نقيب قلبي الفصل الثامن والعشرون 28 - بقلم شقراء

الجزء الثامن والعشرين
#نقيب_قلبي

انصدمت من تصرفاته!!باوعت الولد نايمين..
واني تعبانه..لفيت راسي ونمت..
ماطولت نومتي يمكن عشرين ثانيه..
يعني مرات الانسان من يغالط نفسه..
يكول اني كاعد..
بس هو نايم..
خلال هاللحظات..
شفت مره طويله كلش..
بحيث رفعت راسي اباوعلها وطولها ممخلص..
اجتلي تتقدم واني ابتعد خايفه منها..
بس بالحلم كلش جميله..
تقدمت عليه فتحت ايدي..
باوعت لايدي خضر كأنو بيهم حشيش وكباااااار..
طشت بيدي سبع اهلة..
تناثرن ع الخضار ويضون واحد مكابل اللاخ..
كلتلي هاي حصتج سدي ايدج حيل..
لتنطيهم لاحد...
اجت ايات دفعتني ووكع هلال..

وي وكعته فزيت مرعووبه..
تعوذت واستغفرت..
كمت اباوع لاطفالي خايفه..
كعد ضرغام وصقر نايم..
اخذته وطلعت بالصالة كعدت ..
لان يريد يلعب واخو نايم..
ضليت يمه شوي تعب نام بحضني رجعت للغرفه..نمت..

صقر ..من يوم الحادث واني ندمان ع معاملتي لشاهين...
وهو ميحاجيني ومقهور مني..
كلت افهمه وهم انصحه..
خصوصا من كلتلي زينة..
وشلون شاك هي تخونه..
وكملها مقدام من رايح مهددها ..
وقتها من كالتلي اخذت مقدام بالسيارة..
ورزلته رزاله ناشفه..
صح هو اكبر مني..
بس يحترمني..

فهمته الموضوع وضل يتعذر..
وكتله الزم مرتك ترى طوختها وي زينة..
هذا كله بسبب الموضوع القديم..
ترى زينة مو السبب بالصار..
ضب ايات لا اني اعرف شغلي وياها...

هالفترة بعد ماتركت حلى ضليت مالي خلك ..
حتى سهراتي قلت ..
كلت اسافر فترة استجم..
ومنها شاهين يفكر من يشوفني بعيد..

كلت لشاهين اريد احاجيك..
وكلت للوالد يكون موجود..
لان اذا حاجيته وحدنا حيكول زينه توصلي كلام..
ويزيد شكه بيها..
اجتمعنا وكلت للوالد كلشي..

ابو فهد..شوف شاهين مرتك بنية بنت اصل ..
ومتربية رغم الشافته منك..
لو وحده غيرها جان راوتك شي مشايفه..
شلون يصير تطعن بشرفها..
وانت اجيتلي وكتلي يابه ظلمتهم ثنينهم..
من عرفت جان صقر رايدها..

من تجي تكلها ذوله مو ولدي ماخجلت..
مافكرت تصير من ورا كلمتك عشاير ودم..
اذا انت ماشي بالحرام ومحلله لنفسك..
ترى مو كلها مثلك..
اذا انعاد هالموضوع..
صدكني اطلك زينة منك واشتريلها بيت لوحدها واكعدها..
وطز بيك وبأهلها..

صقر..شاهين انت اخوي..
مو اني افرط بخوي بسبب مرة..
الي صار ماضي..
من يوم صارت مرتك عديتها اختي..
وهي بت الناس شاهد الله عينها مترفعها بعيني..
بس انت السويته والحجيته جبير..
هي لو تريد تحجي يصير دم للركب..

شاهين..صقر اني اعرف..انت مستحيل تخوني..
وزينة وفية وشريفه ..
بس اني مدري شبيه صدكوني..
اني مااكره زينه..
بس احس نفسي بدوامه جبيره..

صقر..عوف كلشي وارجع لعائلتك..
عندك اولاد مثل الكمر..
وابدي من جديد..

شاهين ..يصير خير..

صقر ..شفت شاهين لان شوي..
جنا متجمعين وكتلهم اني طالع لأذربيجان بعد يومين..
وصدك سافرت..

زينة..سالتني ام فهد شلونه شاهين وياي..
كتله رجع كما كان..

ام فهد..زينة ورا الغدا تحضري عدنا طلعه..
_وين يمه..
_تحضري ومعليج..

صدك خلصنا غدا..
تحضرت وجهزت الولد ..
وامي انطت خبر لشاهين وقبل..
اخذنا لواء لبيت بمنطقة مرتبة..
اني قليله خبره بالمناطق واسمائها لان عد اهلي محبوسه..
وهنا معتقلة !!
فتنا سلمت امي ع مرة اسمها علوية بركات..
كعدنا شويه..
كلتلها علوية جايين للسيد بشغلة..
صدك شوي وفات رجال اربعيني..
وجهه عجيب..من شفته فتحت عيني..
لحية كثيفه شقرا..
وعيون سود واسعة ورمش اسود وبياض ناصع..
وهيبة ووقار..
فات سلم وكعد..

ام فهد..سيد اليوم جبتلك مرت شاهين..
وسالفتهم غريبه كلت محد يحلها غيرك..

_شرفتيني ام فهد هلا بيج وقت..
بس مانطاني خبر ابو فهد شعجب..

_اني ماكتله ينطيك..
حجتله ام فهد كلشي..
ومشاكلنا..
_بابا رفعي راسج باعيلي..
اني استحيت بالاول..
بعدين باوعتله..
كال ركزي وي كلمة اكولها..
وجاوبيني عدل..

_زوجج من اول ليلة جان مامشتهي قربج؟؟
لو من رجعتو..
_لا من البداية..بس تقربلي..
ضل يسال واجاوبه..

الا ان كال ..هو مو الابالج..
التردي واحد ثاني!!!!
هنا تفشلت شجاوب وام فهد كاعده؟؟؟
باوعتله..افتهم..

كال انت من جنتي عد اهلج مسحورة..
والساحرتج من البيت..
وسحرج مال تفرقة..
وهسه انت وزوجج مسحورين..
وهم قريبه منكم..
دوري غرفتج شبر شبر..
اصلا مسويلكم عداوة وموت!!!!
اني بطني ضلت توجعني من الخبر..
باد حيلي كله..

حاولت ام فهد وياه..
يحجي الاسماء..
كلها ماعرف بس اعتقد يعرف !!وسكت..
كال طلعي رح تلكي..
واقري علي..وانطاني طلاسم وبخور وحرمل..
كال طلعي باقرب وكت..
لان هذا بي موت وتدمير..

ام فهد كلتله هسه نرجع نكلب البيت..
ترخصنا وطلعنا..
اني مصدومه..
هنا ايات تكرهني واتوقعها..
بس ببيتنا منو!!!!

اخذنا لواء اني ساكته..
ام فهد ضلت تسب بايات..
كالت ماكو غيرها هالغبره..
كال لواء شبي ابو جهل شمسوي..
كلتله ام فهد ع الكلام..
كتلها بس هي متصعد فوك قليل..

كال فهد تتذكرين بيوم الوكعت من الدرج..
مو جانت فوك ومن شفناها ارتبكت ووكعت!!!
كتله صدك عفيه..
واني شفتها يم بابنا هم بالليل..

رجعنا ودخلت عليها ام فهد للغرفه..
ولج ايااااات ..ولج ع مود اختج الساقطة تهدمين حياة ابنييييي؟؟؟؟

للحكايه بقيه......