نقيب قلبي الفصل الثلاثون 30 - بقلم شقراء

الجزء الثلاثون
#نقيب_قلبي

شفتهم سوا سديت الباب بسرعة..
رجعت للمطبخ محتار..
صعد الدم براسي..
هذا شلون هيج يسوي..
وبفراش اخوه...
وهاي الساقطة شلون تسلمه نفسها!!!!

صعدت رجعت السلاح ودخلت لغرفه شاهين انتظره..
ورا نص ساعه صعد..
تلازمت ويا ورزلته..
كتله انت شلون تدنالها وبغرفه اخوك..

شاهين..هههه لك بابا هي ساقطه شبيك..

_اي والساقطه تجيبها بغرفه اخوك؟؟
_ماجبتها هي صاحتلي..
واختها تدري..
خليها اكضي بيها وقت لتصير معقد براسي..
لك هاي مطلكة وملتهبة..
خليني افيدها واستفاد...

مرت فترة هو وياها وهي تبات يم اختها..
لان مقدام جان خفر..
اني عبالي بس اني ادري..
بس بعد هو ابو البيت ضابط عميد..
وولده ضباط ..شتتوقعين تفوتهم الشغلة!!

طلعو يدرون ومحاجين شاهين..
بس ميتوب..
الا ان لزمه الحجي وتعارك وياه وهد عليه بالمسدس..
كله اذا ماقطعت علاقتك بيها ..
اكتلك واخلص منك...

ضل شاهين يلتقي بيها برا البيت..
وبيوم اجت ايات وكلت لامي..
اختها حامل من شاهين..
لزمتها امي خزتها..
امي صح حنونه وطيبة..
بس شخصيتها قويه..
اني بهذا عمري اذا عاطت اختض..
كلتلها خل تجي اريدها..

اجت ميادة ومسويه روحها مظلومة..
لزمتها الوالده محاضرة..
سولفتنا جيان لان بس وحدهن كعدن..
كلتلها ملاعيبج انت واختج حافظتها..
مو عبالج تلوين ايدنا بطفل..
اعرف كلش زين انت مو حامل..
شاهين مو غبي حتى يسوي هالشي..
ومو شاهين الي ينضحك عليه..
واني لزمتج ونصحتج..
كتلج خاله عوفي ..
ميفيدج لعوبجي..
ودخلتج بيتي واكلتي من ماعوني..
وتالي الكاج وي ابني بفراش واحد..
جنت اكدر افضحج بس اخاف ربي..
والعرض غالي..
هذا بدل متعوفي ..
ضليتو تلتقون من ورانا..
يطبج موت..
اذا حامل فهذا ابن حرام..
روحي ذبي وخلصي..
لان ابن الحرام اول ما يأذي امه..
واذا مو حامل روحي شوفي دربج..
بالنسبه لشاهين لتتوقعين ياخذج..
هذا شايف الروسيه والهنديه..
يجي ع وحده مثلج..
رخصت روحها وذبت نفسها عليه..

من وقتها راحت بعد انسدت السالفه..
ومقدام كتل ابو جهل كتله..
خلاها تسقط طفلها..
هددها اذا انعاد الموضوع يطلكها..

_هذا كله وشاهين شنو موقفهم تجاهه؟؟
_شاهين ورا مصارت الشغله ..
طرده الوالد من البيت..
ضل شهرين ميحاجي شكد حاول..
لحد ماجاب واسطات وزلم..
يلا تصالحو..

والظاهر من تزوجتو هي رادت تحرك قلبه..
وسوت هالشي..
رغم هي اختها تزوجت بالناصرية ..
من اهل امها..

زينة..بعد الي سمعته..
ضليت ماعرف افكر..
يعني هذا شاهين شنو؟؟؟
ممخلي خطيئة تعتب عليه...
يعني شلون الله يحاسبه تالي..
جان ودي انفصل منه..
لان هيج بشر حرام يتعاشر..
واني مامسوية ذنب..
حتى هيج اتعاقب...
ذنبي الوحيد حبيت صقر..
يمكن هالشي عقاب ع حبه..
ويمكن لان ماعترضت من باسني..
ربي عاقبني بشخص ..
بايس الكرة الارضية نصها..

رحت لغرفتي بين تفكيري وقهري نمت..
يوم ثاني ام فهد كلت لمقدام..
ع السحر..كلتله السيد كال..
استغربت كلهم يعرفو..
طلع معرفه قديمه بين العوائل..
السيد جان مسجون ..
قبل السقوط ع تهمة دينيه..
ومساعده ابو فهد ومطلعه..
من وقتها هم علاقات..

كتل مقدام ايات وانكلب البيت..
وهي ناكرة ومتعترف..
اخذها ذبها عد اهلها ..
كلها من تريد تحجين يلا ترجعين..
تحلفت بيه وطلعت..
كلتلي مترتاحين ام الرجوله ..

جو البيت مشحون وضوجه..
بالليل جيان صار عدها ولادة..
اخذوها للفجر اني كاعده ولواء هم خطيه..
ومقدام وي فهد وامه بالمستشفى..
خابرو كالو جابت الحمدلله..
صار عدها ولد سمته محمد..
رجعت الفرحه شوي للبيت..

ورا يومين كال شاهين حيروح وي جماعته..
يودون مساعدات للحشد..
مثل كل مرة ياخذون امدادات الهم..
ودعنا كلنا وطلع..

للحكايه بقيه....