وراه نمشي جان بسرعة يدخلوها للغرفة واحنه ننتظر بره ..
راح كعد علئ الكرسي وحاط ايده علئ راسه و ياسر يفتر بس واني كاعده ادعيلها بگلبي ..
لحد ما طلعت الدكتورة وراح گبل فهد عليها وگال
_ شلونها دكتورة شبيها
_ انتَ زوجها ؟
_ ايي
_ صارت عدها مضاعفات و هسه شكنالها مغذي وحسجللها ادويه و خلي تتغذئ زين لان اذا تضل هيج طفل راح تخسره وهيه منا عدها قلب
فهد : خوش بس طفليش هذا ؟
_ ليش متدري زوجتك حامل؟
فهد : حامل ؟
_ اي حامل واليوم رادت تخسره لو ما تلاحكتولها ومنا عدها قلب هيه و موزين وهسه هيه بداية الحمل فلازم يثبت الحمل فأهتموا بيها اكثر
فهد : خوش دكتورة زين الحمل يأثر عليها وهيه منا عدها قلب ؟
_ حاليا لا ميأثر بس لازم تهتمون بيها اكثر حتئ متنعاد هل شغلة
فهد : زين مستقبلاً يأثر ؟
_ لا بس اذا تكرر هل شي يأثر اكيد ولازم تلتزم بالعلاج و لتتحرك هواي ولتعب نفسها حيل
فهد : اكدر اشوفها هسه
_ اي عادي حتئ تكدر طلعوها
فهد : خوش
اندار عليه فهد وگال
_ تدرين بنان حامل ؟
روان : ايي ادري
فهد : خوش
راح ديفوت فهد ردت افوت وياه جان يكول
_ بس احجي وياها شويه ورها فوتي شوفيها
روان : تمام عادي
راح فات عليها واني رجعت كعدت جان يجي ياسر يكعد يمي ويكول
_ لتنقهرين مابيها شي
روان : اييي
ياسر : بس شنو هسه بنان حامل؟
ابتسمت وگلت : ايي عيني حامل حصير خاله اني
ياسر : العبب بوييهه واصير عم انيييي
روان : عساس مصاير عم انتَ
ياسر : حتئ لو بس هذا ابن الغالي
ضحكت وگلت : وفرح مو بت الغالي
ياسر : لا هاي اكيدد بس ابن فهد غير يعني هذاا اصلاا مجنه متوقعينن يزوج
روان : الله اتخيل يجي و يصيحلي خاله
ياسر : لو هيج الخالات لو مينرادن والله هنياله علئ هيج خاله بس هل خاله الطركاعة دمرت عمَ
روان : ليش مو عمَ دمر خالته بس تدري والله شعور حلو اصير خاله
ياسر : ايي عمي تلحكين صيرين خاله وعن قريب ام
روان : لا يمهه ما اريد جهال
ياسر : ليش ؟ اتخيل يصير عدنه بنوته ياعمي وتطلع عدها نفس كفشتج لا لا هيج اكلها اكل
روان : تدري حتئ اني اريد تجيني بنيه
ياسر : اييي عن قريب عن قريب
روان : شووف شوفف صحح انيي اريد يصير عندي بنيهه بسسس ما اخلف هسه تمام
ضحك وگال : نشوف عميي
روان : ليش تضحكك
ياسر : لا مضاحك بس داتخيل شكل بنتنه ام كفشه مثل امهاا
روان : صاير هواي تتخيل انتَ
ياسر : هوه اكو احلئ من تخيلات وخاصة اذا الموضوع بي انتَ
ابتسمت وگلت : لعد اني هم خلي اتخيل ، اتخيل تجينا بنيه وتخبلها انتَ
ياسر : ليش عمي شايفتني مخبل
روان : ليش حاسب نفسك عاقل انتَ ؟
ياسر : لاا و انتِ
روان : اني هم
ياسر : لعد الله يساعد جهالنه
روان : اي والله بس شوف ترا اني ما اتحمل هوسة الجهال اني بلكوه متحمله نفسي ومتحملتك
ياسر : لا لا تتحمليهم بذاك الوكت يصيرون اعزاز ذوله جهال ياسر عمييي
روان : بعدنه ممزوجينن وشوف تفكيرنه
ياسر : احبچ " طركاعتي "
روان : احبك " اميري الوسيم "
ياسر : لا هيج ما اتحمل
روان : اشو احنهه اخذنه الواهس ترا بالمستشفئ احنه
ياسر : سكتي لعد سكتي واني خلي اروح انشر الخبر
روان : يا خبر
ياسر : غير حصيررر عم خلي اروح انشرهه تأخرت
روان : انتَ مو عاقل تدري
ياسر : من زمان طركاعتيي
______________
بنان
كعدت ولكيت نفسي بالمستشفئ وشاديلي مغذي احس بعد اكو وجع بطني بس احسن من الصبح ..
كاعده وحاطه ايدي علئ بطني وجان يدخل فهد راح كعد وگال
_ شلونج هسه
دمعت عيوني وگلت : زينه
فهد : اي بس يخلص المغذي نطلع
بنان : اييي
اباوع عليه صافن عليه وبعيونه احس عنده حجي كومه وعتب هواي جان يكول
_ طلعتي حامل ؟
اني جانت دمعة مغرغره بعيني وهوه حجه هيج جان تنزل دموعي وگلت
_ ايي
فهد : منو ابوه ؟
باوعت عليه بصدمه وگلت : شنو
فهد : داسئلج منو ابوه ؟
بنان : شبيك فهد شنو هل سؤال
فهد : ما اتوقع سؤالي بي شي جاوبيني يلا منو ابوه؟
بجيت وگلت : غير انتَ
اباوع عليه خله رجل علئ رجل وگال
_ صدك والله ؟ اني ابوه زين شنو موقعي واني اخر واحد يدري بحملج
سكتت مجاوبته جان يكول
_ ماعندج جواب مو ؟ خوش زين شنو هاي الموده الجديدة طلعين بدون متكُليلي متحسين زادت عن حدها هاي العادة
بنان : اختنكت و گلبي كام يوجعني فردت دوه فرحت اجيب من الصيدلية
عاط عليه وگال : حلوو وتحجيها بكُل صلافة زين اني شكايلج مو متطلعين وحدج مو كتلج شتريدين تكليلي اكثر من مره دتكرر هل شي بس انتِ مو مال واحد يحجي وياج عدل
باوعت عليه بنظرات تعب وگلت : ما اريد شي منك
فهد : متريدين شي مني موو خوش نشوف اريد افتهم شي ثاني شنو بليلة ويوم تنكلبين عليه شمسويلج اني
بنان : ممسويلي شي بس عوفني
فهد : هسه مو مكان الصح حتئ نحجي بي بس كُلشي بوكته حلوو بس اني اكلج شي راح تخسرين هواي
يحجي وكأنوا ممسويي شي معبالك قبل كم يوم جان يراسل ببنيه جاوبته وگلت
_ لتخاف ما اخسر
ضحك بأستهزاء وگال : يصير خير بنان خلي نرجع للبيت
درت وجهي عنه وگال
_ يلاا مضل شي ويخلص المغذي ونطلع
سكتنا بس هوه كاعد ومخنزر عليه ورها طلع واجت روان يمي
روان : شلونج والله خفت عليج
بنان : زينه مابي شي
روان : وين جنتي وليش طلعتي وليش لكيناج فاقدة الوعي بشارع
بنان : گلبي كام يوحعني ومنا بطني داشرب دوه مالتي ملكيته فطلعت اجيب من صيدلية
روان : وهاي سوايه سويها طلعين وحدج زين كولي الـ فهد
بنان : ما احجي وي فهد اني
روان : عوفي زعلانين متعاركين طبكم مرض بس كُليلي اكعد ياسر احد من الولد
بنان : بعد صار الي صار
روان : شهل البرود بنان صار عليج شيي ولو هوه صار اصلا لكيناج متخربطه
بنان : عوفيني روان كافي عفيه والله تعبانه
روان : فهد شحجه وياج
بنان : محجه شي
روان : اني عبالي حجه شي رزلج ونوب هوه صاير اعصاب طخينهه ينفجر بيج والله خوب مو هوه صار عصبي بالسيارة اخاف اصلا اشارك بالكلام او احجي شي
بنان : اييي
روان : بس لو شوفين شلون تخبل بس ملكاج شكد خاف عليج
بنان : ايي
روان : شبيج ايي ايي
بنان : روان بس عوفيني شويه والله تعبانه
روان : تمام
بقت شويه يمي لحد ما خلص مغذي اجتك دكتوره كال تكدر طلعوها ..
فأجه فهد حتئ يكومني گلت
_ ميحتاج اني اكوم
خنزر وگال : معليج
ديكومني دفعت ايده وگلت : كلتلك اني اكوم ميحتاج
لزم ايدي حيل وگال : لتعاندين خوش
كومني وعدلي الشال واني كله گالبه وجهي جان يلزم ايدي حيل وگال
_ تكدرين تمشين ؟
بنان : ايي
لزمني حيل وكام يمشيني حتئ نطلع اول مطلعنه ركبنه بسيارة كلنه وجان ياسر يكول
_ هاي شلونج مرت الغالي
ابتسمت وگلت : زينه
ياسر : علئ الخيرر عميي تربئ بعزكمم ودلالكم وكون يشبه عمه ياسر
فهد : اذا يشبهك لا عزلنهه
ياسر : ليش عيني شبيه اني اشو اخبل مو هيج روان
روان : لا
ياسر : طاحضج
فهد : ديلا كافي عسئ شيطلع خلي يطلع اهمشي صحته زينه
ياسر : ايي هوه تاليها يطلع اجلج املح مثلك
فهد : وشبيه انييي
ياسر : صاك مصكصك صكصوك
فهد : اي عبالي
روان : لااا هسههه يطلعع الطفل حلووو مثل امه وخالته
ياسر : اييي عيني تخبلونن انتووو منو بجمالكم
ما اشوف غير فهد خزر ياسر وگال
_ هاي عليمن يخبلون؟
ياسر : شنو منو شكو
فهد : منوو الي يخبلون بضبط؟
ياسر : هااا ايييي قصدي علئ روان
فهد : عباليي ، وحتئ روان متحجيي هيج عليها خوش ما اقبل هاي بنت عمييي
ياسر : لا سيدي بس هاي مرتي مستقبلية
اباوع علئ روان صارت متعرف وين تودي عيونها من الفشله جان يكول فهد
_ ومنو گال انطيها الكك هاي بنت عمي واختي الصغيره وعزيزه عليه ما انطيها الك
ياسر : ليش عيني ااني ابزز مثلاا
فهد : لا بس ناقص عقل
ياسر : هاا هاي منتهين منهااا عميي
فهد : من دنعل ابو عمك مكافي عمي عمي عمي شتحجي عمي عمي
ياسر : ومن دنعل ابو ابوك مكافي بويه بويه بويه كلسع تكول بويه
كفخه فهد وگال : ولك هاي عليمن دهلي نرجع واعلمك شلون تغلط بعد
ياسر : هسه انتَ مو غلطت علئ عمي شني وحد اني
فهد : اني اغلط اي وثاني شي اني غلطت علئ حدي مو علئ عمي
ياسر : واني هم غلطت علئ جدي
فهد : انجب انجب كافييي
اباوع عليه شلون يشاقه واني كل ميباوع عليه من المرايه خازرنيي ..
وصلنه للبيت هوه هم اجه سندني جان اول منفوت لكيناهم كلهم كاعدينن بصالحه بسرعه كمزت عليه رزان وحضنتني
_ يمهه بنان خفت عليج هواي
بنان : مابيه شي حبيبتي لتخافين
رحاب : هاي شبيج يمه وجهج اصفر شبيج وين جنتيي
جرني فهد كعدني وكعد يمي وگال
_ مابيها شي بس تعبانه شويه هيه
زوزو : ايي سمعنه بيج حامل صدك
بنان : اييي
فهد : هاي شنو بسرعة وصللكم الخبر
همام : غير انتَ مو خابرتنه محجيت واحنه عرفنه
فهد : شلون عرفتوا
ايهم : من ست يسرئ
فهد : شبساع لحكت تنشر الخبر
ياسر : موهبه هايزمو ياهو جان عنده
همام : شلون موهبة عاد مكيف عود
ياسر : غويرين
زوزو : ايي واخيرا حشوف جهال فهد قبل ما اموت
فهد : عمرج طويل زوزو ليش هل كلام
زوزو : اي يمهه هاي دنيا .. وانتِ عيني بعد ماكو حركه وما ادري شنو واكل العصفور تعوفيي اكو بطنج روح
هزيت راسي وسكتت
بعدين اجوي باركولي علئ الحمل بس تفاجئت محد سئلي وين جنتي ... ورها فهد اخذني وصعدني فوك حتئ ارتاح
ورها راح طلع ملابس اله وراح يسبح بهل اثناء احوي البنات يمنهه وريم اول مفاتت هلهلت
_ كليليلوووووش
بسرعة خليت ايدي علئ حلكي وگلت : ولج فهد هنا بالحمام
ريم : ديلا عادي بس باعي من هسه انيي اسميي الطفل
روان : لا انييي
رزان : شنو واني اريد اسميي
ريم : ماكو اني عمتهه
رزان : واحنه خالاتههه
روان : انتن معليكم اني اسمي
بنان : ولكم كافيي
ريم : اني اسمي موو
بنان : الله كريم
روان : مااا شنو اني اريد اسميي
بنان : هوه اني حجيبه وانطي الكم تربوا تحفضوا تسبحون ترضعوا
روان : لاا اني كلت اريد اسمي بي معليه بي
ريم : متفقنه هيجج شعليه بي ابنج لو ابنيي اني بس اسمي
بنان : اي لعد ماكوو الي حسمي سوي كل ذنيي
رزان : عوفيج منهم انتِ سمي بنان
بنان : هسه خلي يجي
ريم : هسه انتِ ولد بنيه بيج
بنان : بعد مو هسه يبين
ريم : اممم اني ما ادري احس بيج ولد وهاا احساسي ميخيب
روان : لا لا اني احس بنيه ب
رزان : لا ولد احس
روان : بنيههه
ريم : ولد بيها ولج اني اعرف احساسي ميخيب
بنان : هسه كافيي شيجي انعم الله ميهم
رزان : انتِ شتريدين
بنان : اي شيي
رزان : لا احجيي
بنان : ما ادري والله اي شي
ريم : زين انتِ حاسه ولد لو بنية
بنان : شمدريني بعد
ريم : شنو بعد
بنان : شبيكم بنات ما اعرف ما احس شيي
روان : عديمة احساس
بنان : صدك بنات اول ما اجيت محد سئلني وين جنتي ليش؟
ريم : مو ها فهد خابرنه وكال لكيتها و كاللنه عود هوه بليل كلج روحي للصيدلية وصبح نسهه انو هوه كلج تروحين وبعدين لكاج متخربطه
بقيت مصدومه وگلت : هوه هيج كال
ريم : ايي
رزان : بس تفاجئت شلون يخليج طلعين وحدج حتئ خاله وعمو عاتبوا
هزيت راسي وسكتت
ريم : تعالوا بنات خلي نطلعع عيب هسه يطلع فهد من الحمام
بنان : واذا ضلوا
روان : لا عيني صدك عيب خلي نخليكم علئ راحتكم " وغمزت "
بنان : طايحة الحظ
طلعوا البنات واني بقيت كاعده لحد ما طلع من الحمام وكف ينشف بشعرهه وكلسع يباوع عليه من المرايه ورها ندكت الباب راح فتحه طلعت خاله
_ هاي شوربه خلي تشربها بنان
فهد : خوش
اجه يمي وحط صينية كبالي وگال
_ اكلي
بنان : ما اريد ما اشتهي
فهد : حتئ لو اكلي ميصير ضلين هيج مو زين عليج
بنان : ما اريد نفسي تلعب
بقه صافن عليها ورها جاب الشوربه وكام يريد يوكلني درت راسي وگلت
_ ما اريد ما اشتهي والله
فهد : تشتهين متشتهين هاج اكلي مو زين واذا مو علمودج علمود الطفل دكتورة كالت لازم تتغذئ يلا فتحي حلكج
بقيت عيوني مدمعخ وگلت : اني اكل
فهد : فتحي حلكج بنان
بنان : جيب اني اكل
فهد : داكلج فتحي حلكج يلاا
فتحت حلكي وكام يوكلني بعدين بقه شويه من الماعون گلت
_ عفيه كافي ما اريد
_ خوش
ورها راح كعد علئ القنفه وگال
_ اي احجيلي ست بنان
بنان : شحجي؟
فهد : كُلشي
بنان : ماكو شي احجي
فهد : لا اكوو ليش ضميني عني حملج؟ وليش طلعتيي بدون متكوليلي؟ وليش متغيرة عليه ؟
سكتت مرديت جان يعيط ويكول
_ مجاوبين ؟
بنان : شجاوبب
كام يمي وعصر عكس ايدي حيل وگال
_ ليش ضميتي عني حملج ليش مكلتيلي
جاوبته ودمعه بعيني وگلت : وخرر دتأذيني
وخر عني وعاط عليه وگال
_ هسه صرت مأذيج وانتِ شنوو ما مذيتني بيوم وليلة تغيرتي عليه وضميتي حملج عني ولا عبالك اني ابوه ومسمعتي كلامي ولا اصلا كلتيلي وطلعتي واني كايلج مطيلعين بدون متكوليلي هاي يوميه لازم اعيد هل اسطوانه انيي واني مو كايلج كُلشي تكوليلي
بجيت بقهر وكمت اعيط عليه بعد متحملت وگلت
_ هسه اني طلعت غلطانه اني وانتَ انتَ تجي تكُلي احبج بنان انتِ "درابين گلبي" واحلئ الكلمات تسمعني وبالاخير تخوني ولازم اسكت اني
اجه يمي حضني وگال : كافي لتبجين مو زين عليج
دفعته وگلت : وخرر عني فهد وخرر ليش تخوني ليش شمسويتلك اني بشنو قصرت ادري اني ممبادره وياك هواي ومنكن شويه جامده وياك حتئ تصرفاني بس مو مال تخوني
فهد : بس اني ما خنتج
بنان : لا خنتني اني شفت كُلشي
فهد : شوكت خنتج لتخبليني
بنان : فهد تعرف كلش زين انتَ شمسويتلك اني شمسويتلك حتئ سوي هيج ويايه
فهد : بس كُليلي شوكت خنتج ؟
بنان : شفت رسايل كلها بالتليفون يوم انتَ رحت تسبح اجتك رسايل وقريتهن
فهد : وشمكتوب بيهن؟
بجيت وگلت : مشتاقتلك فهد رد جاوب فهد
فهد : وانتِ صدكتي داخونج؟
بنان : لعد شنو هاي الرسايل
فهد : ما احب ابرر بس راح اكلج هاي ليان اكثر من مره دتراسل واكثر من حساب تفوت بس ما اردها و بذاك اليوم مو راسلت رحت بوكتها طيحت حضها وكلت الابوها وعمي طبعا مراح يسوي شي بس ميهم اهمشي انطيته علم بسوالف بنته
اسمعه ودموعي تنزل گلت : يعني هاي ليان
فهد : انتِ متثقين بيه ؟
سكتت مجاوبته گال
_ جاوبنيي بنان شنو متثقين بلا فهمنه متثقين تعاي سئليني كُليلي انتَ هيج سويت واني اكعد افكر اني شسويتلج حتئ هيج صايرة متغيرة
بنان : عبالي دتخوني
فهد : لو تثقين بيه صدك جان مسويتي هيج
بنان : فهد عفيه لسوي هيج والله اسفه بس من غيرتي عليك هيج سويت
فهد : تكدرين تواجهيني واني افهمج
بنان : مكدرت
فهد : يعني هذا السبب ضميتي عليه حملج مو؟
بجيت وگلت : ايي
جاوبني بعصبية وگال : مو من حقج ضمين عليه هيج موضوع عني
بنان : مكدرت اكُلك بس شفت الرسايل
فهد : وطلعتي وحدج ومكلتيلي علمود هل شي مو
بنان : ايي
فهد : اني شكايلج مو كايل شيصير تكُليلي كم مره اعيد واحجي انيي هااااا
اسمع حجيه واحس وجع بطني رجع وكامت توجعني حطيت ايدي علئ بطني وگلت
_ اهخخخ يمه بطنيي
بسرعه اجه يمي وگال : شبيج شكووو
بنان : فهد بطني بطني دتأذينيي
فهد : شربتي الدوه انتِ
بنان : لا لا بعد
فهد : شتنتظرين
راح بسرعه طلع العلاج وانطاني واني بطني بعدها دتوجعني
فهد : كومي كومي اخذج للمستشفئ
بنان : عوفني فهد مو هسه جنه بالمستشفئ يمه بطنيي اهخخ
صار عصبي وگال : وانتِ شكو تقهرين نفسج وصيرين عصبية وتبجين مسمعتي دكتورة شكالت
بنان : لعد شتريدني اسويي
فهد : دخلي اشوف بعد تبجين او تغثين نفسج دمعه ما اريد تنزل من عينج بعد خوش
بنان : خوش
اجه عدل مخدتي وغطاني وگال
_ هسه شلونج
بنان : زينه
فهد : لتغثين نفسج بعد مو زين
بنان : ايي بس فهد اني اسفه
باوع عليه نظرة معرفت افسرها وگال
_ هسه نامي وطلعي موضوع من راسج واذا ردتي شي صيحيني
راح طلع وبقيت الوم بنفسي ادري سويته غلط بس والله من غيرتي واني من نوع ما احب اواجهه احد ..
______________
ريم
متجمعين اني وروان وامي و زوزو بالصاله كاعدين والولد طافرين فوك بالغرفه
نزل على غفلة فهد اجه علينا وهو مبتسم
فهد : هااا كاعدييين
ضحكت روان : لاا كايمين
فهد : تحشش ام عطوب
روان : لا لا سيادة الضابط ما اقبل
فهد : اييييي تسمحولي اجي يمكم اتناقش بموضوع وية ريمه
ضحكت امي : اي عيني تعال
زوزو : ها خاف على مؤمل
فهد : اي زوزو شمدريچ
زوزو : اعرف اعرف
ضليت اني مصدومه ونفس الوقت خجلانه منه حيل
وروان كدامي تغمز وتسوي حركات
كعد يمي وگال : شبيج بويه وجهج صار طماطه
ريم : شنو لا مابية
ضحك وكال : مبين مابيج اي يعني عرفتي على شنو اريد احجي وياج
هزيت راسي ومن الخجل دمعت
فهد : شوفي ريم أنتِ اختي الوحيده واحبچ حيل وما اريد الج غير السعاده بالبدايه اني كلتلج نظرتي عن مؤمل وعن نفسي اني قابل بس أنتِ فكرتي واخذتي قرارج ؟
بلعمت لما كام يحجي وياي هيج بحيث زوزو وامي وروان يمي وديحجون بس ممستوعبه شديحجون ببالي بس كلام فهد
كمل بضحكه وگال : بويه لتستحين مني بس أنتِ يعني فكرتي زين ترا وراج مدرسه وسادس اني ماريد أتدخل بس رأيج شنوو
باوعت عليه وعيوني متروسه دموع من الفشله
هزيت راسي وروان تضحك كدامي جان يكول
_ عالخير أن شاء الله
المفروض من عندي اكوم. بس ضليت كاعده بمكاني ومنزله راسي واريد ابجي جتي يمي روان كعدت وتهمس بضحكه : هاا ولچ وافقتي
بعدين انكلبت ملامحها وكالت بعصبية : جنت اعرف رح تخونيني حيوانهه
ريم : اباوع على فهد كام من يمنا وزوزو ضلت تحجي ويا مدري عشنو
سحبتني روان وصعدنا للغرفه فوك
لاكتنا رزان وهي نازله وگالت : هاي شبيكم
سحبتها روان : تعاي انتي هم وين اختج الضايعه
رزان : مادري بغرفتها يمكن
طبينا بالغرفه مالتنه وكامت روان تعيط : اي اي عينييي شوفي اول شي يعني احم احم أتمنى لكِ كل السعاده والموفقية ويه سيادة الضابط الثاني مؤمل اييييي هسه نبدي بالنظيف ، شوفي عيني طبعا والله عرفت رح تخونيني وتقبلين بحب حياتج جنتتتتت متوقعهههه وتكولي لا لا ماخونج وينج ها وينجج
رزان : طاحضج شوية شوية شسويتييييي
روان : اي والله ممجذبه اني دشوفيها الجذابه هسه قبلت اثنينجن خنتوني اهخخ يا اللهي قلبي تعب جدآ من الخيانات
ريم : دنجبي لجج صبريييي عندي فكرة ترا والله مفكره بيها من زمان وهي للطرفين راضيه يعني
روان : ايييي وشنو أن شاء الله ؟
ريم : تعقدون أنتِ وياسر وياي
شهكت روان وگال : يمهه الفشلللله ويه مؤمل ياسر يكطع روحه ولا يقبل
ريم : لج باعي لازم تقنعي أنتِ مدري شسوين سوي شنو رائيج رزان بالفكرهه
رزان : والله مادري بس اذا ثنينكم شلون مؤمل غريب يعتبر
ريم : يا غريب هو ماكل وشارب ببيتنا من زماااان ويانهه ميعتبر غريب يعني
رزان : ترا حلو شتكولين انتِ روان
روان : والله هي الفكره حلوه بس مادري اذا يسورتي يقبل لو لا
ريم : حبابه حبابه اقنعي انتي
روان : اذا اقنعه اني لعد وعمامي وفهد وحسن وهمام خاف ميقبلون
ريم : لا لا يقبلون معليج والله حلو
روان : بس لا شلون اني ممفكره اتزوج
ريم : ومنو گال تزوجين هوه بس عقدي ياخي لتضوجوني والله ازعل
روان : هسه شنو
رزان : هسه يعني شلون رح تسووه لازم غير انتوا قابلين كلكم ميصير هيجي خربطه
ريم : بس بالبدايه والله هسه يقبلون واني عود احجي وياهم واشوف خوش
روان : تمام اني راح اروح اقنع ياسر واذا ما قبل ما اعقد وياه بعد
ريم : عفيه بصديقتي النجرة
روان : اعجبج
ريم : واني راح اروح اقنع الاهل وهاي وهلي ماما تحجي وياهم وو زوزو هم
روان : تمام خلي ننطلق
___________
همام
صعدت فوك كعدت بالغرفة اكلب بتليفون وجان يدك التليفون ويطلعلي اسمها " الفاهيه "
فتحت الخط وجاوبتها بضحكة وگلت
_ الله بالخير
_ هـاا هلوو همام
همام : هلا يالفاهيه
_ هـاا
همام : حتئ بالمكالمة انتِ هيج
_ ايي
همام : اي احجي صاير شي
شو ما اشوفها غير كامت تبجي وگالت
_ شوف همام اني صح ما اعرفك بس اريد احجي وياك شويه لان اني ما عندي صديقة احجي وياها وحتئ اختي ما احجي وياهاا
تفاجئت من حجيها وگلت : ليش ما عندج صديقات
_ هـاا
همام : داكلج ليش صديقاتتت ما عندججج
_ هـاا ايي اي بسبب فهاوتي نكدر نكول محد يحب يحجي ويايه يكولون متعرفين تحجين ومتفهمين شي ويكولون انتِ بيج خيط عالجي نفسج
همام : هاي منو الي يحجي هيج
_ هـاا
همام : والله مابيه حيل اعيد الحجي تعاي رسايل احسن
_هوه شنو
همام : راح اسد مكالمه وتعاي نتراسل
_ تمام
سديت المكالمه لان مابيه حيل اعيد بالكلام فمراسله احسن حتئ تكدرر تقره الرساله ميت مره وتستوعبها وترد ، كتبت الها
_ منو الي يكول هيج عليج
_ صديقاتي وحتئ اختي وبنات عمي يكول ليش تكولين بس هـا علئ كُل كلمة ترا هاي عيارة
_ وانتِ ليش تحطين كلامهم براسج لتهتمين الهم
شافت رساله بحدود دقيقتين ردت وگالت
_ مو بس همه همام الكل هيج يحجي عليه واني مابيدي شي شسوي حتئ انتَ تحجي عليه
همام : وين حاجي اني
_حتئ لو متحجي وتكلي بگلبك اكيد راح تحجي عليه
همام : اشوو خلصت من فهاوتج اجيتيي دورين مشاكل ويايه
_ شوف شلون گلت عليه فاهيه
_ اشاقه وياج
_ لا متشاقه المهم هسه باي وهاا يعني لتفكر غير تفكير لان راسلتك بس اصلا اني ما اعرف ليش راسلتك
ضحكت لما گالت هيج وگلت : عادي
_ اي المهم باي
_ الله وياج
_______________
روان
مَر اسبوعين واجه اليوم الموعود وهوه يوم العقد الي بالكوه قنعنه ياسر انو نسوي عقد ويه ريم ومؤمل لان مقبل ويكول عيب وشلون وي اختي بس بالاخير قنعناه وفهد هم اقتنع وگال عادي مابيها شي ومؤمل مو غريب وصارت الشغله واليوم عقدنه اني وست ريم
وخلال هل اسبوعين حضرنه الغراض واشترينه هواي سوالف ..
لبست فستاني الاحمر الي گلت الـ ياسر البس احمر بالعقد و حطتلي ريم حمرة حمره وي كحله برزت عيوني العسلية و طبعا ريم مبدله ومخلصه واكفه تحطلي مكياج
ريم : شفتي اني صديقه صدوقه وين اكو وحده مثلي بليلة عقدها بنص كشختهاا وتحط الـ صديقتها مكياج
روان : يمههه فديتج وين اكو منج انتِ احبل اجيب علئ كولت ياسر
ريم : اهخخ بس اهخخ بس والله طالعهه حلوه انتِ اليوم ياسر يسرسح
ضحكت وگلت : هوه اني اريده يسرسح
ريم : اشو انتِ الوضع عندج تمام لا خايفه لا صخام لا الطام اشو اني ايدي بارده وبيه رجفه
روان : هوه علئ شنو الخوف متكُليلي عادي وانتِ مو جنتي تتمنين هل لحظه ويه مؤملج الي ذبحتي نفسج علموده
ريم : حتئ لو بس والله خايفه
روان : لتخافين لتخافين
ريم : اكلج سؤال اشو ليش احسج راح تكسرين عليه اليوم هوه صوجيي اني ردت عقدنه نفس اليوم
روان : وين كاسرههه انيييي اشوو انتِ طالعه جنج سندريلاا والله الشعر اصفر والفستان ازرك وانتِ طبعا لازكه بالـ ازرك مناويه تلبسين لون ثاني
ريم : مو اريد يشوفني مؤمل بالازرك وثاني شي هذا يختلف عن فستاني بعقد رزان جان مستور هذا مفضوح مفضوح مفضوح
روان : والله مستورر مفضوح اليوم حتموتين مؤمل
ريم : شسويله اوييي
روان : اكلج اسرح شعري لووو اعوفه هيج علئ طبيعته
جان تعيط ريم عليه وتكول
_ لااا لاااا ديري بالج تلعبين بشعرج ياسر گال لتخلين روان تلعب بشعرها خلي كفشههه وخلي تفلهه وطبعا اني اسمع كلام اخويه العزيز
_ بس خاف محلووو
_ لا لا والله حلوو شو تعاي اي هيج فلي هاج طلعتي صاكههه
روان : ديلا لعد خلي ننزل يم الضيوف الجاين يعنيي علمودنهه اني وياجج عزيزتي
ريم : دمشي امشيي
_______________
رزان
بدلت ولبست فستان لون بني ومرحت يم ريم لان خطيه ملتهيه بنفسها وبـ روان فـ اصلا مردت احط هواي مكياج خليت مكياج خفيف ..
طلع ايهم مبدل وكاشخ اجه يمي وجرني من خصري وگال
_ تفاحتيي اليوم تريدين اعضعضج شهل حلاوه
گلبت عيوني وگلت : والله ما ادري بس اذا تريد تعض عض
ضحك وگال : هوه بس اعض ابوس هم
باسنيي بشفتي حيلل اول مره يبوسني هيج قوي دفعته علئ كيف وگلت
_ شبيك خنكتنيي
ايهم : غير مشتهي تفاح
_ وهيج تاكل التفاح
جان يجي ويبوسني من خدي هم ورجع باسني من خدي الثاني وگال
_اي هيج
رزان : اي يلا كافي خلي انزل
_ دخلي نبقئ شويه مو متونسين
رزان : لا خلي ننزل
ايهم : يلا ليل طويل عادي
رزان : يلا وخر هدني خلي اروح
دلغم وجهه وگال : تمام
قبل ميوخرها جلبت ايدي بركبته و بسته من شفته
ضحك وگال : هاي ثالث مره تبوسيني انتِ
رزان : حاسبهن انتَ
رفع حاجبه وگال : طبعاً
رزان : ديلا خليي ننزل
_ نزلي نزليي
_________________
بنان
مَر هل اسبوعين واني وفهد علاقتنه جامده يهتم بيه حيل هواي ومعافني ولا لحظه بس اسلوبه رسمي ويايه واني تحسنت شويه ورحنه للدكتورة وگالت وضعي تمام وضع الطفل هم ..
اجه يوم العقد مال ريم و روان وحيل فرحانه الهم لان راح ياخذون الي يحبوهم وخاصة ريم لان جنت اعرف شكد جانت تحب مؤمل وجنت خايفه انو ميبادلها وينكسر گلبها بس الحمدالله اليوم حيكون عقدهم
لبست فستان لون بني نفس رزان لان كالت خلي نسق اني وياج وخليت مكياج خفيف لان مالي نفس ومنا دتلعب معدتي ..
كملت دانزل وجان يطلع بوجهي فهد وحان لابس اسود مطلعه حلوو وهوه باوعلي من فوك ليجوه ورها دامشي انزل ..
جان يجرني من عكس ايدي للغرفة وگال
_ حتنزلين هيج
بنان : ايي
فهد : شدي شعرج
بنان : ليش شبي
فهد : شنو الي شبي فستانج مصلخ سكتت محجيت شيي الحمره مالتج طوخ هم راح اغلس عليها شعرج فالته ليش ؟
بنان : اي غير طالع حلوو
فهد : لا محلوو شيلي
بنان : ليش محلوو؟
فهد : محلوو طالع رفعي
بقيت صافنه عليه بس سكتت وگلت : تمام عادي نفس شي اذا ارفع او افله
رحت يم الميز رفعته سويته كبه داطلع جان يعيط وگال
_ فلي شعرج فلي
بنان : هسه افله لوو ارفعه
فهد : اشوو بس رفعتي شعرج طلعت زنودج و صدرج وضهرج هاي شنو
بنان : وينهن ترا فستان زين
فهد : لا مو زين فلي شعرج
قلصت عيوني وگلت : اوك
رجعت فليته ودانزل گال
_ مو تركصينن ترا انتِ حامل
بنان : ميحتاج تكول ادري
فهد : اي دانبهج اني خاف ياخذج الواهس
وگام يغطي زنودي و ظهري وصدري بشعري گلت
_ هاي ليش خربت شعريي
فهد : احسن يلا نزلي
بنان : اوك
فهد : خوش
نزلت عفته واول منزلت شفت ريم و روان ديركصن بقيت صافنه عليهنن
بعدين جريت روان وگلت
_ تعالن كعدن شويه ثكل لتستخفن
روان : شو وخريي تعقيداتج خليها الج وخلي اكمل ركص اليوم عقدييي عينيي
راحت رجعت تركص هيه وريم شو منشوف غير فاتت مره جبيرة اول مفاتت زوزو گالت
_ طفوا الاغاني طفوها تعاي ام اصهب تعاي
اجت المره وكعدت اشوف ريم راحت سلمت عليها وجرتنه احنه هم نسلم عليها والكل نخبص بيها بس شكلها شويه جان غريب وبس تبحلق بعيونها
جان تكول زوزو : هاي بنان مرت فهد وهاي روان الي راح يعقد عليها ياسر و هاي رزان مرت ايهم
بقت تباوع وگالت : اي ما شاء الله ما شاء الله
كعدنه كلنه جان اسئل ريم
_ هاي منيه
ريم : هاي صديقة زوزو الروح بالروح
بنان : حلوو زين ليش تبحلق علينه
ريم : هيه هيج طبعيتها مو بس هيج تعرف شيصير بالمستقبل
روان : متنجبين شلون تعرف بلا
ريم : اي والله شبيج تكول زوزو هاي اول متباوع بعيون الشخص تعرف شحيصيرله
رزان : يمههه عود صدك
ريم : ما ادري بس زوزو تكول وهاي ثاني مره اشوفها اني
بنان : ما ادري بس مستحيل وين اكو هيج شي واصلا حرام محد يعرف الغيب
ريم : اني هم مصدكت بس زوزو حجتلنه مواقف اشو اقتنعت
روان : عن نفسي ما اصدك
رزان : يمهه اشو هاي دتبحلق بينهه
ضحكت ريم وگالت : لتخافين هيه هيج
روان : هسه شنو نبقه مطفين الاغاني منركص
ريم : لا هسه فد شويه ونرجع
روان : تمام
شو ما اشوف غير هل مره كامت وتأشر عليه
رزان : هاي شنو داتأشر عليج
روان : بنان لتروحين عوفيها
بنان : شلون دشوفي دتصيحني
جان زوزو تصيح وتكول تعالن يبنات تعالن يمنه
بس صاحتنه زوزو مكدرنه منروح لان عيب رحنه كعدنه يمهم جان زوزو تكول
_ اي ام اصهب شدتشوفين
اشوو هاي بقت تباوع بعيني وخزرتني دم مابقه بجسمي جان تكول
_ هاي بنان مرت فهد موو
زوزو : ايي
_ انتِ حامل موو ؟
بقيت صافنه متفاجئه شلون عرفت بس گلت زوزو حجتلها
بنان : اي حامل
_ ديري بالج علئ الروح الي بيج لان بعد مراح يصير عندج خلفه
بقيت مصدومه من حجيها والبنات يبلعمن يمي وهيه خازرتني جان اكول
_ شنو ليش
_ لا ليش ولا بيش ديري بالج علئ الروح الي بطنج
جان تهمسلي روان وتگلي : معليج هاي بكيفها تحجي لصدكيها
هيه يمكن سمعت روان شكالت وجان تخزر روان خزره وگالت
_ انتِ ام الاحمر اكو فرحة الج مراح تم لان اكو شيي عاصي ومديعوفج
روان : مفتهمت؟
_ بعدين تفهمين
باوعت علئ زوزو اشرت الريم تاخذنه فريم جرتنه وگالت
_ عوفوها بكيفها تحجي هاي
روان : اي بكيفها
جان رزان دمعه بعينها وگالت : خاف يطلع حجيها صدك
ريم : لا معليكم بس لتفكرون بهل سالفه وتعالوا نشغل اغاني ونعلكهاا
راحت هيه وروان رجعن شغلن اغاني واني رحت كعدت وما ادري ليش بقه بالي الي حجته هل مره
____________
سمعت حجي المره بس مهتميت لان ما آمن بهل سوالف ورحت كملت ركص ورهاا صاحونه حتئ نعقد عقدت اني وياسر ورها عقدوا ريم ومؤمل ورها كالوا ياسرر حيفوت
اول مفات بدت الهلاهل وتصفك ..
اجه كعد يمي ويضحك وگال : عمييي شنو هذا الجمال روان
روان : من زمان اني جميلة عيني
ياسر : اجه لزم ايدي وگال عمي هسه صرتي مرتيي
جان تعيط خاله رحاب وتكول : ولك يمه استحي مو كدام الاوادم
ياسر : هسه ضلت اوادم دخلي اذوق طركاعتي
بحركة سريعه اخذ شفتي من بين موجودين والكل صار يعيط ويهلهل ويحجيي وريم والبنات واكفات يضحكن
اني جنت ابد ما مستحيه بس لما سووا هيج فد خجلت ..
جان يكول : مو شفه طركاعة
واني منزله راسي مستحيهه من الموقف وهوه يضحك عليه وزوزو كامت تكله
_ عفيهه عفيهه بياسر
اجت خاله رحاب بضحك وهمست اله گالت : هاي سوايه سويها كدام الاوادم متستحي انتَ
جرني وحضني وگال : قابل شمسوي غير مرتي
باوع عليه وگال
_ اشوو متحجين اخرسيتي
واني خازرته وگلت : بسيطهه
جان يضحك ويكول : يمهه شنو منكعد بغرفة نسولف اني ومرتي
اشرت الخاله بـ لا
جان تكول خاله رحاب : لو محترم نفسك ومابايسها جان خليتكم بس هسه لا ومستحيل لان انتَ خبل
ياسر : يمههه شنووو
رحاب : اسكت ماكو يلا قطع الكيك واكلوا ولبسها ذهب واطلع
ياسر : ترا ميصير هيج
رحاب : يصير يصير
قطعنا الكيك وكلني وكلته جان يكول
_ ولو اني ما اشتهي اكل كيك لان اذوقت كيك طيب بس مشبعت
ابتسمت وگلت : تشبع بعدين
ضرب حيل علئ فخذه وگال : طلعتي طايحة حظ انتِ
روان : شعبالك بس انتَ
ياسر : لا لا خلي انهزم قبل مسوين سوالف وتفضحينه لان شفتي هسه بستجج والكل تخبل علينه
روان : روح روح
ياسر : اي قبل ما اروح مبروك النه طركاعتي
ابتسمت وگلت : مبروك النه اميري الوسيم
______________
مؤمل : يا الله يلا عيني يلا سوولي طريق خل اشوف مرتي
فهد : دنجب لك صدكت روحك حيل ماكو متفوت
ياسر : اي والله متفوت معلية ماخليك تشوف اختي
مؤمل : معليك انتَ حاشر خشمك وياي دوخرو
طلع بوجهه همام مبتسم : ماكو ما اقبل
مؤمل : هاي شنو متجمعين علية ناس وصخام وزلم دخلوني افوت شبيكممم
فهد : ماكووووو
مؤمل : لا والله مو هي بكيفك
فهد : اي بكيفي چا غير احنه اخوانها وغصبا عليك متفوت
مؤمل : صدك تحجون غيرر مرتيي صارت
ياسر : ماااكو ماكو متفوت
همام : اغار على اختي ماكو متفوت لك
ياسر : اي واني مثل احساسك حمام
همام : انجب ياسر لتمسلت كدام الناس
عاط مؤمل : دكافييييي وصلت حدها عاد ترا مرتيي
فهد : يلا بويه انتَ فوت بس اني اعلمك بسيطهه
مؤمل : هسه شمسويلكم اني والله هاي حلوه لا مرتي ميخلوني اشوفها وفوكاها شادين وياي مادري على شنو
ياسر : فوت
فات مؤمل وجان يكول ياسر
_ تففف عليهههه
همام : اي والله
____________
ريم
كالت رزان : يلا ريم حيفوت مؤمل
ريم : شنو يفوت يمه لا
روان : مو هذا الجنتي تنتظري تفضليي
ريم : حقيرة حقيرهه عفية بنان شلون اني اخاف
بنان : سكتي ولج ليش خايفه
ريم : مادري مادري متوتره حيل لج رجلية دترجف رجف
بنان : خير ان شاء الله
جتي خاله رحاب ركض على ريم : لج ريم جاهزه خما ناقص شي حيفوت مؤمل
بنان : اي خاله مناقصها شي
رحاب : شبيج تطكين سن بسن
ريم : يوم خايفه
رحاب : لا لتخافين ماكو شي
دقايق مرت واني ارجف وخايفه لحد ما فات واسمع الهلاهل من كل جهه .. گلبي طاح بيدي وعيوني دمعت وارجف وأيدي ثلج
كمت وكفت ومنزله راسي
وهو ضل يباوع علية مبتسم باسني براسي و بخدي بدون ميخجل .. جسمي جمد وگلبي كام يدك سريع
همس يمي : وأخيراً صرتي مرتي
ضليت منزله راسي واني خايفه
كعدت بخوف وهو كعد يمي وعلكوا اغاني واني ممهتمه للمحيط الخارجي وكاعده واعصر ب ايدي وهاي لحد ما مرت نص ساعه عن الوقت وكال لأمي : اكلچ عمه ما تسويلي مجال احجي وية ريم وحدنا
امي كالت : يمه اي شلون هذيج الغرفه
نبت روان يم خاله وگالت : اشو مخلتيني وي ياسر وحدنه خاله لو ريم وحد
رحاب : غير انتِ اشرتيلي گلتي لا
روان : اشاقهه خاله وياج عادي
كمت اني مشيت كدامه وارجف بالغلط رجلي انعوجت وعثرت بس موكعت
هو ضحك : بسم الله عليچ شجاج ولج هيج خايفه مني ما اسويلج شي ترا
دخلت للغرفه فوكاااهاا انييي يربي
دمعت حيل واحس الغرفه خنكه مع العلم سبلت موجود والغرفه باردههه
سد الباب هو وصار كبالي گلت
_ ها لا ما خايفه
مؤمل : اي حيل مبين اصلا
رحت اريد اكعد هو جرني حيل وكالي بضحكة : صدك ردت اذكرج بعقد ايهم لما شفتيني وكلتيلي حرام تباوع دير وجهك اوي شفتي ترا اني وفيت بوعدي وصدك صرتي مرتي ، اهخخ ولج خرببب شسويتي بية بطلعان الروح اخوج الحقنه قبل لحد ما شلع گلبي
ريم : لتحجييي على اخوية
مؤمل : تدافع لاخوهااا
ريم : اييي لعد شلون غير اخويههه
مؤمل : ها ها لسانج طلع
ريم : غير تحجي على اخويههه
مؤمل : يا عيني تموتين على اخوج بسيطه انطيني صبر
درت وجهي عنه وهو يضحك كال : صدك شو طالعه تخبلين راح اسويها صدك واسويها هسه
ضليت كاعده واحس عركت اجيب وامسح براسي وأيدي ترجف
ثواني وايده صارت ع ايدي وكال : ايدج ترجف ليش
ريم : هي هيج
مؤمل : ليش خايفه مني
ريم : مخايفه منك
مؤمل : لا خايفه
ضليت احجي بگلبي اني متوتره حيل وخايفه منه صح بس هو نفسه الي حبيته 3 سنوات ورا بعض
نفسه اكتب عنه بدفتري ومحتفظه بصورة اله
ضليت مدنجه مستحيه حيل
مؤمل : احبچ واحب الازرك عليچ حيلللل
ريم : اني هم احبه يطلعني حلوة
مؤمل : أنتِ ياهو اليطلعج محلوة ؟
محسيت غير باسني من خدي حيل
عصرت ايدي حيل واني على غفلة ابچي
هو ضحك وكال : يلا هسه شيكولون مصدك وشسمه خل اطلع
ريم : تمام
وقبل ميطلع اندار عليه گال
_فكي الحضر مني يا ريمتي عيب تحضرين زوجج مو كتلج اخذج اخدج ومصيرين ريمة احد غيري
طلع واني هم طلعت وبقينه نركص شويه ورها بدت الناس تروح ورحنه بدلنه وبدت حملتنا التنظفية
________________
روان
كملنه تنظيف والعالم راحت بس الولد بعدهم برا ديسولفون واحنه كاعدين تعبانين بالصاله كلنه ودنسولف ونحش بعلان وفلتان
شو منسمع غير صوت طلقة برا ورها صار عياط وكلنه بقينه واكفين خايفين نريد نعرف شكو وجان يفوت همام بسرعة يركض ديريد يصعد فوك جان
خاله تكول
_ شكو همام شصاير
جان يعيط ويكول : ياسر تصاوب بجتفه !
نهاية البارت
يتبع ...
(لاتنسوا التصويت)
ان شاء الله يعجبكم البارت 💖 + ترا البارت طويل بال 6000 كلمة
7.nldn حسابنا الأنستا
إلى اللقاء يا أعز العابرين في قلبي ♡.
الكاتبات دينا & نور
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!