نقيب قلبي الفصل الثاني وأربعون 42 - بقلم شقراء

الجزء الثاني والاربعون
#نقيب_قلبي

زينة..اخذتني ام فهد تصبر عليه وتبجي..
كلتلي اجينا نخطبج لصقر..
واذا قبلو هسه نعقدلكم وناخذج..
احس قلبي انتفض..
مثل الميت ويصعقوه بصدره وترجعله الحياة..
نسيت قهري نسيت حتى الضرب..
ضل ابالي شي واحد هو حنجمع بصقر..
معناها اضمن اطفالي وياي..
ومحد يبعدني عنهم طول العمر..

شوي وسمعت صوت اهلي اجو..
فاتت امي انصدمت من المنظر..
سلمت ع ام فهد مستغربة..
متعرف شنو الي صاير..
حجتلها ام فهد..
ضلت بس دموعها تصب..
كالت ليش ماانتظرتي نجي..
ليش تبلشتي وياهم..
ذول مخابيل متعرفيهم..
كتلها يمه اخذ جهالي جرهم من حظني..
انت تعرفين شنو شعوري ..
تتذكرين قبل شكد يضربج ابوي..
شكد ياذيج وتتعاركون..
تكولين مااطلع وابهذلكم..
ولا اريد ابتعد عنكم..
انتو الهوا الاتنفسه..
شبكتني وضلت تبجي..
كالت يولون ابوج موجود ويعرف شيحاجيهم..

راحت واجت كالت ...
صقر رح يجيب السيد وتعقدون..
يا الله سويها باسمك وتفض..
يعني اليوم حنجمع بصقر ومو خايفه من شي..
يعني مااخاف بعد لا ياخذون اطفالي مني..
لو عرفو صقر رايدني..
رح يصير كلشي مباح بيني وبينه..
رح يصير هو المسئول عني كدام الكل..
اااااه شوكت اصير باسمك من صدك..

ضلينا نحجي وامي وام فهد يسولفن..
وولدي بحضني خطيه خايفين عليه..
من شافو شكليي..
شوي واجو صقر واخوانه وياهم السيد..
كالت امي كومي اطلعلج شي ابيض لبسي..
مو زين تعقدين بالاسود..
طلعتلي كلابية مالتها اوف وايت..
شكبرها عليه عبالك برشوت ..
بس ميخالف المهم اعقد حتى لو بكونية..
خطيه ترتب بيه وتبجي..
وام فهد تكلها ليش تبجين..
ترى صقر يحطها بعيونه..
ولا تتوقعين نظلمها..

كالو يلا حيعقدون..
كعدت ورا الباب..
خطيه امي جابتلي طشت ماي خلت بي رجليه..
وحطتلي شكر ع لساني..
لعبت نفسي وهي تكلي لتذبي..
يخلي حياتج حلوة..
وحطت بيدي هيلة ..
والجهال يباعولي ..
منسندين ع ركباتي..
منا واحد ومنا واحد..
ام فهد تكلهم تعالو..
يكلولها لا نباوع لماما حلوة..
كلتلهم ماما صارت عروس..
وذوله متونسين ميعرفون شنو عروس..
بس يرددون ماما عروس..

سالني السيد تقبلين بصقر ريسان...
اااخ اجت بين عيوني زواجي بشاهين..
شلون انصدمت من سمعت اسمه..
لدرجه من كال اسم صقر..
من كل عقلي اركز!!
اريد اتاكد من الاسم..
رجع سالني واني صافنه..
حاجتني ام فهد..
كتلها اي اي..
كالت جاوبي هو ولج مو اني..
عاد رجع حجه وجاوبته..
بس انصدمت بالمهر الي مخلي صقر!!

جان المقدم ٣٠مليون وكيلو ذهب..
والمؤخر ٣٠كيلو ذهب..!!!!
من سمعته دخت..
شبي صقر شدعوه هالكد!!!
من كله عقله هيج مهر تعجيزي..
يعني مستحيل احد يخلي ع نفسه هيج شي..

خلص السيد وهلهلت ام فهد..
شبكتني وكلتلي الله يسعدج يايمه..
وامي هم تبجي وتباركلي..
بس نظرات التساؤل واضحة بعيونها..
ومستغربه من المهر..
شافت ام فهد طلعت..
كالت ولج يمه شدعوه هالكد..
اخاف ذوله شرطو عليهم..
كتلها ماعرف بس مو غريبه عليهم عادي..
كالت بس المؤخر يمه يخوف ههه..
اكو واحد يحط هيج مؤخر!!!!
كتلها ماعرف يمه ..
هسه يولي المهم اخلص من ظلم اخواني..

وراها كالت امي خل نحضر اكل..
حتى يتعشون..
اني ماكدر اسند نفسي..
كالت رح اوصي الولد يجيبون مشويات..
واحنا نسوي تشريب ونشوي دجاج..
اني اعرف امكانيتها ..
واعرف نشتري دجاجه بالاسبوع مرة ..
ونطبخها والكل بيها..

كتلها لا عليمن الدجاجه..
خيجيبون مشويات..
واحنا نسوي شوربه وزلاطه ..
ردت الولد يجيبون منهم..
لان اعرفهم مينطون لو خلص المسواك..
عاد يجيبون من جيبهم افضل..
كالت امشي لعد كعدي يمهم عيب..
رحت وكامو الولد وابو فهد باركولي..
ابو فهد باسني بكصتي..
كلي مافرط بيج اني..
انتي بنيتي الماجبتها..
كال لصقر روح بوس راس مرتك وباركلها..
اجه صقر يمي..

للحكاية بقية...