رواية نوارس مهاجره الفصل السادس والثلاثون 36 - بقلم zeanab_almusawi

السلام عليكم
متابعيني .. الاعزاء
راح اطلب منكم اتوقف يومين
فقط .. لان صحتي مدتساعدني
مع ان اتمنى اخلصها القصه
بسبب تعبها ..
ومااعرف كيف اشكركم على تفاعلكم وتعليقاتكم .. كلكم بلا استثناء ..
وخاصة الاخت Golden star
الي متحمله عناء الرد على التعليقات بالوتباد
شكرا من القلب الك
والاخت مواسم الكرز الي ترد على الفيس بوك
شكرا على مجهودك
وشكرا لكل الي علق  وصوت وانتظر وتفاعل  وقرأ

💐💐💐💐💐💐💐💐💐💐

#نوارس_مهاجره34
#زينب_الموسوي
الجزء الثاني

طلال

في وسط باخره كبيره ..
تبحر  ل فلوريدا ...وتعود
وعلى دكة  الباخره ... وگفت
ماسك بايدي قضبانها الذهبيه اللون ..  .. اطلقت لنظري حريه التمتع بنسيم الليل  البارد

ومع ضوء القمر  .. وعتمة الليل
والموج الهادر
كونت صوره بخيالي مشابهه للي اشوفه

قمري بعيد عني .. تاه مني وتهت منه... وسط عتمة  قيود ماضي  اعيشه ... واجهل كيف  اتخلص من موجه الهادر

سمعت صوت ضحكات   عاليه
قريبه مني .. انداريت  شفت بنات اثنين  .. امريكيات
ماانتبهت على ملامحهن لكون الظلام منتشر بالرغم من اضوية الباخره
وبينهن حديث مليان كلمات جريئه.
انتبهن عليه  ..  وسلكن طريق قريب مني .. وصارن قريبات بجانبي
رجعت انداريت  للبحر
وحده منهن ... ضحكت  وهيه توجهي كلامها

( هي .. ياوحيد  )
التفت بوجهي فقط  ونضرتلها
كملت حديثها
( لوحدك على الباخره .. تحتاج رفيق )
مارديت مع ان افتهمت قصدها
بس تركت مجال  افكر
وهيه استمرت  توضح اكثر

( لو عندك زوجه اوصديقه ... ممكن  نكون بغرفتي او غرفة
الن صديقتي ). اشرت على صديقاتها
وكملت ( الن  هذي واني  كيت )
وكملت ( السعر  ميضاهي المتعه  ٢٠٠ دولار  لكل وحده
ونقبل كردت فقط )

واني دقق بكمية الاصباغ الي ماليه وجهها
فكرت ... ( هذني ... للتجربه
وهذا شغلهن ... واني محتاج التجربه .. اجهل كيف ازيل صور عالقه بذهني ...
وكرهتني حتى التجربه ..
ومااتصور نفسي انسان طبيعي ..اكيد اكون حيوان  .. مااعرف كيف اكون في موقف حميم ..
سواء ويه ذني ... او مع ايه
لكن صعب افشل امام ايه 
وذني يتقبلن الفشل .. المهم ياخذن اجرهن )

رديت عليها .. واني اخطوا خطوتين  بالتقرب منهن !!!!

—————————
ايه
تركت البيت ... ورحت للمزرعه
عند ملاك .. بعد ولادتها ابنها (حسن )
ولادتها كانت صعبه .. والمها وصريخها .. عادني لنفس الالم المهزومه منه ...
انشغلت يومين  بالطفل ..
لان ملاك تعبانه من الولاده
وماما  تداريها ..
وجود حسن بقدر ماافرحنا .. عذبنا بنفس الوقت  وزاد  التفكير  بطفله اصبح رويتها شبه مستحيل بعد هروب
رعد .. لكليفورنيا

باليوم العاشر  رجعت لديربون لوحدي بعد مااجاني اتصال
من مكتب باستلام العمل

باشرت بالعمل مع مهندس امريكي وزوجته اليمنيه
ساعات عملي من العشره الصبح .. للاربعه العصر
ارسم تصاميم .. بيوت .. ومطابخ .. حمامات ... تطلعيه للبيت
والتنفيذ  مهمة المهندسين

واكثر تصاميمي اقوم بيها داخل المكتب .. لان البيت  تفكيري يكون بنوارس ... وبطلال
الي  مافكر يسال عليه ..
وامه  تتصل بيه وتتصور باقيه اهنا  بسبب مرض ماما
ومن حديثها عرفت متدري بالطلاگ ...
اتصلت بيه والعده باقي خمس ايام وتخلص

: هلا خالتي شلونج
: هلا يمه ايوته الوالده شلون صارت

: احسن الحمد لله
: الله يعافيها ويشافيها .. وانتي يمه شوكت ترجعين لبيتج

ترددت اگلها طلگني  واضطريت اخترع اعذار
مثل
:(نريد نشتري بيت ونتحول اهنا
او : هوه يجي عليه بعدين )

وبلا مااعرف ليش اتعذر  ؟
عندي امل يرجع
لو اعرف نفسي راح ارجع اتصل بيه واتوسل  يرجعني قبل العده

يعدى النهار  بمحاولة النسيان

وليل يجيني اتصال ملاك يرجعني لنفس الافكار ...
ملاك  متنام  بالليل الا ساعات قليله  وتتصل بيه مهزومه من
ندم ... وتأنيب
اتصلت بيه وجاوبتها
حجت بسرعه
: اگلج ايه  تلفون روان وين  بيه صورها  اخر ايام 

: اغراضها  وملابسها كلها وضعوها بكيس وسلموها الماما
وحتى مشفنا الكيس شنو بيه

صفنت وگالت
: ماما هسه نايمه  .. الصبح اسالها ... اريد كم صوره  حولها  على سي دي واحتفظ بيه

:اوكي  لعد انتظري للصبح

بتوالي الليل ..، واني اسمع صوتها ... بثيت شكواي وحزني
ل اختي الي تعرف كل سطر  بكتاب حياتي

: ملاك طلال ابد ماسأل عليه
وخايفه  يبقى الطلاك بينا
يوميه الصبح  اول شي اسويه
اشوف التلفون وثاني شي اشطب يوم من الرزنامه  احسب للعده واگول اليوم يتصل

: اوووف ياايه ماادري شگلج
انتي قهر زاد عن حده
اتصلي بيه حتى لو بس سؤال

: مااگدر  ملاك  كل مره اني الي ادوره   واريده
وهو ولا مره  ...

: ايه اذا انتي تحبيه  لازم  تتحملين للاخير. الولد حجالج الي ضمه حتى على امه
وج يعني انطه  برجولته لخاطر انتي متتصورين ميريدج

: فدوه لاتزيدين عذابي ... جنت ضايعه وگلبي مقبوض
وتعبانه حتى من شيل روحي

: شوفي ننتظر بعد يومين اذا مااتصل اني اتصل بيه

:بس

: اسكتي  لاتحجين اذا ميته عليه
تسكتين

ماخلصت المكالمه الا على صوت بكاء حسن
راحت تشوفه ..
واني
طفيت الاضويه ... واخذت صورته بموبايلي لحضني ونمت

وعيت على اتصال ملاك
تخبرني

:الاغراض ماخذهن رعد ماما
تركتهن بمكانهن  لان بوقتها مالها خلگ للاغراض واكيد
التلفون وياها

: اكيد .. اني عندي الها صور
راح ادزهم الج .. واتصلي بمروه اكيد عدها صور الها بالمدرسه

: اتصلت بيها رقمها متغير  يمكن اتزوجت  وغيرت رقمها

: حرامات ... يله بعدين  نسولف
ورايه دوام

: الله وياج
—————————-
طلال

گعدت الصبح ... تعبان ...
وراسي يوجعني ... يمكن هذا دوار البحر ..
لبست ملابسي المنثوره بالغرفه

واخذت التلفون اتاكد ان الكردت  مماخذ المبلغ 
انتظرت على خط لحد جاوبتني
العامله
طلبت منها ارجاع المبلغ ..
وهيه طلبت الايميل حتى يجاوبوني لان الامر  مو بيدها
انطيتها الايميل.. وانهيت الاتصال

تذكرت

  .. باقي اربع ايام

اخذت تلفوني .. اتصل بيها

لا الافضل اتصل بملاك ...
اسال واعرف الاخبار
اخاف متريد ترجعلي

اتصلت بملاك.. شفت منشور  ناشرته بيه صورة ابنها... واسمه حسن  ..والبنات يباركولها  ...استغل هذي الفرصه  واباركلها

الساعه كانت عشره بالليل

:  حمد الله على سلامتج ام حسن  ...والله يجعله قرة عين الج ولوالده

: ربي يسلمك ويحميك شخبارك 

: بخير  الحمد لله ايه شلونها  تدرين

: ادري  وباقي كم يوم   ويصير الطلاك نهائي

: هيج ايه حاسبتها بالايام. لهاي الدرجه  استغنت عني

: ايه  حاسبتها  على  امل  ان تتراجع  عن  الطلاك  واذا راح تبقون  متاكده  تتصل  بيك وتگلك  رجعني..  طلال ايه بحاجتك هسه اني عندي طفل وزوج وبيت وانشغلت بيهم عن الهم وماما ويايه بالمزرعه  تحاول تنسى بالزرع  والخضره  ايه لوحدها بالبيت  والحزن على روان وعليك حولها انسانه معاديه للكل  هذا غير الي سواه رعد واخذ نوارس من عدنا

: يعني اذا اتصل بيها. تقبل نرجع

: تريدني اتصل بيها واسالها 

: لا اني اتصل. مبروك مره ثانيه

: مبروك  هيج  بلا  جيه  متفيد. تعال  للمزرعه  خلصوا  كم يوم انت وايه  والله تتونسون

: والله تستاهلون الجيه  اذا قبلت نرجع اجيبها عليكم

: يگول  اذا  قبلت  يمعود ايه اعرفها  كلش  زين راح تطلع بهالليل  لشيكاغو  تنتظرك   بس تسمع صوتك  ماادري  شمسويلها  انت سحر  تنويم مغناطيسي

:   اني هم احبها. والله

: الله يهديكم اثنينكم يله اتصل بيها

اخذت  وقت افكر شراح اگللها مااعتقد تقبل ترجع لنفس الوضع
واني شعاجبني من هالوضع الى متى ابقى حارم نفسي منها. ومرعوب من ماضي ضيعني وقتل الاحساس جوايه
مو سهل انسى صحيح وعاهدت نفسي  في يوم  ابد مااكون بموقف يرجعني لذاك الحال
الي لحد الان محاصرتني صرخاته ..وقذارته...  وهوانه

صارت الساعه ١٢ ...واني بتردد اتصل ...وبين لا اتعالج اول مره
اخاف تخلص الايام   ويمكن يدخل حياتها شخص ثاني

اتصل  اسلم  عليها ..

القرار النهائي كان اتصل
وهيه جاوبت من اول رنه

: الووو طلال
جاوبت بلهفه وسكتت حست على لهفتها

: اذا هيج ملهوفه عليه متتصلين 

: تريدني اتصل وانت مطلگني

: لو اريد اطلگج كملت القسم

: وليش مكملته.

: تريدين اكمله هسه

: براحتك. مااجبرك على شي كافي  لحيت عليك  تتزوجني وانت  مطايق  تباوعني

. لج اني مريض.. معقد نفسي  احتاج علاج احتاج مساعده ...
وكنت برحله بحريه اتاكدت بيها اني مريض

: طلال لعد مدتتعالج..  شمنتظر. واني اساعدك بلي اگدر  عليه  ول اخر يوم بعمري ابقى  وياك  بس اشوفك تحاول تتغير تطلع  من الاطار الي خلوك  بيه حقراء . قصدهم كان يكسروك  طلال الحگ لعمرك وشبابك اكسر قيدهم لحولك تعرض نفسك للضرب والاهانه حتى تعيش اترك المصارعه واشتغل  واتعب وحس بقيمة نفسك

: كل هذا اسويه بشرط ترجعين. وتتحملين المشوار طويل مو يوم  ويومين. وقسم بالله من باجر  احاول  اتغيير

: تعال رجعني  لو تريدني اني ارجع لوحدي

: مو انتي طردتيني بنص الليل  المفروض اسامحج اول

: يابه اعتذر  سامحني  وتعال رجعني  هسه...

من فرحها بالمكالمه نست زعلها وهيه  تمزح  ويايه

:هسه  اني ماطلبت منك اهلك وعشيرتك يجوون يرجعوني مو زين مني

:   اموت عليج من يصير دمج خفيف

: مابقى عندي دم حركه رعد الكلب اخذ الطفله وسافر   وحضرنا كلنا  وحضر ارقامنا.. حتى منشوف صورها من ينشر

: لعد شلون مخليه صورتها على صفحتج

: صديقة روان شافتها بصفحته واخذتها

: وشراح تسوون حرام البنت تضيع لوحده مستحيل يگدر يربيها

: فدوه لعينك اول مره واحد يفهم البيه. اريدك تساعدني

: شلون اساعدج تريدين  نسويها قضية راي عام نكتبها بالمواقع والصفحات  اني عندي متابعين عددهم مو قليل

: ياريت حبيبي  ساعدني والله انام واگعد افكر بيها وماما انهزمت من المدينه حتى منظل اثنينا متگابلين ونبجي

: خلص اني وياج لحد  نسترجعها

: مااعرف شگول عنك غير انت ربك خلقك مرهم لجروحي
مااعرف شنو اسمي علاقتنا  تشبه الاجتياح مابقى شي بيه مااحتليته واستعبدته وكلشي بيه يرفض تعتقه احبك واريدك
واعني الكلمه طلال اريدك مثل اي زوجه وحبيبه. واكيد انت تريدني

:رايدج والله. وراح اتعالج علمودج واذا كان الحب بينا اجتياح فصدگي حبج استعمار وگلبي  عميل عندج

:اذا تحبني اترك  المصارعه وهسه تشوف كل حياتك تتغير. طلال حبيبي انت ابن خير والدك مدللك كانت  مثل الامير. كيف تقبل تنضرب من مدمنين وشواذ 
شي انفرض عليك بسجن هسه انت حر. وانت عراقي نص وزنك غيره ...وحميه  لاتقبلها على نفسك

: هذي اخر مباراه لان مستلم  فلوسها ودفعوا اعلاناتها بعدها اعتزل. ونعيش بمشيگان
وافكر بشغل اصدر سيارات للعراق

ايه : ياريت حبيبي نعيش ابيتنا اهنا فارغ

: موقت لحد اشتري بيت خاص بينا

اتفقت وياها بعد المباراه الاخيره اسافر لديربون ونعيش سوا
رحت على المباراه بعد اتفاقنا بيومين. وصلت هناك بالتدريب خبرت المدرب  هذي اخر لعبه اليه واعتزل

ثار  عليه ... وشمر قوطية البيره الي بايده ... وگعد يمي  يشرحلي الوضع

: ماعندك حق بالاعتزال  انت موقع عقد مع شركة اعلانات

وكفت على حيلي اريد اطلع من الغرفه واصريت على ترك المباراه

: مااگدر العب بعد فقدت رغبتي بالمصارعه  واذا على العقد افسخه معاهم

وگف يتحداني

؛ في شرط جزائي  متگدر تدفعه  وفسخ  العقد راح يمس ناس ثانيه  اني  والمضاربين بالمراهنات مستحيل يسمحولك بهذا الشي
كلنا  نوگف  ضدك

: هذا تهديد

: لا هذا. توعيه الك. انت وقعت   على عقد. وهالعقد بيوتنا مفتوحه منه  لاتلعب بالنار

استمر حديثنا دون جدوه. وبعد المباراة  المنظم للمباريات عرف الخبر  ..واجاني باسلوب ترغيب

واني  تعبان من المباراه وگاعد على  كرسي بغرفة التبديل وبيدي منشفه  وامسح عرگي
وهو يفتر  حولي .. وبصوته يحاول يغير  قراري

:  مستر  تي الوقت غير مناسب للاعتزال... وخاصة بهذا الوقت واحنا نخطط لتنظيم مباراة دوليه كبيره يخوضها عشر مصارعين من امريكا...  مقابل عشره روس  راح تنقل على اشهر القنوات وارباحها ملايين 

تفاجأت بكلامه  لكوني ماعندي الجنسيه الامريكيه

: كيف امثل امريكا؟ اني لسه مماخذ الجنسيه

: لاتقلق بهذا الامر..  انت مقيم دائم  اهنا
واترك النا الامر  ...

واستمر  يتحدث عن المباراه وكانها حلم  حياته
المباراه تقام. في لوس انجلوس. ويحضرها شخصيات امريكيه مهمه ... لو فاز الفريق الامريكي راح نحمل اللقب . لقب (ابطال العالم بالرسلنگ )

قاطعت حلمه بحلمي

: بعدها اگدر ادفع الشرط الجزائي واعتزل

: بعدها نتفاوض مع  الشركات الاعلانيه والمراهنين ونتفق على تسويه

رغم مااقتنعت بكلامهم  واعرف خالفت عهدي مع ايه 
وافقت على المباراه الدوليه حتى بعدها اعتزل وعندي مبلغ مالي اگدر بيه ابدي مشروع ناجح ....
الرحله الي رحت بيها ..، اختبرت نفسي  بمسألتين
الاولى نتيجة الاختبار  عرفت اگدر استغني عن المصارعه .. واستبدل العنف  بالانغماس بالحياة .. والعمل .. والسفر

المساله الثانيه  ايه لازم تعرف نتيجتها  .. واعترف الها
حتى لو راح يجن جنونها .. اخر  المطاف  تسامحني

بالليل غادرت  الملعب للفندق 
اخذت شاور..  وكنت تعبان ومنهك.. بعد مباراة صعبه 
طلبت اكل  ...وفكرت اتفرج تلفزيون  وفي على الطاوله مجلات  ل اعلانات 
اخذت وحده اتصفحها  لطرد الملل لحد يوصل الاكل

اتصلت ... ايه
:هلووو حبيبي
: هلووو ايه

الظاهر عليها  تخاف تحجي وظلت تلف وتدور وهيه تسالني عن المباراه

: ايه اول تالي تسالين عن المباراه  گولي لعندج

حجت الي عدها بعد موعدتها مااتعصب

:شفت من ضمن الاعلانات  رقم  تلفون  يقدم مساعده للازواج في المشاكل  وبصراحه اني اتصلت  حتى اشوف حل لعصبيتي  شنو رائيك تتصل
مو علمود اي شي بس حتى بعد منتعارك ونتفارك

حسيت بخوفها على زواجنا رغم نواقصه  الاساسيه ... وتمسكه نبقى سوى  ... ماحبيت اردها  وامشي وياها بنفس المشوار

: دزي الرقم حبيبتي

:صار  .. وبعد متتصل  بيهم ارجع اتصل بيه

اخذت الرقم.. واتصلت حبيت احجي عن وضعي.. كيف ابدي مع زوجتي؟.. كيف اتخلص من عقدي من الماضي الي مريت بيه ؟..
جاوبني الرقم... وطلبوا الكردت كارد ..حتى ياخذون فلوس ليگدام
انطيتهم الرقم.. وظليت انتظر ..
جاوبتني امراءه من صوتها واضح كبيره بالعمر
سالتها عن افضل طريقه انسى بيها تجارب.. سببتلي عقده من الاقتراب من زوجتي ..
وجاوبتني بهدوء .. وكلمات بسيطه .. ولكنه تدل انها  مو امريكيه

(اتكلم مع زوجتك. وابدي بمحو الذكريات الاليمه.. بذكريات جميله معاها
واكيد مراح تنمحي هالذكريات بايام ..او حتى اشهر يمكن سنين ..
حاول تسافر لمكان الكم ..بيه ذكريات جميله
ابتعد عن اي شي يعيدك للماضي الاليم
وابدي بالاستسلام لمشاعر الحب اولا.. وبعدها  حتصير عندك رغبه في الاقتراب منها جسديا
اكيد من حبيتها انت بالبدايه حبيت كيانها.. وبعدين انولدت عندك الرغبه فيها
اعد نفس التجربه.. ومع الايام تلگه ان المشاعر اصبحت غير كافيه للتعبير عن حبك الها
وانما تحتاج تكون علاقتكم جسديه
لذلك في بكل المجتمعات فترة خطوبه ..وتفاهم.. وعلاقات حتى الانسان يتدرج بحاجته للطرف الثاني )

كلامها  نوع ما حسيته واقعي ..وممكن اطبقه ..،ورجعني للايام الي كنت اتصل بايه .. وهيه تنتظر اهلها ينامون.. حتى تاخذ التلفون الارضي  ..وتتصل بيه ..
واتذكر. الرزيال الي كنت اسمعها من ابوها كل مااتصل واسكت  ...او ادعي الرقم  غلط ..
واخذني الحماس  اكرر نفس التجربه  ومن تلك الليله
عرفنا الطريق طويل  واتفقنا  اثنينا  نبدي خطوه خطوه   ...
اتفقنا نتراسل  ..
الرساله الاولى كتبت

(هلووو ايوته  شدتسووين )

جاوبت راسا

: مد اسوي شي  ... شوكت تجي مليت من الوحده

: حبيبتي كلها كم يوم. واجي عليج وبعد متحسين بالوحده

: ان شاء الله

: ايوته. خلينا نسهر نتذكر ايام الكليه  تتذكرين اول مره صعدتي ويايه بالسياره

دزت ملصقات قلوب  طايره
وكتبت

: اتذكر. وراها تزاعلنا اسبوع

: ليش تزاعلنا ؟

: على اساس متدري  تريد اذكرك.

: لا اتذكر.. بس مكان قصدي الزم ايدج.

: بعدك مصر مكان قصدك

: هههههه  لو اموت  مااعترف   مع  ان وراها  اسبوع  كامل تعذبيني  حتى  اعترف.

: اني مو هذا الي قهرني قهرتني سالفه الجاكيت 
شسمها كانت البنيه نسيتها

: اني هم نسيته. كلنا واگفين مجموعه واني الوحيد الي لابس جاكيت اجتي گالت بردانه  انطيني الجاكيت نزعتها لعد شسوي

: لا شهم. يعني. لو ولد طالبها تنطيه لو تريد تقهرني

: مو خطيه هذي بنيه

: حلوه كانت ذيج الايام

: احلى مابيها انتي 
الحمد لله بعدج بحياتي 

استذكرنا.. حبنا.. وايامنا وذكرياتنا... وكانت بدايه لمشوار جديد

وتكررت اتصالاتنا  بنفس الرقم
وايه هيه الي تذكرني اتصل  وتبعث  مسجات بالكلام الي تگوله الها
   الخبيره   الي نفسها  توجهني وتنطيني  نصائح

اتصلت بعد يومين   ب ايه وعرفت منها امها مريضه. وايه داخله كابه خايفه تفقد امها

: ان شاء الله  مابيها شي مجرد سكرها مرتفع

: كل من رعد والي سواه ليل ونهار تتذكر. روان وبتها وتبجي عليها

: هسه هيه بالمزرعه لو بالبيت

: بالمستشفى واني وياها
شوكت تجي  انت 

: باجر العصر 

: اذا ملگيتني بالبيت تعال للمستشفى انطيك المفتاح

: اوكي.
گوليلي محتاجه شي

: سلامتك.
تحسرت. وگالت

؛تعبت طلال. شنو من حياة هذي. لو اموت احسن

: تموتين. واتركيني  لوحدي

: هوه  انت الشي الوحيد الي مخلي هالدنيا تنجرع ... ولو عندي عتب عليك

: اعرف العتب شفتي اعلانات المباراه الجديده صح

: شفتها  المدرب منزل اعلان
كل مره توعد وتخلف

: هذي اخر مباراه وداعتج

: الي قبلها هم گلت اخر مباراه وداعتج

: هالمره  اوفي بوعدي .. لان اني كرهت المصارعه 
ايوته احنا اتفقنا خطوه .. خطوه
لاتنسين

: ماانسى ... اني وياك .. بس اريدك يمي .. لان صار عندي رعب من المستشفيات

؛ شبيج اشو يأسه  الاطباء گالو شي يخوف

: لا بس ضغطها مد يستقر

: الله يساعدها  ادعيلها   وربنا موجود

: الله كريم ..
شدتسووي انت

: داجمع اغراضي من الشقه  والظهر اسلمها واجي عليج

بالمكالمه حاولت اواسيها  واشجعها ...
وبعد المكالمه  واصلت جمع اغراضي بصناديق  كارتونيه
وجنط

رن تلفوني عادل

: هلووو عادل شلونك

: ها شلون صرت طلال

هالسوال كل مره يسالني بيه
ومااعرف شيقصد 
واجاوبه ( بخير  الحمد لله انت شلونك )
مضمون المكالمه صاير عنده طفل رابع ويريد ياخذ رائي يسميه طلال ضحكت عليه

: انت صدك تحجي بالسويد وتسميه طلال  وك هو محمد يختصروه( مو )
ابنك شيصيحوه مثلا

: يصيحوه طل 

: لخاطر ربك لتعقد الطفل وسمي اسم ينجرع.

: لك غير على معزتك 
: يابه اذا تعزني اني اسميه شنو رائيك

: اوكي سميه براحتك

: اسمه ادم  هم اسم خفيف وهم دارج عدهم  وكل الاديان تعرفه

وافق على الاسم  .. وطلب مني ازورهم بالمستقبل وعدته بزياره
لكن بقى السؤال ابالي
( يمكن ايه حاجيه ل زوجته عني شي )  صار عندي شك

وزاد هالشك ثاني يوم. من تلقيت بالبريد   طلب من المحكمه بالشهاده

اتصلت ب ايه اعرف اسباب الشهاده  الي زادتني شك بيها

:اريد اسالج المحكمه طالبتني للشهاده اليوم وصلني تبليغ ليش اني شنو دخلي

: اي حبوا يسمعون رائيك بيه بعد مااعرفوا اراجع دكتوره نفسيه

: منين عرفوا تراجعين دكتوره

: الظاهر روان حاجيه لرعد ورعد ذكرها بالمحكمه

: يعني روان عرفت بحالتي ورعد وبعد منو عرف 
مو  انتي مراسله عادل حاجيتله عني

: لا منو گالك مراسلته

: لعد ليش يسالني شلون صرت  كل ميتصل
منين عرف

: وروح بابا  اي شي محاجيه وعادل طلبت منه يتصلون بيك ويطلعوك من الوحده
بداية زواجنا
وصدگني حتى الدكتوره  مگتلها غير كان سجين 
مامعقوله طلال تشك بيه

:مااشك بيج اني مجرد سوال اني لو اشك سالتج ليش تلفونج للفجر مفتوح تراسلين منو

: استغفر الله  طلال  شبيك
شوكت سهرانه اني غير اتصل بيك
:  لا مو بيه تلفونج يبقى للصبح مفتوح   احلفي متعرفين بحياتج غيري

: طلال تريد تخبلني
اني اعرف غيرك

: جاوبيني تعرفين غيري  حجيتي لمنو  الليل كله لازمه التلفون وتشكين مني  صح لو لا

انفجرت بيه 
: طلال كافي بعد مااتحمل احنا اكثر اثنين ممتفقين بالعالم
ندور على بعض ومن نصير سوا ندور على سبب نفترق

: خلص لاتعصبين اني اسف 
مااعرف ليش ديصير بينا اريد اكون وياج. بس انتي حيل صايره عصبيه 
سكتنا اثنينا.
واني الي سديت التلفون
والطريق  لديربون  احاول اشيل
افكار  وشك  يراودني ... وترجع اقوى
وبديت ابرر لنفسي الي داسويه
اكيد طبيعي ( زوج يغار على زوجته )

ايه

لاشي يتغير في فلكي

وان تغيير فيكون نحو بؤسا اكبر
وشتات لاينتهي
والتقينا من جديد

لقاء رسمي ..بدون حتى قبله وحده تمحي اثر الدمع الصار كم شهر  ينزل على فراگه.. وعلى ماما... ونوارس
وصل للمستشفى  واني اخلص اوراق ماما حتى تطلع

سلم على ماما واني بس باوعني .. ملامحه طاغي عليها  الشك. او الغيره ... من خوفي
باوعت على ملابسي  .. اخاف ضيگه ..
. وهو گلي

: ابقي انتي يم خالتي اني اخلص الاوراق  .. وطلع

بقيت الم اغراض ماما 

:  شنو. رجلج  ماسلم عليج

: عادي قبل شويه اتصل بيه وسلمنا  وعدني
يعيش بالبيت ويانا بين منشتري بيت

: هلا بيه على راحته اشو البيت فارغ 
وانتي اهتمي بيه اليوم وانسي الحزن .. رجلج شاب وحواليهن نسوان تلمع
و العصر اني وملاك وزوجها نرجع للمزرعه

: ماما ابقي يمي اخاف اتعبين مره ثانيه عاد المستشفى قريب

:بالمزرعه ارتاح اكثر. والتهي من التفكير . وحتى متلتهين  عن طلال

:اوكي ماما

وقبل لا نطلع وصتني اخلي طلال يساعدنا  حتى نلگه نوارس

: لا تفكرين ماما. انشاالله ارجعها بديت حمله على النت
وفي ناس وعدتني تتوسط بينا

غادرنا المستشفى كل واحد بسيارته بالطريق اتصلت بملاك حتى تعرف طلال موجود وتحضر عشى

وصلنا على البيت واثق طلع للباب .. يسندون ل ماما
لحد دخلوها للصاله...  ملاك باست ماما... وسلمت على طلال ..  وانطت حسن لواثق
وبعدين اخذه طلال
وبدت سوالفهم  واني وملاك نجهز الاكل

: اشو خلقتج مگلوبه

: اوووف  خايفه لا نتعارك 
وهوه حتى ماسلم عليه

: ميخالف تحملي  المهم  يترك المصارعه

: كم مره وعدني  وماوفى
تلگيته بالمستشفى حتى مباسني

هالگد روحه عايفتني. يجوز  مد يشوفني مثل قبل كبرت او تبهذلت

: مااشوفج مثل متظنين

: والله ماطيقه نفسي وخايفه لا افقد اعصابي مثل اخر مره
اروح انام  البارحه ماعرفت انام بالمستشفى

: واذا سال عليج

: كولي تعبانه ونايمه

اختاريت الاختباء  بين طيات غطائي وفراشي
نمت ساعات وساعات
الفجر گعدت  ادور بالبيت عن طلال

لگيته نايم على الارض بالصاله
وماخذ الوساده من القنفه

گعدته حتى ينام  بوحده من الغرف

باوعني واجاني صوته نص غافي ونص زعلان

(اتركيني مرتاح اهنا  )

: طيب تاكل ويايه  ... جوعانه مااكلت من الغدى

: مااريد

رحت للمطبخ ادور اكل  صاحني

:ايه تعالي

اجيت خايفه وگفت بعيد عنه
فتح الضوى وباوعني. النظره ماتبشر بخير
سالني

: اذا متريديني اجي  ليش قبلتي نرجع

رحت على الثلاجه الي معلگه عليها الرزنامه

انطيته الرزنامه

وگعدت على القنفه يمه

: شوف هذي ايام غيابك .. حاسبتها يوم يوم

طلال. وشنو معناها گدام واثق وامج واختج تروحين تنامين
مافكرتي شنو يفسروها

: ميفسروها شي يعرفون صار ليله منايمه  وتعبانه

: طبعا منايمه سهرانه لوجه الصبح تراسلين

ايه : شنو قصدك منو مراسله اني

: اخذت تلفونج  وشفته
اگلج عادل ليش يراسلج عل خاص

: هيج مرات يحب يسلم وارد عليه
اكيد قريت الرسائل

: قريت وشفت يسالج شلون صار طلال
وتردين عليه  ( احسن الحمد لله)
شنو حاجيتله شي

؛ شتتصور احجيله لو لا

كبر عقلك طلال مناقصه شك هالنوب

: وهذي الناس الي مراسلتج منو

ايه : محامين ومدرسين وعدوني ياثرون على رعد هذا الي كان ناقصني الشك

: وليش مااشك.

طلال  ترى هذي ثاني مره تتهمني واسكت

.: من حقي اشك شعندج ليليه سهرانه وليش المحامين الي تكولين عليهم يراسلوج الفجر

: ما اصدك هذا انت الي تحجي
هذا تلفوني
انطيته التلفون واني اطلب منه يراويني مراسلاتي الي يكول الفجر

: باوع شوف شبيه تلفوني فتش على راحتك اقرا الرسائل شوفها عن شنو نحجي
شوف المراسلات ولا واحد مراسلني الفجر
ومرات اسهر على مسلسل او فلم

رد عليه  وهو يتفحصني 
: ليش مرتبكه ؟

توقفت كل ذرة عقل بيه وانكطعت شعره الهدوء الي باقيه عندي
گمت من يمه  وجاوبته بصوت عالي

: تشك بيه ولازم تلفوني وتدور
شعرفتني  ... مو اني الي تشك بيها
ومااسمحلك ولا اي انسان بالدنيا  يتهمني هالاتهامات

رد بغضب وهو يجرني من ايدي

: اني رجلج وغصبن عليج تسمحين لو ماتسمحين

كنت اعرف راح يضربني  ومع ذلك ماابتعدت عنه بقيت واگفه
ضربني على وجهي 
والي سمعته منه كان مؤلم اكثر من الضرب
شمر التلفون بالارض صار قطع
متناثره

: شدعوه عصبيه كفرت خو ماكفرت 
واني هم مااسمحلج تعليين صوتج

: وخر عني تخبلت انت اكيد

سحبني للمرايه وهو يگلي

شوفي نفسج   .. ماعدتي تثيرين  ...مااعندي احساس اتجاهج.. فقدتي  نظارتج وانوثتج وصار كل همج تصرخين وتعيطين مثل اي عجوز

خلص الكلام منه ... ترك ايدي
وعبالك صحى من نوبة جنون مااعرف شنو سببها

ويه كلماته ماعرفت من الي سقطت على الارض اول.. كرامتي لو دمعتي 
مااعرف انجرح گلبي.. لو انفجر
سحبت نفسي شبه ميته  وتوسلت   برجليه توصلني للغرفتي
سديت بابي وگعدت  مااگدر احرك حتى رمشي
تزاحمت الدموع  ونزلت  تزيدني  حرگه

هسه صرت مااثيره  وعجوز ..
واني الضيعت عمري عليه

كل الهوان الي شفته بعمري كوم
وهالجملتين كوم
شيرجع  الزمن  واحسب احساب هاليوم

طلال

فقدت القدره على ضبط اعصابي  اتعصبت بلا سبب ... او بسبب تفكيري بالمباراه الجايه
الي شايل همها من يوم وقعت عليها
ونتيجه  ثارت   براسي شكوك لمن اهديت  مالگيت  الها وجود

اذيتها والليل كله احاول انام مگدرت
وصلت يم باب غرفتها ورجعت ..
متستاهل الي سمعته مني
العصبيه خلتني اجرحها فوگ جروحها
انتظرت.. وسهرت
والصبح شفتها
غرگانه بحر من نار 

عيونها متنعرف لونها  ..
مقهوره لدرجة  صوته ميطلع. وهيه تتصل  تلفون ارضي
سمعت مكالمتها

: ها. ساره وين الگاج

لا مبيه شي صوتي شويه من البرد

اوكي لعد اشوفج

اخذت جنطتها  اليدويه تجرها بلا قوه
اول مره اشوفها بهالحال عبالك ماتت

وگفت بطريقها  دارت وجها عني

: وين رايحه

: في  عندي موعد مع بنت اصمم غرفة نومها
تگدر تلحگني وتتاكد

؛ متطلعين اذا منتصالح

: والقران بعد لو تذبح نفسك

سديت حلكها

: لاتكملين خلي اعتذر اول وبعدين كملي

غمضت عيونه نزلت دموع متقطعه

؛ انتي البديتي..  تجاهلتي وجودي امام اهلج ورحتي نمتي ورديتج بنفس الاسلوب.
اعرف البنيه صعب تسمع  هالكلمات الگلتها
اني اسف ايه تعرفين الحجي الي گلته مو صدك اني مااشوفج عجوز 

: طلال بس   وكافي بعد نجرح بعض
روح شوفلك بنت صغيره تثيرك  وعيش وياها
واني اشوف واحد يقبل بعجوز

وخرت من يمي وطلعت من الباب الثاني

اجى ابالي اتصل بملاك ..تفهمها  موقصدي الكلام الگلته ..
انتظرت تعبر الساعه تسعه
اخاف اختها نايمه بعدها

ملاك :

حياتي تغييرت بعد ولادة ابني حسن
عرفت الامومه... والقلق ..والسهر.. والخوف  عليه
ابتسامته الصبح بوجهي.. تخليني احس نفسي ملكت الكون
الامر الثاني المفرح بحياتي.. هو  اعتيادي على الحياة اهنا
ومشاركتي واثق بادارة المزرعه ..
الي بدت تعطي ثمارها. وتاخذ صدى قوي في مجال زراعه الطبيعيه.. بدون مواد كيمائيه
واللحم الحلال... بين الجاليه
وجود ماما اهنا شد من عزمي
ودفعني ل ادارة حساب اعلانات لمنتجات المزرعه... واتفقنا مع شركه لنقل المنتجات للعناوين المختلفه
واثق يغدق عليه بالحب. والحنان..  ميخطي خطوه بعمله الا يتاكد اني وياه... اشركني حتى باًفكاره.. وبديت احس قيمة النجاح وافتخر بزواجي من رجال طموح.. ماوگفت الغربه عائق امامه
وكل مشاغله مابعدته عن مسوولياته كزوج.. واب   ويساعدني حتى بالسهر مع حسن

الي منغص حياتي وسالبني الراحه
هو دموعي ودموع ماما.. كل منتذكر روان وبنتها
كل ميكبر حسن ويضحك او يناغي.. نتسال والدموع بعينا
ياترى نوارس هم كبرت.. وتضحك.. وتناغي
نار تشب بگلوبنا كل منتذكرها
وماما هدها المرض. ..والحسره عليها
وايه شايله همها... زواجها  منهار وهيه متمسكه باخر خيط امل ..
وتحولت انسانه عدائيه للكل وزادها حزن فقد روان  وبنتها

—————————-
رعد

الذكريات تمليني حزن.. من يوم رحيلها عني..  رحل كل شعور بالحياة وبقيت اكابد  موت الاحساس
ابتسامة نوارس  تذكرني بيها
وعيونها  من تبجي  تحمل نفس الحزن
الليل يمر  صورتها على سريري
مرات انتبه على نفسي احجي وياها واسمعها ترد
واصحى مالگه غير الالم يطويني ويحولني..  لمجموعة دموع تنزل تزيدني  شوق الها

ايه وام ملاك  وملاك  استمروا يوسطون الناس الي تعرفني وينشرون مناشدات  بالفيس.. والا نستگرام..  ويدعون في وصيه واصدقائي بديربون اتصلوا بيه ..
يطلبون التفاهم على رعايه الطفله.. رفضت وغيرت كل ارقامي
هذي بنتي امانتي.. مستحيل غيري يربيها خاصة ناس قاسيه مثل ايه وملاك

———————————
طلال
اتصلت ب ملاك   احجيلها الصار
متاذي عليها. ومااعرف كيف اعبرلها عن ندمي

بالاتصال ملاك لامتني اكثر مااني الوم نفسي

:  مااتوقعتها منك طلال  لو تدري قبل الغدا شگالت ودخلت نامت

: شگالت. فهميني يمكن اعرف شسوي واعتذر

: گالت حاسه ان اني كبرت وتبهذلت وبعد مينجذب اليه وميريدني

: حلو واني لصت الامور بالزايد وسمعتها كلمتين تسم
هسه شسووي

: اثبتلها العكس  هاي زوجتك وانت اعرف شلون تثبتلها
اكولك مو گلت تجون يمنا. جيبها وتعال

: اني مسافر بعد يومين  من ارجع نجي انشاالله

انهيت المكالمه  وطلعت للجم 
افتريت بشوارع. ديربون. كلشي بيها عربي
حتى ريحة الجو طبخ عربي
افكر  بحل  اصالحها بيه

دخلت للجم. ولعبت وتعبت واني اركض على المشين قارنت حالنا اني وياها
نركض بلا منوصل واگفين بنفس المكان الي ديتغير الزمن عمرنا ديتسابق المفروض مااتركها بهذا الحال 
نزلت من المشين  واخذت قرار 
( ايه لازم تعيش سعيده ويايه )

اتصل بيها 
تذكرت موبايلها كسرته
اشتريلها موبايل بدل الكسرته

دخلت على محل موبايلات  بالصدفه هيه موجوده  وگاعده تنتظر  اول ملمحتني دارت وجهها  وگفت امامها

: ها ايه دتشترين موبايل اني جاي اشتريلج

: لا جاي اصلح موبايلي  بيه صور مهمه لروان وبتها. اذا مااصلحوا التلفون الصور تروح
واحنا عايشين على صورها

( هذي هم كارثه ثانيه اني سببها )
اجيت يم صاحب المحل 

: ها اخويه بيها مجال يتصلح

: مااعتقد  الموبايل صاير طحين
خليه عندي وانطيني رقمك اذا يتصلح اتصل بيكم

: رحمه على والديك شگد ميكلف ميهم المهم الصور

: احاول كل جهدي

: طيب انطيني هذا الموبايل 
اشرتله على احدث موديل 
صح مراح يعوضها بس على الاقل تهدا
بين ماانطانيها وفتحه  ..
انتبهت تاركه المحل.. وطالعه
دفعت  فلوس الموبايل.. واخذته.. وتوجهت للبيت  ادعي  من كل گلبي. الگاها بالبيت 
وصلت للبيت سيارتها موجوده
فتحت الباب بسرعه دورت البيت موجوده بغرفتها ومقفوله وتبجي
دگيت الباب عليها

: افتحي الباب ايه الله يخليج  والله الي صار ماذيني اكثر مامأذيج.
خلي نحجي بالموضوع ونخلص
ايوته ...  لج  والله ماقاصدها. كلتها حتى اقهرج
وتالي ابقى اسولف ويه الباب
هذا قلق المباراه الجايه .. مااعرف گلبي مقبوض منها ..
واعترفلج خايف منها .. وتهربت من الخوف اراقب تلفونج  وصار الي صار

حجيت ولغيت  ..وكررت ..ماردت
ومطلعت.. الا وقت  اذان الضهر
انتظرتها تخلص صلاه  خلصت
رادت ترجع للغرفه  مخليتها سحبتها من اديها...حاولت تتخلص مني 

: هم مراح اخليج تدخلين وتركيني احجي الي بگلبج وارتاحي

: مو عندك مباراه متروح وتعوفني

؛ بعد يومين للمباراه وهذي الاخيره وداعتج. وبعدها نسافر للعراق  نستعيد كل ذكرياتنا هناك 

: اكتفيت من الذكريات ماعادت تعنيني.
صار سنتين بين مد وجزر وياك كنت متصوره  عندك عقده نفسيه  لذلك متگدر تقترب مني
وگلت اتحمل واصبر وياك
اتضحلي البارحه ان السبب اني مااثيرك وصرت عجوز
هالكلمتين  بسمار انغرز  بروحي
مراح انساها ولا تجاوزها 
كل مااوگف گبال المرايه راح اشوف عجوز... كل ماراح امشط شعري اغير ملابسي راح اتذكر الكلمتين والفضل الك
المراءه تشوف نفسها بعين حبيبها..  والصوره داخل عينه تحملها وياها للموت وفوگ هذا تشك بيه

: والله العظيم مقاصدها

: كافي طلال اذا قاصدها او لا  سمعتها ومااكدر اتجاوزها

: لا راح تتجاوزيها لان تحبيني وتعرفين احبج  اموت عليج

تركتني ودخلت تحضر اكل

: نروح ناكل برا  اريد اجرب مطاعم ديربون

: روح انت جربها لان بصراحه مالي خلگ اطبخ

تركت الي بيدها وفتحت الثلاجه اخذت  خبز توست  وعصير ودخلت لغرفتها
دخلت وراها  گاعده على الارض

: زين گوليلي منو احسن مطعم اهنا اروح اجيب واجي

:حسب انت شتريد

: اريدج انتي

باوعتني وردت

: لو كايلها قبل البارحه صدگت 

: صدگيها وعيونج  حياتي كلها ماردت غيرج
وراح اثبتلج   اترك المصارعه حتى لو الشركات متقبل اخذج ونرجع للعراق  ونرجع لغرفتنا
تصدگين لحد الان موجوده امي متقبل احد يدخلها

: روح للعراق وتزوج بنيه صغيره تثيرك  اني بعد مااناسبك

: دتگولين  هالحجي من ورا گلبج لان مجروحه  ايه انتي متعيشين بدوني واني ماعيش بلياج

: اذا هالشكل ليش تشك بيه

: انتي زوجتي من حقي اغار  عليج  ويمكن فسرت غيرتي خطا

بقيت وياها گاعدين احاول انسيها الي گلته
واشوف انكسارها وهيه تحاول تبعد نظرها عني
دگ تلفوني. مصلح التلفونات

: ها اخويه بشر

: والله الموبايل قطعه كلها تالفه من الضربه ميتصلح.

: ماكو طريقه نسترجع الصور

: مااعرف اني اعتذر
ماكدرت انقل الخبر الها هيه افتهمت. وكفت مثل المجنونه تدور  على جهاز قديم عدها
وتبجي

: الجهاز كان اهنا ويه الملابس

فرغت الميز والخزانه وهي تدور وتبجي
: هذا جهاز  جديد اخذيه

اخذت الجهاز ترجف   ..طلعت الشريحه من جنطتها.. ودخلتها الجهاز الجديد واصابعها على گصته اتصلت بملاك

: ملاك تلفوني  انكسر وميتصلح بيه صور روان ونوارس

مااعرف شردت عليها

: متاكده   من هذا الحجي
هسه اروح اجيبه

سدت التلفون ولبست حجابها

: وين رايحه اجي وياج

: ملاك تكول نرجعه للشركه يكدرون يستعيدون الصور

: اوكي اروح  وياج  انتي متگدرين  تركزين  بالسياقه
طلعت  گدامي ركض  گعدت بالسياره تعصر باديها وتلتفت متعرف شتسووي

: الصور الي بيه متتعوض اتخبل اذا راحت وجماله اتعاجزت ادزها لملاك ..

: اهدي  ياعيني  ان شاء الله  متضيع 
وصلنا للمحل نزلت اني وبقت هيه بالسياره
اخذت التلفون من الولد. وطلعت انطيته الها ضمته بجنطتها
و اتصلت بملاك.. انطتها رقم تلفون تتصل بيه حتى تفهمهم
اتصلت بالرقم  تركوها  على الانتظار.. احسها راح تتفجر
جاوبوها  وهيه تشرح للموظف الموقف گالت جمله وحده  (صور اختي الماتت)
وانفجرت بالبجي مكدرت تكمل
اخذت التلفون اني وشرحتله الوضع
  اعتذر الموظف گال:

مانگدر نرجعها  اذا  قطعه مهشمه
:طيب ارسل الكم الجهاز يمكن في حل

الموظف اسف سيدي منقدم هذي الخدمه
سديت التلفون..  ماعرفت اجاوبها والاعتذار  ميفيد سكتت
وصلت  للبيت  وبدت تتصل بصديقات روان وصديقاتها هيه وتطلب منهن اي صوره لروان
بجت لحد ملت 
طلعت من البيت مخنوگ 
يمكن ممكتوبلنا نتفاهم
ظليت بالسياره افتر على محلات الموبايل الي بديربون كلها
نفس الجواب( ميتصلح )
أيست  صار الغروب  ..دخلت للجامع صليت ودعيت  وهان عليه ابجي  على حالي. وحالها
لا احنا  مفترقين..  ولا احنا متفاهمين   ..بقيت بالجامع استمع  لحديث الناس ومشاكلهم  ..وبعض منهم حب يتعرف عليه..  وبعضهم سالني عن عملي خجلت اكول مصارع جاوبتهم. افكر بمشروع اهنا
وكلهم نصحوني بالهوكا ( محلات ارگيله )  لان هو المشروع الماشي اهنا ...
بس
اني ريحة الدخان  مااطيقها  وافكر بمشروع اكبر

تاخر الوقت.. طلعت وكنت جوعان بشكل..  والجو بارد  دخلت على مطعم مقابل الجامع..  اخذت. اكل وطلعت للبيت فتحت الباب..  ايه گاعده على سجاده الصلاه تقرا قران
خليت الاكل على الميز
وانتظرتها  تجي

: ايوته حبيبتي تعالي ناكل
كعدت بلا صوت ولانظره

: لو  ادري جيتي اهنا بيها اذيتج مااجيت

: طلال اني البجي الي بجيته اليوم مال سنه ليگدام والصداع موتني فالله يخليك خليني اگل وبلا منحجي افضل

: على راحتج ولو الخبيره النفسيه  الي نتصل بيها   گالت  لازم تحجي. مع زوجتك

: ليش انت شبيك  انت متحتاج علاج نفسي تحتاج تطلع من الورطه الي انت بيها

: ياورطه

: زواجك مني  ورطه انت تحتاج زوجه تثيرك  وهسه تشوف بيوم وليله تنگلب حصان محد ينافسك

: منتبها على حجيج لو فقدتي الادب فد مره ويايه
اگلج  ترى اني مامجبور اتحمل  لغوتج  لو مااريدج  مارجعتج
گتلج كلمه بساعه عصبيه تريدين تصدگين صدكي متصدگين. براحتج
حتى الكعده يمج هم مااريدها
تركتها وگمت وهيه گامت بعدي
دخلت لغرفتها. واني تفرجت تلفزيون ورحت نمت

ايه

كلمات ...احيانا وقعها علينا اقوى من الرصاص
وگفت مقايبل المرايه.. ساعه ادور على نفسي مالكيتها
ماعدت اشوف صورتي.. انمحت وبقت كلماته هيه الي اسمعها واشوفها

بالليل
الشتى ديودعنا بعاصفه ثلجيه قويه
واني سهرانه اتفرج من شباك على نزوله 
احب اشوفه ينزل

طلع طلال من غرفته باوعته وباوعني  وهو يقترب من مكاني

: بعدج زعلانه

: لا 

: لازم نزل الثلج ودتفرجين

: اي  عاصفه كلش قويه

اجى يمي وتمدد.. وخلى راسه على رجليه

: يمكن هذي اخر مره ينزل

: تدرين من اتفرج على نزوله اتصوره  مثل الحب  يكبر.. ويكبر
وتمر الفصول.. ويذوب ونتصور راح.. ويرجع يتجدد من جديد

: ياسبحان الله. حتى الصور نشوفها بنفس الاحساس

نهض من نومه  ... وصارت وجوهنا متقابله
وهو يحجي

: ايوته اني من طلعت من العراق اتصورت خلص بعد مراح الگاه شخص  يعرفني ..لا اهلي ولااصدقائي.. ولاخطيبتي
ومن كل هالبشر لگيتج انتي
اكيد في امر الاهي  بالموضوع
اكيد رايدنا نبقى سوا

: اني ممعترضه على هذا الشي
بس مااعرف ليش نحب بعض ومنعرف نعيش سوا  كلامك جرحني وحاسه نفسي مرفوضه منك نفسيا  واني السبب بعدم قدرتك

: قسما بيج انتي اغلى الناس عندي انتي السبب الي خلاني افكر بالعلاج  لان بعد ماتحمل الصراع داخل نفسي اريدج وخايف من فشلي خلينا خطوه خطوه. لان متتصورين صعوبه الموضوع  عقلي رافضه

: واني هم محتاجه وقت الحزن افقدني كل رغبه بالحياة
اخلص الليل انشر منشورات اتوسل باصدقاء ومعارف رعد

: لا ايوته هذا حتى ياذيج صحيا 
باعي اني بعد ماارجع  اسافر لكليفورنيا واحجي وياه ميصير لازم احد يكون واسطة خير

: ياريت والله طلال  ماما وضعها بعد ميتحمل حرام عليه حتى الصور حرمنا منها

:  هاي هيه خليها. عليه وارتاحوا انتو

: صدوك راح تتعتزل

: وداعتج اعتزل هذي المباراه راح اخسر.. وافشلهم وادعي المرض  ..وكلشي ينتهي

: يعني راح تنضرب 

: مو اول مره بس اخر مره

: ديربالك على نفسك

: صار
شنو رائيج نسووي جاي حتى نسهر

؛ اني اسوي  الجاي وانت  اجيب الگيمر من الثلاجه
ونگعد اهنا يم الشباك

: اوكي لعد خلي افرش جريده
هم ناكل وهم نتثقف

ضحكنا  اثنينا

و گعدنا ناكل ونشرب جاي ويمنا القوري.. والجريده على الارض  واخذنا صوره متغطين باللحاف
دزها  لوالدته

، اشو شربت الجاي نعست

: اني من النعاس مااگدر اروح للفراش راح انام اهنا

: واني يمج

بتلك الليله فتح ايده اليه وحضني وقبل لينام جملته فتحت باب امالي من جديد

: ايوته. كل الي اتمناه انتي
اتمنى اگدر  انطيج اكثر من الحضن   بس الي شفته شايله بعقلي وممخليني ا

: لاتبرر  خلينا مثل مكالت الدكتوره خطوه خطوه