نقيب قلبي الفصل الثاني وثلاثون 32 - بقلم شقراء

الحزء الثاني والثلاثون
#نقيب_قلبي

راحو الولد واتصلو علينا طمنونا...
مرء اليوم بهدوء وملل..
طلعتهم من البيت وحشة..
بيومها نمنا من وكت..
ثاني يوم جنا نسوي غدا ..
وكالت ايات..
هي حامل..

باركنالها وكالت حتتصل بزوجها..
اتصلت مغلق..
رجعت حاولت كنالها يجوز ماكو تغطيه..
لحد المغرب وهي تخابر ماكو..
خابرو ع البقية محد يدك..
ضلينا مخروعين للنص الليل واحنا ندك..
حصلناهم الحمدلله..
طمنونا كالو ماكو تغطية..
كالو باجر حيرجعون..

حضرنالهم الاكل والحلويات ..
وكلشي يحبوه..
خطيه ام فهد ممصدكة شوكت يوصلون..
صار العصر هم ماكو..
اتصلنا اجهزتهم مغلقة..
مقدام وميض صقر شاهين..
كلهم ماكو..
للمغرب وهم ماكو..
انكلب البيت..
كل واحد يسوي اتصالاته من جهة...
مر وقت واحنا هذا اليدعي وهذا اليسبح..

فزينا ع صوت ابو فهد عاط شنووووو!!!!
ركضنا عليه وكع ولازم صدره..
جبتله ماي وغسلت وجهه ..
ويفركون بيه..
وام فهد تكله فهمني شكوو..
وكلنا دايرين عليه..
كوة نطق ..
كال الولد متصوبين..
عزااا... عيطنا كلنا..
وكع الرجال اغمى عليه..
اخذه فهد للمستشفى ..
وكال للواء ابقى بالبيت..
خابر لواء وجابنا الخبر..

برجعتهم متعرضيلهم ومتصوبين..
بس وميض اصابته مو قوية..
وصقر بجتفه..
ومقدام وشاهين حالتهم خطره..
وحده كابلت الثانيه ونبجي..
والجهال مجلبين بينا ويبحون..
جيان ضلت محتاره بينا..
وتبجي ويانا مرة..
وتصبر بينا مرة..
تدمرت اعصابنا..

ام فهد خابرت ع ضياء..
اجه اخذها لابو فهد..
عنده بدايه ذبحه صايره..
وتلاحكوه خطيه..

ضلينا محتارين ونبجي..
لنص الليل كالو جابوهم للبصرة..
راحو الولد الهم..
كالت جيان حتصل واشوف ونطمن..
خابرت فهد ..
فهمنا مقدام اصابته بصدره..
وميسطرين ع وضعه..
وصقر اصابته بجتفه ..
بس مو خطرة..
وشاهين اصابته ببطنه..
ووضعه كلش حرج بالعناية المشددة
ووميض اصابه طفيفه..

ضلينا طول الليل نبجي وندعي..
اجت ام صقر متهسترة..
تدك وتلطم تصيح بيتي انهجم..
شبكتها حاولت اهدئها ..
شبكت الجهال وتبجي..
تكلي زينه ادعيلهم ..
انت فقيره وكلبج نظيف..
ومظلومه ادعيلهم يمه ادعيلهم

انت احس راسي ثكل من البجي..
كوة مفتحه عيوني..
مهما يكون شاهين قاسي والسواه وياي..
بس يبقى ابو ولدي..
وهم بعده شاب ومبتعد ع ربه..
لو صقر الي مشاف من حياته شي..
ومقدام عنده عائله خطيه..
تمنيتها ازمة وتعدي..
الجهال نامو نيمتهم جوا..
وضليت كاعده وايدي ع خدي..
طلع الصبح لكيت نفسي غافيه واني كاعده..

وميض طلعو مابي شي..
وصقر معالجين جتفه وزين ..
بس مقدام وشاهين بعدهم..
اجه صقر وشافنا هيج حاول يسكنا..
وخصوصا امه متدمرة..
لزمته ضلت تعاتبه..
ليش يمه ماتعبت ماربيت..
انتم رفعه راسي..
طمنها وحاول يهديها..

مرت كم يوم وتحسن مقدام ..
راحو شافو بالمستشفى ويحجي الحمدلله..
وصقر هم تحسن وضعه..
وراها طلعو مقدام والبيت انخبص..
الاهل والناس كلها موجوده..
انقسمو نص عدنا ..
ونص يروح ويجي للمستشفى..
بس شاهين وضعه ميطمن..
امه متدمره عليه..
الاصابه بمعدته..
ووضعيته متأزمة..
ورا يوم كعد وكالو تحسن..
فرحنا كلش ورحنا واخذت الجهال اشوفه..

بسته من راسه وكتله كوم بسرعه محتاجيك كلنا..
حاجاني كال حبيبي مشتاقلج..
اول مرة اسمع هالكلمة..
كتله حتى اني اشتاقيت لخبالاتك..
ارجع كافي ترى ميلوكلك تصير ضعيف..
ضل يضحك..كال انتظري اطلع الا اشوفج الضعيف منو..
قربتله الجهال وبوسهم..
بس خطيه وضعه حرج وصوندات..
بوسته من راسه وباس ايدي وودعنا..
رجعنا اني وامه للبيت ..
للمغرب جاي اصلي بغرفتي..
وسمعت عياط رج البيت ..
اريد رجليه تشيلني ماكو..
كوة مشيت للدرج اباوع ..
ام فهد واكعه وتملخ بنفسها..
وجيان وايات وبناتهم يعيطون ولطم..
نزلت بلا وعي نص الدرج..
وتدحرجت للارض..

للحكايه بقيه...