رواية نوارس مهاجره الفصل الأربعون 40 - بقلم zeanab_almusawi

#السلام عليكم

اليوم خميس ..، واكيد تحبوون تعرفون احداث اكثر عن النوارس
فاليوم انشر بارتين  .. للعيونكم الغوالي
😘😘😘😘😘😘😘😘
#نوارس_مهاجره36
#زينب-الموسوي

الجزء الثاني

طلال
وصلت ل غرفتي على الباخره ...
ومع  بنت  اسمها الن. .
والثانيه كيت
دخلنا  فتحت الاضويه  الن ... وبعدها.. كيت جلست على سريري

الن  انطتني رقم المكتب الي يعملون بيه .. اتصلت بيه
واخذوا  رقم الكردت

بهذي اللحظه حسيت نفسي رخيص ..
وهنه يتجردن من ثيابهن
الي تقريبا. مالها وجود  وممغطيه الا ربع اجسادهن ...
وكفت  واني داير  ظهري الهن
وجهي ... امام المرايه ... واراقب تصرفاتهن ..، وحده منهن طلعت قوطية بيره  ... وشربتها
التصرف هذا  ... ربطته  ب كلارا
وضحكاتهن  ذكرتني بضحكات جنود  ... وحراس السجن
واتمعنت بيهن اكثر ... وهنه يضحكن ... وياخذن مكانهن على السرير  ... وينادني .. شفت كانما الغرفه مزدحمه جنود ... ومجندات. ..

مااگدرت احس بشي غير الاشمئزاز ..  انداريت عليهن
صوتي يادوب يطلع

: اسف ... اني متزوج واحب زوجتي
تفاجان اثنينهن ..، واكيد لازم يحاولن  ويايه  حتى اتراجع عن قراري
مجرد اقتربت كيت  ..وضعت ايدها عليه ... اتصورت كل القذاره الي بالدنيا  لمستني
دفعتها  .. من خشية تتحول الليله عنف... وتحقيق
قررت اترك الغرفه

: اني راح اترك الغرفه .. عشر دقايق
تاخذن الملابس .. وتطلعن

وبسرعه ... وبلا مشاكل

انهزمت .. فتحت الباب ..وگفت خلفه ... اتنفس گوه ... وانتي ابالي .. الحب عندي انتي
بنت خجوله ... نظيفه ... تخصني اليه وبس ... غصن  اخضر  ميعرف موسم القطف  الا على ايدي
هذا صورة  الحميميه عندي
اتشوهت صح .. وحاولت اجرب
واتاكد من نفسي ... بس حتى التجربه مهانت عليه ويه غيرج

طلعوا البنات ..
ونمت گعدت الصبح ... اخذت التلفون حتى استرجع المبلغ الي دفعته لشركتهن بالكردت  كارد ... الرقم مازال موجود
اتصلت مره بقيت على الانتظار
تذكرت .. باقي ايام على العده  گطعت الاتصال  واتصلت بملاك
وبعدها
رديت اتصلت بيهم ... طلعت البنت طلبت الايميل .. لان الامر
موبيدها
انطيتها. الايميل .. وجتي رساله عليه
مكتوب ( المبلغ لايسترجع حتى لو الغيت الخدمه )
اتصلت بيهم.. اسب واغلط ..
گطعوا الاتصال .. رديت اتصلت وطلبت المسوول  عنهم.. واكد نفس الشي ميرجع المبلغ
اقتنعت وسديت التلفون .. بالليل اتصلوا همه.. ان يحبون يعوضوني  بعد الرحله
رفضت ... اتصلو  مره لاخ
نفس العرض
سديته ... وبعدين اتصلت حتى يحذفون اسمي من قائمة المتصلين
هذا الي صار ايه  حجيته الج
والايميل موجود ... مكتوب الغاء الخدمه تعالي اقريه

طول مااني احجي وياها هيه مدنگه وتبجي
: احجي شنو يدور ابالج  تتصورين خنتج

:الخيانه  مو شرط  تكمل وياهن .. الخيانه فكرت  تجرب وياهن ... فضلتهن عليه ... فكرت بنفسك ومافكرت بيه

تحسرت وهيه  تحاول تطلع من الغرفه
ركضت لزمتها  من ضهرها وبقيت لازمها
: ايه  متتصورين صعوبه الي اني بيه ...  ردت اجرب ويه بنات ماعدهن خجل.. وميهمني الفشل وياهن  .، لان خايف افشل وياج .. خايف ابدي واتحول مغتصب  ..وعنيف وحيوان .. ايه
تعبت اكثر منج ..، والله
ايه مثل ماانتي تريدين تكونين ويايه باجمل صوره .. اني اريد اكون وياج رجال  كامل مينقصني شي  ... گوليلي شاسوي

: اتركني طلال .. التعقيد زاد عن حده ..، واحلامي واحلامك سافرت بمركب وسط بحر وغرگت ..، ارحم نفسك وارحمني ..،
انت متعرف شتريد .. واني بعد انهد كلشي بيه من كرامتي... ل انوثتي.. لعمري الراح

ضميتها حيل اقوى مابيه

: ايه اموت  اذا تركتيني  ترضين اموت

بچت   ... بگد قهرها..  ودمارها
الي اول مره احس بيه اني ...
وظلت بين اديه  .. خلصت دموعها  ... وماخلصت حسرتها

: كافي ايه  ... كافي تقهرين نفسج .. گتلج  مصار شي من الي ابالج 
ماردت وحاولت تفلت من ايدي
مااگدرت

: عوفني اريد انام

فتحت اديه  ...  ... دخلت افراشها ...
مگدرت اتركها  بقيت يمها 
: نامي واني يمج لحد اطمئن عليج

: اطلع واطمئن  مراح اموت باقيه لعذابك  وعذاب دنياي

ايه

جبانه.  واستاهل الي يسويه بيه
شعندي باقيه وياه ...
باقيه لان منتظره يتعطف عليه
ويتزوجني ... الي فضل يجرب ويه ساقطات لگاهن بسفينه
ومافكر ينصفني  ... ويساويني
ويه بقية خلق الله  المتزوجات

خانگني الحجي ... ومااگدرت حتى اعاتبه .. خايفه اجرحه ... خايفه  اذله وهو يحاول يصالحني
كرهت نفسي الي تحبه  ..

بقى ويايه واني احاول انام
مانمت  اني ..هوه  الي غفى على صدري غصبن عليه
دموعي نزلت على شعره
مااگدر اصدكه  ..ولا اگدر  اتركه
اريد انهض  لكرامتي.. وعزة نفسي .. وحبه  بگلبي مانعني

اذا اني مهاين عليه اتحرك ليفز
وينحرم النوم   ... كيف اگدر اكرهه

تحركت حتى يكعد ...
اول شي سواه باوعني اخاف ابجي

: ايه صدگتيني .. لو. لا

: مو مهم صدگت او  لا
المهم  مجان هذا المرجي منك
وخليها بالك مراح انساها الك

: مامعقوله. تظلين زعلانه عليه
انتي گلبج حنون. وادري بيج تحبيني

: متشوف  ليش مستغلني. لان تدري  احبك  بس هالمره  لا
راح  اخيب  ضنك  بيه

تركته بالسرير  .. وطلعت. من يمه
لحكني  ...  يتوسل

: ايه تسافرين ويايه .. اهلي ينتظرون ..، لاتفشليني اذا تحبيني 

: هسه مااگدر افكر     باي شي
فدوه  اتركني

تركني وغير ملابسه.. وقبل ليطلع
خلى بطاقتين  السفر
على الميز  يمي.  وباوعني

: ( هذي بطاقتي وبطاقتج ... اذا متروحين .. اني مااروح .. وانتي تدرين امي شگد مشتاقتلي .. يعني  خطيتنا  اثنينا  برگبتج ... اذا متروحين  شگيهم للبطاقات )
ظل ينتظر. اشگهم ... مديت ايدي ... اخذت البطاقات ..، باوعته  .. عيونه تتوسل
اخذتهم. .. رجعتهم اله
: خليهم عندك ..، انت  خاف اضيعهم

تحرك بكل لهفه على الكرسي اليمي گعد وهو  يبوس  راسي وايدي  ويگلي
: مااعرف  اني  المحظوظ  بيج .. لو انتي الحظج سيء

: طلال  رايحه وياك  لان اخاف الله.  مااريد  احرم امك منك  وهيه تحسب يوم  يوم

: اعرف حبيبتي. .. وشايل موقفج على راسي  ... وراح اسوي المستحيل حتى تسامحيني

طلع من البيت  ...

طلال
رجعت للدكتور ... اشوف حل للنوم العندي

بالعياده ناقشت الدكتور عن العلاج 

طلال : دكتور  مامعقوله  هذا العلاج  الوحيد  الي  موجود طيب  الناس  الي  تعمل وتستخدمه  كيف  تتحمل النعاس
اذا  اني  حتى  السياقه  اخاف اغفى  ورا  الاستيرن

: اني  انطيتك  اقوى  علاج  حتى اختصر  مدة  العلاج
خشية  يتطور  المرض  او تتعرض لضرب بالراس وصعب نعالج

: دكتور اني تركت المصارعه  وحاليا بلا عمل. مراح اتعرض ل اصابه
لكن هالعلاج سلبني حياتي صار تلث ايام بس نايم  وفاقد الشعور. انام ساعات طويله

: اوكي اغيرلك العلاج
بنسبه اقل

: يعني هم منوم

: اقل من العلاج الاول

: والتدخل الجراحي  اگدر اترك العلاج  لحد ارجع من السفر واعمل عمليه

: لا  متگدر.
اتحمل العلاج  شويه  وقاوم النعاس  بالمنبهات  فنجان قهوه مع  قطعة  شوكلاته
او امشي  لمسافه   مارس الرياضه  من تحس النعاس لا تلجا للسرير  ابحث عن نشاط يجدد الطاقه بجسمك

كلام الاطباء  اكثره  غير قابل للتطبيق ..
تركت  العياده ...
مريت بالطريق على اسواق ..اشتريت كم حاجه للسفر... واخذت گهوه وشوكلاته.. وظليت امشي بالاسواق... بلا مااگعد
افكر شراح اسوي ..اذا رجعت للبيت

الصبح كانت واصله حد الانفجار من الغضب.
اعتذر منها  ولمن نوصل ل اهلي اكيد مراح تبقى زعلانه

لمحت. مكتب عقاري ...
فكرت  ايه امنيتها  تعيش ابيت واسع .. مثل  بيوت العراق
ليش لا  اشتريلها بيت .. تستاهل

طبگت  سيارتي  ونزلت ..
سالت عن وكيل عراقي لان يعرف بيوت العراق كيف تكون
جاوبني ولد اسمه مهدي

: عندي بيت  بناء حديث واسع
اربع  غرف  نوم. والشركه قبل شهر خلصت بناءه ... بس سعره شويه غالي

: يعني شگد

: ٣٠٠ الف  دولار

: والسعر المطلوب كاش لو عن طريق بنك

: اذا كردت قوي عندك البنك يسلفك اكيد

: اوكي ممكن اشوفه
فتح اللاب وفرجني كم صوره عنه
عجبني  لكن راي ايه  مهم هذي امنيتها
: اخي اروح للبيت  واجيب زوجتي .. حتى اشوفه على الواقع بلا صور
: انتظركم  ياريت متتاخرون

رجعت للبيت اتصورت هيه بالدوام
تفاجات موجوده...  تحضر الجنط ...والاير فون باذانها وتحجي مع صديقتها ...عن تصاميم

اشرتلها  بايدي  هلووو
اندارت  للجهة الثانيه..  واصلت مكالمتها

ومن كملت المكالمه انشغلت بالمطبخ
: ايوته  .. شفت بيت النا  ... والوكيل منتظر  حتى انتي تشوفيه

بلا متباوعني  ردت

: خليه  هسه  البيت ممحتاجيه هذا  البيت  فارغ

: لاحبيبتي  لازم بيت يكون النا
وناثثه .. وغرفة  نوم  واسعه  وحلوه

تركت  الخضروات الي بايدها على السنك  واندارت عليه
وجاوبت

: طلال  احنا نفكر بالبيت ... واحنا منعرف وين راح نصفى
طلال احنا ممتزوجين ..، وبعد الي عرفته  اليوم مااظن  نتزوج ابد
لاتضيع فلوسك

حجيها ثارني وهيه توحيلي تريد تتركني

: شنو قصدج  ماافتهمت

حجت وهيه ترجف

: قصدي  من ليلة البارحه  مااگدر اتصور  اگدر اتحمل اكثر

ضربت الكرسي  برجلي
خافت  وانزوت  يم الباب الي يودي  للحديقه

: اسمعيني ايه  حجيتلج الصار وكافي  تلحين  اعصابي متتحمل

: كافي مثل متريد  بس گلي ليش تقبلت الامريكيات واني رافضني
تتذكر البارحه طلال  ترى اني مو حجر  ..، بين اديك  وكلي رايدك وتگلي نعست .. منو الي تتحمل الي دتسويه  بيه .. تبوسني وتكوم تدور هوى  بحجة اختنكت ... راح اموت والله
اتصور ودي اعاتب وخايفه على شعورك ... خايفه متتحمل عتابي وتتركني ..، واني جربت افراگ وماحملته
اريد اقسم باغلى  مابالكون ان خلص اكتفيت منك ... وماعندي اغلى منك  اقسم بيه
قسم بيك واسمعه ... ابد  مراح احاول اخطي خطوه  تقربني منك

نزلت دموع عتابها. حروفه   رصاص .. موتني واني واگف على رجليه

سكتت  لان اذا اگلها مريض مراح تصدك وتعتبره مجرد عذر

أيست من اجابتي  ورجعت للطبخ
واني
دخلت حضرت جنطتي اني هم
وخليت العلاج.
واجهت نفسي ... واجهت طلال
شنو الي باقي  تسوويه  ايه
حتى  احس على نفسي
(وك صير رجال ... وامحي  حوادث قدر انفرض  عليك
وانعم بحبها
لا والله  مو حب هذا .. الي انطتنياه  اكبر  ... انطتك زهرة عمرها وسنينها ... )

اتركها  تهدا .. وترتاح ...
وتزوجها. عناد بكل مانع وكل حاجز ..
حتى لو اموت ... شلي بعمر
اكون بيه  مصدر. اه ل ايه

طلعت يمها  ...

ادور على اي نشاط حتى ماانعس  ..وبنفس الوقت 
الگه فرصه تسامحني
رحت فتحت  التلفزيون عالي
وهيه سدت باب المطبخ
ليش سدته حتى متشوفني اكيد

فتحت الباب وسالتها

: تحبين اساعدج

بعيون تعبانه من الدمع والسهر باوعتني وبصوت يوحي بالجزع ردت

: لا   روح ارتاح انت

: خلي اساعدج  اني هم ماعندي شي اسويه

ماردت عليه

داحجي وياج ممكن تردين

: اي شي تسوويه  مراح يغير اي شي بينا تدري ليش

: ليش بالله

لان اني الي مالي رغبه بيك بعد
و اي موضوع عندك سده. ماما وملاك وزوجها جايين عدنا ديودعونا  ولازم نمثل دور الازواج السعداء

طلعت من جيوبي وصفة الادويه
حتى تشوفها
: باعي حتى تصدگين اني مريض ومحتاج عمليه

:   مشافى ان شاء الله
من رخصتك اروح ابدل قبل اهلي يوصلون

ايه
ليكون مريض من صدك
يمه اسم الله 
احاول اخذ اسماء الادويه وابحث عنها بالكوگل حتى اعرف شنو مرضه
ميفيد ويه گلبي 
طلعت  هو بالحديقه ديشتغل بيها 
فتحت الشباك  وحاولت اخفف لهجتي وياه... يجوز  مريض .. حرام عليه اقهره

: طلال  الجماعه. جايبين  من المزرعه  اكل  وياهم
اخاف  ميعجبك  تحب اسويلك شي معين

: كلشي من ايدج يعجبني

: اوكي  راح اسوي  كفته تركيه

: هاي شطلعت. حتى الاكل صار تركي مو كافي المسلسلات

سديت الشباك  لان اعرف اذا احجي وياه ..، راح اساله عن مرضه

انتبهت الادويه على الميز
صورتهم بالتلفون ورجعتها لمكانها

وصلوا اهلي ..وانخبص البيت
حسن  بدا يمشي  ويوكع
ماما حيل متاذيه وحابسه همها بگلبها  وسالتني  مرتين  ( مالگيت حل  لنوارس ) وجاوبتها  لا
وسالتني عن اخبار الوصيه 
الي  انشغلت  ابحث  عنها  من يوم  وصول  طلال ... وجاوبتها  ( ان شاء الله الگاها )

استغليت فرصه انشغالهم بالحديث. وتقديم الوصايا بالسفر

ودخلت ابحث بالكوكل خليت اسم العلاج
الاول طلع. يوسع الاورده ..
والثاني.. يزيد نسبه الدم ...
والابر  الرمين للحساسيه

ماافتهمت  شنو بيه.. يمكن فقر دم ...وحساسيه
بقيت  افكر بالموضوع
وحتى من يحجون ويايه بالي مشغول  انزوينا اني وملاك بالمطبخ

؛ هم راح تمرين على اعمامنا

: لا ماامر عليهم.

؛ وبيتنا القديم

: اكيد اروح اشوفه واصوره من برى

كعدت  هيه على الكرسي وتحسرت

: ماادري  جيتنا  لهنا  ربح لو خساره

گعدت يمها سالتها( ليش مهمومه ؟)

: ماما الليل كله  تبجي  وتدعي واني
حاسه  بالذنب  راح يخنكني

؛ ملاك  الموت  مكتوب علينا كلنا.. وهيه تمرضت من العراق ..
احنا  غلطنا  بتعاملنا  وياها طفله  كانت  منعزله  عن العالم وفجاءه  حياة  واختلاط  ورجال يگلها  باباتي
وصار الي صار 
هسه  تعذيب  نفسنا  مراح يرجعها

: على  الاقل  نرجع  بنتها. وج مرات صوتها  باذاني  يعاتبني
هسه اكيد كبرت وتمشي

: بعد  ماارجع  من  العراق   اخذ طلال  ونسافر  لكليفورنيا  ل اهله  ونشوف. شيصير

: ياريت. والله. لحي على طلال خلي يساعدج
ياريت اگدر اسافر. بس اني حامل

: ههههه صدوك  شبيج ولج  ممصدكه   متزوجه ابنج بعده زغير

: غير  واثق  يريد  ولد  يشتغلون بالمزرعه 

: ان شاء الله  حبيبتي تجيبن سبع ولد  الله  يسعدج  ويهنيج

: وانتي وطلال  شصار بينكم

:  ملاك اني كلش تعبت  .. وحاسه دخلت نفسي بمعركه اني مو گدها ... اريده : يحس بيه وبنفس الوقت  ماريد  اذل نفسي اله ... فدوه گوليلي شاسووي

: شوفي تصرفي عادي وياه يعني لاتبينين انتي متضايقه
لحد هو يبادر  من نفسه .. ترى الضغط يولد. نفور

: اگلج الصراحه ... بداخلي مااعندي بعد  رغبه اله
تعودت على وضعي وياه

لحظه اسد الباب  واسولفلج على  ليلة  البارحه
وهمين شوفي هذي الادويه شنو تستخدم

استمر الحديث بينا  بضحكه ودمعه  واه ... لكن ماعرفت شنو العلاج وليش ياخذه
كملنا  الغدى  ..وقدمناه

طول  الگعده  طلال  يتثاوب وملاك  تباوعني. كل ميتثاوب
وهو  انتبه  وبرر

: اعتذر منكم  داتثاوب بس لان البارحه سهرت

جاوبه واثق الي ملابسه تلطخت اكل من حسن

؛ اخذ  راحتك روح نام. انت وراك سفر

: لا  منعسان
وبعد الغدى اطلع للجم 

: اوكي نروح سويه ان شاء الله

اندار طلال على ماما وحجى وياها

: حجيه بس ارجع من العراق. اسافر. ل اهل رعد  ومااجي اذا مااعرف عنوانه

فرحت ماما بالحجي ودعتله

؛ الله يحميك  وترجع بالسلامه ويرزقك بولد ونسميه ايوب

: ان شاء الله ربنا يسمع منج

طلال
خلص  النهار...وصار  الليل
اني  واثق  تابعنا  مباراه  كرة قدم  بالتلفزيون  وحجالي عن اهله   وانطاني  اغراض  اوصلها ل  اقربائه  بالشمال

وجلسنا كلنا نشرب جاي بس اني ردت گهوه  واستمرت السهره  وبلا مااشرب  ادويه

وقت النوم  توزعنا بالغرف  
اني نزلت بالبيسمنت
ايه نزلت بعدي وياها حسن
تلعبه وتشاقيه 

: حسن ميشبه ابوه ولا امه

: يشبه  بابا  الله يرحمه
باوع زين

دققت بوجهه
: صحيح  في  شبه

: وبابا   كان  يحب  اسم حسن مااعرف  ليش

: وامج تحب اسم ايوب لذلك سمتني ابو ايوب
ان شاء الله  يصير عدنا ايوب

ماعلقت 

اخذت  حسن  للحمام وطلعت باين على وجهها الدمع

خلت  افراشها  بعيد عني واخذت حسن بحضنها وطفت الضوى
مااعتقد نامت 
لكن طفت الضوى حتى تبجي بلا مااشوفها 
اجيت يمها

؛ اعرف  منايمه  ودتبجين
مااعرف ليش كل منقترب  من بعض تنتهي الليله بمأساه

: طلال الله يخليك عوفني والله تعبت  خليني انام بلا متضيف لجروحي جروح

: خلينا نحاول 

: مااريد  بداخلي ماتت كل رغبه الك 
ومن هسه اكلك ابد بعد لاتقترب مني  لان اني هسه مااريدك انتظرتك لحد اكتفيت

: حقج صار دوري هسه اني انتظر  لحد تصالحين
مراح اعوفج. راح احاول ليليه اصالحج لحد ترضين .. بس لا تزيدين الدلال  تعرفيني  اعصابي. من تطبگ

: لاتعب نفسك ليلة البارحه
الهوان الي شفته احتاج الف سنه وماانساه

كامت وشالت حسن وبعد مرجعت

استسلمت للنوم الي كنت اقاومه طول النهار

وعيت على اصوات وقع الرجلين
بالطابق الاول

صعدت صبحت عليهم كلهم
ملاك  تحاول تقنع ايه تنزع الاسود وهيه متقبل. واستنجدت ملاك بيه حتى اقنعها 

: خليها بقناعتها  وهسه من نوصل امي مستحيل تخليها لابسه اسود

كعدنا نتريك الريوك كله من منتجات المزرعه  الي ميزت طعم منتجاتها عن الاكل الي تعودنه عليه

وبعد الريوگ
توداعنا  سلمت على الحجيه

: نشوفكم بخير حجيه. الله وياج

: ديروا بالكم على نفسكم مابيه حيل بعد مصايب

: اسم الله محروسين بالله والنبي طلال دير بالك على ايه

:  لاتوصيني ام حسن ايوته  بعيني. صار
واثق طلب الدعاء

: لاتنسونا بالدعاء من تزورون 

. ان شاء الله
وايه لقت اخر التعليمات

: ملاك اقفلي البيت من نطلع 
والبريد وصيت ام كوثر تاخذه يوميه واذا شي مهم تتصل بيج

: اوكي.  روحي ولاتفكرين
وتونسي  ونتصل يوميه
صعدنا الجنط
طلعنا بسيارتي.

: بطاقات السفر عندي  والجوازات عندج

: عندي  يله توكل بالله

: ياالله.

طلعت التلفون تريد تشغله

: اويلي على هالتلفون الي ميفارگج

: المتعه الوحيده بحياتي. بشنو مضايقك

: هسه  نوصل للعراق وتلتهين بالناس والطلعات

:  شايله هم للسوال الي راح يتكرر الف مره

: اعرف عن الاطفال

: انت لو گايلي عن السفره قبل شهريين تلاثه كان دبرت امري  وتبنيت طفل

: تتبنين طفل شنو.
شتقصدين

: اقصد حتى تكمل الصوره متزوجين وعدنا طفل

: كافي ايه  لاتعصبيني اسكتي احسن

: اني ساكته انت الي كل شويه التلفون والتلفون.

: شراح يخلص هالورطه

: اي والله ورطه

قطعنا الحديث اثنينا وحتى من وصلنا للمطار.
هيه بحالها واني بحالي
كعدت تنتظر  على الكرسي
واني رحت جبت گهوه وشكولاته

: تشربين گهوه 
اخذت الكوب مني
گعدت يمها  وانتبهت على المسلسل الي تتفرجه بدون ترجمه

: تعرفين تركي انتي

: اي اعرف خمس سنوات بتركيا  تعلمت بيها  اللغه والطبخ التركي

: طول عمرج شاطره ايوته

ايه

الوضع بينا صار مثل جيشين متقابلين ..
الحديث تحول... لهجوم.. ودفاع ..وهدنه
ومع نفسي قررت ابقى بوضع الهدنه  مااريد اهله يحسوون بشي
اخاف على شعوره 
  لازم  اكون امامهم زوجه سعيده
وچنه متفانيه

بالطائره
اخذت مكان قريب من النافذه
حتى اتفرج على الارض وهيه تتضأل...  وتصغر...
الكثير من الناس هذا المنظر يولد عدهم شعور بالحزن ..
اني اشوف هالمنظر دليل امل ..
ان الاشياء مهما كبرت  لابد. بيوم تتلاشى.. وتروح ..حتى الهموم
كراسي الطائره ابد مو مريحه
والمسافه للرجلين قليله خاصة لطلال

: هذا المزعج  بالطائره ... المقاعد  صغيره والمسافه معدومه

: فعلا اني مااگدر امدد رجليه  الله يساعدك انت

:اكولج مدام الرحله طويله خلينا نسولف بمستقبلنا. شويه

: شتقصد  زواجنا

: لا  زواجنا غير قابل للنقاش
باقيين سوا  للموت  .. انتي زعلانه  اتحمل كم يوم  ونتصالح
ونتزوج

: لعد شتقصد بمستقبلنا

:  قصد عملي بالمستقبل شنو افكر بمشروع سيارات تصدير للعراق
ميصير ابقى بلا شغل

رديت باختصار ... واني اباوع على اجنحة الطائره  وهيه تقلع

: براحتك

تعصب عليه

: مو  داتناقش وياج. شبيج دايره وجهج  ... ملازم لاتحجين

سكتت واني سكت ... وكل شويه مندار عليه

: هسه تحجين لولا  اريد رائيج 

: احجي داسمعك

: شنو  رائيج بشغلة السيارات

: السيارات  شغله  متعبه وقوانين الكمرك بالعراق وامريكا كل يوم تتغير

: لعد بشنو اشغل فلوسي

: المبلغ الي عندك كبير  يجيبلك  محطة  بانزين. بمكان محترم  وامين  وتخلي بيها عاملين   وانت تستلم الوارد

: خوش فكره  والباقي

: المبلغ الباقي اشتري بيتين صغار  بديترويت  البيت  تحصله بتلاثين  الف
واجرها على ( سكشن ايت )
( يعني الحكومه تستاجرها للناس المحتاجه )
وتخلص من دوخة  انت فقط تستلم  الايجار  شهريا من البنك
يبقى  الوارد  الي راح  يجيك تستثمره  بالعراق. محد  ضامن القرارات  بامريكا
:
:افكر  افتح  نادي  رياضي  ادرب مواهب رياضيه  على اللعب واجيب  مدربين  كرة  قدم  وسله

: حلو  هم الشباب العرب يكيفون افضل مباقين يشربون ارگيله  ويدورن  مساعدات.

سولفنا  بمواضيع عديده .. وهو يتجنب  يثير  زعلي .. واني نفس الشي
مااريد اهله يحسوون بفتور بينا

الرحله طويله.. وبالليل صارت بارده  وزعت  المضيفات بطانيات  وطفوا الاضويه  حتى انام

رفع الحاجز بين مقاعدنا
وميل جسمه عليه لان مكانه ممكفيه
:ممكن انام على ايدج
المكان صغير
فتح اديه  بلا موافقتي  وغطاني وياه  بالبطانيه
ونام
عبرنا المحيط  ودخلنا  اوربا
ومنها نزلنا ساعه ترانزيت
بمطار  هيثرو  بلندن

كنت تعبانه.. ومنايمه..  وجوعانه.. اكل الطائره عباره عن اشياء غريبه.. موضوعه بعلب بلاستك
تثير التقزز.. اكثر ما تثير الشهيه

: طلال جوعانه فدوه لعينك مااگدر اصعد لطياره ثانيه اذا مااكل

: مابقى وقت ايه بين منوصل البوابه يراد ساعه

المطار كبير. وبوابه عن الثانيه بعيده... وازدحام المسافرين ..
بحيث نركض.. الى ان وصلنا
وكفنا بالباب.. لحد يفتحون البوابه للطائره
شاف محل بيه نساتل ..
راح ركض جاب كل انواع النساتل
لمن  گعدت  بالطائره كل شويه افتح  وحده  واكل ..
الرحله  من  اوربا  للعراق  ست ساعات  طيران  واجراءات  مطار بغداد  اكثر  من  ساعه يله  خلصت
من التعب   مااگدر امشي. .. ودي  انزع  الحذاء  وامشي حافي
اما  طلال  فيثاوب  بوجه الكل

استقبلنا اخوه... وزوج اخته 

وتحول وصولنا... الى دموع وفرح .. وهتاب
مو  فقط  بالمطار..  ابيت  اهله
والدته و   والده.. كانوا واصلين قبل يوم من العمره .. والبيت مليان خطار
وناس رايحه.. جايه..  وصلنا العصر
اكثر  موقف  اثر  بيه  امه حاضنها ..وهيه ماسكه بيه باثنين  اديها ..
وكل شويه تباوعه.. وترجع تحضنه وتساله

؛ ليش  حرمتني  شوفتك
وابوه  حاضنه  واخواته  يبجن

بقيت  واگفه  بالهول لان الكل يسلم  ويحضن  بطلال
لحد  انتبه  ابوه

: ها بنيتي نسيناج  فوتي  بنتي

: شلونك عمو   عمره مقبوله

اندار ت  امه  واجتي عليه
بوستني ..  وحضنتني
واخذتني  للغرفه  مالتها
هيه.. والبنات

: ارتاحي اهنا  البيت كله  رياجيل اخاف طلال  ميقبل  يشوفوج

: صار خاله اني هم تعبانه

جتي وفاء  تبوسني  وهيه تحجيلي  عن  غرفتي

: هسه  بس طلال  يسلم على الموجودين. اصعدوا لغرفتكم
الحجيه ماخلت احد يدخلها كل هاي السنين
والبارحه  نظفناها  وبخرناها الكم

: متقصرون. تسلمولي

تذكرت الجوع

:عفيه وفاء  اني كلش جوعانه 

، هسه ثواني اجيبلج الغدا

طلعوا  وتركوني  لان عدهم  ناس
وجابوا  الاكل   مابقيت  شي بالصينيه  مااكلته
وخرت الصينيه على الميز

و نمت بفراش الحجيه

لحد وقت العشى كعدتني ام طلال

: اگعدي يمه تعشي واصعدي لغرفتج 
ودي  ازفكم الها مثل  ماتمنيت
قبل  كم  سنه

: حجيه. الزفه  خلصت  وراحت.

طلعت  وياها  للمطبخ  نتعشى
وهيه تمشي وتكمش بيه وتگلي
(متغيره ايوته )

: والله خالتي افراك اختي هد حيلنا كلنا

: الله يرحمها يايمه طفله  بريئه هسه بجنات الخلد وانتم تاذوها بحزنكم هذا

: صحيح حجيج خالتي

گعدت  وياهم  على السفره
وهمه  يجيبون اكل ويخلون گدامي .. واني هم ماقصرت بالاكل

وسالت على طلال گالوا  نايم بغرفته

:  شوفي رجلج خاين صعد قبلج. واحنا  نريد  اثنينكم تصعدون  ونشوف  شنو شعوركم

: بصراحه اكثر  مكان  بالعراق اتمنى اشوفه هو  هذي الغرفه
صح ماعشت  بيها
لكن تگطع  گلبي من دخلتها بيوم  عزاه  اسم الله عليه

: اي والله يمه تگطعت گلوبنا. تركت البيت كله اخاف اشوف غرفة عرسه  واقتل  نفسي

: الحمد لله على كل حال

بعد العشى
ساعدت اخواته وبناتهم بالمطبخ
واحسب الدقايق حتى اصعد اشوف الغرفه  واستعيد  ذكرياتي بيها  ..جذبت  انتباهي وحده  من بنات عمه... اسمها  رفقه،،  تقريبا  بعمري او اصغر  ..
وتشبه اخواته..  بالبياض والعيون الملونه
كل  مااندار  الگاها   تتفحصني
ومااتذكر  سلمت  عليه  ..ولاحجت ويايه

خلص الشغل... والناس طشت ..
وناس نامت  .. سالت وفاء عنها

؛ اگلج  هذي  البنيه  الي اسمها رفقه  اشو  بس تباوعني وحتى مسلمت

: خطيه هذي بنت عمي  تهجروا من ديالى  باحداث داعش
والدي سكنها  بهذا البيت وياهم لان هيه مالها  احد  تزوجت مرتين  وتطلگت. وعمي مات وهيه ظلت بين الاخوان .. وامي هم محتاجه  احد يداريها ويداري ابويه

: خطيه  بعدها  شابه  وحلوه

: لو تشوفيها  قبل كم سنه جانت  تجنن  هسه  القهر  غيرها

: اي عفيه  هو  القهر  شيخلي بينا
من  هاي  ساكته  ومتحجي  وبس تباوع

ضحكت وگالت

: تباوعج  لان  من كانت  زغيره والدي  رادها  لطلال  وبصراحه هيه  كانت  تريده

؛ اممممم  هذا  الحجي
وليش  طلال  مااخذها

: لان رادج  الج
وهيه  كانت  رغبة  والدي  طلال كان  صغير

حلو  مفاجاءه  ممتوقعه.. اني ناقصه خطيبته السابقه بالبيت .. واحلى مني بالف مره ...وراح تبقى تباوعني شهر كامل

: وفاء حبيبتي اني نعست اروح انام

:داخذي  هذي الفواكه  اخاف يكعد طلال جوعان

: تسلمين  يله تصبحين على خير
صعدت  الدرج ..
اباوع على الباب الغرفه
لحد وصلت ..فتحت الباب. طلال نايم ظلمه
فتحت الضوى..  وكفت اتامل كلشي بيها

صور تخرجنا... التحف.. الورد نفسه ..الستاير .. الفرشه
كلشي مثل ماهوه .. شي واحد متغير  گلوبنا  .. تغيرت وملتها الجروح
فتحت  الكنتور. جزء من ملابسي بعدها .. وملابسه..  وقاط المهر  ..
اهنا  بعد مگدرت ..غير ابجي واني المس الماضي ..الي ضاع مني
وماعشته مثل ماحلمت

باوعت على طلال نايم  ..وايده على عيونه

مليت  عيني  منه.. حضنته نظراتي ..بدل اديه
بگد ماتمنيته..
بگد ماحلمت بيه... و بگد ما بعدني عنه ...احبه
يمكن خنوع ... يمكن رضوخ ..
مومهم  شنو ... المهم  اكون وياه ...

خفت ليگعد  ..

فتحت  الجنطه... بهدوء وغيرت ملابسي.. وطفيت  الضوى
ودخلت  الفراش  خلسه
رجعت  بذاكرتي ل اسعد  وقت بعمري  يوم  الي شفت  الغرفه بعد  المهر
وكعدنا  اني  وياه اهنا
ياربي كان  يحبني.. شغيره
وكفت كبال عيني  الذكريات
منها  الي بچاني  ومنها  الي ضحكني
اخر  المطاف  انداريت  على طلال  يادوب  اشوفه  من الظلام
جالت  براسي  امنيه  انام  على وساده  وحده  وياه
امنيه  صار قربه ..
طردت امنياتي  ال غير قابله للتحقق
ونمت ..
استعداد  ليوم جديد اكون فيه چنه للمره  الاولى  بحياتي

طلال

گعدت الصبح  ايه  ماموجوده بالغرفه

اكيد نزلت  غسلت بالحمام الفوك الي يكون بالطابق الفوك يتوسط  غرف  اخواني القديمه  ..بدلت  ..ونزلت
على الدرج سمعت احاديث. تدور  بالمطبخ.  بين النسوان
وردت  استمع ل احاديثهن كلهن يحققن  مع  ايه  عن الاطفال وهيه  متعرف تجاوب.  وكلهن يحاولن  يوهمنها   ان الصوج بيها .. ويتناقلن  بطولاتهن في انجاب  الاطفال ... وبقدرتهن الخارقه  في الحمل من اول ليله
وايه  مترد غير  بكلمة ( الله كريم )
دخلت  للمطبخ
تفرق  الاجتماع  وبقت بس ايه وامي

: صباح الخير
ردت امي وهيه
(صباح النور )

اخذت  مكاني على الميز
وهيه  دتحضر الريوگ

: هايمه ان شاء الله  ارتاحيتوا بغرفتكم البارحه

: اني نمت وماحسيت بالدنيا حتى ايه مااعرف شوكت اجتي

: بحدود الساعه ١٢  اجيت

: يمه  اليوم  خلي  ايه  تطبخ وشوفي  طبخها. مستحيل ضايكه مثله
( محاوله ارفع معنوياتها. بعد التحقيق الي مرت بيه )

: يمه ايه بعدها خطار خلي ترتاح
والعصر اخذها للدكتوره

: ليش شبيها مريضه

. يمه هذي الدكتوره كل بناتنا عدها  وكلهن  راجعنها وحبلن واني  سالت  ايه گالت ممراجعه

جاوبتها  ايه برتباك

. حجيه اليوم  مااگدر  شويه تعبانه  من السفر

: يمه  خليها  ورا  الله   هو  رزق ترى  مو بيد الدكتوره

: اكيد رزق  بس  يمه ترى انتم اثنينكم  كبرتوا  ويراد الكم  طفل 
صح يمه ايه  بيه  حجي شي غلط

: لا مابيه غلط
بس اجليها اليوم  وهم الناس بعدها تجي تسلم

انسد  الموضوع بطلعان الروح

دخلت  بنت عمي  رفقه المكيب الي خالته  عبالك  عروس
وسلمت عليه  وكفت  حتى اسلم عليها
ولاحظت تجاهلت  وجود ايه وشاركتني  الاكل بنفس الماعون
وايه تراقب سكته. اعرفها تغار  من ايام  الكليه

: شلونج  رفقه  مشفتج  البارحه

: واني مشفتك  اشو انت  بس نايم
وضحكت بلا سبب

: اي  والله صدك  متتصورين شگد  تعبان  الرحله  متعبه

دخل طفل بعمر السنتين يگلها ماما  خلته بجانبها حتى توكله

:هذا  ابنج  الله  يخليه

: بلي ابني  سلوان

: شنو هالاسم  هذا

: سلوان يعني نسلى بس مننسى

: احجيلي شنو القصه ليش تطلگتي

: يووو  من الصبح  تريد تضوجني .. الاول تزوجته..  امه واخواته شدن ويايه  .. اشتغل من  الصبح  لليل  ومعاجب ..
اخواته  كل وحده  بگد  الثور گاعدات  واني  امسح  واكنس
گتله  طلعني  ابيت  ..امه لعبت لعب  لحد  طلگني
والثاني  اخذني  على مرته الي مخلفه  ثمانيه  ومراد اطفال حبلت  بسلوان  طلگني
اوووف
واصلت حديثها
: احجيلي انت عن وضعك بامريكا  مبين عليك مرتاح

: الحمد لله  مرتاحين

: وشلون التقيتو انت ومرتك اهناك

: قصه طويله  خلي ايه تحجيلج
اترخص اني  الحجي من البارحه مسولفت وياه

طلعت من المطبخ. قبل ل ايه تنفجر  دورت على الحجي بالحديقه وكعدنا نسولف

بعدها فكرت اروح اشوف كليتي واخذ ايه  معاي
رحت  عليها  كانت  تتشاقى مع سلوان  ابن  رفقه

: ايوته  ترحين  ويايه  للكليه  وبلكي  ندخل وناخذ صور جوى عادل والولد وصوني

: صار هسه ابدل

: اني هم جاي وياج  ابدل

طلعت من المطبخ  بسرعه وعلى الدرج  اسرع
وصلت للغرفه قبلي. فتحت الباب  وراها  گاعده  على السرير مغمضه  عيونها.. وتتنفس  بقوه

: خيرج ايه.

: ماكو  شي  دايخه من الطائره
واسناني تاذيني

: تحبين ترتاحين ونطلع باجر

: لا اريد اطلع 

: اوكي لعد نطلع ونشوف دكتور بالطريق

: ليش مگتلي رفقه كانت خطيبتك. وماعرفت عايشه عدكم لحد وصلنا

: خطيبتي شنو. يمعوده هذا حجي طفوله   وماعرفت هيه اهنا لحد البارحه لان اتصالي بيهم قليل

: لعد شنو  سبب هالزياره

:  رحله  شفاء اليه تبدي من هذي الغرفه
اهنا  حلمت بيج   واخذتج بحضني
وعدتج  نكمل الي بديناه  تلك الليله
وبعدي  على وعدي 

: ومثل كل مره  راح  تاخذني بين اديك   وبعدها  تفز  ياما تريد  تتقيء  او تختنگ  او ضغطك يصعد
اكتفيت من وعودك

ماتعودت العصبيه منها او ماتقبلتها

كامت  اخذت  ملابسها  للحمام تبدل
كلامها  استفزني.
غيرت ملابسي
وطلعت انتظرتها  بسيارة  والدي
وبفترة الانتظار  افكر  بطريقه ترجعها اليه  باحساسها 
صعدت السياره  ومگالت غير جملة

ايه ؛ رفقه. توصيك  تسوق على كيفك. ومنتاخر . اخاف تقلق لان بغداد مو امان

: هههههه صدك گالت هيج

: الي قاهرني البارحه ابد محجت وياي وسلمت وبس تباوع  عبالك دتاخذ قياساتي
ومن  شافتك اليوم الصبح. راسا سوالف واسئله

: لاتقهرين نفسج وخلينا  نعيش اجواء الكليه

: وليش انقهر   تعودت  على خيبات الامل

كلامها  ويايه اما جارح او  مقتضب

وراح تطگ من الغيره من رفقه

ايه
تجولت  بنظري على شوارع بغداد
ماكو تغيير. هو نفس  الطابع
وبغداد حلوه  بكل  حالاتها. الشوارع ازدحام  وفي  قلق عند الناس  من  داعش
وغيرها من المشاكل الي تزيد وتبقى  بلا حل

وصلنا على الكليه وگفنا بالباب

: كنت انتظرج اهنا

: وكنت اشوفك من بين كل الطلاب  حتى من بعيد

: احلى سنين عمري

:وسفه  انتهت وراحت

: ماانتهت بقينا سوا 

حبست  كلمات  ..لو طلعت صعب ترجع
كلمات تكول بقينا سوا لكن خسرنا  اللهفه والشوگ.
خسرت  اكون  وياك صاحبة كرامه..  واشوف بعينك صوره حبيبه.. وزوجه
بدل صورة...حبيبه بالماضي ..
وزوجه بالاسم

افترينا بالكليه واخذنا صور فتح لايف مع اصدقائه
بعدها طلعنا بسيارته
نفتر  ومنعرف وين رايحين

: ابالج مكان معين نروحله

: اي وخايفه اروح   يتصورلي بابا  بعده  بالشارع  مدد والدم مغطيه

.لعد منروح افضل.

: لا لازم اروح

وصلت امام بيتنا. القديم
انهد حيلي بمجرد شفت مغيرين  صبغ الواجهه
تذكرت بابا  وجيته العصريه محمل اكياس 
واحنا  نتلگاه   ويحضنا  ويلمنا بكلمة ( نوارس )
اهنا لعبنا... اهنا ماما  وگفت تودعنا... واحنا  نروح  للمدارس

ردت انزل ادگ الباب طلال منعني
: ميصير  ايه الناس  منعرفهم
اكتفيت  بتصويره 
وارسلت الصوره لملاك

: طلال اخذني منا قبل ل اموت

تحركت سيارته .. وتوجهت للمقبره
وصلت لقبر بابا سلمت وقريت قران ..، وماتجرات اكوله روان ماتت

طلال
وتلث  ايام الاولى هيه تشغل نفسها  بدور الجنه وتطبخ اصناف تركيه  حتى تشغلهم عن الاسئله وعن الحاح امي بالروحه للدكتوره
وبالليل تجي هلكانه وحزينه
تنام  يمي  ورافض اي محاوله مني ... واني. صاير  اعصاب من الصداع  لان تارك الادويه .. ومااريد اغصبها لان اعرف بحالتي  محتاج  مساعدتها
وممتاكد  شراح يصير ..

: ايه وتالي وياج  ... رفضج شنو  معناه  ... اذا  دلال عادي اتحمل
بس اخاف قصدج تذليني

: لا اريد اتدلل ولا اريد اذلك
خايفه من  رفض جديد
تحملني  كم يوم  .. الله يخليك

تحجي وهيه  لازمه سنها

: بعده سنج يوجعج

هزت راسها( اي )

: اي صار سنتين تتهربين  من قلعه  ومتحمله الاذيه
اخذج باجر  العصر للدكتور

اتفقت. وياها  اخذها  للدكتور

  نزلت الصبح ..مشفت ايه سالت امي (وين ايه )؟

: وفاء اليوم  عازمتنا غدى ابيتها ورادت ايه تعلمها على الاكله الي سوتها  البارحه

: وليش مگالتلي قبل لتطلع

: استاذنت  من الحجي  وطلعت
مرتك  تعرف بالاصول. والله يمه خوش  بنيه  وحبابه  بس  ناقصه الخلفه

: يمه  اتركي  هذا  الموضوع يجوز  اني  السبب  مااخلف

: اسم الله عليك اوليدي

:  اگلج  يمه  شوكت  نروح لبيت وفاء  

:بعد الصلاه الظهر 

واني  متمدد  بالهول اجتي رفقه

: طلال فدوه  لعينك  تاخذني
لدائره. الجنسيه    اريد افتح  سجل بالنفوس 

: مااندل  الدائره

: اني اندلها  عفيه  بلكي من يشوفون رجال ويايه  يمشوني

: اوكي نروح  بس ابدل

ايه

اجتي  خالتي  الحجيه  والحجي الظهر  لبيت  وفاء
وطلال  مو وياهم
معقوله  بالبيت  يبقى لوحده ويه رفقه

: حجيه طلال وين ؟

: من الصبح اخذ رفقه لدائره  الجنسيه 
ولحد الان مرجعوا.
ليش مااتصل بيج

: لا مااتصل
ماارتاحيت للموضوع وفاء حست عليه

؛ هاي رفقه ملكت غير طلال تاخذه . هو يندل ... يعرف بالدوائر. ..يمه المفروض متخليه يروح
ورفقه اني الها.  هو جاي يرتاح ويتونس  لو يفرفر برفقه

: والله  يايمه  مادري  بيها من طلبت منه لحد راد يطلع خبرني

وبدت دوامة الغيره تاكلني
وتعصف بيه 

صبينا  الاكل  بالصاله.. وفاء بيتها  كبير  وقريب  من اهلها
واطفالها  خمسه. وحماها وزوجته  واطفاله  تلاثه موجودين

وهمه  من نوع  يكعدون كلهم سوا  للاكل

گاعدين  كلنا على سفره.
بالي  مو يمهم  ..والم سني ذبحني
اندكت الجرس ساعه ٢  وعشر دقايق
وصل طلال شايل سلوان على جتفه.
ورفقه  لابسه صايه سوده مجسمه.. مابيها سنتمتر زايد
والحمره. حمره ..
والشال رافعته..  والعطر. انتشر اكثر  من ريحة  الاكل
الكل ظل يباوعهم ويباوعني
بانتظار اندلاع الحرب الاهليه
دنكت ...وهو يگلها

: هاج ابنج. موتني شايله من الصبح

: انت  ماصدگت  شفت  طفل
ومابقيت شي مااشتريته اله
وحتى  تغدينا بمطعم
شنو من مكان حلو ... شنو من اكل  مينوصف

امه واخته نحرجوا. من الصار
ومع ذلك گعد ياكل بس هيه لا ظلت
تفتر گبالنا.

وفاء  ظلت تسولف وياهم تريد تفتهم  شنو هالتصرف

:  مجان اتصلتوا گلتوا نتاخر  وراح نتغدى برى

هيه ردت

: لا خلصنا من الدائره  من وكت  بس طلال حب يونس سلوان ويشتريله  حتى سلوان ظل يصيحله بابا

رفعت عيني عليه.. ملتهي ياكل
وهيه مبتسمه وتباوعني ..
ورجل وفاء واخوه مستغربين جراءتها... وتجاهلي من طلال

ترخصت  من فشلتي
:  من رخصتكم.
سني حيل مااذيني  ومااگدر اكل
اگوم اسوي الجاي