رواية نقطة لقاء الفصل السابع عشر 17 - بقلم الكاتبة دينا _ الكاتبة نور

ياسر : روان !

روان : اي

دخلت روان ورزان للبيت

حجيت بصدمه : شبيكم ليش هيج .. اقصد شبي وجهكم شنو منو مسوي هيج بيكم

روان : ياسر صيح بنان

صاح محمد : ياسر منو عالباب

ياسر : خطااااار

ريم نزلت وشافتنه
شهكت بصدمه وعيونها مدمعه

ركضت وهي تحضنه وسلمت علينه

روان : ريم عليج الله صيحي بنان بسرعه ما اكدر اضل واكفه

ريم : شبيج روان احجي

روان : كتلج صيحي بنان

صعدت ريم تركض على بنان و طلع محمد و شافهم وملامح الصدمه على وجهه ورحاب نفس الشي سلموا عليهم وضلوا ساكتين

حجى ياسر بعصبيه : منو سوى هيج بيكم؟؟؟
سكتت روان وهي مدمعه

خلال هالاثناء نزلت بنان تركض وراها فهد وهمام
نزلت وانصدمت من أشكال خواتها

ركضت بسرعه وبدت دموعها تنزل وحضنتهم وهي تبجي وروان و رزان يبجون

عاطت بنان وهي تبجي : احجوا منو سوا بيكم هيج احجوااا

بجت روان وكالت : بنان احنه انتهينا

صاح فهد : شنو انتهيتوا شصاير وليش هيج وجوهكم كلها دم

" باوع لملابسهم وكمل بعصبية " : حتى ملابسكم .. شصاير ؟؟؟

همس همام لياسر : جريمة قتل ؟

ياسر " بعصبية " : انجب خلي نسمع

بجت بنان وهي تصيح : احجوا شبيكم لتخوفوني

محمد : بويه احجوا خلينا نفتهم الموضوع لتضلون ساكتين

حجت رزان وهي تبجي : امي ماتت

بنان : شنو ؟

روان : امي ماتت بنان ماتت وهسه احنه انهزمنه

بجت بنان بعدم تصديق : شنو ماتت انتوا شدتحجون

فهد : اريد افتهم احجوا من البدايه كلشي

بنان
جنت بوضع ميسمح بس شفت حالتهم تخبلت ما ادري شصار بيه اباوع علئ روان ورزان كلها اثار ضرب ..
ومنا يكولون ماتت امنه مجنت مصدكه اي شي دموعي تنزل واباوع لخواتي وهنه يحجن وانتبه علئ كل كلمه ديكولوها

مجنت اريد اعرف اللي صار .. تمنيت انوا يكون كل الي ديصير حلم وانو امنه الي ربتنه والي ولا يوم حسستنه انوا احنه مو بناتها انو تموت!

..بس هذا قدرها
قدرها تموت ب ايد جمال

فهد : شكو واكفات تعالوا كعدوا بالصاله

اخذتهم رحاب للصاله وراحت ريم تجيب مي الهم
بنان ابد معافت خواتها وتسمع الهم

بجت روان وهي تشهك وتحجي : اول بارحه بالليل كال جمال انوا رزان تزوج باجر ومراد اي نقاش وياه وحدد

اني والله كله بسببي أن شاء الله اموت

ياسر : هيووو شنو تموتين

نغزه همام : انت اسكت خل نسمع من البنية

جتي ريم وجابتلهم مي

كملت روان وهي تبجي : اقترحت انوا ننهزم و أخذنا غراضنا وانهزمنا بابل لبيت خالتي احلام تذكريها
هزت راسها بنان وهي تبجي

جنه مطمئنين بس رزان طول الوقت جانت خايفه وتفكر شراح يسوي

بنان : يعني جنتو صح مهزومين بس مكلتولي ؟

روان : رزان خافت عليج وكالت تضل تفكر بينا

كملت وبدت دموعها تنزل : رحنا يوم كامل يمهم بس بالليل اللي ما توقعناه لكانا جمال

بس مجان صاحي والله شكله عبالك وحش طب للبيت غصب عن الكل وأخذنا كلنا ورجعنا لبغداد

جان فهد مصدوم من اللي يسمعه : وبعدين ؟؟؟

روان : بعدين رجعنا للبيت يعني شتتوقعون شيصير كتلنا هو وفراس بس امي تأذت اكثر شي من جمال
وراها حبسنا بالغرفه ونسمع الصوت يكتل امي وهي تكوله طلعهم وعوفهم وتتوسل بي بس مجان اكو فايده

اختفى صوت فراس بس وراها سمعنا صوت طلقه

همست لبنان : رزان لحد الان ماعرف شبيها

كملت وهي تبجي فتح النا الباب وجان يضحك
كال اشبعوا منها هاي لحظاتكم الاخيره
طلعت ياريت مطلعت والله راح اموت

امي جانت ميته بنان ميته مشفتي المنظر انتي لج جانت الكاع كلها دم ياربي لو ميته بمكانها اني
بجت بحرگة وهي تحضن بنان بس بنان جانت تنزل دموعها وهي تهز راسها بـ لا

كامت بنان وهي تحجي : امي ما ماتت مو صح
فهد امي مماتت .. امي ما ماااتتت

وكعت بالكاع وهي تصرخ وتبجي
صاح فهد على ريم حيل : ريم أخذي روان ورزان يمج بالغرفه

هزت راسها بخوف واخذتهم وياها
وفهد جان مخبوص وميعرف شيسوي

زوزو جانت تبجي وهي تسمعهم ودموعها تنزل
ورحاب ومحمد نفس الحاله بحالة صدمه من اللي سمعوه .. يعني اهلهم ممسافرين مثل مكال فهد ؟؟؟

صرخت بنان بوجه فهد وهي تبجي وجها احمر : امي ما ماااتت اللي يحجو مو صح

حضنها وهمس الها : اشششش كافي امشي فوك اهدأي ليصير بيج شي

صعدها فوك جان محتاج هدوء حتى يحجي وياها يساعدها ويفهمها

لزمت وجها وصلت تبجي وتصرخ وتعيط : امي ماتت شلون فهد شلون والله مشايفتها ما اتحمل بعد

ماتت واني مشايفتها والله اموت وراها
ما اكدر انساها الله لا يوفقك يا جمال وفراس عسى كسر ب ايدك الله لا ينطيكم

صاح فهد بقهر : صيري قويه بنان ما شفتي خواتج شلون وضعهم انتي ما شفتيها شلون ميته بس هنه شافوها

صيري اقوى من عدهم ساعديهم احجي وياهم اذا شافوج هيج هسه شيصير بيهم هاا ؟

بجت وحضنته لا ارادياً : ماكدر فهد متعرف هاي الانسانه انت مراح تعرف اللي حسيت بي والاحس بي

جنت اريد ارجع حتى اشوفها هي وخواتي هسه اني المن ارجع بعد راحوا كلهم فهد امي ماتت تعرف شنو ماتت ما اتحمل والله كل هالألم .. مجانت امي بس والله

بدت أيدي ترجف واجر النفس بالكوه وگلبي ينبض سريع

لزمها فهد بقلق من وجهها وكال : اهدأي بنان باعي علية .. بس اجيب العلاج واجي لتسوين اي حركه ليصير بيج شي يمعوده

راح جاب دواها وانطاهيا وشربته

جانت لحد الان تبجي وهي تحجي : ماعرف شلون انام وامي ميته .. احس اني هم متت

فهد : كلنا على هذا الطريق

عاطت بنان وهي تحجي : مو كلنا هذا موت الله وكلنا عالطريق هذا اعرف ونعم بالله بس هاي جريمة قتل تعرف يعني شنووو هااا لك امي الانسانه الي ربتنه ماتت ماتت !

فهد : اششش كافي حقج وحق خواتج اخذه واندم جمال علئ كل شغله سواها وياكم وهسه تغاب تمددي رتاحي

لزم راسه بعصبية وكال : اذا ما جبتك يا جمال ما اطلع اني فهد

غطاها وكام طلع وراح لغرفة ريم اللي جانت عبارة عن الكل موجودين بيها

جان ياسر واكف وملامح العصبية على وجهه وهو يباوع لروان تبجي ورحاب تحاول تفهم الموضوع ومحمد يحجي ويه همام

راد يطب فهد بس لزمه محمد بعصبية : شنو هذني مو خوات بنان انت مجذب علية شنو اهلهم مسافرين شنو يم بيت جدهم اللي سمعته يختلف فهد

فهد : بويه هسه افهمك بس خلي احجي وياهم متشوف حالتهم

محمد : داشوف بس ليش جذبت

فرك راسه بعصبية وصاح لهمام و ياسر : اسمعوا كلكم هسه تنزلون جوا ورا دقايق راح اجي واحجي وياكم بموضوع مهم حيل ما اريد هاي الهوسه بس اني اضل وياهم اصخم وافتهم الموضوع زين واعرف ششتغل شبدي وشسوي

محمد : انت لتعيط ولتاخذنا بعصبيتك هاي خوش واني انتظرك جوا حتى افتهم الموضوع زين فهددد

اجه وقت الحقيقه
اختفائهم اللي مدته 18 سنه
هسه راح ينعلن وكدام البيت والناس والعالم كلها
راح اكول لاهلي وما اكدر أضم أكثر من هيج
جان مخططي انوا الكى جمال بعدين أخذهم بس اللي صار العكس

هنه اجوي لـ هنا .. وهسه راح اضل ادور على جمال لو اعرف هو بالمريخ هم اروحله للمريخ واجيبه

راح يتأذى الكل بهذا الشي وبالذات بنان خايف عليها كلش لان هي مريضة قلب وضربتين عالراس توجع
اولها وفات امهم اللي ربتهم طول هالسنوات واعتنت بيهم

وثانيها همه بنات عمي وخالتي نفس الوقت والحقيقه صعبه

زوزو راح تفرح وتتأثر اكثر وحده لان اكثر وحده بينا تأذت من بعدهم وطول هال 18سنه هي ما نستهم وعلى طول بدماغهم

اجى وكت كلشي ينكشف ويعرفون كل شيء ...

دخلت للغرفه شفت ريم حاضنتهن وكاعده تواسيهن
ورزان و روان بس يبجون بس جانة حالة رزان غريبة تبجي وتسكت وتضل ماعرف شتحجي كعدت يمهم وبديت احجي

فهد : روان .. رزان اسمعوني .. من اليوم ورايح انتوا بأمانتي وبأمانة البيت كله ما اريد اي وحده من عدكم تبجي ، وما اشوف دمعة اي وحده .. اعتبروني اني اخوكم الجبير شنو تحتاجون من عندي تعالوا كولولي اي نقص اي شي تريدوه وهاي امي جوا وريمه يمكم صديقتكم.

رحاب : اي والله اني احطهم بعيني وما اقصر وياهم

فهد : واني عندي موضوع وياكم

حجت روان وهي تمسح دموعها : شنوه ؟

تنهد وكال : اعرف هو صعب بس لازم الكل يعرف ما اكدر بعد اضل ساكت تكدرون تنزلون جوا ويمه هم انزلي وياهن وراح اجيب بنان ونجي تمام انتظروني كلكم ما اريد اي واحد ما هوا

رحاب : بس خل ننتظر حسن على جية من شغله واحجي

هز راسه : تمام يلا انتظروني

نزلوا جوا كلهم وكعدوا ينتظرون

راح فهد لغرفة بنان وعيونه حمره وراسه مصدع وميعرف شلون راح يعلن السالفه وشنو ردة فعلهم
بنان و التؤام شنو راح يكون شعورهم

"راح لبنان وكعد كبالها وهو يحجي بهدوء وصافن عليها" : أنتِ بنت عمي .. وبنت خالتي هم .. شنو راح تكون ردة فعلج من راح تعرفين احنه اهلج

حجى بهمس يم أذنها : بنان .. بنااان

فتحت عيونها وصار بوجهها ، دمعت عيونها وكالت : جنت بحلم اني مو ؟

فهد : شنو بحلم

بنان : امي ما ماتت

فهد : ما اكدر أنكر الحقيقه ، بنان امج صح ماتت بس ميصير تسوين بنفسج .. شكلج انتهي وجهح مخرمش واحمر صوتج راح بالكوا تحجين حتى بالكوه تتنفسين

واني كتلج اطلع حقج وحق خواتج واحد ورا
الثاني .. بس انتي اريدج قويه بنان قويه كلش ومحتاجج بموضوع ما اريدج تضعفين كدام خواتج لان من يشوفوج بهيج حاله راح يضعفون ومراح يحسون عدهم سند وانتي اختهم الجبيره العاقله الفاهمه تحملتي اشياء صعبه

بجت حيل وهي تشهك وعيونها حمرا وصوتها راح : امي ماتت فهد امي ماتت شلون تريدني اصير قويه كولي شلون ها ؟؟ المن ارجع اني بعد وشعندي هنا انت جنت تساعدني وهسه امي ماتت .. جنت اريد ارجع علمودها وعلمود خواتي بس هسه خواتي همه اجوني

راسي مدا يصدك هالاشياء احس روحي بغير عالم !
معقوله كل هذا صار بيوم وليلة

فهد : بنان كافي دتأذين نفسج هواي واني الحجي قبل شوية حجيته المن ؟ اني عندي موضوع كلش مهم وياج وويه اهلي كلهم دينتظروني جوه كلهم وننتظر حسن هم وخواتج هم الهم صله جبيره بالموضوع هذا

" حجت ب استغراب" : شنو الشي المهم أكثر من هذا ؟

فهد : كلش مهم بنان .. لازم تحاولين تصيرين قويه ادري الوضع ميسمح بس لازم صدكيني لازم

بجيت وكلت : جنت ما مرتاحه ابد وكلبي ناغزني طلعت امي ميته

فهد : ولچ بويه كافي انتهيتي واني ساعتين اخرط واكول صيري قويه .. بس هالدقايق وحاولي تتفهمين كلشي بعقل واعي خوش بويه ؟

هزت راسها وهي تبجي

فهد : اي وانتي تبجين شلون ننزل

بنان : امشي ننزل فهد عيب دينتظرونا صدكني راح احاول كله علمود خواتي وبس

" ابتسم فهد وعيونه تلمع ": كل متحسين بضعف وخوف تذكري بظهرج فهد " درابين گلبي أنتِ "

ابتسمت بنان وهي تسمع لكلام فهد و نزلوا جوا
جانت بالكوا متمالكه نفسها وعيونها متجمعه بيها الدموع

فهد جانت نظراته غامضه ومو مفهومه بالنسبه للباقين عرفوا انوا اكو شي جبير

جانت روان كاعده وساكته ونفس وضع بنان مدمعه
نظرات ياسر جانت مليانه قلق عليها وكلسع همام ينغزه

رزان جان حالها مثل الصنم متحركت ولا حجت بس بجت وضعها مخيف حيل

ريم جانت تواسيهم وكاعده يمهم ورحاب و زوزو يتهامسون ، ومحمد عصبي

كال فهد ل بنان : روحي اكعدي

محمد : شرف الاستاذ فهد يلا احجي هسه اريد اعرف

همام : يابه حسن ما هوا ميصير بعده بالطريق

محمد : معلية اني اريد اعرف كلشي هسه

فهد : على كيفك يابه اهدأ موضوع حساس كلش ويخص الكل

زوزو : دحجي لك فتيت كلبنا فتتت

ارتبك ومسح على شعره : ماعرف شلون ابدي الموضوع وياكم

ياسر : شنو شلون فهد هو اصلا شنو الموضوع ؟؟؟؟

باوعلهم بأرتباك ونظراته ثابته على بنان ومراقب وضعها وخايف حيل لكن بان كلشي ولازم الحقيقه تطلع .

فهد : اسمعوا يعني ادري الموضوع راح تنصدمون من عنده حيل .. ما اكدر أضم عليكم اكثر من هيج وما اريد اسئله زايده و ملحه علية اللي راح احجي اني متأكد من عنده مليون بالمية وبحثت عن كل شي ووصلت

محمد : احجي نسمعك

باوعلهم بقلق وهو يتابع نظراتهم و تعابير وجههم

فهد : بنات عمي اياد و خالتي سراب

حجت زوزو وهي مدمعه : اوف يا فهد بيش جاي تذكرنا انت

ريم : اي كمل ؟

فهد : ما ميتين

كمز الكل بصدمه

محمد : شلون ما ميتين

رحاب : شلون عرفت

فهد : اني عرفت كلشي بصفتي ضابط جبت المعلومات بدقه وبحث دقيق

محمد : كمل بويه اسمعك بس شدخل الموضوع بالسالفه اللي كتلك عليها ؟

فهد : هي هنا

ياسر : شنو هنا ؟

تنهد وهو يباوع لبنان اللي بعد شوي تبجي وروان ورزان حالتهم مو طبيعيه

حجى بصوت عالي وكال : البنيه والتؤام اللي نفقدوا خلال 18 سنه من يوم الحادث الماتوا بي عمي اياد وخالتي سراب همه نفسهم بنان وروان و رزان كام الكل بصدمه

بهالاثناء ياسر ضحك ضحكه شعلوها

همام : اسكت ولك شبيك

ياسر : لك بس لا يضحك علينا هالفهد

بجت زوزو : يمه عليك الله صدك دتحجي

فهد : كلتلكم اني متأكد من كل خطوه

كامت بنان وعاطت : شنو بنات عمك وخالتك شنو هالحجي هذا ؟؟؟؟

روان : شلون عرفت ها ؟؟ شنو اليثبت

رفع حاجبه وكال : تمام تجون لغرفتي اشوفكم الادله ؟؟ كلها مخزونه بالآبتوب

كام محمد وهو يباوع الهن ودمعت عينه : بنات اخويه انتوا ؟؟؟

رحاب : فهد خاف دتجذب علينا صدك تحجي ؟؟؟؟

حجيت بغصة وممصدكه الموضوع : فهد تحجي صدك شنو بنات عمك شنو بنات خالتك ترا راسي حينفجر ؟؟؟

ريم : فهد من يسوي حاجه متأكد من عدها مليون مره يلا يحجيها

رزان : مهما يكون بس نريد نعرف

كل هذا اللي صار لكن روان جانت نظرات حقد وبس تباوع وممصدكه اي شي

باوعتلها بنان : روان

حجت روان بعصبية : روحي واني ماروح لان مستحيل اصدك

محمد : عوفيها بنان روحي انتي ورزان

حجى فهد بعصبية : كافي كافي شنو هالوضع هذا هنه هذني بنات عمي وخالتي الي نفقدن وما ماتن بالحادث واخذتهم عائله وربتهم وهذا كلشي

اذا متصدكوني تعالوا اشوفكم كلشي واذا حتى لو مصدكيني هم اشوفكم

ضحك ياسر لهمام وكال : عمي والله لو تطلع روان بنت عمي وخالتي اوزع جكليت لوجه الله

همام : انت بس هذا اللي يهمك ؟؟

ياسر : چا شنو ؟

كامت روان و بنان بس البقية محد تدخل
ريم جانت تبجي وهي كاعده بصف روان اللي مصدكت اي شي وما قبلت حتى تشوف ادله و زوزو تبجي ورحاب تبجي وتهدي بيها

ومحمد عيونه مدمعه وهمام يحجي وياه

_________

فات فهد للغرفه واندار لرزان و بنان

فهد : راح اشوفكم كلشي

بجت بنان بحُركة : انت شنو تضحك علينا فهد صدك تحجي ؟؟ شلون بنات عمك كل هذا اللي صار صدفه معقوله ؟؟

فهد خنزر وگال : مااعتقد فد يوم ضاحك عليج اني راح اشوفج كافي بجي .. تعاي رزان ليش ضايجه هسه اطلعلكم كل شي

كعد وفتح لابتوب كدامنه ويمه ملف كله اوراق وكعدنه يمه وهو مركز وبدا يبحث ويكلب ويحجي كل المعلومات اللي حصلهن وبالفعل جانت المعلومات أدق التفاصيل عنه

بجيت بحركة بعد ما تأكدت من كلشي : شلون هيج شلون

ويه وفاة امي كلشي طلع .. وين جنتوا عنا ها؟؟ طول هالسنوات عنا انتوا وين تعبنا وتأذينا بسبب جمال و

بجت وهي تشهك وكملت .. وفراس والاذيه اللي صارت هاي كلها النا

بطلني من المدرسه وهاي جانت البدايه لكل معاناتنا
وين فهد وين معقوله ما كدرتوا تلكونه واحنه نفس المحافظه بيناتنا مناطق بس !! محد لكانا طول18 سنه

من جان عمري سنه فهد تعرف شنو

كامت رزان وهي تبجي : مستحيل

حجى فهد بهدوء : اتقبل كلشي راح تحجوه لان من حقج ومن حق الكل لكن صدكيني مو بس ابويه وعمي محمود هم جان يدور ما خلوا مراكز حكوميه مستشفيات دار ايتام دور بكل مكان لكن ما لكى اي اثر منكم لحظتها الكل فقد الامل وعبالهم انوا توفيتوا ودفنوكم بالحادث مرت هالسنوات لكن ذكركم مراح من بال اي احد

رزان : شلون صار كل هذا شلووون !

ابتسم فهد لرزان : شفتي كل شئ بعينج هسه مستحيل اكو جذب بالموضوع

بجت رزان وحضنت بنان وصاروا يبجون ومحد ما مصدك أحد

من خلال هالاثناء دخلت روان وهي عصبية
وركعت الباب حاولت ريم تطلعها لكن ما كدرت

روان : مو من حقك تتلاعب بينا .. ما اصدك انت واحد جذاب

فهد بعصبيه : اول شي الزمي السانج واحجي عدل وهاج شوفي الادله ؟؟

عاطت : ما اريد اي ادله .. وين جنتوا انتوا طول هالسنوات لعد .. ليش حطيتونا ب ايد جمال ليش عفتونا وليش ما دورتوا علينا .. كل هالاشياء جانت صدفه كلها ؟؟؟؟

حتى زواج بنان منك على أساس تحميها هم جان كذبه !

فهد : اني ضابط ميصعب علية شي الا والكاه ومتأكد من عنده يلا احجي بي وهاي بالنسبه الج بس مفتهمت هسه انتي مصدكتني لو جايه تعاتبين خلي افهم حتى ارد

رزان : لا مصدكتك ولا أعاتب

بنان ورزان انصدموا من روان والجرأه اللي جانت بيها ؟؟

بنان : روان اكعدي خل نفهمج

بجت روان وهي تباوعلهم : امي ماتت يا ناس يا عالم وهذا يكول انتوا بنات فلان وفلانه راح اتخبل اني راح اتخبلللل

فهد : ولج اوكفي أخذي نفس اخذتينا حاصل فاصل اهدأي اهدأي

روان : شهدأ ها شهدأ

رزان : كافي روان اسكتي خل نشرحلج الموضوع

روان وراحت كعدت : حتى لو اصدك لكن مراح اكدر اسامح الكل

بجت بنان : روان هاي الحقيقه

فهد : ربي دخيلك راسي راح يطك كلكم جاي تبجون و ومدا اركز واسمع بس صوت بجي داكول اهدأوا شو تزيدون يعني هسه انتوا مفرحانين ؟

روان : شنفرح ها شنفرح علئ شنو نفرح بعد كل هل سنين تجون فجئه والله يا عيني احنه اهلكم وتعالوا تقبلونه

فهد : اني وياج وحقج الي دتسوي بس هيه هاي الحقيقه واحنه دورنه وملكناكم

دخلت ريم تبجي : زوزو تريد تشوفهم وتبجي جوا كلهم كالبيها مناحه

راحت ريم اخذتهم وأشر فهد الهم انوا ينزلون

روان : ما أنزل اني

بنان : انزلي واني اجي وراج

باوعت بعصبية وسحبت رزان وياها وطلعوا

فهد : بنان

بنان : ها فهد

فهد : اسمي يطلع حلو من تكوليه

بجت وهي تكول : اني وين وانت وين من كل عقلك !! هسه انت ابن عمي ! وابن خالتي

هز راسه : اي يبت عميي

بنان : راح انزل على زوزو

فهد : تصير بيبيتج ام ابوج
امي تصير خالتج
ابويه يصير عمج أخو ابوج
وكلنا ولد عمج و خالتج سوا

بنان : مدا اصدك شلون هيج صار ها ؟؟
امي ربتنه ماتت البارحه ..

بس انت شوكت عرفت وجمعت هاي المعلومات

فهد : هذا جان شغلي اللي مانعني ارجعج
جنت اتاكد يوم عن يوم يزيد الشك أكثر وابحث اكثر إلى أن وصلت لكل شي

بچت وكالت : بس شوف قبل لا انزل على بيبي اريد من عندك طلب

فهد : " عيوني الچ"

بنان : سالمه عيونك ..

فهد : الطلب ؟

بنان : تلكى جمال وفراس وتعتقل هذوله الاثنين
هذوله ما اريد يوم فرح بحياتهم فهد تعرف شنو يعني هذوله أعدائي

فهد : فراس شمسوي

سكتت بنان ودموعها تنزل بهدوء : هيج

رفعت راسها وكملت : بس لازم تاخذ فراس هم
انت مو ضابط .. انت مو ابن عمي هم ؟

فهد : تمام بس السبب شنو شمسوي فراس هو اللي قتل الهام امكم هو جمال

بنان : الله ياخذه مو بس هو فراس تدري شنو وشيسوي ؟

فهد : شيسوي ؟؟

بنان : هيج

حجى فهد بغموض : هو جان زين وياج

بنان : لتجيب طاريه كدامي

بچت وهي تذكر امها : فهد امي هسه وينها وين وداها جمال وين ذبهاا حتئ محنكدر ندفنه مثل الاوادم

فهد : راح اسوي كلشي حتى أخذ حقج وحق خواتج وحده وحده وان شاء الله الكاه ومثل ما ردتي

وسالفة فراس نتناقش بيها بعدين ما ارتاحيت اله

بنان : عوفها

امشي اريد انزل

گلبي مجاي يتحمل هالاشياء هواي

فهد : كدام خواتج وبس صيري قويه .. مَثلي .. همه ياخذون الشجاعه من عندج مو يضعفون

هزت راسها ومسحت دموعها

فهد : امشي يلا

___________________________

نزلوا جوه جان الكل يبجي
واكثرهم زوزو جانت حاضنه رزان بس روان مقبلت وجانت واكفه بعيد وبس تباوع

زوزو : تعالوا يوم اشم ريحتكم انتوا من ريحة ابني
راحت بنان تبجي وهي تبوس بيها ورزان هم جانت تبجي

زوزو : يمه روان تعاي .. جان كلبي حاس ولج رحاب مو كتلج

ابتعدت روان أكثر وراحت صعدت راحت وراها ريم

ريم : روان شبيج ليش هيج

روان : اني مشكلتي مو وياج ويه اهلج .. مراح اسامح اي احد بيهم

حجى فهد وهو يباوعلهم : بعد ما سووا الحادث عمي اياد و خالتي سراب .. جانوا البنات عايشات ومابيهم شي بالمستشفى .. اخذتهم عائله وربوهم طول هالسنوات

محمد : بس اني دورت بكل مكان ويه محمود

فهد : صار اللي صار بعد

زوزو : اوف يا يمه الله يساعد كلبكم

رحاب : زين شوكت عرفتو اهلكم ذولاك مو حقيقين

بنان : فد يوم كالتلنا امي وعرفنا

حجى محمد : مدام لكيناهم باجر اسوي عزيمه واعزم شكو واحد اعرفه لوجه الله ..

حجت روان : منريد عزيمه نريد امي ..

باوعت لفهد وعيونها مدمعه : امي لازم نلكاها جمال مادري وين وداها هسه وين ذبها

فهد: من باجر راح ابدي اشتغل على هالقضيه وأدور عليها وأن شاء الله خير .. بويه العزيمه عادي تتأجل لغير يوم لان الوضع ميسمح

تنهد محمد وهو يباوعلهم .. راح وباس راس كل وحده منهم وكال

محمد : ما اريد اي دمعه تنزل من عيونكم من بعد هاليوم انتوا وراكم ظهر .. وراكم أهل وسند وعزوه

رزان جانت متتحرك وساعه تبجي وساعه ساكته وضعها مو طبيعي وبنان كضتها بجي

دخل حسن للبيت وجان يباوع بصدمه : شنو شكو شبيكم

ياسر : لكينا بنات عمي اياد وخالتي سراب

حسن : شنو شلون !! وينهن

ياسر : ما ميتات تريد تعرف كلشي احجي ويه فهد هذاك وينه .. بنان والتؤام طلعوا همه

حجى حسن بصدمه : شنو شلون

فهد : مثل اللي سمعته من ياسر مابية حيل اعيد واسقل

باوع حسن لبنان : يعني انتوا صدك

شلون صار هيج

راح فهد واخذه ع صفحه : شوف حسن روح ارتاح بالليل اجي يمك ونسولف وافهمك كلشي

هز راسه حسن وكال : فهد تحجيلي كلشي لان مدا اصدك

فهد : حقك بويه

حجت رحاب : تعالي يمه روان ليش هناك واكفه انتي
شوفي يمه ريم حضري غرفة بيبيتج لان متنام بيها الهم

ريم : لا يمه اني اريدهم وياي بالغرفه بس فراشات نجيب وهاهيه

رحاب : بسرعه يمه شوفي حالهم خطيه تعبانين كسر بايد اللي سوا هيج بيكم يمه شوف وجوهكم

راحت ريم تركض جابت فراش وروان راحت صعدت فوك ورا ريم

لاكاها ياسر والضحكه شاكه حلكه : الله شفتي الدنيا شكد صغيره يا بنت عمي

خزرته وكالت : مو بنت عمك

ياسر : اعصابج عمي .. بس يعني دا اكلج .. جنا بالبدايه واحد غريب عالثاني وهسه صرنا اقرب الناس تؤ تؤ سبحانك ربي

روان : خليني اروح وخر من دربي مالي خلك اي احد وبذات انت

ياسر : ماوخر خل اخلص كلامي .. شنو هاي شبي وجهج هيج ها منو كتلج هيج الا اكسر ايده

روان : مراح تلكاه ويلا وخر

ياسر : ماوخر شتسوين

روان : مو بحالك مووو بحالك وخر من يمي

ابتعد وهو مبتسم وحجى بكلبه : اوخر .. ورانا درب طويل اهخخخ هسه ارتاح كلبي

دخلت روان لغرفة ريم شافتها تحضر المكان : شكراً ريم على كل شي

ريم : اوف يا روان اتوقع كلشي الا هالشي شلون صرتي بنت عمي وخالتي صدكيني فرحانه

سكتت روان وكالت وين رزان

ريم : يم بنان كالت راح اجيبها واجي

روان : تمام اني راح انام الساعه 12
خلت راسها عالمخده ونزلت دموعها
حجت بكلبها : " يمه اشتاقيتلج "

طبت بنان وياها رزان

بنان : باوعي رزان خليج قويه تمام لتضعفين
باوعت رزان وهزت راسها وراحت نامت

بنان : شلونها روان ما حجت وياج

ريم : لا معاملتها سطحيه .. بنان احنه اقرب صديقات لبعض اني عاذرتها لان جان يوم صعب من حقها و الله يساعدها

بجت بنان : منين اتلكاها اني .. صدمات هواي
اولها موت امي وثاني شي انتوا بيت عمي وخالتي

ريم : انتي هم ارتاحي تأخر الوقت روحي نامي تمام شوفي نفسج وجهج انتهي وعيونج حمرا كلش تعبانه روحي ارتاحي ميصير تضلين هيج

طلعت بنان لاكت حسن هم صاعد : هلا بنت عمي الغاليه

بنان : هلو حسن شلونك

حسن : والله الحمد لله

بنان : شلونهم مريم و فرح

حسن : زينين .. محد يدري بالسالفه

بنان : كوللهم

حسن : لا خليهم من يجون يعرفون خليها تصير اكشن

صعد فهد ولكانه واكفين ونسولف
فهد " خزر بنان '' : روحي بنان للغرفه

راحت بنان للغرفه

حسن : علكيفك

فهد : اي اي امشي يلا مو تريد اسولفلك

حسن : ميحتاج ياسر موجود سولفلي هسه كلشي وصراحه فرحان مشايف فرحة زوزو خطيه

فهد : بس هنه هسه ترى مو فرحانات هواي لان امهم الي ربتهم متوفيه .. روان ورزان شايفيهن وهي ميته وكلشي صار كدام عيونهم .. رزان حالتها متطمن وروان مادري شبيها ممتقبله كلشي

حسن : الله يساعدهم هم حقهم مو شي سهل اي صار والله كل هل سنين بالاخير يجي احد يكول احنه اهلكم بعدهم شوي شوي يتقبلون الوضع

فهد : يلا اني حروح انهمد وراي شغل من الصبح انت محتاج شي

حسن : سلامتك

رحت للغرفه ولكيتها تبجي
سكتت وما حجيت شي لان خليها تبجي بلكي ترتاح

فرشت بالكاع ورحت اريد انام ماكدر كلسع اباوع عليها تبجي بس ما اكدر خليها متبجي بالنهايه هي امها حتئ لو مو امها الحقيقيه بس هيه الي ربتيها

مسحت دموعها وكالت : فهد انت كاعد

فهد : اي كاعد .. مكدرت انام وانتي تبجين

بنان : تمام سكتت

فهد : بالعكس لتسكتين ابجي حتى ترتاحين ولو حتى البجي ميفيد والوفاة صعبة .. بالذات الام

بنان : احس نار بصدري .. اني مشايفه امي فهد مشفتها من اخذتني انت من هذاك البيت المشؤوم

فهد : احس بيج

بنان : مثل ما وعدتني انوا ترجعني الها
اريدك توعدني تلكاها وين مجانت لان ادري جمال نذل لدرجه يشمرها بأي مكام وهيه متستاهل هل شب

فهد : ليضل بالج ان شاء الله الكاها وندفنه ونسويله احسن فاتحه وجمال اذا ما اندمه گلبي شايل عليه هواي

هزت راسها واختفى صوتها .. نامت

فهد ما نام طول الليل وهو يفكر بيهم

...................................................

كعد فهد الصبح وراح للشغل

بنان جانت نايمه والكُل نايم

كعدت زوزو الصبح ساعه 9 مثل وقتها كل يوم وكالت ل رحاب

زوزو : بلكي تجيبيلي البنات حتى بنان اريد اشوفهم واحجي وياهم

رحاب : مو خاف نايمين

زوزو : لا لا بس كوليلهم بيبيتكم تريدكم هسه يجون

نزل ياسر والضحكه شاگه حلكه : صباح الخير شلونكم اميرات ديزني

رحاب : عزا بعينك انت ممداوم ، يعني يوم واحد ما كعدت الكم متداوم

ياسر : يوم يا دوام بابا تعرفين شنو لكينا بنات عمنه
رحاب : لعد ريم وينها داومت لو لا

ضحك ياسر : هم لاا

رحاب : اوففف منكم تعبتوني والله بس اللي ما اشيل همهم هو حسن وهمام وفهد وانت وريم شالعين كلبي

زوزو : ولج روحي صيحيلي البنات اريدهم شكو تحجين ويه ياسر

ياسر : هسه اني صاعد اكعدهم لتشيلين همهم
صعد ياسر وهو فرحان ويضحك

وصل لغرفة بنان جانت اول وحده
وضل يدك لحد مفتحت بنان الباب
جان وجهها مورم من البجي وعيونها حمر

ياسر : احمم العفو ست بنان بس زوزو تريدج جوا

بنان : خطيه شتريد

ياسر : مادري كلتلي صيح البنات اريدهم

بنان : تمام حروح أصيح خواتي

ياسر : لا لا مو هاي شسمه يعني كلتلي خلي بنان تجيني بسرعه اول وحده

بنان خافت : تمام هسه حنزل اشوفها

ياسر توجه لغرفة ريم وهو يضحك ويحجي بين نفسه

لك الله يا ياسر عمي انت فد محظووووظ .. بس لا اني ليش افرح خطيه هي امها ميته بس شسوي فرحتي فاضحتني مو بيدي

دك الباب ومحد طلع إلى أن هجمم الباب هجم
العاده اللي ميبطلها مال هجم البيبان

ياسر : يمعوووودين اكعدنننن انفجار صار .. قنبلهههه ، ولجن اكعدن شهالنوم

فتحت الباب ريم وهي عصبية : شبيك انت شبيك مخبل وجاي تطلع خبالاتك علينا

ياسر : اي اي مخبل يلا تعالن نزلن وها يعني كعدي روان ورزان ينزلون لان زوزو تريدهم وهسه بنان نزلت

ريم : ولي روح بسيطه أني الك

ركعت الباب بوجهه وراحت تكعدهم

هاي شبيها وشسويت اني .. فوك ما اكعدها غير اخت هاي والله يالله

ريم
رحت كعدت روان ورزان

ريم : بنات زوزو تريدكم جوا

روان : ليش شتريد

ريم : مادري ياسر كال رادتهن وهسه بنان نزلت

رزان : يلا امشي روان ننزل

روان : ما أنزل اني

رزان : عيب مره جبيره ورادتنا

روان : ما انزلللل

رزان : تمام

كاموا ونزلوا جوا ريم و رزان

حجت رزان : ريم اني اعتذر بالنيابه عن روان بس هي هيج لانو ضايجه ويعني شايله بكلبها شويه بس بعدين راح تفتهم الموضوع وترجع مثل قبل

ابتسمت ريم : لا عادي رزان ماكو داعي تعتذرين اني اعرف روان زين عشرة عمر احنه

نزلوا جوا لكوا بنان كاعده يم زوزو و زوزو تبجي وتحجي وياها وكلسع تبوسها وتكول شكد حلوات
اول مراحت رزان هم ضلت زوزو تبوس بيها وتبجي

حجى ياسر : وين روان

ريم : مقبلت تنزل

ياسر : جا اني عليمن صاعد

ريم : واني شعلية يعني اجيبها سحل هي البنية ضايجه اني اعرف روان ما اكدر اضغط عليها خليها براحتها من حقها لان متعرف احنه شكد دورنا عليهن

ياسر : لعد شوكت تنزل

ريم : وهسه انت شعليك شنو كاعد علمودها ؟

ياسر : تكدرين تكولين هيج

ريم : انت شنو متوب

ياسر : يا اتوب بابا اني احبها

ريم : انجب خاف احد يسمعك

ياسر : لتخافين محد يسمع امان بس داكول الصدك اني احبها

ريم : الله يجمعكم صراحه يعني روان حقك تحبها هي حلوه ومو ناقصها شي

ياسر : لسانها طويل

ريم : هو المحليها

ياسر : عمي هي كلها عسل

ريم : اسكت لك مو وكتك اخاف لا احد يسمعنا

ياسر : سكتت

ريم : صدك انت ممداوم اليوم شو بس لا اللي بالي هم ؟

ياسر : هم اي

ريم : يمههه يمهههه

ياسر : مظلوم اني

ريم : اوي موهنديس ياسر مظلوم

_________________________________

فهد

اول ما وصلت الدوام بلشت بقضية الهام لازم بأسرع وقت الكاها بس اذا وحدي اكيد مراح اعرف
صحت لمؤمل يجي يساعدني بالموضوع ويبحث وياي عنه و هادي هم

احنه 3 ضباط بهيج حاله راح مكدر نسيطر عالوقت واحنه ندور ومن البحوثات

للاسف جانت كاميرات المراقبه ممبينه اي شي لكن استمرينا نبحث وندور معلومات

..........................................................

عالغدا اجه همام وشكله مو طبيعي مادري شبي

ياسر : حضرة المحامي ولك تعال امي تنتظرك تريد تصب غدا

ابتسم وكال : بالعافيه ما اكدر

صعد ليفوك وياسر مستغرب من حاله اول مره هيج همام

زوزو : شبي هذا الوليد شو اليوم ضايج

رحاب : خاف من الشغل لو فد شي خلي يرتاح واصبله غدا

راحت بنان تساعدهم عالغدا ولحد الآن روان ما نزلت

رحاب : ماما بنان عوفي الشغل هاي ريم يمي روحي شوفي اختج ما نزلت وصيحيها ميصير تضل فوك هيج

بنان : راح اصيحها بس ما اتوقع تنزل هي ما ادري شبيها

رحاب : خاف يصير بيها شي يا امي هي ما ماكله اي شي
بنان : حروح اشوفها واجي

حجت ريم : يوم أنتِ كلتي لخالتي جمانه وعمي محمود لكيناهم

رحاب : والله ابوج ما قبل كال اني افتح الموضوع وياهم اليوم بس ارجع من الشغل بين ميرتاحون البنات

ريم : كلش تعبانات ماما شفتي وجوههم كلها دم اللي كاتلهن ما عنده ذرة رحمه بكلبه

رحاب : الله ياخذ حقهم أن شاء الله

صعدت بنان فوك على روان وفاتت لغرفة ريم اللي تقريباً راح يستقرون بيها

دمعت بنان وهي تشوف خواتها الاثنين سوا جانت رزان فوك هم بس رزان جانت صافنه وما نطت أي ردة فعل قويه لحد الان

روان جانت دموعها تنزل

بنان : روان امشي انزلي اكلي ميصير تضلين هيج

روان : لا يصير ما انزل جوا يعني ما أنزل

بنان : كلت تنزلين ميصير هيج تضلين ولازم تتقبلين الواقع هذا تمام ميصير هيج تسوين بنفسج

عاطت بوجه بنان : اسكتي بنان انتي ما شفتي اللي شفته لتجين تحكمين علية

اني شفت امي وهي ميته وانهزمت بليلة ظلمه واجيت هنا وطلعوا اهلنا
ليش بالذات البارحه انكشف كلشي ها
همه اصلا ليش ما دوروا علينا ليش خلونا يم جمال

بنان : روان لتسوين هيج انتي مدا تشوفين رزان وضعها مخوفني لتسوين هيج كدامها تردين تحجين تعالي لغرفتي

روان : ما أنزل

بنان : عيب صدكيني عيب بس اكلي لكمه تعيشج

روان : ما اريد اعيش اصلا

بنان : راح تعيشين وتصيرين اقوى

روان : شوفي راح انزل هالمره مو علمود أحد علمودج وبس

بنان : تمام .. يلا رزان امشي تعالي نزلي ويانه حتى تاكلين

رزان : ما اريد

بنان : شلون اني اليوم اقنع وحده الثانيه تبطل

رزان انتي عاقله لخاطري انزلي

رزان : مو كتلج ما اريد اني ما أشتهي اصلا عوفيني حبابه كلشي ما اريد

غطت راسها

بنان : على راحتج

نزلت روان و بنان جوا

ضحك ياسر : مية هَهلا بنات العم .. شنو وين رزان
همست روان لبنان : هذا شلون راح اكتله

بنان : هو يكتلج

جاوبت بنان : متشتهي

رحاب : ليش ميصير تضل هيج

زوزو : تعالوا يمه كعدوا يمي ورزان لازم تنزل خوش ميصير تضل هيجي

بنان : شسوي بيبي هي مترضى

كعدت روان بصف بنان و ياسر عيونه ابد ميشيلها

همست ريم : لك ياسر انت راح تفضحنه

ياسر : اششش والله خوفي لتفضحيني انتي

ريم : لا أمن من ناحيتي اني امان

ياسر : على گلب اخوج بس مرات تنجلبين

ريم : ها ياسر بديت تجفص

ياسر : خل اكل احسن ..

بعد ما خلصوا الغدا كالعاده ضلوا منجمعين بالصاله

زوزو : احجولي على حياتكم قبل

بنان : بيبي مينحجي شي بس اللي اريد اكوله جمال ابونا جان ظالم و امي الهام جانت احسن ام شفتها بحياتي

زوزو : الله يجزيها الخير يارب على اللي سوته

رحاب : انتوا شلون جانت حالتكم الماديه

سكتت بنان وكالت : مجانت زينه لان حتى لو جمال يشتغل يصرفهن على اشياء تافهه مو علينا

ياسر : هذا شكد نذل لو الزمه ما اخلي عقل براسه

همست روان لبنان : هذا حمه

بنان : اشششش

رحاب : اريد رزان وينها ليش كل ما اشوفها ساكته ومتحجي ومعزوله ميصير هيج يا امي صيحيها بنان وتعاي

بنان : خاله هي هم حقها .. شافت اشياء كدامها متنشاف

صعدت بنان فوك وهي تبجي

محد جان متوقع نوصل لهالمواصيل
مره من المرات تمنيت اكون بنت هالبيت
بس طلعت صدك بنتهم

شي غريب .. وامي .. اخخ يا يمه وينج هسه وين وداج وشسوه بيج جمال

دخلت على روان جانت صافنه ومتحجي
هي هيج من البارحه لليوم

كعدت يمها واني اباوعلها ودموعي تنزل واحجي : اعرف اللي مريتي بي صعب بس اني هم الي مريت بي اصعب

اني ما شفت امي اصلا

رزان : بنان اني شفتها
جانت تنزف كدامي دمها بيدي

بنان : لتخلين هالشي يسيطر عليج تكدرين تنسين
فهد ديدور علئ جثتها

رزان : هسه انتي ليش اجيتي علية

بنان : اريدج تنزلين وياي جوه يريدوج عيب

رزان : بنان اني كتلج ما اريد عوفيني

بنان : ميصير هيج تضلين ليش تمردين گلبي حالتج مو طبيعيه رزان

رزان : بنان عفيه لتلحين علية ما اكدر والله ماكدر خليني هنا وحدي

بنان : بس انتي ما ماكله اي شي

رزان : اصلا ما اريد اكل اريد ابقى هنا وبس

بنان : تمام ما اجبرج

طلعت بنان وهي مدمعه ونزلت جوا

بنان : خاله متقبل تنزل ولا ماكله ماعرف شسوي

كامت روان بعصبية : لتاكل اني رايحه يمها هم

ياسر : وانتي شدعواج هيج

روان : شدعواني ليش انتوا شنو هسه فرحانين لان لكيتونا ها ؟؟؟ ليش ما لكيتونا من قبل ؟؟ ليش خليتونا يم جمال ؟؟ تحملنا ضرب واهاين ومستقبلنا ضاع
اني بطلني من المدرسه باخر يوم عرف اجيت لعيد ميلاد ريم
بطل رزان حتى تزوج وبطل بنان اول وحده و

عاطت بنان : رواااننننن

مردت من الموجودين

بجت رحاب : والله يمه دورنا عليكم ايام وشهور وما لكيناكم أخر شي ايسنا وكعدنا كلنه اكيد ميتات بالحادث

روان : حجيكم وفرو لنفسكم اني ما اصدك كل هذا

ياسر : لسااانج

روان: هسه انت كاعد على لساني عوفني ياخي

ياسر : ماعوفج عمي

روان : اي لتعوفني

صعدت بعصبية ليفوك وزوزو تبجي وبنان مصدومه من السان اختها

________________________________

روان
صعدت فوك بغرفة ريم ابجي وحدي اطلع الي بداخلي محد ديفهمني يريدون اتقبلهم شلون شلون اتقبلهم يعني انتي طول هل سنين وبالاخير بيوم وليلة والله يجي واحد يكول احنه اهلكم اهلنا؟ شلون اهلنه وين جانوا هذا مو عذر ابد انو ملكناكم عبالنه ميتين واحنه عشنه حياتنه مشفنه يوم حلو هاي كلش كلش منكن نشوفلنه يوم حلو ايام محلوه

ومنا بارحه امي ماتت امي صح مو امي الحقيقة بس هيه الي ربتني هيه الي يامه يامه دافعت عنه هيه الوحيده امي ما اريد ام ثانيه ..

كاعده وجان تفوت ريم للغرفه

ريم : روان عادي اكعد احجي وياج لو هم حتعيطين بوجهي

روان : لا تعاي

ريم : باعي روان اني منكن مجنت اعرف يعني ولا جنت واعيه بذاك الوكت بس اني اكلجياها متاكده واثقه اهلي دور عليكم انتي حقج شما تكولين حقج بس اني واثقه همه دوروا عليكم

روان : ريم دوروا ما دوروا شحيفيد هذا كله محد حاس بمعناتنه الي عشناها ضرب ايهاين كلام تجريح وبعددهواي اشياء ما اكدر احجيها .. ترا الحجيناه الكم هذا مو كل الي صار اكو هواي حجي محجيناه

بهل اثناء جان ياسر واكف ديتسمع الهم

ياسر عاقد حواجبه ودخل عليهم : ليش شنو بعد الي ضامينه وما حجيتوا

روان : ماكو شي

ياسر : لا احجي اكو اشياء عيونج تحجي

روان : معليك اكو لو ماكو شحيفيد هذا كله

ياسر : براحتج لتحجين بس حعرف

روان : تعرف متعرف هاي مشكلتك وعوفني ويلا روح من يمي

ياسر : علئ كيفج صايره كتله من الاعصاب بس احد يطخج يحاجيج تنترين بي والسانج الحلوو شويه خففي حلاته لان ديطاول حيلل واذا زادت الحلاه يزيد السكر وبهيج حاله يموت الشخص فخخفي من حلاته شويه

روان : وهسه شتريد

ياسر : اريدج وانطاها " بوسه بالهوه وطلع "

روان : هذا شبي اخوج

ريم : معليج بي عوفي

روان : ريم والله تعبت مداتحمل

ريم حضنتها وكالت : تعاي حبيبتي كون التعب بيه ولا بيج

روان : احبج ريم

ريم : شعندي غيرج اموت عليج ام السان الحلوه

_____________________________

بنان كاعده بالغرفة صافنه وداشوف شلون بليلة ويوم نكلبت حياتنه وبهل اثناء جان يطب فهد

من طب فهد رأسا كمت رحتله : ها فهد شصار

فهد : ان شاء الله نلكي الجثه مال امج او جمال هم حنلكاها وبس الكاه مخلي عظم بي صاحي

بنان " بجيت " : راح تلكاها ؟

فهد : الگاها لتخافين اني وعدتج

بنان : تمام تعال اكعد اسفه ما نطيتك مجال

فهد : لا بويه عادي

بنان : تريد اكل ؟

فهد : لا ما أشتهي

بنان : تمام اني رايحه لغرفة البنات اذا تريدني صيحني

فهد : خوش .. شلونهن ؟

بنان : روان كلش عدائيه ضد الموضوع هذا ومتفكر بأي شي .. عقلها كله بالماضي

فهد : لعد و رزان .. ما اسمعلها حس

بنان : رزان مصدومه ، احس بيها حالة صدمه لان متحجي ولا تأكل بس قبل شوية رحت وديتلها لفة وهم مقبلت بس هالمره جبرتها

فهد : لازم تاكل .. همه متأذين حيل

دنجت راسي واني اتذكر امي : همه يفكرون بأمي والمنظر اللي شافوه .. اني اكول حقهم اللي ديسووه لان الشافو مو هين لو اني شايفه جان هسه بمستشفى الأمراض العقلية

باوعلي صفح وكال : لعد واهلي شلونهم ؟

بنان : كلش زينين وخالتي وزوزو وعمي ترى معتنين بينا وممخلين اي شي ينقصنا

فهد : خوش

بنان : يلا اني رايحه

فهد : عود تعاي بسرعه

بنان : ليش

فهد : مادري

درت وجهي وطلعت

ورحت لغرفة ريم
طبيت لغرفتهم لكيت رزان كاعده مسوين هيج دائره وريم. جايبه فواكه وحلويات بس مماكول من عدها شي
وريم تتوسل بيهن

بنان : ريم عوفيهن بسيطه

روان انتي مو صغيره لازم تأكلين اذا تضلين هيج تموتين

روان : اني رايده اموت

بنان : شبيكم انتوا يا هي الاسئلها تكول اريد اموت
روان : لان اللي شفناه مو بسيط وتجين هيج بسهوله أكلوا !! شاكل ؟؟ امي ميته تعرفين شنو ميته ليغرج شكلي هذا اني ميته .. هاج شوفي رزان شوفيها ؟؟؟ ترى احنه متنه من ماتت امي مو بسهوله راح ننسى اللي صار .. يمكن اني قويه واكدر اتخطى بس ما انسى بس رزان ؟

بجيت واني اسمعها هيج تحجي

عبالها بس هي متأذيه واني احس روحي ميته من زمان

ريم : بنان خليهم على راحتهم لنضوجهم

بنان : والله بس هالمره اني كل متعاندون اكول حقهم واللي شافوه مو هين واني شنو كدامكم ها معندي مشاعر لو متأذيت لو مرتاحه وناسيتكم؟؟؟

روان : اني مقصدي هيج مراح تفتهموني

حجت رزان ونزلت راسها : تمام اسكتوا كافي

باوعتلي ريم عيونها مدمعه : خليهم يرتاحون عادي
بنان : صعب كلشي صار صعب وياهم وياي

_____________________________

ياسر

ياسر : هيو انت شبيك أحسك مهموم

همام : هههههَ مهموم حسيته دلع لاسمي

ياسر : خاب انجب لتحشش أحسك ضايج

همام : اني مو تدري بية دوم ضايج وحاير بشغلي وقضايا صعبه عندي

ياسر : لا انت كل مره مو هيج مادري عندي احساس بيك شي

تنهد وكال : قضية صعبه ياسر ودا افكر بيها

ياسر : شنية ؟

همام : بنية

ياسر : لك هلا بيها بنية

همام : اي خل احجي

ياسر : احجي بعد عمك

همام : هي بنية بس اهلها جابريها تزوج من رجال جبير

ياسر : شكد اعمارهم؟؟؟

همام : هي عمرها 20 سنه وهو 45

ياسر : بس لا عدها فريخات

همام : ماعدها بس هي كلتلي انوا من سألت عليك كالوا محامي ناجح وقضايا ناجحه دائما

ياسر : وهسه وين الصعوبه

همام : الرجال ميقبل يطلكها

ياسر : اهوووو عوفها كولها تروح محامي ثاني

همام : دنجب لك غير اني محامي شنو تروح

ياسر : بكيفك ضل هيج احسك راح تبجي

همام : خاب اسكت احسن لا الطك على جهرتك

ياسر : اخاف لا تتشوه بعد منية تباوع علية

همام : اسكت ياسر حير بروحك روح صخم عندك محاظرات اقراا شكو جاي يمي

ياسر : يابه دعوفهن يا محاظرات

همام : انت من تنحصر حصرة الجلب يلا ترتاح مو صح ؟؟

ياسر : تعرفني عمي

همام : حافظك بعد اخوك

دخل حسن : ها مجتمعين ضراير ابليس

همام : اي والله جاي نسولف

حسن : اي لعد شجنتو تنتناقشون

ياسر : شي ميخصك سوالف سناكل انت مرتبط عمي

حسن : انجب شنهي شجنتو تحجون

همام : على قضية صعبه

فات حسن وضلوا يسولفون ودك سوالف

.....................................................

راح فهد على بنان للغرفه مال ريم ودك الباب كامت ريم تفتحها

فهد : بلا أمر عليج ريمه صيحلي بنان رايدها

ريم : هسه

بنان فهد يريدج

هزت راسها وهي تكول : راجعتلكم لا عبالجن اعوفجن

روان.: روحي لزوجج

بنان : ها فهد ردتني

فهد : اي تعاي للغرفه

بنان : ليش

فهد : دماغججج استغفر الله امشي بويه بس هيج
رحنا للغرفه وهو راح كعد جان شكله تعبان حيل وضايج

بنان : شبيك ليش هيج

فهد: تعبان

بنان : من شنو ؟

فهد : من الدنيا

بنان : كلنا تعبانين

فهد : الله يساعدنا .. علاجج اشربي يمعوده

بنان : شربته من زمان

فهد : تمام

بنان : شكراً فهد على كلشي سويته وياي

فهد : ما أحب شكرا من تكوليها الي .. اني ابن عمج ماكو داعي تشكريني المفروض تفرحين لانو لكيناكم ولكيتي اهلج

بنان : اني فرحانه بس فرحتي مكسوره بأمي

فهد : فراق الام صعب حيل

بنان : امي جانت غير امي اهتمت بينا حيل ولا حسستنا احنه مو بناتهم

فهد : الله يرحمها .. كلتي انتي للسادس وما خلصتي ؟

بنان : اي والله هو جمال بطلني علمود يبيعني
فهد " بعصبية " : لتكولين يبيعني تدرين هذا لو الزمه شسوي بي .. اهشم تعابير وجهه وعلي

بنان : ليش سالتني عالدوام

باوعلي صفح وكال : هيج

بنان : يحرك گلبي هالموضوع .. جانت الدراسه الوحيده ملجأي من الحياة بس بطلني جمال وصار اللي صار

بس عندي طلب من عندك بسيط

فهد : اطلبي

بنان : اريد اروح لبيتنا أخذني واكيد جمال محيكون هناك

فهد : اهخخخخ لج راسي راح ينفجر اريد الكاه والله دين ما اخلي براسه هالكو**

نزلت راسي واني اسمعه يعيط : واني اعرف وقته يطلع من الصبح ويرجع الظهر ومن الظهر يرجع بالليل

فهد : الله كريم بس هالايام ما اكدر

بنان : احبك فهد

فهد " بصدمه " : شنو ؟؟؟

بنان : يمه لا مو هيج اقصد مو بالك يعني احبك مثل الاخ والاخت لان ساعدتني هواي

ضحك وكال بشقه : يمكن اني ما اعتبرج اخت

بنان : لا انت مثل اخويه

سكت ودار وجهه بعدها اجه ياسر يدك الغرفه
ويعيط

طلع فهد : شبيك انت

ياسر : ولك بيت عمي محمود جوا وليان الحيه مطلعه السانها هذا اللي بطول نعالي

نهاية البارت
يتبع ..

(لاتنسوا التصويت)

وأن شاء الله يعجبكم البارت وسوينا طويل لعيونكم ♡︎ .

إلى اللقاء يا أعز العابرين في قلبي ♡.

الكاتبات دينا & نور