نقيب قلبي الفصل العاشر 10 - بقلم شقراء

الجزء العاشر
#نقيب_قلبي
(من هذا الجزء رح يشاركنا صقر بالسرد)..

اني صقر..عمري ٣١ مواصفاتي حسب ماذكرت زينة..
رتبتي نقيب بالداخلية..
صنف استخبارات واشتغل بأمن الجامعة..
وتعرفت على زينة من صار الحادث..
ومن يومها دخلت بعقلي كلششش ..
عرفت عنها كلشي وبيتهم اندليته وسألت عنهم مدحوهم هواي..

عائلتي تتكون من خمس اولاد ..
وامي وابوي الله يحفظهم..
فهد ومقدام اكبر مني متزوجين ..
وفهد مقدم بالجوازت.. وعنده بنات ثنين (حور وجنة) ..
مقدام رتبته رائد..و عنده بنية وحدة(تالا)..
اني وراهم بالترتيب..
وشاهين ملازم اول بالجيش..
واصغرنا لواء ..هذا متعقد من العسكرية..
يداوم معهد طبي..
ابوي عميد متقاعد..
رجل بمعنى الكلمة ..صح اله هيبته بس مخاوينا..
خصوصا اني سري عنده..

فهد شخصيته رزن مثل الوالد..
بس مقدام لا..
صح هو حوك ومعدل..
بس عنده مرض اسمه نسوان..
رغم متزوج ومخلف..
بس بعده علاقات ومرات شرب بس خفيف..
ع كولة اشرب للكيف والمزاج..
اني ماابرئ نفسي بس علاقات ونصب ابد ماعندي..
جان عندي علاقه ببنت قبل كم سنه وطولنا فترة..
بس اكتشفتها ام فليس...
وعرفت معدنها شنو وتركتها..
صح واصل وياها مرحله ومتعمق جسدياً..
بس كله برضاتها..
حتى مااخليها بذمتي لو اكول غصبتها..
وراحت هسه تزوجت وخلفت ونسيتها..
بقيت اذا احتاج مرات اطلع وي جماعتي..
بس اشرط اكون اول واحد وياها..
والفلوس موجودة كلشي يتوفر...

عدنا شاهين كلش رايح زايد..
يعني نسوان وشرب عنوانه ..
وعرايك الوالد ويا متنتهي..
رغم والدي شديد..
بس هذا عنده جسارة ..
ومثل ميكولون كل عائلة بيها واحد منشق..
هو حنين بس شخصيته هيج مو بيده..

لواء.. كلش حباب وهادئ بنفس الوقت مرح ويحترم...

حبيت زينة وجنت مراقب خطواتها..
جنت رايد قربها بكل الاشكال..
وبيوم الانفردت بيها بالسيارة افففف..
تمنيت ماخليها تنزل بعد..
انتظرتها اخر امتحان الها وقررت افاتحها بالموضوع..
بس ماكدرت اشوفها ..
انطيتها خبر وكتلها اريد اخطبخ..
وحاجيت الوالدة كتلها شفت بنيه بالجامعه ورايدها وفاتحتها بالموضوع ..
وكتلها رح اجيب اهلي..امي كالت ياريت وفرحت..
كالت اعرف اختيارك اكيد هسه بنيه تتوفر بيها كل الصفات الزينة...
كتلها حجيه تعجبج حبابه وعاقلة واهلها خوش ناس..
كالت تعال احجيلي بالتفصيل..
كتلها هسه هلكان كلش..
انام ومن اكعد نحجي..
وهى جان الوالد مسافر يومين ويجي...
انتظرته يجي ونمشي عليها..
لان ماخطي هيج خطوة وهو مو موجود..

يوم ثاني اجه شاهين راد يحجي وي امي صاحت علي..
كالت هيج وافرح بيكم ثنينكم تتزفون فد يوم...
كتلها خل نسمع من شاهين بالاول..
لان كلش جنا يائسين منه يتزوج..
عاد كلها اريد اخطب بنيه احبها امي طارت فرح..
حجالها عن مواصفات البنية ..
كلها اسمها زينة غسان.. وطالبة حاسبات..
وبيتهم بكذا مكان وحالتهم بسيطه!!!!

هنا تخبلت كتله ..
صقر..منين عرفتها حتى تخطبها؟؟؟
شاهين..عندي علاقة بيها..
تعرفت عليها بالجامعه..

ام فهد.. ماما تأكدت من اخلاقها..
ترى اعرفك انت اخلاقك تعبانه..
بس مو تجيبلي وحده مثلك..

شاهين..لا يمعودة تأكدت وروحو سألوا عنهم ناس خيرة..

صقر.. شاهين شكد صارلكم علاقة؟؟

_سنة صارلنا وتعرفت عليها بالجامعة..
وحتى جواد ابن عمتي مرتبط بصديقتها..
وهم يريد يخطبها...

صقر..الله يوفقك.صدك حسيت بالاهانة..
معقولة زينة ضحكت عليه...
اشوف شاهين مستعجل وخبص امي خبص..
يكلها متقدميلها ناس واخاف تروح مني!!!
يعني كتلها رح اجي اخطبج ..
خافت تصير صدك وكلتله...
احس بكد ما حبيها حقدت عليها..
كرامتي ورجولتي انهانت..
كالت الحجيه وانت صقر ترى مافهمتني كلشي..
صفنت والنار الجواي بركان..
كتلها يجي الوالد ونحجي..
هسه فرحتنا بشاهين متنقاس ...
كمت واني عقل مابراسي..
حتى ماعرف افكر...
ضلت زينة تراسلني وتسأل بس جنت بلا ماقرا المسج امسحه..
اخير شي حلفتني..
وللأسف كدامها ضعيف هواي..
دزيتلها مسج احس شوي طلعت من الغل البداخلي...
وحضرتها ومشت الايام وجان شاهين مستعجل..
وصارت خطوبتهم..
وامي لحت عليه نروح نخطب كتلها مو هسه..
البنت فاتحتها بالموضوع كالت غير وقت ..
اقتنعوا ..
بس اني ما اقتنعت..
ضليت اسهر وي ولد صديقنا عنده شقة ..
يوميه شرب وعربده..
اكعد يمهم بس شربي كلش قليل ابقى صاحي..
صارت عندي عقدة وكره تجاه كل جنس حواء..
عدا امي..
وصيت صديقي اريد وحدة تسهر وياي..
بس بشرط تكون الي..
جابلي بنية عمرها 25 ..
بعدها بنت وللأسف ..
ملامحها تشبه ملامح زينة هواااي...
يمكن ضليت اشوف زينه بكل الوجوه..
بس لا .. بيها هواي شبه..
خصوصا الابتسامه..
الملامح..بس النظرات لا..
نظرات زينة متشبه احد..
ولا احد يشبهه..
نظراتها تذكرني بالطفل من يكون بحضن امه..
يصفن بوجها وتحس نظراته خاليه من كل دغش..
ويختم النظرات بأبتسامه ناعمة..
هيج جانت زينة..

المهم تعرفت ع هالبنت اسمها حلى ..
جانت تتمنى ترضيني..
وحاولت هواي تتقرب مني..
بس جنت يمها جسد بلا روح..
وهواي ااذيها..
مرات خلال العلاقه واني اباوعلها اتخيلها زينة..
اضربها اضل اغلط عليها..
بالاول استغربت لان تسمعني اكلها زينة..
بس بفلوسها تسكت..
وجنت ادفعلها فوك المتفق عليه..

اليوم عرس شاهين..
ورحنا للقاعة وبلش العرس والتهينا..

....................
زينة.. مرت الايام علي مثل الميتة..
جهزولي كلشي بس ولا مرة طلعت...
وشاهين بعد ماوصل..
والبيت كله احسه مخلي الذنب علي...
اليوم زواجي ..
رحت للصالون ..وخليتها تشتغل باليعجبها..
بحيث استغربت..
تكلي اول عروس عاقلة وماتتشرط..
كملت مكياج ولبست البدلة..
شفت الموجودين حيل انعجبوا بيه..
وبالبدلة انبهروا..
الكل تسأل من وين اجرتيها..
جاوبتهم سارة..
زوجها جابها الها توصية ..
شفت نظرات الحسد بعيون الناس..
لو يعرفون شنو عيشتي ما جان نظرولي اصلا ...!!
كملنا واجه شاهين ..
رحنا اخذنا صور وشرط ع المصورة..
يريد 30 لقطة هه..
وكل لقطة تكتب يمها يوم من الشهر مثل الروزنامة..
وسوا كل اللقطات الي اباله..
جنت عبارة عن لعبة..
يجيبوها منا...ويخلوها منا..
راد اللقطة الاخيرة بوسة..
رفضت ..باوعلي كال مو لمصلحتج وخزرني..
سوينا اللقطة بس حسيت بقرف..
احس هسه استوعبت..
اني رح اعيش ويا هالانسان..
ووياي بالبيت صقر...

للحكاية بقية..
للكاتبه شقراء(قمر كانون)