نقيب قلبي الفصل الرابع وثلاثون 34 - بقلم شقراء

الجزء الرابع والثلاثون
#نقيب_قلبي

من كال ابقي حسيت ماي بارد ونزل ع قلبي..
خابرت سارة كتلها ..
كالت اني حاجيت امي كالت تحاجي ابوي..
كتلها لا ماحاجه..
رح ابقى هنا..
نزعت عباتي ورجعت ملابسي..

فتحت الكنتور صارت ملابس شاهين كدامي..
ضليت ابجي بحركة..
صح حياتي جانت مو سعيده ويا..
بس صدك الزواج عشره ومودة..
مو سهلة واحد ينسى ..
اطلع بالملابس وابجي ..
لميت ملابس الطلعه بجنطة..
باوعت اكو جوا كراتين ثنين فتحتهم..
واحد حذاء جديد..
وواحد بي اوراق..
كلبت بالاوراق كلها مستمسكات وقسائم شراء..
فتحت الباب الثاني بي صندوك فضي ..
اباوع ع اغراضه ويوجعني قلبي..
يعني صدك هو مموجود..
يعني صدك راح..
شكد صعبه من تعاشر انسان ويروح ميرجع..
الله يساعد كل انسان فقد عزيز..

فتحت الصندوك بي البومات..
طلعتها بي اله هواي صور...
ولكيت بي صورة الي..
هيج مخليها ..
بحيث بس فتحته وكعت..
اني ومينا كاعدين بحديقة الجامعه ..
اخذناها بيوم الجامعه..
طلعت البوم العرس..
واباوع اللقطات..
شلون وجهه مبتسم ومباوع للكاميرا بشغف..
شكله كله حيويه..
للاسف راحت منه الحياة..

اخ شاهين ليش هيج صار..
ولله لو صاير زين وياي قسم...
الا اعيشك بجنة..
وجنت مستعده اساعدك تتخلى عن حياتك..
بس جنت رافضني انت..
يلا ..راح الي راح بعد..

اندك الباب صحت منو كالت ام فهد اني..
فاتت واني كاعده بكنتور شاهين..
ام فهد..ها يمه طلعتي ملابسه..
زين سويتي ننطيها لواحد يستفاد منها..

زينة..اي يمه جاي اطلع بيها..
_يمه ماغيرتي رايج وتبقين يمي..
اني هم امي والي حق عليج..
_لا يمه راح ابقى..
صقر ماقبل اروح حاجاني قبل شوي..
_اييي يابعد عيوني انت..
ضلي يمي تدرين انت صرتي بنيتي..
ووليداتج من اشوفهم جرح كلبي يهدا..
_تطمني يمه انتو صرتو اهلس..
وماتمنى افارككم بيوم..
وراح انذر عمري لولدي..
اربيهم واوصلهم اعلى المراحل هذا همي..
_الله يزيدج عقل يازينة ..
صدك انت زينة واسمج عليج..

صقر..من توفى شاهين..
احس انكسر ضلع من ضلوعي..
الاخ غالي..وميتعوض..
ندمت ع كل لحظه تعاركنه..
ع كل حرف حجيته وجرحته..
صح موتته موتت شرف..
بس يبقى الموت مصيبه..
وفكرت بزينه وين تروح ..
اهلها مينشد بيهم ظهر..
قررت احاجيها واخليها تبقى..
خصوصا من كالت الوالده حضرت اغراضها..
صعدتلها وجان كلامي وياها جاف..
لمصلحتها حتى لا ترد كلمتي ..
من تشوفني متعاطف وياها..
اعرف اذا راحت الهم تشوف العذاب..
ومو بعيد يزوجوها بس تطلع عده..
ويذبون الجهال علينا..
وهاي لو راحو جهالها منها تموت..
الحمدلله قبلت تبقى.

زينه.. ورا فتره اجتلي مينا مفرفحه..
جانت وي امها بالعمره..
حضنتها وبجيت بحضنها..
شكيتلها همي احس ارتاحيت شوي..

مينا.. لج زينه جواد متدمر خطيه..
لان جان هو وشاهين روح وحده..
لو تشوفين يبجي بحضني مثل النسوان..
وكلساع يرتفع ضغطه..
راح اتخبل اخاف يصير بي شي..

زينة..مينا انتو مو عاقدين محكمة وسيد؟
ليش متجيبين اغراضج وتجين لبيتهم..
اوكفي ويا بمحنته..
انتو المفروض عرسكم بنهاية الشهر..
ليش تنتظرين بعد سنه..
وتكثر المشاكل والاذيه..
ورجلج بحاجتج..
ترى الرجال مايخفف محنة فراق العزيز عنده بس المرة..

مينا..هيج تكولين انت ..اني هم فكرت..
رح احاجي واشوف ..
_اي جواد يستاهل تساندي..
وهو رجلج مالج غيره..
صدكيني مهما كان الرجال..
زين لو سيء بس وجوده ضروري..
_ربي يصبرج ياعمري..
انت قوية..

مرت الايام واني انزل من يفرغ البيت..
بقى من عدتي اسبوعين وتخلص..
علي وزيد وياسر وبارق يخابروني..
يتطمنون علي..
لان ام فهد جابتلي فون..
كالت تسلي بي شوي..
خطيه يسالوني اكلهم باحسن حال..
هم معايزين حمل وهم..
واخواتي وامي هم يحاجني ويصبرن بيه..
لحد الان مشايفه احد من الولد ولا محاجيني..
بس يدزولي سلام بيد جيان وام فهد..

ايات صارت بشهر السابع...
وصار عدها ولادة مبكرة ..
اخذوها للمستشفى وراحو..
خطيه جابت الطفل ومات..
مقدام كلش تاثر..
ويكلها انت السبب رعنه..
متحافظين ع نفسج..

مرت ايام وخلصت عدتي..
الجو شوي تغير بالبيت ..
والجهال مسلينهم لان كلامهم صار حلو..
وحركتاهم حلوه ينسون الواحد همه..
جانو يعاملوني فوق الاحترام..
حتى لا اتحسس ..
ولواء يحاول يشاقيني..
وصقر حاجتي قبل لا اطلبها يجيبها..
وفهد يعاملني مثل بنته..

مرة كاعدين بالحديقه بالليل..
الجو جان حلو بهاري..
ولاحظت مقدام نظراته مو مريحه..
جذبت نفسي كلت متوهمة..
بعدين لا صح لاحظت واضحه..
سحبت نفسي وكمت للمطبخ..
حاولت اشغل نفسي بشي اغسله ..
حتى لا ارجع بسرعه..
ومنها بلكي يحس ع نفسه..
بين شرودي وصفنتي دخل للمطبخ..
كال زينة عندي حجايتين اكولها واروح..
صفنت عليه كتله مقدام تصرفاتك مريبة..
انت محاسبني اختك؟وهيج تتصرف..
كال من الاخير تتزوجيني!!!!

للحكاية بقية...