فهد
صحت بأعلى صوتي : سلمواااا نفسكممم .. اليوم لو اني لو انتوا
ماحس غير طلعوا بوجهي 4 من جماعتهم وضلوا يرمون علية بس مكدروا يصوبون و قتلناهم طبيت جوا للبيت وورايه مؤمل وكم واحد من المركز نمشي بطيء
صحت مرة ثانيه : سلموااااا نفسكممم وربكم اليوم احرككهم حرك اني اعلمكممم
لحد الان ماكو اي صوت صعدنا بالسره للطابق الثاني الفوك جانت بي غرفه وحده أشرت للكل يسكتون دفرت الباب مرة والمرة ثانيه دفرتها ودفعتها صارت هي دفره وهي دفعه كسرتها وصارت مواجهه قويه تقريباً 5 همه
ضلوا يرمون بس مؤمل صوب واحد منهم
و البقية خافوا وحتى عدنان صار جريذي طبوا بقية الشباب والقوا القبض على الكل وهذا التصوب هم أخذوا
طبيت ركض للغرفه واني خايف .. نعم خفت عليها .. هي ماعدها أحد غيري شلون ما اخاف عليها
جانت تبجي والدم عليها مطفر من هذا الي تصوب ورجلها وايدها وحلكها كلها مربوطه
اول مشفتها حضنتها .. مادري شلون حضنتها بس حسيت براحه متنوصف من شفتها .. كأنما رجعت لي روحي مرة ثانيه
فكيت ايدها وفكيت كل الحبال وهي ضلت تبجي ومغطيه وجهها بحركتها المعتاده
وخرت أيدها وكلتلها بقلق : بنان سوولج شي .. اذوج بيج شي ؟
هزت راسها بنفي : لا مسوو شي بس راد ياخذني بعد يومين
فهد : محد راح يكدر ياخذج بعد مدام اني موجود
بنان : بس اخذوني
فهد : كتلج محد راح يكدر ياخذج مني كومي بوية
بنان تبجي : ماااكدر رجلي توجعني من الحبل حتى ايديييي
فهد : علكيفج بويه
بنان " انتبهت لايده ملفوفه بشاش" : شبيها ايدك
فهد : ولا شي
بنان : لا مبين بيها شي
فهد : جرح بسيط .. بنان مو مهم اني تعاي خلي نطلع تعاي يابه
بنان : تمام
فهد : بيج حيل تمشين اشيلج ؟
بنان : هاا لا ميحتاج
وكفت دامشي مكدرت
اجه فهد ساعدني وكال: چا بويه مو كتلج خلي اشيلج شو تعاي
فهد طلعنه بره كعدنه بسياره جبتلها مي وغسلت وجها
فهد : هسه شلونج
بنان : احسن
مؤمل : فهد القيت قبض عليهم و حنوديهم للمركز
فهد : خوش بسيطه حسابهم يمي اني اعرف شسويلهم اله ازوعهم العافيه
مؤمل : الحمدالله علئ سلامتج خويه خوما بيج شي
بنان : الله يسلمك لا مابيه شي وشكرا تعبتكم ويايه
فهد خزرتها وگلت : شو سكتي شهل الكلام
مؤمل: اني حروح للمركز عندي كم شغله
فهد : تمام روح
.....................................
ريم كاعده بصاله وحدي فگلت خلي اتصل علئ رقم مال روان فدكيت عليها
الهام فتحت التليفون : منو
ريم : هلوو منو روان؟
الهام : لا امها منو انتي
ريم : هلا خاله اني صديقة روان ريم
الهام : اها تمام هسه حبيبتي لحظات
ريم : تمام خاله
الهام : تعاي روان صديقتج علئ التليفون
روان اخذت تليفون منها ورحت لغرفتنه
روان : هلو منو
ريم : ولج هلا روان شلونج ريم ريم وياج
روان : يا هلا بريمه الحمدالله وانتي معبالي انتي داگه
ريم بضحكه : هاا خاف عبالج احد معجبينج السرين
روان بضحك : يا معجبين يا صخام همه وينهم
ريم : موجودين موجودين
روان : اي شلونج شلون المدرسه بدوني
ريم بمياعه : تخبووووول فد هدوء وماكو مشاكل
روان : اها هيج لعد لعد حمدد اجازتي المرضيه
ريم : لا عيني اشاقه والله محلوه بدونج وبدون مشاكلج
روان بغرور : اعرف اصلا
ريم : مو وكت غرورج ست روان بس والله مشتاقتلج
بهل اثناء فاتوا للصاله زوزو و ياسر
زوزو : منو هاي الي مشتاقه اله يا طير
ريم بضحك : وي ست روان
زوزو : هااا هاي اكيد احد صديقاتج الطايح حضهن
روان سمعت شكالت لان صوتها جان عالي
روان ضحكت : رحمه الله والديها
ريم : لاا متقصد هيج
روان : لا عادي خيه
ريم : مسحيها بوجهي
روان : مسحتها مسحتها
جمال بصوت عاليييي كا عد يتعارك وي رزان
روان : هسه اجي ريم
ريم : خو ماكو شي شنو عل عياط
روان : ماكو شي هسه اجي
ريم : تمام
ياسر : شكوو
ريم : ما ادري بس سمعت عياط وراحت
ياسر : ليش وهيه شلون صارت ايدها
ريم : ما ادري وايدها صارت زينه
زوزو : وانت ولك ليش تسئل هاا
ريم : ليش مدريتي هوه احد معجبيها سرين
ياسر : انجبي ريم
زوزو : شنو شنوو ولك حاط عينك عليها عاد هيه حلوه
ريم : ولج زوزو تخبل تخبل عيونها عسليه وشعرهاا يبوي حلوه حلوه
ياسر : اول شي ما احبها اني ثاني شي وين الحلووو بيهاا هيه وكفشتهاا وثالث شي شنو هيه عدهاا معجبين
زوزو : يكول ما احبهه وبكل صلافهه يكول عدها معجبين دروححح
ريم ردت اغوره : اذا گل هل جمال شلون ما عدها
ياسر : يعني عدها
ريم گلبت عيوني : معليكككك
ياسر خزرتها وكمت ضايج : يصير خيرر
ريم : اي اي
زوزو : ولج هذا صدك يحبها
ريم : اي اي بس ميريد يعترف
زوزو : شو تعاي سولفيلي عليها
ريم : تعاي احجيلج عن ست روان ...
...................................
بنان
وصلنه للبيت
فهد : يلا تعاي فوتي
انتبهت علئ بنان نزلن دموعها
فهد : ليش البجي يا عيني
بنان : مديروح المنظر من عيني منا اخذوني وهذا المكان وگلشيي مداكدر انسه
فهد : فوتي فوتي بويه واني اعلمهم اذا ما اندمهم علئ گل دمعه نزلوها من عيونج
فتنا كعدنه
فهد : بيج شي اكو شي يوجعج اوديج للمستشفئ
بنان : لا ميحتاج
فهد : اي احجيلي شصار شسولج
بنان بديت احجيله ودوعي ينزلن
فهد : اياا انذال وهذا ابوج اني اعلمه بس لو افهم شنو من اب هذا بس والله اله اخذ حقج من عدهم واحد واحد واسود عيشتهم
وما علئ عدنان وذولاك الجلاب مالته اني اعلمهم و اكسر ايدينهم
فهد : بويه بنان گافي تبجين والله اخذ حقج مربع بس گافي هل عيون الحلوه ميلوكلها البجي
بنان : والله ما اعرف شلون اجازيك واشكرك انتي قدمتلي هواي تعبتك حيلل ويايه
فهد : تعبج راحه يابه
تعاي ارتاحي لان عندي حجي هواي وياج واريدج تركزين بي بس اول شي تعاي اكلي
بنان : والله ما اشتهي بعدين
فهد : لا ماكو تعاي اكلي هاج لو تريديني اوكلج اني
بنان : هاا لا ميحتاج اني اكل
فهد : چاا من البدايه كولي هيج يلا تعاي
.................................
روان : هاي شنو شصاير شكو هل عياط
رزان تبجي : ام حارث مو اجت ذاك اليوم كومي روحي كولي الام امير عليه وخابري ماما كليلها نريد بنتكم الامير
روان : اي وشصار
رزان : ماما راحت كالت الجمال وجمال اجه يكلي اي غصبن معليج تقبلين
روان : وليش كالت احنه نريد نسد موضوع هيه تروح تكول
رزان : ما ادري ما ادري والله واني ما اريد شلوننن
روان : اني اعرف شسوي
رزان : لا عفيه روان هسه يجي يضربج ايذيج
روان : شيسوي خلي يسوي مو يكعد هوه يتحكم بينه
روان رحت عليه وكلت
روان : رزان متريد تزوج من هذا امير
جمال : شو دروح من يمي انتي ثانيه احسنلج لا اكسر ايدج الثانيه وخري من يمي
روان : شنو انت متفهم كلت الك رزان متريد تأخذه ليش انت هيج ويانه اوك اني وياك انت مو ابونه الحقيقي وهاي بس ترا احنه عشنه وياكم كل هل سنين مرف گلبك النه البناتك ترا ميصير هيج
تحسسنه حيوانات عندكك وتتحكم بينه دنكلك متريد تزوج متريد ليش تجبرها علئ شي هيه متريده
جمال : عود تحجي بابا اني ما اريدكم اريد اخلص منكم مصدكت خلصت من وحده بس صبروا صبروا اذا ما اخلص منكم وحده وره ثانيه ما يطلع اسمي جمال وشو هسه وخري من يمي
روان : الله ليوفقك ان شاء الله ورزان متزوج يعني متزوج اوككككك
جمال كمتله ولزمت شعرها : هاي عليمن تعيطين انتي شلون بيج شلون وي السانج الزفر هاا كتل وميفيد شي وميفيد بس اني اعرف شلون اكسر خشمج هذاا يا حقيره وخري من يمي
رزان : عفيه روان كافي بس تعاي ويايه
الهام : هاي شنو شصاير
روان : سلامتج احنه مو كنالج لتكوليله هاا وانتي اول ما اجت كلتلج رحتئ كلتيله وانتي تعرفي ميصدك
الهام : واني شمدريني حيسوي هيج لو اعرف خيج حيسوي ولا اروح اكوله بس معبالي هيج ابوكم حيسوي
رزان ضحكت بستهزاء : ليش هذا هم اب سمينه
روان : انتي هم اصلا تريدين تخلصين منه
الهام : ماما شهل حجي شنو اخلص منكم
روان عفتهم وصعدت
رزان : لزعلين ماما منها بس يعني جان كلتيلنه رفضتي من عندج واني اصلا ما اريد ازوج عفيه كليله قنعي
الهام : يمه والله ما ادري شمدريني حيسوي هيج عود احجي وياه شنو مو بكيفه ..
..............................................
بنان خلصت ورحت غسلت و اجيت كعدت
بنان : اي شنو الموضوع
فهد : سمعيني وخلي بالج يمي تمام واني الي حكوله بس علمودج وعلمود تكونين بأمان
بنان : يمه خوفتني شنو
فهد : لتخافين كل الي حكوله المصلحتج
بنان : تمام احجي اسمعك
فهد : نزوجججج ؟؟
بنان : هااااااا
فهد : اي والله اعقد عليج حتئ تكونين بأمان ومحد يكدر يدنالج وبنفس الوقت تكونين كدام عيني يم اهلي بصفتج زوجتي
بنان بعصبيه : شنو شدتحجي انت شنو ازوج شنو هاي
فهد : شبيج كله المصلحتج وعلمودج وهوه زواج شكلي وبس وحتئ لو اعوفج وبعدين وين حتروحين وحتئ امج ترا من ذيج المره وبعد ابد مسئلت عليج
بنان تنهدت : وشلون واهلك
فهد : معليج بأهلي خليها عليه شغله
بنان : خاف ميتقبلوني
فهد : لا لتخافين اهلي مو مثل الي مفكره
بنان : مدري رايد افكر
فهد : اي تمام اخذي راحتج روحي نامي ارتاحي وباجر رديلي خبر بس اني علمودج
بنان تنهدت
فهد : يلا روحي نامي عيني
بنان : تمام حتبقئ هنا انت
فهد : اي چاا شتريدين اعوفج
بنان : تمام
فهد: بنان تدرين
بنان: ها
فهد: شلتيني شل
بنان: اني ؟
فهد : ايي
بنان : انت مو گلت تعبج راحه
فهد : ايي واحلئ راحه
.........................................
الصبح
ياسر
كعدت الصبح وغسلت وكشخت جا اليوم جاي وياي ضابط وشرطه لازم اكشخ والا اطلع هذوله الجلاب الي ضربوا احمد واني الهم واحد واحد
نزلت جوا لكيت ريم واكفه بنص الهول ومتخوصره
ريم : وينكككك انتتتتت صارلي ساعه انتضرك وانت تتكشخخ
رجعت انداريت : انتضري نسيت البس ساعتي الفضه
ريم : لك يااااااسر حتأخر والله شبيك تعاااالللل
ياسر : اوووووو ملازم البس ساعه امشي عمي
رحاب : ولكم تعالوا اكلوا المن مسويه هذا الريوك اني
ياسر : يوم منريد متأخرين احنه اصلا حنطلع
ريم : خلي لبابا و زوزو يكعدون من وكت وفرح هم تنزل تاكل ويه بابا
رحاب : شلون بيكم انيييي
طلع ياسر ويا ريم وركبوا السياره وصلها للمدرسه
ياسر : شوفي لج من ارجع واخذج مو تتأخرين وتضلين محوتره يم باب المدرسه انتضر فلانه وانتضر علانه خوش
ريم : وخررر الله ليعوزنييي عليك اني ارجعع
ياسر : اشوف شلون ترجعينن اكسر رجلج تتمشى وحدها بالظهريه واخوها عنده سياره تهي بهي روحي عمي واني اعرف شلون اخليج ترجعين وحدج
ريم : شبيك خبصتني كله عمي وعمي رايحههههه
ياسر : دوخريي
شخط السياره ومشى وراح من يم المدرسه
اتصل علية الضابط الي حيجي علمود قضية احمد
الضابط : أهلا ياسر انت هسه وينك
ياسر : سيدي اني هسه بالطريق للجامعه
الضابط : تمام اني بعدني مطالع وهسه حطلع بس وين انتضرك حتى نفوت سوا
ياسر : تكدر تنتضرني يم باب الدخول واني جايك
الضابط : تمام اتفقنا ، بالسلامه
ياسر : الله وياك
الا الزمهم واحد واحد واني الهم وأعلمهم ياسر منوو
.....................................
بنان
الصبح
كاعده واحضر ريوك واكفه يم الطباخ داتسوي جاي وصافنه وجان يجي فهد
فهد : صباح الخير
بنان : صباح النور .. " ابتسمت وكملت " اني بس جنت انتضر الجاي يصير واجي اصيحك حتى تجي تتريك
فهد : لا اني هذا وقتي اكعد بس استغربت يعني انتِ كاعده هيج وقت لان من وكت
بنان : لا بالعكس يعني اني من جنت يم بيت اهلي جنت متعوده اكعد هيج من وكت وهم اسوي ريوك اني وامي وبعدين مو بس انتَ تساعدني لازم اني هم يعني
فهد : عادي ريوك مو فد شي اني اسوي وحدي
بنان : لاااا ريوكي غير
" ابتسم" فهد : ها خوش
فار الچاي وجابته هي وصبت إلي ودتريد تروح كلتلها
فهد : تعاي بنان اريد احجي وياج قبل لا اطلع
حسيتها توترت وبدت تفرك ايد ب ايد جتي وكعدت
بنان : اي تفضل احجي
فهد : اكو واحد من الي خطفوج تعرضلج ؟
باوعتله وحجيت : اكو واحد جان بس مسوالي شي بس ينرفزززز بس ماعرف اسمه يعني بس وجه مادري يخوف وبي جرح يم حواجبه
فهد : تمام
بنان : شلون عرفت ؟
فهد : اجاني اتصال من المركز انوا هو معترف من خلال الضرب ، كال مسويت الها شي بس ضربتها
نزلت راسها بحزن : صح ضربني الحقير
فهد : حقج يطلع .. واني الي راح أطلعه
شرب جاي وكمل : بنان الموضوع الثاني .. شقررتي ؟
بنان ب توتر : صراحه والله مادري ضليت الليل كله يعني افكر بالموضوع بس ملكيت غير حل
فهد : بنان انتِ تثقين بية ؟
" حجت بثقه " بنان : مو انتَ نفسك انقذتني مرتين من هذوله الوحوش ومن " ابوية " هم
فهد : صدكيني راح ترجعين لاهلج سالمه وترجعين لأمج ولخواتج ، اني ما اتصلت على امج من يوم اللي اجيتي بي هنا ، ف راح اتصل عليها من ارجع خوش حجي
دمعت عيون بنان : خوش
فهد : يعني هسه انتِ موافقه
هزت راسها ب اي
فهد : تمام ، انتظريني اني راح اروح للشغل ومن ارجع راح اجيب شيخ ونعقد
كام فهد وكال : اي شي يصير تدكين علية ، بابج هذا ينقفل وراية أو اني اقفله تمام ، تندك الباب فضول مدري شني ماعندي اني خوش تكعدين وتسكتين
" ابتسمت " بنان : تمام
فهد : يلا في امان الله
بنان : الله وياك
_______________
ياسر
واكف بنص الحر يم باب الجامعه والحلوات يفوتن ضاربات المكياج وذيج الملابس واني مسوي نفسي اني هنا وبس اكيد لان وين اكو بجمالي هنا ولابس نظاراتي الشمسيه بس اخخخ ريم لو خالتني البس الساعه الفضية جان كملت الكشخه ..
ورا دقايق طب الضابط وراه شرطه اثنين ودخلنا للجامعه واني اعدل بالستره هيج ورافع خشمي يمي ضابط منو يتحاجى وياي هيهيهيهي وصراحه عندي ثقه الزم هذوله الكو*** واعلمهم منو ياسر ، خرب احمد الجامعه بدونك ولا شي زبالهههه الا اطلع حقك ماطلع اني ياسر
الضابط : تعرف وين صارت الشغله وين وصفلك
ياسر : سيدي بالحمامات مراح يفيدك بشي المكان واكيد رايحه البصمات مناك ف افضل شي انوا نشوف كاميرات المراقبه بلكي مثلا الهم اثر
الضابط: تعتقد همه مداومين
ياسر : سيدي رحمه لأهلك اذا همه مسوين جريمه تريدهم يجون وين اكو هيج شي
الضابط : بالعكس يجون حتى يبعدون الشبهه عن نفسهم
ياسر : اول شي خل نشوف الكاميرات
رحنا للمكتب مال المعاون وطلبنا التصوير ورجعنا الايام وضلينا ندقق بالتصوير ثانيه ثانيه إلى أن شفناهم همه 3 طلعوا و تجمعوا برا وضلوا يحجون شفنا اشكالهم زين واني هم تأكدت اكثر
سأل الضابط : ياسر تعرفهم متأكد منهم انطيني اسمائهم بسرعه
ياسر : اي نعم سيدي اعرفهم كلش زين هم
هذا***
وهذا***
وهذا***
الضابط : تعرف عنوانهم ؟
ياسر : اعرف عنوان واحد منهم
الضابط : انطيني
انطاه العنوان ياسر
ياسر : بس سيدي يعني هذا عنوان واحد
الضابط : لا حبيب مدام عرفنا عنوان واحد معناها لكينا الكل لان كم ضربه لهذا راح يعترف على جماعته
ياسر : تمام سيدي .. يلا اني رايح عندي محاظره بهذا الوقت
الضابط : واني رايح للمركز حتى نتخذ الإجراءات اللازمة
@@@@@@
فهد
طلعت الصبح ورحت للمركز طلع بوجهي مؤمل
مؤمل : لك هاااا
فهد : خير
مؤمل : دسلم شبيكككك هيج مو عقدتني
فهد : عندي اشغال
مؤمل : ها اشغالك متخليك تسلم
فهد : مؤمل اكره اللي يلحون تعرف زين
مؤمل : السلام لله
فهد : يابه السلاممممم عليكككككممم تعال شغلي وياك
كعد فهد وحجى: بالسجن ؟
مؤمل : حدد
فهد : عدنان واللي وياه
مؤمل: اكيددد صارت عليهم أكثر من تهمه ، وداعتك اكبر راس ميطلعهم منا
فهد : اي .. اريدك تجيبلي واحد اسمه **** ، راح امشي بيهم بالسره الا أعلمهم منو فهد بسيطه
مؤمل : منو هذا
فهد : مالك دخل جيبه وتعال بس صيح اسمه
مؤمل : دتحسسني توني متوظف وماعرف شلون اجيبه
فهد : يااابههه جيبه وتعال يلاا انت تريد واحد يهينك
مؤمل : رااااايححح
راح مؤمل وجابه واجى
ابتسم فهد : اطلع مؤمل
مؤمل بگلبه : هو انت كاضيها تعال مؤمل روح مؤمل
طلع مؤمل وبقى بس فهد ويه هذا الولد
جانت ملامح هذا الولد ما خايف ومسوي نفسه ما مهتم كلش
اول ما بدا فهد كعد كباله : الله بالخير چاي كهوه " صرخ عليه " اوكف عدلل لك لا اكسر رجلك حيوان
الولد : واكف عدل
فهد : لتحجي لا اكص لسانك
الولد : ......
فهد : انت لو رجال متمد ايدك على مرة خوش
الولد بعصبية : رجال وأرجل م...
بعده ممكمل الا وبوكس من فهد طيحه بالكاع
فهد : ماعندك ذرة رجوله .. تجار تبيعون وتشترون بالبنات ؟ مسوين بيت دعارة للاستاذ عدنان واو صراحه فوك هذا تجار مخدرات؟ اذا ما اخيسكم بالسجن ما اطلع اني فهد
كل هذا وجان الولد ساكت وبس يباوع
فهد : كتلتها ؟
الولد ساكت
فهد " عاط " : كتلتهاااااا
الولد : اي بس بأمر من عدنان
فهد : زر** بأوامره ، شكال ؟؟
الولد : كال اذا سوت شي ميرضيكم ضربوها
فهد : وانت اخلاقك تسمحلك تمد ايدك على مرة ؟
الولد سكت ومحجى شي
ابتسم فهد ابتسامه تخوف واشر : كتلتها بيا ايد هاي لو هاي ؟
خاف الولد من الديصير واتراجع ليورا
لزم ايده اليمين من معصمها وعاط بفحيح " هاي موو "
الولد : لا الله يخليك لتسوي شي اني جنت امشي بأوامر عدنان
فهد : بس ضربتهااا هههههههه
صوت الغرفه الهادئ طلع صدى لطكة ايد هذا الولد
وانملت بصوت عياط وبكاء من الالم
دخل مؤمل : خير شصاير هنا
فهد وهو يمسح جبينه : طلع هذا ، طلعههههه ماريد اشوف خلقتههه يمي
مؤمل : امشي لك حيوانننن كوممم تستاهل اكثررر اصبر اصبر حياتي الا نخليكم بعد متعرفون نهاركم من ليلكم
@@@@@@@@
محمد : اليوم عزمت بيت محمود علئ غده
رحاب : اي هلا بيهم
زوزو : اهووو حتجي الغثه جمانه
محمد : شبيج شاده وي المره شمسويتلج
زوزو : ختولي هيه وبنتهه بس يتفيكن هيه صدك شعدها جايه مو زعلانه
محمد : يمه اذا مو لخاطرهااا الخاطر محمود شعلينه بيها
زوزو : يمه قابل شعندي وي المره اني بس هيه اهخ منهااا حيه تقبلهاا ذاك اليوم سد تليفون بوجهي
رحاب : ترا منكن نگطع نت او صار هيج
مريم : تكدر ترجع تتصل
رحاب : ديلا كافي صار الي صار هاهيه شنسوي طبها طوب
......................................
فهد : مؤمل عندي شالفه وياك ومحتاجك
مؤمل : يؤمر الحلو كول حاضر اني
فهد : حعقد علئ بنان واريدك شاهد
مؤمل : شنو شنوو
فهد : والله مثل مسمعت حقعد عليها
مؤمل : وشلون واهلك
فهد : عادي حعقد عليها واخذها للبيت واني علمودها ماكو غير هذا الحل
مؤمل : يا هلا لعد تمام حلوووو فهودي كبررر وحيزوج العب
فهد : زواج شكلي بس ما اريد احد يدري انو شكلي
مؤمل : لتخاف سرك بير بس هل بير مزروف
فهد : مؤمللللللللل
مؤمل : اشاقه عيني اشاقه
فهد : يلا لعد امشي خلي نجيب شيخ وهم شغله
مؤمل : شنو
فهد : حكول ال همام حتئ يصير شاهد
مؤمل : وليش همام بالذات
فهد : لأن همام اعرفه ميحجي
مؤمل : تمام
.........................................
طلعت من القضية واشوف تليفوني يدك فتحته ولكيت فهد
همام : هلا بأبو الفود خيرك ان شاء الله مو من عوايدك ادك عليه
فهد : انجب واسمعني زين
همام : يا ستار كول خويه
فهد : اني حعقد
همام : جذببببب تشاقه صح !!
فهد : مشاقي وياك قبل اني ؟
همام : اي
فهد : انجب واسمعنيي اني حعقد واريدك شاهد
همام : اوك تمام بس ليش حتعقد لحظه ترا بعدنس ما مستوعب الي كاعد تحجي وليش مندري ومنيه..
وليش
فهد : كافي اسئله تعال للمركز واني افهمك كلشي بس لتكول لحد
همام : تمام طياره هسه جاي
.....................................
بنان كاعده وحدي ودافكر معقوله حعقد بعد كم ساعه بس هوه ليش ديسوي كل هذا معقوله شفقان عليه؟
وليش يخرب حياته مثلا يعني وي شخص ميحبه هوه هوه مامطر هيج يسوي ..
دائما احلم بهل يوم وهاي بس عمري متوقعت حيكون بهل طريقه هاي جنت اتمنئ خواتي يمي اكيد جان حيكونن فرحانات حتئ ماما الي حتئ لو جانت مو امي الحقيقيه بس اعتبرها امي ..
................................
همام : يلا احجيلي بسرعه
فهد : اكعد
همام : وها كعدت يلا احجي
فهد حجيتله كلشي من البدايه
همام : يربي معقوله اكو هيج اب
فهد : توقع كلشي من هل الدنيا بيها اشكال وانواع بس اسمع هل شي ما اريد احد يدري بي وهل زواج كدام الكل حقيقي مفهوم
همام : اي تمام وانت مؤمل تدري حيعقد وتكول
مؤمل : اني هسه يالله دريت
همام : احاول اصدك
فهد : كافي تمسلت امشوا يلا
.............................................
بنان كاعده اني واسمع صوت الباب مرحت فتحت انتظرت يدك عليه حتئ افتحه
فهد : بنان افتحي الباب
بنان : تمام
همام : حلوو وكلع اسمها بنان هم
مؤمل : اسكت هسه يسمعككك وتعرف شيسوي
همام : اووي يقار صدك هيه حلوه لا
مؤمل : حلو شكلها بس استاذ فهد ميعترف
همام : مغرور غير
فهد : انتظروا اهناه و مؤمل دك علئ الشيخ خلي يجي
مؤمل : ادلل يالعريس
فهد فتت ولكيتها كاعده
فهد : هسه حيجي شيخ ويعقد النه
بنان : تمام
فهد : بيج شي شو احسج ضايجه
بنان نزلن دموعي : فهد انت شنو ذنبك حتئ تحي وتوكف ويايه وتحمينيي وتزوج شخص متحبه
فهد : اشتعل ابوج شبيج بويه اني مو كتلج هاي عيونج ما اريد ينزلن دموع واني منو كال مراضي اني راضي هوه بنهاية زواج شكلي فتره وينتهي
بنان : تمام
مؤمل : فهد اجه شيخ
فهد : اجه شيخ حفوته بالصاله وانتي كعدي هناه وهوه حيسئلج وجاوبي تمام
بنان : تمام
بنان رحت لبست ايزار وكعدت والشيخ ديعقدلنه
الشيخ : اذا قبلتي قولي" نعم وانت وكيلي "
بنان نقبض گلبي وكمت ارجف وما اشوف غير گلت
_ " نعم وانت وكيلي "
لحد معدلنه الشيخ وبارك النه وطلعنه
فهد اجه كعد يمي وكال
فهد بضحكه : مبرووك النه
بنان : هااا
فهد : تعاي كعدي بنان خلي احجي وياج
بنان بهمس : هوه انت شفتك وشفتني وتكلي كعدي خلي احجي وياج
فهد : شكلتي
بنان : هاا لا ماكو شي
فهد : حنروح هسه بيت اهلي واخذي راحتج بي ولتقيدين ومتأكد حتحبيهم وما اريد احد يدري زواجنه شكلي حنكول للكل زواجنه حقيقي تمام
بنان : تمام
فهد : اوك لعد ها هم شغله لحظه انتظري
بنان رجع وشفت شايل علاكه
فهد : جبتلج هذا الفستان البسي ما ادري اذا يعجبج
بنان : شكرا تعبتك ويايه
فهد : هاي مال تعبتك ويايه كرهتها بابا اني مو كتلج تعبج راحه يلا هاج لبسي وتعاي
بنان رحت للغرفه طلعته جان لونه زيتوني ومنقط ابيض وي شال اسود جان حلوات كلش ذوقه حلو
فهد شفته لابساتهن ابتسمت حلوات عليها
بنان : ها يلا
فهد : يلا
همام : يا هلا مرت اخويه
بنان ابتسمت وباوعت علئ فهد بمعنئ منو هذا
بنان : هلا بيك خويه
فهد : هذا همام اخويه هوه الوحيد الي يدري بزواجنه شكلي
بنان : تمام
مؤمل : هلا اختي شلونج اكيد تعرفيني ميحتاج اعرف
بنان ابتسمت : تمام وانت
مؤمل : الحمدالله علئ الله
فهد : يلا امشوا ركبنه بسياره ورحنه
ما اعرف شلون حتصير حياتي من اليوم شحتنتظرني ايام واهله حيتقبلوني وشنو حتكون ردة فعلهم وشلون حتعايش وياهم ....
نهاية البارت
يتبع ..
لاتنسوا تصويت
الئ اللقاء يا اعز العابرين في قلبي ♡ .
الكاتبات دينا & نور
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!