رواية نقطة لقاء الفصل السادس عشر 16 - بقلم الكاتبة دينا _ الكاتبة نور

روان

صار الليل والكل نايم .. فطلعنا بهدوء من البيت وأخذنا الاشياء المحتاجيهن

وامي ويانه تساعدنه .. محد لمحنا ولا حس بينا من جمال ولا فراس .. طلعنا واتوجهنا لكراج ببغداد شفنه حجي وعنده تكسي امي كلتله تروح لبابل كالها اي وكروه هلكد صعدنا جنطنا و صعدنا بالسياره واحنه فرحانين نخلص من ضيم جمال

ابتسمت لامي وكلتلها : واخيرا

دمعت رزان وكالت : خايفه

الهام : احنه بأمانة الله .. لحد يخاف أن شاء الله خير

_________________________________

بنان
جنت كاعده والليل كله اباوع عالسكف ومادري شبية حيل خايفه .. ما اعرف لان فهد مو يمي بس ما ادري احساس جان غريب ويخوف ما ارتاحيت بالغرفه وحدي رحت ع ريم لكيتها نايمه كلت فشله اكعدها .. لزمت راسي وكلت .. ليش ما ادك ع فهد خليجي يمي ! ..

لزمت التلفون ودكيت عليه رأسا جاوبني

فهد : اهلا اهلا

بنان : احمم بيك

فهد : ايييي شعندج داكه علية مو تخافين مني ؟

بنان : فهد عوف هالكلام بس يعني تعال هنا يمي بس كم كلمه واذا تريد ارجع عادي

ضحك خفيف وكال : اخاف اجي لا تسوين بية شي اخاف على روحي

بنان : فهد انجب وتعال بسرعه

فهد : شنو شنو انجب ؟ اني انجب ؟

فتحت عيوني بصدمه طاحظج بنان شلون تحجين هيج

بنان : اسفه والله اسفه مادري يعني اني من اسولف ويه أحد هيج يعني ميانه مادرييييي والله بالغلط

فهد : بسيطه جاي

سد الخط وضليت خايفه

متكدرين الا تجفصين شلون بية استغفر الله يمه خاف يكتلني يسوي بية فدشي

لا اكيد فهد مو هيج هسه اني حجيتله كتله بالغلط هسه قابل صدك اعصابك سيادة الضابط

يمههه لا اني خايفه حيل والله

باوعت للساعه جانت ب 3 شوداني ورحت صخمت دكيت عليه شبية شجاني مو ماكدر لازم اخربط السالفه

سمعته فتح الباب باوعت لكيته ملامحه جاااامده
سَد الباب وضل بمكانه

رفع ايده وتكتف : انجب ؟

بنان : اسفه آسفه اسفه والله بالغلط

فهد : اي بس فهد ما عنده غلط وصح

بدا يحجي ويتقرب خطوه خطوتين

بنان : والله كتلك آسفه وبالغلط والله ماعيدها

وكف كبالي واني احجي وخايفه منه

تبدلت ملامحه وتحولت لضحك وبدا يضحك ويضحك

واني صافنه كلت بگلبي : هَهذا شبي صدك يحجي ؟ خاف فهد يطلع جني بالنهايه

حچى وهو يضحك : شبيج بابا شنهي مخبله أنتِ ترى اتشاقه وياج .. خلتصير شخصيتج قويه بس مو علية ديربالج وانتي متقصده وتكولين انجب اطلعلج فهد 2 زين حبيبة وبعدين شنو موضوعج ..

باوعتله وحجيت بخوف وعيوني بيها دموع : اني خايفه عفية لتروح ابقى

فهد : شنو ابقى الولد كلهم جوا نايمين شلون اعوفهم هسه شيكولون علية

بنان : عليك الله فهد خايفه

صغر عيونه وكال : مو أنتِ تخافين مني

بنان : فهددددد عليك الله

فهد : خوش خوش .. شوفي راح ابقى هنا لحد الفجر تصير ساعه 6 لو 5 اروح انزل يعني قبل ليكعدون

بنان : شنو همه هيج نشيطين يكعدون من ال 6 ابقى فهد والله كتلك اخاف

فهد : اللهم طولج ياروح .. ولج بوية من شنو خايفه

بنان : لو ادري أكول الك

فهد : خلص تمام فراشي هنا بعده

بنان : هو موجود هنا بكل وقت

فهد : يلا هاذهوه راح انام شسوي يعني

بنان : عفيه بالحباب

فهد : شف شف تكولي انت تتمادى وهي تكلي عفيه بالحباب شني هاي

بنان : غير اشجعك

فهد : شكرا عيني ما احتاج تشجيع ويلا ننهمد كافي متعبتي منعستي

دمعت عيوني : اي اي نعست ولا اكلك ارجع انزل جوا ماريدك

رفع راسه بعصبيه : لتضلين تلعبين علية اصعد انزل اصعد انزل شطلعت هاي

بنان : لا ابقى

لزم راسه وكال : ربييي

@@@@@@@

ريم
كعدت بالليل عطشانه اني كل مرا اخلي يمي مي بس هالمره مادري ليش نسيت ونثولت

ادور كمت واني ناسيه احد بيتنا وحالتي حاله وشعري طاير صفح وروحي طالعه وامشي اني ومغمضه دا انزل من درج وكعت بس همزين ماكو احد كمت وكفت يلا وذا هي وكعه نزلت جوا رحت للمطبخ ادور عالكلاصات نسيت مكانهن وين هسه وين اكو وحده متندل كلاصات المي استغفر الله يربي هسه وكتها لكيت واحد ودا اجيبه جان انتبه ع واحد واكف ديباوع انصرعتتت فتحت حلكي من الخرعه جيت اعيط جان هذا كمز علية وسد حلكي

مؤمل : صمي حلكج رحمه لابوج

ريم : يمه منو انت يمههههه حرامي

مؤمل : صخام بوجهج وبوجهي اني مؤمل

فتحت عيوني بصدمه : وخر وخر لتباوع دير وجهك حرامم يمهه انت شجابك هيج وكت

وخر من يمي وكال : شمدريني

ريم : لتباوع لتباااوع شو انت عينك صلفه

مؤمل : شعلية اني غير انت واكفه يمي

ريم : عزهههه غير انت مثل الجني شفتك هناااا

هو يحجي وداير ظهره : والله أنتِ جنج هذني المخبلات اللي بالشماعيه شايفه شعرج وكفشته حتى تسريح ميفيده لو بجامتج وحده صاعده وحده نازله .. شارده من مستشفى الامراض العقلية

ريم : احترم نفسك

مؤمل : جا غير داحجي صدك .. بويايييي مُوش عيون عليج ضيم وعلي

صار كلبي يدك سريع واني احجي موقف كلش غلط

ريم : احترممم نفسك احسنلك كافي .. حتى مي هم بطلت ماريد .. اوف شجابني ونزلت الله ياخذج ريم

مؤمل : اييييي وياخذني وياج عالواهس

ريم : استغفر الله وخر خل اطلع

مؤمل : وين

ريم : شنو وين ، اريد اطلع وانت واكف بوجه الباب

حچى مؤمل بكلبه : تسودنت انت

ريم : وخرر أندار خل اطلع

مؤمل : جا شمسوي اني هسه

ريم : ياخي بس اريد اطلع اطلعععع سويتها قصة عنتر

مؤمل : اي عيوني طلعي طلعي احد كاضج

طلعت واني كلبي يدك سريع يمهههه مستفززز حيل ولا توقعته هيج .. شورطج ريم ادور كل ما اشوفه مدري شيصير بية كلبي يدك سريع

@@@@@@@

روان

بعد مرور كم ساعه وصلنه ودخلنا محافظة بابل
قرينا اللافته الجبيره ( محافظة بابل ترحب بكم )
تنهدت واني مرتاحه .. رزان محنخليها تزوج لو هسه مادري شيصير بجمال بس ماخليها وكلتله من البدايه وحذرته وخل يشوف النتائج اللي دتصير

اباوع لامي ورزان نايمه على كتفها واني الوحيده اللي منمت ، اباوع للشارع واني افكر .. بنان هسه شلونها وريم شكد حلو همه ببيت .. يارب افرجها علينا وساعدنا وساعد بنان كلش تعذبنا ومدنتحمل
كعدت امي وكلتلها وصلنا وكلتله وصلنا وكلتله ودينا لفلان منطقه ودخلنا بيها امي تندل بيت خاله احلام بس احنه ابد مرايحين الها ولا مرة بس هي جانت قبل تجي لبغداد ... نزلنا من التكسي ونزلنا جنطنا 2

حجت رزان بتوتر : راح يتقبلونا ؟

تنهدت الهام وكالت : الله كريم أن شاء الله هي كُلها فتره وتعدي

باوعت روان للباب وراحت دكت الباب ساعه 4 الفجر
4 الفجر ! منو كاعد هسه اكيد نايمين .. بس امي كلتلهم اكيد ينتضرونا

دكينا جرس البيت وباب البيت واحنه متوترين حيل وامي كلسع اشوفها تتلفت يمنى و يسرى

فتحلنا الباب ابن خالتي .. اسمه يوسف هو اكبر مني ب 4 سنوات

باوعلي بصدمه وشفته صفن وبعدين باوع لامي ورزان سلم عليهم وكال تفضلوا تفضلوا فوتوا ننتظركم

فتنا جوا وهو شال الجنط وطببهن جوا بالبيت

اول ما طب كال بصوت : من اليوم ورايح اعتبروا البيت بيتكم ولا تشيلون على نفسكم ولا اي شيء وأخذوا راحتكم

الهام : لعد وين احلام و ابوكم

يوسف : ابوية مسافر بشغل و امي جوا بغرفتها متدري ثواني اصيحها

كعدنا بالصاله واحنه وحده تباوع بوجه اللخ

روان : عزااا هذا يوسف .. شو متغير اخر مره شفته قبل 6 سنين هيج

الهام : يا يمه دنيا تركض ركض متحسين بيها

رزان : خاف جمال يكعد هسه شيسوي يكلب الدنيا علينا شلون يمه خايفه حيل

روان : انتي سكتي كضيتي عمرج خايفه .. اليوم زواجج لو ما منهزمين رزان لتخافين احنه بأمان

اجتي خالتي وهي تضحك وراها يوسف وسلمنا عليها ورحبت بينا خطيه وكعدت يمنا وضلت امي تبجي وتشكيلها واني ورزان كاعدين وساكتين

حجى يوسف : أن شاء الله انتوا بأمان لتخافون

الهام : لعد وين كوثر و مهدي ؟

احلام : نايمين والله

الهام : خطيه

احلام : يمه يوسف جبت فراش ؟

يوسف : جاهز كلشي محظره

احلام : ارتاحوا عيني روحو ناموا شحالكم ما نايمين يوم كامل

الهام : تسلمين احلام والله غيرج ميسويلنا هالمعروف هذا كله بسبب جمال هو بهذلنا وخلانه نتخذ هيج قرار

احلام : منو فكر بهالشي

الهام : روان .. روان اقترحت لان رزان اليوم زواجها وماعدنا غير حل

رفعت راسي وأشوف هذا يوسف كاعد كبالي

ويباوعلي .. دار وجهه رأساً اول ما انتبهت عليه

بعدين رحنا لغرفه من الغرف عدهم همه محظريها و بيها فراش و نمنا بيها ..

@@@@@@@@

بنان

كعدت الصبح تقريباً ساعه 7 أو 8 لكيت فهد ماهوا
نازل وشسويله قابل هم اصدقائه هنا ويضل وياهم
ضليت افكر رزان .. روان وامي شلونهم هسه .. روان بعدها زعلانه مني لحد الان ، بس اكيد هسه امي حجت الها كلشي هسه

اوففف .. كمت دا اريد انزل جهازي دك باوعت رقم غريب هسه شسوي افتح خط خاف يطلع احد اعرفه لو شي ،

فتحت خط بعدني مكايله كلمه

اجاني صوته وهو يعيط بفحيح : وين امي والتؤام
سكتت مجاوبته ردت اسد تلفون وضليت ارجف

فراس : وين امي يا* وربج اذا مكلتي وين راحوا احرك الدنيا عليج

بنان : و واني شمدريني وينهم .. بجيت وكتله شبيهم وينهم

فراس : انجبي لج *** لتبيعين براسي ثكل خوش وادري بيج كلش زين تدرين وين مهزومات بيوم زواج رزان وابوية كلب البيت عليهم والدنيا اكيد تعرفين انتي وكالولج

سديت التلفون منه ورجع يدك واني اباوع للتلفون وارجف كلسع يدك علية اخر شي فتحت تليفون وانطيته بلوك

يربي راح اموت صبرك يا الهي وين راحوا هسه كله بسببك جمال ضيعت الكل حتى زوجتك إلى متى حنضل هيج مشتتين

دكيت على تلفون امي يدك بس متجاوبني
يا الهي دخيلك اوكف وياهم وين ما جانوا

..................................................

كعدوا الولد الصبح

كام احمد : هاي شنو اني وين

ياسر : اكعد اكعد يمي انت لتطلعلي خبالاتك

التفت ياسر شاف مؤمل صافن : ها ولك انت " غمزله" شبيك عمي

مؤمل : هيج ما بية

ياسر : احجي وانه اخوك

مؤمل : جا هذا فهد شوكت يكعد

ياسر : شوف مدام دنيا صبح وجمعه ماعتقد راح يكعد منوكت

وكف مؤمل وكال : اني راح اطلع لعد حتى اروح عندي شغل لباجر

كعد همام : هيو شنو شغل يوديك من صباحيات الله حتى فهد وأحمد نايمين

مؤمل : مهم بعد عيني

ياسر : اوكف خل اكعد فهد

كام ياسر وهو يعيط : فهدددد ولك فهيدداااان كوم عمي اكعد حيروح صاحبك

كعد فهد بعصبية وكفخ ياسر : حيوان لتجوعر طرشتني منو يا زمال منهم حيروح

مؤمل : اني زمال .. خلف الله عليك

فهد : انجب وين رايح

مؤمل : عندي شغل بالبيت

فهد : وشعندك الصبح بعدنا حتى ممتريكين

مؤمل : مهم عيوني داكول مهم مهممممم

فهد : كافي انت الثاني يلا امشي اوصلك

مؤمل : شتوصلني لا اني اروح كمل نومك حبيب

فهد : امشي ولا كلمه لا انطيك دفره اوصلك لباب الشرجي

مؤمل : اشكرك

فهد : شسالفتك انت شكراً واشكرك ومدري ايش صاير مؤدب اليوم شعجب وبعدين ماحب احد يكلي شكراً

غطى ياسر راسه وصاح : كبررررر شبيكم خل انام

دفره فهد : انلصم مهجوم

كام وراح هو و مؤمل بالهول يحجون

كعد احمد : اهخخخ شلون نومههه

همام : اي وشسويت بينا انت وأحلامك

ضحك ياسر : متكلي شجنت حلمان وتمسلت

احمد : ليش شنو شبيكم تضحكون شصاير

همام : هجمت الغرفه خويه

احمد : ها ولكم تدرون شجنت حلمان

ياسر : اي شنو طلع الزبده عمي

احمد : حلمتتتتتتت اني مسافر واكو عصابه لاحكتني وصعدت بطيارتي الخاصه وهاي ولكيتهم يركضون وراي ركضت بالطيارة انداريت شفت اكو برده

همام : اكو برده بالطياره؟؟؟؟

احمد : اسمع خل اكمل شفت اكو برده شكبرها داوخرها طلعوا بوجهي هذوله العصابه داريد أفلت جان احس براجدي عليكم الله منو ضربني بيكم
ياسر باوع لهمام وطكوها ضحكه

احمد : دحجو منووو واني عبالي حتى الراجدي حلم

ياسر : عمي اني ضربتك جا غير لازمني من شعري مدري شتريد تسوي بية وضربتك كلت بلكي يكعد

احمد : حيل لو مهلس شعرك فدمرة

ياسر : لا تلاحكت لروحي .. حمام شبيك مطفي

همام : نعسان

ياسر : كضيتها كله نعسان اريد انام وخرو ضايج طالع مدري شتحس

همام : انجب لك شو وخر خل اروح انام احسن واليوم جمعه اللههه

ياسر : نام بعد عمي نام .. وانت احمد هم حتنام

احمد : لا عمي هو اريد اروح

ياسر : خاب اكعد وين مولي نتريك عود هج

احمد : مو بعينييي

______________________________

كعدت روان على صوت عياط وكعدوا كُلهم حتى رزان و الهام هم

رزان : شنو شبيهم هيج يعيطون ؟

روان : مادري والله

الهام راح اطلع اشوف شكو

روان : لا لا ضلوا اني اطلع اشوف

باوعت للساعه 10 الصبح

خليت اذاني عالباب ولا اسمع اي شي هم سويت نفسي توني طالعه دا اروح على خالتي

لكيت ابنها مهدي واكف كبال يوسف وبنتها كالبه خلقتها وتباوع صفح

كلت هذوله شبيهم

روان : شنو شكو خاله

ضحكت احلام بتوتر : لا خاله هيج سلامتج

باوع مهدي صفح وكالب خلقته حجى بصوت ويه امه : ليش جايات هذني هنا هم عايزنه احنه ؟

يوسف : انت انجب واسكت هواي لغيت

مهدي : ليش تدافع انت هو هذا الصدك احنه مو بيتنا فندق خمس نجوم حتى يجون يكعدون يمنا

باوعت عليه بعصبية وباوعت لخالتي جانت متوتره : مجايين عليك احنه خوش

مهدي : لا بالله !

روان : اي مثل مسمعت مجايه حتى اشوف خلقتك تمام احنه اجينه هنا مجبورين وكلها فتره ونروح

كوثر : منو يكول فتره ؟

روان : محاجيه وياج دا احجي ويه الافندي

كوثر : اي ما اسمحلج تحجين على اخويه وانتي كاعده ببيتنا

صاحت خالتي : كافي وسمم اني اعملكم انت مهدي اصبرلي وكوثر الا اكول لابوكم

مهدي : لتضحكيني يوم شنو احنه جهال دتشوفينا واصلا ابويه مقابل انوا يكعدون هنا لتنكرين هالشي وسافر مو علمود شغل بس علمودهم

يوسف : كافي مهدي شبيك امشي

جره من ايده قوي بس هذا عاصي ميروح : وخر لك ودفعه

يوسف : انت شلون راح ابتلي بيك امشي اطلع

مهدي : راح اطلع بس والله ما اسكت عالديصير

باوعت لخالتي : ميريدنا

احلام : خاله حبيبتي معليكم بي هذا مخبل اني أريدكم

روان : مراح يغير اي شي خاله وحتى كوثر متريدنا احنه مجايين لا على مهدي ولا على كوثر احنه اجينه من هنا مهزومين من ابونا وبس

طبيت للغرفه بعصبية و اسمع خالتي ترزل كوثر وتعيط عليها .. بس شرح يفيد ؟

سالتني امي شكو كلتلهم هيج ديشاقون

_________

كعدوا ياسر وهمام ورجع فهد وكعد يتريك وياهم ورحاب سوتلهم اكل وزوزو نايمه لان البارحه منامت زين من ورا الاغاني وبعدها راح احمد و صعد فهد فوك

صعد فهد وهو ضايج ومنايم زين
دخل للغرفه وشاف بنان تبجي

فهد : شبيج بنان ليش تبجين ؟

بنان : ...

فهد : احجي بويه شبيج تبجين احد سوالج شي

بنان : اهلي مهزومين

فهد : شنو وين ؟

بنان : مادري فهد

فهد : دكيتي عليهم ؟

بنان : دكيت وما شالوه

فهد : جربي دكي مره ثانيه

شالت تلفونها ودكت عليهم مره لخ وانفتح خط

واجه صوت رزان : هلو بنان شلونج

بنان : يمه رزان شلونكم " تحجي وفهد يمها "

رزان : زينين أنتِ شلونج

بنان : ليش انهزمتوا ؟

رزان : شنو منو كال انهزمنا. ؟

بنان : امممم

رزان : لا لا ممهزومين هياتنه موجودات

ابتسمت بنان بفرح : صدك والله ارتاحيت هسه

رزان : حبيبتي انتِ اهمشي أنتِ بخير والله احنه زينين

بنان : لعد وين امي وروان احجي وياهم

رزان : ماكدر بنان هسه تمام اذا اكدر اتصل عليج اني من يجون يمي

بنان : تمام انتبهي لنفسج

رزان : أن شاء الله

بنان : يلا باي

رزان : باي

رزان
مردت اكول البنان انو نهزمنه حتئ ليضل بالها علينه فطريت اجذب عليهااا

سدت الخط واني مبتسمه وامسح بدموعي

انداريت لكيتا واكف ويباوعلي وساكت

بنان : شبيك ليش هيج

فهد : سحبتي علية

بنان : وين سحبت عليك مو جنت احجي ويه اختي

فهد : مبين اكو شي حلو مدام ضحكتي اي شلونهم

بنان : زينين وكلتلي ما مهزومين

حجى ببرود : وانتي شمدريج همه انهزموا

بنان : وصلني خبر من .. من صديقتي

باوعلي صفح وكال : تمام .. ايييي شلونج ؟

بنان : شلوني .. لوني اسود

فهد : تحشش ام الوصخ

بنان : عزاا أني ام الوصخ والله ماكو غيرك وصخ
ضحكت وماشوفه غير خازرني

باوعتله بصدمه : اسفههههه مو قصدي والله

فهد : هم بالغلط هاي

بنان : اي والله هي تطلع من وحدها شسوي

فهد : انتي شلون حتطيرين عقلي

بنان : اني طاير عقلي اصلا ، اي تعال كولي تونست البارحه

تنهد وباوعلي وابتسم باستفزاز : اي والله تونست حيل تونست وكلت اعوفها خطيه تخاف مني .. صدك خل اروح انتي تخافين مني

" باوعتله باستغراب " بنان : وين

فهد : غير اريد اعوفج مو تكولين اخاف منك

بنان: اهوووو فهد انت شو متنسى

فهد : اي ما انسى .. مشكلتج

بنان : مو هم اخاف اذا تروح

فهد : شطلعت هاي تخافين من اني موجود وتخافين من اروح

بنان : اي والله شسوي

فهد : انتي تسطرين اكبر راس

بنان : مشكلتك

فهد : شلون راح اكص لسانج طولان وياي اول مجيتي مو هيج

ضحكتله استفزهه : اي جنت ماعرفك هسه يعني صرنه عشره

غمز وهو يكول : اي وبعدين يصير زاد وملح

سكتت وكتله : شكد عيب هسه مرحت ويه امك اسوي غدا

فهد : يابه شعندج هذيج ريم و مريم هناك

بنان : عزا شنو ريم ومريم خطيهه انت شكد اناني

حجى بخباثه : اناني بيج شليتي شل " يا درابين گلبي "

بنان : شنو هاي كلمة جديده عل ساحه

فهد : بعد وبعد حشبعج كلمات

بنان ابتسمتله

عفته وطلعت رحت نزلت جوا يمهم اساعدهم وهو لزم هاللابتوت وكعد يشتغل

@@@@@@@@

نزلت جوا لكيت ياسر كاعد يلعب بوبجي ويعيط وهمام كل ميعيط يكفخه وتكب العيطه

بنان : هلووو شلونكم

ياسر : ولج هلوووو صارلي شكد محاجي وياج .. تصعدين كيم وياي

بنان : بوبجي ؟

ياسر : اي

بنان : مادري ماحبها

ياسر : معليج نزليها واني اعلمج عليها

همام : بنان معليج بهذا الخبل ترى تلعب النفس ومحلوه ومتخبل هالانسان مادري شبي

ياسر : دنجب حمام بسيطه اني الك

بنان : يلا اترخص حروح لمطبخ اساعدهم
رحت للمطبخ لكيت زوزو حاطه كرسي بالمطبخ وكاعده تحجي وتعد وتصف وريم تضحك هي ومريم و خاله رحاب تحجي وياها

بنان : ها محتاجين شي اساعدكم

زوزو : لا يمه لعد هالفيلق شديسوي هِهنا

بنان : لا خاف يحتاجون شي

رحاب : لا خاله حبيبتي سلامتج كلشي مخلصين
طلعت معندي شي وكلشي مخلصين

جبت تلفوني ورحت يم ياسر

بنان : ياسر يلا جبت تلفوني شلون شسوي هسه

ياسر : معليج انتي نزلتي بوبجي

بنان : اي اي

نزلت اول كيم ويا طبببب انكتلت

بنان : عزاااا هاي شنو

ياسر : ديلاا اكليها

بنان : هسه شلون

اجاني صوته يكول : شنو شلون

باوعله ياسر : جاي اعلمها حتى ننزل كيم سوا

عكد حواجبه وكال : شنووو شو بكيفكم من وراي

بنان : والله حلوه ترى بس بعدني ما عرفلها

فهد : جيبي تلفونج

ياسر : يا اخي انت شكد عقده شبيك هي بوبجي لتسويها كبه

بنان : شتسوي بي

فهد: جيبي وصعدي وراي

ياسر : هيوووو سيادة الضابط

اجه فهد وكفخه ع راسه بعصبية : معليك بـ بنان خوش

ياسر : بعد استاذ فهد غار شيخلصنه

فهد : حيوان اني الك

صعد فهد وصعدت بنان

فهد : شلون تقبلين ها ؟

بنان : ليش مااقبل ترا ممسويت شي و بعدين مو من حقك تحاسبني

فهد : لا احاسبج واكسر راسج

بنان : شبيك فهد والله هي لعبه

طلع تلفوني وفتحه ومسحها كدامي ومتقصد يحرك دمي

بنان : الا انزلها

ابتسم وكال : اشوف شلون حتى اعرف اتصرف غير تصرف وياج

اخذت الموبايل منه وذبيته ونزلت

شبي هذا على أقل شي يحاسبني واحنه متفقين زواج شكلي .. حيخبلنييي

@@@@@@@

ورا الغدا جنه كلنا كاعدين سوا
فرح : اني اليد الوح لبيبي

ريم : هاي بيبي يمج

فرح : لااا اليد الوح لبيت بيبي هناك

مريم بضحكه : تقصد على امي

بنان : خطيه لعد وديها

مريم : هسه يجي حسن عود اكوله بلكي يقبل .. يلا ماما فرح امشي ننام قيلولة الظهر

ضحكنا كلنه عليها : شنو قيلوله شو تحجين فصحه

مريم : غير هي حتى افهمها كله كاضيته كارتون ههههه

لزمت فرح وصعدوا فوك وضلينا اني وريم جوا

حجت ريم : بنان تعاي لغرفتي

بنان : تمام امشي

صعدنا فوك دنمشي جان يطلع فهد من الغرفه

فهد : وين على خير

كلبت وجهي منه وريم انتبهت

ريم : هيج اخذها وياي ترى ماخليها يمك اليوم

باوعت وكلت : اي حتى بالليل اريد انام يمج خوش

انداريت شفته يباوعلي ومبتسم بأستفزاز : اي عادي ماكو اشكال

سويت نفسي ممهتمه وجريت ريم ورحنا للغرفه وهي تضحك علينا

بنان : اي ولج شبيج احس موضوع مهم

ريم : اسمعي حسولفلج البارحه شصار

بنان : شنو منو؟

ريم : اوي شبيج بنان فكي دماغج البارحه

بنان : هااا اي

ريم : نزلت بنص الليل للمطبخ وشفت مؤمل بالمطبخ
فتحت عيونها بصدمه: عزاااا شلون

ريم : واني لج شعري واكع ومكفش وبجامتي وحالتي يرثى لها وتخيلي جيت اعيط عبالي حرامي وجان يسد حلكي بعدين عيطت عليه وكتله دير وجهك خل اطلع

لججج يستفززززني

بنان : نفس الطينه هو وفهد

ريم : كل ما اشوفه حالتي تتدهور ومادري شيصير بية

بنان : انهُ الحب

ريم : اي والله وها لج هوه صاير حلو

بنان : الله يحفظه الصاحبتها

ضحكت ريم : عزاا شنو صابحته معقوله مرتبط لا لا ان شاء الله لا وترئ اني عندي اوراق اكتب بيهن نصوص وأشعار اله هالفتره بطلت

بنان : استمري بعد اخيتج

ريم: هو اني مبطلت بس التهيت بالصخام الامتحانات .. والمدرسه حيل محلوه بدون روان

تنهدت وكلتلها : اوففف

ريم : اسويلج مكياج

بنان : لا ماريد

ريم : شبيج يحظي

بنان : مو احنه زعلانين كل منزعل تحطيلي مكياج هسه يفسرها بغير نظره

ريم : غير هو رجلج شنهي يفسرها بغير نظره والله يالله

بنان : اي يمعوده هذا اخوج مستفز

ريم : اذا مؤمل صديقه شيطلع لعد

بنان : صدكتي هذوله نسخه مستنسخه

@@@@@

ياسر : شبيك انت خلقتك مكلوبه مو البارحه ونستك لو انت هيج يعني

فهد : وانت شعليك ترى راح اضربك

ياسر : مو اني خايف علساس

فهد : اني مو بحالك هسه خوش

غمز ياسر : لعد بحال منوو

فهد : بحال روحي ف انجب

ياسر : لا عمي ما انجب شحتسوي ؟

فهد : تريد تعرف شسويلك ؟

ياسر : علواه

كام فهد ولزمه من شعري وكع بي تكفيخ وضرب

ياسر : رحمه لزوزو عوفني شنهي ابتليتتتت ولك حماااااممم يوووومممم بويهههه تعالولي

فهد : انجب متحلفلك صارلي فتره

ورجع يكتل بي الا ان صار وجههه خريطه ومزورك
اجه همام وهو يفاكك بيهم ويضحك عليهم ورحاب هم تكوله عوفه وفهد ولا يمهم

همام : ولك فهيدان عوفه للولد انجعص دشوف مردغته

فهد : يلا هيج كافي ؟

ياسر : ولك عوفني شنو هاي ايد لو حديد

عاطت زوزو : انتوا شنو شو ماعدكم احترام كوا***

وخر فهد وهو مخنزر ع ياسر : علمود هذا البلوة شوية تأديب بسيط

زوزو : وخروا من كدامي يلااا ولكم كل واحد زلمه شكبره يتكاتلون بدون سبب

ياسر باوع لفهد وطكها بضحكه

همام : شبيك بابا انت مخبل رسمي كوم شكو تضحك
ياسر : هذا متنرفز طلع قهره بية اني

فهد : شكلتللككك البارحه يم الباب مو كتلك اني اعلمك استلم هاذهوه مشكلتك بعد لا احترام لا شي مهندس شكبرك شكدك وهاي سوالف المزعطه بطلها

ياسر : لا بالله

فهد : اششش ولا كلمه

همام يضحك : هيووو انت الثاني فهد طاكلك عرج شبيك خويه دخن دخن لتضوج

كام ياسر وهو لازم راسه: اوف ولج رحاب لحكي لابنج تكسر ورا دوام ورا بنات عزاا هسه شلون البنات بعد حيباوعن بوجهي جميل

رحاب : لك بس لو هذا لسانك تضبه جان هسه احنه بخير

زوزو : هو ياسر يستاهل بس گلبي مينطيني اشوفه ينكتل

شمرلها ياسر بوسه بالهوا: حبيبتي انت يبعدهم كلهم .. يا بعد فهدد

فهد كاعد ويباوعله وحاصر الضحكه

نزلت فرح تركض : سبيت ياسل منو تتلت ( شبيك ياسر منو كتلك )

ياسر : فهد ولج عمج فهد هذا ال .. مكمل كلامه وكال اعوذ بالله

فرح : فهدددد ليس تتلت ياسلللل ( فهد ليش كتلت ياسر )

رفع فهد حاجب : ايباااااخ وانتي شعليج عيني ليش دافعيله

فرح : ختيههه ( خطيه)

فهد : لا مو خطيه لان وكح

ياسر : وكح بعينك ششايفني كدامك اشرب ممه

فهد : اي متكول لنفسك على هاي تصرفاتك

ياسر : اروح اصعد لغرفتي احسن

فهد : اي والله تسوي فضل واحسن بهواي صراحه

همام : يمعووووودين استهدوا بالله شجاكم

فهد : اي اي

@@@@@@@

بابل / بيت احلام

روان
كاعدين بالليل كلنا سوه وامي تسولف ويه خالتي وكوثر متطلع من غرفتها ابد ولا تجي يمنا وتتقرب بس مهدي لا كلسع ذاب حجايه ويوسف يهدأ بي وميفيد ورزان انتبهت لكلشي وعرفت

مهدي : شوكت تروجعون لبغداد ؟

تنهدت امي وكالت : مادري والله يا خاله

انكلبت خلقته ١٨٠ درجه مدري شبي كمت دا ارجع الغرفه جتي ورايه رزان هي وخايفه

رزان : روان ترى بنان خابرتني الصبح و مادري منو مخابرها كايللها انهزموا بس كلتلها كلشي ما بينا وممهزومين

روان : هاي منو داك عليها

رزان : والله مادري .. خاف فراس

روان : يسويها هالطايح الحظ

اجه يوسف و رزان طبت للغرفه

يوسف : احمم .. اني اجيت اعتذر بالنيابه عن مهدي

روان: شكراً يوسف ميحتاج .. هو اللي يكوله اله حق ومديجذب بي

يوسف : لا شنو هالحجي روان بس يعني هو هم شاخط مسحيها بوجهي

اجه صوته متنرفز: شنو مسحيها بوجهي شنو اعتذر
لا شكو تعتذر هذا الصدك واتمنى بأقرب وقت تروحون من بيتنا وحاجي امج عود وين متروحون روحو هنا مستحيل

تعصب يوسف صك على اسنانه وحجى : مهدي الزم حدودك

باوعتلهم بقهر : الله ليعوزنا على أحد بس احنه واكعين بمصيبه واضطرينا نجي هنا وان شاء الله من باجر نشوف وين نروح شكرا للاستضافه

ضحك بحقاره : ياريت والله تخففون عنا

يوسف : معليج روان ادخلي جوا اني اتصرف ويه هذا

مهدي : اشوف شلون .. وانتِ شلون هيج طالعه وشعرج متستحين امج ملبستج صخام بشعرج

تنرفزت منه ورديت : انت شعليك هاا انت شعليككك

يوسف : كافي مهدي كافي والله ترى إذا سويت اي شي اطلع واهج من البيت

ضحك وكال : هي هاي الناقصه بعد

طبيت للغرفه واني مقهوره وراسي راد ينفجر .. يتدخل هم شنو هالانسان هذا ياربي دخيلك

___________

بيت فهد

بنان
كاعدين بالليل كلنا مجمعين بالصاله ونسولف وياسر وفهد واحد زعلان من الثاني و مريم فرحانه لان باجر راح تروح لبيت اهلها وحسن حيوديها و همام غريب الأطوار ساعه يضحك ساعه يسكت و ريم وحسن يناكرون زوزو عمو محمد يباوع اخبار

اباوع الهم .. عائلتهم كلش حلوه .. متعاونين .. و خاله رحاب تعرف تتصرف وياهم كلش زين

وكل واحد بيهم اله شخصيه حلوه واجتماعيين تمنيت ولو للحظه انوا اني بنت هالبيت من صدك
طفوله ضايعه .. مراهقه متشتته .. وهسه !

هسه مادري شلون عايشه اني تعبانه كلش بس تعب مو طبيعي ولا قليل وبالذات مرضي كلش يتعبني بس مع كل هذا ساكته

باوعت لفهد شفته صافن علية كلبت وجهي هذا الثاني هم متغير مادري شبي وخايفه لينقل وشلون بعد اضل وحدي هنا مع العلم حبابين بس عندي خوفه قويه

فهد مصدر الامان كل ما اشوفه ارتاح حتى لو احنه زعلانين من بعض بس احس بأمان من اشوفه كبالي

_________________

جنا بالغرفه كاعدين كلنا اني ورزان يمي وامي
حسينا على دك بالباب قوي مو طبيعي طلعنا يم خالتي نتراجف

صاحت احلام على يوسف ومهدي وكوثر لازكه بأمها وتريد تبجي

مهدي : معلية اني لحد يدخلني بمشاكل هذوله خوش ؟

راح وطب للغرفه ورزان و امي وخالتي يتباجون اباوع على يوسف كلي : احتمال هذا ابوج جاي طببيهم للغرفه امج ورزان ونشوف شيصير تمام
هزيت راسي بأي ورحت طببتهم

رزان : لج يمه لكانه جنت حاسه والله العظيم راح يلكانه

روان : مو انتي بومه استغفرك ربي

الهام : ياربي دخيلك احفظنا احنه بأمانتك .. " روان و رزان بأمانتك يا ربي احفظهم من كل شر "

حظنا امي وبجينا موقف صعب حيل واحنه نسمع يوسف يعيط على جمال برا ويتعاركون وجمال مُصر انوا احنه هنا

سمعنا الباب انطبكت حيل ويوسف يعيط ويكله اطلع من بيتنا لتطب وحسينا بي دخل جوا واهلي يبجون
اني الوحيده الي جنت متمالكه نفسي بيهم وما بجيت رغم الأنهيار الداخلي والخوف الفضيع
اندفرت الباب علينا

جمال .. جان شكله يخرع ويهلوس ووضعه مو تمام
ابد

ضحك ضحكه مو طبيعيه وكال : اني جمال هَهههاي .. لو تروحن للقمر هم الكاجن

................................................

ياسر

واكف بغرفته ويباوع من الشباك للسما
وعيونه تلمع وهو يفكر بيها

دندن بصوت ناصي وهو يغني :

لِيلية اشُوف السما
واتخَيل عِعيونك
ما فَكرت ليلة وَلو
بالعِيشه من دونك
مو فارس احلامك نعم
بس انتَ كِل احلامي
والدِنيا ضَلمه بغِيبتك
يا گمرة ايامي ..

وينها روان هسه .. معقوله زعلت هيج زعله قويه
مفكرت تتصل على ريم وتكول هالمسكين أخو ريم يريد يسمع صوتي ويطمئن

صح اني اضحك كلش هواي لكن هي محتله جزء جبير من تفكيري ومستحيل اكدر انساها .. هيج الحب صعب وينك وين الحب ياسر انت وجه حب بربك
تنهد بقهر وهو عيونه ثابته عالكُمر

_______________________________

رزان

اخذنه وطلعنه من البيت حاول يوسف يمنعه لكن جان وحده وما كدر ومهدي جان بس يبتسم ما تدخل ونفذ كلامه ومحد كدر يسوي اي شي

طلعهم مثل مجان مفكر وأخذهم وانواع الغلط وهو مجان بوعيه واللي واضح انوا شارب وبي ريحه

جمال : الكاجن يا كح*** عبالجن تنهزمون من عندي لا والله الكاجن ولج انتي الثانيه المهزومه بليلة عرسج هذاك هو رجلج يدور عليج وما اله نفس بيج وكال راح اطلكها وافصخ الخطبه حيوانات الا ابيعجن ومصيركم مثل مصير بنان واني الكم طلعت عينجن بس اني اعرف شراح اسوي

روان : مو بكيفك مووو بكيفكككك

انطاني بوكس ع حلكي وبدا يجري دم

أخذهم بالسياره وراح متوجه لـ بغداد

روان
ساعتين امي و رزان يبجون واني اعيط على جمال ويريد يكتلني وأبد مادري اصلا شلون ساق السياره اصلا لأن مجان بوعيه ويغلط ويعيط وكل شوي راد يسوي بينا حادث ويبدي يسب ويغلط

وصلنا بالمعجزات لبغداد
اول مدخلنا الفرع مال منطقتنا تلكانا فراس ولزمني من شعري وهو يكتلني واني اكتل بي يكتلني وارجعله كتله وجمال شبعهم كتل لامي ولرزان صاروا ب ايده اباوع لوجه امي بعد متتحمل وكله دمايه ورزان انتهت بأيده صاح جمال على فراس يجي ياخذني اني ورزان للغرفه ويقفلها وفعلاً اخذنا واني ادفع بي وماكو ميفيد

دفعنا بالغرفه وقفلها علينا

صرنا نسمع صوت امي وهي تتوسل بجمال يطلعنا وتبجي وتعيط وميفيد

سمعته كال : مفاد وياهم اي شي راح ابيعهم احسن شي مثل ما كسبت فلوس براس بنان .. راح اخذ فلوس براس هذنييي هم

رزان " تبجي " : عزه عزه روان راح يبيعنا
باوعت لرزان منهاره عطت عليه: تحلمممم تودينا لمكان

جمال : انجبي لج ***

وراها صار هدوء وفراس صوته اختفى
كعدنا واني ورزان تبجي ومنعرف شنسوي

والغرفه الي حبسنه بيها جان بنص الباب جامه بس اذا نباوع منها متبين بوضوح ..

سمعنا ضحكة جمال كلش قويه بعدها سمعت صرخه من امي .. و طلق نار
طلقه !

وكفت رزان وعاطت بعلو صوتها : يمهههه

نهاية البارت
يتبع ..

(لا تنسوا التصويت)

إلى اللقاء يا أعز العابرين في قلبي ♡.

الكاتبات دينا & نور