رواية نوارس مهاجره الفصل الرابع والثلاثون 34 - بقلم zeanab_almusawi

#نوارس_مهاجره32
#زينب_الموسوي
الجزء الثاني

———————————

ملاك

بعد القاء القبض على رعد

اصابنا الارتباك .. ومنعرف شنسووي .. الجوارين تروح. وتجي علينا .. تسال ليش القوا القبض عليه

اصرت روان تروح للمركز ورفضنا اني وايه تروح
لكونها مريضه .. ومراح تتحمل تشوفه بالحبس
لحد
ماما اخذت موقف مغاير لمواقفنا .. وهيه تطلب اتصل بواثق

اتصلي بواثق... ونشوف محامي
يمه روان لاتخافين اني اشهد وياه تزوجج برضاي وموافقتي

وصاحت بيه ( اتصلي برجلج )

: واثق شعليه. اتدخليه

( خفت اتصل يتصور خايفه. على رعد )

: لعد منو يوگف ويانا مو هوه نسيبنا وصديقه لرعد

: فدوه ملاك اتصلي بيه لخاطري

اتصلت بعد الحاح ماما.. وبچي روان

وگلي جاي عليكم

وظلينا ننتظر. وهنه اكل گلبي
وينه ... وين صار

: انتظروا شويه يجوز مشغول بالدجاج.. والكلب يطمئن عليهم
ايه رادت تتصل بيه مره ثانيه
لكن ماما ماقبلت. وسالتها على رجلها

: وانتي رجلج وين صار شهر مسأل عليج ... شبيج .. متحجين مره تجين عينج مضروبه ... مره ايدج شبيج انتي ورجلج

: اهووووو راح يفتحن تحقيق
اگلج روان تعالي اني اخذج للمركز ونفهم شديصير. الظاهر مكتوب علينا نعيش طول عمرنا وحده

اخذت روان وطلعت وماما حولت التحقيق ويايه عن ايه. وطلال

: والله ماما. مااعرف. وايه ابد متحجي شي

: يعني اكو شي وضامته علينا

: الظاهر ممتفاهمين على المصارعه ويفكرون ينفصلون

: ويمكن. يضربها. اشو عندي احساس يضربها

: ماما هسه خلينا بمصيبة رعد يله نروح نلحگهن افضل

دخلت ماما تبدل دگ تلفوني واثق

: وين صرت تلث ساعات ننتظر

واثق : بين مالگيت محامي يجي ويايه تدرين هسه المكاتب عزلت ... والمحاميه متجاوب على التلفون
افتحي الباب اني برا

فتحت اله. الباب .. وهو يتحاشى ينظرلي
حتى من گتله تفضل بقى واگف قريب من الباب

ناديت. ماما

: ماما واثق وصل تروحين ويانا لو تضليين

: جايه وياكم

.....

اتجمعنا كلنا بالمركز...
وعرفنا التهمه الموجهه اله
من زوجته بام
بتعدد زوجات ... واغتصاب قاصر

سمحولنا نشوف رعد.. لكون عنده اصدقاء شرطه
من جابوا رعد كان عيونه بالارض ...ميباوعنا وروان اول مشافته. انهارات بالدموع خاف عليها. انطاها ايده وگعدها يمه
وسلم على واثق وحجى لواثق
عن منو الي مخبر عنه

: الصدمه الاولى الي مخبر عليه اخويه فاضل
: لاحول ولاقوة الا بالله شلون عرفت

: الشرطه اصدقائي وخبروني المتصل كان من كليفورنيا ويحجي بلكنه عربيه وصوته يشبه صوتي لكن الرقم مستخدمه يختلف

سأله المحامي عن التهمه

: شنو التهم الي وجهوها الك
: تعدد زوجات واغتصاب قاصر

وروان مسكتت خاصة من سمعت كلمة اغتصاب

؛ اغتصاب شنو. منو گال اغتصاب احنا تزوجنا. وبموافقة ماما وفي صور عرس تثبت

: بيبي مافي ورقه رسميه تثبت هالزواج

: ومافي شي يثبت الاغتصاب. منو گال انت كنت ويايه

هالحجي استفزني

: والطفل لعد من منو ؟

المحامي وضح شغله مهمه

:زوجتك بام مو من حقها ترفع قضية. اغتصاب. هذا حق اهل روان. اوحق المدعي العام
لكن بام حبت تنبه المدعي العام عليك
واعتقد زوجتك روان وجهة نظرها صحيحه ممكن تنكر اي علاقه بيك وفي حالة طلبوا الفحص ترفض هيه ومو من حقهم يجبروها

: في ادله ثانيه وجودنا اثنينا بيروت.. تركها الدراسه
وغيرها من الادله

: يعني تريد تنكر الحمل من عندك ماما دتسمعين

جاوبني. المحامي. ابرود

: مجرد اجراء شكلي حتى يطلع

تركت الكرسي وگمت

: وعساه لا طلع لك انت ماعندك غيره الناس شتكول مرتك. منين حامل موكافي خطفتها

وايه ساندتني وگفت نفس وگفتي

: رعد كافي تفكر بنفسك وبس هسه اشهد ضدك خطفتها وحامل منك وعقد الشيخ ميعترفون بيه

بجت روان وهيه تلزم ايد ماما وابد رعد. وجهت كلامها. النا اني وايه

: حرام عليكم يعني بنتي تنولد امها ميته وابوها بالسجن

: لج ياابوها اذا هو ناكرها اصلا ياخذوها يذبوها بملجيء

وماما ايضا مقبلت على حجي المحامي

: اي يمه هذي سمعه شنو ينكر هذا مو حل.
: طيب اجلسوا خلينا نتفاهم

: اي حل تفكرون بيه مرفوض اذا نكر الطفل منه

بقينا اني وايه واكفين وروان تبجي
والمحامي بدا يحجيويه رعد واثق بس

: في مجال نراسل الشيخ الي عقدلكم يرسل ورقه وتاريخ الزواج وبشهادة امها على الموافقه يتحول زواج وتبقى تهمة تعدد الزوجات

تذكرت ماما عدها نسخه
من العقد. وطلعته من المراسلات وتاريخ المراسله

والمحامي اخذه صوره
وگال لرعد ...

( بقت زوجتك. لازم نوصلها. شخصيا ونتفاهم. وياها
ونطلب نسخه من معاملة الطلاق )
واهنا. تطوع واثق للسفر

: اني اسافر لكليفورنيا واتكلم مع زوجته

: في ولد صديقي بكليفورنيا اعطيك رقمه وحاول تتفاهم وياه بام لو عرفت مااريد الاملاك تتنازل عن القضيه

: تنازلها يفيد ويسهل هوايه امور
نگدر نتفاوض وياها على ان تشهد ان زواجكم كان منتهي واثنينكم موقعين واوراق الطلاق
ومنتظرين فقط الحكم

بعد اقتراحات وشرح ومداولات
قرروا نحاول مع بام تتعاون ويانا

تركنا المركز ورجعنا للبيت

بالسياره من دنرجع بقينا اني واثق لوحدنا ماما راحت مع ايه وروان لان تبجي

شغل واثق السياره وعلى لسانه ثورة كلام بس ماجلها

: صدوك راح. تسافر

؛ ماكو غير اسافر يومين لكليفورنيا التقي بزوجته. وننهي الموضوع وياها

: وانت ليش تسافر هذا واحد اناني ميستاهل
التفت عليه وسالني
: شنو سبب غضبج منه
اگدر اعرف

افتهمت قصده وجاوبت

: الي سواه بينا. مو قليل ...
ليش نساعده وهو انانيته وصلت بيه ميراعي مرض روان وخلاها. تسووي طفل

: الي افتهمته منه. بلبنان فحصت مرتين صحتها زينه

: لاتصدگ حجيه .. واحد كذاب

بتلميح واضح سالني

: اي كذاب وبعد شتعرفين عن رعد

صار وجهي مثل فضائيه مقطوع بثها.

وجاوبت بارتباك

شتقصد واثق. بهالحجي

: مااقصد. شي وبصراحه رعد
قبل ليعرف اريد اخطبج كان يعتقد انتي معجبه بيه

مااعرف منين الله خلى الكلمات على لساني.... واني منهاره ومحرجه. منه

: عمت عينه. اني بحاله هالقرفوز ... وانت شفت بنفسك اني ماانطي مجال ل اي شخص
صح لو لا

: صحيح

: هذا هيج يحجي لان ماقبلت يخطب روان
حب يشوه سمعتي
رجل الامريكيه السكيره

ماادري اقتنع. بكلامي او لا
بس اني اقتنعت بحجتي
وهو بدل الكلام

:لازم نساعد رعد ونوگف وياه افضل ماينكر الزواج وخلي اگلج شي روان اختج مااعتقد تعيش المرض باين عليها فكري انتي وايه اذا ماتت الطفله شنو مصيرها

وهو يحجي صخنت وصار كل تفكيري ان اقنعه رعد ميهمني

: تريدني اسافر وياك. اذا مزعلان مني

: مو بس زعلان تعبت منج

؛ واثق موبيدي شنو اسوي

حجى بعصبيه مامتعوده عليها منه

: شنو الي موبيدج تقصدين گلبج موبيدج ماحبني

مابقت عندي سلاح غير دموع المراءه امام رجل اعرف يحبني

: ليش تعتقد اني مااحبك حرام عليك

. الف دليل يكول متحبيني
اولها الي يحب ميگدر على افراك حبيبه شهر حتى بلا مكالمه. توديلي رساله تكوليلي حامل. شدعوه ليش مخليتي الدكتوره تتصل بيه وتگلي افضل

. ليش عصبي. شبيك

. متريديني اصير عصبي واني اشوف تصرفاتج ويايه
انتبهتي على روان ورعد اليوم شفتي دموعها عليه وشفتي مستعده تتحمل كلام الناس ونظرتهم الها ولطفلتها بس حتى تنقذه
وانتي لعد وينه حبج اليه ملاك
شنو الي قصرت بيه وياج. شاركتج بكل الي املكه المزرعه والبيت باسمائنا اثنينا والاكثر انطيتج گلبي
اريد اسس حياه وبيت واطفال
والظاهر انتي متريدين

: منو گال مااريد.

: اوكي هم راح اصدكج وانطيج فرصه ثانيه
راح اسافر بعد يومين
وارجع من كليفورنيا اريد قرارج

نزلني باب البيت مقبل ينزل

: وين تروح بهالليل المزرعه طريقها بعيد

: عندج بعيد. عندي لا
الله وياج
طلع باقصى سرعه

بدخلتي للبيت انفتحت ابواب جهنم عليه من ماما الي رادت تفرغ قلقها. من الجاي
او حبت تعترض على وضع بناتها الثلاثه وزواجتهن الواگفه في منتصف طرق اعترضت بطريقتها او طريقة كل الامهات
الصياح والاجبار على الفضفضه
وجبرتنا على. الجلوس القصري
على قنفه امامها
: اگعدن اگبالي وافهمني شديصير. واثق ليش مادخل طلال وينه المفروض يوگف ويانا. تلفون ميتصل شصاير احجي ايه

: ماما ماكو شي اني وطلال تزوجنا. واكتشفنا استعجلنا بالزواج

: استعجلتوا شنو. وج اني طفله ودتضحكين عليه بهالحجي

ايه : شتريديني اگلج شغله بيني وبين رجلي .. ميريدني هيه گوه
گتله لو اني لو المصارعه
اختار المصارعه. شاسوي مليت
بقى بس ابوس رجله حتى يحبني
تعبت شاسوي گولولي

بجت واخذت روان لغرفتها ودخلن اثنينهن

اندارت عليه ماما
: انتي سالفتج معروفه. بعدج تفكيرين برعد. اگعدي خلي اذكرج بشي صار بحياتج الظاهر نسيتيه

گعدت واني اشوف ماما ل اول مره بهالحزم

؛ شنو الحادث

ام ملاك : تذكرين ابن عمج علاء من خطبج... وبعدين عرفنا الخطوبه هدفها ياخذ الورث وگدر ياخذ بيت الاعضميه تتذكرين لو نسيتي

: اتذكر. والبيت راح وصار ملك مسوول ادعى لبيت ورث جده

: اتركي مسالة البيت
وقارني هذاك الموقف ...بموقف واثق الي انطاج. ملكه... وتعبه... وبيته بدون مقابل منج
انطاج اسمه. ..واحلامه.. راد يشاركها وياج شنو انطوج الي قبله مثلا شنطاج رعد گوليلي كم كلمه سمعتيها منه بدون مايعنيها حتى. شنطاج علاء
غير سيف سله وغمده بگلوبنا كلنا
يايمه الرجال مثل الثوب بيه الغالي لو لبستيه يغليج
وبيه اذا لبستيه يرخصج
افتهمي حجي وروحي لبيتج ومزرعتج ولرجلج ابو ابنج
جيته اليوم علينا بس اتصلتي بيه
معناها ترك الدنيا. واجاچ انتي

تركتني ل افكاري وراحت ورى ايه وروان

تركتني ل مواجهة نفسي
احيانا نحتاج شخص يثبت رجلينا على ارض الواقع.

هال الشخص كان ماما. الي خلتني افرغ كل اوهامي ...وتخاريفي... وهذياني... بالتمسك في حب ماله وجود... واخليها أ بالون واطلقها في فضاء ذكرياتي
واودع كل ماضي. وافتح اديه للحاضر واخذه. بالاحضان
واصعد سيارتي مع ساعات الصباح الاولى
واتوجهه لبيتي... ومزرعتي ...وزوجي

واني اطوي الطريق ... اتصور ابتسامته الي راح تستقبلني ...
وفعلا كانت ابتسامته بنتظاري كانما شمس اشرقت بجوفي ..
وهو يقطع حطب ...اقتربت منه

: صباح الخير
ترك الفاس من ايده وجاوبني

: صباح النور

: مااحتاج اقرر... اني قررت من زمان... من اللحظه الي لبست حلقتك بايدي

: ومراح تندمين على هالقرار

: اني على يقين مراح اندم وياك

اقترب الكلب مني ينبح
اقتربت من واثق خايفه

؛ اخذي هالعصى واشمريها بعيد

اخذتها وشمرتها بعيد ركض الكلب جابها ورجعها اليه

: اشو جابها

: اشمريها مره لاخ هم يجيبها من يتعود عليج يسووي الي تريديه

: والله يعني اذا اگله بعد لاتنبح خاصة بالليل يسكت

: تدرين ليش ينبح لان عباله شخص غريب انتي
من ياخذ احساس انتي صاحبة البيت والمزرعه بعد مينبح

: اممم شسمه هو

: اسمه سريع

اقتربت من واثق ولزمت ايده والكلب يباوعني

: احجي وياه عربي يفهم
ضحك وهو يگلي
: براحتج.

توجهت بالكلام لسريع

: شوف سريع. هذا زوجي وابو ابني. وهذي مزرعتي وبيتي
بعد لاتنبح الله يخليك

سريع كان ينصت فعلا اما واثق فيضحك
: محاوله جيده حبيبتي لازم تنطيه انطباع اني زوجج
لان هذا كلب امريكي

: امممم انطباع باوعني سريع

خليت ايدي على اكتاف واثق وقبلته وبادلني القبله بعدها قبل واحضان

: انطباع كافي

. كافي اليه
تعالي ويايه لبيتنا

: يله حبيبي

واني امشي انتظرت النباح
ماسمعت وانما يمشي معانا لحد الباب دخلنا. وسريع گعد قريب من الباب
افتهمت كل الي كان يسويه خايف على واثق مني

ملاك : لاتگلي الديك والعصافير هم خايفات عليك مني

: لا حبيبتي العصافير والديك هاي طبيعتها تبدي الفجر

: زين انت مو تگول هاي مزرعتي

: بلي مزرعتج

: اقطع الشجره القريبه من شباك غرفتي حتى متتجمع يم الشباك

: بسيطه. من ارجع من كليفورنيا. اقطعها وننزل بالغرفه الاسفل انتي حامل ميصير تصعدين درج

: بقى الديك اذا اتخلص منه الدجاج يطلع عليه مظاهرات

: ههههه عندي حل انطيه للعامل المكسيكي ياخذه بالليل ويرجعه الصبح

: فدوه لعينك احسن حل

خلصت الليله وتاكدت بيها زوال كل شك براسه
بصدق مشاعري وياه

....
سافر واثق لكليفورنيا. وبقيت بالمزرعه لوحدي
رن جرس المنبه الي وقته بالسته الصبح. مثل كل المزارعين
لبست ملابسي. وطلعت للمزرعه واني معاي وجبته الصباحيه مثل ماعلمني واثق

خليته امامه .. اقترب مني وتمسح برجلي ... كزبر جلدي
واتحملت .. تمشيت شويه
ترك اكله حتى يمشي ويايه واني احجي وياه

: انت الحارس الشخصي
تعال ويايه اريد اشوف الدجاج
دخلت لبيت الدجاج
في بيض
هشيت الدجاجه. واخذت بيضتين... وانهزمت من الدجاجه الي بدت تصدر اصوات غريبه
شفت العمال. باشروا عملهم
وسلموا عليه. .. ورديت السلام

رجعت للبيت. طرگت البيض مع خضروات المزرعه الفرش
وضعتهم بالمقلاه استطعمت الاكل

طعمه مقبول

فكرت اجرب اشياء ثانيه بالمزرعه
تمشيت لمشتل الورد قطفت كم ورده واخذت كم صوره بالمشتل... وبالمزرعه ...والمنحل.. نزلتها على حسابي
حتى اشوف ردود صديقاتي واكيد راح اتاثر بردهن وتشجيعهن

اكثر التعليقات عبرت عن امنياتهم يزورون المزرعه ويعيشون مع هدوء الطبيعه
اليوم الثاني
بديت اتقبل اشياء كثيره كنت متصوره رافضتها ومانعه عيوني تشوف جمالها وتصدگها اولها حب زوجي اليه
الي مافي رجال مر بحياتي حبني مثله وبطريقته

ومرت ايام بيها اتفقد المزرعه بكل ارجائها وانزل الصور في ارض واسعه( فكرت لو نجيب كم لعبه ..ومرجوحه... وكم كرسي ...ومسطبه.. ممكن تتحول جزء من المزرعه مكان ترفيهي وتبدي الناس تزور المكان وتبتعد عن ضوضاء المدينه ونخلص من الوحده او ممكن اطرحه بالانستگرام كمكان للحفلات الاعراس مقابل اجر بسيط بدل القاعات المكلفه وممكن نبدي باصدقائنا )
اخذت صور ونزلتها كلها بصفحتي وصديقاتي كان عدهم حماس يزوروني

وجدت متعه في اعداد خطط ان اضيف. للمكان روح
واحوله. لبقعة راحه وترفيه وحضاره. اضافه لكونها مزرعه

وانتظرت واثق يرجع وابلغه بخططي

ومن ر جع اول حديثنا
كان عن سفرته . وعرفت منه زوجة رعد رافضه تتنازل

: وتالي شلون روان بعد متتحمل مصايب فوگ مرضها

؛ طلبت من بام تجي لهنا وتزور رعد وتشوف صحة روان
حجيت وياها بانسانيه يمكن ترق لحال هالطفله المسكينه

: وعرفت السبب الي دفع فاضل يخبر عن اخوه

واثق : لو احجيلج متصدگين
ابن فاضل يطلع عمره بالعشرين هوه الي غاسل مخ بام
وحبيات ورد ومشروب وهاي مصدگه
وهدفهم يجردون رعد من املاكه وهمه ياخذون كلشي

: اصدگ ليش مااصدك غدر الاقارب شفته بعيني ومااستغرب
ماادري هسه شگول ل ماما وروان دينتظرون الاخبار

: گوليهم ننتظر جية بام لهنا

؛ انت متاكد تجي

و ؛ تجي لان تريده يوقع تنازل عن الاملاك وتحصل الطلاق بدون خسائر. وتتزوج المدير الجديد ابن اخو. رعد اسمه دريد وهيه تصيحه دي دي

: اووووف شورطنا ويه هيج ناس
تدري مرات احس بالذنب
لو موافقه على زواجهم تزوجوا بالسر ومصار كل هذا

: اكيد رفضج كان من حرصج عليها وخوفج على مستقبلها
: ماادري يمكن

: احجيلي عن الايام الي رحت شسويتي اهنا

وگفت امامه بكل تباهي. وهو متمدد. بسريره ويستمع ل انجازاتي

: اسكت شحجيلك
سريع صار الحارس الشخصي وعرفت اجمع البيض يوميه الصبح مع العمال
ليش احجيلك صورت كلشي

اخذ التلفون وشافه
: والله احسن فكره هذي ننشر على المزرعه ومنتجاتها

: اگدر اسوي حساب خاص بالمزرعه وننشر. بيه وعندي فكره اسوي مكان ترفيهي او للاعراس اهنا الناس تجيه

: شفتي اختياري الج كان صحيح عرفت انتي الجزء الناقص بحياتي

: جزء واحد بس

: لا والله انتي كل حياتي

( مااتذكر في يوم بحياتي كنت اعني حياة شخص
رديت على جملته بابتسامه
على وجهي واطمئنان داخل نفسي واعلان ضمني واثق كل حياتي الجايه )

———————————

؛ البارحه زرتهم ماكذب عليك المرض اكبر منها متتحمله بعد والدكتوره احتمال الاسبوع القادم تبدي معاها علاج كيميائي

: اووووف. شسووي لازم اطلع لازم اكون وياها. شسووي اريد حل

مالگيت حل غير التوسل بام عن طريق اتصال .. الي صوته. بدى عليه. السعاده والي اعرف سببها دي دي

: بام انتي تعرفين زواجنا منتهي صار سنين
وطول تلك السنين محاولتي حتى تتصلين بيه

: انت خدعتني واخذتني لبيروت اتصورت بدايه جديده مافكرت بمشاعري من اكتشف ماخذني حتى تتزوج طفله. عاملتني بغباء

: عندج حق واني غلطت بحقج.
لكن زوجتي مالها ذنب حامل ومريضه بالسرطان وحياتها بخطر
اذا على الاملاك اخذيها كلها واوقع الطلاك
كل الي اريده اكون يمها وهيه بمحنتها بام ارجوج. لاتزيدين احساسي بالذنب اتجاهها
لاتزيديه البعد عنها وتركها بمعاناة

: كيف اتاكد زوجتك فعلا مريضه يمكن تكذب

: تعالي لهنا وتاكدي بنفسج

: ليش اجي واخسر تكت طياره

: اوكي اتصلي بالمستشفى واحجي مع الدكتوره

: راح اتصل واتاكد واذا طلعت صادق اراسل محاميك
عندك محامي اكيد

: عندي

بعد الكالمه بساعه اتصلت بيها مره ثانيه وعرفت متاكده من مرض روان
: مدام تاكدتي وقعي اوراق الطلاق وروحي عيشي ويه دي دي

: كلم محاميك يرسلي تنازلك عن كلشي تملكه واني اتنازل عن القضيه اهنا

: الصبح ارسل التنازل لان هسه ليل ميجاوب اتصالي

: والصبح اتنازل اني

: وعد بام اكيد

: ثق بيه وامنياتي لزوجتك بالشفاء

عديت ساعات انتظر الصبح واني بالزنزانه
طويت المترين المحبوس بيهن الف مره تعب جسمي.. وارهقني التفكير
طلع الصبح سالت الشرطي

؛ ممكن اتصال اخير مع المحامي
سمحلي اتصل وبلغته يجيب الاوراق التنازل حتى اوقع

: اوكي راح اضيف فقره بيها التنازل شرط تتازلها عن القضيه اخاف شخص يلعب بعقلها ومتتنازل

: اوكي ماعندي مانع

وصل المحامي وقعني الاوراق
وارسلناها ايميل ل بام
وبعدها بست ساعات استلمت. نسخه من تنازلها
وبقت اجراءات الشرطه بين يتصلون بكليفورنيا ويتاكدون في تنازل والغاء القاء القبض

لكن اجاني خبر ثاني
: للاسف مراح يطلقون سراحك لحين اكتمال التحقيق بقضية روان

: هذي التحقيقات ممكن تاخذ اشهر وزوجتي مريضه

؛ احاول على كفاله يمكن تطلع

انتهى اليوم وهو يحاول يطلعني بكفاله
المبلغ كان كبير ماعندي ربعه ...
بقيت انتظر مساعده الاصدقاء
واتصل بيهم واتوسل
مرت يومين واني احاول ادبر المبلغ لحد اكتمل وثلثه دفعه واثق
بقت القضيه قيد التحقيق
بمجرد خطيت اول خطوه برا الحجز
توجهت للمستشفى اسال الدكتوره عن حالة روان واثق فهمني حيل تعبانه

———————————-

ايه

الدنيا جربت وياي كل المصايب
وخايفه هالمره تكون اكبر من تحملي ... لمن
الدكتوره اتصلت بيه تريدني ل امر ضروري بعد مطلعت نتيجة الفحص الدوري لروان
توجهت بسيارتي لعيادتها... من كثر النعاس ...اغفى ورا المقود
الليل؟ نتناوب اني وماما على رعاية روان الي فقدت القدره على المشي حتى الحمام تحتاج مساعده
الطريق كله اعمال صيانه... اخذت طريق اطول... وكل مااقترب من العياده يزداد عندي اليأس
وصلت للعياده خبرت الاستعلامات عندي موعد وطلبوا مني انتظر
انتظرت ربع ساعه طلعت الدكتوره جي نادتني

مشيت باتجاهها رجيف گلبي مثل زلزال بدا يهدم كل قوتي
لحد سمعتها گالت

: تفضلي ايه

گعدت واديه لازمه جانب الكرسي
: دكتوره. اعصاب مابقت عندي شنو نتيجة التحليل

اطرقت براسها وجاوبتني

الدكتوره : للاسف السرطان عدها منتشر بشكل سريع... وصل للجهاز اللمفاوي

كلامها كان سيف قطع حتى النفس بيه ماعدت اقوى حتى على الكلام. ولساني ثگل

استطردت

:لازم نبدي بعلاجها
اي تاخير معناه تركناها للموت

؛ لازم زوجها يعرف اني مااگدر اقرر لوحدي

: مافي وقت للقرار البنت حياتها في خطر انتظركم بكرى الصبح بالمستشفى

: الله يكون معانا جميعا

شكرت الدكتوره... وطلعت للبيت
بالطريق اتصلت ملاك وفهمتها
على العرفته ...واسينا بعض بدموع... والم.. وندم
وصلت للبيت وادعيت الاطمئنان
دخلت على روان گاعده تلوب من المها وماما تحاول تنطيها الاكل

؛ هلووو روان استعدي باجر نروح للمستشفى. للعلاج الكيمياوي

انخطف لونها وهيه تسمع كلماتي وخلت ايدها على بطنها

: والطفله مياثر عليها العلاج

: حسب كلام الدكتوره مياثر لان يكون بجرعات بسيطه فقط يوقفون انتشار ال
سكتت وهيه كملت

: السرطان گوليها ليش خايفه

گعدت يمها واخذت راسها بحضني

: روان انتي قويه وهالمرض اهم فقره بمحاربته هو القوه

اندارت على ماما

: ماما اريد احجي ويه ايه بموضوع

ردت ماما عليها والدموع بعضها خبتها وبعضها سبقت خطواتها وهيه تطلع ونزلت

: طالعه يمه

سدت الباب خلفها

: ايه انتي متعرفين تكذبين في امل بشفائي الدكتوره شگالت

( مثل هذي الاسئله جاوبها لازم يكون كذب )

: بصراحه گالت لازم تتعالج حتى المرض ميتطور
والطفله ماراح تتاثر

: ان شاء الله
عندي طلب منج

: كولي عيوني الچ

؛ بعد موتي اريدج انتي وملاك تحافظون على بنتي الله يخليج انسوا الي صار وحبوها لخاطري

: شنو هالحجي بنتج وحده منا اكيد نحبها وانتي مراح تموتين سبق هزمتي المرض وهسه لخاطر بنتج لازم تهزميه

ظلينا نسولف وبذلت جهدي اصطنع وامثل واضحك حتى تنطلي التمثيليه عليها وتصدك حياتها مو بخطر

ومن ضمن الحديث سالتني عن طلال وزواجي وليش اني اهنا وهو بشيكاغو

: صح اني زغيره بس اعرف في شي غلط بينكم

: هو السجن ماثر عليه وعصبي وشغله معاجبني

روان : وانتي حاولتي تساعديه

: حاولت والله وحتى داشوف دكتوره نفسيه واحجيلها يمكن اعرف اتصرف وياه واطلعه من الذكريات ومعاناتها ... ومااعرف شاسووي وياه. اريد احد يفهمني شلون اعامله
عمرنا. اثنينا ضاع. وباقين بلا بدايه. ولا نهايه

: ايه طلال خطيه ماعنده غيرج وحيد
اتصلي بيه اسالي عليه

: اكيد اتصل بيه نامي انتي ورتاحي واني اروح اسويلج غدى

خلت راسها على الوساده وتمددت

طلعت بسرعه واعرف ماما راح تواجهني بكمية اساله متنتهي

شفتها واگفه بالصاله گبال صورة بابا وتبجي
مشيت بطء وگعدت يمها

: خلي البجي يجي وكته لاتخافين

: يعني راح تموت خلص ماكو امل

: بس رحمة الله ادعيلها ماما

مرت ساعه تشاركنا الهم والدموع والدعاء
اتصلت ملاك وجاوبتها

: اگلج. شنو رائيج بعد متولد ناخذها. لنيويورك بيها مراكز علاج متطوره والفلوس ناخذها من حساب البنك

: الدكتوره فهمتني المرض منتشر واصل للمف ومن باجر تاخذ اول جرعه بالعلاج وبعد الولاده نحاول ناخذها لمركز ثاني

: ايه عندي احساس بالذنب

: فدوه اسكتي نفس الاحساس عندي وخايفه اعترف والي زادني هم توصيني بنتها اربيها

: يايمه يايابه شنو هالقهر
وج گلبي راح يطلع من مكانه

: وج اكيد رعد راح يحرمنا من الطفله اذا لاسامح الله صار على روان قدر

: ميگدر يسوي شي وراه قضايا ومحاكم
اگلج ايه عوفينا من رعد اني راح ابحث عن مركز من هسه وناخذها. اهناك ميصير نستسلم كلنا

: اوكي اني هم ابحث

اخذت اللاب وبحثت وراسلت مراكز. واطباء وانتظر اجابتهم عليه

ومثل كل ليل اسهر
بصحبة همي.. وحيرتي

ياخذني الحنين لصوته ..ولشوفته
افتح تلفوني اتفرج صوره
واسأل نفسي ...ياترى هم يحن اليه؟ لو تجاوزني وعاش حياته مثل ميريد بدوني

ممكن الانسان يحب من بعيد ؟
ممكن الحب يسمو بينا فوق علاقه الجسد ؟

واني اتصفح دالفيس
شفته منزل صور عرسنا بالگروب والاصدقاء يعلقوله
وهو يرد عليهم
والغريب ان يلقبوه بابو ايوب
اكيد هو خبرهم هذا لقبه
الصوره اكيد ماخذها من جهازي
لان هو ماخذ صور بجهازه بالعرس ملاك كانت تصور

حرك اصابعي الشوگ اله
اخذت تلفوني ونزلت للبيسمنت اخاف اهلي يسمعوون
واتصلت بيه قبل لتكمل اول رنه جاوب

: ايوته غلطانه بالرقم شنو

: بلا عتاب الله يخليك
خليني اسمع صوتك وبس

سكت

:گتلك اسمع صوتك لاتسكت احجي

: مشتاقلج شگد متتصورين شلون صارت ايدج اذيتها اكيد

: الايد كسرها ينجبر لكن كسره گلبي. مانجبرت ولحد الان تاذيني

: اني الكسرت گلبج. ؟
: اختاريت المصارعه عليه
على العموم. گلبي ملكك وبكيفك

: ايه مو. بسهوله. اعترافي الج بكلشي خلاني اغلي والمصارعه جتي بوكتها. حتى اخلص قهري

: يجوز. اني استعجلت بطلبي
اعتذر
سكتنا اثنينا. هو الي كسر السكوت
:احجي ليش ساكته

: شفت صورنا ناشرها ليش
نشرتها

؛ حتى تشوفيها وتحنين وتتصلين

: واتصلت وبعدين

طلال : اني حجيتلج كلشي وانتي گلتي مااعوفك ورى تلث ايام تركتيني

: . ومااعرف شسوي تصور داراجع عند دكتوره نفسيه حتى اعرف شسووي

: واهلج مسالوا شتسوين بالدكتوره

: ميهمني اجاوبهم المهم عندي انت
وراح اموت على شوفتك

: واني نفس وضعج وميت على شوفة وجهج يضحك احلى
ضحكه
افتحي كاميرا اشوفج

: مالي خلك والله مهمومه حيل. ومااعرف شاسوي
اختي روان على شفى الموت وزوجها طلع من الحبس وملاك. حامل وماما كل شويه تسالني عنك

: كل هذا صاير واني مااعرف ليش ايه لهذي الدرجه بعد مااعني شي بحياتج على الاقل اتصلي اوكف وياكم

؛ انت هم ماتتصل بيه ومن مباراه لمباراه
بس حبيت اسمع صوتك
باي

: لاتسدين الخط انتي محتاجه احد تشكيله واني مشتاقلج خلينا نسولف سوا

: بعدك تحبني

: انتي جاوبيني الي عرفتيه عني ماكسر صورتي بعينج متشوفيني جبان ومااستحق اكون رجال بحياتج

: انت مالك ذنب بالي صار داخل سجن وقيود وقوه وسلاح
لكن ذنبك من طلعت من السجن

: شنو ذنبي مدافهم

: بقيت خاضعلهم حتى من طلعت بقيت بالقالب الي وضعك بيه الوحوش
مصارع لتسليتهم ورهاناتهم
وحرمت نفسك تكون حر.
وتتمتع بزوجة تحبك
الدكتوره فهمتني هالحجي

: مااعرف شلون اغير حياتي وخايف ل احاول اكون زوج وافشل گدامج وانتي تدرين منو انتي اليه

. ابدي بخطوات صغيره لحد تكبر
اترك المصارعه وبعدين فكر بالجاي

: باجر عندي مباراه مهمه. لازم احضرها
: ميفيد الحجي وياك مستر تي قتل طلال وماتركله فرصه يعيش

: بعد المباراه اجي عليج لديربون ايه ساعديني لاتتخلين عني

؛ اساعدك من تاخذ اول خطوه وتبتعد عن المصارعه

: مااگدر فكرت هوايه وماگدرت دمي يظل يغلي لحد اضرب وانضرب

: لعد شلون اساعدك وانت الحابس نفسك بزنزانه ومتريد تطلع

: محتاج وجودج لاتبتعدين عني

: تعبت من حياتي وباجر ورايه مصايب جديده

: الله يعين
ايوته تحتاجين افلوس

:لا ممحتاجه

: حتى لو ممحتاجه الصبح احولج على الويسترن يونين قبل ل اسافر
ها نسيت اگلج
اتصل بيه واثق قبل فتره وراد فلوس حولتله علمود رعد

: اي احتاج لكفالة رعد ولو ميستاهل احد يساعده

: شعجب واثق مدفع الكفاله

: مجان جوا ايده افلوس خطيه هو هم يادوب يلحك على مصاريفه المزرعه بعدها جديده لكن همين ساهم المبلغ كان كبير

: ليش مااتصلتي بيه وطلبتي انتي محاسبتني رجلج

: يمعود انت مو بس رجلي
اكثر انت شي بعد محد لگاله اسم. انت الي ماحسبتني مرتك

: انتي مرتي من اول يوم شفتج ل اخر يوم بعمري

؛ واذا گتلك مااريد الكلمه اريد المعنى تفهمني وتسوويني مرتك فعلا
كملت الجمله سمعت
صوت قوي يمه ...اشياء دتتكسر وتنضرب
وهو يصيح.
( اه اه مااريد اعيش)

: طلال شبيك شنو هالصوت شنو ضربت وكسرته
متحجي شبيك

وهو يصيح بكل قوته وبانهيار. ماله مثيل

:الي گلتيه موتني ايه تدرين شكد صعب الي اني بيه تعرفين الي مر عليه خلاني اكره كلشي الا انتي ايه بالزنزانه كنت ابجي على اثنين

: تبجي على منو

: بجيت على رجولتي الي ماحسيت بيها من لحظة الاغتصاب
وعليج لو عرفتي مااگدر اكون رجال الج

وهاي انتي دتگولين اريدك واني مااگدر

اصوات بجينا كان واحد وحسرتنا وحده
حبست كل كلام عندي وكل حق اليه عنده
وفكرت بيه مكنت حاسه بالمه لحد سمعته يگول اسمي بتوسل

: ايه لايكون قرارج اتركيني

: حبيبي طلال اهدء شويه. واگعد كافي تفتر وتكسر

اهدء

: گوليها گولي شنو قرارج اذا تريديني اهدء

: حبيبي مالي قرار. اني وياك والك.
وسوى نعبر كل صعب
اگعد كافي على شنو تبجي وتكسر

؛ وانتي على شنو تبجين

: ابجي عليك. ماريدك تنقهر
بداعتي لاتنقهر. فدوه طلال افتح كاميرا. داشوف شسويت ليكون اذيت نفسك

: روحي هسه بعدين نتصل

مااروح. طلال اذا سديت التلفون هسه اجي لشيكاغو
لاتخبلني طلال
افففف ياالله شجاني وحجيت اعتبرني مگلت شي فدوه احجي

: الموت هو الحل كافي رابطج ويايه
كافي اتعذب واعذبج

: طلال اذا تحبني لاتاذي نفسك والله من الصبح ارجع يمك وين انت هسه شتدتسوي
في باب انفتح

: انت . وين احجي صعدت ل اعلى البنايه صح

مارد عليه لحد صرخت
: طلال طلال حرام عليك اهلي گعدوا على صياحي

: سدي الموبايل ايه

: مااسده الله يخليك اهديء واترك الي ابالك تريد تموت وتتركني اعيش فقدك من جديد قسما بيك وتدري هالقسم شكد غالي اذا سويتها ل انتحر وراك وانت السبب وك احبك شلون تعوفني

جاوبني طلال فدوه
خلينا نسولف لحد تنام او اني انام والله مااريد غيرك ومستحيل اتركك

اسمع نفسه لكن ميحجي

:طلال نزلت. لو بعدك

:نزلت. روحي نامي

: لا باقيه وياك.
اهدء و
گلي شنو كسرت اذيت نفسك

: مااعرف. هوايه اشياء كسرتها
واديه. ودستها برجلي وتجرحت

: اسفه اذا. اذيتك
افتح كاميرا حتى اطمئن عليك

فتحها. وهو گاعد على درج البنايه

: ادخل للشقه حبيبي اخاف احد يسمع حجينا

ترك الدرج. ودخل للشقه
جلس على كرسي وصار يحجي ويايه بلا انفعال

: ايه اني مناقص جروح احجي الي بداخلج فعلا تريدين تبقين ويايه لو خفتي انتحر

: لعد وين اروح اذا اتركك
مااعرف اكون لغيرك حاولت مره كنت اتصورك بيها ميت وحتى الموت مخلاني اتقبل فكرة اكون لغيرك

: والتالي شنو

: التالي باقيين سوا احنا افترقنا وبقينا لبعض ونبقى لبعض

: اهلي يسالون عليج ومااعرف شجاوبهم

: وماما تسال عليك ومااعرف شجاوبها

فكر شويه وهو يگلي( امسحي دموعج كافي تبجين )
مسحت دموعي وطلبت منه يجي يمنا كم يوم

: راح انتقل لديربون حتى نعيش سوا ونخلص من اسئلة الناس والاهل

: ياريت والله محتاجتك يمي

: واني. محتاجج اكثر والله

ماسالته عن نوع الحاجه واكتفيت بتغيير الموضوع

: طلال تصلي لو بعدك تمد السجاده وتبتعد

: بعدني امد السجاده واخجل اتوجه لرب العالمين

: ليش حبيبي.

: بلحظة معينه بحياتي تسألت شنو ذنبي؟شنو الي سويته ؟
وتصورت ان رب العالمين يختار المصايب لان يكرهني

: اوكي حبيبي اني كلش گلبي مقبوض راح اتوضى واصلي وانت همين صلي وخلينا ندعي سوا دعاء واحد اكيد الله ميردنا

: ندعي نبقى سوا

: سوى حبيبي

صلينا اثنينا والكاميره مفتوحه

صلينا سوا لرب واحد.. ودعينا نبقى سوى
ونزلت دموعنا بنفس الحراره والحيره

طولت المحادثه لحد وجه الصبح. الي استشفيته من حديثه
يريدني ارجع بنفس الوضع هو مصارع مهزوم مني
واني زوجه راهبه صابره

امام انهياره وخوفي عليه رضيت بالسكوت وتقبل الوضع ولو لحين

تغيب ...وتعود من جديد
ثم تغيب ثانية... وتعود
ومابين الغياب... والعوده
عالقه انا في منتصف الطريق
لا انا قادره على الرحيل ...
ولا انت تقرر الهجران
وقربنا مؤذي ...
وبعادنا مميت

اخر مره شفت بيها الساعه اربعه الفجر بعدها غفيت للتسعه صحاني جرس الباب

ماما فتحت دخلت ملاك وزوجها

: بعدج نايمه. وج اني الليل منمته من الخوف

: لاتخوفين روان واخذيها مع ماما وساعه واجي عليكم

: دارجف مااعرف شبيه

: يله كمليها انتي. واوگعي مو اني ناقصه

دخلنا على روان بدلنالها وحضرنا احتياجاتها... وطلعت ملاك وماما بيها على المستشفى
واثق راح يكمل اجراءات رعد

فتحت تلفوني رساله من طلال بالتحويل
طلعت من البيت اخذت التحويل
وبوجهي للمستشفى

كلشي بعيني اسود... گلبي مقبوض
وعندي احساس بالحزن... مسيطر عليه ..و كابت على نفسي
على اعتاب المستشفى مثل الي نزعت روحي عني وظليت بلا روح
صورة روان.. وضعفها. ..وجسمها الي اصبح تجسيد للهيكل العظمي
وجهها الاصفر.. وعيونها الغايره
كل هالصور حولتني ل شلال دمع ابجي داخل نفسي
اندارينا عليها... نشد من عزمها
وهمه يحضرونها للعلاج ويقيسوون الضغط... والوزن

حضرت الدكتوره بادلتنا التحيه وكم جمله مشجعه واخذت روان للعلاج
بعدها بدقايق وصل رعد بحاله مزريه. اللحيه طويله... والقميص معفس

———————————

رعد
سالت عن روان وشفت الاجابه بعيون يمليها الخوف

وصلت يم باب الغرفه الي بيها العلاج الممرضات رفضوا دخولي
صحت حتى تسمعني

: روان باباتي هذا اني يمج وانتظرج روان بيبي انتظرج

كفكفت دموعي بأيدي بعد ماصار. البجي بالممر من امها واخواتها اعلى من اي صوت ثاني
ابتعدت عن الباب وبداخلي امنيه وحده لو عندي القدره لتغيير شي واحد بالعالم فقط واحد
اريد ازيح هالمرض عنها واصارعه بدالها وميهمني هو ينتصر لو اني
بحر الامنيات كبير نغرك على جروفه وتسيس كل امانينا وميبقى غير زبد الحسره جوانا

طلعت روان بعد اول جلسة علاج
حالها صعب ينوصف بكلمات
فقط جسد نحيل... مسجى على سرير... لولا النفس بيه تكون اقرب للميته
باوعت علينا كلنا واعتصرت عيونها لان متگدر تبجي حتى الدمع جف بداخلها
ركضت ايه جابت مي تبلل شفايفها الي صايره بيضه
وتحجي وياها
: سلامتج حبيبتي ارتاحي هاي احنا كلنا يمج لاتخافين

اجيت عند السرير كعدت يمها وخليت راسها على حضني

: بيبي. صيري قويه مثل ماعرفتج دوم
قاومي المرض وارجعي لحياتج واليه

اشرت على تلفونها

: تريدين التلفون.
هذا اخذيه

اخذت التلفون.. وانطتنياه
افتهمت منها تريد صوره ويانا كلنا ...
اتجمعنا حولها... واخذنا الصوره
اني بطرف... وامها بالطرف الثاني ...نحضنها.. وايه يم امها وماسكه ايد روان... وملاك وزوجها خلف السرير... يم راسها

واهنا اتذكر ملاك شي مهم

: ياجماعه احنا ناسين شي مهم

ا : لاتگليلي نسيتوا اوراق روان

: لا ناسين نختار اسم للطفله اذا انولدت

: هالحجي مو وقته بعد شهر يله تولد

ام ملاك اختارت اسم
: نوارس اسمها نوارس مثل ماكان ابوكم الله يرحمه يسميكم
النوارس راح تزيد وحده

والاسم نال استحسانهن تلاثتهن. وتذكرن معناه بالتتابع

: الله احلى اسم كان من يريد يجمعنا يصيح نوارس وينكم

: واذا راد يصيح وحده منه يصيح ملاك النورس
او ايه النورس لو. روان النورس

: اتذكر. فعلا اسم حلو نوارس

انشغلن بتغيير. ثياب روان ..
وملاك گعدت يمها مشطت شعرها ..، وامها تنطيها الفاكهه
وطلبت (يوگرت ) بالفاكهه
علبة البان مع فاكهه
وايه وملاك طلعوا خارج المستشفى يجيبون طلبها
وبقينا اني وامها يمها
يحجون عن وضع ايه وافتهمت ان ام ملاك تريد تعرف ليش تراجع دكتوره نفسيه
وروان جاوبتها
:ماادري ليش وسالتها ماافتهمت شي
بقت ام. ملاك تسالها
لحد روان تعبت ونامت ...

وخلال يومين ... حالتها ساءت ..
وتغيب عن الوعي ساعات .. ومتاكل ... وتتنفس عن طريق جهاز

بعد اليومين العصر كانت المفاجاه او الفاجعه

الدكتوره طلبتنا لغرفتها كلنا
توجهنا عليها ونعرف الي جاي هو النهايه

گعدنا بكراسي متقاربه.. وهيه تحمل اوراق بيدها
اخذت مكانها بالكرسي امامنا وتنهدت وحجت

: اعرف الي راح اكوله صعب ولابد اگوله حتى تستعدون روان تصارع الموت
وبالتحليل والفحص اكتشفنا السرطان خلاياه انشط

قاطعناها كلنا بالبجي والرفض سماع الي تكوله
واني تركت الكرسي واتوسل بيها
: ارجوج دكتوره لازم في حل

ردها كان بيأس
: منگدر نزيد الجرعات عليها جسمها ميتقبل

: اذا خايفين على الطفله كلنا نوقع منريدها نريد روان

: لا عزيزي الطفله ايضا احتمال موتها وارد لان الام جسمها ميولد اي غذاء او كريات دم

: يعني خلص نتركها للموت

: راح تبقى على الاجهزه لحد تدخل السابع

: بعد اسبوع على شهر السابع
مستحيل يكون هذي النهايه اكيد التامين ماغطى العلاج لذلك راح اتركوها للموت وگوليلي شگد التكاليف هسه اروح اجيبها ابيع سيارتي واخذ من اصدقائي

گامت ملاك وطلعت من جنطتها الكارد وخلته امام ميز الدكتوره وهيه تبجي

: اذا على المصاريف احنا نتحمل هيه عدها حساب بالبنك

: ابدا مو المصاريف العائق تامينها يغطي
لكن المرض تغلب على مقاومتها
اهدوا وحاولوا تكونون قريبن منها

دفعت الكرسي وفتحت الباب وركضت على غرفتها. فتت
شفتها گاعده وبيدها التلفون
وجهها صاير مثل الشبح حتى رموشها بيضه

اشرتلي تعال
فتحت الفديو..ال. وهيه تصورني اقتربت وهيه تحجي بالفديو

: ماما نوارس هذا بابا شوفيه يمي ومتركني ل اخر لحظه
اخاف تسمعين من تكبرين حجي ثاني لاتصدگيه

احجي بالفديو رعد گول شي

: شكول

: احجي لنوارس خليها من تكبر تعرفني

: نوارس بنتي هذي روان مو بس انتي( ماي بيبي) هيه كانت قبلج وتبقى( ماي بيبي. ) دتشوفين دموعي عليها بداخلي اكثر منها نزف
بقى الفديو يسجل واني ابوسها واحضنها... لحد دموعنا توحدت وماعرفنا دموع منو بينا الي تنزل على خدودنا
——————————

طلال
وصلت على المستشفى.. الوجوه كلها كئيبه ...منو اسلم عليه يبجي
واكثر شخص متاثر. ام ملاك ورعد.
ام ملاك من كثر حزنها گاعده بالممرات.. ومتگدر تدخل تشوف بتها
سلمت عليها وعلى البقيه وصلت ل ايه الي تركت الكرسي
وگامت حتى تحضني وتبجي
كلها خوف والم

: وحدوا الله ياجماعه. ناصبين العزا قبل وقوعه

: دتموت وك عيني يوم عن يوم

: لعد شعدكم اهنا المفروض تكونون يمها

: زوجها موجود ومخليها بحضنه حتى الممرضات ميخليهن يقتربن منها بس للعلاج

: يله نروح يمه اكيد هو هم محتاج احد يوگف وياه

سحبت ايه ..وامها.. للغرفه وبعدها دخلت ..ملاك
النظره الاولى لروان شبه ميته
سلمت عليهم كلهم
وبدينا نسولف ونسال بعض اسئله نعرف جوابها
شلونكم. شخباركم. ومن هالاسئله
الاخوات اقتربن من اختهن... بعد ما رعد راح ينادي الممرضه لان تاخرت عليهم
وهنه يتبادلن حديث ذكريات

: روان هذا طلال شوفي جاي علمودج ترى مو علمودي

: هلا بيه انشاالله تبقى اهنا علطول حتى ايه تبطل بجي عليك ترى ثبرتنا

: حتى بشيكاغو يمي هم تبجي الظاهر عدها البجي هوايه

: هههههه طيب روان تتذكرين الرگص الرگصتيه بخطوبتي اني وطلال

؛ اتذكر وملاك راد تكتلني

.ههههه اي والنبي بيومها فورت دمي ذبت لحم

والذكريات جرت ذكريات وسوالف واهات وضحكات

وبعد الذكريات صار حديث الوصايا. والوداع ابتدته روان

: اكول نوارس تعرفون اني كتابتي مو قويه .... واذا متت

سكتتها ايه

: اشششش لاتجيبن طاري الموت

اصرت تكمل

: اذا متت
مااريد تنسوني. ولاتتصورون زعلانه عليكم ...ولاتزعلون عليه
استعجلت على الزواج من رعد ...لان حبيته واعرف ماعندي عمر ينتظر

دنگت ملاك. تريد تبوس ايدها
وهيه تطلب السماح

: روان حبيبتي سامحيني والله من خوفي عليج والله احبج

: ادري تحبوني واني احبكم ونوارس تبقى عدكم لاتحرموها من ابوها لكن متعيش مع زوجة اب اذا تزوج رعد. او لا
واني تركت وصيه نوارس تربوها انتم تاخذوها عدكم ...وطلال انت شاهد على هذي الوصيه

حاولت ايه تشجع
: كافي من هالحجي. صيري قويه ولا تستسلمين للموت
انتي انضربتي رصاصه ومامتي

طلال بنهاية اليله طلبت اني
من ملاك وزوجها وام ملاك يروحون للبيت واني وايه نبقى مع روان ورعد
تركوا المستشفى ورعد نام بنفس الغرفه وبقينا اني وايه
گعدنا على المسطبه برى الغرفه وبدينا حديث اشتياق ممزوج بالم

: واني اقترب من ديربون خفت اوصل واشوفج

: من شنو خفت

: خفت متريدين تشوفيني

: تدري فرحتي بشوفتك مثل فرحة طفل اول مره يجرب ملابس العيد

: وفرحتي بشوفتج مثل الي انحرم من العيد وماعرفه الا وياج

: انطيني ايدك

مديت ايدي ...اخذتها حول خصرها ...وقربت راسها على كتفي وسحبت جهه من جاكيتي على جسمها

: راح انام تعبانه

بايدي الثانيه حوطتها

: ارتاحي ايوته نامي

بقيت وياهم .. يومين بين البيت والمستشفى ...
باليوم الثالث حددوا موعد عمليه قيصريه لروان لان تاكدوا هذي ايامها الاخيره

الصبح ..المنظر مينوصف وهمه يودعوها خاصة رعد باسها من راسها لرجليها
اني واثق گوه سحبناه منها
واجى دور امها واخواتها يبجون ويبوسون والكل يردد كلمة سامحينا وترد عليهم سامحوني

وهمه يحاولون ياخذوها ... ملاك تناديها
( روان بنيتي ) ... متقبل تترك سريرها ... ومتقبل احد يقترب منها
دفعوها الممرضات وهنه يبچن

اخذوا روان من الغرفه
بقى بس الدعاء والتصبر. .. والامل بالله

الممرضات سحبوها بالسديه لغرفه العمليات
مشينا وياها بالممر اخواتها لازمين ايد ورعد ايد الثانيه نمسح دموعنا

نظرت ل امها نظره اخيره
واشرتلها تقترب منها
دنگت امها عليها باستها
وگالت
. لاتنسيني ماما
ويه هاي الكلمات انهار كل عزم بداخلنا سدوا باب العمليات

گعدن على الارض تلاثهن
واني اخذت ركن ادعي
واثق كامش رعد
وهو يعيط خلف الباب
: روان روان. لاتخافين باباتي

ركض على الباب يحاول يدخل
لكن الباب مقفوله

نزل على الارض وگعد مثلهن ودموعه تتنافس مع دموعهن
ويريد نفس دعائهن
: يارب ياارحم الراحمين
تولاها برحمتك. ياالله

استمرينا بدعاء وخوف وترقب
انفتحت الباب طلعت الدكتوره
تعابير وجهها تدل على الفزع وگفنا كلنا بوجهها

: ولدت بنت سليمه

: وزوجتي شلونها

: روان عايشه لكن. في خطر عليها
نحاول من بكرى نبدي بعلاجها يمكن تستجيب

: اگدر اشوفها

الدكتوره ؛ عشر دقايق وتطلع وتشوفوها والطفله ناخذها للخدج
خليكم اقوياء روان محتاجه المعنويات العاليه

ابتعدت الدكتوره وطلعوا نوارس بسرير صغير زجاجي حجمها صغير
وملامح وجهها دقيقه ولونها وردي كلها

كلنا باوعنا عليها الا رعد مگدر
البجي ماخذه واحساس الذنب اعلن عنه بكلمة
( كله صوجي )
حاول واثق يهديه ياخذه للكفتريا
مقبل لحد طلعت روان
البنج موضعي للعمليه القيصريه
تگدر تحجي ويانا وتشوفنا

رعد حضنها وهو يبجي على صدرها
ويردد

( تفداج الدنيا والي بيها بيبي )
ابعد الممرضات وهو دفعها وصلها للغرفه وشالها خلاها على السرير

مرت عشر دقايق ملاك وگعت من طولها من كثر البجي
تلاحگوها الممرضات واخذوها على غرفة ثانيه واثق وياها
واني مع ايه
وايه بين روان ورعد
وامهم تفتر بين الغرفتين

عرفنا ملاك عدها هبوط بالضغط

: واثق اخذ ملاك على بيتنا ترتاح واني وايه والحجيه باقيه اهنا

واثق سال ام ملاك اذا تريد تروح
.

: لا مااروح ابقى يم روان انتم روحوا

اكثر موقف بجاني هو حب رعد ل روان
كنت اتصور مافي انسان بالدنيا يحب مثل حبنا اني وايه
واليوم عرفت رعد يحب روان اكثر من حبي
متمدد يمها ماهامه ناس ...وممرضات
اديه حايطتها. ويغنيلها بصوت باكي

(يازلف يتغاوى ويه الليل باطراف الگصيبه
هاك روحي الماغفت والطيف ...مامره حبيبه )

حول لحظاتها الاخيره بهذي الدنيا لسعاده باحضان حبيب
حرمها الموت تكمل مشوارها معاه بالحلوه... والمره

رفرفت روحها البريئه بين ادين
رعد... وصعدت لباريها

انملى المستشفى بصرخاتنا ودموعنا

الممرضات والاطباء يحاولون يرفعونه من عليها
رعد لازمها ويبجي... وايه وامها يهزوها يمكن بيها رمق باقي وتصحى تكلمهم

عدت ساعات واحنا على هالحال
اخذوها منا. وسط دهشة
الدكتوره الي كانت تتصور تگدر تقاوم كم يوم
لكن السرطان يختار الوقت الي يريده هوه... وميبالي بضحاياها
وحاجتهم للوقت

————————