نقيب قلبي الفصل الحادي وأربعون 41 - بقلم شقراء

الجزء الواحد والاربعون
#نقيب_قلبي

صقر...من شفت زينة اجت وهي تزحف ..
صدك كرهت نفسي..
ليش خليتها لهسه ماعقدت عليها..
حتى لو بس بالاسم..
المهم احميها من هالوحوش..
كمت الها اني وامي ..
اريد اسندها اجه اخوها..
دفعته وكعدتها..
اباوعلها الوجه مضرب..
والعيون مورمه ومينشاف بيها بياض..
كلها حمرة دم..

دفعت اخوها كلت لامي اخذيها عالجهه.
وكام مازن..
ضل يصيح شنو تدفعه..
هذا محمد جبان ميفيد..
يتحامى بمازن وينتظره يحجي..
حتى يستقوي بي..
تلازمت وياه كتله مالكم علاقة بيها..
من شوكت صرتو زلم براسها..
ولكم اختكم شبعت ضيم وترملت..
وانتو مافكرتو يوم تمرون بيها..
لو تجون تكلولها خوية شمحتاجة...

ضل الوالد يصيح تركته ورجعت ليورا..
كال اكعدو جايين نتفاهم مو نتكاون..
ابو فهد..بوية هي اختكم ومن حقكم تاخذوها..
بس مو اصول تجذبون علينا..
نيتكم تاخذوها مترجعوها..
وتدزون ولدها للبيت..
والادهى من هذا تنطوهم للطفلة..
يعني لا حطيتونا حشيمة ولا احترمتو..
بتكم عايشه ببيتنا معززه مكرمة..
تجون تاخذوها مثل الحراميه لييش؟؟؟

هي جبيره ومن حقها تقرر مصيرها وين..
ومو من حقك ولا حق ايً كان يبعدها عن ولدها..
انت مخلفين وتعرفون معزة البزر..
السويتو عدوان متسوي..

مازن..لا عمي العفو..
بس محمد كال زحمه ازعجهم والدنيا ظهر..
واحنا ناوين نجيكم نتفاهم..
بس زينة اجتها قسمه وخوش قسمه..
بدل مماتبقى هيج وهي بعدها شابه..
تشوف مصيرها وتروح..
وهم زحمه عايشه بين اربع زلم وثنين عزابية..
الناس اكلت وجهنا..

صقر..احترم نفسك ولا تضل تشمر..
شنو شايفنا نواقيص ع عرضنا..
نعاملها احسن معامله ومراعين الله بيها..
وصارلها سنة يمنا من شهادة المرحوم..
هسه صعدت غيرتك وردتها ..
لو جايبلها واحد مثل جرفتك تريد تورطها بي..

مازن..انت كاعد ببيتي ماكدر اتجاوز..
ولخاطر ابو فهد راح اسكت..
_لا تسكت لان حجيي صحيح..
وماعندك رد عليه..
شوف من الاخير..
اجيناكم هسه بموضوع..
تفضل يابه احجي ودرت ع والدي ..
باوعت بنظرات
معناها شد عليهم..

ابو فهد..ابني احنا المفروض ..
الموضوع نفتحه وي الوالد والوالدة..
بس بسبب الظروف راح نفتحه هسه ..
والنا جية ثانية حتى نحجي..
محمد..هم هسه على جيه..
تفضل حجي احجي..
_شوف ابني زينة بتنا..
ولو شكد ماندور مانلكى مثلها ذهب صافي..
انت تعرف من بعد المرحوم بقىو ولده..
وهم من ريحة الغالي..
ويابوية الضنا عزيز..
وابني شلع شريان كلبي بروحته..
وهالولد اشم بيهم ريحة ابوهم..

اني جاي واريد اطلب زينة لابني صقر..
هو هم يصير الها سند وهم يكفل اطفالها..
وهم وليدات اخوه وحنين عليهم..

مازن..عمي يجي الوالد وننطي علم..
ويصير خير..
وزينة تبقى يمنا لحد ما نقرر ..

صقر..شفته يحجي معلگ..
ومسوي نفسه زلمة وهو صخلة ماتلوذ بسده..
ويجاوب وواثق من نفسه هو ولي امرها..
كال الوالد احنا نترخص هسه..
ومن ارجع اتصل بالوالد..
كله بس انطي خبر للحجية حتى نروح..
كام محمد يصيح للوالدة..
وسمعنا صوت اهله..

دخلو سلمو احنا واكفين..
كالو استريحو ومتطلعون..
كلهم الحجي انا زعلان والي عتاب وياك حجي..
كله ابو زينة لا خويه مامرجيه منك..
لعد ياخوي ولدك يجون ياخذون زينة من بيتي..
ويذبون الولد علينا ...
يكولون امهم متريدهم..
وكاتليها كتله مسويها جنازة..
اجت تزحف زحف..

تعذر ابوها وضل يحجي عليهم..
كله الوالد حجي اني جايك بطلب..
كله نطيتك ابو فهد..
ابو فهد..احنا جنه منتظرين تدور سنه المرحوم..
وتخطب زينه لصقر..
تعرف هو عم الجهال ويحن عليهم..
وزينه مانلكى مثلها ومثل اخلاقها..
كله كبع واخذ شوكت ماتردون..
بتكم هي..انتو فصلو واحنا نلبس..

صقر..من رخصتكم يابه ..
من رخصتك عمي ..
خلينا نعقد هسه مدام الطرفين راضين..
كال ابو زينة خير البر عاجله..
ووالدي كال زين تسوي يابه ...
حتى نرجع ام صقر ويانا من بعد اذن ابوها..
بتك هاي ابو فهد والشور شورك..
زين مدام اتفقنا..
اني رايح نص ساعه اجيب السيد واجي..
كال ابو زينة براحتك بويه نقيب صقر..
واحسب حسابك عشاكم يمنا..
الله يكثر خيرك عمي ..
يلا من رخصتكم مااتاخر..

رحت بسرعه خابرت مقدام..
_الوو مقدام اريد تروح لسيد مجيد..
جيبه وتعال لبيتنا..
_خير سيدي هههه شكو..!!
_دجيبه كله صقر يريدك بسرعة..
رحت لبيتنا اخذت فلوس ..
وما اخلي بالبيت هواي..
اخذت من الوالد وكملتهن..
كلت لفهد وكال عين العقل..
وانتظرت مقدام اجه هو والسيد..

مقدام..خير صقر شكو؟؟
_اخوك يريد يتزوج يول..
_الابالي مو!!
اي اي ..
يلا نتوكل..
طلعنا ورحنا لبيت زينة..

للحكايه بقيه...