رواية نوارس مهاجره الفصل الثالث 3 - بقلم zeanab_almusawi

السلام عليكم ...
غوالي 🌺 اليوم انزل بارتين  حتى متحسوون ان القصه رتيبه
باحداثها
ان شاء الله

#نوارس_ مهاجره2

#زينب_الموسوي

ا

في صباح يوم بغدادي جميل
وفي كليه الهندسه ......
وقت امتحانات النهائيه ......
باحة الكليه مليان طلبه
وكل مجموعه بيدها الاسئله وتحل
وكل شويه نسمع صوت
( خرب والله كتبت هذا الجواب ومسحته )
( لك انت شبيك نايم عل دفتر مصدك راح تصير مهندس)

اقتربت من مجموعتي المفضله
رسل وهيفاء وسالتهم السوال المعتاد

:  :ها بنات شلونكم بالامتحان
اول وحده تجاوب رسل هيه دائما.تحب تسبق الكل بالجواب نسميها ام الجفصات من هالگد ممستعجلع

:الحمد لله زينه  بس لاتحسدوني اعرف القسم كله حاسدني
ردت عليها هيفاء

:چفصي بعد
ضحكوا البنات  .... كملت هيفاء جملتها

:اني زفت مبينه دور ثاني
انتي شلونج ايوته

: :على الله
بس لاتحلون الاسئله فدوه

: : يله بقى امتحان ونتخرج
والله ماصدگ بعد ماوراي دراسه ومحاضرات وقهر

رديت عليها بعجل

: :القهر ورانا ورانا  من تظلين تركضين على التعيين

الاحاديث تشعبت وتحولت سياسه واقتصاد ورياضه ...
التفتت انتظر اشوف طلال
شفته واگف بعيد مع مجموعة شباب
الشمس بعيونه ....
هو ميعجبه الشمس
مدلل بعد ....
افتهمت  نظراته اليه .... لغة بدون حروف يعرفها گلبي وعقلي
رديت عليه بابتسامه .....
وانتبهت صديقاتي يراقبون ...مع ادعاهم الانشغال بالحديث

: يابنات اترخص

:اي عيني روحي طلال دينتظر

:: هههههه وانتم شكو غيرانات

اجابة هيفاءبعدها  حسيتها نوع من الحسد اكثر ماهو  واقع

:مو حقنا دنغار  اشو صدتي اكبر سمكه بالبحر
هم اخلاق وهم اصل وغني وطول وجمال

: :اعوذ بالله من عيونكم

: يله روحي الولد مات من الحر

مشيت خطواتي تسبقها فرحة گلبي ولهفته ..
لوجه تعودت اشوفه يوميا من اربع سنين
اوشكت على الانتهاء ..

عرفت وياه الحب ..والغيره ..
والشوگ ..والسهر.. والاسرار ..
عرفت العيون من تلتقي بعيون
وتحجي بلا خجل ولا خوف ..
عرفت كلمة احبك من تنگال يعني  وعد يعني عهد
يعني للابد ..
نفس الابتسامه على وجهه من اول يوم شفته وكتبلنا القدر
يطلب قلم مني للامتحان ....
ورجعه ثاني يوم ومعاه احلى عباره لحد الان صداها باذني
( تفضلي القلم ..اتمنى ماارجعه
واحتفظ بيه للابد ..
بس شيفيدني القلم وانتي اخذتي گلبي اكيد القلم مسحور )
بيومها ابتسمت لبدايه  مشوار
مجهول الاسم
واصبح سيرة حب بينا وتعاهدنا للابد
وصلت يمه سلمت على الشباب وياه الي كلهم طلاب قسمي...
وردوا السلام عليه ....
وطلال استأذن منهم  حتى  نروح
كنا قريبين من السياره  راح بخطوات  سريعه سبقتني ودخل السياره. هربا من الحر
دخلت بالسياره بعده

: : هاي شبيك عفتني  هيج متتحمل حر

:صار ساعه تسولفين واني ميت حر  
فتح التبريد ... اني بلا تعليق اعرف طبعه ميتفاهم اذا محتر وحتى بالبرد هم ميتحمل برد
مرات اتشاقى وياه واگله ( انت نبات ظل ميتحمل  لابرد ولاحر )
بعد مابردت داخل السياره حجى
: ها بشري جاوبتي

:: على الله

: ترى سهله الاسئله اليوم
المفروض تجاوبين

:: عندي سعي عالي
وبعدين شلون اجاوب وانت الليل كله تسولف متگلي منين تجيب الرصيد الساعه ٢ الفجر خلص رصيدك ورا عشر دقايق اتصلت
ضحك وشغل الراديو وجاوبني

:  :اخذت رصيد من الوالد ..
ومو من حقج تعترضين على اتصالاتي مدام ماجله خطوبتنا لازم تتحملين  اتصل باي وقت

:ايه: طلال تعرف سبب التاجيل مااريد اكسر بخاطر اختي ملاك هيه اكبر مني 

اتأفاف هالموضوع شبعناه نقاش وماوصلنا ل اتفاق
واستمر النقاش

:ترى انتي مسويه مشكله من لا شيء  ...اني حجيت ويه ملاك كم مره ماعدها اي اعتراض

:: ادري ماعدها اعتراض بس ميهون عليه اتزوج قبلها... يعني خطيه هم بلا وظيفه وهم اتزوج قبلها

: :ها خوش حجه هاي تريدين انتظر تتعين او تنخطب اختج
كم سنه يعني مكافي اربعه

جاوبته بجزع  ورجاء ان يفهم وضعي

: :طلال اذا تحبني تنتظر

:طلال :اذا ؟
ليش عندج شك احبج

من نبرة صوته عرفت انلاصت الامور اكثر  وكان لازم ابرر اله

:: لا ماعندي شك  واعرف راح نتخرج ويصير لقائنا صعب ....
لكن اني ادرى بظروفي وعائلتي
ننتظر شويه  لحد تتعين انت او اني وبعدها. ...نفكر بالخطوه الجايه

:طلال :اني ممحتاج الوظيفه وداشتغل مع والدي  وغرفتي موجوده انتي بس انطيني موعد محدد
الجمله المعهوده لنهاية اي نقاش عقيم

:الله كريم

النقاش بهذا الموضوع ينتهي دائما بالسكوت من جانبي والزعل من جانبه ...

على الطريق موجوده سيطره مشايفتها قبل
انتابني الخوف ...، وطلال بين عليه الارتباك
خفف سرعته

: :انتبه طلال هذي السيطره

: :شنو هذي السيطره مشايفها قبل

وگفنا للسيطره شباب زغار بلعمر  لابسين مدني ولازمين سلاح
وگفت السياره امامهم .... نشف دمي وهمه يباعوني...
فتح طلال الزجاج واطلع ايده يسلم عليهم

:طلال الله يساعدكم شلونكم شباب
جاوبوا باستعلاء. وغضب وهمه يتفحصون السياره والي بيها

:گول السلام عليكم

: اسف السلام عليكم

:وين رايح وهذي منو الي وياك

نصيت راسي. وعدلت قميصي واحاول اخلي الكتب على رجلي حتى متبين بقية ملابسي

:طلال راجع للبيت وهذي خطيبتي

واحد منهم علق بسخريه
(اي خطيبته

وليش مو محجبه احنا دوله اسلاميه )

ودي اختفي انمحي نظراتهم تخوف واعرف طلال اعصابه سريعة الاشتعال
ورغم رده الذكي  قبضة ايده  ايده على الاستيرن تحوي اصبح على وشك الانفجار

طلال اكيد وخطيبتي مسيحيه وانشالله راح  تدخل  للاسلام وتتحجب

استفزوا اكثر وقصدهم يثيروه حتى يقتلوه وياخذوني

:واطلق اللحيه متعرف حرام تزيين

:طلال لا والله مااعرف منا وجاي
ان شاء الله

: دروح روح بيك خير حجب مرتك

باوعهم  طلال وايده اجتي على باب السياره يريد ينزل يتعارك .....
وهمه اجتمعوا كلهم قريب من السياره ونظراتهم تحدي ....
خفت اعصابه تفلت
توسلت بيه
: لخاطر  الله طلال لخاطري. اطلع فدوه

استغفر. ربه وسد الزجاج وطلع

تحركت سيارتنا وياها تشاهدت الف مره ...
و طلال وجهه نار  وسد الراديو
وانقطع الكلام بينا
حجيت وياه لغرض اخفف عنه العصبيه

: ولايهمك حبيبي شوية زعاطيط
انفجرغضب  وعصبيه

: منو هاي الشكولات حتى يعلمونا الدين منين اجوي وصاروا  يحكمون ويتحكمون

السنين الي عرفت بيها طلال علمتني شلون امتص غضبه بتحويل الحديث فكاهي

: بس حلوه مال اني مسيحيه
لو طالبين هويتي وشايفين اسمي ايه محمد شتكول

:طلال هذا الي اجى ابالي ههههه
ضحكته مطر يمر على زرع اخضر يشتد ويزهي بگاع  حلوه
احب اسمعها  مره واثنين
جاوبته

:اية .وتريد تدخلني  للاسلام ها

:طلال عندج مانع 
تعالي ادخلي الاسلام ههههه

كان يريد اقترب من ايده حتى يحضني

وخرت ايده ورجعتها على الاستيرن

: تخبلت احنا بالشارع وتعرف هذي الحركات ممنوع هسه سجلها على الحساب مثل كل مره

جاوبني وهو يضحك

:طلال حسابج كلش ثگل شوكت تدفعين

:ايه انشالله بيوم عرسنا ..
ولاتگلي شوكت عرسنا

:طلال مراح اگول امري ل الله انتظر

باوعني بنظره  تمليها. امل اغير احابتي عن سوال كل يوم يسالني

: گولي  وين تريدين نروح
واجاه جوابي حازم مابيه تردد

:انت  ابد متستسلم 
كل مره تسال نفس السوال واجاوبك نفس الجواب
رفع ايده يدعي

:    هسه حظي عفت البنات كلها وحبيتج انتي المعقده 
شصار  يعني اذا  افترينا  بالسياره شويه

:  دشوف الوضع ياعيني بغداد صارت تخوف  ...
وهاي احنا  سوا بالسياره
ديله  وصلني هسه ملاك تحاسبني على التاخير

:  : صار  ايوته. من عيوني
: سالمه عيونك حبيبي

وصلني يم بيتنا نزلت من السياره  واني اسد الباب ودعته
:الله وياك
: الله وياج
يله افتحي الباب وادخلي

:حاضر

دخلت لبيتنا

اهلي يعرفون طلال يوصلني
لان من اهل المنطقه .....وبالامتحانات تختلف اوقات البنات بالخط لذلك يوصلني .....
بيتنا بحي الجهاد والمنطقه فقدت الامان خاصة بالليل
—————————

ملاك 
صار وقت الغدى  لازم اگعد ماما اليوم  خطيه  حيل مفاصلها تأذيها. وشگد قنعتها ياخذها بابا للدكتور. مقبلت. لان الاطباء  ازدحام  وگالت انام  احسن

دخلت لغرفتها. واخذت جانب من سريرها   المريح 
وخليت ايدي على كتفه والايد الثانيه على  ضفيرتها  المرتبه وكانها نسيج حرير. ماغيرت السنين نعومته. وجماله

:ماما يله گومي تغدي البنات  ايه وروان رجعوا من الامتحانات ...وكملنا الغدى

ردت بصوت عليل متعب

: تغدوا انتو وخليني اني نايمه

: ميصير ياماما لازم تاكلين وتاخذين الادويه

: هيه الادويه هاده حيلي ومابيه اگوم

: لخاطرنا يله فدوه لعمرج
وهيه ترفع  جسدها  المنهك واني احاول اساعدها اول سؤال كان منها

: ابوج وصل

: هسه وصل وايه دتفتحله الباب يدخل السياره
دكومي خطيه من يشوفج مريضه ميصيرله واهس حتى ياكل
نزلت رجليها للارض  وسرحت بعيده وتنهدت

: مسكين  محمد ماشاف وياي غير المرض .....
والناس اكلت راسه تزوج عليها
ظل معاند ومافد يوم هملني لو هملكم .......
واني اسمعها تتذكر ابتسمت وشجعتها بكلمات بسيطه

:م لعد گومي لخاطره
قابل انتي شبيج هو شويه ضغط

:ام ملاك وسكر. وزلال... وقلب ...ومفاصل ...
وقرحه

دخل بابا للغرفه ...والدي يختلف عن كل الرجال بالعالم..
ضحكته بوجهنا ياما زالت هموم.. وخلتنا نعبر مصاعب ..
كلامه ويه عمامي من يكولوله يرادلك ولد
يرد عليهم  بناتي نعمه من الله اكو واحد يرفض نعمة ربه ..
الكلمه تخلينا نحس احنا اميرات مو فقط بناته ...
ورغم بساطة حياتنا المعيشيه
ماقصر ويانا بالتعليم والتشجيع .. وتوفير احتياجتنا  ..
الصبح يعمل كاتب عدل
والعصر يروح لمعارض السيارات يشتري ويبيع ..
اني خريجه علوم كيمياء صار اربع سنوات من تخرجت واشتغلت بمنشاه تابعه للتصنيع العسكري حاليا توقف عملها ...
اني اكبر اخواتي ايه اصغر مني باربع سنين ..
وروان عمرها تسع سنين بالرابع ابتدائي
ماما مريضه من شبابها وهذا سبب التباعد باعمارنا وخاصة روان جتي مفاجاءه للجميع

دخل والدي بضحكته المعهوده

: السلام عليكم شلونكم نوارس   شلونج اليوم ام ملاك

: الحمد لله
يله ماما ملاك ساعديني اگعد وياكم اتغدى
اخذ بابا مكاني يسندها وهو يبتسم

:وليش ملاك اني موجود
وماما ردت بخجل عليه

: انت تعبان وجاي من شغلك

: وين التعب اصلا شفتج ارتاحيت

: ههههه هذا غزل علني بابا

: وليش لا قابل ممنوع

: صدوك انتي وابوج  بطرانين
يله  نروح. نتغدى

جلسنا نتغدى سوا  اوقات مليئه بالفرح والاطمئان حولنا اب عطوف وام حنون ...
رغم الاطلاقات الناريه الي نسمعها بين فتره وفتره من المسلحين ...الي تثير خوفنا وخاصة  ماما

::  حجي لازم تفكر بيع البيت. بسرعه منطقتنا صارت خطره والقتل على الهويه كثر بيها

اذا ابيعه هسه نص سعره ميجيب اخسر بيه

: :احسن منخسر حياتنا اشو ذبح وخطف وقتل وتهجير

: الله كريم العصر امر على الدلال وافهمه ولو خايف بدري وجدي اخواني هم يطالبون بحصه من البيت

: ياحصه حجي  البيت تسجل باسمك بحياة المرحوم كل واحد انطاه حصته 

: الله كريم

انقطع هذا الموضوع بسؤال بابا عن روان

:روان شلونج اليوم بالامتحان باباتي
ردت وهيه تاكل

:جاوبت كل الاسئله
وباجر عندي علوم

لزمت  ايدها عن الاكل حتى انبها على تصرفها

: شنو علمتج  اني ها احجي

دنگت وبلعت الاكل يله ردت

: مااحجي وحلگي بيه اكل اسفه ملاك

: يله خلصي اكل حتى ابدي احفظج

وجهت  نظرها لبابا حتى ينجدها

: :اول اشوف تلفزيون حبابه بس شويه والله الكتاب كله حافظته حتى اساليني

: :ادري بيج حافظته بس التلفزيون يشتت تفكيرج وينسيج

:: حبابه والله بس كارتون واحد حبابه

:: خليها بابا  تشوف كارتون هيه روان شاطره ودائما الاولى

: :تدريسي غير وطالعه عليه صحيح ماما حجي

:والله ملوكه ماما انتي ماكو بشطارتج لحد الان المدرسات يتذكرونج ...
اني تمرضت بامتحاناتج وطلعتي علوم والله المثلج تطلع طبيه

:هسه رضيت بالعلوم واشتغلت وسدوا المنشأه غير كون يشملونا بتعيين
مخليت مكان مقدمت

وايه زادتني ياس بحديثها

: وين اكو تعيين اذا ماعندج حزب  انسي اني هم راح اتخرج واگعد يمج

: هلا بيج تونسيني عاد ههههه

: :باباتي انتم تدرسون وتاخذون شهاده لنفسكم مو للتعيين والوضع ميبقى هيج يتغير

سالته ايه تريد تعرف شنو فائده  الشهاده

:اذا الشهاده متجيب راتب اخر الشهر شنو فايدتها

:فايدتها توسع عقلج ترفع مقامج بين الناس ترى الفلوس اي واحد يگدر يجيبها حتى الحرامي

:ههههه صدوك بابا كلامك من اسمعه. يقنعني دائما

استغلت روان انشغالنا بالحديث وتركت الميز  ولاحقتها بتعليمات اضافيه اعرف تكرهها

:غسلي اديج من الاكل ولاتگعدين قريب من التلفزيون
اخلص المواعين واجي اراجعلج

: :حاضر صار

: :بابا اسويلك جاي

:لا ملوكه اروح انام شويه حتى العصر اروح للمعارض

وماما راحت وراه تذكره

:: مو تنسى تمر على مكاتب العقار  حجي الله يخليك

: :انشاالله ماانسى

: : اساعدج بالموعين ملوكه

:ملاك : يله ايه  . اغسليهم  ولو غسلج ميعجبني
اغسليهم بمي حار  ونشفيهم

:  : ترى هيه مواعين  اغسلهم
ميراد كل هذي التعليمات

هذا طبعي احب اوجه تعليمات
واراقب شغلهم خاصة بالنظافه

خلصنا ترتيب وغسل مواعين اني وايه 

ايه مو بس اختي .. صديقتي المقربه   .. وملجأي ... ربيتها مع ماما  .. وحضني شالها  من عمرها يوم واني عمري اربع سنين ....

الظهر 

اخذت  روان للغرفه نقرا ومعانا ايه... تستعد ل امتحانها بعد يومين
نبهتني. ايه ل اتصال احاول اتجاهله

:: تلفونج شاشته منوره  ليش مخليته صامت ؟

:مااريد اجاوب

:اها ثامر اكيد

:اسكتي خليني ادرس روان

تركت القلم من ايدها  ودفعت الاوراق بعيد  واستعدت لتوجيه مزيد من الاسئله

:ايه : احجي شبيه هالمره وبعدين شنو هالثگل النص استاو
لو متريدين يتصل اقفلي الجهاز
بس تريدين تحسبين كم مره يتصل
سديت كتاب روان  رغبه مني بالانتفاض

: :لج خبلني عمري ضاع واني انتظره البنات الي تخرجوا وياي تزوجوا وصاروا امهات
واني كل مااحجي يگلي ظروفي. وانتظري واصبري
شصبر اكثر ثمن سنوات وياه

:: الحق وياج ميصير حاجزج وموقف حالج هيه حلقه شصار يعني

على صوتي وركضت روان سدت الباب اخاف اهلي يسمعون

: :لو موفر فلوس الاتصالات هذي جان گدر يخطبني على الاقل

: :ماالومج ملاك بس لازم تردين عليه وتتفاهمين وياه
اذا متردين عليه مراح توصلون لحل وانتم مو زغار

:: خليه ينشلع گلبه شويه بالليل احجي وياه
اكلج وانتي ماحددتي موعد لخطوبتكم انتي وطلال ترى راح تتخرجون وطلال ابيتهم ماكو وحده تعين امه  واموره زينه
استعجلي ولاتفكرين بيه

: :مااگدر ملاك نفسيتي متتقبل
اذا يحبني ينتظر

:الله يخليج ايه اذا صدوك تريديني ارتاح لا تخليني عقبه امام خطوبتكم خلصي امتحانات  واحجي ويه اهلي وفضيها والله الولد لگطه
ياعيني خلي وحده من عدنا تشوف طريقها ..
واني ارتاح من خوفي عليج
وهو يوصلج يوميه
الناس مترحم
ومدام يحبج ومشتريج لا تأخرين الموضوع

علت وجهها   ابتسامه رضا. وكانما منتظره هالحجي مني وگعدت يمي وباستني بخدي   وردت

:وج انتي صدوك ملاك واني محظوظه بيج
المفروض هسه تكفشيني من شعري وتتعاركين ويايه لان راح اضرب السرى

: :لاتخافين اسويها بيوم عرسج حتى ترتاحين هههههه

—————————

اخيرا  وصلت البيت .... الازدحام بغداد. خلانه نكره الطلعه

طريق من البيت للكليه ياخذ ساعه
اكيد راح افتقد هذا الطريق بعد التخرج ....  هو لو  ما الازدحام
مصارلي مجال اشوف ايه ... واسولف وياها كل يوم ساعه
هذي وحده من فوائد الازدحام

وگفت السياره بالباب ... اعرف ابويه ميقبل يخاف تنباك .... بس جوعان  .. اتغدى واطلع ادخلها للكراج ...
اكيد امي منتظره على الغدى ...، يوميه متاكل ومتخلي ابويه ياكل ..، لحد ارجع

اني هوايه ادللت عليهم. لان  اصغر اخواني واخواتي ..
بيتنا مابيه غير امي وابويه
اخواني علي  وايوب طلعوا بسبب الوضع الامني بغداد وبسبب وظائفهم  ايوب موظف بالحله ...
وعلي بالبصره ...
عائلتي تعتبر مرتاحه ماديا والدي يعمل باستيراد المفروشات ..والتحف
وعنده بيوت مأجرها  .....
اصلنا من ديالى سكنا بغداد بالتسعين 
وبحكم راح اتخرج
اهلي يلحوون على زواجي
ارتبطت مع  بنت وياي بالكليه
شفت بيها  ميزه حلوه هيه الصراحه ....
ماتحب تجمل الحقيقه تكولها مثل ماهيه ...

مره وبداية تعارفنا...  عجبني التشيرت الي لابسته گتله

( حلو التشيرت )جاوبت بدون تردد
(من الباله بالفين )
وترى مو التشيرت الي حلو اني حلوه )
مارديت عليها
السكوت استفزها

: اشو سكتت  قابل اني موحلوه

: شوفي كل نساء الارض جمع مؤنث سالم ...
الا انتي
(جمع مؤنث  فاتن )

ايه: هههههههههه
شكلها الجمله مرتبه
ومنو الي تعرفها  تگللها هالسطر

طلال : واذا اگلج  اول مره احب ....واشتاق..... واغار
شتگولين

:اگول  الله يعينك

:وانتي كم مره

رفعت عيونها للسمى تفكر على اساس تحسب ...

: لا

كم مره اشو دتحسبين
:  اذا استثنينا المطربين ....والممثلين والرياضيين ...
اعتقد راح.  اجرب  للمره الاولى

: يمعوده وگعتي گلبي

عجبتني الصراحه ..والثقه بالنفس ..والبساطه.... واشياء ثانيه

تتعلق  بشكلها   وملامحها  البغداديه الي تمتزج بيها  الحنيه  والجاذبيه ...
ونظره عميقه  بعمق عراقه بغداد... وسحرها .. والقها
صعب اوصفها غير بجملة ...
شكلها  اول مشفتها مااگدرت اتخطاه  وانساه ....
ورفعت الرايه البيضه .. ورحبت باحتلالها گلبي  وكل دنياي ...

مرت علاقتنا  بصعوبات ...وغيره... وسوء فهم مثل اي اثنين
ابتعدنا.. واعتذرنا.. ورجعنا...
لكن ولا مره استغنينا عن بعض

المشكله بالشرط الي مخليته هيه لازم اختها الكبيره  تنخطب اول

فتحت باب البيت 

توجهت  لجنتي 
وبوقت الغدى
امي تحضر السفره ... وريحة الاكل  سحبتني للمطبخ  مثل السحر ...

امي انسانه طيبه ل ابعد الحدود
وعيت عليها على طول مبتسمه
حتى لو كانت تعبانه... مريضه
مزعوجه ...
عدها الابتسامه مرسوم صادر من طيبتها ....
ولازم تتلگانه كلنا بيها
لهذا السبب اعتبر بيتنا جنه

مرات احاول اساعدها بالبيت
تضحك وتجاوب
(هنيال مرتك  )
وگفت يمها ..

: :الله يساعدكم  يمه يابه  شلونكم

: :هلا بيك طلال  يمه
شلونك بالامتحان

: :الاسئله سهله حتى مااحتاجيت للغش

الظاهر ابويه معجبه اغش اعترض

: :ها يعني الامتحانات القبلها كنت تغش

:: طبعا يابه   اغش اذا الاسئله تجي تشوي شسوي نسلكها مناومنا 

:: ههههه المهم تتخرج وارتاح من گعدة الصبح وياك

:: انشاالله ترتاحين من كلشي من ضرب الاوتي وغسل قمصاني وبعد متنتظريني  لحد ارجع بالليل

: ياالله يعني راح تجيبلي جنه  اسولف وياها واتناكر وتجيب كم طفل يملوون البيت

: :موجوده وداعتج بس ترتب امور عائلتها وتنطيني خبر

خلت ايديها اثنينهم  على السفره

: :لا تمدون  ايدكم  لحد تگلي منو هيه وين بيتها ؟
شوكت اروح اشوفها ؟

حجب السفره عنا وخاصة والدي اسلوب تعذيب يجبرني على الاعتراف وخاصة والدي ميتحمل جوع وراسا صاح بيه

:: احجي لك انريد ناكل

:: البنيه طالبه ويايه السنه تتخرج ومن  اهل منطقتنا قريب من المدرسه الابتدائيه
بيت ابو ملاك الرجال الموظف بالمحكمه تعرفه يابه اسمه محمد

: : اعرفه خوش رجال والناس محترمين  يله ناكل

: :دوگف انته
يمه احجيلي البنيه حلوه طويله گصيره سمينه ضعيفه

: :يمه نتغدى وراويج صورتها عندي بالبتلفون اخذناها جماعيه البارحه

: :شتتغدى راويني الصوره  طلال  لا والله اشيل الاكل

::   لحظه اطلعها من التلفون 
واني ابحث امي تركت مكانها وگفت على راسي

: يله متفضها عاد

:هذي شوفيها

بس هيه احلى بالحقيقه

شافت الصوره امي ابتسمت ورفعت راسها تباوعني وترد تباوع الصوره
مقارنه طبيعيه بين انتاجها وانتاج الغير

:: لايگتلك ولك
همزين عندك ذوق

: :طالع على ابويه

:: ابوك مو يمنا ملتهي ياكل
شوف ابو طلال 
مبينه حبابه البنيه  مو بالله

:: اسمها ايه يمه ايوته

ضمت الصوره لگلبها ورفعت راسها للاعلى تدعي

: يهنيك ربنا  وياها يمه بحق كل ايه بكتابه نزلها على حبيبه محمد 
ردت باوعت على الصوره وسالتني

:عندك صوره ثانيه الها  .. اقرب من هذي

: : اليوم ميخلص اذا متكشفين كل الاسرار 
خلي اتغدى ونگعد اني وياج احجيلج عنها وعن عائلتها 

:  : وراويني صورها  هذي ممبينه زين

: صار  تدللين

خلصت فتره العصر امي
ماعدها حديث غير عرسي
خابرت اخواني واخواتي وشافت صورها الي عندي
وماكتفت اصرت والدي ياخذها يشوفون البيت من برى

سالتها واني اشوفها تستعد للطلعه تشوف البيت

:: شراح تستفادين من شوفة البيت يمه

اخذت العبايه  الي معلكه بدايه الغرفه وهيه تطلع وباصرار جاوبت

: :هيج اشوف بيتهم بلكي اعرف واحد من الجيران واسالهم

حاولت امنعها من الروحه خايف لا تدگ الباب وتحرج ايه وبذلت جهدي اقنعها

:: يمه البنيه اعرفها اربع سنين  مؤدبه وخلوقه واختها الكبيره خريجه وهم اخلاق وادب

: :وليش اختها ممتزوجه ليهسه

: امها  مريضه  وبالبيت  معتمدين عليها وهيه ترفض تتزوج اذا متحصل وظيفه

واسئله بعدها اسئله ... مفاد طلعت شافت البيت
صار لازم اخبر ايه حتى تفهم اهلها ... انتظرت الليل
صعدت لغرفتي  اتصل لان امي بدت تراقب اتصالاتي
سديت باب الغرفه ...
اتصلت بيها جاوبت

:: هلووو طلال ليش صارت الساعه ١٢

: :وشمعنى ١٢

: :انت اتصالاتك تبدي ١٢ عادة

:ههههه اشتاقيت اسمع صوتج ميصير

: :اها يعني مسويلك مصيبه وتريد تگلي  احجي شسويت

: :امي شافت صورتج

شهكت من الخوف

:: لا صدوك تحجي شلون شافتها

:اهدي لاتخافين :اني راويتها الصوره گتلها هذي جنتج
واجتي شافت باب بيتكم ورجعت گالت الصبه مال بيتهم تجنن نظيفه

: مدام عجبتها الصبه خلص يعني اني هم عجبتها

:: وعاجبتني الي همين
لخاطر الله احجي ويه اهلج ترى هسه ادز امي والله مستعده ومحضره العبايه

:راح اخلي ملاك تحجي ويه امي

: :اليوم هسه

:: هاشبيك لاتلهيني عن الامتحانات لخاطر الله

:: ايه خلي اگولج شي وافتهميه

: :احجي داسمع

حجيت وياها وبثيت شكواي يمكن هالمره تنهي الانتظار

: :شنو فايدة العمر  بدون منعيشه ويه انسان نحبه ايوته
العمر مره وحده والحب يمكن ميجي طول العمر
ولو اجى حرام يضيع بمتاهات مالها داعي
ليش ليليه نسهر بعاد عن بعض اذا نگدر نسهر سوا؟
لاتظلين تاجلين لحد ينقتل الشوگ بينا وسط انتظار
لج
والله احبج

اختفت الضحكه من صوتها وردت بصوت خافت تخاف احد يسمعها

:اني هم احبك واذا اجلت خطوبتنا فالظروف انت تعرفها

:: اعرفها. ومن ثالث سنه كليه اجلت الخطوبه
وبعد مااهلي اخذوا خبر صار التاجيل صعب
الخطوه الجايه عليج

:: انشالله بعد الامتحانات ارد الخبر

:: لا  اليوم تحجين وياهم وتردين الخبر

:: ليش مستعجل هالگد

: :ايام عمرنا  مو ملكنا
مااريد عمر يخلص بدونج

:الي يسمعك يكول رايح تسووي عمليه انتحاريه وتموت

: :ههههه يجوز اسويها اذا اجلتي  هالمره

:: واذا لخاطري وعد مني ااخر تاجيل بس تخلص امتحاناتي
واني اتصل بيك واگلك تعال اخطبني
لخاطري طلال

: : يابه لخاطرج بس لاتزعلين
اذا امي دگت الباب ترى
متحمسه اكثر مني

ايه : ههههه
سلملي عليها وفهمها بس هاليومين اخلص امتحانات
واحجي مع اهلي

طلال : انشالله خير

—/—————————
ملاك

نجحت روان الاولى ...
وايه خلصت امتحاناتها
وكلفتني افاتح ماما بخطوبتها

وقت الظهر  وقبل رجعة بابا دخلت لغرفتها  افاتحها بموضوع ايه ...
اول منظرتني  وعرفت  محتاره كيف ابدي الموضوع  حجت هيه

: : شبيج  لازگه بالباب وتباوعيني احجي شعندج

رتبت الكلام قبل لا احجيه وگلته مره وحدهز

: : ماما في ولد يريد يتقدم ل ايه
واهله مستعجلين شويه
استغربت من سرعتي بالكلام وردت

: : عبالي تگولين يريد يتقدم الج
والله يايمه شايله همج ....
احس بيج مدفونه بهالبيت ....
وصارت حياتج.. طبخ... وتنظيف
شاسوي  مرضي مامنه شفى وحظج مامنه رجى

: : شنو القصه ماما اني شحجيتلج
وانتي سويتيها مأساه
داگولج طلال الولد الي ياخذها خط معجب بيها
واتخرج وياها مهندس
واهله المنطقه كلها تعرفهم خوش ناس
شتكولين ؟

: : اسال ابوچ . واشوف رائيه
ولو المفروض انتي قبلها

: :ماما  الله يخليج لاتفكرين هالشكل
ترى الولد صار سنتين رايدها
وهيه تاجل علمودي
يروح يطير من ادينا
ونظل على گلبج اني وهيه

: :  وتظلون ليش اكو احلى منجن بدنياي
بس البنيه. اول وتالي سترها الرجال

: : مدام هيج اقنعي بابا
ومااعلمج شلون
راح اطلعلج دشداشتج
الحمره حبابه استعجلي
الولد ذبحنا اتصالات
وامه واگفه يم تيل الكهرباء

: :نزول عليج صدوك تضحكين
دجيبيها للدشداشه

فتحت كنتورها الي كل ماافتحه اصفن على ترتيبه وريحته ريحة ثياب الامهات  يفوح  طيبه وصبر  وحسن ...
عطرهن لسه مافي احد گدر يستخلصه بقاروره عطر ...

:  :تفضلي الدشداشه
وراح اتصل بابا
اگوله ماما مشتاقتلك

:: انتي اطلعي واني اتصل بيه
وبطريقج انطيني المشط واطلعي
انطيتها المشط اشرتلي باديها اطلعي

:طالعه عيوني طالعه

- [ ]