رواية نوارس مهاجره الفصل السادس والعشرون 26 - بقلم zeanab_almusawi

هلوووو
متابعيني شلونكم
في بعض التعليقات  تذكر ان ليش طلال ميتعالج نفسي
طبعا مااعترض على التعليق
واكيد لازم يتعالج نفسي
لكن اوضح شغله
العلاج النفسي يعتمد  على استعداد الشخص  ... وتقبله للعلاج نفسه ...والعلاج النفسي
يعتمد على الكلام والتحليل والتجربه
مافي عقاقير او ادويه
فقط مهدئات
وفي صعوبه ان  تقنع اي شخص بحاجته لدكتور  نفسي  ... الا بدافع  ذاتي
مو فقط بالدول الشرقيه
لا كذلك الغرب 
يتجنبون هالعلاج . لطول الوقت الي ياخذه ... وكلفته العاليه
واحيانا. لحساسية الامر
بالنسبه لطلال الفتره الي تزوج بيها ايه
كان يعيش صراع شخصيتين
بداخله
وكان يفضل يكون  مسترتي
بدل طلال
لكون الاول يمثل قوه
والثاني يريد ينساه لكونه يمثل ضعف ... وعار
واني بالسرد. داوضحلكم هالصراع
فمره يظهر طلال ... ومرات مستر تي
فخليكم حتى انشوف من الي يعيش بالاخير
🍁🍁🍁🍁🍁🍁🍁🍁🍁

#نوارس_مهاجره26
#زينب_الموسوي

ايه
اليوم الثالث لزواجنا ....

يوم سفره بالليل ...

واني مستمره اطبخ ...وانظف ...وابدل ملابسي واتمكيج  مثل اي عروس
يمكن كل ساعه اغير ملابسي ...
عارضات الازياء ميبدلن بگدي

الصبح البس تراك ... الظهر
فستان ... العصر  جينز  وتشيرتات

وبالليل  بعد العشى اقشمر نفسي ..، والبس
قميص  نوم 
لا لشيء  البسه لان دفعت فلوسه  غاليه
فالبسه  قبل لااموت قهر

وبالليل اسهر . وحدي ...ادور عن سبب الي يخليه معزول عني ...وكل الي يسويه هو يتفرج مصارعه بتلفزيون... ويفشر... ويغلط على المصارعين... احيانا من كثر انفعاله مع اللعبه... يضرب رجليه بالارض ...ومخاديد القنفه... وينسى الي حواليه

يتهرب .من .النظر اليه
ويطلع من الساعه عشره الصبح  حتى يفتر بمعارض السيارات
ويرجع محمل اكياس اغراض للطبخ

استقبله بابتسامه واساعده بحمل الاكياس

: الله يساعدك
ياعيني الثلاجه مليانه ليش متعب نفسك

: اخاف اسافر.... وتبقين لوحدج وينزل ثلج صعب عليج تتسوكين

: قابل انت رايح شهر. هيه يومين  غير

دور على جواب  وماادري كذب او صدق جاوب

: اي انشالله يومين او تلاثه

دخلت  الاغراض  للثلاجه.... وهو  اخذ مكانه  المعتاد امام  التلفزيون   وبيده اوراق  يقراها

: اتصلت عليك مجاوبت

جاوب وهو يقرا الاوراق ومهتم بيها  بشكل اثار فضولي

:صار عندي شغل   ومارديت

: الشغل اله علاقه. بهذي الاوراق

شال عينه عن الاوراق وبسرعه
رجع  نظرها على نفس الاوراق
وجاوبني

:بلي ...
  سكت وطلع قلم   ... وقع مرتين
وخلاهم  امامه ... ابتسم وهو ينظر  اليه  واني واگفه قريب منه
انتظر  تفاصيل اكثر عن الاوراق
باوعني  بنظره  مترقبه
لردك فعلي. للي راح اسمعه منه
وسمعت

:  حضج  حلو .... ايوته

ابتسمت متفائله. بكلامه
ومااطول تفائلي ... وهو يكمل
اشرلي على الاوراق
( تعالي اقري .... هذا عقد ٣ سنوات ويه  متعهد .... راح يخليني  العب تلث مرات  بالاسبوع  وسفر يومين )

:وين الحظ الحلو  بالموضوع

جاوبني يضحك

: الشقه راح تبقى  الج  لوحدج
واني اجي خطار يوم واحد

ماادري شنو الي قهرني اكثر ضحكته  لو كلامه

رحت  كملت  ترتيب الاشياء بالثلاجه
واتوسل بدموعي تجمد.

ومكفاه كل الي گاله. اصر يكمل شرح

: انتي اذا تريدين. تروحين لديربون واني مسافر   ...روحي الله وياج

لهنا اكتفيت  وحبيت اوضحله  شي

اخذت  صحن  فاكهه  خليت امامه ... وگعدت يمه بدون مااترك سنتمتر. واحد  بينا
واني  ارتدي فستان قصير
مددت رجليه يم رجليه على الطاوله 

اخذ الاوراق. راسا  وخلاها بايده
على اساس يقرا ...
ماهمني الي  سواه
ميلت راسي. على صدره ...
وحوطته باديه... من خلفه   ...ومن امامه

بلا ميتحرك ...بلا ميتنفس
ذكرني بنبره  مضطربه

: مو گلنا اصدقاء

رديت عليه

: اذا  اصدقاء  ... ليش تريد تهججني ... وتهج  من عندي
بشنو ضايقتك ... اشو  حتى  نايمه بغرفه ثانيه

بنفس الجمود  والنفس المحبوس
بعد راسي باديه
وترك المكان  وهو  يرد عليه

: اني شايل همج ... حرامات
يضيع  عمرج   ويايه

تركت المكان اني همه
وصلت عنده. ...
تصور  راح ابوسه. من شافني رفعت  رجليه. حتى اوصله

همست باذنه
:( العمر  فدوه الك ... صبرت ١٢ سنه بدونك ... وراح اصبر بگدهن واني وياك )
نزلت رجليه ... حتى يتتفس
ويطلق  زفير حابسه

دخلت لغرفتي ابدل

و قررت احاول وياه... محاوله اخيره
على الاقل اعرف شنو مرضه

لبست فستان سهره اسود طويل  مفتوح  من الجانبين

وبلا. ردن ...
وشلت شعري
ولبست گلاده باسمه واسمي
وتزينت   بالمكياج والعطر

طلعت للمطبخ  حتى ارتب  الطاوله. 
وقدمت  العشى

وناديته

: يله حبيبي العشى جاهز

باوعني  وابتسم.  وصل  للطاوله
گعد  وهو  يثني  على   الاكل

: الله  كباب  عراقي ....عاشت  ايدج

: بالعافيه   حبيبي
( عجيب لاحظ الاكل ونسى يلاحظني )
ملاحظه لنفسي ( لاتفقدين الصبر )

گعدت  مقابيله على طاوله  دائريه   زجاجيه

وبديت حديث ودي معاه حاولت بيه. اصحي الذكريات داخله

: راح تتصل بيه من تسافر لو تفقل تلفونك

: اكيد  اتصل  وا نتي اذا  طلعتي  لاتروحين احياء  خطره   لان بعدج  متندلين  المدينه

: اوكي  مااطلع   وين اروح
وراح انتظر اتصالاتك  مثل مكنا بالكليه

: ههههه تتذكرين

وهو. منهمك  بتقطيع  الاكل بالشوكه.
وعينه. ترفع حدها. ل اديه

: اكيد اتذكر  اول مره  اتصلت بيه  وكل شويه  حضرتج ....وحضرتج

وهو يستذكر ويبتسم. تجاوب ويايه بحديث الذكريات

: غير اسوي نفسي مؤدب بالبدايه   وانتي  هم  ماقصرتي بالتفيك

: شوكت اصلا دائما على طبيعتي

: ديخلولن  هالسوالف  علينا طبيعتها  كلشويه.... اسمحلي ...واسمحلي

ضحكت. وهوه يقلد  صوتي

:اي مودبه مو بيدي ....

الوقت كان مناسب اعترفله. بمشاعر واسرار  محتفظه بيها صار سنين

:تعرف في. شي لحد  الان محتفظه   بيه ...
انتظر اروح اجيبه
طلال

گامت من يمي
باوعتها...،. ودي  تبقى  تسولف ويايه للابد... عن  احلى  ذكريات عمري

حديثها  حملني بعيد
وصلني  لطلال  الشاب البريء
الي كان يتمناها  ... صديقه ...
وحبيبه ... وزوجه

نسيت الي
اعيشه  من  قهر  ...وحسره عليها
وورعب من صور انتهاكات  مارسوها  ضدي  بسجن  اظلم  تصير گبالي 
كرهوني نفسي ...وكرهت كوني رجل

رجعت بيدها عدة اشياء من ضمنها...  قلم جاف
وقدمته اليه وهيه تضحك  وخدودها. حمره  من الخجل

: لا مستحيل  لحد الان محتفظه بيه

: والله هو نفسه... ولساعه يكتب لان مااستخدمه

اخذت القلم بايدي  وجربته. يكتب على شرشفه الطاوله
ادري متقبل  اشخبط
لكن حبيت المس شي من الماضي

رجعت  گعدت  گبالي ...واني اضحك

ومقابل اعترافها  اني اعترفت بسر صغير

:  عبالج صدفه  طلبت  قلم  منج  ها ؟
استغربت الي گلته وردت  (لعد )!؟

: لج مخطط  ...اريد  فرصه احجي وياج...   وثاني يوم  رجعته ...
ومرتب الجمله .

: شگد لئيم  انت... وليش مگلت بعدين من تعارفنا

: ماكشفت اسراري

: احجيلك  سر  اني  همين

: شنو بالله

خجلت وترددت  لكن حجت

: اني حبيتك ...قبل لاتنتبه انت  عليه ...

: عليج  الله  تحجين الصدك شلون فهميني

جرت نفس ... رفعت  عينها  وهيه تتذكر

: بايام  الدراسه  الاولى  والهوسه  والتسجيل  والبحث عن  القاعات  شفتك كم مره  جذبني  طولك  واكتافك  وكلشي بيك
وظليت  انتظر  يوميه  اشوفك واباوع  عليك  من  بعيد
وفد  مره اني وصديقاتي  فتنا من  يمك  حتى  اقارن الفرق بالطول  بينا
الخيال  اخذني  وتخيلت  نفسي عروستك  ولابسه  گعب عالي
وغيرها  ..، وتكرر  هالخيال  يوميه
وهيج صرت احبك

طلال :
شفت  عيونها  انملت  دمع ...
تركت مكاني... ورحت گعدت على طرف الطاوله يمها ...
رفعت  عينها  وگفت  الدمعه على  اطراف  الهدب
ونزلت بمجرد رمشت   مسحت دموعها
ورجعت لمكاني

ايه :
توقعت  راح  يبوسني
لكن  رجع  لمكانه
وسالني بفضول

: وهذي شنو الي بايدج

: هذا  الشراشف  عليها  اسمي واسمك  هديه  ملاك  النا  بعقد زواجنا  الاول

: الله  حلوه
خليهم لعد حلو  منظرهم

توجهت. اله  بكلام جدي

؛ اخليهم  من  انام بغرفه وحده سوى

سكت ودنگ  راد يگوم

: خليك گاعد الله عليك كمل عشاك

رجع گعد

واني مصممه.يكون. كشف الاسرار. الليله

: طلال اني مثل اي بنيه من تتزوج ...
تحلم... مااعرف شلون اكولك ...
ويمكن  اعرف  بس  الخجل

مسحت گصتي من العرك وجريت نفس  وشربت مي

باوعته  بعده مدنگ  والشوكه لازمها بشكل مستقيم بايده

كملت

: اني من  جيل  البنيه   تتزوج متعرف  اي  شي  عن الزواج وتعتمد  على رجلها  هو يكون المعلم  الها

قاطعني بصوت  تركيز واضح على وشك الانفجار وهو يلفظ اسمي

: ايه كافي گتلج مااگدر

رغم خجلي ... وخوفي 
كملت

: متگدر  شنو  فهمني  اذا  انت حتى  محاولت  ويايه  ومن اول يوم  طاردني  من  غرفتك
متحبني  گول

غرز الشوكه بالطاوله وباوعني بنظره اورده الدم بعينه مبينه
وصاك على اسنانه. وهو يحجي

: مااحب الجنس
انتهينا ...افتهمتي

: لا ماافتهمت. متحبه ويايه اني بالذات لو شنو

: مااحبه  ويه  كل  نسوان  العالم

يمكن اضطرابي وخوفي خلاني اعبر غلط

: يعني تحبه  ويه غير  النسوان
شاذ  انت  شنو

الكلمه فلتت مني... وهو فلتت اعصابه
دفع برجله الكرسي الي گاعده عليه  اني  من تحت  الطاوله
بحيث  انگلب  بيه وگعت  على راسي   وظهري
وصرخت  من الالم

؛ اخ ظهري... ظهري
رفس  الطاوله  كلها

ونصى عليه  اديه  على  رگبتي بقوه ..، وصوته  باذني

: قسما بالله...  لو ما اخاف الله اذبحج  على  هاي الحجايه
وج  والله  مره وصلت  بيه اذبح سجين  گالها  اليه
انجبي  وبعد  لاتفتحين  حلگج
معاجبج  الوضع  روحي  ل اهلج
اني  ماجبرتج

غمضت عيوني واستسلمت للخوف الي جمد حتى الم ظهري
وخر  اديه  عني

ونهض
بقيت  بمكاني  من  الالم
وهو  دخل  الغرفه  وبعد  دقايق طلع  من   الغرفه
وگف  يم  راسي واني. مدزه بالارض
ويحجي ويايه

: اني  انهزمت  من اهلي. حتى مااذيهم 
وحاولت. انهزم منج حتى مااذيج
لكن. انتي مصره  تاذين نفسج
فياريت اكتفيتي من الليله. واتركيني

طلع بيده جنطته الرياضيه

طلال

طلعت بسيارتي. على المطار
وفاتح  زجاج السياره
مخنوك ... ادور على الهوى
كل هالزيح البارده  متكفيني

مااعرف شنو الي خلاها. تگول هالكلمه
داست  على  الجرح ...داست بقوه ..،
  متدري ...تتصور تطلب حقها من .انسان .طبيعي

سكتتها بعنف ...خوفا عليها
من .عنفي يصير اكبر
تركت البيت... ورحت للمطار انتظر  السفر
  دمي  فاير ...
اريد   اي  شي  افرغ  قهري  بيه
مالگيت  غير  نفسي  ...
دخلت  حمامات  المطار 
التفت   يمين.    يسار....
ادور  على  شي حاد  مافي
انتبهت  على  منفضه  للمناديل
شلتها  وضربت   الارض  فيها مره  ومرتين  لحد  تعبت
گعدت  على  الارض  دموعي انمزجت مع  العرگ  الي يتساقط  مني

بقيت في شهيق وزفير 
مطروح على ارض قذره

دخلوا مسافرين  للحمام
وهمه ينظرولي باستغراب
نهضت ...غسلت...
وطلعت
صعدت  الطياره  ...

اتمنى  تاخذني  لمكان  مجهول ماابيه  بشر. ...
خالي  منهم ...ومن اسالتهم ...
بمكان انولد بيه من جديد... اني وياها  بس
انولد  مابيه  النار  الي  تحيط  بيه
مابيه  الاحتقار  لنفسي
مابيه  القذاره  الي دمرت كلشي حي  بيه ...
مابيه  كوابيس  الليل
وضحكات جنود سكارى يستبيحون اجساد سجناء لاحول ولاقوه  لهم
وصوت  نباح  الكلاب  وهيه تحاول  تنهش  اعضائنا

اتمنى  اكون  رجال بعين نفسي وبعين  ايه
اعود انسان بسيط بدل الحيوان الهايج  داخلي  ويدفعني للسفر مئات  الكيلو مترات  حتى انضرب
واستعيد  الاحساس  اني حيوان عايش

ايه :

حاولت اوگف   مااگدرت
زحفت للقنفات ...وكمشت بيها وكمت ..:
گعدت على القنفه....  وبجيت لحد انبح صوتي ...

الم  ظهري  يزداد... ومااعرف شاسويله
دورت بالحمام بين الادويه ...والمراهم ...
دموعي تصب... مااشوف شنو مكتوب عليها
مسحت دمعي... واخذت سبريه مخدر  للالم ..،رفعت الفستان باوعت ظهري بالمرايا
رشيت السبري ...
ودخلت الغرفه... قفلتها عليه مااعرف ليش  ...خايفه
افكر  بلي  صار.
شنو  سبب  ردة  فعله  العنيفه هذي  ....
يمكن واجهته بحقيقه نفسه  معقوله بالسجن تحول .......
ويمكن  هذا  السر
ويمكن هذا السبب الي يخليه مبتعد  عن اهله  والناس  كلها لان  يحس بالعار
ويمكن نفس السبب يخليه ميذكر  الي صار  السجن ابد
والف يمكن..،،
زادت ناري نار
هربت منها
ودخلت سريري وغطيت راسي مجرد غمضت عيني
اتصلت ملاك

جاوبت  بصوت طبيعي رغم الم ظهري

: هلووو ملاك شخبارج

: عندي خبر  الج  مفرح
ماما  حصلت  تقاعد

: صدوك  والله الحمد لله
وليش  متصلتي بيه من الصبح وبشرتيني
: هسه رجعت من الدوام وفتحت البريد

:حبيبتي الله يساعدج
يله مدام ماما حصلت تقاعد
منا وجاي قللي  الشغل

: اي هوه. هم هيج ... وافكر نروح عمره اني وياها

: لج  انتي شوكت توافقين على واثق  ترى مصختيها
:
: وج  مااحبه

:يمعوده ياحب  انتي همين هو  اكو  غير الحب  بهذلنا وطيح حظنا

استغربت كلامي المختلف عن  كل مره

: خير اليوم  الكابه  فول
لازم  سافر  ابو ايوب
خطيه  اليوم  تنام  لوحدها  ههههه

: اي تصوري راح انام وحدي

: احسنلج حتى يرجع مشتاقلج

: اكيد  مشتاق وتلث ارباع
عوفينا مني وگوليلي

ليش
مارديتي  على  واثق  ترى فرصه والله

: تريدين الصدگ ... احس نفسي كبرت على الزواج. والبدله
وحتى. على الفرحه ...
بداخلي  اشوف نفسي   جف كلشي بيه ... حتى مشاعري

: ليش ملاك احجيلي فضفضي

واسترسلت تشكيلي في حديث اخوات  لم ينقطع على مر السنين

: مادري ليش  ايه يمكن ... من كثر الصدمات بحياتي
يمكن ظروف الي مرت عليه وخلتني اتسابق مع رجال واوگف وگفتهم. قست گلبي وفقدت الانثى داخلي
ويمكن خايفه مثل كل مره  انتهي بجرح

: شوفي  ملاك. حقج بكل الي گلتيه
بس في شي انتي غافله عنه

: شنو  هوه

: كل الي مروا بحياتج  انتي حبيتيهم
الا  واثق... هو الي يحبج
ورايدج ... وحبه الج  لو انطيتيه فرصه  راح يحيي الانثى داخلج
اسمعي كلامي. ومتندمين

: متردده. ويمكن عاجبني اتعزز عليه

؛ خليج تتعززين على ماتجي وحده تاخذه منج

:انتي شتگولين اخليه يجيي يحجي ويه ماما ونتفاهم

: لعد  شمنتظره  ياعيني  يمعوده  تزوجي  وخلفيلج  طفل طفلين  يردون  عنج  هالوحشه بالغربه

:  راح اخذ احجايتج تالي عمري امشي ورا كلام المخابيل

: خذ الحكمه من افواه المجانين... مو يگولون هيج

: اجوائج كابه اليوم اروح لاتگأبيني وياج

: باي الله وياج

رجعت. لمحاولة  النوم. او حتى ادعاء النوم

لكن  الليله كنت موعوده باتصال الاخوات

الاتصال الثاني كانت روان

: هلووو. روان شخبارج

: حياتي الف... الف... مبروك. تستاهلين كل خير

: اشكرج حبيبتي... طمنيني شنو امورج بالزواج ...سعيده

: كولش سعيده... رعد حباب وشنو اكول يسووي

: روان احجي الحقيقه.. الله عليج بس لا ندمانه

: ندمانه شنو. منو تندم وهيه متزوجه حبيبها اكيد انتي عشتي هالاحساس  ماكو داعي احجيلج

من صوتها مبينه سعيده. كلامها مثل الكبار
حبيت اعرف منعا اشياء يمكن اني كبرت وفاتني اتعلمها

: لا روان  احجيلي  داسمعج

: شحجي يعني ماافتهمت

: روان اگولج  شي يمكن يكون غريب
وصح  انتي زغيره  واني المفروض  اعلمج
بس انتم  من جيل يختلف وكلش  تعرفون

: احم احم. اعتراف خطير بذگائنا

:شلون  اخلي رجلي  ينجذب اليه
مااحس  طلال  مثل  قبل

سكتت  عبالي تفكر

: مااعرف  شلون  والله  واني حاليا  مستخدمه  الزعل.. كل ماازعل هو يتخبل اكثر
جربي  يجوز  ينفع

ضحكت على حجيها

: ياعيني  انتي  زغيره  ورجلج جبير... وماخذج  على  كد  عقلج
طلال  اذا  ازعل  يجوز  يشحني لديربون  بنفس  الساعه

؛ والله  ماادري  شكولج
جربي  اسالي  ماما

اهنا ضحكت من القهر

؛ نزول  عليج  وج  ماما  من جيل  تلفزيون  ابو  القناه الوحده
وفلم  ابيض  واسود  اذا الممثل باس  الممثله  البث  ينگطع اسبوع  والمشاهدين  يصخنون يومين

هيه. هم ضحكت

: هههههه  والله  دمج  عسل
اكيد  طلال  ميت بخفة  دمج

: هو من ناحيه ميت  فميت بقيت  اني  شوكت  اموت واخلص

: اسم الله عليج
اكلج ادخلي على گوگل واقري بلكي  يعلموج

: وج فكره يله روحي خلي اروح  ادور

وسمعت  كلام  روان وبحثت بالكوكل  من موقع  لموقع
طلع  نفس الكلام
الي هو
بدلي ...وتزيني..، وتعطري
كل  هذا  جربته  مفاد  وياه

اليوم  الثاني   حاولت  اشوف مباراته ... طلعت القناه  المباريات عديده.... واشكال المصارعين مقرفه... واجسادهم الشبه عاريه
جعلتهم بنظري شبه الحيوانات المفترسه ...
اموت واعرف شجابه على هالدرب ...
گلبي منطاني  اتابع  واشوفه ينضرب
خلصت وقتي... ارتب غرفته
وملابسه... افراشه... وبنفس الوقت ...استكشف اي شي ...اي خيط ...يوصلني للمخفي
مالگيت اي اثر...  تعبت ابحث بلا فايده ...
مابقى غير الطبخ  ... اقتل الملل...
والخوف ... والحيره

مليت الثلاجه والفريز  اكلات
من كبه ... لبورك ... لدولمه
خلص الشغل  ...
مابقى شي ماطبخته ... ولا قطعة  ملابس  مانضربت اوتي
ولا مكان  ماتنظف
اليوم الثاني طلعت بسيارتي استكشف المدينه ...
على  الگوكل خرائط
شفت كم محل عربي
ونزلت اخذت كم حاجه
ومحلات  ملابس رجاليه
اخذت منها. كم بيحاما اله

ورحت لمحل سجاد  اشتريت دواسات للارض ...
وكم علبة بخور ...
واشياء. تزيين البيت
احبها ومااستغني عنها

رجعت للبيت  رتبت اغراضي
وحسيت بالوحشه

وتردد ابالي كلمات اغنيه  زعجتني  ونزلت دمعي تكول
( حرت لا اني لهلي ... ولا اني لحبيبي )

ازداد شعوري بالوحده ... والوحشه
تاكدت الابراب والشبابيك. مقفله
وقررت  اعالج الوحشه ...
اخذت وسادتي  ..، وتمددت بسريره  وحضنت  وسادته

والصبح بدلت 
اغطية الوساده بوساده عليها اسمي واسمه

مرت يومين... وتلاثه
حتى مااتصل...
امه تتصل بيه ...
وتسال ...وتوصيني ...

( استعجلي بالاطفال ...راجعي دكتوره ؛ )
وارد عليها  ( انشالله خالتي ادعيلنا )
واليوم الرابع... ومارجع ولا اتصل
حتى ماادري ضرب ...انضرب

طلال

كل قهري جمعته بايديه... وجهزت للمباراه  ايدي شايله كل حزن گلبي  ...وقهري ...
وصوت ايه يرن... باركان غرفة التبديل ...وهيه تظن بيه شاذ ...

المعديين للمباراه ينظرون حركة ايدي واني قابض عليها اتصورو حماس للمباراه ...
وبدوا يشجعون... ويزيدون الرهانات ...
دخلت الحلبه والجمهور ينادي مستر تي
والاضاءه عليه  ..
احسه اريد انفجر باي شي
باي انسان
لحد مااعلن الحكم بدا المباراه
تقدمت على الخصم الي كان اقل حجم مني
ضربته ضربه على معدته وضربه على وجهه...
وگعته..
اشتعلت المقاعد  بالهتاف ...والتشجيع
مع صرخاتهم اطلقت صرخه عاليه  كزائير اسد   مجروح

رجعت ضربت المصارع الثاني وضربته
صوت المشجعين يزداد ...وياه صراخي  لحد وگفني الحكم ..
وامرني اتوقف...  توقفت
بعدها بدت الحركات الاستعراضيه. يعني اقفز عليه
اضربه بكرسي.. متفق عليه وهو ينهض يضربني ...
سال دمي... وانتهت الثوره بداخلي بتهدات  الالام  الان  وتاجيل  ثورتها  لوقت ثاني ...
وانتهت  المباراه

رحت على الفندق الي كل مره انزل فيه... ويعرفون طبعي ...واكلي
غسلت ...وداويت الكدمات ...وبدلت ...طلعت بسيارتي  ...افتريت المدينه
الي كل مابيها يدعو للخطيئه ...
حتى اضويتها تحس بيها مجون ...
وكل اغرائتها... وملاهيها ماگدرت تنسيني الي مهزوم منه ...
رجعت للفندق اتهرب من التفكير  بانسانه  تركتها مطروحهً بالارض
على گد  ماضربت  ناس  وشفت دم  واصابات  وجروح
تصورت  بعد  متهمني  هالمناظر
لعد ليش منظرها واگعه ميروح من بالي
شيصير  لو اتصل  بيها  واعتذر
وشگلها حتى اصالحها
اوعدها بليلة زوجيه متنسي ...
لو اوعدها بعد مااصحيها مذعوره بنص الليل على صوتي بالحمام ...

خليها مرتاحه مني افضل

بقيت تلاث ليالي بصراع ماله نهايه...
  واليوم الرابع
رجعت
وگفت امام الباب. متردد ادخل
ومحتار ياقرابين اقدم لتذبح
تقربا  لغفرانها  ..
افضل. مااقدمه الها  .. هو انقاذها  من وهمي
الوقت ليل ...
دخلت الشقه...  ومطفيه الاضويه
امريكا علمتنا نعيش ظلمه

فتحت الاضويه مافي صوت
دورتها بغرفتها ماموجوده
راح ظني  تركتني وسافرت لديربون
سرعت الخطى لغرفتي
واختلط الشعور  عندي بين اريدها وبين اتمنى تركتني
فتحت ضوى الغرفه...
لگيتها نايمه بمكاني ...
فزت   باوعتني
وراسا نهضت ..،ورادت تترك المكان

. خليج نايمه خليج
طفيت الضوى.. وطلعت وسديت الباب
فكرت دقايق شسووي
انام بالصاله القنفه متكفيني
رجعت للغرفه
بالظلام فقط ضوى الموبايل
غيرت ملابسي...  وهالمره انتبهت مافي ملابس على الارض
دخلت ملابسي للخزانه ..
مشيت ابطء ب خطوه واسرع خطوه
لحد وصلت للسرير دخلت وتمددت على ظهري
وعيني على السگف.
استداريت قليلا عليها

وحجيت  وياها

:ايوته   اسف 
سكتت يمكن ترد

ماردت
استمريت احجي وياها

: الظاهر تريدين تنامين ...
شيلي هالافكار الي ابالج تعرفيني كلش زين انسان مستقيم 
وادري تريدين توصلين للحقيقه
وياريت اگدر افهمج
انتي من دون خلق الله مااريدج تعرفين

شفتي اللعبه شفتي شلون كسرته تكسر
هههههه
واسبوع القادم حنسوي لعبه وياه  يسموها ...الانتقام
وبعدها لعبه
تجيين ويايه... تتفرجين
شنو نمتي

( ماردت  ..، اعرف شلون اخليها ترد )

: گومي نامي بمكانج ... انتي ماخذه نص السرير 

بلا متحجي  ويايه
دارت وجهها عني ...
وابتعدت شگد متگدر  لطرف السرير

 
درت وجهي عنها حتى اكون اقرب لجهنم ...
واعرف هيه على الجانب الثاني من جهنم
احيانا منحتاج ندخل النار ...حتى نحترك... السرير ممكن يتحول جهنم
ويحرگنا بلا  رحمه

———————————
ايه

طلع الصبح ماتحركت من السرير
البارحه كال ميريدني اعرف شنو بيه
يعني الي بيه الى متى؟. لشوكت يريدني صابره بدون مااعرف شنو الي بيه ؟

انطيه وقت اكثر ماعندي مانع لكن اسكت بلا ماافتهم مستحيل

حسيت گعد وبدا يتحرك بالسرير

: كافي تدفع راح توكعني من السرير

فز  مجرد  سمع صوتي. وگعد بالسرير

: هاي انتي بعدج نايمه اهنا...
ولاحسيت بيج

باوعته اثر. الضرب. خفيف بس مبين
ومن عرف  دادقق  بيه  تحجج حتى يطلعني. من الغرفه

:ايوته  ميت  جوع   عفيه  سويلي ريوك

مارديت عليه

: اخاف بعدج زعلانه 
اعتذرت البارحه سمعتيني
وهاي راسج ابوسها

انتظرت  شويه  اريد  اعرف بعد بوسة الراس  شيصير
انتظرت... وانتظرت
مصار شي  اگوم افضل  عبالك ديصالح امه... لو خالته.. يبوسني  براسي

طلعت من الغرفه... ماليني القهر
تجاوزت  الباب  قفله ورايه
وهو يگلي (غرفتح اهناك  ...
لاتگعديني  اريد  انام )

الهدرجه مطايق وجودي

رحت على غرفتي
ابجي  بفراشي  بلا سبب
كل هاي السنين. احلم  اتزوج طلال
واتضحلي متزوجه. رجال ثاني

مهانت عليه نفسي  ... وقفلة الباب  اذتني  اكثر من  الضرب

نمت لساعه ١٢  الظهر

اندگت جرس الباب
طلعت .. هو طلع من غرفته قبلي لابس نفس التراك الي كان نايم بيه...
فتح الباب ... اخذ  طرد  من ساعي  البريد  ...
وشكره  ... وسد الباب
تمشى  وبيده الطرد  ... خلاه
على المنضده ... وفتحه بيهد
قفازات. ملاكمه
شيسووي بيها ...
لبسهم  ..
خفت اقترب منه وهو يضرب بيهن بوكسات بالهوى

حتى لو خايفه  لازم  اساله

: هذي قفازات. ملاكمين شتسووي بيها

اندار عليه. وهو يضرب امام وجهي  بوكسات بالهوى
يمين شمال
ويتقدم باتجاهي  ويقترب من وجهي اكثر
درت وجهي  ...خايفه ليسويها صدك
وهو مستمر  ...يضرب  اديه
باتجاهي
انهزمت... يم باب غرفتي.
وهو بعده  امامي

لزم  بايده الباب ... حتى  مافتحه
وبالايد. الثانيه  ضرب الباب
الي راسي  يمه
صرخت ( طلال  كافي )
اقترب  مني  لدرجه  فزعتني
وگعت دموعي 
وصحت بيه ...
كافي ....شجاك ...خبلتني

ضحك  ورد  بكل  بساطه  واستهزاء بدموعي

: خوافه .. دادرب  حتى اديه تقوى  ..، هذا تمرين كل المصارعين. يتدربون عليه 
ههههه خفتي مو بالله

تركني بمكاني   وراح نزع القفازات
يم القنفه

وگلي ( ايوته جوعان ريوگ من ايدج الحلوه )

بتلك  اللحظه  كنت على وشك اطلع من الشقه
واتركه  وانقذ كرامتي ونفسي
من انسان   بلا احساس ومشاعر

دخلت لغزفتي دقيقتين
غيرت ملابسي.
واني كل جسمي بعده يرجف

طلعت للمطبخ

فتحت الثلاجه  ..وهو طلع من الحمام  لابس تراك ...هو نفسه الي كان نايم بيه

من عصبيتي  اريد افتح گلاص الجبن مينفتح ...
عفته.. وسويت بيض    وهوه بنفس الگعده امام التلفزيون.. وينشف شعره بالمنشف ...وخلص شمره على الارض ...واشتغل الفشار نفسه

رحت عليه عيوني يطلع منها شرار   ... شلت المنشفه ذبيتها بالغساله ورجعت  خليت الريوگ
على المنظده
وبلا مااناديه.
گعدت هوه  اجى گعد  ...
شافني احاول افتح  كلاص الجبن  ... ومااگدر

ضحك ...وهو يستهين بيه

: اگلاص  متگدرين  تفتحين ومتزوجه  مصارع

اخذ  الگلاص  ضربه على الطاوله    بالعكس خفيف  ...مرتين وفتحه باصبعين ...
وضحك
: هاي  شفتي  انفتح  بس انتي مال نزاكه مو مال قوه

: منو  گلك  اصلا اني كنت اعمل بالمطعم ١٦ ساعه باليوم ومافد يوم تعبت ويجوز اقوى منك اني

سمع كلمة اقوى منك  دعاني للتحدي

: يله تتحدين

خله ايده  على طاولة الطعام
وباوعني

: يله  خلي ايدج دنشوف من الاقوى

خفت اخلي ايدي يروح يكسرها  لان ايده ضعف ايدي اربع مرات

استمر يتحداني

: ها خوافه

: اني مو خوافه

خليت ايدي ...
وتشابكت اصابعنا ..

حاولت مجرد احرك ايده مگدرت... دفعت وهو ولا حرك ايده  ... استخدمت ايدي الثانيه ...
وگفت حتى  احرك ايده
مااگدرت
نظرنا  لبعض   وضحك

: انتي فزتي   يله بس لاتبجين

بلحظه  اثنينا  ماسكين  ايد بعض
تصورت  العالم  كله صفن وديباوعنا  وينتظره  يقترب مني
نظرته حاطتني  بحب  افقدني الاحساس  بالمكان  والوقت
وقاطع  هالاحساس  صوته

: الجاي  على النار لايحترك
سحب اديه ورجع لنفس الملامح الميته

بعد الريوك  سالني محتاجه شي
جاوبته لا

: اني رايح للجم فد ساعتين وارجع

ايه : المره الجايه گولي قبل وقت حتى اروح وياك

رد  عليه رد قاسي ومحى  اي امل عندي   بالسعاده وياه

: في  جم  نسائي  بديربون سجلي بيه  ... على الاقل قريب على اهلج

طلع ...وانشغلت ...انظف واهرب... من مواجهة نفسي
اتصلت   بيه  ريم صديقتي من السويد

: يابذات  هسه  يله  تذكرتي تباركين

:والله يوميه  اني  وعادل نريد نتصل  ونگول خطيه نشغلهم عن بعض  اكيد ممصدگين نفسهم اتزوجوا

: ههههه اي والله ممصدگين

حجتلي عن گروب بيه كل اصدقائنا

: تدرين  عادل  نشر  الخبر بگروب  جماعتنا الي كنا بنفس الكليه
لو تشوفين الردود سوينالكم عرس بالمنشورات

: لعد ليش متضموني لهذا الگروب

عادل سال طلال. وگله ماعندي وقت اتواصل

: لا حياتي  ضمينا  اني وياه
وعادل. وحسن والشباب كلهم خلي يتصلون بطلال

حاولوا يتصلون ميجاوب

: انطيني عادل اسولف وياه

:تدللين  هذا عادل وياج

يمكن من خلال اصدقائه القدامى
انتشله من الضياع الي هوه بيه

: هلوووو  ايه  شلونج  مبروك الزواج  وبالرفاه  والبنين

: الله يبارك بيك
اسمعني  عادل  انت صديقه ل طلال  واقرب  شخص  كنت اله

: خير خو ماكو شي

: طلال السجن اثر عليه وانعزل عن الناس
اريدك  تستعيد  صداقتك  وياه

:اني  مقطعت  علاقتي  بيه والولد كلهم يحاولون يتواصلون وياه هو ميجاوب

: اعرف  اريدك تساعده وتساعدني  اتصل  بيه وخلي اصدقائنا  كلهم يتصلون
هو يريد يتواصل وياكم لكن مااعرف  شنو يمنعه  فدوه عادل
خليه  يستعيد  ذكرياته  وحياته
الجانت

: انشاالله اتصل بيه واضمه لگروب  حتى  لو ميسولف ويانا على الاقل يقرا  الي  انشره  صور واغاني  قبل  في شباب حتى اوراق الامتحانات محتفظين بيها

تذكرت الامتحانات والدرجات والغش
: عزا طلعت الفضايح

اگلك  عيني  عادل فد ساعتين هو يكون بالبيت  راح اتصل
وانت اتصل بيه

عادل : من عيوني

محاوله يمكن ينكتبلها تنجح وتفك عنه قيود العزله

بعد رجعته  تغدينا
دكيت على   وعادل ورا دقيقه دگ عليه
اخذت تلفونه من الميز
وانطيته اله

: جاوب صديقك. عيب مرته تتصل وهو يسال وانت متجاوب

: اذا اجاوب واحد يعني لازم اجاوب  الباقيين

. وشكو  بيها  ذوله اصدقاء احلى اربع  سنين  بعمرنا
جاوب لخاطري

: اخذ التلفون
واجيت اسمع  شيحجون

خلى التلفون يمه  ورجع يباوع تلفزيون

: شسويت ؟

رد بعصبيه

: اشش لاتدوخيني  ... حضرته
انتي   تريدين تصادقين ...
تراسلين  ...
اني مالي خلگم

رجع يباوع مصارعه ...
واني يمه فشلانه
من نفسي واصدقائي

بعد هذا الموقف ماتحملت اكثر

جمعت شجاعتي  وطلبت اروح ل اهلي

: طلال  اريد  اروح ل اهلي كم يوم
واقدم اجا
: بعدني ممكمله

گام فتح باب الشقه
وهو ياشرلي بايدها

: هذا الباب ... والله وياج

وگف يباوعني  واني اباوعه
ثواني اخذ مفتاح سيارته
وطلع من الشقه

——————————
روان

لمن  الحياة  تنطينا فرصه ثانيه نعيش مشاعر خسرناها ...وتعوضنا  عن انسان فقدناه ..

تكون الحياة اشبه بالدخول للجنه
لمن شخص يغنيك... عن العالم ويصير وجوده سد امان... وحضن حنيه... ودلال

يكون هذا الشخص هو عالمك ...وليس فقط انسان عادي

لمن تحاول تكتب الاحساس ...وتوصف الحبيب وتشوف اللغات عاجزه توصف ...
تكون الاحاسيس اشبه بالخيال

اي خيال الي اعيشه مع رعد
واجمل مافي هذا الخيال هو محاولته ان يوصلني شعور ان هو كان بحاجتي بحياته اكثر مااني كنت محتاجته

وجملته الي يگوله عني ( انتي قطعة السكر الي كنت محتاجها بحياتي )  يمكن اكون قطعه سكر
لكن هو اكيد  الشراب الساخن لذبت بيه

استعين بماما تعلمني كيف اتعامل وياه  وكيف اكون بمستوى عمره
وتنصحني
احترميه... لاتطلعين بلا اذنه ...
صيري نظيفه... اطبخي الي تعرفيه
لاتصرفين زايد ...

رجعت علاقتي ب ايه طبيعيه
واحاول  استعيد  علاقتي ب ملاك

اخاف اتصل بيها ...
خوفي نابع من احساسي
ان ملاك ام ثانيه اليه
ويمكن اكثر

المواقف الاخيره الصارت بينا
خلتها تفهمني غلط ...
وجبرتني اتجاوز عليها
وشگد  ندمانه على كل كلمه سمعتها مني

ملاك تضحيتها كبيره  .. اتذكر بتركيا  كم مره انخطبت
وترفض .. وسبب رفضها كان تگول ل ماما
( مااتزوج  لحد اطمئن على روان واشوفها تصير طفله طبيعيه مثل الباقيين )
هالكلمات باقيه ابالي
ومصدر تعذيب بداخلي
الزم التلفون واخاف اتصل
واظل ابجي  ... بس اريد اسمع صوتها

واني لازمه التلفون وابجي
رجع  رعد  للشقه

محمل اغراض  شافني ابجي
شمر كلشي من ايده  وسالني

؛ خير شصاير ؟
: مشتاقه لملاك. واخاف اتصل بيها

: گعد على كرسي 
: والله هبطتيني  عبالي صار شي

: رعد  اريد اصالحها واريدك تعتذر منها. الله يخليك

: اوكي اتصلي بيها 

: اني اخاف اتصل راح اخلي ايه تتوسط  بينا
: على راحتج  بس اتوقع مو بسهوله تسامح

؛  صحيح   اكيد تزعل مني  لان هيه  تعبت عليه  وسهرت بالمستشفى ويايه  ودرستني

: انطيها  وقت بعد في ناس تسامح بسرعه... وفي ناس تاخذ وقت اطول
وعلى طاري الدراسه ترى سجلتج بمدرسه خاصه

: اهوووو شسوي بالمدرسه

: شتسووين شنو  تتعلمين وتحصلين  شهاده  روان انتي لاتعرفين عربي ولاانگليزي
ميصير  تبقين بالبيت بلا تعليم

؛ وليش مگتلي اول واخذت رائي

: اني ولي امرج  باباتي

: مزاعلتك  ...ومااصالحك ..طول مااني اداوم ابقى مزاعتك

رعد ؛

سعادتي... وغرامي ..بروان يوميه يزداد
حولت حياتي لوحه  جميله مليئه بالتعابير... والالوان
ايامي تمر  مايعكرها غير الحسره على العمر المضى بدونها
وليالي تعدي  وياها  بضحكه ...ترن بجدران حياتي وتعزفها ...
بلحن شجن  ..ومحبه
حتى من تلزم  العود وتعزف
تجعلني اتامل منظر اناملها گانما  تضرب على اوتار قلبي

الشموع الي تعلگهم ليليه ...والاغاني الي نرددها سوا
بمثابة الامعان والتعمد في ان تنغرس بكل دقيقه صغيره في اعماقي
مااعرف منو الي ديلقنها هالرومانسيات
لكن اكيد الي ديعلمها متقصد يغتالني  بواسطه العشق المفرط

العيب الوحيد بيها هو حبها للتسوق... وكرهها للدراسه.. او الطبخ ..واعمال البيت

اكيد بعمرها هذا متحب  تحمل مسؤولية بيت  ..واعباء حياة زوجيه ..

لذلك متحمل تمثيليتها اليوميه حتى تغيب عن المدرسه

: متداومين اليوم اشو ممبدله

: مااريد المدرسه. فدوه خلي ابطل.
مو زين اوفر عليك المصاريف

شلت جنطتها. وسحبتها من ايدها

: تداومين والمصاريف وفريها بالتسوق  الماله داعي
يله   اوصلج
عندي شغل  لاتاخريني 

طلعت من الشقه وهيه تتافئف

: اففففف
بسيطه شوف منو يحاجيك بعد

؛ نسيتي تگولين زعلت

: زعلت

روان :
مااعرف  ليش  هالالحاح على المدرسه
ومن  اناقشه   مااريد. حرمج  من الدراسه
سجلني بمدرسه خاصه... وبلبنان مطلوب الفرنسي 
وبدت  معاناتي  مع الفرنسي
هو يساعدني ومرات يتعصب عليه من يدرسني

: روان ترى طگت روحي شنو داقري حايط.
هم افتهم

: ماافتهم شسوي

سديت الكتب الي مطشره امامنه وحاولت اقنعه ابطل

:اگلك عوف الدراسه. وخلي نطلع  نت

قبل لا اكمل كلمه نتسوگ
ثار عليه

:: اذا گلتي نتسوك اذب نفسي من الشباك اوكي

: اوي شدعوه ملازم

دگ تلفوني    شفت الرقم من لبنان  غريب .. اول مفتحت خط. امريه تحجي انگليزي
وسالتني

: منو انتي ؟

:  انتي منو. اني روان

: شنو اسم زوجج
اسئله غريبه

: اگدر اعرف سبب السؤال

: اني بام زوجة رعد

: زوجته لو طليقته

: زوجته اني ... وفي صوره وصلتني   في بنت صغيره عروس مع رعد  ورقم تلفونك ومعاها
هل الصوره حقيقيه

: منو الي ارسل الصوره الك

: مايهمك منو. جاوبيني انتي زوجه رعد

اخذت التلفون وانطيته لرعد

: زوجتك جاوب

—————————-
ملاك

الساعه وحده الظهر. اتصل واثق
ياكد عليه الموعد
وجاوبته

: بلي اتذكر .. هلا بيك الوالده بانتظارك

سالني
: الوالده بس 

: دكتور. واثق ...  مااحب القراءه
بين السطور
انت ردت موعد تزور ماما
وداگلك هلا بيك

: يعني ممكن اشوف الوالده واطمئن عليها. واحجي وياه عن خطوبتنا

: الموضوع الي تحب تحجي بيه
متروك الك  براحتك

: ان شاء الله خير
اشوفج الساعه اربعه

انتهى الاتصال ...
مااريد افتح باب. ومثل كل مره اسده بدموع وندامه
يريد يخطب  يجي يحجي وخلص
ماانطي مواعيد وموافقات وتلفونات

ماما عدها خبر عن زيارته

ومستبشره. وطلعت من غرفتها لابسه شالها الحرير
وجبه سوده جديده مشايفتها
قبل
اكيد مشتريتها من الدلالات اهنا

باوعتني  بزدراء

: متفوتين تبدلين ... تتزوگين
الولد على جيه

ماحبيت اناقشها. لان بالفتره الاخيره
النقاش بينا تحول عرك

: حاضر ماما هسه ابدل

كمت صاحتني انداريت عليها

: لاتلبسين جينز. وحذاء رياضي البسي فستان

: حاضر ماما ... يالون تحبين البس
گعدت على الكرسي وردت

: البسي مثل البنات احمر ... وردي 

: حاضر ماما

انداريت اروح لغرفتي

صاحت

: من تبدلين وتكملين
حضري كيك وعصير

: تدللين ماما
اكو شي ثاني. لو هاي هيه

: افردي هالوجه ترى الولد جاي يخطب. مو يقرالنا عزا

دخلت ركض للغرفه
قبل لا تتطيني تعليمات ثانيه

وتجنبا لغضبها
لبست احمر. وشال اسود
لان كل صديقاتي يگولون الاسود يلوگلج
طلعت شفت ماما مجهزه الكيك والعصير
واني جهزت گعدتهم  وخليت
ورد .. ومناديل
وكلاصات جديده  مع صينيه
جديده

وفتحت التلفزيون على الاخبار
اعرف العراقيين مدمنين اخبار
وانتظرنا ساعه واثنين
صارت الاربعه
والخمسه والسته
والسبعه ونص
صار الليل 
وحتى تلفون يعتذر بيه ماكو

لميت الهوسه الي خليتها على الطاوله
ونزعت الفستان

وتوسلت ب ماما تتركني لحالي
بدل ما تلح عليه كل عشر دقايق

( اتصلي بيه )
—————————

طلال

خلص صبرها بعشر ايام

كنت اتصور  صبرها اطول

وكنت اتصور نفسي مااهتم لو راحت وتركتني ...

لذلك طلعت من الشقه
رحت على شاكر...  ابدل السياره
ومن وصلت  اهناك

مجرد لمحني استبشر خير

ومثل كل مره يترك الكل. ويجي عندي
يعرف راح ادفع
بادرني بابتسامه... ومباركه للزواج

: الف مبروك مستر تي
زواج العمر. ان شاء الله

: اشكرك
صرفت نظري عنه واني اقترب من سياره
جيب   ...جيروكي ...ماروني 
عاليه ..
باوعتها من كل الجهات. وتخيلت ايه  بيها

انداريت على شاكر وهو يفتح بابها  الامامي ...
لكن مو باب السايق ...
وكانما يقرا افكاري

: هدية مناسبه لعروس بطل قوي مثلك
والسعر؟ مناسب   جدا
تفضل اصعد شوفها

طلبت المفتاح منه 
وجابه اليه بدقايق

صعدت السياره
ردت اسوقها. وفجاءه تذكرت
ايه  راح  تتركني
  عشر ايام  احاول اوصلها هالقرار  ... ومن قررته  شفت صعوبته  بنظرتها  اليه
الي  كانما  تگلي
(لاتخليني اتركك )

وانهزمت من امامها لاتقرا بعيوني
كلمة( لاتركيني )

طلعت من السياره راسا
ومااهتميت  استغراب  شاكر
وهو  يصيح  ورايه

: مستر تي في سيارات احلى لو تحب  تشوفها

: جاوبته واني اصعد سيارتي واطلع من المعرض

: اجيب العروسه وهيه تختار

ابتسم ابتسامة  راحه...  وامل بكسب زبون جديد
رجعت للبيت ...
سيارتها موجوده  يعني مراحت ...
يجوز الصبح تروح

صعدت الدرج ركض
فتحت الباب

اول مشفت  العشى على الطاوله
مغطيته  بسلفون

وضوى  غرفتها  مطفي

يعني  نايمه

يمكن  نامت  لان  ناويه  تسافر باجر

دخلت  الغرفه   وبدلت  ملابسي

واكلت. ... لوحدي

من  خلصت  حملت  المواعين للسنك

وكعدت  اتفرج  تلفزيون

وبقيت  اتفرج  للساعه  اربعه

بدا  عندي  صداع  قوي
والم  حول  عيوني
دورت  على  الادويه 
الي كنت اشمرها باي مكان ملگيتها

هالترتيب  الجديد  الي  سوته
بالشقه  خلاني  ادور  على كلشي وماالگاه

دخلت على غرفتها فتحت الگلوب
وگعدتها  فزت خايفه
او يمكن خجلت من ملابسها

درت وجهي بين متگعد واول كلمه طلعت من لسانها

: ها حبيبي ... شبيك ..معدتك

: لخاطر الله وين وديتي الادويه
صار ساعه ادور

تركت سريرها
وهيه تسالني
: سلامتك شبيك ... يا دوى تريد

تعال ويايه

رحت وياها   دخلت للحمام فتحت. المخزن الي خلف المرايا
شفت الادويه مرتبه  مثل الصيدليه
طلعت العلبه  ...
وانطتني حبايه. وراحت سريع جابت كلاص مي

شربت  وبقيت بالصاله گاعد
سالتني

: ليش متگوم تنام ساعه اربعه ونص

: مااگدر انام ... اني بعد المباراه اعاني قلق  يومين يله انام

گعدت يمي. وهيه تسولف عن معاناتها ويه الارق بتركيا
بعد ماكانت تتصور اني متت وفاة والدها

: وشلون تخلصتي منه

: قريت عن محاربة القلق  بالايحاء. وجربت مره مرتين لحد تعودت

سالتني تحب اجرب وياك
بلا ماارد

اخذت ايدي
رحت وياها ... فتحت باب الغرفه ...
رفعت الغطى
وهيه تگلي
فوت  لفراشك... وتمدد
فتت  للفراش

سدت  الستاير  تماما
وطفت الضوى. واجتي خلت راسي بحضنها

سالتها

: ضروري  اخلي راسي بحضنج

جاوبت راسا
: براحتك خليه على الوساده اذا ترتاح  اكثر

خليت  راسي  على  الوساده
ورضخت  لكل  اوامرها   ولصوتها الحنين  الهامس  واصابعها الدافيه  المشغوله تمررها على جبيني ... وبين خصل شعري

: غمض عيونك  ... واسترخي

لاتفكر باي شي ثاني  ...
وين تحب تكون هسه 

: يم امي

: اني يمك حبيبي... طلال.. ابني
اوليدي... شمعة عيني ..
نام   يمه ...هياني يمك
اششش ..نام ..واني يمك يمه

ثگل جفني وغمضت بين اديها
وهيه تاخذ دور الام  بكل حنانها
وطيبتها

لاتنسون التصويت
شكرا الكم