رواية نوارس مهاجره الفصل الرابع 4 - بقلم zeanab_almusawi

هذا  البارت الثالث واروح اتغدى واجي اشوف تعليقاتكم وتصويتاتكم منوره شاشة تلفوني

#نوارس_مهاجره3

#زينب_الموسوي

ملاك

مهما نحاول نتجاهل  اراء  الاخرين ...وكلماتهم  ونعيش

الفرح الحقيقي... ولو  للحظات
يبقى تاثيرهم علينا يعكر صفو فرحتنا ...
وهذا الي حسيته بيوم خطوبه اختي ايه ل طلال ...
كل صديقاتي... اقاربنا... جيرانا
عمامي ...
نفس السوال

(لعد وملاك )؟

شلون الصغيره قبل الكبيره ...

منو سن هالقانون... واتصور  ان البنات الاخوات واگفات  سرى وميصير وحده تتزوج قبل الكبيره ....
تجاهلت عقدهم النفسيه وعشت فرحة اختي ...
وقبل يوم من الحفله باليل اتصل بيه ثامر .... الي  بدل ميشوف  حل  بدا يتنصل من وعود  ..... وسنين انتظار

اني عرفته لثامر  بالاول كليه وبقينا سوا الدراسه والتطبيق
حبيته رغم اعرف ظروفه صعبه وقتها كان حصار .....
تخرجنا وخدم عسكريه باليوسفيه.... بعدها  وسافر للاردن ....ورجع بعد سنه بدون ميحقق اي تحسن بحياته الماديه .... وضيع عليه فرصة التعيين ...
وصار السقوط وانصدمنا بالواقع الي صار اسوء ...
والشهادات  تحولت لمجرد لوحه تتعلگ على الحايط تباوعها وتتحسر على تعبك سنين ....

اجاوب اتصاله يمكن في امل جديد

:هلووو ثامر شلونك

:الحمد لله
رده واضح بيه  الجديه. اكثر من اللازم 
بعدج ضايجه  ترى صدگيني مو بيدي  اني هم منتظر اليوم الي يجمعني بيج

:  :والى متى  ياثامر  صحيح اني فرحانه ل اختي بس اشوف الغصة والحزن عليه بعيون ماما وبابا 

تنزفز وعله صوته

:. :اني ظروفي تختلف عن غيري
خطيب اختج الله فاتحه بوجهه ....اني عايش بيت جدي يتيم لا اب ولاام  زين من خوالي وصلوني وتخرجت ومااگدر هسه اكلهم يتحملون تكاليف زواجي

ولاكلمه يگولها  جديده ومضطره اسمع نفس الحجج  واعيد عليه نفس الكلام

:اعرف ظروفك وكل الي اريده حلقه  سبب يخليني اجاوب بيه الناس من تسال

سكت  واعتقدت ديفكر بلي گلته   ويدبر اموره ويجي يخطبني... ويجنبني اسئلة الناس
اتضح لا  ديفكر  بشي ثاني...

  :عندي حل واحد بس

: :دحجي لعد شنو. تنتظر

  :اسافر واكون نفسي واطلبج يمي بعدين

: :يوووووو
هذا سالفة السفر سمعت بيها من سنتين وسبق سافرت ورجعت  ....
وهمين ميخالف تعال احجي ويه بابا. واني انتظرك

  :وليش احجي وياه
مواثقه مني اطلبج

: مو قصه ثقه
قصة كبرت على علاقه ....واتصالات سريه

رد عليه باستهزاء 

:  :هاي لان اختج الاصغر منج انخطبت انتي كبرتي

: : هذا احساس كل انثى تشوف الاصغر منها انخطبت سواء اخت او صديقه تحس هيه كبرت

::  لاتفكرين هيجي اتعبين
اني لوبيدي نتزوج اليوم
لكن الظروف

: :الله يخليك اتصرف لان شايله هم باجر شيخلصها ويه اسئلة الناس

علاقتنا بدات تفقد. عنفوان الحب  ... واصبحت اشبه مايكون  محاكمه اما هو متهم من قبلي ويحاول يبرر او بالعكس
والي گاله بعد ذلك اكدلي تعب من الا نتظار  وربما اكثر من تعبي ....

: :ملاك اذا تشوفين نفسج متگدرين تنتظرين بعد
اني عاذرج 

الكلمه سمعتها اذني ...وماستوعبها عقلي ..
هل هي تصريح بالتنصل من الوعود ؟ هل هي بدايه الخذلان

: :شتقصد ؟!

::  اني مشواري طويل وحتى سالفة السفر مو اكيده وانتي تريدين تتزوجين وهذا حقج  ....مااگدر امنعج واربطج اكثر

اختنگ صوتي  وجبرت نفسي على الرد

:وهالحجي وين جان قبل
اشو قبل شهر تتوسل بيه ارفض ابن عمي

:: هسه داگلج اذا بنفسج الزواج حرام عليه أأخرج

( بنفسج زواج ) الكلمتين  خلني اكره غبائي  هذا باعتقاده الهدف من انتظاري اله  وردت يفسرلي الي گاله

: :شنو بنفسج الزواج
ليش متصورني منتظره كل هذي السنين علمود زواج وبس
ليش شنو بايره اني وانت اخر رجال بالعالم

اني رايدتك انت ومنتظرتك  انت مو بايره ولا مشموره بسجة درب مهجور

:اذا تريديني. انتظري ليش تظلين كل شويه محسستني مذنب ؟

: :شنتظر. بعد وانت تتصور ذابحه نفسي على الزواج وبس
كل هالانتظار اختصرته (اذا بنفسج زواج ) ومن شوكت صار حبنا ذنب انت شايله

:: على كيفج يمكن معرفت اعبر صحيح

ماعاد بيه شي يريد يسمعه رفعت الاقلام وجفت الصحف

: :لاتعبر ولاتكلف نفسك
اسمع ثامر سالفتنا طولت اكثر من اللازم
گدامك شهر  اما تخطبني
او تحلني من اي وعد بينا
وحتى اتصالاتك بعد مااجاوب
مع السلامه

سديت التلفون وقفلته ...
كلامه بقى ابالي  ..
خنجر اندس وسط روحي
البنيه عمرها مينقاس مثل عمر الولد ...

الولد شجره مثمره باي وقت .....
البنيه زهره تفتح بأوان   ...وسرعان ماتذبل

اسمع صوت ماما تناديني
مااگدر اجاوبها
الشغل مكوم بالبيت وايه لوحدها .....

تملكتني رغبه للبكاء اكثر من اي شي ثاني ...
اخنگ نفسي لايتفسر بگائي
غير تفسير ...

حاولت اكتم. وماگدرت
الغرفه قريبه من الهول ...

سمعتني ايه فتحت الباب
اني بين الاسره  ابجي ... ومتغطيه بطانيه حتى صوتي ميطلع

:: حبيبتي اسم الله شصاير ؟ ملوكه

: :اسفه ايه والله مو قصدي ابجي لاتفهميني غلط والله فرحانه لخطوبتج بگد فرحتج واكثر

رفعت الغطى عني وهيه تبينلي ماعدها شك  بفرحتي الها

:ادري والله بس گولي شبيج

استسلمت للبكاء بين اديها وهيه تحاول تعرف شصار

:: ولج ضيعت ٨ سنين من عمري ويه واحد ميستاهل

: منو ثامر ؟

: :هو اصخام البين منو غيره
يگلي اذا بنفسج زواج تزوجي
شوفي الكلمه شگد رخيصه

:: لا مع الاسف عليه
لعد وين حبه الج
المفروض يفهم شنو الي مصبرج
وليش منتظره لو تريدين زواج اخذتي علاء ابن عمج موظف بالعقاري ومرتاح

: :والله من عرف ابن عمي متقدملي گلب الدنيا عليه
وكل شويه يتصل
هسه يگلي اسافر وانتي شوفي الي يريحج

: :اخاف هذا ديتهرب

: :يطبه مرض هاي هيه
بسيطه اذا مااوافق على علاء واحرگ گلبه 

:دوگفي انتظري يجوز خربط بالحجي
يجوز متضايق من شي

: :اسفه ايه هذا اليوم لازم اكون وياج

خلت اصابعها على حلگي حتى مااكمل  وكل همها كان متشوفني ابجي

: اسكتي ولاتبچين 
نامي شويه واگعدج
تساعديني مو عبالج تفلتين من الشغل

تمددت بالسرير وهيه غطتني وتاكد عليه ( ارتاحي لاتحرگين دمج هو اليخسر نامي )

: :زين شويه واطلع
لاتحجين لامي شي الله يخليج
هي مناقصه مرض وتعب

:لاتخافين كلشي مااگلها نامي وارتاحي

مررت ايدها على راسي وباستني وطلعت ...

شفت اخر نظره بعينها تدل على عطف وانكسار داخلها ....
خلتني اتحمل  صدمتي بانسان ماقدر مشاعري وصبري وياه
...وبين نفسي اردد هذي اختي
وباجر  فرحتها ...
جبرت نفسي اترك. الفراش
واوگف گبال المرايه رتبت شكلي ...واخفيت اثر الدموع بمساحيق والوان .....
فتحت باب الغرفه وابتسمت الها
ردت عليه بابتسامه امتنان

تساعدنا اني وياها  بالليل تتظيف وترتيب البيت 
وجهزنا الكيك  حتى نخفف الشغل ثاني يوم
ونستعد  لحفلة المهر  وبعد مااخلصنا  شغل البيت
جهزنا   ملابسنا  وطلعت مجلات عندي حتى تختار ايه منها التسريجه والمكياج.....
وانغمست بتفاصيل تهم حفلتها وبس ماذكرت ثامر
مااريد شي يسلبها فرحتها
ابد
وهيه تجاوبت وياي وانشغلنا بادق التفاصيل

::  اني اشوف ماكو داعي للصالون اخاف نتاخر والدنيا مگلوبه ومسلحين

: :لاتشيلين هم صديقتي تقوى فنانه بالمكياج تجي من الصبح تطلعج غير شكل انتي متعرفين نفسج

:: مااريد شي مبالغ بيه اريد قريب من الطبيعي

: : دسكتي سكتي هذي حفله لازم تطلعين بشكل مختلف

روان تتفرج تلفزيون وكمزت من يمها من سمعت حديثنا واقتربت مني تريد تگول شي ومتردده

: :ملاك ميخالف باجر اخلي حمره وافتح شعري

تعجبت من طلبها

:وانتي شفهمج بهاي السوالف فوتي نامي يله
هالگدوتها وتحجي بالحمره

ماما كانت تساعد  ايه بتخصير بدلتها وسمعت روان تبجي انبرت للدفاع عنها

: :شبيج وياها  خليها ترى هواي بنات بعمرها بالعيد والاعراس يخلون
جاوبتها   ايه

: :ماما هذا غلط. اذا غيرنا يسويه احنا ملازم نصير مثلهم

: :بكيفكم بس صالحوها لا تخلوها تبجي 

تركت  البدله ماكملتها. وراحت ورا روان تصالحها
اخذت الابره. وكملت دور ماما بالخياطه
طلعت بعد قليل ايدها بايد روان الي متباهيه  وتحاول تثير غيرتنا
وهيه تسمع ماما توجه كلامها النا

:اني رايحه انام. واخذ. روان تنام بحضني

اباب الغرفه اندارت روان علينا وطلعت لسانها تعيب
واني وايه اشرلنا الها اصطبري
سدت الباب
واحنا نضحك عليها

———————————
ايه
الحب مغامره يمكن نخسر ...ويمكن نربح ..
مشاعر متضاربه:
خوف ..غيره ..
انتظار ..ولهفه

عشتها مع طلال اربع سنوات
وادركت تماما  مشاعره مني حقيقيه
والدليل الحلقه الي راح يخليها بيدي اليوم ....
وينكتب اسمي واسمه بعقد مقدس ..
مهمتنا نحافظ عليه ..
وبماان الزواج هو تضحية جسديه ونفسيه من جانب المراءه.. يصبح الامر  اجمل لو كانت التضحيه مع رجل احبه ويحبني
———————————
طلال

اجمل مراحل حياة الانسان هيه الحياة الجامعيه ...
رغم صعوبة الامتحانات ..والدراسه ..
قسوة الاساتذه بعض الاحيان

تبقى ذكريات  الكليه تنعش القلب وتجدد الرغبة في الحياة...
واصعب مافي الحياة هي التخرج وتوديع الاصدقاء ...
وبدايه مشوار جديد في الحياة بعيد عن وجوه تعودت عليها ..
وعاشرتها.. ضحكنا ..وسولفنا ..
الالقاب الي نتبادلها.. النكات
دنيا جميله

لحسن حظي الوداع حيكون اسهل عليه ...
اخذت جزء من الكليه بل اغلى جزء عندي ....
وتعيش ويايه بقية عمري ونستعيد نفس الذكريات سوا ...

اليوم الخطوبه والعقد 
وعدتها قبل اربع سنوات وعد
واليوم اوفيه ..
نكون سوا للابد ...

امي مخبوصه من الصبح
مره تدعي.. مره تبجي ...
مره تستقبل اخواني وزوجاتهم
ومره تتصل باخواتي تاكد عليهم  ميتاخرون ...
وكل نص ساعه تسالني

: يمه طلال خو مانسيت شي للحفله
واجاوبها نفس الجواب

: يمه كلشي مناقص  حتى ايه گالت بعد لا تدز شي مناقص اي شي
تريدين اتصل بيها و  تحجين وياه

واصلت بجيها. وهيه تعيد نفس الوصايا ل ابويه واخواني
ماتحملت اشوفها تبجي وهيه گاعده بالهول وفاء وريام اخواتي وياها على الواهس

گعدت يمها  اخذت ايدها وبستها 
ماسكتت زادت

:بس لو اعرف ليش تبجين يايمه ...

افتهمت السبب من جواب ايوب الگاعد على الجهة الثانيه منها وبحضنه ابنه الي شاف بيبيته تبجي هو هم بچى وياها

:هذي مراسم العقد عند امي لازم تبجي
وبيوم العرس لازم تتعارك ويه ابويه  لاتهتم كلنا بجت بعقدنا

:طلال :غير تگلولي
گلبي مردته من الصبح تبجي
دكافي يايمه  حتى الفرحه بعد مااحس بيها

مسحت دموعها وهيه تحضني وتبوسني وتدعيلي

: عسى ايامك كلها فرحه . .هاي سكتت  بعد ماابجي

دگ تلفوني .....
باوعت بالشاشه ايه ....
اخذته بعيد وجاوبت

:هلووو ايوته

ايه :شلونك

:شلونك معناها تريدين تگولين تعليمات احجي

: ههههه صحيح
بدون مجامله
كم واحد حيجي للعقد ؟

: ١٥٠ رجال ١٥٠ امريه

فزت من الرقم

:صدوك تحجي شعدنا

:هههههه
داشاقى شبيج
يعني كلنا بحدود ١٦ شويه اكثر
ليش دتسالين ؟

:بابا يريد يسوي عشى  فگلت اسالك حتى نحسب احسابنا

:باعي ترى معظم الناس بعد العقد تروح مناطقهم بعيده ...
وامان ماكو ....يرجعون من وقت افضل
الي يبقى عائلتنا بس

:ها لعد اگول لماما افضل

: شنو الاجواء عندج

:غائمه وزخات بجي كل شويه

طلال :حتى عدنا امي مابطلت تبجي واختي وفاء مگابلتها وكل شويه طلال حبيبي كبرت وراح تتزوج  يعني اليوم يله اكتشفوا كبرت

: وين الشي المحزن بالموضوع

: ماادري الظاهر احنا شعب مكبوت نسينا الفرح ومنعرف نعبر عنه غير بالدموع

سكتت شويه وبعدين حجت

ايه: اكلك ملاحظه كلش مهمه

طلال: خير گولي

ترددت تحجي لحد لحيت عليها

: شفت بعقد صديقاتي واقاربنا من يلبسون الذهب تصير الحاح من اهل الولد ان يبوس البنيه

: اي والمطلوب ايوته

:من هسه اكلك حركات الافلام المصريه اتركها اليوم

ضحكت من طلبها وحبيت اتلاعب باعصابها

: افتهمت دتگوليلي بوسني
صار تدللين

: داحجي جديات طلال استحي من ماما واختي

:دمشي روحي فيكاتج موعليه

ظلت  تتوسل  وتلح

: طلال اسمعني لا والله

: الخط يگطع مااسمع  باي باي ايوته
مااسمع باي

: الوووور طلال
———————————
ايه

الساعه خمسه اجتمعت الناس عدنا صديقاتي موجودات واعمامي
ماما وخالتي ومرت عمي بالمطبخ مشغولين

ملاك وصديقتها. اخذوا مهمه شعري ومكياجي

والبقيه وسط هوسه متنعرف ليش 
روان طابه طالعه للغرفه مااعرف شعدها وملاك كل شويه. مصيحها  عليها

يمكن اني فقدت التركيز
وخاصة من سمعت ان ام طلال واخواته وصلوا

: :بعد وگت مو گالوا بالسبعه يجوون عفيه ملاك تاكدي صدوك وصلوا

: :عادة النسوان توصل قبل ....يدورن ملاحظات هفوات ويظلن يسولفن بيها

:  الله اليستر اگلج : اتصور البدله مسمرتني  زايد 
اني مااحب البصلي  مااعرف ليش اخترته
عفيه اخاف مااعجب امه واخواته

: :ياعيني مو شافوج قبل اسبوع وعجبتيهم
صدقه ل الله اصلا حظ ابنهم
من السمى اختي تجنن مو بالله تقوى

: :صدوك ايه حلوه متحتاجين مكياج  قوي

: :كل مااسمع صوت الهلاهل بطني توجعني

: :خليهم يهلهلون شبيج

اخذت ملاك دور  بكلشي  بهذا اليوم 
من تجهيزي لتحضير الكيك وترتيب البيت
تزيين الكرسين الي محضريهن النا  اني وطلال
الى  مسانده وداعمه لروحي وانتزعت الي گدرت عليه من خوفي   وتوتري
ورغم الوقت كان صعب وحضر تجوال والوقت قصير
ماخلتني احس شي ناقصني بهاليوم ....

بعد ماخلصنا مكياج وتسريحه

راحت  ملاك تستطلع الوضع قبل ل اطلع من الغرفه

رجعت ورى شويه

:ها شنو الاخبار

رسمتي صوره شفهيه  عن الغرفه الثانيه الي هيه مقر الاحداث (الهول )

:ام طلال گاعده گبال الغرفه وترصد التحركات اما اخواته  فبصفها

وماما حجت قصة حياتج من انولدتي مرورا باهم الامراض والوعكات الصحيه وامتحان السادس اعدادي
لحد البارحه من گلتي مااگدر اتعشى خايفه

: :ههههه لانفضحنا
والاغاني منو مشغلهن

: ؛هاي عريفة الحفل روان ونازله رگص

: اطلع لو بعد انتظر

: :اني اشوف اتطلعين وتحاولين تكونين فكره عن عمتج وحمواتي
لاتحجين استمعي فقط

:  :اففففف شيخلص هاليوم
كلي ارجف
تنفست بنفس عميق
الله يعدي الليله على خير
ملاك على يساري وتقوى على يميني  وكل شويه تگلي

:توكلي بالله
گوموني من الكرسي البدله كانت كبيره من الاسفل رفعتها ملاك 

:الزموا اديه
الدنيا دارت بيه

لزمتني ملاك
تقوى فتحت الباب .....
رفعت بدلتي
وطلعت عيني اجتي على ماما
باوعتني ....
ودنگت  تحبس دمعتها ....

وسمعت صوت
صلوات ....
وهلاهل ....
مارفعت عيني وتركت ملاك ترشدني للطريق .....

لحد گعدت على الكرسي المخصصي اليه

باوعت الكل عينه عليه

اقتربت امه واخواته يبوسوني
ويهنون
وامه جلست يمي على الكرسي المخصص ل طلال من يوصل
وبدت تسولف ويايه

: :صلوات يمه گمر ونجوم جنج

ابتسمت ودنگت

:: اني فهمت الحجيه امج احنا مستعجلين شتگولين انتي

:بكيفكم مثل متحبون

:: اي احسن النا والكم ليش تطول الخطوبه وبعدين تصير مشاكل الله يبعدنا عنها
ولاتخافين اي شي تريديه گولي وتدللي
ترى طلال المدلل واخر فرحتي

:متقصرين خاله والله يخليه الج ويحفظه

:: ويخليه الج  ويستر عليج ويتممها على خير. امين ربي

بقت تسولف واخواته  غنوا ...
ورگصوا

وبعدها عدى الوقت
ووصلوا الرياجيل ......

ابن وفاء ضرغام  عمره عشر سنين اصبح مراسل ينقلنا الاخبار شديصير  وكل ميدخل بخبر جديد

:( : الشيخ ديحجي ويه خالو طلال

هسه طلال باس عمو ) نقل الاحداث اول باول بجمل مقتضبه. وبنبره مرعبه
على الاقل بالنسبه اليه
لحد

جتي  ماما عليه

:يله الشيخ يريد يسمع موافقتج

: وين اروح يعني

لزمت ايدي ام طلال واخذتني وياها

: :تعالي ويايه بنيتي لاتخافين گومي

اخذتني وهي تسمي
وگفتني قريب من باب الصاله وسالني الشيخ ......
جاوبت موافقه

سمعت الصلوات من الصاله ....
والهول نگلب هلاهل ورگص

ردت ارجع لمكاني وگفتني امه
بين الهول وصاله الزغيره

:: تعالي اهنا هذي الصاله الزغيره فارغه

: ليش خاله

: :حتى من يدخل طلال يلبسج الذهب ياخذ راحته

: ياخذ. راحته بشنو

طلبها غريب لان احنا خالين الكراسي بالهول امام نسوان عمامي وخالاتي وصديقاتي

:ا: شبيج يبس الدم بوجهج بعد صار  رجلج

راحت يم بناتها ....وتركتني واگفه بين الهول والصاله

:ام طلال :يمه وفاء  ريام
شيلوا الكراسي بهذي الغرفه
احسن ......
واستأذنت من ماما

:من رخصتج داده ام ملاك خليهم براحتهم طلال يستحي شويه

تصرفها أثار نسوان عمامي وخالاتي  واعترضوا

:(شنوا قابل نحسدهم

:ميصير عيني  هستوهم عقدوا
احنا ماعدنا هذي التصرفات ابيتنا حتى لو عقد
المفروض يلبسها گدامنا )

دزيت  رساله اله

يارب يفتحها ....
فتحها

:: هلووو رجلي

:والدج يمي ارويه الرساله تريدين

:: لاحباب.

: :بعدين مااگدر اجاوب

بقيت افكر شاسوي ومالحگت اوصل لنتيجه  اخته صاحت

(العريس يريد يجي يلبس الذهب )

كنت واگفه بنص الهول
مااعرف وين اگعد ......

سحبوني تقوى وملاك  للقاعه الي امه گالت عليها  ونقلوا الكراسي ......

وتقوى اقترحت اسكت مااعترض

:اگعدي اهنا
ترى تاخذ موقف منج وتحسبها عليج .....
قابل شراح يسووي يبوسج
ويطلع .....

وملاك طمنتني

:لاتخافين الفضول راح يخلي النسوان كلها تجي اهنا

لحظات ضليت اسمع الاصوات اضخم واعلى .....

غمضت عيوني وجمعت تركيزي
لحد دخل طلال ....

شوفته عادت الامان لگلبي ......

امه باسته وسلم على الكل ( السلام عليكم ) ماسمعت الرد الهلاهل كانت اعلى

حجى ويه امه ..... واشرتله على مكان ماما الي كانت قريبه من الدرج ..... الظاهر  راد يسلم عليها.
توجه يمها وباس راسها  ....

وامه اشرتله يجي للهول
شافني گاعده ضحك ....

وصل يمي وگعد....
تفحصني من شعري للحذاء
واني باوعته خطف   لابس قاط رصاصي
واول تعليق ضحكني بيه

(يمكن خلال نص ساعه بوست نص عشيرتكم ..، كل شويه يجي واحد ويگلولي  بوس عمك )
ضحكت  واتذكرت   الحضور يراقب  كتمت الضحكه باصابعي
سألني

:: ليش خاتله اهنا ؟

:: بعدين احجيلك

:: طالعه احلى مني اليوم

ابتسمت رغم كنت على وشك  الضحك بصوره عاليه وبعدين گلت  لازم اثگل ..،.،

:  :  احجي براحتك مااگدر ارد اليوم

امه واخواته واگفين قريب  وفاء بيدها علبة الذهب
ومثل مگالت ملاك النسوان كلها دخلت يمنا تتفرج
ام طلال الحماس الي عدها اكثر منا ومستعجله على الاحداث

:يله يمه لبس مرتك الحلقه والذهب

التفت يدور على وفاء  وهيه يمه
الاحراج مبين عليه

اخذ الحلقه من ايد اخته ....
انطيته ايدي
اديه ترجف مثلي
والحر والخجل خلاه ميعرف شيسووي ......

ماردت احرجه زايد
واني اسمع امه تگله
(بوسها
صارت حلالك بعد )

باوعته وباوعني ابتسمنا
باسني بخدي مرتين ...

واندلعت موجه من الهلاهل
واغاني
استغلينا انشغالهم بالهوسات والرگص حتى يلبسني بقية الذهب
ومع اول  حركه منه نحوي مجرد مد ايده يلبسني الگلاده سكتوا وظلوا يتفرجون

:: ليش يتفرجون علينا داحس نفسي متهم ويريدوني اعترف

:: اني لو ادري هالگد احراج جان لبسنا حلقات بسكته وخلص

:: هاي واني وصيت امي تتركنا لوحدنا

:ها يعني هذي فكرتك 
لعد تستاهل خليهم يتفرجون

باوعني وگال

: : هذا حجي يفيدج
يمه يمه تعالي احجي وياج

:: شدتسووي طلال

:طلال :هسه تعرفين ايوته

اجتي امه ركض

: :ها يمه حبيبي شرايد

: :يمه ايه تگول اريد ابوسك واستحي من النسوان

:خاله والله ماگلت

:: هههههه ادري هاي سوالفه
وشكو بيها اذا گلتي
هسه افرغلج الصاله كلها

وكفت بنص الموجودات وبصوت عالي اتصور حتى الرياجيل سمعوا 

:
حبايب من رخصتجن
العريس يريد يبقى لوحده وياه عروسته

انتن كلجن تعرف بهالامور

سمعتها تحجي
بنص النسوان ....
الا شويه يغمى عليه ويمكن الدوره الدمويه توقفت  وماعادت احس بقى عندي دم تحول بانزين وديحترگ

: شنو هالا حراج طلال

الخوف خلاني اتابع الي يغادرون واحد واحد عبالكم انتظر واحد يعترض او يبقى
فرغت الغرفه
فكرت اني اعترض

:شوف طلال عيب من اهلي
ميصير هيج

: والله هم اني عيب من اهلي
تخلص الحفله بوستين على الخد
وبعدين تذكري احسابج الي صار سنين تاجليه

مع اني احاول اكون بدور الي محافظه على الاصول وابيع ثگل
بتلك اللحظه ضحكت

تحركت اديه باتجاهي
واني اندار طوع امره
جتي عيني على ضوء الشمس
الي بدت تنزل وتغيب شويه شويه
كذلك كنت اني
بين اديه

في لحظة هوى
كنسيم عشق طفولي
التقت شفاهنا
للمره الاولى
ونامت اصابع يدي بين كفيه
كحمامه وديعه هانئة في عشا امين
وعانقت ناره. جليد. عمري

لحظه حلاوتها اسقطت دمعي
كريح هب على رقاب الشمع
ليطفىء  نارها دون وعي
دون حسره

انتبه على دموعي .....الي لامست شفاهه الي مازالت تجول بين ملامح وجهي
سالني

: :ليش تبجين

:: تريد الصدوك افكر شلون اباوع بوجه ماما واخواتي
والله عيب

: :خلص مدام تستحين منهم تعالي ويايه  اليوم 

:هم استحي من اهلك  هههههه  طلال  عفيه روح للصاله
والله استحي لخاطري

:  :لخاطرج تدللين صار
ولو صعب اتركج

: عدنا العمر كله  اصلا تمل مني

:اگلج ايوته  ترى اتفقنا الزواج بعد شهر

كان قصده يخوفني
باوعته ورديت عليه بمكر

:: شهر هواي ميصير. اسبوع

رجع گعد بمكانه بعد ماكان على وشك يترك المكان

::  تدللين هسه اروح احجي ويه عمي اگله العروس مستعجله

:ايه: ديله گوم روح
طالع تخبل اليوم

:طلال : شكرا على المجامله

سكت شويه وگلي

:طلال : متاكده تريديني اروح

هزيت راسي اي

:طلال: يله ايوته اروح

وگف ورفعت عيوني
وهو يدنگ على راسي يبوسه
وبسته بذقنه ......

اندار. وطلع
عيوني تتظر. لطوله
وبداخلي اگول
( سبحان الله من يبدع ميخلي نقص .....
طوله. رمح يلوح ويقتل بهدوء ....)
خفت عليه من عيني تحسده ودعيت
(ربي يحفظك )

بمجرد طلع الكل تحولوا يمي
خاصة امه فد شويه وتسال شصار ....
بعد ساعه الناس بدت تروح
بتلك الفتره كلشي كان محكوم بالظلام مجرد يبدي تنتهي
الحياة وتبدي العالم تتسابق مع 
اخر خيوط الضوء حتى ترجع لبيوتها
قبل انتهاء الامان وبدا حضر التجوال ...

بقينا بس اهلي واهله
حتى نتعارف اكثر على العشى

اني وملاك غيرنا ملابسنا وبدينا نحضر  الاكل

ونسمع مديح ام طلال واخواته
نبهتني ملاك لشي ناسينا

: :ايه ماما  مااخذت الادويه
اليوم وجهها صار اصفر

:: هسه اجيبلها الادويه

دخلت على غرفتها جبت الادويه
من وصلت يمها حسيتها گوه تتنفس .....
نصيت صوتي وحجيت وياها

:ماما تعالي بغرفتج ارتاحي
خالاتي موجودات

: :شلون يصير الناس شتكول
انطيني الادويه وروحي ساعدي ملاك

:حاضر ماما

ملاك كانت متوتره وعصبيه

: :ملاك لخاطر الله استعجلي ترى ماما حيل تعبانه

: :سوده عليه ماما
هسه هالعشى الا اليوم
وهذي روان اذا الزمها الا املص رگبتها

:شبيها  روان

: :روحيلها خلي تطفي الاغاني وخلي صديقاتها يولن لبيوتهن

والله خوش روان عدها صديقات وتعزمهم بله  مندري

: :عل كيفج  ملاك لاتتوترين فدوه بس خليها تعدي الليله

: :اسفه موقصدي ايوته
روحي سدي الاغاني

:هسه ركض اسدها
——————————-
ملاك

فقدت القدره على التحمل
رغم حاولت اتحمل .....
حجي ثامر براسي ..حرمني اشارك اختي فرحتها
صحيح موجوده وياهم  ...بس روحي تحاسبني على السنين الضاعت مني ...،

يتصور الي گاله سهل
ثمن سنين ضاعت وينهيها بجمله ....
اتمنى تصير عندي القوه واردله الالم الي حسيت بيه
وليش اتمنى مرت عمي ام علاء موجوده
اروح المح  الها يتقدملي علاء مره ثانيه ......

بس شلون اني الي رفضته وبالتلفون فهمته مااريده اريد اشتغل  بالبدايه .....

كملناالعشى وبدينا نصب مامارفضت نستخدم مواعين فلين استعمال واحد

:ام ملاك  : مو عيب هاي وين صايره سيتات الصيني ماليه البوفيه ونقدم الاكل بفلين

ونفتحت البوفيه الاثريه على مصراعيها وبدت  درازن المواعين  تدخل للمطبخ فارغه وتطلع للصاله والهول مليانه
واني افكر بغسلهم
(: زين لگيت شي اسهر عليه الليله واهرب من التفكير )
تقدم  الاكل للضيوف
سمعت من الحاضرات كلمات مديح على طبخي  لان ماما حبت تسويلي دعايه وهيه تدري مو اني الطبخت
المهم رفعت معنوياتي

وكمل العشى
الي مااعرف شنو  كانت محتوياته 
وطلعوا .....

اخذت ايه على المطبخ  وبدينا هيه تغسل مواعين واني انشفهم  وارجعهم لمكانهم وبغسل المواعين يحلى الحديث ويطيب السمر. وموضوعنا كان علاء ابن عمي

:: اريد اوافق على علاء وخايفه اندم

:ليش تتدمين

:: تعرفين بيت عمي متعصبين
وميحبون ماما  ومشاكل الورث بينهم على بيت بيبي  بالاعظميه

:: كل هذا مو مشاكل عائقه الخوف ليكون قرارج رد فعل على حجي ثامر
وترتبطين بعلاء وتبقين تفكرين بثامر

: :فعلا خايفه

:ايه: لعد انتظري  كم يوم لحد تشوفين شراح يكول من يتصل
يمكن يعتذر

:: واذا اعتذر ايه ماكو نهايه النا اظل انتظر

: :اخذي قرارج على مهل فكري

ترى انتي تحبيه وهذا الي خلاج تنتظريه

:: اذا هو يعتقد منتظرته حتى اتزوج وبس

:: افتهمي منه شنو قصده افضل

وبعدها قرري

: :ان شاء الله

يووو  نسيت حتى انطيج هديتج
تعالي ويايه
اخذتها لغرفتنا
طلعت الهديه من الكنتور
تفضلي ....
افتحي الكيس وشوفي

وصيت تقوى عليها وجابتها  الج مخصوص  القماش ستن  ابيض
وخيوط التطريز حمره

:: الله عاشت ايدج هاي منو يطرزها

: :بنيه جانت ويانا بالكليه
گاعده بلا تعيين وعدها واهس بهيج شغلات
وصيت تطرز اسمج واسم طلال على المخده

؛ :حبيبتي ملاك الله لايحرمني منج
كلج ذوق
ياربي اردها الج وانتي عروس

تعانقنا وتباوسنا .....
فاتت روان
واني اصلا متحمله عليها  لزمتها من ايديها

: :تعالي لج تعالي
منو عزم هذي الزعاطيط

حضرت الدموع وردت

: :اني. صديقاتي وعزمتهم

:: شلون عزمتيهم استخدمتي تلفون بابا ها

هزت راسها اي

:: وسالتي بابا قبل لتدكين

؛ :نسيت

: :وصديقاتج عدهم تلفونات
اذا گلتي اي اتخبل

: :ماعدهم. اعرف رقم ام فرح وام بنين وام

: :وبعد ام منو. وين الارقام

گامت تعصر بعيونها وتبجي

روحي جيبي الارقام هسه .....
اگول نخلي الرصيد يخلص ثاني يوم اثاري تخابر من ورانا
روحي جيبي الارقام

راحت ركض ومرجعت .....

لحگتها لان اعرف شدتسووي
دخلت الغرفه ضمت دفتر وراها

: :شدتسووين

انفجرت بجي  تريد تسكتني

: : اگلج اني شدتسووين .....تنقلين الارقام بدفتر ثاني وتتطيني القديم

انهزمت يم الباب وصيحت عليه

: :وانتي شعليج اني اتصل من تلفون بابا بصديقاتي

:: لج عليمن تصيحين
ها

اخذت الورقه ومزقتها
ولزمتها هيه  وگدامها اخذت تلفون بابا
ومسحت الارقام منه

وهيه تحاول تفلت من ايدي

: اذا شفتج تلزمين تلفون بايدج
هذي اصابعج اشلعها سمعتي
فوتي انزعي البدله وعلگيها ونامي يله
تحركت وهيه تبجي
: :گولي حاضر

:روان : مااگول. ورايحه لبابا انتي بكيفج
طلعت من الغرفه ركض ركضت وراها .....دخلت لغرفه بابا تبجي
شافها بابا گام اخذها بحضنه
ويمسح دموعها

: : شبيكم نوارس  روان باباتي ليش تبجين
جاوبته وهيه تتدلل

: : ملاك جرتني من اذاني وتگلي اشلع اذانج

:ا : وانتي شسويتي وصارت اختج عصبيه عليج

سكتت ماردت عليه

:  : متحجين لبابا  اشو سكتي ام لسان

اشرلي بابا اسكتي 

: : هسه باباتي روان تحجيلي. هيه متضم عليه
مو باباتي

خلت اديها على شعر بابا  وتمسح عليه باصابعها  وتحجيله

:: بابا اني اخذت تلفونك واتصلت بصديقاتي علمود الحفله

وبابا  مشت عليه. حيلها وضحك بوجها وطمنها
: اني مسامحج والمره الجايه من تريدين التلفون كوليلي واني انطجياه
وهيه استغلت بابا وهو مستمتع بلمساتها الماكره لشعره

:  : بابا اريد تلفونك العب بيه العاب

: : هههههه
شاطره تعرفين شلون تاخذين الي تريديه
هاج التلفون باباتي

طلعت من يمهم ورحت لغرفتي اصارع افكاري وهمي
الي حاولت اطلعها بروان المسكينه