نقطة لقاء الفصل الثاني وخمسون 52 - بقلم دينا _ الكاتبة نور

وماذنب قلبي ان لم يرق لك
ورق لمن جنى له هما ونكسارا
فكما عشقتني اجبارا وتهيما
عشق قلبي غيرك طوعا ونكسارا ..

>>>>>>>>>>>>>>>>>

جان تكوملي وبحركة سريعة حيل بالكاع واجت الوكعة علئ ظهري ..

احس ظهري انفصم من الآلم والوجع الي حسيت بس بهل لحظه كمت ابجي واصيح من قوة الضربه والوجع .. وهيه ولا يمها راحت كعدت علئ القنفه وتباوع عليه

علئ صوتي نزل مؤمل من الدرج بسرعه وخاله هم اجتي

اجه مؤمل عليه گام يعيط گال

_ شبيج ريم

ابجي واحجي : ظهري ظهري اهخخ

اجه يمي ديشيلني گال : شبي ظهرج احجي شلون وكعتي

آشرت علئ سُمية وگلت : دفعتني

جان تباوع عليه بنظرات حقد گالت

_ اني شعليه انتِ عثرتي وكعتي

خزر عمته حيل واجه شالني وگال

_ هيه دفعتج

سُمية : واني شعليهه دفعتها هيه وكعت

ريم : لجذبين انتِ دفعتيني

سُمية : هاي عليمن جذبين دشوف السانها زفرر

ام مؤمل : كافي سُمية

سُمية : انتِ معليج ابقي فاهيه هاي الي ردتيها فضلتيها علئ بنتي شوفي شلون اخلاقها

يحجون واني ظهري موتني فرفحت روحي من وكعه گلت : مؤمل ظهري

عاط مؤمل وگال : كافيي لحد يحجي ريم تعاي للمستشفئ

ريم : ما اريد وديني لاهلي

مؤمل : شنو

جان شايلني فوخرت منه وكمت وكفت وگلت

_ وديني لاهلي ما اريد ابقئ هنا

مؤمل : شنو اوديج لاهلج ريم شدتحجين

ام مؤمل : يمهه استهدي برحمان

سُمية : اي خلي تروح هل حيه من يوم اجتي كامت سوي مشاكل

عاط بيها مؤمل وگال : كافيي عمه احجي عدل وياها

شهكت ولطمت علئ صدرها وگالت

_ تعيط علئ عمتك علمود مرتك

گلت برود ودموع بعيني : وديني لاهلي

مؤمل : ريم ليش

حجيت بعصبية وگلت

_ ما ابقئ بهل بيت مادام عمتك هنا تحملت هواي والحجي السم الي ذبه الي ومحجيت شي بس وصلت تأذيني وتدفعني هاهيه ما ابقئ هنا بعد لو اني لو عمتك اختار

سُمية : ولج تخيرين الوليد بينج وبين عمته دتسمع مؤمل متريدني اضل هنا ولك تريد تطرد وصية ابوك

مؤمل : ريم تعاي احجي وياج

ريم : لا احجي وياك ولا تحجي ويايه وديني لاهلي واذا متوديني هسه اخابرهم يجوني

مؤمل : ريم

ريم : شنو ريم شنوو ظهري ديوجعني وموتني وحجي عمتك وتريدني اضل وديني لاهلي يلا

سُمية : وديها وديها لبيت اهلها متستحي

اندار علئ عمته وصار يعيط عليها وصار عصبي نار گال

_ كافيي سكتي عمه كافي طوختيها حيل عبالج ما اعرف انتِ دفعتيها و تحجين عليها

وجان اكو ميز عليه غراض دفره حيل وتكسر هوه والغراض الي عليه

ام مؤمل : كافي مؤمل علئ كيفك شبيك هل عصبية هسه الغراض شعليه تكسرهن

ريم : وديني لاهلي ما ابقئ بهل بيت مادام عمتك بي

جرني من ايدي ديريد يصعدني فوك وخرتها وطلعت موبايلي گال

_ شدسوين

ريم : اخابر علئ فهد او احد يجي ياخذني

مؤمل : ريم لسوين هيج لتخربين علاقتنا

ريم : ممخربه شي اني وديني لاهلي ما ابقئ بنفس البيت وي عمتك

باوع عليه نظرات تعب وگال : امشي

لزمني من ايدي وطلعنه ركبنا بسياره گال

_ اوديج للمستشفئ

ريم : ميحتاج

هز راسه وكمل جان يرجع يكول

_ ظهرج بعده يوجعج

هوه جان يوجعني بس گلت لا حتئ بس اريده يوديني لاهلي گلت

_ لا

وصلنه للبيت دانزل گلت ودموع بعيني

_ خلي عمتك تنور بيتك بعد ما ارجع اني

نزلت وعفته فتت للبيت لكيت فهد وهمام و ياسر موجودين ..

عكد حواجبه فهد وگال : ريم شو رجعتي

ريم : يعني متريدني اجي

فهد : لاا مو هيج

رحت كعدت گلت

_ مؤمل بالباب

راح فهد طلعله هوه وهمام واجه ياسر يمي گال

_ شكو شصاير

ريم : ماكو شي

ياسر : شلون ماكو شي لعد شكو رحتي ورجعتي

ريم : يعني شنو متريدوني اجي لو شنو ترا عادي هسه اروح

ياسر : انجي مو قصدي هيج بس ليش رجعتي غير اكو سبب سوالج شي مؤمل مضوجج؟

ريم : لا

ياسر : لعد ليش عيونج بيها دموع وحمره احجي جنج وحده زوجها خانهه

هوه حجه هيج واني طكيته بجيه

جانت ملامحه تضحك بس وره مشافني ابجي تحولت ملامحه الجديه وگال

_ شكو شصاير ريم احجيي مضوجج موو مؤمل شسوالج ؟

بهل اثناء فات فهد وهمام

فهد : هذا شبي ضايج مؤمل حتئ كبل طلع وراح ملحكت احجي وياه

همام : هاي ليش دتبجين ريم

اجوي كعدوا يمي وگال فهد

_ شبيج ريمه

ياسر : هيه غير تحجي

گلت بشهكه : عمته سُمية

ياسر : منو سمية

ريم : عمته

فهد : اي شايفها شبيها

ريم : ما اريد ارجع لهناك بعد مادام هيه هناك

همام : ليش ؟

ريم : مداتحمل بعد دائما تحجي حجي سم واليوم تعاركت ويايه حتئ دفعتني علئ ظهري

فهد : دفعتج

ريم : اي دفعتني ولا تكول عساس اني عثرت وكعت

فهد : مؤمل شسوه؟

ريم : بس عيط عليها واني بعد ما اريد ابقئ مادام هيه هناك لو اني لو عمته بعد

شو ما اشوف غير فهد گام گال

_ بسيطه

ريم : فهد وين

فهد : خلي اروح اشوفها شلون تدفعج بعد

رحت كمت علئ فهد وگلت

_ فهد عفيه عوفها

ياسر : شنو يعوفها هيه دفعتج لو صاير بيج شي وهيه مو تحجي هيج عليج ليش ساكته ليش مكلتيلنه

ريم : كافي عفيه ليش تخلوني بعد ما احجي شي لسون مشاكل هاهيه واصلا بعد ما اريد اروح هناك مادام هيه موجوده بالبيت

همام : ابقي هنا واشوف الي يرجعج الهم بعد

ريم : اني ما اريد ارجع اذا عمته هناك

فهد : هاهيه روحي ومترجعين اله اله يشوف حل استاذ مؤمل واني احجي وياه عود

هزيت براسي وعفتهم تلكتني ماما گالت

_ شو راجعه صاير شي

_ لا ماكو شي بس هيج اني گلتله خلي ارجع لان اضوج وحدي وهوه عنده شغل

رحاب : اي خوش يمه هلا بيج تعاي اصبلج غده جوعانه

ريم : لا ما اريد ما اشتهي صاعده يم البنات اني

رحاب : تمام يمهه

رحت صعدت فتت غرفة روان شفته كاعده و بنان يمها جان تفز گالت

_ ريم شجابج

ريم : عاجبني اجي واريد اكعد بغرفتي عندج اعتراض

ضحكت گالت : ايي عنديي

ريم : ظاهر حلتلج الغرفه

روان : اووي عابت قابل شلون غرفه اصلا بعد اسبوع وبعد ما اكعد هنا

ريم : اي ليش لا تروحين الحضن ياسر

روان : ايي اي

بنان : ريم صاير شي شوو احسج ضايجه

اجيت كعدت وگلت : اووف ماكو شي

روان : ظاهر متعاركة ويه الحب

نزعت شالي والصايه واجيت تمددت گلت

_ اووف عوفوني بضيمي

بنان : يمهه خوفتيني شصاير حتئ ابني كام يدفر بيه يريد يعرف احجي

عاطت روان وگالت : عرفت والله عرفت المسمومه وياج مووو

ريم : ايي

روان : شبيهاا

ريم : دفعتني علئ ظهري

روان : جذبببب

بنان : عزااا شهل حقاره وشصار بيج

ريم : متت ودفنوني وقرولي الفاتحه وهسه مؤمل كاعد ياكل بثريد فاتحتي

بنان : عزااا صدكك

ضحكت وگلت : الله يساعدك فهد

روان ضربت بنان وگالت : ثولج طفي شويه

بنان : اووي شبيكم وانتِ لضربيني ترا اختج جبيره اني شويه احترام

روان : مو اكوملج

بنان : ولي حقيره اي ريم كملي

ريم : ملخص مفيد بعد ما ارجع لحد ما استاذ مؤمل يشوف حل ما ارجع للبيت اذا عمته موجوده

روان : عفيهه بريمتيي النجره

ريم : لتكولين ريمتيي

روان : ليشش؟

ريم : مو مؤمل يصحلي هيج

روان : عابتلج وعابتلهه وهاي المسمومه اريد بس اشوفها اله اشلع عطوبها

بنان : هوه انتِ ضاله ياهو شوفينه شلعين بعطوبه

روان : خاف عاجبج جربين

بنان : ولي ما عندي عطوب اصلا

روان : واضح

بنان : والله ما عندي ريم عندي عطوب

غمزتلي روان فـ گلت

_ لزعلين بنون بس عندج عطوب عزاا شو اشوف هاي صاير بشعرج تعاي تعاي اشوف شنو بي

اجت بنان يمي كعدت عطت وگلت

_ عزااااا بنان بيج كمل

بنان : ها شنو

روان : عزا شدتحجين ريم بنان بيها كمل

ريم : اي بيها باع شكد كمل

روان : وخري عني بنان لتعديني مضل شي العرسي

ريم : اهخخخ بنان ليش هيج

شو اشوف غير بنان كامت تلزم بشعر وشم بي وتكول

_ والله دائما اغسله حتئ ريحته طيبه وحتئ فهد يكول

جان نطكها بضحكه اني وروان گلت

_ خطيه عليك اخويه جان يحب ريحة شعرج هسه شلونن لازم ادورله علئ مره شعرهاا ريحته اطيب ومابيها كمل

روان : يلا عاديي مثل ميحب ريحة شعرج حيحب كملاتج بنان لزعلين

ريم : لا عيني لاا حبدي ادورله علئ مره شنو ياخذ وحده مكمله

شو منشوف غير بنان كامت تبجي ولازمه بطنها وتكول

_ والله شعريي مابي كمل منين اجه

ريم : شسوين هاهيه

بنان : دائما اغسله

روان : الله يعوضج

ريم : هسه فهد يزوج عليج

بنان : يزوج عليه؟

ريم : ايي اكيد جا شنو يبقئ وي وحده شعرها متروس كمل

عاطت علينه بعصبية وهيه تبجي گالت

_ والله دائما اغسله منين اجه الكمل

روان : يلا عادي لزعلين عود نلبسج باروكه وخلي استاذ فهد يسودن عليهه

بنان : طاحضكم ادبسززيات

جان تاخذ شالها وتلبسه شلون مجان وطلعت هيه تبجي جان اعيط وگلت

_ هسه فهد بس يشوف شعرج يروح يخطب ليان

اشو اني گلت هيج وهيه كامت تبجي بزايد وسدت الباب حيلل وطلعت صدك حسيت نفسي حقيرة

روان : هوه كله مشه صح بس لصتيها بالنهايه منيلهاا ليان ام عطوب

ريم : اي والله صحح بس شسوي لا شغله ولا عمله خلي اكعد احرك بين الازواج واهجم بيوتهم

روان : هوه انتِ بس هاي الحايره بيها

ريم : شسويي

روان : صدكك ريم تعاي شوفي يا بدله احلئ البسها بعرسي

اجت يمي شوفني جان اكول

_ شو ذني مشلحات

روان : لا وين

ريم : هياته شوفي حتئ صلوخ وثاني شي ترا القاعه مختلطه شلون تلبسين هيج

روان : اووف حبيتهن

ريم : شو اشوف باعي هاي بدله حلوه ومستوره هم

روان : اي حلوه بس اريد البس هاي

ريم : ويسورتج يقبل

روان : لااا بس حتئ لو

ريم : شوو كومي مني يمي عوفيني خلي انام بفراشي مشتاقتله

روان : انهمديي

_____________

بنان
هنه حجن هيج وياي كمت ابجي ومنا كلولي يروح يخطب ليان تخبلت بالزايد رحت للغرفه ملكيته كعدت ابجي ..

جان يفوت فهد گال

_ هاي شبيج تبجين

اجه يمي كعد گلت

_ وخرر فهد عني

فهد : بدت رحمة الله شبيج

بنان : روح روح اخطب ليان

فهد : شبيج بنان شجاب نعال بالنص

بنان : روح اخطبها اي عيني بعد بنان متفيدك صار شعرها محلو اي اي روح ليان

فهد : شسوي بـ ليان شبيج

بنان : ريم هيه وروان كالولي راح تخطب ليان لان شعرها احلئ من شعري

بقه صافن بوجهي گال : وانتِ دتبجين علئ هاي

بنان : لااا وكالولي شعري بي كمل هم

ضحك وگال : ليش كمل بيج ؟

شفته يضحك لوو تخبلت بزايد گلت

_ اي اضحك عليه اضحك

فهد : هسه غير افتهم شبيج

بنان : ريم روان يكولون شعرج بي كمل وفهد حيزوج عليج

فهد : هاي يعني مسويج مضحكه وانتِ الفاهيه مصدكه وكاعده تبجين ولو انتِ متصدكين تلكيلج سالفه حتئ تنزلين دموعج

بنان : لتحجي عليهه

فهد : مو انتِ تخلين الواحد يحجي عليج

بنان : فهد

فهد : خيرر

بنان : انيي بيه كمل

ابتسم وگال : لاا

بنان : لجذب عليههه

فهد : شبيج ممجذب

بنان : اكيد

كام لزم شعري وباسه وصل يشتم بي وگال

_ كُلشي مابي شو شوفي شحلاتهه وريحته ترد الروح

ابتسمت وگلت : صدك فهد

فهد : ايي شبيج يغارن منج لان شعرج حلوو

بنان : زين اني عندي عطوب

كام يضحك وگال : تريدين الصراحه؟

بنان : ايي

فهد : هوه صراحه صراحه لا بطلت هسه زعلين وتكعدين تبجين

خنزرت عليه وگلت : لا احجي

لزم شعري وگال

_ هوه انتِ عندج بس ترا اني احبهن

بنان : تضحك عليه انتَ

فهد : وين ضاحك

بنان : لا دتضحك بعد لتحجي ويايه خوش

فهد : صارت خوش مو جانت اوك

بنان : بكيفي

داكوم جان يجرني ويصير فوكايه صارت عيني بعينه گلت

_ فهد وخرر خلي اكوم

فهد : تؤ

بنان : شبيك فهدد خلي اكوم

فهد : ماكوو متكومين

بنان : ليش

فهد : بكيفي ؏ كولتج

بنان : هسه شنو راح تضل هيج

يحجي وعيونه صارت علئ شفتي وترني صرت ما اعرف شنو احجي جان يكول

_ اي عندج مانع

بنان : لا بس

بعدني ممكمله كلامي جان يبوسني بشفتي جان يوخر باوع عليه گال

_ شو جمدتي

_ هـاا

_ وجعاا شبيج خنستي قابل اول مره ابوسج

دفعته وگلت : وخرر فهد انتَ صاير ابد ابد ابد ابد متستحي

فهد : اني؟

بنان : ايي

فهد : ليش شمسويلج اشوو حباب وماكو اعقل مني

بنان : لعد منو باسني هسه

فهد : هسه علئ البوسهه شو تعاي هاي ثانيه

شو رجع وباسني مره ثانيه جان اضحك واكول

_ فهد كوم مو الطفل نجعص

جان يكوم بسرعه ويكول

_ شنو نجعص امشي للمستشفئ

ضحكت وگلت : انتَ كُلشي وگلت امشي للمستشفئ

فهد : اي غير انتِ كلتي نجعص

بنان : لا كُلشي مابي

فهد : شنو ضحكين عليه انتِ وشلون ينجعص بلا

بنان : ما ادري

فهد : مو ثوله

بنان : هاي عليه ؟

فهد : ايي

بنان : اوك

كمت وجريت حجابي وطلعت من الغرفه اشوف يا ثوله بعد تحجي وياك

_________

رزان
چانت الدنيا عصر وأيهم توه راجع من العياده
كاعد يكتب وعنده اوراق جان يكول

_ رزان جيبيلي مي

رزان : هسه دقايق

نزلت بسرعه جبت اله مي وصعدت لكيته لازم تليفونه يخابر فاتح مايك ويكتب بأوراق .. بس اني سمعت صوت بنية ؟

چان ممنتبه علية واسمعه مادري يحچي حتى مو انكليزي عرفت احد من المانيا بس هاي بنية
اشتعلت نار بگلبي .. شنو شعنده يحجي وياها وهو يشتغل هم ؟ لعد اني ميحجي وياي من يشتغل منية هاي الي هيچ مهمه عنده أكثر مني

شمرت الكلاص حيل بالكع انكسر

رأساً باوعلي وهو مصدوم ولحد الان يحجي
ثواني و سَد الخط

باوعلي وگال : شبيچ رزان

رزان : منية هاي ؟ منيةة؟؟

ايهم : منو قصدج

رزان : ايهمممم الي دتحجي وياها قبل شوية منوو انتَ لما كلتلي جيبي مي ردت بهل وقت تحجي وياها موو تنتظرني اروووح

كام بعصبية وگال : شبيج أنتِ هاي وحده من المانيا بيناتنا شغل قبل جان وبس دكت على شغلة وراحت

رزان : لااا انتَ دتخوني

ايهم : رزان شنو هل حچي

رزان : اي اي شيسموووها لعد هاي

ايهم : شغل شغل شغللل

رزان. : مااا اقبل ايهم تفتهم شنو ما اقبل حتى لو شغل ما اقبل تحجي وية بنية

ايهم: شبيج هجمتي علية هيچ وتخوني وهل حچي هذا الي ما اله داعي تعرفيني اني ايهم رزان تمام معندج ثقه بيه

رزان : مو شغلة ثقة ايهم بس ما احب تحجي وي بنيه اتخبل عليك

ابتسم وكال : انتِ تغارين علية يعني

رزان : اكيد

ابتسم الي وكام يحچي

اتغارينَ عليَّ وأنتِ علمتِني معنى الحُب ؟
اتخشَي ابتعادي وتخشَي أن يختفي الحُب بيننا ؟
لا تشغلِ نفسكِ بالغيرة والخَوف علي
فأنا قلبي لا ينبُض الا لأجلكِ بالحُب
وغيركِ ليسوا سِوى عابرين في حياتي
لذلكَ .. احبچ هواي

حضنته حيل وگلت : اني هم احبك هواااي وكلامك يجننن اهخخخ احبك ايهمي ..

ضل ثواني يمسح على شعري بعدين گال

ايهم : تدرين هسه شنو

رزان : ها شنو

ايهم : روحي وخري هذا الكزاز والمي امسحي

رزان : ما اوخره انتَ وخره لان ضوجتني

ايهم : دروحي لج

رزان : رايحههه

رحت اوخره الكزاز شلت الكبار و خرت الصغار بس بالغلط ايدي انجرحت شفت الدم يجري من ايدي

رزان : يمههه ايهممم

كام بسرعه اجه علية : شبيج شبيها ايدج

رزان : انجرحت

ايهم : وين شاش والمعقم

رزان : يمهه باع الدم

ايهم : وينهن احجي

رزان : هناك هناك

اشرتله راح بسرعه جابهن و اجه يلف ب ايدي ويكول

_ اهخخ الفهاوه مالتج

رزان : شبيك

ايهم : مابية شي ايدج كاعد توجعج؟

رزان : معليك ب ايدي انت كلت علية فاهيه ؟

ايهم : اي لعد هاي شيسموها

رزان: وخر اي يلا اني فاهيه

ضحك وگال : واني ممجذب انتن كلجن فاهيات ما عدا روان

رزان : بسيطه ايهم الا اكول لعمو زياد عليك

ايهم : خفت يابوية خفت حتخربط

رزان : وخر يلا شكراً

ايهم : اهمداج فوك ما الف ايدج

رزان : اي ايي

_________

روان
بقيت اكلب بالبدلات وگلت خلي استشير ياسر كمت ورحت لكيت كاعد جوه وحده بصاله

اجيت كعدت يمه وگلت

_ ياسرر لحكلي ياسر

ذب تليفونه وگال

_ شكوو شكووو منو مات

روان : روانك ماتت

خنزر وگال : انجبي طايحة الحظ شنو متي مو اكوم اكسرج

روان : هسه شحجينه عيني مهندوويس ياسر

ياسر : غير انتِ صايرة ادبسزز

ضحكت وگلت : ياا صدك هسه دريت اي المهم مثل متعرف عرسنه بعد اسبوع

ياسر : اييي ادري

روان : فشنوو تعال يا بدله احلئ اشتري

ياسر : شو خلي اشوف

روان : شوف شوف

اخذ تليفوني كام يشوف البدلات جان يكول

_ محلوات

روان : ياسررر شنو محلوات

ياسر : اي والله محلوات

روان : هوه صوجيي استشيرك

ياسر : شو دروحي

روان : اكرهك

ياسر : اموت منجج

روان : طلكنييي

ياسر : اكلي عسل

روان : ما اكلك

كام يضحك گال

_ شنو شكلتيي

روان : هاا كلتت ما اكل نفسيي

ياسر : لا لا كلتي ما اكلك زين اعترفتي اني عسل

روان : اصلا ما احب العسل

ياسر : بس تحبيني

روان : حيل واثق

ياسر : اي اي هسه ولي من يمي خلي اشوف نتيجتي

روان : جذبب غير تروح للجامعه

ياسر : لا هسه خابرني احمد گلتله شلون حصلت شهادتك مو علئ باجر كال بس خابرت علئ دكتورة واحجي وياها هيه حبابه تنطيك راسب لو ناجح

روان : وانتَ شنو

ياسر : ما ادري هسه ردت اخابرها و انتِ اجيتي

روان : يلا يلا خابرها وصدك احمد شطلع

ياسر : ناجح

روان : والله عفيه عليه وانتَ

ياسر : صبري هسه اخابرها هيه اصلا تحبني

روان : شنو تحبككك ؟؟

ياسر : ولجج ياتحبني اصلا مره جبيرة هيه بس حبابه يعني تحبني لان اضحكها فهسه بسرعه تكلي لان ما اصبر الباجر

روان : هااا عباليي

كام يخابر كدامي علئ دكتورة الي مستلمه بحثهم وهاي كام يحجي وياها ويضحك وهيج من هل حجي الطيب وانطاها اسمه شو ورها كام يتشكر منها وهيج وسد تليفون گلت

_ ها بشررر

ياسر : ناجححح هلهلي هلهلي

روان : يعني مو دور ثاني

ياسر : بيش طالبتني اي عمي من اول دور مو اكول اني سجاج محد يصدكني

روان : اييي يلا مبروووك

كام اجه يمي وباسني بخدي وگال

_ الله يبارك بيج روانييييي

وكام يعيط والكل طلع علئ عياطه

فهد : شبيك تجوعر

ياسر : ناجححح غير ناجححح

همام : شمدريكك

ياسر : معليكك المهم ناجح هلهلوووو

ريم : هسه صار صدك مو هنديوووس ياسر

ياسر : عمي مو اكول اني سجاج شاطرر محد يصدك

همام : ديلاا كافي خبصتنا

ياسر : امداككم يمهه وينجج

خاله رحاب كامت تهلهل وحضنته والباقين هم باركوله وعمو محمد و عمو زياد

ريم : هسه بالاخير يطلع دور ثاني

بنان : احلئ شي

ياسر : ريم انجبي وانتِ مرت الغالي ما اكدر احجي عليج بس هم انجبي

شو منشوف غير فهد كفخه گال

_ ياسرر احترم نفسك

ياسر : محترم بس وخر اسفين مرت الغالي المهم ناجححححح

همام : يلا هسه ثبرتنا

ياسر : وانتَ شبيك مضغوط

ايهم : ايي مبرووكك ياسر

ياسر : الله يبارك بيك ابن العم

شو منشوف غير ياسر راح لبس حذاء مالته جان يكول فهد

_ وين رايح

ياسر : حروح لاحمد نحتفل

همام : شلون ثنين

ياسر : وخرر من يمي المهندس " ياسر محمد " بعد لحد يحجي وياه رجاء

همام : دطيرر

_________

ريم
گاعدين بليل وروان فاتحه تليفونها تگلب بالبدلات مال عرس

ابتسمت على شكلها وهي تدور
دك تليفوني شلته طلع مؤمل
انطيته رفض

دك مرة ثانيه .. وهم نفس الشي انطيته رفض
ما اتحمل اضل بعد بالبيت كلهم زينين وياي الا سُميه
الوحيده ضدي شكد خاله ام مؤمل تحبني هي واسيل وماعندي مشاكل وياهم وعلاقتنا كُلش حلوة

حتى عمته سُمية من تشوفني احجي وياهن تغار وتكعد تخوزر واخر فترة شدت وياي حيل بس توصل لهيج مواصيل اني ما اسكت ولا اتحمل ..

شكد احب مؤمل بس هذا الي ديصير اني ما راضية عليه ولازم يشوف حل .. لو اني لو عمته

ضل مستمر يدك علية بعدين كمت ما اجاوبه وما دك بعد ..

دقايق و دز الي مسج
كابرت انتضرت دقايق والدموع بعيني بس مكدرت فتحتها ..
جان كاتبلي

" انتَ تدري
تدري كل ليلة بغيابك ينهدم ثلثين عمري
وانتَ تدري بكل لحظه بودادك بيها
يكبر باقي عمري
و انتَ عمري ولا تظن غيرك حَبيبي
يا حبيبي "

وراها دز " ريم "

هم مجاوبته ودموعي نزلت واني اقرا
دز مسج ثاني

" مو بيدي ابتسم كلما حچوا عنك
بس انتَ "ضحكة طفل" ما ينشبع منك
والروح لمن تمر يابه شكبر حظها
وعيوني اذا شافتك جيب اليغمضها
مرتاح يمك واحس كُل خساير قبل
بيك الله عوضها
وكل نسمه منك تهب تاخذني وياها
ومعذور اذا بالغت
زينات كل البشر بيك الله خلاها "

متحملت كمت ابجي ..
سديت التلفون وجتي بسرعه يمي روان وهي تسألني : ريم شبيج تبجين باعيليي

حظنتها واني ابجي ماعرف شكوللها
احب مؤمل حيل احبه بس عمته الي جاي تخرب بينا واني ما اتحمل بعد الديصير لازم يشوف حل ..

روان : علمود مؤمل مو ؟

مسحت دموعي وكمت احجي : اي ديراسلني

سكتت وبعدين كالت : مؤمل لازم يشوف حل لهاي عمته هو صح صعبه بس لازم يلكا حل يقنع الكل

ريم : واني جاي انتظره .. فهد كلي رح احجي ويا

روان : لتبجين لعد اكيد راح يلكى حل

ريم : اهخخ روان مادري شكول

روان : سكتي ونامي بعدين عود شوفي شلون تصفى

ريم : اشتاقيتله

روان : انجبي هو اليوم الصبح رجعتي شوكت لحكتي تشتاقيله

ريم : مو وكت شقه يعني صدكك بس والله اشتاقيت اله حيل

روان : هسه نشوف شيصير .. بالنهاية اكيد مؤمل مراح يعوفج ريم هو يحبج وأنتِ تحبي اكيد اكو حل

ريم : دا انتظره شوكت يلكا الحل سيادة الضابط

روان : اوي شكو تفكرين حروح لياسر لان هسه رحع من احمد فـ اكله يشتريلنا حلويات وهاي نكعد نشوف مسلسل

ريم : يعني بربج هسه اني ضايجه وانتِ تكليلي مسلسل

روان : لعد شكلج هو اني اعرف بالنهاية شيصير فـ شنو لتهتمين لـ هاي مسمومه وتعاي نشوف مسلسل

ريم : ها تعرفين النهاية ليش أنتِ ام اصهب

روان : ايععع اكيد لا بس واضحه يعني فـ بعد ليش كل هذا

ريم : اوف هم ماريد

روان : لعد ولي حروح ليسورتي خلي يجيب بس الي

ريم : لا جذب اني هم اريد

روان : عفية من البداية وكولي شكو صار ساعه لا ولا كافي تبيعين ثكل

ريم : ولي يلا

_____________

بنان
دامشي اروح الغرفة البنات لان زعلانه من فهد جان يجي ويجرني من ايدي فوتني الغرفتنا گلت

_ شكو فهد

فهد : فهاااد يريد يحجي وياج

بنان : لا فهد ميحب يحجي وي ثولات فاروح اني احسن

فهد : زعلانه علمود كتلج ثوله

بنان : عوفني خلي اروح

جان يلزم بطني وگال

_ الحلوو بيا شهر صار

دفعته علئ كيف وگلت

_ شوف حتئ متعرف بيا شهر صرت لو تحبني صدك جان عرفت

فهد : بلشت الهرمونات مالتج

بنان : مو هرموتات هاي حقيقه لو صدك تحبنيي جان عرفت بيا شهر اني

فهد : اي بيا شهرر ؟

بنان : حفوتت بالسادس

فهد : صلوات ما شاء الله

بنان : ايي

جان يوخر الشال ويلزم شعري وگال

_ بنان تدرين انتِ حلوه

بنان : ترا ما انسئ انتَ كلت عليه ثوله

فهد : شنو انتِ متنسين

بنان : لا ما انسئ

باوع علئ شفتي وگال

_ شو شفتج صايره حلوه

بنان : اييي

نزل عيونه علئ جسمي وگال

_ هاي شنو صدرج كبران ؟

هوه گال ههيج واني عطت گلت

_ فهددد شنوو هذا الحجيي عوفنيي لتحجي ويايه

ضحك حيل وگال : اوووي فهااااد

بنان : ليش تحجي هيج ويايه

فهد : قابل مجذب اني

بنان : اووف عوفني

فهد : لتتأففين هسه هم بس تجيبين ابني هم يكبر

بنان : لتحجي هيج فهد ما احب هل حجي

اجه تقرب يمي وخله راسه بركبتي وگال

_ عود صدك متحبين هل حجي

بنان : امممم

جان يوخر راسه من ركبتي باوع بعيوني وگال

_ خدرتي لو لا حتئ ابلش بشغلي

فتحت عيوني وگلت : شنوة فهدد

فهد : شبيج غير اول شي اخدرج بعدين اشتغل براحتي

بنان : عزاااا

جان يبتسم وگال

_ اول شي ابوسج بشفتج

جان يبوسني بفشتي ورها گال

_ ورها ابوسج بحنجج

وجان يبوسني ورها گال

_ بركبتج

جان يبوسني ورها گال

_ ابوسج بصدرج

قبل ميبوسني دفعته وگلت

_ فهد نعسانه تعال نام

ضحك واجه گال

_ اي نام ليش لا بس شنو نسيتي اني كتلج ثوله تعاي خلي اكمل صلح

بنان : هاا لا عادي عادي هوه اني مرات انثول ميحتاج تصالحني

فهد : لا ميصير اني الي ازعله لازم اصالحه

عكدت حواجبي وگلت : وكل الي صالحهم سوي هيج وياهم ؟

ضحك وگال : لا انتِ صلح خاص الج

جان يجرني الحضنه وگال

_ احبج هواي بنان

بنان : اني هم

تنهد وگال : بس لو تعرفين شكد احبج

وخرت من حضنه وبسته بخده گلت

_ اني هم احبك هواي

____________

مر اسبوع
روان
اجه يوم عرسنا .. اني و ياسر
واكفين كلنا بالصالون ومكياجنا وفساتيننا ونضحك ومكيفين

اشوف الحزن بعيونهم بس اني م احب ابجي وأبين حزينه لو هيج ..

گالت بنان : عفية خما بطني مبينة

رزان : بالعكس والله فستانج يجنن وممبين

روان : ترا عادي واذا بينت اوي

ريم : سكتي عيني .. ولكممم روان سوت عرسها بقاعه واني لا ؟ لك مؤممللل

بنان : عادي واذا احنه كلنا مسويناه بس عرس روان وياسر لازم غيررر

رزان : صح صدك روان شو مكلتي خايفه ولا هاي

روان : امممم اني اخاف لا عيني لا اني مو يم الخوف اصلا ولا يم البچييي مثل بعض الناااسسس

بنان : شوفن شوفن شلون تبسمر

ريم : اي مو حقيرة

رحاب : لشوكت تضلن بهاي سوالف المناكر حتى بالعرس

روان : اي يا خاله يا حبيبتي متحله الأجواء الا بهيج

بنان : ام المشاكل

ريم : اوف يا يمههه روان حتزوج

روان : وانتِ تزوجتي هممم لتنسيييين

ريم : اوف كلنا تزوجنا اهخخ

رزان : اشوو متحمسه اني يلا شوكت تعرسين

روان : لا واني هم .. اريد اشوف يَسورتي بكل عرس اشوفه بس بعرسسسي اليوممم مشفته

رحاب : هسه يجي ياخذج منا

بنان : لعد فهد يجي ويا

رحاب : لا فهد يبقى بس يجي همام يوديكم للقاعه

روان : اويييي لعد ياسر يجي بسيارة وحده ؟

رحاب : اي

ريم : وحدكممم ايييي ليييش لا

روان : عين الحاسود بيها عووود

ريم : ما أحسد انس اسحرر

بنان : بناتتت فهد دك علية

روان : شكال

بنان : بسرعه كلكم تحضرن ياسر جاي بالطريق

روان : هلا بعريسي هلا بـ يسورتي

رزان : دقيقههه اني مكياجي حلو ؟

ريم : اييي

روان : واني

بنان : تجننيننننن

رزان : حتحي مَي؟

بنان : اي راح تجي

روان : ايي همزين

ضحكت بفرحه ورجعت اباوع لشكلي بالمراية وفستاني الأبيض ومكياجي

فستاني جان مستور لان قاعه مختلطه
والبنات هم نفس الشي كلهن حلوات فساتينهن

دقايق وكالت رزان : اجه ياسررر اجههه

وفعلاً ثواني وياسر فات للصالون جان مغطي وجهه بـ ايده ومبتسم

باوعت لخواتي يضحكن

ابتسمت وگلت : هسه على شنو مغمض روانك مثل ما هي ترا

وخر ايده وضل يباوعلي وفاتح حلكه من الصدمهه
گال

_ شطالعه طركاعتي

روان : مثل متشوف يَسورتييي

ياسر : تجننين عمي وبعد طوايف عميي اهخخ خرببب دباع الحُمره

روان : ادبسزز لتجي تطلع سرسريتك كدام البنات اوكك

همس وگال : ايييي دسكتي خل اشوف هاي شنو كدامي

ويضحك ويكول : تخبلين طالعه

حظني حيل وباسني من راسي : احبج رواني حيلل .. وأخيراً اجه يوم عرسنا وشفتج بالبدله البيضه .. تخبلين تخبلينن موزين كاض روحي لا اسوي شي بنص هذني دباع هاي ريم مبككه عيونهاا

روان : عوف ريم هسه صدك شلوني أني حلوة مو

باوعلي ويبتسم : هي بس حلوة طركاعة أنتِ طركااااعة

روان : احبك

ياسر : لج خربببببب امشييي نطلع

روان : دوكففف خل نركص هنا شوية هناك وين اكدر انيي

ياسر : اي والله صدك

وميقبل الا عود اغنيتههه ويغني ويركص واني اهز ويااه

ويضحكك وريم تحشش عليناا
بعد شغلنا اغنية " عرس المرجله " بس هنا ردحنا كلنا مضل واحد ما ركص واني وياسر علكناها بالركص

بحيث اخر شي يضحك ويركص وگال : عرسيييي مدااااصدككك

ضحكت وگلت : صدك حبيبي صدك

ياسر : اشتعل عمييي

روان : محمود مو

ضحك وگال : منو غيره

دقايق وطلعنا من الصالون والبنات وخاله رحاب بسيارة همام أما فهد وحسن وعمامي ضلوا بالقاعه

ركبنا بسيارة وحدنه اني وياسر وجانت مزينه تزينها حلووو وشغلنه اغاني راد يطلع اغنية تورط گلت

_ لا طلع غيرهاا

_ لعد شوفي شراح اطلع

جان يطلع اغنية وكام يغني ويركص وياها

_ اريد ازوج افرح واودع هل عزوبيه
واودع هل عزوبية واسوي عرس لا ما صار

جان يأشر هيه ويكول

_ لخاطر هاي البنيه

يغني هوه واني كاعده اهز بيدي واضحك واصور

ورهاا وصلنه للقاعة اول مفتنه لكينه عائله كلها قبلنه واصله للقاعه اول مفتنه الاستقباليه طلعوا
حسام الرسام مال هم عريس وبدت الهلاهل وتصفك

ورها رحنه كعدنه واني كاتمه ضحكه وهوه بس يتمضحك ورهاا شاورني وگال

_ ثكلي كافي تتمضحكين

روان : يعني واحد ميضحك

ياسر : لا ضحكي عمي اليوم عرسنه

ورها طلعوا اغنيه

ونزل ياسر يم الولد ذبوا لحم بأختصار ركصوا ركص مصايرر وصاروا يغنون وي الاغنيه

_ عروستنا ماكو مثلها .. عروستنا ماكو مثلها

ولما وصلوا لها مقطع كاموا يصيحون ويكولون

_ وعريسنا حبها واخذها

اكثر شي ياسر واحمد ذبوا لحم ..

ولما طلع مقطع

_ يلتحبوه باركوله باركوله باركوله .. بيوم عرسه هلهلوله

جان احمد يكول

_ اي ليش منهلهل نهلهل

وكام يهلهل واحنه فاطسين من ضحك والبنات كلسع يجن يمي ويروحن ينزلن بس ست بنان عيني متتحرك فهد ميقبل ..

وياسر كلسع يجي يمي يهز يمي واني بس اتمضحك وهز بالباقه مال ورد ..

________

بنان
كاعده واباوع شلون يركصون وكل ما اريد اكوم اروح يم روان فهد يكولي

_ كعدي ماكو

بنان : فهد خليني اكوم من اول ما اجيت كاعده

فهد : كعدي كعدي ماكو كومه

بنان : اوووف

واباوع علئ ريم كلسع تخطفلها نظرات من مؤمل وتنزل راسها ..

وبالنسبة الـ مَي كاعده هادئه متحركة هم وهمام كل الحفله بس يباوع عليها مشال عيونه عنها ..

ورها كالوا انو راح يركصون جوبي

فكاموا كلهم وفهيد هم وياهم طبعا ..
واني مشلت عيني منه باقيه اباوع عليه شلون يركص جوبي ..

وره مكملوا اجه يمي گال

_ هاا شفتيني

ابتسمت وگلت

_ اي والله طالع تخبل كسرت عليهم

ضحك وگال : اي شعبالج

كاعدين جان يكولون العروس راح تذب الباقه مال ورد

فالبنات كلهم كاموا جنت اريد اكوم جان يكول فهد

_ وين وين كايمه

بنان : غير اروح الزم الباقه

فهد : استجني يا باقه هاي واني شنو هنا تروحين تلزمين باقه

بنان : شبيك فهد والله حلوو

فهد : شنو تريدين تزوجين

بنان : لااااا بس هيج خلي اوكف

فهد : لا ماكووو كعدي تريد تلزم الباقه ليش اني شنو هنا والله خوش سالفه هاي

بنان : اوووف فهدد

فهد : ابقي تتأففي ماكووو

رزان رادت تكوم ايهم گال

_ واين رايحه

رزان : غير اختي راح تشمر الورد خلي اروح الزمه

ايهم : مو مزوجه انتِ بعد شكوو

رزان : حتئ لوو خلي اوكف حباب

ايهم : شنو واني شنو هنا

رزان : حباب خلي اروح بس هيج اوكف

اتنهد وگال : روحي بس متلزمين الورد تمام

رزان : اي والله مالزم

كامت رزان راحت گلت

_ فهد خلي اكووم

_ لتلحين ماكو كعدي شنو تروحين توكفين هل سوالف مال زعاطيط وهم انتِ مزوجه وحامل بعد شكوو لو عاجبج جددين

بنان : بطلت ما اريد

فهد : اي احسن

همستلي ريم وگالت

_ يلا اني خلي اروح اوكف

بنان : مو مزوجه انتِ

ريم : حتئ لووو اريد اروح اغور مؤمل

بنان : باع الخباثه

ريم : شعبالججج بس هاي روان متفقه وياها اني انو تنطيني الباقه حتئ اغور مؤملي

بنان : شلون عصابه

ريم : اي عيني

راحت ريم وكفت وياهم جان اشوف مَي كاعده گلتلها

_ متكومين مَي انتِ هم

كالت بهدوء : هـاا

_ متكومين وي البنات

مَي : مو ما اريد

بنان : حتئ لو بس اوكفي هيج وياهم حلوو

مَي : هيج تكولين

بنان : اي اي كومي

كامت راحت واني كلسع اخزر بفهد وهوه يضحك عليه ..

_________

روان
واكفه داريد اذب الباقه وريم تكولي

_ روان انطيها الي عفيه

روان : انتِ مزوجة ولي

ريم : روان لسوين هيج عفيه

روان : ماكووو عيني كعدي وسكتي

ريم : اووف مو متفقات احنه

روان : ماكووو

ريم : وانتِ رزان شكو واكفه مو مزوجه

رزان : شعليج بيه وانتِ هم شعندج واكفه

ريم : اني حاله استثنائيه

رزان : اي معليج

روان : يلا بنات حشمر الباقه

صرت اسوي نفسي راح اشمرها وهنه يعيطن يريد يلزمنها واكعد اعيد بالاخير بالمره ثالثه كمت نزلت من ستيج ورحت علئ مَي انطيتها الورد

روان : هاج مَي اخذيها يوم الالج

ضحكت وگالت : الي

روان : لعد الجدي

مَي : اووي شكرا روان

وكاموا يصفكون وهيه تضحك وترفع بالورد بنزاكة ..

جان تكول ريم : شكد حقيرة انتِ

روان : هذا الموجود مَي ما مزوجه انتِ مزوجه شنو تريدين تعرسين هم

ريم : اهخخ منج هسه اكول لاخويه يطلكج

روان : ههيهيههيي بعد ماكوو تراجع

ريم : وانتِ كيفتي بالفاهيه

مَي : هـاا

ريم : وجعاا يلا يختي يوم الالج ونشوف عرسج وجهالج المهم انطيني الباقه اطك وياها صور

مَي : ماا شنووو مالتي

ريم : مراح اكلها بس اطك صور

راحت جرت ريم الباقه من مَي واحنه نضحك عليها

رحت كعدت جان ياسر يكول

_ احبج رواني

ابتسمت وگلت : اني هم

ياسر : شكد جنت متمني هذا اليوم

روان : اي وصار

ياسر : واخيرا يطركاعتيي

روان : اييي

ياسر : اليوم نلعب فلك بالغرفة

روان : ياسرررر

ياسر : صخمانن بسيطه اني الج

روان : اي اي

ورها كالوا انو لازم نركص سلو بقه ياسر يباوع عليه واني اباوع عليه واضحك لان نعرف نفسنه مو مال هل سوالف ..

المهم رحنه وكفنه حتئ نركص وهيج يعني وطلعولنه اغنية اليسا " عبالي حبيبي "

واني خجلانه بس بنفس الوقت اريد اضحك وصرنه نركص بهدوء بس اباوع عليه كاتم ضحكه گلت

_ لك ياسر مراح اتحمل اريد اضحك

حجه بضحكه وگال : لج لتفشلينه كملي ركص ومعليج

متحملت كمت اضحك گلت : يمهه شكد فشله والله احنه مو مال هل سوالف يعني زايده هل فقرة ولا فوكاها مطلعينه اليسا

ياسر : انجبي وركصي يلا غني وي الاغنية

اضحك واني اكول : عبالي حبيبي عبالي حبيبي

ياسر : والله انتِ مو مال رومانسيات

روان : اي والله مال ردح اني

ياسر : كملي كملي ديباعون علينه

روان : اي اكمل ليش لا

كمت اغني بهمس واضحك وي ياسر

_ ليلة البسلك الابيض .. وصير ملكك ودنيا تشهد
وجيب منك ان طفلك لا لاا صدك ذكرت منجيب اطفال احنه موو

غمز وگال : كلشي بوقته حلوو

جان ادوس علئ رجلي بكعبي واحنه دنركص عفس وجهه وگال

_ اشتعلووا اهل ياسر اني اعلمج

ضحكت وگلت : منجيب جهاللل

ياسر : خوشش

احرك حواجبي واضحك : عبالي تجرحني وعبالي صالحني بلمسه حنوني بغمرة مجنونه

ياسر : لا بكتله احسن

روان : اي والله احسن يلا كافي شوكت تخلص الاغنيه شو طولت

ياسر : تحملي هسه تخلص

روان : ايي احسنن حتئ نطلع ردح هل اغاني متفيد

ياسر : ولج اني نسطرت بعطرج

روان : ليش طيب

ياسر : غير يشك اهخخ منج متحلفلج

روان : يسورتي عاجبك ادوس علئ رجلك مره ثانية

ياسر : لا رواني

روان : اي عفيه لعد لتحجي هيج

ياسر : اوك ست روان

ورها كملنه ركص بس احنهه خربانين ضحك اباوع علئ خواتي والولد هم يضحكون علينه

وسمعت همام يكول

_ والله انتو مو مال هل سوالف

ياسر : بالعكس ركصنه حلوو

همام : اي حيلل مو ضحكتوا الاوادم عليكم

ياسر : ولي طاح حضك غويرر

همام : اي اي واسي نفسك

________

ريم
باوعت الكل ملتهي
مؤمل كل ما اباوع عليه الكاه خازرني واني متجاهلته ..

بالذات لما رحت يم روان بخصوص باقة الورد وامف خازرني ..

اههخ فوكاها طالع حلو .. شسالفته هو وفهد كله اسود فوكاها يطلعهم حلوين .. ريم بعد بعد انتضري شوفي شيسوي و الحل اوف يا مسمومهه .. هاي تاليتج ريم تحجين وي نفسج مثل الخبله ..

بعدين ورا شوية كلت اطلع برا القاعه اصور شوية
طلعت برا اتمشى ماكو احد كلهم جوا ملتهين يركصون ..

واكفه واطك صور
سمعت صوت وراي بعدين سكتت
مرة ثانيه سمعت صوت حركة أندار ما الكى احد
رفعت تلفوني اريد اصور ما احس غير ايدي انجرت حيل وانشمرت بمخزن شو ما اشوف غير واحد لا اعرفه ولا يعرفني سد الباب علينه ..

نهاية البارت
يتبع ..

(لاتنسوا التصويت )

أن شاء الله يعجبكم البارت وبال 5000 كلمة 💖

7.nldn حسابنا الأنستا

إلى اللقاء يا أعز العابرين في قلبي ♡.

الكاتبات دينا & نور