رواية نوارس مهاجره الفصل السابع والعشرون 27 - بقلم zeanab_almusawi

تعديل بخصوص ملاك صارت طفره بالاحداث 
الله يساعدني مد الحك

هلوووو
متابعيني  الاعزاء
بارت اليوم ركزت بيه على ايه وطلال
واجلت احداث ل ابطال اخريين
حتى تعرفون معاناتها ومتلوموها  على الاحداث الجايه
شكرا الكم ولمتابعتكم وتصويتكم وتعليقكم
🌿🌿🌿🌿🌿🌿🌿🌿🌿

#نوارس_مهاجره27
#زينب_الموسوي

ايه
الي يحسه طلال اتجاه امه هو
تأنيب للضمير  ... بسبب اهماله السوال عنها
اكتشفت هذا الشي ...وهو يتمنى امه يمه  من ينام
يفتقدها .... وبنفس الوقت يقاوم حنينه الها
ياترى عنده نفس الاحساس اتجاهي  ؟
ليش  يكرر  عليه كلمة...(  اتركيني )
وهو  في  اوج  حالته  عصبيته 
مالفظ  كلمة ( ولي)  مثلا
او  ليش  ميطلگني  ؟

هذي الحقائق  توصلت الها
وهو  نايم على وسادته
ويتصور  بصوتي  امه  ودموعه نزلت  وهو  نايم

الصبح قررت استعين بامه واهله واخوانه واصدقائه كلهم
هو مهزوم منه ... واحنا لازم نلاحقه...  ونرجعه... لحياته وحياتنا

اتصلت بامه  الصبح عدنا  وبديت بحديث وياها

: شلونج خالتي. الحجي شلون

: هلا بيج ابنيتي ... طلال وينه

: نايم خالتي  بس يگعد يتصل بيج ان شاء الله

تحسرت  وهيه تجاوبني

: طلال مايتصل بيه  حتى لو من يسمع بيه ميته

: اسم الله عليج ...
خالتي. شنو  رائيج  اگله  مريضه واخليه  يتصل  بيج
اسم  الله  عليج  من  المرض بس حتى  يتصل  يوميه

ترددت وگالت :اخاف يسمع بيه مريضه وميتصل

: لا يتصل وهسه تشوفين طلال گلبه  حنين  بس السجن اثر عليه

اخذتنا  السوالف  اني وياها 
وباخر  المكالمه  اتفقت من يتصل  بيها  تدعي  المرض

بين مكملت الغدى...  هو گعد
لابس نفس التراك
مااعرف شنو قصه هالتراك
يتفائل بيه ... ماعنده غيره ماادري ....
دخل  للحمام  يجر  نفسه  جر
عبالك  بعده  نايم

من طلع  گعد على كرسي  ينتظر الاكل  بدون  ميحجي  كلمه

: طلال تريد ريوگ ...  لو اصبلك غدى

: الي يعجبج ...
حجيه بثگل. ...وبلا واهس

انطيته الريوك ...
وبعد ماخلص ... انطيته
التلفون  وطلبت منه يتصل بوالدته
سالني ليش ؟

: خطيه مريضه وتريد تسمع صوتك
بس  سمع مريضه. اخذ التلفون
وهو  يسال

:شبيها مريضه ؟

دگ  بسرعه ... ودخل للغرفه
وسد الباب ... حتى يحجي وياها
حسبت وقت  المكالمه نص ساعه. بين دموع  ...وعتب ...واعتذار

وحتى من خلصت المكالمه ماطلع بقى بالغرفه 
معزول عني  ... بدلت ملابس العمل

ودخلت للغرفه
بيده  التلفون  واضح  من الصوت  ديتفرج  مصارعه

ومن  دخلت  سدها

: حبيبي اشو. گاعد لوحدك شبيك 

: بصوت حزين جاوبني

: ضايج ... واريد اتعارك
الا شويه اضحك  بس سيطرت على نفسي

وغيرت الموضوع

: تعال نطلع نغير جوا
شنو رائيك 

باوع على السگف وفكر
وگلي
انطيني عشر دقايق ابدل

ترك السرير. ديبدل
واني اخذت مكاني على القنفه
طلع  ملابسه  شافني  گاعده
تعجب  من  وجودي
واني  هم  نسيت  نفسي
راسا  اعتذرت

: اسفه والله  نسيت  هسه اطلع

طلعت ركض 
وبين ميكمل اتصلت  بملاك
اشوف  شصار  وياها
ومثل كل مره  حظها  اخر لحظه
يخلص  شحنه
عرفت الخطيب مجاي للموعد

: اكيد عنده سبب منعه
ترى مو زغير حتى هيجي يسوي

من ردودها  عرفت مهتمه للموضوع يمكن من كثر الصدمات
سالتها اذا. اتصل بعدين  او لا جاوبت

: اتصل ب ١١ بالليل
: شنو  گال ؟

: مجاوبته  حضرت. رقمه
يمعوده  مبين يريد طلعات واتصالات  تالي الليل

: لا غلط الي سويتيه المفروض  تفتهمين  شنو الي  اخره

: فدوه ايه لاتصيرين  مثل. ماما بس تتناگر ويايه
: مااتناگر   وياج  وبراحتج بس لازم  تتاكدين

تحول  الحديث   لشكوى  من جانبها   ...من  ماما  الي  تلح عليها
تسال على واثق ...
سمعتها للنهايه...  واقترحت عليها تسال  عليه... من بعيد لبعيد
وتتاكد. اذا فعلا  نيته يلعب ...
واقتنعت  بكلامي

تألمت  لحالها  ...  ودعيت من كل گلبي ..، يطلع الولد  عنده عذر  ...اخره عن الموعد

طلعنا اني وطلال بسيارته ...
وخبرني  حياخذني للمعارض
السيارات ...
اني هم احب السيارات بس مو مثله... هو  مهووس بيهن

وصلنا لمعرض گلي ان صاحبه عراقي ...
بركنا السياره ونزلنا ..نتفرج السيارات
فجاءه... سمعت صوت شخص
يكول :

يااهلا  بعروسة  بطل الابطال

انداريت ... شفت وجهه اقل كلمه اوصفه  بيها  هيه...  محتال

وجها رفيع... شعره مليان جل او دهن ...
وصوته مبحوح. ومن اسنانه الصفره... واضح مدخن 
گلبي  قبضني  من شوفته

حتى مارديت عليه
طلال الي رد السلام
وبدوا   يتناقشوون عن السيارات والسعر

وطلال اشرلي على سياره  مارونيه
رحت يمها سياره حديثه جدا

وهو اخذ المفتاح  وانطانياه
وگلي
: يله اصعدي سوقيها ...
بقيت واگفه بمكاني
صعد  هو  بالمقعد  المجاور للسايق

صعدت بعده

باوعته
وهو  ياخذ  المفتاح ويشغل
ويشرحلي
هذي الاشارات... هذي الماسحات.. واللايتات

: المن هذي السياره طلال

: الج ايوته  سيارتج قديمه
هذي لايگتلج 

: بس انت عندك  سيارات تلاثه
واني عندي سياره

: ديله سوقيها ولاتناقشيني
خلينا نتمتع بفلوسنا

: حبيبي افلوسنا  ملاگيها بالشارع
دتسافر.. وتنضرب .. ودمك يجري
وبعدين نضيعها على سياره
خلي نشتري بيت افضل

قبل لا اكمل كلامي
فتح الباب ونزل
اجى عليه   فتح بابي  وصيح
انزلي ... هسه تنزلين 

انحرجت من صوته العالي
حاولت اتفاهم وياه
: طلال الناس تتفرج. شبيك
خلص نشتريها مثل متريد

: داكلج انزلي. تتزلين لو اجرج جر

نزلت  ..، ميته خجل
وخلقة شاكر گبالي 
وهو صعد بمكاني
وحرك السياره  وطلع راسه من الشباك
وحاجاني

: اخذي سيارتي  وارجعي للشقه
لمي اغراضج  ارجع واوصلج ل اهلج

حرك السياره بسرعه
وطلع من المعرض

واني يابس الدم بعروگي
المسافه للسياره صارت الف متر
دخلتها....  وانهزمت بيها ...
من عيون الناس الي تتفرج ...
ودموعي طول الطريق تنزل

منين  ماابدي  وياه. ...يگطع الطريق عليه
اسوق ... وادعي يارب صبرني
انطيني طولة البال

وصلت للشقه
مااعرف شاسووي ... الم اغراضي ..، الناس شتكول ؟
ماما المريضه  شگللها ؟
هوه  منو اله بعدي ؟
وسط حيرتي.
دخلت غرفتي وقفلتها عليه
وظليت انتظر ساعات
وساعات مارجع ...
تجراءت  دگيت عليه مجاوبني

بقيت اتصل وهو ميرد  .. حتى اكل مااكلت ..،  صارت بثمانيه بالليل 
جتي رساله على تلفوني من رقمه
راسا  فتحتها 

(اقفلي الباب زين... احتمال ابات برى )

قفلت تلفوني
وفرغت الاكل بحافضات دخلته الثلاجه
ورحت انام  ..، وماگدرت انام وين يبات ؟ عند منو

بهالتفكير... اندگ الجرس
خفت ...هو گلي اقفلي الباب
منو الي ديدك الجرس بهذا الوقت
من باب غرفتي  سالت منو ؟
جاوبني هوه

: اني افتحي الباب
باوعت  الساعه  تسعه  وربع
فتحت الباب
وبلا مااشوفه. درت وجهي اريد ادخل
لزمني من جتفي قوي   ...وصوته باذني

تعالي .. ليش مارحتي ل اهلج
من  الخوف ليضربني كذبت عليه
:

دالم  اغراضي والصبح اروح

سمع كلامي ترك  جتفي
وتراجع. عن  غضبه
وظل يحجي بموضوع ثاني

: هيه فلوسي ... لو افلوسج
شعليج بيه اصرفها  احركها
ترى اخاف عبالج انتي مرتي وتحاسبيني 
اني تاركج عندي لحد  تملين وتركيني

الحجي الي گاله سمعته الف مره
عفته يكرره ويعيده
وهو يحجي
خليت عشى على الطاوله ودخلت لغرفتي
غيرت ملابسي وتمددت بفراشي
واراقب صوت خطواته. والضوى بالصاله
ومن صوت المواعين  عرفت اكل ...
وظل يفتر بالشقه الظاهر معدته

تقيء ساعه ١ بالليل
ورجع   يفتر.
بعدها دگ الباب عليه  وفات راسا
وبفعل  امر. بدا جملته

: گومي نوميني ... راسي ومعدتي

اخذت  وسادتي  وگمت 
هوه  يريد يسالني عن الوساده
عرفت.... وبلا ميسال وضحتله

: انومك  ميخالف بس ابقى نايمه يمك .. اني مو اضل رايحه جايه
ماعلق طلع من الغرفه قبلي
ودخل لفراشه  طفيت الضوى

وبالسرير بجانبه  گاعده

ويمكن  لاحظ   متضايقه من الموقف السواه  بالمعرض
وحاول ينطيني مكان بالسرير

وسالني سوال واضح يريدني اجاوبه  ب (لا )

: صدك  باجر  تروحين
جاوبت بثگل

: بكيفك انت
: لا انتي بكيفج

اختصرت الكلام وياه

: اگلك خليني انومك  ..، اني هم نعسانه واريد  انام

سكت مارد عليه  مع ان الكلام تارس عيونه
  وسالته
والدتك كانت تغنيلك قبل لاتنام ؟

اتذكر  شويه  وگال
: لا متغني بس بين  متنومنا
تقرا  يمنا  قران   ومن كبرنا
عرفنا  ليش

دفعني  الفضول  اعرف
:
:ليش ؟
واجابته اقتنعت بيها ميه بالميه

:امي تگول  القران يخليكم اذكياء ...
ويدخل  بعقلكم
وهم هيه تحصل حسنات

:لعد اطلع القران بالموبايل  واقرالك

واني ابحث في السور المباركه
تذكر السياره.. وعرفت مااشتراها

: ليش مااشتريتها ؟
: طلعتيها من عيني 

ضحكت  ...او وعدته كل ميريد يشتري شي اطلعه من عينه

ضحك  وانهى حديثنا  بكلمه
(نوميني )

طلعت سورة الرحمن
وهوه غمض عيونه 

واني اقرا بصوت هاديء خاشع
( بسم الله الرحمن الرحيم
الرحمن .علم القرأن . خلق الانسان .علمه البيان .)

مع كلمات ربانيه ... وايات رحمانيه
انتظم صوت نفسه ...
وغط في نوم عميق

تغلب علينا سلطان النوم  ...اثنينا
وغفينا على وساده وحده

واشرقت شمس الصباح
ليكون وجهه النائم هو صباحي
قبلته بجبينه ...
بقبلة رسمت على شفاهه ابتسامه
تتحدى صبر قلبي

نهضت من السرير  سعيده
وتجدد حماسي في مواصلة المطارده  للنهايه
ويمليني الامل النهايه تكون لصالحه
بديت بتحضير الريوك
واتصلت بوالدته
سلمت عليها وگعدته يحجي وياها

لليل  شفت بتلفوني منشورات حلوه  وذكريات جميله
ناشريها اصدقائنا
ضميته للگروب بلا مااگله
وهو  متمدد  على القنفه

اخذت كرزات ... وفواكه
اجيت يمه ... وخر. رجليه
وگعد حتى اگعد يمه

گعدت وبيدي التلفون ... وهو مشغول بقناة المصارعه

واني اقرا واضحك
وكل مااضحك يندار عليه
لحد سالني
: شبيج على شنو تضحكين

ضحكت وجاوبته

: طلال اقرا. جماعتنا. شلون يحششون على استاذ  سيف تتذكره
: شلون مااتذكره  ... كان اول ميدخل بدل ميصبح علينا
يگول ناقص عشر درجات

بعلو صوتنا. ضحكنا 
وانطيته التلفون
تفرج منشوراتهم. وتحشيشهم
قرا اسماء اصدقائه
وهو يتذكرهم

: هذا محمد الاشگر ... وعادل
وخضر  خابصها

يتذكر ويبتسم
من جهازي دگ على عادل
اخذ التلفون... وطلع للبلكون يسولف...  واني اباوع عليه من خلف الزجاج ...طول ماهو يحجي
يتحرك رايح... جاي... ويحرك ايديه هوايه
طال الحديث گعد على كرسي موجود يمه
وبدا يسترخي ومرات يبتسم بعدها ضحكه عاليه
لمن خلص
دخل عليه مبتسم

: ايوته تعالي شوفي المنشورات

: يامنشورات

اجى گعد يمي

: باعي  هذي  جماعتنا  شلون يحششون علينا بيوم عرسنا

ودار في صاله  لم تعد حزينه مثل ماكانت
حديث مرح وذكريات لها  رائحه الحنين وطعم الوفاء

: ههههه  شوف الصور عزا جنت زغيره كولش

: هذا محمد الاشگر. ناشرها

: اعتقد الصوره مگصوصه.. لان احنا مناخذ صور لوحدنا ابد

: اي بس لان واگفين حد بعض  واني داباوعج

: واني شدعوه هالگد الابتسامه شاكه حلگي ممصدكه شنو

: الا اعلق بالگلتيه

اخذت التلفون منه

: لا عفيه  شنو  تضحكهم  عليه
وهو  يحاول  ياخذ التلفون من ايدي خليته ورا  ضهري

مد ايده خلفي. ونصف جسده عليه
اجسادنا اقتربت... وارواحنا اكيد اقتربت اكثر
حس على نفسه... وبسرعه گام

وابتعد عن كل الموقف  بجملة
: يله بدلي  نطلع نشوف المدينه بالليل

بلا  ماابدي اي تأثر  او يأس
بدلت

طلعت وياه...   وافترينا... وضحكنا
ورجعنا للبيت بالليل

ومثل كل مره
اخليه ينام  وبعدها اني انام

والايام الي بعدها. استمر يراسل اصدقائه...  ويتابع الصور والاخبار لجماعته
ويروح الجم
نقترب بگد مانقترب ...وفجاءه يفز
وينهزم باي عذر
——————-
:
روان

انطيت التلفون  لرعد  يجاوب بام

تغيرت ملامح وجهه وهو.  ياخذ التلفون  مني... ويجاوبها... وطلع من  الشقه

صارت نار بكلبي.    فتحت الشباك  حتى اسمع... انتبه عليه ...وغير مكانه

اففففف   مالحگت   سمعت ولاكلمه
ضليت   افور  بمكاني 
مزقت الكتب... والدفاتر... وبعثرتهم

رجع بعد عشر دقايق... اني متعاركه  ويه  روحي  عشر  مرات

رعد
جاوبت الاتصال... ورجعت
لگيت روان  مزقه  الكتب والدفاتر ...
وتبجي بوسط. الصاله

تركت التلفون من ايدي
واجيت يمها گعدت

؛ شصاير. روان ليش هيج

وهيه مستمره. تبعثر. بالكتب
والدفاتر. وجهها راح يطگ غضب وتحجي

: شصاير. ها ...
مو گلت  طلگتها  طلعت  كذاب

لزمت. ايدها قبل لتقضي على كل الكتب
وصيحت عليها

: مو كذاب طلگتها عند الشيخ

: وليش تتصل بيك

: لان  تتصور  بعدها  زوجتي
لاتاخذين  الاتصال  حجه  حتى تبطلين  من  المدرسه

دفعت  ايدي وگامت بعيد عني وتصيح

:اشو بطلت  بكيفك  ترجعني
وراح  اطلع  واتركك  ارجع ل اهلي  لحد  تطلكها

فقدت اعصابي للاخير

: شنو  هاللعب  مال  الزعاطيط الي  انتي  بيه  شنو  بطلت وارجع  ل اهلي
انتي  لحد  الان  ماخذه الموضوع  لعب  وممفتهمه هذا زواج

:انت  الماخذه  لعب وتتصور زغيره  وتقشمرني   وتضحك عليه  من  تگلي  طلگتها

مابقت اعصاب اتحمل صوتها العالي عليه
: شوفي اني هسه عصبي  واذا ارد  عليج  وتردين  عليه بالصوت  العالي  ممكن يصير
تصرف اثنينا    منريده

تخصرت  وهيه باقصى حالات الانفعال

؛ قصدك تطلكني مو. لان تخاف منها. واني لا

صحت باعلى طبقة صوت عليها

: روان كافي فوتي  لغرفتج وابتعدي عني. بسرعه

خافت من صوتي العالي ...ودخلت. للغرفه ...ورگعت الباب قوي

ممحسبه هذا الامر بام تهدد

والي ثار عصبيتي ماعرفت منو الي  الي داز الصور  الها
شكيت بملاك

وهذي  بسرعه  مزقت الكتب بلا متفهم  شديصير   رادت حجه حتى تبطل

صفيت افكاري بگعدتي بالصاله
منو الي خبرها ؟

ليكون  ملاك  وبام  متفقات عليه 
بس  ملاك متعرف بام
يمكن فاضل اخويه ... حب يخبرها  قبل. لا هيه تكتشف زواجي
ويخسر وظيفته

افكاري. ودتني. لخيار. واحد اتصل بالمحامي

واخذ  احتياطاتي  قبل  لاتبلغ عليه بام
ظليت  بالصاله  حسبت  فرق التوقيت  هسه  بدايه  العصر بامريكا  معظم الناس  بدت ترجع  من  الدوام  ومتجاوب تلفونات  بخصوص   العمل
لكن  اني مضطر
واتصلت

جاوبني  في  المحاوله  الثالثه شرحتله  عن  زواجي  وان بام صار  عدها  علم  اول  شي سالني

: في اثبات  رسمي  بزواجك الثاني  او تاريخه

: مافي اثبات هو عقد شيخ
لان البنت قاصر
لكن في صور  للعروس في بدلة عرس

: الصور دليل ضعيف
موجود انت بالصور

: نعم. موجود في صوره وحده

فكر. شويه وبعدها سالني

: المحامي في شهود ممكن يشهدون  لصالح  بام  ويذكرون زواجك الثاني

: اخت العروس احتمال تشهد لان مراضيه على زواجنا

: حاول تكسب سكوتها عن طريق اختها
لان اذا شهدت احتمال ياخذون بشهادتها  مع وجودك   في نفس مكان الفتاة
فقط عندي استفسار

:تفضل

: شنو الي خلاك تاخذ زوجتك الاولى لنفس المكان وانت رايح تتزوج

جاوبته واعرف راح بداخل يحكم عليه غبي

: ردت ابعد الشبهات عني من اسافر من امريكا بصحبة زوجتي
الحكومه متشك بيه راح اتزوج

: بالعكس ثرت الشبهات اكثر
واذا  صار  تحقيق راح  يسالوك
عن السبب ويعتبروه  تضليل

: طيب  ومساله البنت قاصر  كيف احلها قانونيا

: خليني  اشوف  منفذ
للامر  موقفك  صعب  اذا بام اشتكت ... واخت البنت شهدت
ضدك 
وخاصة  ان  انت  سبق  وخبرتني اتهمتك  بخطف  اختها

: قلقتني  شنو اگدر اسوي

؛ فقط حاول تصلح الامور مع عائلتها

رعد : اوكي احاول
انهيت المكالمه .. ابالي عدة امور ماحسبت احسابها
واخشى من كوني فتحت على نفسي مشاكل قانونيه  مالها حل

رحت  اشوف روان
دخلت للغرفه
البجي  خانكها ...وگاعده  تلم ملابسها

: ها خير وين رايحه انشالله

: راجعه  ل  امريكا  شعندي اهنا.
سكتت  مارديت  عليها  خلي تطلع. كل الي بگلبها
الملابس  نفسها  تدخلهم للجنطه  وتطلعهم

لمحتني. اضحك عليها
تعصبت اكثر

: متروح لمرتك شكو مگابلني

: غير اوصلج للمطار. وبعدين اروحلها

الجواب ثارها  وصارت  كتلة غضب

: يعني تعترف

: احتاريت وياج  اكلج  طلگتها متصدكين  اكول  زوجتي تگلليلي  تعترف

: وين جوازي اريده

هيه تندله وين

: بالدرج  الاعلى  يمج

اباوعها... واضحك

: حجزتي  طياره  لو  احجزلج

سدت الجنطه وردت

: احجزلي  هسه

:
ماعندي فلوس  احجز  كلها خلصتيها بالتسوق

: وهسه  شلون  تريدني ابقى يمك  ان شاء الله

: لج  هو  اكو  احلى  من  تبقين يمي

تعالي خلي نسولف جديات

: مااجي.
وليش  متجي  انت

: حاضر  جاي
من صرت يمها
راحت باتجاه السرير وگعدت اهناك
رحت يمها وگعدت  خليت ايدي داير كتفها وضميتها

: يايوم جذبت عليج
ها 
والله مطلگها
اسمعيني روان.
بام  منين. عرفت رقمج ؟ومنو الي دز صورج ؟

:  صدوك  منو الي دزها  هيه مگالت منو

: لا مگالت  بس اعتقد ملاك

فزت من  مكانها وهيه تدافع عن ملاك

:ملاك متسووي هيج شي مستحيل. اختي. واعرفها

؛  لعد منو 
فكرنا اثنينا بعدة اسماء
وكل الي دزينا صورنا الهم  همه ( ام ملاك ... ومروه ... وام زهراء اختي )
ام زهراء استبعد تسويها  ومروه تخاف من اهلها 
بقت ملاك

: روان بيبي  اسمعيني ترى بام دتهدد ترفع قضيه عليه

: قضيه شنو

: تعدد الزوجات  صح هيه ماعدها دليل  الا  اذا ملاك شهدت

: مستحيل ملاك تشهد اختي واعرفها گلبها طيب

: انشالله يطلع حجيج صحيح
اريدج تتصلين بوالدتج وتفهميها تضمن  ملاك  تصير ضدنا.

؛ اخاف تصير مشكله بين ماما وملاك

: اوكي لعد احجي اني ويه والدتج ونشوف

: اتصل من يصير الصبح بتوقيتهم تكون ملاك بالعمل

: اوكي ننتظر لعد
وهسه خلينا نتصالح ترى غثيتيني من گلتي كذاب

؛ هو انت كذاب لو مطلگها وخلصان منها متجرأت تهدد

: بيبي والله رفعت القضيه بامريكا فقط تحتاج وقت بينا املاك واسهم يراد حصر للاملاك ويشوفون كيف يقسموها

: اني ماافتهم  بهالحجي  وكل الي افتهمه تطلكها لو ازعل عليك

: بس اتمنى يمر يوم اذا متزعلين بيه

: طلگها واني بعد ماازعل منك ابد

: بيبي اني  وياها  باعتبار مطلگين  من زمان  اصلا من اول سنه  زواج  هجرتها

وكلام جر كلام  لحد

الليل  بتوقيتنا...  اول الصبح بامريكا

اتصلت بام ملاك ...
اكيد ملاك بالدوام
والدتها صح تسلم عليه... لكن گلبها مصافي الي مثل قبل وحتى سلامها ثگيل

: هلا بيك شلونكم روان شلونها

؛ بخير حجيه انتم شلونكم

: بخير. الحمد لله

: حجيه  محتاج رقم طلال  زوج ايه  احب  اتعرف عليه  واباركله

؛ ها من تجي ملاك لان مااعرف اطلع الارقام

: انشاالله خير
حجيه في شغله ثانيه اريد اكلج وماريد تصير مشاكل

: مشاكل على شنو ليش

؛ زوجتي الامريكيه  مااعرف. منو  بلغها زواجي وداز صور روان الها
وهذا التصرف ممكن ياذيني
وياذي روان تعرفين هيج زواج ممنوع بامريكا

جوابها. بلا اهتمام ومغثوثه مني

:وشنو المطلوب من عدنا

: حجيه  بس طلب اصغير
اذا صار تحقيق  اترجاج ملاك متشهد ضدي وتذكر  شغلة سفرها ويايه

انطتني حجايه بالعظم

:صح هيه دگه ناقصه منك ... بس اطمئن  ملاك متاذي اختها
مثل ماسويت انت واذيتنا

اعرف الاعتذار  مراح يغير شي لكن اعتذرت

: اعتذر. حجيه ... وارجوج اذا احد سال عن صور. لاتراويهم

بكل عصبيه جاوبتني

: والله الصور  ماخليت احد مافرجته عليها
حتى خوالها بالعراق
بنات الناس مو لعبه عندك
وعملتك لو مسويها بالعراق ذبحوك  عليها

ضاع الكلام مني  ومابقى غير انطي التلفون ل روان

حجت وياها روان وطلبت منها تسال ملاك عن الصور
وعدتها  تفتهم من ملاك وتبعدها عن اي تدخل بحياتنا

انتهت مكالمه
شفت روان خايفه ونفسها تجره بصعوبه
: عزا ماما كلش صارت اعصاب ويمكن راح تتعارك ويه ملاك

: فعلا  والدتج حيل عصبيه واني ماالومها  ..، الي خططت اله اني
كان جنون. وتحدي وعناد

زاد قلقها وخوفها

: اذا الحكومه الامريكيه عرفت شنو يصير

: لاتخافين ميسوون شي قابل يفرقون بينا  نبقى بلبنان عايشين في اسوء الاحوال

: اني ماعندي جنسيه امريكيه بعد سنه تسقط الاقامه اذا مااروح ل امريكا

: قبل لا تخلص السنه روحي ل اهلج زياره وارجعي
ونفرض سقطت الاقامه عنج
يصير عمرج ١٨  وادخلج زوجه اليه بجنسيتي

: اشو خايفه

رعد : بيبي روان اخر شي تفكرين بيه اعوفج
ولج احبج.... احبج
اخ هاي الكلمه شگد شايله معنى وخاصة ال (چ )بيها من تنگال تطلع من نص الگلب وكلها وجع

صفنت تباوعني وتسالني

: منين تجيب هذا الحجي

اشرتلها على گلبي وگلتلها
(منا)

ومثل كل مره تستغل اعلاني عن  حبها  بطلب 

: اذا تحبني. اتركني ابطل من المدرسه
والله ماافتهم فرنسي واريد ابقى يمك

: مثلج كسوله ماشفت

لزمت  وجهي  بايدها  وباستني وظلت تبوسني تگلي حباب خلي ابطل حباب

: عيديها بعد مره
باستني  وعادت حباب ابطل

: لا ماتبطلين 
هو انتي شوكت درستي هيه رابع ابتدائي بالعراق ..وسنتين بامريكا
حتى كتابتج بالعربي مامضبوطه والانگليزي گوه تعلمتي لازم تفكرين بمستقبلج روان ومدام اني وياج اساعدج وماعدنا اطفال استغلي الوقت

: اطفال  شنو
اني يصير عندي اطفال

: لعد اني  اكيد يصير عدنا اطفال حلويين مثلج
بس لاتخافين تبقين انتي البيبي المدللة عندي

صفنت من سمعت كلمة اطفال واضح عليها ممستعده لهذا الشي

: ها وين صفنتي

: دافكر  اذا صار عندي طفل منين اجيب وقت الك وللدراسه والتنظيف

: هسه من يصير الطفل نفكر وذاك الوكت اني اساعدج

: اممممم  لعد الشقه حيل صايره وصخه
الجمعه انطفها اني وياك

: الحمد لله من انتبهتي
باباتي لازم تشتغلين  شويه بالبيت
واذا متعرفين اعلمج ...واساعدج

:اعرف كولشي
غير المدرسه مااخذه وقتي  وهمين  اتعاجز
ولخاطرك  اراح اشتغل

: واني اساعدج  لان بعدج زغيره  وتعبين  الوحدج

وهيه واثقه من قدراتها جاوبت

: لا مااتعب اخلي الهيد فون واسمع اغاني واشتغل

رعد : وليش الهيد فون العود موجود اني اعزف وانتي اشتغلي
هيج يصير التنظيف وقت ممتع
——————————
ملاك
اثناء الدوام واتصلت ماما
تصيح عليه

: ماستحيتي ماخجلتي من تدزين صور اختج وتخبرين عليها

ملاك : ياصور ... يااختي ماما شتحجين
بلا اي تفاهم  اتهمتني وحللت وصدرت اوامرها

:شوفي ملاك  اتركي روان ورجلها بحالهم لا والله ارجع للعراق واعوفج اهنا لوحدج

: ماما وروح بابا الغالي  مااعرف عن شنو تحجين وداعتج انتي

شرحتلي الموضوع واتهمتني اني دازه الصور

: بكيفج لاتصدگيني صدگي برعد  صخونه للزلم الخايفه من تهديد. مره

: وصخونه للنسوان الي الغيره تعمي گلوبها  قبل عيونها
وج هذي اختج وطفله تريديها تتبهذل وتنكسر باول عمرها

؛ لا  اسم الله عليها  واني حلفتلج بروح بابا  وداعتج
مدازه صوره ومالي علاقه بيهم ابد
اصلا اني اريد الناس تنسى

سدت التلفون بوجهي
اتصلت ب ايه وفهمتها موقف ماما مني   وايه  ماهمها غير تسال على واثق

: سالتي عليه عرفتي ليش. خلف الموعد

: سالت عنه بنيه تشتغل وياه
وعرفت  امه متوفيه بالعراق
ومسافر شهر يله يرجع

: ياخطيه  من هاي مااجى واتصل بيج حتى يفهمج  وانتي حضرتيه

: شفتي حظ اختج .. انوب يتمت الرجال

: هههه ماشاء الله حظنا. قناص مايخطي

———————————-
ايه
مثل كل يوم. بالشقه انظف ...
ماابقى ركن مانظفته... افكر اشوف الجيران اذا عدهم تنظيف اساعدهم ...
مليت... وتعبت من هالوضع 
لكن صابره ... ومصره على تغييره
صار تسعين  يوم  سوى
بس  الله يدري شلون... مرت ليليه نفس الحسره انام... واگعد عليها
عبالك فقد الاحساس بيه
يضحك.. يسولف  ...يشتري يغلط ...يعتذر.. يسافر.. يتصل
'ومرات  اكاد  اجزم  بعد ميگدر يتحمل  اكثر  بعد عني
ويظل دافن رغبته بيه  وهاجرني بلا سبب

اجاني اتصال ملاك ومن جاوبت تبجي

ايه : خلصتي عمرج تبجين شبيج

ملاك :لو تدرين ماما شسوت بيه البارحه
ايه : اكلج احجي وفضيها
ترى روحي طاكه  وخاله الدرج بنص الصاله ودانظف السگف

حجت عن  حلقه من سلسلة المناگر  اليومي بينها وبين ماما

: وج ماما سمعت بواثق راجع من السفر  وتريد اخذها لشغله
نعزيه 

: والله ماما عدها ذوق وتفتهم بالاصول

عاطت بيه ( شتحجين انتي )

: باعي ملاك  شيلي الحضر  عنه
واتصلي بيه وعزيه
مابيها شي 
وبعدين انتي سألتي عنه وعرفتي ابن اوادم  ومحترم
حاولي تفتحيله گلبج واخذيه
واگعدي ابيتج وتستتي
ترى بعد فضيحتنا لاتفكرين بفرصه تجييج مثل هاي

: ماادري شگلج
اشيل الحضر  اي .. لكن اروح لشغله  مستحيل

خلصت مكالمتنا اليوميه

ورجعت للشغل
نزعت جاكيت التراك...  وبقيت
بالتاب ودانظف الاضويه ...بالسقف خلصتها  ...واتجهت للشبابيك انظفها... فتحت الستاير
اشعت الشمس دخلت للبيت
وانتشرت  بكل الارجاء
اخذت الفوطه... والسائل ورشيت على انعكاس صورتي على الزجاج... مااريد اشوف  ملامح الكابه ..
وبداخلي رغبه عارمه للبكاء
وغصبن عليه..،  نزلت دموعي واني اتفحص صورتي امامي
واسال نفسي
شناقصني ؟  شبيه ؟ شنو الي يخليه ميحس بيه واني نايمه يمه ؟ يمكن فقدت انوثتي وماعدت اجذبه ؟

طلع  طلال  من الغرفه لازم جنطة السفره الرياضيه
ذب الجنطه من ايده

؛ هاي شنو. البردات مفتوحه وانتي بهالملابس

: اليوم احد كلها سكرانه ونايمه منو يضيع وقته يراقب وحده تنظف  ...وبعدين الشمس تطلع مره بالشهر... خليها تعقم البيت

وهو يجي يمي

:ابتعدي عن الزجاج  والبسي جاكيت بسرعه

: طلال اتركني انظف

صوتي واضح نبرة الحزن بيه واعتقد بگائي اوضح

حسيته   وصل يمي

سد البردات بانفعال واضح

اخذ الجاكيت  ولبسني
مااعرف غيره عليه... لو ميريد يشوفني

تسابقت دموعي  واني اشوف صورتي بعيونه
واديه وكفت  متتحرك كامش الجاكيت  وميگدريسده 
روحي وكل حواسي صارت تنتظر اي بادره منه وهو   خايف لايطخ بيه
ماتحملت گلت الي بگلبي
:( طلال لشوكت  ... اذا انت متريدني ... اني اريدك )
سد الجاكيت و بعد اديه. وبقى واگف بمكانه 
خايفه ارفع عيني واشوف الرغبه بعينه  واساله  ليش  حابسها  ظليت مدنكه

. على شنو تبجين من الصبح

: ماتدري ليش
متدري شگد صعب تحب شخص ماحاس بيك

ابتعد وراح لمكان الجنطه وشالها

مسحت دموعي بسرعه وسالته
اشو مبدل وين رايح ؟

: في مباراه هسه اتصلوا بيه ولازم اسافر

: هم مباراه والله گلبي خلص من الخوف عليك

: لاتخافين  تعودت

: كم يوم تبقى  اذا تتاخر اسافر ل اهلي ملاك  ضايجه  وتريدني كم يوم

: مااتاخر
و ارجع ونسافر اثنينا. نبقى كم يوم عدهم

: مثل متحب انتظرك

: ايوته اريد اگلج شي

رفعت نظري اله

: هذي المباراه  راح اخسر بيها وانضرب قوي

تركت كلشي من ايدي وركضت عليه

:يمه گلبي فدوه لاتروح الله يخليك
لزم ايدي وهو يفهمني

: اسمعيني. هيه سلسله لازم اني افوز مره.. وهو مره
لكن هالمره لازم اخسر.. حتى تزيد الرهانات  ..واجري هم يزداد

: انعل ابو الفلوس الي تتاذى علمودها ليش طلال هاي مو انته مو طبيعتك ،،يعني علموك بالسجن على الضرب  ...والعنف شنو الي يجبرك تبقى مثل مرادوك همه ..
فدوه لاتروح

: ايه داگلج راح اخسر وانضرب حتى متتفاجئين من ارجع متاذي 

: طلال فدوه اترك هالشغله
الله يخليك لخاطري

: اني رايحه الله وياج

كمشته من ايديه اريد امنعه
وخر ايدي.. ومشى
ركضت وراه... كمشت بقميصه

: وك عيني لاتروح واسمعني

بعد اديه... وبلا ميندار طلع
ذبيت نفس على الارض ابجي
لحد دموعي نزلت امامي

———————————-

رعد
المحامي نصحني اصلح الامور مع ملاك وعرفت في  امل بخطوبتها من واثق  من اتصلت بيه وعزيته على والدته
وروان دزت رساله اعتذار الها
اني كتبتها الها 
واتصلت بيها مجاوبت

مر اربع اشهر  من زواجنا بيه اكتشفت ان زواجي من روان بمثابه  احياء  لمشاعر تمنيت اعيشها
احيانا تكون زوجتي واحيانا طفلتي
محاولاتها البسيطه بالطبخ
والتنظيف اكثرها تفشل
لكن تنجح  بايصال رساله لگلبي
ان دتحاول لخاطري

بيوم كتبت قائمة مشتريات حتى اروح اجيبها الها

باوعتها كلها مشتريها قبل يوم

: بيبي هذي جبتها قبل يوم

خجلت تجاوب

: اي ومااتذكر وين خليتها

: ها تقصدين فشلت  ولايهمج اجيب غيرها

:: مو زين داتعلم

؛ والله زين منج باباتي ولو الي يريد يتعلم يبدي باشياءبسيطه
وبعدين يبدع

: شنو قصدك يعني

: قصدي عاشت ايدج بيبي
اروح اجيب الاغراض

؛ لاتنسى اليوم نطلع
صار اسبوع مطالعين

: انشاالله ورا متخلصين دروسج نطلع
————————
طلال

مباراه اخرى... والم اخر 
اعرف مسبقا بنتيجتها.... وناقشت المدرب ان لازم اضربه بالبدايه... وبعدين اخسر

: شمعنى هالمره تناقش انت تعرف هذا مجرد عرض

: هالمره اريد اغير
كافي انتم تتفقون واني  انفذ

بعد اصرار مني وافق يناقش المدرب المصارع الثاني

: اوكي  امهلني لحظات اناقش المدرب للخصم

: بدون متخبره  خليها مفاجاءه للكل
ومن اليوم مااريد مباراه بيها اتفاق

قراري هذا كان  سببه معرفتي ايه دتتفرج..  ومااريد تشوفني انضرب بدون ردة فعل مني

دخلت الحلبه ...
كل التشجيع.. والهتافات والشعارات ...والناس الموجوده
مامحت صورتها تتوسل بيه
( لاتروح )
هالصوره  ظلت امامي واني افاجا الخصم بضربه على الانف فجرت دمه ..
وكع والحكم وقف المباراه
نظرت لمعدين المباراه يتهامسون  بينهم
والمعلق يعلن.دخول مصارع. جديد
تفاجات بهالشي  مكان عندي وقت ادقق... وخاصة ان المصارع الجديد دخل للحلبه بحجم ضخم... وبشرة سوداء
نظرت للجمهور... بدت مراهنات جديده
والحكم اشر... بدا المباراه
تقدم عليه اول ضربه كانت على ايدي اليمنى ..
خلتني ادمع من الالم بعدها على ضهري وگعت ...
نصى عليه مصارع ضربني براسي
وفقدت كل حواسي فقط ..الم
وعيوني تشوف اضويه ...
ووجوه تقترب ...وتبتعد
وتوالى الضرب ...
نفذوا مؤمرتهم ضدي وخدعوني لزياده الارباح

ايه :

تفرجت بالتلفزيون على المباراه وشفت طلال يتلقى الضربات
بكل مكان...  وهو فاقد للاحساس
ورغم عصرة گلبي الي حسيته
صار الف قطعه مفجوره ومنتشره بكل الارجاء ومديوس عليها
اتاكدت طلال محتاج انقاذ... من نفسه اولا... ومن سر بداخله ثانيا
اخذت صور اله  اريده يشوف
حالته اكيد مشايفها
واحتفظت بالصور لحد رجع وهو  مضروب ومورم وجهه

دخل بفتحة الباب وگفت حتى اساعده يتحرك... ويمشي

اشرلي بايده وگال  (ابقي بعيد مااطايق روحي )
دخل غرفته  وسد الباب
نصيت على فتحة الباب حتى اتفقده شفته نايم
تركته ياخذ وقته ينام... وبعدها دخلت اشوفه ...
متمدد بالسرير  ويعصر وجهه من الالم كل ميندار  على جهه

: سلامتك  متشوف شر

: بعد اكثر من هالشر شااشوف

؛ انت جايبه لروحك محد جابرك..، ومااعرف تاليتك شنو

؛ مو وگت مواعظ هسه اجليها.
: صحيح مو وقتها  توكف على رجليك ونتفاهم

انطيته مسكن الالام  ... وساعدته ياكل بالسرير
وبعدها مليت البانيو مي حار
واخذته للحمام 
ومن طلع استخدم مراهم  للرضوض الي بجسمه

ابقيت عشر ايام وياه اداريه لحد

تشافى 
بهذي العشر ايام  شفته يموت الف موته... الم... ووجع..
وعصبيه... من يتصل بالمدرب
ويغلط عليه... ويكله خدعتني ...بعد ماعندي ثقه بيك
ويسد الخط ويرجع يتصل بيه

مرت الايام  وصار  على زواجنا خمس اشهر