رواية نوارس مهاجره الفصل الخامس والثلاثون 35 - بقلم zeanab_almusawi

#نوارس_مهاجره33
#زينب_الموسوي

الجزء الثاني

ايه

الموت حقيقه مو جعه 
سواء جزعنا ام صبرنا. لايمكن نكران وجودها . ...

ايام
العزا  كانت  بالجامع  للرجال  وبالبيت  صديقاتنا  وجوارينا  ماما في اقصى حالات الجزع ...والالم  حتى دموعها جمدت بعينها
ملاك بالمستشفى على المغذي
لان متاكل
ورعد نقلنه صورته ابو كوثر. بجملة
(ياخذ مهدئات حتى  ميحس بالمصيبه )

واني بين المستشفى عند نوارس... وملاك.. وبين ماما ..والعزا

هانت عليه الدنيا  واني اشوف تغسيلها... وتكفينها. ماعدت احس بقيمة شي
ومضطره  اگوم على حيلي ...
واواصل الحياة

....
ثالث يوم العزا.طلبني  طلال 
وام كوثر بلغتني يريد يشوفني

: من يخلص العزا  خليه يجي يبات عدنا ليش باقي يم رعد يعني  بس  رعد حزين

؛ ولو مو وكتها بس انتي وياه بينكم مشاكل

: لا والله  ياام كوثر  ماكو مشاكل وراح ينتقل لديربون علمودي

نفس هذا السوال ... تكرر من صديقاتي.  .وجيراني بالعزاء .

وتهربت  من الاجابه... ومن خنگت البيت الي كل ركن بيه اشوف روان... واستعيد منظرها بالانفاس الاخيره
انهزمت.  برا  البيت مابقى بيه حيل اواجه كل هالمعاناة

بالاربعه  العصر  طلعت للمستشفى  اديه  تتحرك بلا وعي  مني مااعرف شلون شغلت السياره  وكيف  وصلت

رحت  على الخدج  شفت( نوارس) خلف الزجاج  عيوني  مااعادت تشوف الاشياء مثل قبل ..
شراح يكون مصير هالطفله؟ منو يربيها؟  من تكبر وتسال عن امها وتعرف القصه من ابوها... راح تكرهنا اكيد
مديت ايدي الها من خلف الزجاج... تصورت روان يمها واگفه  وتنظرلي .. وغمضت عيوني .. وفتحت

بهذي  الاثناء  انتبهت
وصل رعد.. يطمئن على بنته نضر  لي   ودنگ  تكلم  مع الممرضه  جاوبته

(نموها طبيعي..  وصحتها. جيده )

: طيب شوكت اگدر اخذها

سمعت الجمله ماگدرت اسكت
تركت الزجاج.. واجيت عليه

: وين تاخذها. مو كافي اخذت امها. مو  كافي الي  سويته بروان. حرمتها  الهوى خدعتها بكلمة(  بيبي وباباتي)
اسالك باالله لو  بنتك ترضى تتزوج بعمر ١٦ سنه تقبل تنهزم ويه  واحد ضعف  عمرها. وبلا اهتمام  ورعايه  تخليها تحمل ماكلفت نفسك مره تاخذها للدكتوره  لحد السرطان انتشر بجسمها
الله ياخذ حقها منك 
انت  الي تستحق تموت  مو روان   المسكينه

ظليت بالمستشفى اصرخ عليه  وابجي واصيح( الله ياخذك
اه ياروان  )

مارد بكلمه....  ترك المستشفى وطلع ...
گعدت على مصطبه ابجي والممرضات يكلموني  ...ويخففون عني
هديت  ونزلت  على الطابق الي بيه ملاك
فتحت غرفتها... تستعد تطلع وتلم اغراضها

: ها راح تطلعين

: بلي واثق راح يقرب السياره للباب ويجي ينزلني

:اني انزلج هن عشر درجات

: اشوفج عصبيه نوارس بيها شي

: مابيها شي 
شفت رعد وتعاركت وياه يريد ياخذ نوارس

: وين ياخذها

: مااعرف  بس لو اموت مياخذها هذي وصية روان ملاك لازم انتي واثق توگفين ويايه

: دتعالي نزليني ونسولف على الدرج
اخذتها من ايدها والجنطه شايلتها على كتفي
ونزلنا  لحد وصلنا لواثق سلم عليه وگعدنا نسولف اني وملاك وهوه

: واثق رعد يريد ياخذ نوارس منا  

: يابنات. ترى رعد مثلكم هم مصدوم  وحزين على مرتهد
:  ملاك واثق  اتراهن اذا مو  شهرين  تزوج  ونساها ونوارس تبقى للضيم

: لو يموت مياخذها

بگد  ماكنا  اعصاب ومشدودين  ...واثق كان بارد ويحاول  يدافع عن رعد

: اني  اگول نتفاهم وياه على الحضانه  يعني هو ابوها اله حق يشوفها  يربيها يعتني بيها وانتم  خالاتها 

: واذا تزوج  نوارس تظل للقهر والاهانات

  : احنا بامريكا بتلفون صغير من الطفل  يشتكي يذبون ابوه  بالسجن

:  هذا مينسجن يقشمر الطفله بكلمه مثل ماسوى ويه روان

: بصراحه اني مناوي اوكف ضده اولا لان صديقي وصاحب فضل عليه وثانيا هو اب ومن حقه يربيها

: واثق انت زوجي  واني محتاجه وگفتك ويايه 

: الله كريم انشاالله اكون واسطه خير بينكم

صعدت هيه بسيارة زوجها ومبين عليها مراضيه على موقف واثق
واني صعدت  بسيارتي وصلنا للبيت

نزلت من السياره طلال بالباب

ولامره بحياتي شفته وگلبي مافز
الا هالمره  المصيبه  نستني  يقين حبه
وگفت اباوعه قبل لينتبه عليه
شاف ملاك سلم عليها 
شافني واگفه
واجى عليه
غمضت عيوني بلحظه تمنيت  ياخذني بين اديه  ويرجع اليه احساس الوجود 
اقترب واخذني بين اديه
على صدره بجيت بگد ايام العزا كلها

: البقاء لله ايه.
الي دتسووه ميرجعها. انتبهوا على امكم هيه الي بقت

بداخلي كلام يملي ارجاء المدينه.. بارضها.. وسماها بديت
احجيه
: روان صغيره على الموت
اني وملاك ورعد قتلناها حوبتها راح تطلع بينا

: كافي ايه تعالي نفوت جوى.
اريد اسلم على والدتج من يوم المستشفى مشفتها

: ماما ميته باقي بس النفس والحسرات بيها

: دفوتي كافي صريخ وعياط الناس تتفرج

واحنا نمشي ترك ايدي وابتعد وكانه بمهمه رسميه... وانتهت وگان احساسه بيه مات

بالبيت صديقاتنا دينظفون
ويعزلون بعد العزا

وماما. مطلعه ملابس روان وتشم بيها
بهذا المنظر  خلاني اتمنى الموت فعلا...  مابقى واحد واگف على رجليه الكل بالگاع ويبجي

واثق وطلال  تماسكوا... وجبروا ماما  تكوم... وتدخل غرفتها ترتاح. وتاكل

اني وملاك وحده متباوع بوجه الثانيه ..
اخذت  ملابسها صفطتها .. ريحتها لحد الان بيها.. شگد تحب الملابس جانت... وتحافظ عليهم... اويلي عليج انحرمتي من الدنيا
وضعتهم  بجنطه ومعاها العابها.

: وين  راح توديهن

: احتفظ بيهم لحد تكبر نوارس. اكيد تريد شي من ريحة امها

: نوارس من تكبر راح تكرهنا كلنا

: عدها حق اذا احنا كارهين نفسنا 
دخلت لغرفه ماما
خليتها  الجنطه بيها
وطلال گاعد يمها... تحجيله عنها وهو يسمع 

بدات الناس تودعنا.. وتطلع. واحد بعد الثاني
هذي نهاية كل انسان تلث ايام عزا  ... والايام الي بعدها  يصبح
ذكرى
  ...الاحياء يبقوون يتصارعون مع الذكريات ...والالم ...والحزن

نامت ماما ...
واثق  وملاك بغرفتهم

ادور بالبيت عن انسان يشيل عني ... يضمني بين اديه ...
يگلي مالج ذنب بالصار
ونزلت للبيسمنت ... ادور على هالشخص ... طلال
نزلت الدرج الاضويه مطفيه
باقي فقط التلفون تجي عليه اشعارات .. وهو نايم  على القنفه ... الي يادوب مكفيته
گعدت لوحدي ...
  سهرت مع حزني  ...
وخذلان الدنيا.... وصدمات عمري
اقرا قران ...واصلي.. وادعي
ربي يرحمها... ويخفف عنا العذاب...
الساعه وحده فز على صوتي ابجي
    سمعني  كلمات مواسات  ( اصبري. ..وارتاحت . انتبهوا على امكم ) كلمات انطتني احساس ان هو خطار جاي يادي واجب  مو جاي يوگف مع زوجته بمحنتها

گمت افرش اله لان واضح المكان ممكفيه

خليت افراشنا سوى  .. وهو ماقبل
: خلي افراشي اهنا بين القنفات
عندي مباراة باجر

افتهمت قصده ... وسكتت
كنت اريد مواساه .. شخص يمدني بالقوه ...

فرشت الفراش بالمكان الراده هوه ..
ورجعت لمكاني  اقرا ادعيه بالموبايل

نام بمكانه  وسالني

: مراح تنامين  ؟

وجدتها فرصه اشكيله

: مقهوره طلال .. وخايفه من الجاي

: شنو الجاي تقصدين

: ماما خاف متتحمل وتموت ...
ونوارس تضيع مني

: ان شاء الله كل هذا ميصير
ارتاحي انتي صار تلث ليالي منايمه

بتوسل .. وضعف .. وقلة حيله

: طلال تتذكر  بموت والدي الله يرحمه .. تتذكر من گتلي اني موجود .. واخذتني بحضنك
فعلا بيومها حسيت  عندي سند

فدوه طلال لاتسافر. وتتركني
لخاطري ابقى ويايه ... على الاقل مااشيل همك وانت بالمصارعه

مارد عليه
: ها طلال شگلت 
: مااگدر ايه صدگيني هذي مواعيد  محجوزه  ورهانات  وناس تخسر

: وكل هذا اهم مني

: لا  مو اهم  ياايه بس انتي تعرفين  اهنا المواعيد عدهم  مهمه .. وكلشي محجوز  وماتفق عليه
اذا اتاخر. او الغي لعبه  .. بعد محد يتعامل ويايه
ان شاء الله من ارجع  من المباراه ابقى وياج

: وبعدها تنتقل لهنا تعيش ويايه

: من نشتري بيت  اهنا  انتقل يمج

: هذا البيت فارغ منو بيه

: حبيبتي نامي هسه النقاش راح يزيد الخلاف بينا .

: لعد ليش اجيت مو قررنا منترك بعض

: اجيت اوگف وياج

سكتت حيل مابيه اتعارك واصيح

وگمت حتى اصعد واتركه لوحده ... اريد ابجي ومااريده يشوفني
اول مره احس بيه اناني وماعنده قرار .. ويحب يعيش دور الضحيه
وگفت سالني ( وين رايحه ؟)

اصعد نام بالغرف فوگ فارغه

فتح الضوى  وهو يگلي

: ليش تسوويها  خلاف وتكبرين المساله  ترى الخلافات بينا متستدعي هالعصبيه

ايه : شنو الخلافات بينا ؟ ممكن تحددها اليه

شوكت تبطل دور الضحيه ؟
وتوگف لعمرك وشبابك .. تتصور بس انت الي تعاني
باوع زين شوف الماسي الي عايشتها اني
اسمع الاخبار شوف المصايب بالعراق والانفجارات والايتام
والمرضى بلا علاج

اترك  المصارعه ؟  اشتغل وحس بالتعب .. وقيمة نفسك
بس  الظاهر الي اغتصبوك بابو غريب
لحد الان عايشين وياك
ويتحكمون بيك

الاحتقان بوجهه ونظرته اليه المليانه غضب ماگدرت تهديني  واسكت كملت لمن شفته ساكت  ردته ينفجر. بيه  وبلحظتها كنت احاول انهي هالقصه المأسوويه

ايه : شوكت موعد  المصارعه القادمه  ؟
جاوبني وهو ينظر الى مابعد السوال 

: بعد يومين

: لعد ليش تريد تروح باجر انت من تكون ويايه تتمنى تبتعد عني ومن تركتك اصطنعت حاجتك اليه شنو حاجتك بالضبط

وكف على حيله ... وجرني
من ايدي للگاع ..
ونصى يمي  .. واديه على وجهي  يعصر بكل قوته كل وجهي

: شبيج. شنو الي ترديه
تريديني اذبحج ونخلص
كلمة اغتصاب اذا كررتيها متبقين عايشه 
ترى ساكت لان مقدر حزنج

واني جوى اديه  ماخفت وكملت
؛ مااريدك تقدر  والي عندك سويه
روح اضرب وانضرب حتى تحس انت بشر
مو هذا الي انت عايش علموده مو هذا شغلك
المن جايني  ها ؟  واجب اديته يله توكل بالله  اني مفارغه اعالج مرضى نفسيين  عندي مسؤولية ماما ونوارس  انت شوفلك وحده غيري تتحمل الرهبنه الي انت بيها

ضربني ابطني  مرتين

كام بعدها 
وبدا يغير ملابسه حتى يطلع

: صدگي لو ما اني ابيتكم وامج اخاف عليها تموت بسببي
والله متبقين عايشه
الرهبنه انتي الي رضيتي بيها
ومتي حتى نعيش سوا مگتلج اني ولاخدعتج.

:  وانت الي اتصلت وگتلي لاتعوفيني وبعد مااتحمل خلص انتهينا

: انتهينا  وانتي طالك
سمعتيني

سمعت كلش زين.. وبوضوح  صحيت من نوبة الهستريا الملازمتني
ونزلت دمعتي امامه
ماحجيت  ليكرر الكلمه  وهو تحاشى ينظرني
خايف لا اگله كملها
صعد الدرج  ..اعد درجه درجه ليندار.. ويكررها..  فتح باب الحديقه..  وسده خلفه
طلع من البيت  وتركني اواجه عاصفة الاسئله من ملاك
الي كانت تسمع
نزلت الدرج فاتحه عيونها
وساده حلگها من الي سمعته

: وج ايه طلال جان بابو غريب

ويه الكلمه احساس مابقى عندي  والغصه خنكت الحجي

: ملاك فدوه اسكتي . لاماما تسمع فدوه اروحلج مااريد احد يعرف
هذا رجلي صعبه احجي اسراره

گعدت يمي اتدك على نفسها
:وج يارجلج .. وج طلگج وطلع
احجي شصار  ها

:ماادري  ضليت اصيح عليه واغلط لحد گالي الكلمه

: وهسه ارتاحيتي

: لا. نار وشعلتها بگلبي
بعد لو اموت ميرجع

: وهوه متزوجج لو لا

:  ملاك باعي على فراشه وينه وافراشي وين
صار اكثر من شهر  ممتشاوفين  مااقترب مني حتى لغرض المواساة. ملاك اني تعديت ٣٠  احس كبرت  والي ديسويه ديحسسني كبرت اكثر لدرجة فقدت كل ذرة انوثه ممكن تخليه ينجذب اليه ومصيبة روان مخليتني اريد انهش الناس باظافري مابيه حيل طلال وضيمه

: وج غير تحجين تگولين
ياربي شنو هالمصايب  شسوينا احنا

: ملاك بداعة روان بداعة بابا  ميطلع الحجي .. فدوه اروحلج
اموت والله اذا احد عرف

: اخذتني بحضنها. وحلفت متحجي
——————————
ملاك :

مصيبة ايه  الي عرفتها اليوم مع
شعور ي بالذنب ال قاتل . وكاني قتلتها
وكل ذكرياتي واني
اراجع مواقفي وياها. كل حياتي اتصورت داربيها... اتضحلي كنت فقط اضطهدها
لحد ملت وتمردت  حتى على نفسها
نار الي داخلي عليها وعلى بنتها
حرگتني  بلا رحمه
كل هذا دفعني  ... اهرب من الواقع  بالمزرعه ... اشغل  نفسي ساعات  النهار  لحد مغيب الشمس ... اگعد قبل واثق ... واطلع من البيت 
بجانب الاشجار. الي صرت اعرفهن  وحده وحده ..
واداري دموعي. بالمنحل او بمشتل الورد ...
محاولات ... ومحاولات
بگد ماتبعدني عن التفكير  بالنهار
ترجعني  للتأنيب بالليل

————————-
رعد :
كلشي بحياتي فقد معناه... بعدها
ماتت بين اديه.. وتركتني عايش الذنب 
كلمة حزن لايمكن تشرح حياتي
بعدها  المهدئات اصبحت  انيس وحدتي... اشربها  وانام اريد بس اليوم يعدي واشيل هم اليوم الثاني ...
لمن تصبح الحياة عباره عن عذاب... وتانيب ضمير... بكل دقيقه
لمن تنام.. وكل امانيك  ان تكون هذي اخر  لحظه بعمرك ...
لمن  تبحث بكل زاويا بعالمك عن وجه.. ينهي معاناتك
وتعرف هالوجه راح.. ومستحيل تلتقي بيه
اعرف ان حياتك توقفت والي تعيشه الان مجرد رحلة عذاب ...متعرف شوكت تنتهي
....

بعد عزاها  انعزلت عن الناس والعالم... بغرفه ايجار قريبه من المستشفى...  حتى اكون قريبه من بنتي نوارس

ام ملاك مريضه  ومهدود حيلها على بنتها 
وايه بين امها  وبنتي
كل  مااروح  للمستشفى تصب غضبها  عليه
وتفرغ قهرها بتهديدي باخذ بنتي

واني ازور  بنتي. شفتها  داخل غرفة  الخدج..  وبيدها  نوارس  والممرضه  تعلمها  كيف ترضعها  بالممه..  وايه واضعتها على اديها ومبتسمه.. وهيه ترضعها   ..ونوارس واضح عليها الاطمئنان بين اديها
سالت الممرضه

: اگدر ادخل اشوف بنتي

: طبعا تگدر  
انطتني ملابس خاصه وفتحت الباب حتى ادخل
انتبهت ايه  على وجودي اندارت... حتى متشوفني

وكفت  يمها 
: اگدر اشيلها

: ماادري اسال الممرضات

وسكتت تمشت بيها بعيد عني
وبعدين سالت

: من راح يحققون وياك وتدخل السجن. منو يتكفل بالبنت لازم تنطيني توكيل بحضانتها

. منو گال راح ادخل السجن
التحقيق ديمشي ولحد الان مافي ادانه ضدي وداراسل اصدقائي حتى يرسلون نسخه من العقد بيروت

: مستحيل اخلي ماما تشهد لصالحك انت قاتل. ولازم تاخذ جزاك 

: الوالده اذا تريد تقابل ربها وهيه ناكره شهادة حق. فبراحتها
اما عن جزائي فاخذته بحرماني من روان. وبنتي الي راح تعيش يتيمه

: مراح تعيش يتيمه اربيها اني وادللها

: مثل حال روان ممنوع عليها كلشي بس الهوا  والاكل

: احجي عن نفسك الي حرمتها حتى الدكتور  يشوفها  والتهيت باشباع رغباتك منها

. روان حبتني وعرفت السعاده والامان والحب ويايه

: روان كانت تبحث عن شخصية الاب  بحياتها. لو  يرجع  الزمن بيها  مستحيل  تقبل بيك زوج

:حقها تدور على اب من كثر القسوه  الي بيكم عليها

: شوف  رعد  ماكون  بنت ابويه اذا  ما اخذت  نوارس منك  وحرمتك منها  ولعلمك في وصيه  لروان ان البنت نربيها احنا

: وين الوصيه. اريد اشوفها

: مااعرف وين تركتها  بس من هاللحظه راح ادورها  وارفع قضيه وصايه

: ومن هالحظه راح انبه المستشفى ممنوع تدخلين على بنتي او حتى تقتربين منها

اطلعي  برا يله اطلعي
تركت  الغرفه ورحت على الاداره  وخبرت الكادر  تريد تسرقها  تجمعت الاداره حولنا وطلعونا برى الغرفه حتى نتفاهم

تكلمت مع المدير. بعصبيه

: بأي  حق تحمل بنتي  وتهتم بيها 

: افتهمنا ان هيه خالتها

؛ اني ابوها واني ارعاها
ممنوع تقترب منها

: امها وصت  اني ارعاها

: في وصيه مكتوبه حتى نضمها بالملف

: مافي  وهذي  كاذبه  ممنوع تقترب  من بنتي  المستشفى يتحمل  المسووليه  اذا مست بنتي

:  هو الكذاب صدگوني في وصيه هيه تركتها واكيد عنده 

استمرت هيه  تهدد   واني اغلط عليها
وكل ماتقترب  من الزجاج  يمنعوها
دفعوها  وظلت تبجي
واني وقعت اوراق 
بالمستشفى اني الي اراعيها وبس
وايه نزلت على الدرج تضرب بالحديد برجلها بكل قوتها

بعد التوقيع دخلت على غرفة بنتي  اتعلم اشيلها لان حجمها صغير. وشلتها بين اديه وضميتها لصدري  النعومه باصابعها ذكرتني بروان نفس الاصابع الناعمه  ناديتها ( بيبي روان  هذي جزء منج بين اديه وعد احميها  اطمئني )
بقيت اتمشى بيها والمس وجهها البريء  لحد مرت ساعه
تركتها بالسرير الزجاجي وطلعت  ايه واگفه يم سيارتي بالبارك ومنتظره

اول مالمحت وجهها يم السياره
دفعتها وگعت بالارض
على ضهرها
مكنت. اتقصد أأذيها
ردت ابعدها عن طريقي
ردت اساعدها توگف
تهجمت عليه بالجنطه بايدها

: لك مكافي حرگة گلبنا على روان تريد تاخذ الطفله

: مكافي عداوه ويايه مكافي
تحملوني ذنب انتي وملاك شاركتوا بيه

هيه تضربني بالجنطه  واني اضربها. باديها  ضربتني مرتين على وجهي  جتي الضربه على عيوني
ثرت عليها ضربتها على وجهها وجريت اديها وگفتها على السياره
صاحت  ساعدوني تهجم عليه

الناس شافتنا دخلوا على الامن
وفي اشخاص عرب اتدخلوا بينا

بعدوني عنها وهيه ابتعدت
وصلوا الامن بالبنايه وحققوا ويانا

: تهجم عليه. وضربني

  :  في  كاميرات اكيد.. شوفوا شصار  باعوا عيوني ضربتها

: هذا مستشفى. ممنوع هالتصرفات اما تغادرون او نعمل تقرير للشرطه

: اعملوا تقرير لا تخلوه يروح

صوتها وتصرفاتها تثبت فقدت عقلها  
تحوم حول سيارتي وكل شويه تضربها وتصرخ  ( اتصلوا بالشرطه )

. ماعندي مانع اتصلوا بالشرطه

اتدخلت ناس يهدوني ويهدوها
ساعه يله
اقتنعت  تروح وتترك التبليغ وتوعدتني
( اني الك اذا مافضحتك بكل مكان )
صعدت سيارتي ورجعت للبيت

———————————-

ايه

زياده بحرگان دمي.. من رجعت للبيت لگيت رعد  متصل  ب بواثق الي صاف وياه 
وهو يدافع عنه

: رعد ابوها. من حقه يربيها.

: روان وصتنا احنا نربيها لو نسيتوا

: اكيد نربيها بس مو نحرمه منها.  وبالتفاهم منريد البنيه تكبر على المشاكل بينا وبينه  كافي تفرجون  الناس عليكم

: ها انت لان راح يصير عندك طفل متريد تتحمل مسووليتها لاتخاف اني اربيها

: الله يشهد  مااتركها لرعد لويصيرون عندي عشر اطفال اني وايه نربيها

: يابنات افتهموا قصدي.  روان كانت محتاجه اب بحياتها وانتم انشغلتوا بالحياة والشغل
لاتعيدن نفس الشي مع نوارس

: روان كانت عايشه مدللة اني وملاك دللناها .. مواعيد علاجها مافوتنا موعد  لحد هالحقير طلع بحياتنا
. وخلي يكون بالكم. اي وحده تتقدم للشهاده لصالحه. معناها اتخلت عن بنت روان 

:  روان تحب رعد وهو حبها انتم مشفتوا. حالته بالعزى
كافي نحرگ گلبها عليه

: الا احرگ گلبه . والعصر ارفع دعوه اطالب بالحضانه اليه
قبل لياخذها لكليفورنيا

ملاك سالت ماما اذا تشهد ويه رعد

: مااشهد اذا ماينطينا حق بتربيتها  اذا تزوج شلون.

:  حجيه هو فهمني اخذ موافقتج  قبل لايعقد عليها

: ايباه على اساس لو مموافقه مياخذها
هو خطط ودبر. وخلانا حجايه بحلگ الناس. وهسه اجى الوقت  خليه احجايه

: صحيح اخذ موافقتي
ومثل ماهوه ينكر وصية روان اكيد وصته اني هم مااشهد وياه ولا اصول لامحكمه

؛ اني طالع من هالحرب انتم بكيفكم

: هيج عندك صديقك اهم من زوجتك. مع الاسف ردتك عون اليه

: اي والله واثق تصورتك توگف ويانا  وننقذ هاليتيمه  دتشوف محد النا  لااب ولااخ

: الي عليه احجي وياه  مياخذها بعيد عنكم ويكون الكم دور بتربيتها

: ايه اتصلي ب طلال يجي يمنا. ويوگف ويانا

: طلال طلگني

الصدمه انرسمت على وجهه واثق وماما الي بدت  تصيح

: ليش محد گلي وليش طلگج احجي شنو معتبراتني ميته

گعدت على الكرسي ابچي وفتحت حجابي  حتى اضم  بيه وجهي ودموعي
وملاك  جاوبت ماما

: منريد. نزيد همج ماما

: ليش شنو الهم جديد عليه  تعودت عليه واكثر من موت روان بعد شاشوف
ليش طلگج احجي ايه

: تعاركنا. وتجاوزت عليه طلگني وراح

مفاد البجي مهرب  امام ماما
وسالتني سوال واثق واگف   خلاني اتمنى اموت

: اگلج انتي ليش مصار عندج طفل. شعجب

: ماما خليتني ساكته فدوه اروحلج
ولاتدخلينا  بمواضيع جانبيه
اني رايحه للمحاميه اوكلها بقضية وصايه..  اه  لو اعرف وين الوصيه الگالت عليها روان

: سالتي صديقاتها معرفتي شي

: مروه انتقلت هيه واهلها لغير ولايه...  مااعتقد تعرف.. وتلفونها ماعندي  وبقيت صديقاتها مااعرفهن

وبديت معركة  اخذ وصايه نوارس من رعد
صممت على قراري.. وطلعت ابحث عن محاميه
يمكن الفشل الي حوطني بكل ركن حياتي ..
يمكن تجاوزت مرحلة وهم  الحب...   وانولدت عندي رغبه  باحساس   الامومه
يمكن اريد انتقم  لروان ولصورها العالقه بذهني وهيه تتالم بايامها الاخيره
ليش هو يعيش ويرتاح وروان ماتت ؟
منو يضمن مراح يتزوج ويترك نوارس لمرة اب ظالمه ؟
منو  يضمن مينهزم ويحرمنا شوفتها؟
مهما كان دافعي  نوارس تحتاج حمايتي 

....
وصلت على محاميه اسمها فيء وكل الجاليه يعرفوها...  وشرحتلها الموضوع.. وبدات تاخذ معلومات مني حتى تتوضح القضيه ..

: اعطيني سبب اقنع فيه القاضي ان رعد اب غير كفؤء لرعاية الطفله

: هوه عليه قضيه  زواج من قاصر ويحتاج شهادة ماما

: امك لو شهدت ضده ياخذ من ٨ الى ١٥ سنه وبهذي الحاله يمكن نقدم طلب وصايه على الطفله

: واذا شهدت لصالحه

: اذا نحتاج سبب قوي مثل دليل ان زوجته كانت معنفه من قبله
او  هوه  مدمن

: كل هذي ماموجوده  اني فقط اريد انفذ وصية اختي وصتني اربي بتها

: اوكي نرفع القضيه يمكن يحس بالضغط عليه ونتفاهم معاه

بعد جلستي معاها طالبت باول دفعه.. من الاتعاب.. دفعتها  وصيتها تهتم بالقضيه اكدتلي ترفعها من بكرى

رجعت للبيت ملاك راجعه للمزرعه مع زوجها. وماما متحجي ويايه
نزلت للبيسمنت فتحت تلفزيون
دورت على القناه الي تعرض مصارعه ماموجوده على اشتراكنا
حاصرني  الشوگ اله  ...طلعت التلفون اباوع صوره..  دخلت على حسابه.. مفاتحه صار يومين
اكيد عنده مباراة

مشتاقتله.. بگد  مابايعني 
مشتاقتله.. بگد مارافضني
ادري الي صار بيه صعب وانطعن  بكرامته... ورجولته
لكن لو يحبني كان رادني
ومحى كل ذكرياته الاليمه ويايه
مشتاقتله بگد  رغبتي  الي تمتلكني الان.. وتگلي اتصلي بيه
مشتاقتله  لدرجه لو  يجي  الان
اوقعله  صك مفتوح بعمري الباقي
مشتاقتلك   ماتعرف معنى الكلمه لانك ماجربت الشوگ

——————————
رعد

تبلغت  برفع  دعوه بطلب وصايه...  على  بنتي رافعتها ايه

بالاضافه  للقضيه  الاولى تحدد النطق بحكمها  بعد عشر ايام
كان لازم اتصل ب ام ملاك واوگف ايه عند حدها
الظهر خابرتها ...
صوتها ميطلع. اكيد من كثر البجي  على روان ..

: حجيه  تعرفين ايه رافعه قضيه عليه تريد تاخذ بنتي

: يمه انت هم قدر وضعنا.. هذي بنت روان يعني  بتنا ميصير  تحرمنا  منها. نريد نشوفها... نربيها.. وانت رجال وراك  شغل  وراك  زواج ثاني اكيد

: حجيه  الطفله بنتي اني ومحد راح يربيها غيري خصوصا  ملاك وروان مااريدهن يقتربن منها. كافي الي سونه بروان مستحيل اترك بنتي عدهن ولاحتى ساعه

: واني هم متريدني اشوف بزر بتي النحرمت منها

: انتي اجيبها الج تشوفيها
واخذها

: هذا مو حل. خليها  عدنا وانت تعالى شوفها شوكت متريد   لاتحرمنا شوفتها  هذا البقى من ريحة روان

: بنتي  مااريدها  تتبهذل بالبيوت هذي غاليه وامها غاليه عليه. ..روان عاشت سعيده مدللة عندي  لو ما الموت  مستحيل نتفارك. .ونوارس راح تعيش مدللة.. عهد انطيته لروان وماارجع عنه ابد

بقيت في جدال ونقاش معاهم

البنات مصرات هنه يربنها
واني اسم ملاك وايه من اسمعه
ودي امحيهن من الوجود ...
وحتى ام ملاك. لو واگفه ويانا بزواجنا. انحلت كل الصعوبات
بس هيه رضخت لبناتها

هنه   السبب  الي خلاني اخذها  لبيروت بعيد عنهم ...
العنوسه  الي كاننا  بيها
خلتهن  يرفضن زواجنا  ونعيش مثل. باقي البشر الي اهنا
وهسه جايات يمارسن ضلمهن على بنتي مستحيل يوصلنها

مرت ايام  يدزون ناس عليه ..
واثق حاول..  ودخل شيخ الجامع   ...رفضت
وبالمقابل  ام ملاك رفضت تشهد ويايه 

لحد وصل موعد المحاكمه الاولى الي هيه تهمة اغتصاب  من قاصر
وبدت المرافعه للمحامي والمحاميه اثنينهم يدافعون عني

القاضي نصف عربي من اب عربي وام امريكيه
اول ماعتلى الكرسي  .. امر باغلاق الهواتف ... هالامر انطاني انطباع. بانه قاضي صعب
گعد ونظر للاوراق امامه
ونادى القضيه اغتصاب قاصر
المتهم رعد
تفضل محامي المتهم

تقدم المحامي امام الحضور
: سياده القاضي  الزوجه صحيح قاصر لكن الزواج تم بموافقة ولي امرها  الي هيه امها وبدوري اطلبها للشهاده امام المحكمه

الطرف الثاني  الي مشتكي عليه كان يمثل الولايه يعني المدعي العام
وهو ايضا تقدم  بدوره

المدعي العام : سيادة القاضي  مافي ورقه تثبت زواجهم
القاضي توجه بالسوال للمحامي. وگله

:شنو رادك على هذا الكلام

: الزواج تم في دوله عربيه  في قانونها  يعتبر الزواج رسمي اذا كان  بوجود رجل دين
وحاولنا نتصل بيه للاسف مااگدرنا  ... لكن في نسخه مصوره من هاتف روان ل والدتها بالعقد وتاريخه
لو تسمحولي اقدمها لحضراتكم

اشر ( تفضل )
انطاه النسخه باوعها  من كل الجهات. ورد ( فيك)  يقصد غير حقيقي مزور

استطرد المحامي حديثه بطلب

:لو تسمحون لموكلي بالسفر. يستطيع جلب الاثبات
وفي شهادة الام اكبر دليل على الزواج
وايضا طليقته السيده بام الي تعرف بالزواج

رد وهو يحرك ايده باهتزاز فوق الاوراق

: نطلب شهادة الام واطلب اثبات رسمي للزواج 

والمحامي طلب وقت من القاضي

؛ نحتاج وقت حتى نوصل للشاهده لان التبليغ الاول موصلها
وايضا نحاول وضع محامي ابيروت يقدم عقد الزواج

بكل صرامه  سال
: هل يكفيكم   واحد وعشرين يوم
ومحامي توسل بطلب شهر
رد عليه
: شهر ..بعدها مافي اي تاجيل

تعابير وجه القاضي يبدو عليها الغضب ونظرلي وهو يطلع على اوراق القضيه
ويسالني

: انت كنت استاذها هذي لوحدها جريمه

اني سكتت جاوبه المحامي

:  حضرة القاضي تصحيح لمعلوماتك هو مجرد متطوع وليس على الملاك

: ويعني  شنو الفرق وين اداره المدرسه عن تصرفك هذا

ومره ثانيه المحامي حاول يبرر

: حضرة القاضي علاقته بيها بدت ابيروت هيه كانت رايحه سائحه  وهو تارك التدريس اصلا

هز راسه غير مقتنع  وعلق

: ننتظر المحكمه واريد اثباتات على كل كلمة نطقتها

نادى على القضيه الثانيه

غادرت المحكمه وابالي شي واحد اسويه 
اخذ بنتي وانهزم.. القاضي واضح ماخذ موقف ..وقرار قبل لايسمع مني
خططت الانهزام  فقط انتظر محكمة الوصايه على بنتي

——————————
ايه

طلعت
ماما من الصبح. للمستشفى تشوف رعد. اخذتها. ام كوثر .. لان اني  مااتحمل اشوف رعد

رجعت الظهر..  عيونها حمره من البجي..  وراسا دخلت على غرفتها..   بلا  متحجي ويايه   صوتها عله  بالبجي ..
دخلت عليها اشوف شكو

: ها ماما لاتگوليلي مخلوج انتي هم تشوفيها

:  نوارس  ...شوفتها فطرت گلبي هيه  روان  وگاعده وشفت ابوها حاضنها ..وميخليني اشيلها

: ومحجيتي وياه يخلينا نشوفها

: حجيت وياه  ماقبل ويريد يروح  لكليفورنيا  وياخذها
يريد  يحرگ  گلوبنا  عليها

: مو  حجيت  مو  گتلكم واحد حقير.

: يگول بنتي مايربيها غيري

: بسيطه يارعد الكلب  اذا مافرجت عليك الولايه 

شفت ماما حيل تعبانه .. جبت جهاز الضغط اقيس ضغطها
ملاك علمتني  اقيس الضغط وانطيها.  ابر.  انسولين

ضغطها كان صاعد  ومقبلت تروح للمستشفى

: اشوف  اذا  مصرت  زينه  اخذيني

وراها بشوية جتي ام كوثر  وياها صديقات  ماما  يخففن عنها

وصار وسط حديثهن  بجي ..ودموع

صعد عند ماما السكر ...بالليل
طلعت بيها للمستشفى  ...
اعصابي  صارت نار تحرگ
انتظر  .. طلعة الاطباء.. يخبروني عن حالتها ... والهواجس عندي تاخذني وتجيبني
ليكون الدور على ماما ..
رجليها ماعادت تحملني ... وگلبي ضعف نبضه
صرت اكره المستشفى هذا
واكره الادويه ... والاطباء
گعدت  يم  مره عجوز  تنتظر
مريض بالداخل

وطلع الدكتور  : خبرني السكر عالي عدها  لازم تبقى بالمستشفى

: في خطر على حياتها

: لا  مافي  خطر   فقط  نحتاج نراقب  مستوى  السكر  حتى نعطيها  العلاج   المناسب

دخلت شفت ماما. دمعتها بعدها على خدها
گعدت يمها وبست ايدها

: ماما ليش تبجين ؟

: المرض  ماينحمل  شلون  روان حملت  الموت
والحارگ  گلبي  رجلها  راح  ياخذ بتها  تربيها  نسوان  غربه

: لاتخافين  رفعت عليه قضيه وبيوم  المرافعه  انتي  تعالي ويايه   وناخذها  منه

: مالگيتي وصيتها 

: مالگيتها  يجوز  تركتها عنده واخفاها
..

يومين   بعدها. طلعت ماما من المستشفى.. وتجدد عليها الحزن على روان
كرست كل جهدي ابحث عن الوصيه
حتى الغرفه الي كانت تبات بيها دورتها  مالگيتها
ظليت انتظر موعد المحاكمه
ويعدي يومي واني اعيد نفس الافكار ونفس الاحداث

ملاك  خصصت كل وقتها للمزرعه .. بعد ما واثق رفض تتدخل  ضد   رعد
وتركت الشغل  واصبحت تنفذ مشاريع  هيه  مخططتها للمزرعه
في محاوله منها للهروب من تانيب الضمير الي يخليها ليليه   تتصل بيه
وتگلي  ( كله مني ... ومن عنادي )

وارد عليها ( ملاك لازم  نربي بتها احنا. ونعوضها )

صار موعد المحاكمه
حظرنا.  اني وماما.  ويايه  المحاميه فيء

الي دخلتنا للقاعه  وفهمتنا شوكت نحجي
مشايفه محكمه امريكيه
اول مره ادخلها .. اصابتني الرهبه .. خاصة من شفت القاضي ..، وروبه الاسود ... والمطرقه امامه ...
والناس الي وگفت  اول مدخل
ونادى شخص ( ليقف الكل )
وگفنا  وشفت
رعد  ايضا حاضر
   بدون  محامي
ومن  ساله القاضي ليش بدون محامي
جاوبه
؛ مااحتاج  محامي  هذي  بنتي  ومافي فقره بالقانون  تجبرني انطي  حق  الوصايه  لغيري

ترافعت المحاميه عني

: موكلتي متريد تحرمه فقط تريد  المشاركه في تربيه بنت اختها

وهو. استغل  وضعي للتشهير بيه والحط من قدري

: ايه  تميل  للعنف  وسبق وان تعرضت  اني شخصيا للعنف منها  ..وتراجع  دكتور  نفسي ومتزوجه من مصارع.  يمارس العنف ضدها
وتعيش بشيكاغو  بعيد عن سكني وسكن بنتي
وكانت تعنف زوجتي وتضربها
اخاف على بنتي منها
واني راح اكرس حياتي الها واذا قصرت  من حقها تطالب بالوصايه

طول ماهو  يحجي القاضي وكل الي بالقاعه يباعوني 

تمنيت انزل تحت المقاعد واهرب من نظراتهم
منو گله اني اراجع دكتور  ؟ منين عرف  هالحجي
ساله القاضي

: في دليل انها عنيفه

: الامن  في  المستشفى شافوها مره تضربني
واسالوا دكتورتها النفسيه

اندارت عليه المحاميه وسالتني
: صدوك هالحجي

جاوبتها ( والله هو ضربني امام اامستشفى )

القاضي انتبه نتهامس اني والمحاميه
توجه اليه وگلي

:تكلمي  ليش تراجعين دكتوره نفسيه

: الدكتوره النفسيه تعالجني من شغله ثانيه

بديت ارجف وعندي رغبه اضرب رعد

: نگدر نعرف ليش تراجعين الدكتوره

:شي يخصني ماله علاقه بالقضيه

: زوجك عايش معاك بديربون لو  بشيكاغو

ضاعت الكلمات مني والمحاميه جاوبت

: حاليا موكلتي تعيش بديربون. وهيه مطلقه

: عدها  عمل ثابت اوبيت ملك
لو على مساعدات الحكومه

بهذا السوال حسيت نفسي افشل بنت بالكون ..والكل ديسخر مني
القاضي ينتظر الاجابه  والمحامين ورعد ينضروني  باستصغار

: حاليا مااعمل لان كنت  ارعى اختي المريضه من كان رعد بالسجن.  ..والبيت الي اعيش بيه باسم اختي لكن ملكنا كلنا. وكوني مطلقه ميعني مااستحق اربي طفله

اثناء هو يسالني غوشت عيوني
وگعدت

: انتي اوكي

: مااعرف. الي گاله رعد كله كذب روان مكانت معنفه  كانت اصغر وحده  ومدلليها  لكن فترة مراهقه مرات تصرفاتها منتحملها. ..ومتتحملنا.. وهو استغل الوضع وخطفها وتزوجها 
في قضيه ضده  استدوعوا تحسين طالب عنده استغله حتى ياخذها لكندا وكذلك راح ياخذ  نوارس وينهزم

: واضح ان الخلاف كبير بينكم
لو نطلب شهادة طليقك يتقدم للشهاده

: ماادري 

: اطلب شهادة طليق ايه ودكتورتها النفسيه  وتقييم نفسي الها

خلص كلامه ويايه وتوجه لرعد

:وبالنسبه  لرعد  مااعتقد انت افضل من ايه بشيء بالعكس اعتقد هيه افضل 
ولحد احكم
تبقى نوارس عندك  
لحد اقرر عكس ذلك

باوعلنا  بشماته والقاضي ساله

:القاضي عملك حاليا شنو

: اني مدرس ..وكنت متطوع للترجمه بعدة هيئات ومؤسسات  راح ارجع للتدريس بكليفورنيا واريد اخذ بنتي اهناك

بقى القاضي ينظر للقضيه وسالني

: اسال سوال ايه ليش تريدين الوصايه

: اختي قبل لتموت وصتني اربي بنتها  وفي وصية مكتوبه لكن مااعرف وين يمكن رعد يعرف وين

: مافي اي. وصيه روان ماتت بين اديه  وايه وامها  كانوا موجودين  ماوصت باي شي المفروض لو في وصيه وصتنا واحنا كلنا موجودين

اخر كلام ذكره القاضي امامنا كلنا

: اعتقد كلامك صحيح
لكن  اذا ظهرت  الوصيه وتاكدنا من صحتها   تتنفذ مثل ماهيه

: هل يعني مو من حقي اسافر في فرصة عمل جيده اليه اهناك. مااريد بنتي تعيش على مساعدات الدوله

گال هذي الجمله لان يعرف الامريكان يحبوون الناس الي تعمل وتطلع من المساعدات

: السفر والعمل من حقك لكن انت متهم بقضيه ثانيه
مااگدر اسمحلك تسافر يمكن تهرب  

بعد حكم القاضي المحاميه مگدرت تحجي ويه القاضي راحت على رعد الي كان يستعد مغادرة المحكمه

: اخي تعرف هذا ظلم  افرض انسجنت الطفله تضيع بدور الدوله
. يعني هم موت بنتهم وهم تحرمهم  بنتها

: ايه وملاك هنه السبب بموت روان وبنتي ماانطيها

وخلص بعد مااريد حجي بهالموضوع الي ماحنن على اختهن ميحنن على بنتها

طلع بخطوات سريعه وتركنا اني وماما وسط  نار مالها نهايه
رجعنا للبيت هيه تبجي گبال صورة روان وتگلها ( ضاعت بنتج. ماما روان )

واني نظرات الاستصغار  باقيه
امامي
وبقت ويايه

ايام عديده ،... مخنوگه  ونومي مثل نوم المطلوب ثار ..مطعونه بوسط روحي  ..والاستصغار الشفته بعيون كل الحضروا المحكمه خلاني  اعيد تفكيري بحياتي

رجعت  قدمت على عمل في مكتب هندسي   بديربون
وعدوني يردون عليه

فقدت كل اهتماماتي. النهار تسوى مع الليل 
تخلص ساعات النهار بجي وندم
ويجي الليل يعيد الذكريات والهم
لحد جتي ولادة ملاك

——————————-
طلال

مابقت عندي طاقه مااستتفذتها
بمحاولاتي المضي بحياتي
راجعت الدكتور النفسي  مره ثانيه الي
كل نصائحه  مثاليه زياده عن اللزوم

تركته ... ومارديت على سكرتيرته الي تاكد المواعيد كل مره

وقررت اخذ اجازه. من المصارعه  اسبوعين

وحجزت لرحله بحريه

يمكن  بيها استعيد حياتي

حياتي ! ياحياة هذي
مااعرفت الحياة الا وياها
وباقي
انتظر منها حرف واحد  رنة تلفون
مافي
طيب على شنو ترجع. ايه تستحق زواج حقيقي واطفال
اني حتى محاولت
تركتها لليأس  والاحساس بالرفض
ليش اعتب عليها واني الي تركتها مثل غصن ريحان وسط عطش  ومااريده يذبل ويموت
مشاعرها ماتت
لكن بعد ماصحت مشاعري

مااعرف شنو الحل اريدها تبقى ويايه.. ومن تقترب مني احاول كل جهدي ابعدها
اريدها تتحملني ..واني مامتحمل نفسي
  اريدها   تساعدني .. واني رافض المساعده

انتبهت على تاريخ بالموبايل
باقي شهر على عدتها

اكيد  حزنها الان وحاجتها للسند  يدفعها  تبحث عن انسان
اتمنى اكون هالانسان  اني