نقيب قلبي الفصل الثالث وثلاثون 33 - بقلم شقراء

الجزء الثالث والثلاثون
#نقيب_قلبي

اجت ام فهد وجيان كوموني وحضنوني!!
ويصرخون لج زينة رااااح..
راح شاهين راااااح..
رفعت راسي ممصدكة هزيتها ..
كتلها يمه وين راح شبيج ..
كالت ولج رجلج مااات..
ولج يمه ابني مات..
ولج شاهين ابو طول الحلو..
بعد ماشوف وجهك يا يمه..
اني صرخت حيل..
وضليت املخ بشعري واضرب ع وجهي..
يريد يهدوني ماكو..
الزم شعري من الاصل واملخ..
ادك ع خدودي الى ان تبنجت..
ماحس بالم ابد ..
جيان شابكتني وايات اخذت البنات اخترعن..
وام فهد تنعي وتصرخ من كلبها..

ضليت اضرب بنفسي الى ان فقدت..
فتحت عيوني بغرفه جيان ..
وبناتها كاعدات يمي ويبجن ..
اجيت اكوم غوشت عيوني..
لزمت الحايط وجريت نفسي كوه فتحت الباب ..
البيت متروس !!وبجي وعياط..
طلعت اسحل بنفسي سحل..
اجتلي عمتهم سندتني..
شبكتني وضلت تبجي ..
كتلها عمه مو كالو زين..
مو حاجاني وحاجه ولده وكال مشتاقلنا..
ليش مات ليش راح..
من بين بجيها فهمت منتكس العصر ..
ورايحين كلهم يمه ووضعه خطر بس ماحجو..
لحد ما متوفي..

كتلها ولدي وين..
كالت عد اختج ..اجت هي وامج..
مخابرهم صقر ..
واجو كاعدين يم امه هسه ..
دخلت يمهم نمت بحضن امي ..
ضليت ابجي واعيط..
شبكتني وتصبر بيه..
كتلها ولدي وين..
كالت عد خالتهم فوك يخافون من العياط..
رحت صعدت تلكتني سارة..

حضنتها ضليت ابجي واحجي..
ولج مارتاحيت من شفته لليوم..
لج سارة مات شاهين رااااح..
يتم ولده خلاهم بلا اب لييييش..
منو النا بعد منوووووو...
شبكت الجهال واحاجيهم..
ماكو بابا بعد..حتصيرون يتامى..
حتنذلووون...ابوكم راح..
هم يباعون بوجهي ومبرطمين..

جرتهم سارة كالت كافي لخاطرهم اهدي..
من يشوفوج هيج يخافون..
فكري بيهم زينه هذا قدر ربج..
ورجلج مات موت شرف..
رجلج يعتبر شهيد افتخري بي..
وولدج بيت جدهم ميعوفوهم..
واني موجوده مستعده ااجرلج بيت واكعدج..
اعرف شتفكرين اعرف محنتج هسه..
شبكتها ضليت ابجي بحضنها..

بعدين جابو تابوته للبيت..
اباوع لوجهه ما كأنه ميت..
وجهه مو شاحب ولا اصفر..
عيونه مو ذابله..
شاهين بالتابوت جان كشخه..

كعدنا يمه وحاجينا..
كلهم يكلولي سامحي..
كتلهم هذا ابو ولدي وخيمتي..
ماشايله عليه ومحلل وموهوب..
خطيه امه كوة جروها منه..

سوينا العزا و٣ ايام هلكنا ..
منا ناس هواي منا حزن...
خلصت وكفو الناس..
صارت وحشة وكآبه..
اني لميت ملابسي وحضرت نفسي ..
اروح لاهلي حتى الزم عدة يمهم..
كلتلي ام فهد ابقي يمنا ..
وابقي فوك حتى اكلج اني اجيبه الج..
كتلها مترهم شباب يتقيدون بيه..

خابرت امي كتلها خل يجي علي احد ياخذني..
كالت شكلج يا يمه..
ابقي هناك احسن!!!!
كتلها ليش يمه ابقى هنا..
كالت مازن كال لتجي هنا..
تلزم عده يم عيالها احسن..
كتلها هو كيف مازن بله!!
كالت اي حجه وي ابوج واخوانج..
وكالو تبقى هناك تضمن ورث زوجها احسن....

يعني تشمروني يم الناس ع مود ورث؟؟
بعدين امهم وابوهم عايشين ياورث؟؟
هسه شكلهم!
اهلي ميقبلون اجيهم بقوني يمكم...
اهلي خايفين تبوكون ورث ولدي!!
كالت ام ولدهم اكيد يردوج يمهم..
صفنت شحجي بعد ..
اذا بايعيني ومتفقين عليه..
واني بشدة..
بدل ميساندوني..
ميخفوون عليه..
واني مكسوره جنح وعندي ثنين ايتام..

ختمته وياها وكعدت حطيت راسي بي رجليه..
ضليت ابجي ابجي بلا توقف..
احس الدمعه تطلع من كلبي..
شسوي هسه وين اولي..
وشلون تطلع من حلكي وانطقها..
اكلهم ابقى يمكم..

رجعت خابرت سارة..
كتلها فهميني شسوي ..
شلون اكلهم اهلي ميخلوني اروحلهم..
استحي احجي..
كالت سارة هسه احاجي امي واشوف حل..
كعدت جنطتي يمي ولابسه عباتي ..
والولد اخذتهم ام فهد تشبع منهم شوي..
شوي واندك الباب..

زينة..منوو..
صقر..اني زينة..
_فتحت الباب ووكفت ورا..
تفضل صقر ماكدر اطلع اعذرني..
_لا لتطلعين ماحاجه ..
عندي كلمتين جاي احجيها واروح..
_تفضل اسمعك..
_زينه..من الاخير طلعه من البيت ماكو..
وولدج ولدنا ومن ريحه اخوي الشهيد..
مانكدر نبعد عنهم ..
خليهم نشم بيهم ريحته ..
ترى الوالد والوالدة منهارين..
وجودكم كلش يقوينا كلنا...
_صقر ميصير لاز...
_قاطعني..زينه هذا مو ترجي ..
هذا امر متطلعين من البيت فاهمة..
واني خابرت اهلج وترخصت منهم وقبلو..
يلا اني اترخص ام صقر..

للحكايه منحى جديد....