نقيب قلبي الفصل التاسع والعشرون 29 - بقلم شقراء

الجزء التاسع والعشرين
#نقيب_قلبي

ايات..شنووو يمه شتكولين ..
معقولة اني اضر شاهين ..اخوي..
ضلت تحلف وتبجي ..
تالا شافتها اجت لام فهد..
لتأذين ماما بيبي انت حبابة..

اجو الولد ع الصوت..
واستغربو شنو الموضوع..
كلتلهم ام فهد موضوع يخص النسوان..
الزلم تطلع منه..
من نحتاجكم عود تدخلوا..

سكتت ام فهد كلتلها حسابج بعدين..
اجت جيان كلتلها ام فهد..
جانت حامل بشهرها..
كلتلها اني ادور وياكم..

صعدنا للغرفه..
ودورناها كلها حتى الجنط الي بستور الجرباية..
فتحناها وحده وحده..
التحفيات ..حتى التيبلامب كلبته جيان ودورت..
هلكنا ..
همزين الجهال يم جدهم وعمامهم..

الحمام هم دورنا صح مابي اماكن هواي. للضم..
بس دورنا فتحنا الكومدي مال المغسلة وفرغناه..
اني كتلهم بعد ماكدر خل نستراح..

كعدو يمي ام فهد كعدت ع التكية ..
وجيان خطية تمددت ع الجرباية..
واني كعدت بالارض وخليت ايدي ع راسي..
اجه ابالي موضوع مال اخت ايات!!
سالت ام فهد..

_يمه اخت ايات شنو دخلها؟؟
وليش ايات هلكد تكرهني..
_لتخلين ابالج زينة..
موضوع قديم ماله معنى..
وسكتت..

باوعت لجيان انخطف لونها من حجيت ...
ضلت لتباوع لحلك ام فهد شراح تحجي..

كلت الخبر يم جيان..
لازم احقق واشوف ..

كمنا كملنا تفتيش كلشي مالكينا...
نزلو واني سبحت ذبيت تعبي..
جابو عشا من برا وتعشينا ..
كعدنا نسولف..
الى ان كل واحد راح لغرفته..
صقر يتصل عليهم ويدزلهم صور..

ماتحملت بعد لازم اعرف..
كلت لواء..اي لواء يفيدني بهالموضوع..
صعدتله دكيت الباب طلع..
طبعا شاهين كالعاده برا..

كتله لواء مو تكول اني اختك الماجابتها امك..
اذا صدك عزيزه عليك..
احجيلي شبيها اخت ايات..
اذا كذبت عليه وعرفت من غيرك..
انسى خوتنا وانسى كلشي..

لواء..زينة انت اخيتي..
بس اخاف من ردة فعلج ..
لهذا ماريد تعرفين..

_احجي اذا تريدني ارتاح..
تعرف ماكو شي يستاهل بعد..

_شوفي زينه اول متزوجت ايات مقدام..
قبل اربع سنوات..
جانت اختها تجينا هواي..
هي مخلصه اعداديه ومطلكة..
شافها شاهين خفيفه..
وايات رادت تورطه بيها..
صارت بينهم علاقة..
بس محد جان يعرف ابدد بس اني ..
جنت سادس وعطلة ..
شفتهم بغرفه ايات الصبح ..
هي جانت بايته عدنا..

جاي ادور نسكافيه بالمطبخ الجوا..
اخذتها اريد اصعد فوك..
سمعت صوت بغرفه مقدام..
تخبلت ..عبالي ايات لان مقدام مو هنا شكيت بيها..
ضليت اتصنت الصوت مستمر..
شسوي افوت لو شلون ..
اخير شي رحت جبت السلاح..
كلت افتح الباب..
لو لكيت وياها واحد اكتلهم ثنينهم..
طفرت بسرعه جبته ونزلت..

فتحت الباب ..
شفت شاهين وميادة اخت ايات..
بلا ملابس وبفراش مقدام!!!!!

للحكاية بقية...