نقطة لقاء الفصل السابع وخمسون 57 - بقلم دينا _ الكاتبة نور

الشمسُ قُسمت نصفين لي ولها
النور في خدِها ،والنار في كَبديْ

>>>>>>>>>>>>>>>

جمدت بمكاني لما سمعت عياط خاله رحاب وبجي آسر بصوت عالي ..

عطت بصدمة : يمهههه شبي ابني

ركض بسرعة فهد واني هم نزلت وراه ركض اباوع لكيت خاله لازمه آسر وتبجي ..

وآسر مفرفح من البجي اجه بسرعة فهد شاله يريد يسكته وعاط

_ شبيي شصاير

رحت بسرعة وكفت يم فهد وكمت لزمت ايده وبجيت گلت

_ شبيك ماما حبيبي

وهوه يبجي مفرفح .. باوعت لكيت زوزو كاعده شلون ارتفع ضغطها راحت يمها خاله ..

ولكيت فرح واكفه علئ صفحه وتبجي گلت

_ فهد جيبه عفيه خلي اشوفه شبي

ما اشوف غير عاط بيه وگال

_ انلصمي انتِ

_ شبيك فهد جيبه

مرد عليه وبقه يحاول يسكته جان يعيط وگال

_ هاي شنووو راسه

اجيت يمه اريد اشوفه لكيت حنجره صايرة براسه وهوه يبجيي

رحاب : ولك يمههه اخذته شلته شويه ورها رحت اريد اشوف الجدر خليته علئ القنفه يم فرح شو ما اشوف غير لطه لكيته واكع ويبجي

فرح : والله بالغلط وكع ما ادري داشيل فلت من ايدي

رحت عطت عليها گلت : غير تنتبهين ومنو كلج تشيليي

فهد : كافي بنان

_ شنووو كافي طفلة صغيرة شلون تشيله ليش شلتي شوفي شصار بي بسببج

اباوع عليها كامت تبجي وراحت حضنت خاله رحاب

راح فهد اخذ آسر وجاب زيت وكعد كام يمسح براسه بمكان الحنجرة الي صارت

اجيت وكفت يمهم وامسح بدموعي باوعت علئ خاله گلت ..

_ خاله وانتِ ليش تخلي يم طفلة شلون شفتي شصار

رحاب : اني خليته علئ القنفه شمدريني راح تشيله

عطت وگلت : لو صاير بي شي شلوون

عاط فهد بيه وگال

_ صوتجج لتعلي

_ ليش لو صاير بـ آسر شي اني منو يفيدني

خزرني حيل وگال : كافي بنان صعدي فوك

_ ما اصعد انطيني آسر

عاط حيل وگال : كلت صعدي فووك هسه اجي

_ مااا مااا اصعد انطيني آسر

_ اخر مره اكلج صعدي فوك

باوعت علئ آسر بده يسكت وباوعت علئ فهد لكيت خازرني عفتهم وصعدت فوك وقفلت باب الغرفة ..

كعدت ابجي حيل علئ تعامل فهد الي تغير فجئه وبجيت علئ آسر احس گلبي الوكع مو آسر ..

بقيت علئ حطتي هيج ربع ساعة لحد ما اشوف باب يندك مفتحت لحد مسمعت صوته وگال

_ فتحي الباب بنان

مرديت عليه ورجع گال

_ فتحي الباب

صحت وگلت : ما افتحهه

عاط وگال : اذا متفتحي اكسرهه وانعل شيب الخلفوج فتحي

_ مااا افتحههه

_ بنان بيدي آسر لتخليني اكسر الباب وصير محلوهه فتحي واستري علئ نفسج

جانب مني يكول روحي فتحي وجانب مني يكول عاندي ولتفتحين الباب گلت

_ ما اريد افتح عوفنيي

_ يعني متفتحي ؟

_ لا ما افتحه تريد تكسر الباب متكسره براحتك

_لا مراح اكسر الباب بس اشوف الي يشوفج آسر بعد

سمعت هيج وبسرعة كمت وفتحت الباب لكيته واكف ومخنزر وشايل آسر جان نايم بسرعة جريته منه وكمت ابوس بـ آسر وحضنته وامسح علئ راسه

رحت الجربايته ونومت آسر وره مذبيت آسر انداريت جان الكاه بوجهي گال

_ مو كتلج فتحي باب ليش مسمعين كلام وتفتحي

_ فتحته

_ وليش تعلين صوتج

_ شتريد فهد

_ كُلشي ما اريد

عافني وراح لط الباب رحت بسرعة علئ آسر لان كعد وصار يبجي ورجعت اسكت بي حتئ ينام ..

___________

روان
رحنه صبح للدكتورة اني وياسر حتئ نشوف وضع طفل فحصتني وگالت وضعه تمام وره مخلصنه طلعنه اني وياسر وركبنه السيارة جان يكول

_ سمعتي دكتورة شكالت

_ سابع مره تعيدها عليه

_ هوه دانبهج بعد حركة هواي ماكو ومشاكل بالمدرسة ما اريد روان

_ خوش بعد اكو اوامر ثانيه استاذ ياسر ؟

_ اي اكو

_ شنيه

ضحك وگال : اريد بوسه

_ ماكوو

_ هسه حتئ البوسه حرام

_ ايي

_ شلون بيج انتِ

گلبت عيوني وگلت : يمكن اذا توكلني موطه وام الككو يمكن اقبل انطيك بوسة

_ اذا هيج ادللي ست روان

_ بس ترا لتحسبها عليه مو اني الي اريد ابنك مدري بنتك يريدون موطه

_ تدلل امهم وهمه هم يدللون

كام يسوق بسيارة ولازم ايدي واني مبتسمه اله

ورها طفه الاغنية لان وصلنه يم ابو الموطه فقبل مينزل گال ..

_ راح اجيبلج موطه ام اليمون حتئ ابنه يطلع اشقر علئ ابوو

ضحكت وگلت : ترا مفتهم الموضوع غلط استاذ ياسر

_ لا معليج راح اجيب ام اليمون هاهيه خلص النقاش

_ ياسرر مطيبه جيب ككو

كام يقلد ويكول : ككاوو

_ ياسر اذا مجيب ككو صير محلوه

_ عناد بيج اجيب ام اليمون

_ بسيطهه

سد باب السيارة ونزل يجيب الموطة .. فخطرت بالي شغلة اسويها بس يجي انتظرت شويه لحد ما اجه فتح الباب وفات گال

_ هاج هاي الموطة ام ككو ردت اجيب ام اليمون بس انقهرت عليج

باوعت عليه بحزن وگلت : تمام

_ شبيج ضايجه شو مو رحت جان مابيج شي ؟

_ لا ماكو شي

_ لا احجي شصاير

كلت واني مسويه نفسي حزينه گلت

_ مو جنت كاعده اكو واحد اجه وغمزلي

فتح عيونه وگال : منووو هذا

روان : ما ادري واحد ما اعرفه اجه غمزلي تقبلها

ياسر : هذا يا كلب ابن الكلب وينه وين راح

راد يطلع لزمت ايده وگلت

_ شبيك وين راح

_ اروح اشوف هذا الـ غمزلج

_ يعني قابل راح تلكي هسه اكيد راح

انطاني موطه بضوجهه وگال

_ بس لو الزمه الچلب شنو يغمزلج شنوو

_ يلا عادي مصار شي

عاط عليه وگال : شنوو مصار شي شلون يغمزلج شلون

ضحكت حيل متحملت بعد جان يخزرني ويكول

_ شو ضحكين شنو عاجبج الوضع

_لا بس مقهوره عليك ما اكول غير الله يساعدك

_ ليش ؟؟

_ يعني الله انطاك مره مثلي صاكه وحلوه ورقيقة وهادئه فأكيد ناس راح تكوم تغزل بيها وتغمزلها

_ يعني مكيفه لان واحد چلب غمزلج ؟

كمت اكل بالموطه وگلت

_ هوه اكيد لاا يعني بس اني مشكلتي حلوه فيعني الاوادم متتحمل اذا متغازلني وهيج

_ تحجين صدك انتِ؟

_ ليش مجذبه عليك قبل حبيبي يسورتي

شو ما اشوف غير جر الموطه مني ولطخها بوجهي فزيت عطت بعصبية گلت

_ هاي ليش هيج ياسر ليشش سويت هيج بيه

_ تستاهلين واشوف الي يحجي وياج بعد

كمت امسج بالموطه الـ صارت بوجهي وگلت

_ جذب محد غمزلي ولا صخمني اشاقه وياك بس شوف انتَ سويت بيه

_ حيل بيج

_ اييي وشنو يعنيي شوف انتَ مخليتني اتهنئ بالموطه وخربت وجهي الجميل

_ اي احسن حتئ بعد متجربين تشاقين مرا ثانيه

_ اكرهك حيلل

_ اموت منج حياتي

_ مو حياتك اني

_ لا حياتي

_ اكرهك تدري ؟

_ اي ادري عمريي

كمت امسج بوجهي وهوه يباوع علئ يبتسم ابتسامه يستفزنيي بيها ورها رجعنه للبيت ...

________

ريم
كاعده بالساحه وحدي .. روان اليوم مداومت بس رزان داومت ..

شعبتنا الوحيده شاغر
فاتن من كبالي مروة وسجى يابوية هذني صارلهن شكد مشايفتهن ..

مروة باوعتلي بستهزاء وضحكت : ها شنو وين روان

سجى : لا لا خطيهه

نترت بيهن : روان تداوم باجر يلا روحن انتن يلااا

جتي مروة وكفت كبالي : وشبيج عيني شسوينا احنه

ريم : ما سويتو شي امشي يلا أخذي هاي وروحن من يمي مالي خلكجن

سجى جتي بحركه سريعه اني جنت كاعده دفعتني وكعتني كالت : يااا سوريي مادري

اني انهضمت من السوته وضلن يباوعن ويضحكن

كمت بسرعه ودفعته اقوى وعطت بوجهها

_ شكد چلبه انتي ؟

لزمتني مروة متخليني اضرب سجى دفعتها وضربتها راجدي كمت ماعرف شسوي اريد بس اكتلهن املخهن تملخ اضرب منا ومنا ..

انتبهت على دم ينزل من خشمي مسحته بسرعه بقميصي اريد اضربها مديت ايدي جان تسحبني سجى وانشك القميص من يم الايد ..

سمعت عيطة المديرة وهي تعيط : ولجن شلون بيجن اني شلوووون راح اتخبل من وراجن هجمتن المدرسههه امشن كدامي حقيراتتت يلااا

مشن كدامي بس اني ضليت واكفه

كالت المديرة : امشي طبي للإدارة

ريم : ست هنه بدن وياي وكعوني وضربوني شوفي الدم وشكن قميصي

صكت ؏ سنونها وگالت : كدااااامي يلا

مشيت بلكوة اروح منا ومنا وحسيت بدوخه بسبب الدم والضرب ، دخلت للإدارة مثل كل مرة صار شي عادي اصلا رزالة المديرة المتخلص ومروة وسجى مادري شلون راح اكضي السنه وياهن

آخر شي دكت على ولي أمري الي هو مؤمل
ضليت كاعده بالإدارة وضايجه وهذني كبالي كلسع اريد اكوم اكتلهن ..

دخل مؤمل و بزي الدوام ويخوزر ، المديرة خافت شوية ضلت تحجي ويا بهدوء

ضل يباوعلي متخبل من فوك ليجوا ويعيط حتى هنه ضلن يباوعن علية وعليه ..

آخر شي ضليت ادافع عن نفسي ومؤمل هم يدافع عليه ورها المديرة كتبت فصل الهن ..

اخذت جنطتي وهو يسحبني بسرعه ويعيط بنص الساحه

_ لج شلون شلون هيج متعاركه

ريم : شسويلهن هنه حقيرات هنه بدن وياي

مؤمل : بس مو هيج شنو انتن ولد باع الدم باع القميص راح اتخبل

ريم : لتتخبل ولا ابد تعود علية هيج يعني عادي اني وروان عدنه عداوة وية هذني الجلبات من زمان وبس نتعارك وياهن وهنه يبدن

مؤمل : خرببب شو باعي خما بيج شي

ريم : ماابية شييي

مؤمل : شلون هيج تتعاركين مخبلة انتِ

ريم : شسوي هي جتي دفعتني وكعتني اني ماتحمل هيج يستهزئن بية وضربتهن

مؤمل : متوصل هيج بالدمايه وكفش حتى القميص مشكوك ادري شنو انتن

ريم : يعني تضربني واسكت

مؤمل : لا يابه شلون اذا ريم متتعارك مترتاح

ريم : هسه شبيك تعيط عليه هنه بدن

مؤمل : امشي امشي حسابج بالبيت

جان وقت الحلة طلعنا وكفنا بالباب وطلعت رزان جتي عليه گالت : عزااا هاي شنو ريم

ريم : تعاركت

رزان : شلون وية مروة وسجى مو ؟

ريم : اي يعني منو غيرهن الحقيرات بس انفصلن حيييللل

رزان : خيولن عوفيهن هذني مجلوبات ، عادي توصلوني بدربكم ايهم عنده شغل بالعياده وميكدر يجي علية اليوم

مؤمل گال : اي عادي يلا اصعدن

رجعنا رزان للبيت وراها رجعنا احنه لبيتنا ..
دخلت بعصبية جان تصير اسيل كبالي : يمه هاي شنو الدم

ريم : تعاركت

اسيل : ويامن خما تأذيتي ريمه

ريم : لا عادي خيولن

گال مؤمل : شوية وننزل حنصعد فوك

سحبني بسرعه وصعدنا فوك وهو ضل يرزل بية

مؤمل : شهل خبالات خما خشمج يوجعج

ريم : لا لا ميوجعني

مؤمل : اوف منجج طلعتي عرمه

ريم : عرمهه ولا اسكت مثل الفاهيات

مؤمل : يا عيني متكدر تسكت

ريم : هسه شسويت قابل

عاط عليه وگال : شنو شسويتي باعي خشمج باعي قميصج المشكوك شنو هاي الحركات ريم ولا توقعتج هيج

ريم : لعد تعود علئ هل شي

مؤمل : لا ما اتعود لان مراح يتكرر هل شي

ريم : اسفه ما اوعدك اذا هنه ضلن يجاوزن هيج قابل اسكت اكيد لا

مؤمل : تخطيهن يحجن وياج عوفيهم اذا صار بيج شي او اذوج اني شيصير بحالي هاا

ريم : هسه كافي شصار سد سالفه

مؤمل : شسد شنو الي اسده واني يخابروني يكلولي تعال مرتك تعاركت

ريم : عادي واذا

مؤمل : ولج شنو هل برود شنو العادي وثاني شي انتِ سادس يالكائنات سادس حيري بدراستج وعوفي العركات

ريم : هاهيه كافي افتهمت

تنهد ورها گال : قميصج مشكوكك امشي بدلي

ريم : اي شسويلة عندي ثاني اوي

مؤمل : لتكولين اوي

ريم : اوي اوي اوي

مؤمل : عنادج عناااادج شلون بيج اني

ريم : محد جبرك تاخذني

مؤمل : هيه بعد تورطت

ريم : اي هاهيه لعد

تقرب عليه وگال

_ بس تدرين احسن ورطه هاي

گلبت عيوني وگلت : ايي

اجه تقرب يريد يبوسني جان اوخر منه واكول

_ مو ريم ترضئ بوسه

_ لعد ترضين ب*****

خنزرت وگلت : لتحجي هيج ويايه عيب

_ بعد شايفه انتِ

_ راح تخرب اخلاقي انتَ

_ فديت مؤدبتي العرمة

_ اووف

_ روحي بدلي يلا امشي

__________

بنان
شفت آسر نايم نزلت جوه بالصاله لكيت زوزو وخاله رحاب والبنات ومريم وفرح كاعدات رحت يم خاله وگلت

_ خاله ترا والله ماقصدي اعلي صوتي عليج بس من حركة گلبي علئ آسر

رحاب : لا عادي بنتي مصار شي حقج

ابتسمت وانداريت علئ زوزو وگلت

_ اي شلونج بيبي هسه

زوزو : والله من وره الهبطه الي صارت صبح ردت اموت

بنان : لا اسم الله عمرج طويل

زوزو : اهخخ اني فديوم انجلط واموت اي شلونه آسر هسه

بنان : لا زين احسن

زوزو : الحمدلله كله من وره هاي الفاره واشرت علئ فرح

وفرح كامت تبجي وحضنت امها انداريت علئ فرح وگلت

_ تعاي فروحه

اجت يمي حضنتها وگلت

_ حبيبتي لزعلين مني مو عيطت عليج

مريم : لا والله تستاهل السوته مو قليل

بنان : حتئ لو مجان لازم اعيط عليها طفلة بالنهاية

فرح : لا خاله بس والله اني جنت اريد العبه وبس

بنان : ادري حبيبتي بس هذا طفل صغيروني وانتِ ايدج ناعمة مو مال تشيلينه شفتي اليوم شصار جان الله ستر

فرح : اسفه خاله

بنان : لا عادي حبيبتي بس اني دافهمج وترا احبج اني هواي

فرح : اني هم احبج واحب آسر هواي

بنان : اي عفيه بفروحة واصلا انتِ مثل اخته الجبيرة

فرح : اي خاله

ورها كامت وراحت يم امها ورحت كعدت يم البنات جانن يتهامسن گلت

_ خيركم شو تتهامسن

روان : غير دتحجيلي رزان عن عركه مال ريم اليوم اههخ لو جنت موجوده جان كتلتهن

بنان : كعدي راحه حامل انتِ صدك اليوم مو رحتي شحجت وياج دكتورة

روان : اي كالت لتتحركين وهيج يعني من هل سوالف

بنان : وانتِ تريدين تتعاركين

روان : اووي لصيريلي ياسر كلسع روان ديري بالج روان

بنان : اي غير خايف عليج

روان : اويي

رزان : تعاي روان خلي نروح نخابر ريم تسولفلنه علئ عركة واكيد مؤمل رزلها

روان : اي والله اكيد رزلها بس عفيه عليها بعد ايدي هاي امشي نخابرها فوك بنان تجين

بنان : لا خلي اصعد اشوف آسر لان اكيد هسه يكعد جوعان

روان : اوك تمام

رحت صعدت فوك حتئ ارضع آسر كعدت شويه اكلب بتليفون طبعا صار الليل وفهد بعد مارجع لحد ما كعد آسر اخذته وصرت ارضع بي ..

دمعت عيوني واني اباوع عليه فـ بسته
وشلته نيمته بالكاروك وضليت كاعده ..
عيوني مدمعه وابجي بقهر .. لو صاير بي شي اني شيصير بية ..

بهل اثناء دخل فهد عصبي وسد الباب قوي عفته مهتميت تمددت ردت اغفئ شفته راح سبح واجه كعد بقه صافن عليه بس اني مباوعت عليه ..

ورها اجه وجرني حيل علئ صفحه تفاجئت من حركته وگلت

_ ها فهد ايدي

باوع عليه بعصبية وگال

_ انتِ شبيج تخبلتي بنان شهل تصرفات مال يوم وشنو عياطج جوا

وخرت ايده واني ابجي : مسويت شي غلط ابني هذا ابني لو صاير بي شي اموت ورا والله

فهد : تمام خوش ابنج مابي شي شفتي بي شي ؟؟ شلون تعلين صوتج علية

بنان : وخر انتَ ماعندك مسؤولية لو صاير بـ ابنك شي جان شسويت هاا

فهد : اني ماعندي مسؤولية لو ماعندي اصلا امنعج تجيبين اطفال صوتج ليعلى بناننن

بنان : شنو يعلى شنو فهدد انتَ شبيك

فهد : شنو شبية لج صوتج هرجتي البيت

بنان : وخر عوفنيي

فهد : ليش اعوفج هااا الظاهر نطيتج عين زياده

بنان : شنو عين زيادهه شبيك فهدد لو صاير بـ ابنك لا سامح الله شيي جان ما خفت عليه ما انقهرت

فهد : شلونن ما انقهر بس طلع ما بي شي بس مو تعيطين وتعلين صوتج علية اني دافهمج داصخم داكول ما بي شي طلعت اني ماعندي مسؤولية وما اخاف على ابني بس مثل ما هو ابنج هو هم ابني الوحيد خوش

نزلت دموعي واني ابجي جان يكول

_ ابنج حقج تخافين عليه بس مال تعلين صوتج علئ امي لا محلوه عيب

بنان : اني من حركة گلبي هيج سويت وانتَ هم عيطت عليه

فهد : اني ادري غلطان وعيطت عليج لان جنت ضايج من شي بس انتِ تعلين صوتج عليه شنو اني صبح محجيت شي وعفتج وطلعت لان اعرف راح اجرحج هواي فمكدرت وطلعت لان جنت عصبي

بنان : وهسه عساس مو عصبي انتَ وترا اني اعتذرت من خاله

بقه صافن عليه ثواني ورها عافني وراح تمدد عالجرباية ..

امسح بدموعي ويرجعن ينزلن والله مو قصدي ارفع صوتي عليه بس من خوفي على آسر كمت ما انتبه ؏ نفسي شكول ..

رحت غسلت وجهي وطلعت كعدت عالطرف الثاني
هو ساكت ما حجى ولا گال شي ومطنكر ، غطيت راسي واني افكر .. شلون عيطت مادري اني بالغلط صارت من خوفي على آسر خفت لا بي شي

ما تحملت وخرت البطانيه وضليت احوص اتكلب وهو كاعد يلعب بتلفونه ..

اخر شي كمت عدلت نفسي وبحركه سريعه بسته من خده ..

رفع حواجبه وصغر عيونه وگال : شو كمتي تبَوسين

گلت بحزن : اسفه والله مجان قصدي اعيط عليك ولا هيج اسوي بس صارت لا إراديا

سكت ثواني وهز راسه بـ اي بدون ميحجي

حضنته وگلت : لتزعل مني فهد عفيه

فهد : مزعلان

_ احلف

ابتسم وگال : ليش احلف مو كلتلج مزعلان بس انتِ وحده راسج يابس وتجفصين وبس تبجين فأعذرج

بنان : اوك

فهد : خوش

سكتت شويه وثنينه ضلينه ساكتين گلت

_ ها بعدك زعلان مني

_ شبيج

_ اسفه

_ لتتعذرين هاهيه عادي ولو مسلتي هواي وطلعت ماعندي مسؤولية

_ مو كتلك ما اقصد

_ هاهيه انسي

تقربت يمه وحضنته وهوه هم حضني ونمنه ..

__________________

( بعد مرور سنتين )

روان
كاعده ابدل البناتي لان اليوم عيد ميلادهم وره مبدلت الهم ولبستهم بدلات لون وردي وخليت بشعرهم فيونكه .. جان يفوت ياسر ..

ضحك وگال : وين ريناسي و رينادي

روان : تعال شوفهن كملتهن

اجه يمي كعد علئ الجرباية وباس ريناس و ريناد وكام يدغدغ بيهن وهنه فاتحات حلكهن ويضحكن وهوه متخبل عليهن جان يكول

_ ذني ليش حلوات هيج

روان : غير اني امهم

ياسر : فديتهن وفديت امهم الجابتلي هيج تؤام بنات حلوات مثلها

روان : وفديت ابوهن هم

جان يشيلهن ويخليهن بحضنه وگال

_ بس تدرين احنه متعادلين

_ شلون ؟

_ وحده تشبهني وحده تشبهج

_ بهاي صح

_ اي رينادي عدها كفشه حلوه مثلج و ريناسي لا شقراوي علئ ابوها الصاك بس تدرين شنو

_ شنو

_ احنه ليش منخلف بعد ؟

_ يمهه شخلف كافي دخلي يكبرن بعدهن كتاكيت صغار

_ لا مو شوفي خلي نخلف لان انتاجنه حلوو

_ الله كريم بالمستقبل البعيد جدا عود

ابتسم وهوه يباوع عليهن گال

_ هذني شلون اريد اكلهن مال عظ

اباوع عليه يدغدغهن وهنه يضحكن وهوه متخبل عليهن ويسوي حركات بوجهه ويكول

_ لا ما اتحمل هيج جمال وحده احلئ من الثانيهه شنو ذنيي

_ كافي تتغزل بيهنن فهمنه تحبهن

_ شنو غرتي

_ لا عيني ما اغار بنهاية بناتك اني بيش كيلو بعد اجن ريناد وريناس اني بحح

كام يضحك وگال : لا انتِ الاصل انتِ مزروعة بگلبي طركاعتي

ضحكت وگلت : يلا يلا خلي ننزل

ديريد يشيلهن حتئ ننزل شو ما نشوف غير ريناد كوم وضربي ريناس حيل علئ وجهه خلت ريناس تبجي بجي

كمت اخذت ريناد من ياسر .. وياسر كام يريد يسكت بـ ريناس الي كامت تبجي

شلت ريناد واحجي وياها

_ ولج ماما ليش هيج مو اختج هاي ليش هيج وكحهه انتِ

اباوع عليها مخنزره عليه وريناس هرجتنه بصوت بجيها وياسر بس يريدها يسكت بيها

_ يلا كافي بابا حياتي سكتي حبيبتي

اندار ياسر وخنزر علئ ريناد وگال

_ ولج طركاعة مو اختج خطيه ليش هيج تضربيها هاي نونو بعدها

اباوع علئ ريناد ياسر بس خزرها وجان تبجي هيه هم وتعال جيب الي يسكتهن هوه لازم ريناس يريد يسكتها واني لازم ست ريناد

بالاخير بعد مده يالله شويه سكتن جان يجي ياسر يريد يشيل ريناد جان ريناد دير وجهها وتحضني

ضحك وگال : ولج عرمة تعاي

وهيه متقبل تروح علئ ياسر حاضنتني وبس يلزمها تكوم تبجي ريناد عدها كبرياء فضيع واذا زعلت تقفل علئ الواحد واحسه تفتهم الي نحجي واذا احد عيط عليها ..

عكس ريناس هادئه حيل ومسوي وكاحه وريناد كلسع جايبه اختها بكفخه ..

_ تعاي بابا اشيلج لزعلين مني

وخرت ايد ياسر وگلت : وخر وخر ليش خنزرت علئ بنتي متريدك بعد

ياسر : واني اكول ليش عينها طالعه وكحهه هاي البنية اذا امها انتِ

روان : لتحجي علئ بنتي وبعد لتحجي ويايه هم مادام زعلت ريناد

كام يمسح علئ راس ريناس وگال

_ بس هاي بنتي العاقلة مسوي وكاحه

_ يلا كافي امشي ننزل

______________

بنان
واكفه امشط لـ آسر وهو يضحك ويبتسم

كرصته من خدوده وگلت

_ يمه اروح فدوه لهل جمال

چان لابس دشداشه جابها اله عمو محمد
وفهد انطاه سبحه لون ازرك ..
اخر شي لبسته اليشماغ عفس وجهه وگال

آسر : ايعع ماليته

بنان : ياا ليش مو حلو عليك تصير شيخ

آسر : مااا مااا

عفته براحته ولبست شالي ونزلنا جوا يمهم لكينا الكل كاعد ..

كال ياسر بضحكه

_ لك هلا بشيخنا شنيهاي عمييييي

راح آسر على فهد وحضنه

مؤمل : اشو هذا طالع صاك

همام : اكيد صاك غير طالع على عمامه

ايهم : لك آسر هاي شنو جيب السبحه

آسر لزمها حيل وصعد اكتافه يعني ماريد ..

ايهم : جيبها خلي اشوفها

عكد حواجبه آسر وگال : ماااا

طبوا من برا البنات ..

روان : يلا تعالو كملنا حتى نسوي عيد ميلاد

ياسر : هسه جايين .. شبيك ولك ابو خنزورة يلا تعال

هو گال ابو خنزورة جان آسر يزعل وراح يريد يطب جوا ..

راح ورا همام وگال : تعال عمو تعال لتزعل .. ولك شيخنااا وين رايح وعايفنه

ياسر : دخل يروح الكو** يتزعل واني شكلت

فهد راح شال آسر وكام يعيط على ياسر بالجذب

_ اسكت لك ديربالك تجي بصوب ابني خوش آسر خط احمر

ياسر : احمر لو اخضر

فهد : امشي لك وبعد لتفشر كدامه

ياسر : عساس ابنك راح يبقئ مؤدب خطيه مراح يفشر طول عمره

فهد : ايي يبقئ مؤدب

ايهم : يا مؤدب مادام عمه ياسر اغسل ايدك منه

ياسر راح شال ريناد وريناس وكف كدام كيكه جان يعيط آسر

آسر : ايييد (اريد)

بنان : شبيك ماما شنو

كام يأشرلي ؏ الكيكه

بنان : هسه خل يطفون شموع وانطيك

رجع خنزر وعيط : مااا اييد واجه تقرب يم الكيكه

ياسر : وخر لك عوف كيكة بناتي

آسر : ماااا ماااا

فهد : ياسر انجب خلي آسر يطفيها

ياسر : وانتَ شبيك عمييي غير كيكة بناتي

فهد : اسكت يلا ابني شتريد سوي عسا ما تهجم الكيكه تلغمط روحك العيد ميلاد مالتك

ياسر : شوف شوف شنو بكيفك

فهد : اي بكيفي وثاني شي بنياتك الحلوات صغار ميعرفن يطفن شموع

باس ياسر ريناد وگال : لاا بناتي كبار راح يصيرن سنتين

فهد : شيصيرن يصيرن تعال بابا آسر لتزعل طفي كيكه انتَ ذني ميعرفن يطفن

ياسر : واني اكول ليش هل ولد طالعه عينه .. تعال عمي استاذ آسر طفي كيكه

وكف آسر هوه يكلب بعيونه وگال : ماااا

فهد : شبيك بابا طفي الشموع

كام يدور براسه ويصيح : مااا مااا نونو

فهد : شبي نونو

آشر علئ ريناد وريناس وگال : نونو اوووف

فهد : ايي حبيبي ذوله نونو

كام يسوي بحلكه حركة شلون يطفي الشموع وگال

_ نونو يفتوهم ( يطفوهم )

فهد : مو يفتوهم ، يطفوووها يلا شو كولها

آسر : مااااا

مؤمل : هذا شبي مشكل على كلمة ماا

ايهم : اي وكلسع برأي شكل الاستاذ

ياسر : ديلا فضنا استاذ آسر الـكو**

فهد : يااااسر السانكك

ياسر : اهخخ اذني شبيك

فهد : لتفشرر كدام آسر وكدام بناتك

ياسر : عساس راح يفتهمون وهسه انتَ شعليك لتفشر ولتفشر اني بناتي اريدهن يطلعن صايعات شعليكم

فهد : لا هاهيه ونعم التربية

ياسر : عساس ابنك شلون تربية وهوه نهايته يطلع واحد طايح الحظ ابو بنات

همام : هسه كافي مو شموع راح تموع واحد يتفضل يطيفهن

آخر شي انسحب آسر وگال : مااا هلي نونو

ايهم : تريد نونو يطفوهن

هز براسه آسر وابتسم وگال : ايي نونو

بالاخير محد طفه الشموع گال ياسر

_ شوو دروحوا اني اطفيهن صارلكم ساعة علئ هل سالفة

طفوا الشموع منا فجأة اشتعلت اغاني وكام يركص ياسر ويغني اغنيته " تورط " وروان حاطه ايدها علئ حلكه تضحك

وشايل بناته ثنينهم ويفر بيهن وهنه فاتحات حلكهن ويضحكن ..

وآسر باقي واكف يصفك بيده ويدور بنفسه وبس اجي يمه يصيح عليه ويكول

_ ماااا وليي

هاي الكلمة ميتوب منها رحت يمه وگلت

_ ماما آسر لتكول ولي

دمع وگال : ماا وليي

بنان : لتكوول

آسر : مااا ولي

بنان : اصيح ابوك

آسر : ماا مااا

بنان : اي كول ماا بس ولي لا

عكد حواجبه وگال : مااا مااا

بنان : اي عفيه

ورها قطعنا الكيك وزعنه وكعد آسر بصف ريناد وريناس وكل وحده كدامه كيكه وتلخبط بنفسها

وأسر شال من كيكته وقدمها كدام ريناس

اسمعه يكول لـ ريناس : تيته

وهي تباوعله مبحلقه بعيونها ..

بعدين التفت لـ ريناد يباوعلها ، شال من كيكته يريد يوكل ريناد هم

ريناد كومي وضربي ريناس حيل علئ وجهها وكومن ثنينكم ابجن ..

كام آسر ويأشر ويصيح عود صاير عصبي ويكول

_ ماااااا لتبتون ( لتبجون)

روان : يا يا هاي شبيكم

آسر أشر على ريناد

روان راحت شالت ريناس سكتها واني شلت ريناد اريد اخليها تسكت جان تكول روان

_ عرفت هاي البدت ام المشاكل

بنان : خطيه بعدهم صغار تنحست

روان : حيل صايرات نحسات

ريم : شبيكم يمه بسرعه تعاركتوا شسالفه متوارثين عصبية هذولة

مَي : والخبال هم

روان : صححح هذا اني الخايفه منه اتمنى بناتي ميطلعن مخبلات وعصبيات

بنان : تعال ماما آسر

اجه كعد يمي يباوع عليهن مبتسم

روان : يلا كول ياهيه حاط عينك عليها

ريم : لك هاااا آسر

مَي : خاف يطلعن اثنينهن وجيبوا الي يحلها

ريم : آسر ياهيه حبابه اكثر

ابتسم وگال

_ اثنينهم

ورها خنزر وگال

_ بس ينات وتحهه ( بس ريناد وكحهه)

ريم : صلوووووات طلع حساسج صح مَي

مَي : هـاا

رزان : سلامتج

روان : آسر لعد ياهيه تحب اكثر وحبابه

_ ثنينهم

ريم : ميصير لازم وحده

عاط وگال : مااا ثنينهم ثنينهم

ياسر : هاي عليمن على بناتي لا عيني عوف بناتي غض البصر شيخناااا

وهو جان زعلان من ياسر وياسر يداهره ..

فهد : اي واذا شصار حتى لو رادهن بالمستقبل تنطوهن غصبا عليكم

همام : لا ولك تصير مكافش من الروس غير

ايهم : انتَ اذا يجي ابنك لو بنتك يقضون عليه هذولة المخابيل

همام : مشوفني شايل هم

ياسر : هاي عليمن مخابيل

مؤمل : ترا واضحه عليك وعلى زعاطيطك

ياسر : ما اسمحلكم تحجون على بناتي شمسويات الصكصوكات كاعدات

همام : سكتوا كافي يعني ميصير نكعد بدون عركه ومناكرررر

ايهم : هاي شنو ضجت

همام : ايي

ياسر : عمي عوفه حمام بسرعة يرضئ

همام : مو شايفتي جاهل يمك بسرعه اتراضى بس انتَ تلح واخذك على كد عقلك وبعد لصيحلي حمام

ياسر : ليش كبرت

همام : لا بس عيب كافي لان هسه راح يصير عندي طفل فـ ميصير

ياسر : ما اكول غير الله يساعد ابنكم وبنتكم عليكم ابوها معقد وامها فاهيه لا كملت

همام : علئ اقل مو مخابيل

ياسر : اني مخبل ؟

ايهم : هوه انتَ منيلك عقل

مؤمل : عقله طاير اكص ايدي اذا انتَ عندك عقل

ياسر : كصها يلااا

فهد : كافيي

ياسر : بسيطه

فهد : انتَ ضل بسيطه وبسيطه بالنهاية تطلع بوخه

ياسر : لو مو اخويه الجبير واحبك جان رديتك

فهد : لا عوزك تردني

ياسر : لا عمي شلون اردك غير انتَ اخويه الجبير

فهد : اي عفيه

ياسر : صدك عود ابنك شنو ماخذ الرموش منك

فهد : ايي شتريد هسه انتَ ؟

ياسر : دخلي ينطينه شويه من رموشه البناتي خطيه

همام : شنو يشلعهن الك

ياسر : خلي يشلعهن احسن ما بناتي يضلن هيج بدون رموش ترا ميصير هيج

فهد : عود بس تزوج وحده منهن الآسر عود نطيك

ياسر : لا عمي لا بناتي ما ازوجهن ذني عزيزات ابوهن

فهد : هوه قبلت مقبلت وحده منهن الابني ولو مو حرام جان اخذتهن ثنينهن اله

ياسر : دخذني اني بعد لابنك

فهد : لا متفيده انتَ

ياسر : اههخخخ يا ياسر حتئ بناتك فكُر حضهن مثلك

فهد : وشايفتلهن ياخذن آسر

ياسر : اي حتئ يشبعهن تخنزر وتكفخ

فهد : لا ابني ماعنده هل سوالف

ياسر : سوده عليه مؤدب علئ ابوه

فهد : مو اكوملك

ياسر : سكتت شبيك داشاقه وياك

همام : هسه احنه نصيحلك ابو ريناس ابو ريناد شنصيحلك

ياسر : لاا اذا تصيحولي باسم وحده منهن يعتبر تفرقة وميصير افرق فصيحولي ابو البنات احسن

همام : خوش صاير تحجي

ياسر : شعبالك بعد كبرت وصار عندي اطفال راحت ايام التفاهه

ايهم : اي فتت بالعمرين

ياسر : شسوي هيه هاي الحياة تكبر الواحد

همام : سودهه عليه خويه

ياسر : اهخخ خويه

خلص العيد ميلاد وكعدنا جوا تجمعنا بالهول والولد بصاله راحوا ..

كعدنا نسولف ونضحك

روان : صدك مَي يا شهر هسه انتِ

مَي : هـاا

روان : ياشهرر انتِ صرتي ؟

مَي : حفوت بالخامس

رزان : زين معرفتي ولد لو بنية

مَي : هوه تريديون صراحه مو رحت للمستشفئ رحت وسويت سونار يعني يم دكتورة طلع بنية

ريم : كليلليوووش

بنان : زين كلتي الـ همام

مَي : لا بعد

روان : اي زين تجي اخت ثاني البناتي

بنان : اي وتجي زوجة جديدة الابني وجنه ثانيه الي

روان : يمهه انتِ وفهد بقه بس اني زوجوني الابنكم

ضحكت وگلت : عزاا انجبي نشاقهه

روان : اي عبالي

بنان : بس هل شي ميمنع ابني يختار الي تعجبه

روان : اووف ربي اكلج ريم انتِ هم خلفيلج طفل وتطلع بنيه

بنان : اي ريم خلفي حتئ شنو وحده من بنات روان ناخذ و مَي و انتِ هاهيه كملت

ريم : لا مو هسه اخلف عيني ما اريد هسه بعد خلي رزان

رزان : لا انييي ما اخلف خليني متهنيه بجامعتي

روان : كضيتي عمرج دراسة

رزان : اكو احلئ من دراسهه

بنان : ريم

ريم : هااا

بنان : فهد مو جان صغير هادئ موو

ضحكت وگالت : فهد هادئ ؟ لو تدرين شمسوي هوه وصغير خوب فهد مو جان مراهق يابه المصايب الي مسويها

بنان : ياا شمسوي

ريم : مصايب مصايب

روان : ريم ما اوصيج خبليها

بنان : احجي ريم شمسوي

ريم : ممسوي شي شبيج فزيتي

بنان : عبالي

مَي : شدتحجون شبيجن تخبلتن

بنان : ذني من زمان مخبلات

مَي : يمهه خايفه علئ بنتي لا تطلع مخبله وتاخذ خيط خبالات

روان : وليش عيني شبي الخبال

ريم : حلوو بس تدرين بالسادس لو باقية يمكم جان رسبت

روان : وليش عيني ترسبين

ريم : من ورا خبالكم اصلا الحمددددلله طلعت معددليييي 82

روان : ها تردين تسمعيني ترا معدلي 80 فرق درجتين لتشوفين نفسج

ريم : وليش عيني اشوف نفسي الحمدالله كله بسبب تعبي وتعب مؤملي وياي

روان : زوزو شوفي ر.. ، رادت تكمل بس ريم سدت حلكها

زوزو : شنو هاي سمعت اسمي

بنان : هيج زوزو مو عليج

زوزو : ها اي خل اكمل المسلسل لعد

ريم : تلحكين زوزو تلحكين

كرصتها روان : لج لتسمعج

مَي : هـاا

ريم : هيج عصير مو وياج

مي : هااا ازعل ترا

ريم : لا عيني كلشي ولا زعلج

رزان : تدرون منو تذكرت هسه

بنان : منو

رزان : بيت شرشبيل .. بس احس الحمد لله حياتنا بدونهم ماشيه بس يجون يكب البيت

روان : ايي والله خلصنا من ليان تزوجت وسافرت وخلصنا من شرها

ريم : واني سمعت من بابا عساس ايمن خاطب ومدري شنو

بنان : الحمد لله هيج بدونهم ماشيين وحياتنا هادئة وبيناتنا

ريم : اوي غيرو الموضوع

مَي : وانتِ رزان شلونها طب اسنان وياج

رزان : والله هوه صعبه دراسه بس مشيه حالي وايهم هم يساعدني روان انتِ ليش متكملين جامعه

روان : مابيه داومت مكدرت اوقت وقتي بين جامعة وبنات تعبت فما اريد

رزان : اكبر غلط واحد يجيب اطفال وهوه يدرس

روان : صح واحد ميكدر يسيطر وينضم وقته بس شنسوي يلا الحمدالله

بنان : صدك خابرتوا حسن ومريم

روان : اي حجه وياهم اليوم ياسر كالوا نرجع بعد اسبوع من تركيا

بنان : ايي تمام

رزان : يلا لعد حنروح اني وايهم خطيه عمو باقي وحده بالبيت ضل تعبانه مكدر يجي ويانه

روان : هسه راح ترحون مو بعد وكت مشفناج

رزان : هسه شنو مو يوميه جاين يمكم وهياته بيتنا بصف بيتكم بعد شنو

راحت رزان وايهم البيتهم الي اخذوا بصف بيتنا ورها راحت ريم ومؤمل ولملمنه البيت ورها كل واحد اخذ جهاله وراح الغرفته ..

________

بنان
بعد ما خلص العيد ميلاد اخذت آسر فوك صعدنا
دقايق وطب فهد عصبي يعيط ..

فهد : انتِ ليش حاطه مكياج هيج هااا

بنان : شنو شبيك

فهد : مكياجج ولبس وصخام

بنان : على كيفك هو شكو ترا مكياج خفيف حطيته كلت حتى لا سيادة الضابط يجي ويحجي علية وهذا فستاني مابي شي وعريض ؏ شنو هل اعصاب

فهد : شنو اعصاب وهاي الحمره والمكياج شنو

بنان : شبيك محاطهه هواي فهد لتعقدها بشي تافه

فهد : هسه هذا طلع شي تافه بنااان اني شكايلج مكياج لتخلين هواي

بنان : فهددد

فهد : استغفر الله شلون وياج اني

بنان : شنوو شلووون فهد شبيك اصلا ماكو شي وجيت تتعارك

فهد : شنوووو ماكو شي وهذا التصبغ الي مسويته بوجهج عبالج حلو جنج مهرج طالعه

هو عاط بوجهي جاني آسر يجي بنصنا و دفع فهد
ضليت صافنه عليه ليش دفعه

فهد : شبيك بوية شعندك

اجه حضني آسر وگال : مامااا

سحبته رجعته : شبيك ماما

ضل مخنزر على فهد وبعيونه دموع وفهد لازم الضحكه عليه

فهد : لتخاف ترا ما اكتل امك بس داخلين بنقاش

بنان : مبين فهد يا نقاش هذا شوف خطيه افتهم غير شي

حضني ويباوع لفهد بتحدي

فهد : احضن بعد ابوك احضننن

بنان: شبيك انتَ ساعه تتعارك ساعه ساعه تضحك ترا حيرتني وياك فهد

فهد : لا بوية ليش تحيرين واحيرج جيبي ابني خلننزل جوا

بنان : لا خلي هنا

فهد : شبيج خلي انزل جوه

بنان : لا ماكوو

فهد : آسر منو تريد اني لو امك

صفن آسر بعدين حضني

فهد : ماجذب ياسر من كال ذيج الكلمه عليك ضل ضل يم امك لتعوفها وانتِ بعد صبغي بروحج طوخي الحمرة طوخي ما اوصيج اني اصلا شعليه .. شنو شعلية غير اني زوجج بناااان مكياجج بعد اشوفهه يلا تنزلين خوش

بنان : فهد عفية ليش تكبرها وهي صغيرة

فهد : وتنزلين محمره لازم اسكت اني

جبت الكلينس وامسح بوجهي بقهر گلت

_ شسوي بعد شسوي غير اني حلوة هيج من الله وانتَ شوف هسه هذا مكياج بربك شوف

خنزر وگال : ايي

گال هل كلمة وطلع وركع الباب وراه وصاير عصبي
يعني هسه اني شمسوية جريمه قابل ورها

كعدت اسولف وية آسر گلت

_ هاي ليش هيج تخنزر على بابا مو عيب

هو ميكدر يحجي هواي بس كلمات بس جان يباوعلي وساكت

بنان : مو عيب ميصير هذا ابوك .. وهو مديضربني ديحجي وياي

هز راسه بـ لا

بنان : يعني شنو هاي

ابتسم بوجهي وحضني ..

- ابتسامتكَ التي تأخذ حيزاً صغيراً من وجهكَ
تأخذ كلَ " قلبي "

- وبكَ ايقنتُ اني املكُ منَ الحظِ " اجملهُ "

___________

هُمام
ابتسمت لما شفتها طبت للغرفه ..

همام : تعاي وين جنتي

مَي : جوا يمهم

همام : لتتعبين نفسج هواي تمام

مَي : هـاا

همام : لتعبيييين روحج هاي شنو بطنج كبرانه

مَي : اي لعد تبقئ صغيرة

همام : اي وسمنانه صاير عندج خدود وزنود

مَي : يعني قصدك اني سمينه ؟

همام : لا لا تخبلين انتِ

مَي : هـاا

همام : اذا احجي شي محلو تسمعين وبس احجي شي حلو تطرشين

مَي : هسه انتَ شبيك ويايه

همام : مابيه شي

ابتسمت تقربت ابوسها جان تكول بضحكه : وخر وخر

گلت مستغرب : ليش

مَي : هـاا

همام : ليشششش ؟

مَي : ها مو هاي شسمه

همام : شنووو شسمهه

مَي : لحيتك تدغدغنييي

كالت هل كلمات وانفجرت تضحك

ابتسمت على شكلها : صايرة سخيفهه وتتمضحكين زيادة عن اللزوم

مَي : هـا منو اني

همام : لا اني

رجعت تضحك

صفنت عليها وهي تضحك .. ملامحها بريئه

كلتلها واني مبتسم : " خِايبة الدنيا بِدونچ فاهية "

_ وانتَ بدونك الدنيا مُرّه

همام : شنو جاين نطبخ قابل

صفنت عليه ولزمت شعري وگالت

_ شعرك حلو همام احبه

_ وهوه هم يحبج

_ هـاا

_ اقصد اني هم احبج

_ هـاا ايي شوف همام

همام : عيونيييي كولي

مَي : اريد اكُلك شي مهم حيل يعني ردت اسويها الك مفاجأة

همام : اي شنية بسم الله

گالت وهي مبتسمه : من رحت عرفت جنس الجنين

همام : هااا صدك ؟ شنو شلون ليش مكلتيلي مَييي

مَي : لا لا مو ما اكُلك يعني كلت مفاجأة حتى ما كلت لـ أحد وهسه انتَ اريد أكلك

همام : شنو دكولي بسرعهه

مَي : هـاا

همام : شنو الها مَي كوولي بسرعههه

مَي : شوف مراح أكلك بالبداية كوم اشتريلي حلويات

همام : مَي تكولين لو شلون ليش تخبليني

مَي : اني شعلية اريد حلويات بالأول

همام : شتسوين بيهن اني حلويات اصلا

مَي : خطيههه شوف راح استخطيك واكلك

همام : اي يلا

مَي : واحد اثنيييييين

همام : 3 طارت احجيييييييي

مَي : بنية

همام : صدك

مَي : وعيونك

ابتسم وتقرب من يمي وباسني بعيوني گلت

_ هاا همام نسيت يلا جيب الحلويات

همام : مَي شبيييج بعدني ممستوعب الفكره يعني حتصير عدنا بنية وأنتِ تكولين حلويات

مَي : اي شسويلك يعني مشتهيتهن تقبل هيج تقبل تعوفني اتنسا .. صدك خاف تطلع بالبنية ككو

همام : شهل افكاااار

مَي : هـاا

همام : حااااامل ببنية يعني انتِ حروح انزل جوا انتِ ضلي هنا خوش لتنزلين اخاف عليج وهسه اجيبهن واجي

مَي : شتجيب

همام : حلوياااااتتت

مَي : هـاا شنو

همام : صخام بعيني حلوياتتت يعني حتصير عندي بنوته

مَي : شنو حتصير

همام : معليج بس لتنزلين خوش اني هسه دقايق اجيب واجي

مَي : تمام حبيبي

__________

رزان
رجعنا للبيت الي عمو زياد هم ساكن ويانه بي ..

رحنه للغرفه واني انزع شالي : احس بارده مو صح

ايهم : لا عادي .. إذا بردانه كليلي ادفيج

رزان : لا اني ادفي نفسي ميحتاج

حضني من ورا يضحك : ليش ميحتاج عيني

رزان : لان شنو انتَ طايح الحظ فـ اريد اقرا ليضيع وكتي

فتح عيونه بصدمه شنو منو طايح الحظ علية ؟

وهنا ادركت انو جفصت فگلت

_ عزااا لا مو عليك

ايهم : لا اني سمعتج زين

رزان : لا ما سمعت مو عليك هاي اني اني

ايهم : لا مو انتِ تقصديني

ابتعدت وهوه يتقرب عليه گلت

_ والله والله اقصد نفسي مو انتَ

_ شنو تضحكين عليه انتِ لا تقصديني

نحصرت يم الحايط وبعد ما اكدر امشي اجه حط ايدينه الاثنين وگال

_ هسه اشوفج شلون يصير طايح الحظ

_ شبيك ايهم اتشاقه

ابتسم وجر وجهي وباسني قوي احس شفتي تشككت لحد ما كمت دفعته لان اختنكت وخر من يمي وگلت واني اتنفس

_ ايهم مو هيج خنكتني

_ خنكتج ليش اني مو طايح الحظ علئ كولتج

تقرب اكثر عليه گلت

_ ايهم اسويلك كهوه

_ لا ما اريد

لزك جسمي بجسمه وخر شعري علئ صفحه ونزل علئ ركبتي حيل و باسها بقوة احس شلعت گال

_ شوفي هسه صار هنا آثر حلوو

_ ايهم ليش سويت هيج

تقرب مره ثانيه علئ ركبتي وباسها وگال

_ وهذا الآثر بعد احلئ

ورها باوع عليه وگال

_ شو متحجين

_ شنوو؟

_ اني طايح الحظ ؟

_ لا والله اني طايحة الحظ

_ بعد تحجين هيج عليه ؟

_ لا والله اصلا اسفة

باسني بخدي وخر من يمي وگال : اي عفيه بـ تفاحتي

ابتسمت ودرت وجهي رحت طلعت كتبي وكعدت اقرا وهو يمي كاعد ..

وكلسع اباوعله وابتسم وهو يكول

_ وزعي ابتسامات انتِ وزعي ظاهر عجبج السويته تحبين نعيد

_ هاا لا لا داقره

_ اي عفيه بَطلة مبينه خوش قرايه

كام يضحك ويشتغل واني اقرا دقيقه وساعه صافنه عليه

صفنت عليه واني اباوعله ، ايهمي ودكتوري شكد احبك اني اههخ گلت

_ تريد كهوة حروح اسوي الي

ايهم : اي اريد

رزان : اوك

رحت للمطبخ اسوي كهوة الي واله ورجعت صعدت
اول ما طبيت اريد افتح الباب بالغلط تحرك الكوب وانكب علئ جسمي

من حرارتها صرخت : اهخخ

كام علية ايهم وهو يعيط : شبيج شبيج شنو شلون انكب خما تأذيتي

هزيت راسي ب لا واني اكمز واوخر بدشداشه

_ لا لا ما تأذيت بس شوية حرورة وصلتني

ايهم : لتجذبين رزان خما تحركج خاف حارة حيل

رزان : لا ايهم مابيه شي

ايهم : متأكده ؟

گلت بعيطه : اي مابيه شي

_ دتجذبين علئ منو انتِ

اجه يمي راد ينزعني دشداشه لزمته وگلت

_ شبيك ايهم

_ دخلي اشوف خاف احتركتي

_ لا لا كلشي مابيه

_ لا بيج

_ شبيك ايهم عفيه لسوي هيج

_ كافي لتدخلين

نزعني دشداشه غصب واني ميته خجل واتنفس سريع واباوع عليه شلون يباوع الجسمي ومبتسم بخباثه واني فشلانه بعدين باوع عليه وابتسم وگال

_ كلشي مابيج ماكو حرك بس موجود اثار قبلاتي

نزلت راسي بخجل وگلت : حباب لتحجي هيج

ضحك وگال : ديلا روحي غيري ملابسج غسلي لو تريدين ابدلج واغسلج اني هم

_ لاا لا اني

بسرعه اخذت ملابس ورحت سبحت و بدلت واجيت كعدت يمه

ايهم : خما تتأذين؟

ابتسمت اله وكلت : شبيك ايهم مابية شي كلها مجرد كهوة ووكعت علية ماتأذيت ولا احتركت ليش خايف هلكد علية شوفنيي مابية شي

ايهم : متأكده ؟

رزان : اي والله

حضني وضل ساكت

رزان : يمههه افديك انيي شهل حنية ايهمييي

ايهم : انجبي يلا كافي روحي اقري

رزان : ها خلصت رومانسيتك

ابتسم وگال : لتخافين عندي رومانسيات هواي بس روحي اقريي حتى اشوف شغلي وياج بعدين

هزيت راسي بضحكه : شنو يا شغل ، سكتت ثواني استوعب اني شكلت زين هو شقصده ، هاااا

ابتسم بخباثه : يلا يلا روحي اقري شبيج

بلعت ريكي وگلت : اي اقرا بس يمكن ماخلص

ايهم : ليش شفت المحاظرة قليله

رزان : لا هواي يمكن اضل هواي اقراها

ايهم : لتهولين السالفه شكدوتها نص ساعه متخلص

رزان : ها اي خوش

رحت كعدت اقرا وكلسع يباوع علية ويضحك ..

من اشوف عيونه ارتاح .. أيهم الامان والحب بالنسبة إلي .. هو اللي وكف وياي بعز قهري وبقمة ضياعي جان مصدكني وساعدني اتخطى الصار وياي حبني بكل حالاتي .. حبني واني جنت مريضه
جنت محتاجه انسان مثله بحياتي و الله رزقني بيه نعمه .. احب اهتمامه بية و بأصغر تفاصيلي

أُحبك بطريقه صادقة وكإنها المرة الاخيرة من كُل شيء .

____________

ريم
بعد ما خلص العيد ميلاد .. طلعنا من بيت اهلي و
مؤمل اقترح ياخذني لـ مطعم واكيد ما رفضت

الدنيا جانت شته وحيل بارده .. ركبت بسيارة

وانمدت ايده وفتح اغنية لـ كاظم " هل عندكِ شك "

" هل عندكِ شك انكِ عمري وحياتي
و بأني من عينيكِ سرقتُ النارَ
وقمتُ بأخطرِ ثوراتي "

صار يغني وياها كل شوي يباوعلي ويبتسم
ابتسمت اله وبداخلي فرح مو طبيعي
وصلنا للمطعم ودخلنه اني وياه وكعدنه ...

_ لفي نفسج باللفاف زين لا تتمرضين

ريم : تمام

حضن ايديه ويباوعلي وعيونه تلمع

گال بهدوء : سندريلا

_ ها

مؤمل : اني احبچ هواي يَـ بعد جفون عيني

دمعت عيوني وبينت الدمعه منها

ابتسمت وكلت : مو بكدي

مؤمل : ريم اني منصدك احبج هواي أنتِ كلشي بحياتي ، اشوف الدنيا بيج

ريم : واني هم احبك هواي مؤملي

ضحك وگال : حلو حلو ياء التملك

ابتسمت اله گلت

_ الأجواء تجنن

مؤمل : جبتج حتى اغير من نفسيتج

ريم : انتَ تجمع طلعاتك كلهن بيوم واحد بعدين تكلي موووو طلعتج واني بس يوم طالعه

مؤمل : هاا منو قبل شهرين طلعج

ريم : هاي انتَ اعترفت قبل شهرين صار شكد خلف الله على اخواني يجون ياخذونيي يمهم

مؤمل : ديلا كافي لنتعارك مو كاعدين بمكان حلو

_ اوك تمام

_ آخر مرة اجيت هنا اني وفهد .. قبل سنه بس هل مرة كلت لازم اجيب اخته

ريم : اني مجاية هنا هاي اول مرة همزين عاد حسيت وجبتني كلت ريمتي ضايجه

مؤمل : حقج علية ، ريم حذكرج بشي

ابتسمت وگلت : خوش

مؤمل : قبل كم سنه اقصد قبل لا نتزوج من شفتج بالمستشفى وي فهد جنتي مريضه .. من سألتج تحبيني ضليتي تبجين

ريم : اخخ جنت فطيرة شلون ابجي كدامك شلووون

مؤمل : ليش

ريم : كشفت نفسي بسهولة

مد ايده وضم شعري جان طالع شوية من الشال جان يكول

_ بس همزين عرفتج تحبيني وجيت خطبتج

ريم : جنت تحبني لما خطبتني موو

مؤمل : لا جنت اكرهج اموت منج اصلا

ريم : اييي واضح

مؤمل : يعني تدرين بية احبچ ليش تسأليني

ريم : مادري هيج

ريم : ومرة جان ياسر عازمكم يمكن وجيت انتَ بقيت يمنا بتت ومن شفتني اهخخخخخ مؤمل اني وشكلي وشعري

مؤمل : اتذكر اتذكر هنااا لما كلتلج شارده من مستشفى الأمراض العقلية

ريم : لا مو بس هاي وكلت عليج عيون ضيم

مؤمل : شسوي غير طحت بحبج

ريم : هوه اصلا اكو واحد ميحبني

باوعلي مبتسم وگال : سكتي لج

_________

روان
وره مخلص عيد ميلاد كاعده امشط لريناس وريناد سويتلهن نخلات بشعرهن حتى بعده مطالع بالكوة احط قراصات

طب ياسر يضحك : لك هاي شنو عيني شهل جمال

روان : اهخخ تعبني

ياسر : دروحي هذني يتعبن ؟

روان : اي يتعاركن هواي

ياسر: دروحي لج يمه بناتي

شالهن ويضحك وياهن : يمه اروح فدوة للحلوات انيي

ابتسمت ؏ شكلهم يضحك

بعدين ياسر باوعلي جان يكوللهن : تفلن على امجن

خنزرت بصدمه : عزا انتَ شدتكول

ياسر : تفلن يلا هيج تففف ويعلمهن

روان : ياسر شبيك ميصير هيج تعلم بيهن شبيك تخبلت اني امهن

ياسر : عادي عادي يلا تفلنن هيج تفففففف

خزرتهن وگلت : انتن تفلن على ابوجن يلاا

وهنه اصلا ميفتهمن شي بس صافنات علينه

ياسر : يلاااا تفلن عليها

روان : لااا تفلن عليه

اخر شي ريناس ساكته متعرف بس ريناد تفلت علية

فتحت عيوني بصدمه خنزرت عليها : هاااي شنو ياسر

ياسر كام يضحك ويعلم بـ رنوسه : يلا بعد انتِ يلااا بابا

روان : ياسر اكعد شدتسوي مخبل عيب اني امهم تخليهن يتفلن علية

ياسر : شبيج حتى يصيرن قويات مو بس عليج اليحجي وياهن يرشكنه بتفله

روان : اصلا انتَ مدري شلونك صاير هسه تعلمهن مادري شلون كوللهن غلط خنزر عليهن فهمهن خوشش وخر واني زعلت

ياسر : يااا طلابة روان المتخلص شبيك بوزتي مو دنشاقه

روان : مو شقه هذا انتَ واحد سرسري ومستهتر ليش تعلم بناتك مو بعدهن صغار واني امهن وميصير

سمعت تفلة ريناد مرة ثانيه : هاك استلم وخر عني يلا اصلا انتَ تحب بناتك أكثر مني لو تحبني متعلمهن

لزمني يضحك گال : شبيج عمي شبيج زعلتي عادي هسه ينسون مو دنضحك ونصخم الا تخربين الأجواء وتطنكرين

روان : لك شنو اطنكر وانتَ مو دتعلم بيهن اشياء غلط

ياسر : هسه هنه شمفهمهن

روان : خطيههه منو يعلم بيهن ؏ التفله وخر بعد زعلت

ياسر : اهوووو شبيج كعدت ؏ صفحه اباوع للبنات يلعبن بالالعاب مالتهن

ضلت ساكت ميحجي ولا اني
بعدين سمعت صوته وهو يردد كلماته ..

ياسر : رواني ، طركاعه ، ام كفشه شبيج لتزعلين أستغفر الله شكبرني شكدي اجي أتوسل بيج

باوعتله صفح : تخليهن هيج يتفلن علية

ابتسم وگال : لا بس دا اشاقه مو قصدي

ابتسمت وگلت : مرة ثانيه متسويها

ياسر : اتشااااقههه شمسوييي

روان : بس متعيدها

ياسر : عمي خوش خوش تدللين

روان : سرسريييي

ياسر : انجبي طركاعه

روان : ماااا انجب

يا ترَى من انتَ..؟
من اين جئتَ لي
هل انتَ مَلاك ام ماذا !
وفيءٌ بطبعكَ
حنونٌ بتصرفاتكَ
ولطيفٌ بمزحُكَ
انتَ گ قطرات المطر التي تسقطُ فجأة
گ خبر مُفرح في وقت مُحزن
گ رَاحه بعد تَعب
هل تعلم كَم أنا احبكَ ؟

_______

بنان
كاعده بالغرفة احجي وي آسر و احجي كلمة واكول كررها ورايه لان هوه بده يحجي صار عمره ثلاث سنوات ..

بنان : كول تفاحه

آسر : تفاها

بنان : كول برتقال

آسر : برتكال

دغدغدته وهوه يضحك گلت

_ اروح فدوه لحلكك الحلوو الي يحجي

وبسته بحلكه وحضنته بهل اثناء فات فهد وشافني اشو ما اشوف غير خزرني مهتميت وبقيت احجي وي آسر واضحك ورها گلت

_ يلا حبيبي نام

آسر : مااا ولي

بنان : ولك ماما لتكول ولي عيب

آسر : مااا مااا ولي

اباوع علئ فهد صافن علينه تقربت يم اذن آسر وشاورته بصوت مسموع گلت

_ ترا اكول البابا

هوه باوع الـ فهد وكام يضحك جان يكول

_ شكوو تضحك ولك

ضحك وگال : ماتو شي (ماكو شي)

اجه فهد يمنه كعد علئ الجرباية يم آسر وگال

_ لا اكو شمسوي مصيبه

ضحك آسر بخباثة وگال : ماتو شي ماتو

شاله فهد وكعد بحضنه وگال

_ لا تعال نام

آسر : ماا ماا

فهد : لا ماكو امشي نام

عكد حواجبه آسر بضوجه وهوه يباوع علئ ابوه ورها اندار عليهه وقدم ايده الصغيرونات يريدني اشيله گال

_ ماما ماما

بنان : ماكو ماما هسه وكت النوم

كمت سويتله ممه وشربته اله ورها شلته وخليته بجربايته لان نام ..

وكول هذا محجيت وي فهد شو ما اشوف غير انجريت وصار فهد فوكايه گلت

_ عزا فهد وخرر آسر نايم

فهد : انتِ كلتيها نايم

بنان : خوش وخر خلي انام

فهد : ماكو نوم اليوم

بنان : لا فهد وخررر

فهد : اووي فهااد

بنان : تراا لعبالك اضحك ما اضحك

فهد : هسه انتِ زعلانه علئ شنو

دمعت وگلت : انتَ عيطت عليه علئ شي تافهه

فهد : لا هذا شي مو تافهه ان كايلج خففي مكياج

بنان : اي هاهيه تمام خلي اكوم انام

فهد : ترا سويت هيج لان اغار عليج

بنان : بس مسويت شي غلط اني

فهد : هذا مكياجج الخفيف الي تحجين عليه اني اشوفه هواي ومن غيرتي عليج عيطت عليج لزعلين مني

بنان : لا خلص عادي مزعلانه

فهد : تعلميني بروحي اعرفج زعلتي

ابتسمت وگلت : لا مزعلانه

جان يكرصني من خصري حيل ردت اعيط سد حلكي وهوه يضحك گال

_ ولج لتفضحينه بهل ليل ويكعد آسر ويخرب الجو عليه كالعاده

هزيت براسي وخر ايده وگال

_ شو ابتسمي

ابتسمت وگلت : ليش

باوع بعيني وعيونه تلمع گال

_ ابتسامتج حلوه

بنان : وعيونك حلوه

تقرب عليه حيل وباسني بشفتي ورها خله راسه بركبتي گال

_ اهخخ علئ ريحتج الي تسطرني دائما

وكام يطبع قبلاته علئ ركبتي وجهي ونزلت ايده علئ جسمي گلت

_ لا فهد مو اليوم

_ ليش؟

_ لا مو اليوم عفيه

هز براسه وباسني يم شامتي وگال

_ براحتج

ورها وخر واجه حضني حيل وراسي صار علئ صدره
شفته بده يغفه گلت بصوت مسموع

_ اني شكد محظوظه بيك .. ومحظوظه بحبك هذا

شو ما احس غير ايده صارت تمسح علئ راسي وگال

_ ومتتخيلين شكد انتِ غالية عليه

ابتسمت وگلت : سمعتني

_ اي

بنان : تدري فهد

فهد : شنو ؟

بنان : اني خسرت هواي اشياء بحياتي وعشت هواي امور بس الله عوضني بيك وچنت احلئ عوض

فهد : وعوضني بيج هم

بنان : احبك هواي فهد

باسني براسي وگال

_ واني هم احبچ درابين گلبي وام ابني

لُِم يتوُقفُ حٍبَهما بَلِ نحٍن من نتوُقفُ عن سرٍدِ حِڪايتهم

تــمـــت
______________________

ولهنا تنتهي قصة " نقطة لقاء "

تاريخ ابدء 3/6/2022
تاريخ الانتهاء 22/9/2022

جان صعب علينا ننهيها لان تعلقنه بيها حيل بس لكل بداية نهاية وهاي نهاية القصة وان شاء الله تكون نالت اعجابكم وكدرنه نوصل الكم قصة الابطال والي عاشوه من .. حزن .. فرح .. وكُلشي ..

واجهنا هواي انتقادات بهاي القصة وكلام سلبي بس كلها اتجاوزنها ومأثر بينه وكملنا بهوايتنا الي نحبها الي هيه " الكتابة "

وشكراً لكل واحد وكف ويانه وشجعنه وكتب كلمة حلوه مثله ..

وهاي جانت بدايتنا بالكتابة وان شاء الله الجاي اقوئ واحسن انتظرونا بقصة جديدة ..

ونحبكم هواي طركاعتنا 😔💖 .

وهذا حسابنا الانستا7.nldn وتلكون رابط انستا بالبايو مال واتباد الي يحب يتواصل ويانه و يعرف اخبار عن الابطال و راح ننشر اشياء تخصهم بيها ..

وهواي كالوا الابطال عدهم حسابات انستا نعم عدهم بس كلها خاصة ..

بس هاي قناتنا التليكرام راح نخلي احد البطلات تحجي بيها الي يحب يدخل بيها هذا الرابط

_________

(لاتنسوا التصويت)

إلى اللقاء يا أعز العابرين في قلبي ♡.

الكاتبات دينا & نور