رواية نوارس مهاجره الفصل الثاني والعشرون 22 - بقلم zeanab_almusawi

السلام عليكم ياحلوين
اذكركم القصه حقيقيه ... مابيدي اغير شي بيها 🥀
ومااگدر اخليهم يشترون چاي محمود😂😂😂😂😂 ويجتمعون بابتسامه
وطلال يلزم ايد ايه ويغنون ( بمبي ) 😂
فتحملوا الاحداث ولو مؤلمه

وصوتوا  باصابعكم الحلوه 👍🏻👍🏻
🌼🌼🌼🌴🌼🌼🌼🌼🌼🌼
#تكمله21

صار. لازم اسافر لمشيگان ...واوكف  مع ايه واخواتها... بازمتهم

سافرت يوم احد. الفجر
و الصبح  ...وصلت للبيت

فتحت ايه الباب ...
التعب والسهر مذبل جفونها

تفاجاءت بجيتي ...لكن منست ترحب ...

: طلال  مگتلي جاي تفضل
دخلت واني اسلم عليها ( هلوووو ايوته ) ولو هيه توقعت عناق وقبل
وكفت جانب  واني اشرحلها سبب الزياره المفاجاه

؛ خفت اگلج  ومااجي وتفتهميها غلط

: هلا بيك تفضل تفضل

#نوارس_مهاجره22
#زينب_الموسوي
طلال

دخلت
وهيه سدت الباب ....
الفرح مرسوم على وجهها  ... وتصرفاتها. ومتگدر تسيطر على ابتسامتها وهيه تفتح ابواب الصاله.... وترتب الوساده على القنفه قبل لا اگعد
رغم خوفها... وحزنها على... امها

انتبهت على  البيت  ...بيه لمسات
خلاني اتذكر بيتهم ابغداد ...
حتى الريحه  نفسها ...

گعدت يمي وهيه ترتب شعرها  بانتباهه متاخره
سالتها عن والدتها

: شلون صارت الوالده

اختفت الابتسامه..، وظهرت ملامح الحزن... على واقع متعب تعيشه هيه واخواتها

: الحمد لله على كل حال
اكلها قليل. وتنام هوايه

؛ اگدر اشوفها واسلم عليها

: اكيد تگدر
خلي بس انطيها خبر

راحت تركض دخلت على امها

واجتي ورى دقايق
وهيه تگلي( تفضل)

مشت ويايه بممر قصير
ذكرني بفرحتنا الماطولت ...وماتت غصب
ومشيتها رجعتني لصورة خجلها بداية تعارفنا ..
من نمشي سوا  وهيه حاضنه كتبها وضامه نص وجهها بيها ...من الخجل
صرنا مقابيل غرفة امها...   فتحت  الباب ...
امها على سرير طبي  ... وكبرانه هوايه ...
استقبلني وجهها بدمعه ...وغمضت عينها ...
اقتربت منها ... وبست راسها
مدت اديها اليه... وحضنتني وبجت ...

: سلامتج  خالتي ... ماتشوفين شر

ظلت حاضنتني ودقق بيه وكلامها يدل ممصدگه وجودي

: طلال... انت طلال... يايمه
شوفتك ذكرتني بالعراق  ...واللمه الحلوه

: انشالله تطيبين ونروح نزور العراق... واهل البيت
بس لاتبجين...  الله يخليج

ندارت على ايه   الي جابتلي كرسي اگعد يم امها

: ايه شنو قصتج شوفي الولد متريك لا

انتبهت على نفسها وردت

: حتى لو متريك هم يتريگ ويانا

اگاد اسمع طبول فرح داخل گيانها ... عبالك طايره وماعادت تلامس الارض

: اني اسف اجيت من وقت
اتصورت الطريق اطول

: يايمه هلا بيك بكل وقت

طلعت ايه واخذتنا السوالف
تسالني... واسالها
لحد وصلنا  لموضوع  محيرني واتمنى اكون شجاع واخذ قرار صح بيه

: طلال يمه  اني امك
احجيلي شنو المأخر . زواجك من  ايه...  وتنجمعون سوا

تفاجاءت بكلامها... وسكتت هيه استطردت

: ماتريدها  ...
مااظن لو ماتريدها ماحنيت ...واجيت تشوف امها المريضه ...
لو ماتحبها ...
ماعينك راحت وراها من طلعت ...
ليش يمه الصبرته ايه قليل

انهزمت من الاجابه الحقيقيه باجابه. مزيفه

: ماادري شگول ومااعرف ليش مااريد اتزوج. ..السجن كرهني الدنيا...  وخايف اظلمها وياي

: ومن تتركها  هالشكل هم تظلمها ايه بنتي واعرفها مراح تتزوج  غيرك تحبك
صورك لحد الان بدولابها

اتهرب. من مواجهه حقائق اعرفها  وهيه تستمره بالضغط

: الله كريم يمه لاتشيلين هم

: شلون مااشيل الهم
واني خايفه اموت... ومارتاحيت من وحده منهن... ملاك تركض من الصبح لليل... وقسمتها عوجه... وايه  راح تدخل تلاثين ومنتظرتك...
يايمه طاوعني ايه راح تسعدك ...وتنسيك السجن وضيمه ...
اريد اطمئن على وحده واتركها
عندك

: خالتي اني مرافض ايه  ... رافض تكون بتعاسه ويايه
اني تحولت ل انسان عصبي
معقد

قاطعتني وهيه تاشر باديها بمعنى اسكت

: انت صفي نيتك  ... والباقي سهل
هيه شويه تتحمل .. وانت تتحمل... والحياة تمشي

ماجادلتها  بعد. ماتركتلي مجال ولا عذر 
واني اشوفها تتوسل وتقنع بيه طمنتها بكلمات ماعنيتهم

: مثل ماتحبين بامرج خالتي

باوعت على الباب اشوفها وين صارت متت جوع

:هيه ايه وينها اشو تاخرت

ضحكت وجاوبتني

: هسه تلگاها سوت انواع الاكل مدام العزيز الغالي موجود عدنا

: ههههه. هيه هم عزيزه وغاليه عندي الله شاهد

: مدام هيج  فرحوني بيكم   واعقدوا الليله

: خالتي احنا عاقدين

ردت عليه
: ميخالف اخاف حجي الناس
جددوا العقد افضل وسووا عرس بسيط واخذها وياك

وكملت بالشرح كل التفاصيل
واخر كلمه گالتلي
بعد انت بكيفك  ... مااضنك تكسر خاطري وخاطرها

وافقت على كلامها

ايه
فرحتي متنوصف بجيته ..
حتى اسناني متنطبگ على بعض من الابتسامه

دخلت المطبخ مبقيت اكله سريعه للريوك مسويتها..  بديت  بالمخلمه .،
وتبسي الريوگ
والفول والبيض

احضر. والزم گلبي اتاكد بعده بمكانه  ...من الفرحه يمكن طار

رجفت اديه   مااسيطر عليها

اتصلت ب ملاك اگلها لان ممصدكه

: متصدگين منو عدنا خطار

بكل انزعاج  سالتني

: منو يعني ؟

: طلال. وهسه گاعد ويه ماما
واني داسوي ريوك الهم ...
لج اتصوري اني داسوي ريوك لطلال ...سمعتي الجمله وج مداصدك

: يوووو  يمعوده احنا الي يضوگ اكلنا يعادينا ...
مثل هذا الحقير رعد

: لا تقارنين طلال بيه

وصتني على روان

: روان وين ديري بالج تطلع

: لا بعدها نايمه بغرفتها

تحسرت وهيه تگلي

: ماادري اخليها تداوم الاثنين لو لا

:  خليها تداوم الغياب يأثر على مستواها

: وهذا الحقير شلون ادفعه الثمن غالي... وج كل مااتذكر المنظر من دخلت عليها
وهو يتصل كاميرا انجن

: طفله ولعب بعقلها  واحنا انشغلنا عنها بهالدنيا الغبره

اقترحت عليها اقتراح

: شتگولين اذا  انتقلت لشيكاغو ويه طلال
اخذها ويايه  وانقلها مدرسه يمي
واتفرغ الها ولطلال. واكيد تنساه لرعد  وتفكر بمستقبلها

: خوش تفكير... وانتي  ترتاحلج اكثر مني
وطلال حباب يكون الها اخ  واب
بدل هالمتحرش ...
لا ويريد يقنعني يحبها

: لعد شيگول  يخاف من الشرطه والفضيحه

: ولج بايسها  ماادري شوكت اكيد من جان يجي يدرسها

: كافي فورتي دمي خليني شويه فرحانه ...

؛ يله روحي

:ايه تعالي من وكت حتى نتغدى سوا
: انشالله
كملت الريوك ورحت لغرفتي اغير التراك بفستان
اختاريت  فستان احمر مشجر  بورد ابيض
وفتحت شعري
وخليت مكياج خفيف
وطلعت

دخلت للغرفه وكف وسحب طبله واخذ الصينيه مني

كعدنا  ناكل تلاثتنا

كم السعاده الي حسيتها موجوده بالغرفه ...
تكفيني اعيش باقي عمري سعيده ...
حتى لو على الذكريات 
السعاده واني اشوف فرحه ماما بيه ...
السعاده بسوالفه  البسيطه ...
ويحاول يشجع ماما تاكل ...
ويندار عليه يگلي( كل هذا لخاطري )

وگلبي يرد عليه ...
(لخاطرك انت... مستعده اموت الف مره... وماينكسرلك خاطر
وحق ربك الي رزقني حبك )

بعد الريوگ  رحت على روان اشوفها

جانت نايمه

من سعادتي واني افتح الغرفه عليها شفتها نايمه براءه
وكنت مستعده اسامحها : 
كعدتها

روان گومي بدلي ...عدنا خطار
گعدت  وسالتني

: خطار منو
جاوبت بابتسامه
: طلال  يله گومي

واني اطلع صاحتني وگفت بس منداريت عليها

: ايه تحبيه لطلال

مجاوبت وهيه كملتد

:والله اني هم احب رعد مثلج
والله ملاك متوهمه  مكنت انزع ملابسي كنت البس وروح بابا  

سالتها سوال حتى اتاكد هيه تحجي الصدگ

: شوكت باسج  رعد لو هذا هم ملاك متوهمه

سكتت ودنگت

: گومي بدلي واياج تتصرفين تصرف واحد غلط

: زوجوني اله واخلصوا مني

ولج  مصدگه بحجيه
ولج غبيه يتزوجج عقد شيخ اسبوع  يتونس وياخذ الي يريده
ويذبج مثل الجلب
وحتى حقوق مالج لان متزوجه بلا علم الحكومه
والمرض  اذا رجع عليج
فكري بمستقبلج ولاتمشين ورا رعد والاعيبه

________________________
رعد

صابني الياس ...وكل محاولاتي يوافقون اخطبها ...
بأت بالفشل
رحت على ابو كوثر وحجيتله  اريد اخطبها  فقط خطبه

استقبلني الرجال ابيته وحب يساعدني

: اني رايد اتزوجها واحبها ليش ميوافقون

: الي افتهمت من ام كوثر ملاك گايله  اختي زغيره ...ومريضه
وهو جبير... ومتزوج  ميناسب اختي

: اني مقدم طلاق وهسه بس اخطبها

دنگ وهو يگلي

: بصراحه سمعت حجي منهم عنك خلاني  اسحب نفسي من هالموضوع

: شنو الحجي مثلا
اذا على عمري فاني مو اول واحد يحب بنت بالعمر  هذا

: استاذ رعد انت ناسي انت مدرسها 
واذا التربيه عرفت تروح سجن متعرف ممنوع تقترب من طالب اوطالبه

: ابو كوثر احنا بديربون القانون الامريكي اهنا مضروب
وانت اعرف مني يعني كم عربي هسه متزوج قاصر ...
كم عربي جامع زوجتين ...
كم عربي يشتغل ويستلم مساعدات ...
اعرف اني استاذها
لذلك اخطبها هسه
واتزوجها من يصير عمرها ١٨

بعد نقاش واسئله واجوبه وعدني يساعدني

: اروح عليهم العصر  لان اختها  ايه دتعقد

: منو الي راح ياخذها

: خطيبها السابق طلال

: اي روان حاجيتلي عنهم
همه حلال يحبون واحنا حرام

——————————-
ايه

اجتمعنا على الغدى كلنا
الي احتوى كل الاكلات الي يحبها طلال اعرفها من زمان
وضفت عليها الاضافات التركيه
واللبنانيه

على السفره ماما سالت عن روان

: اشو منزلت  روان اليوم

: نايمه ومرادت تاكل

: مااتصورها كبرت بعدها ابالي طفله

ردت ماما عليه بشكل احرجه

:    وانت هم كبرت

: اي والله صدك كبرت

: مدامك كبرت وامك الحبيبه مو يمك تزوجك ...اني ازوجك

قاطعت ماما

: ماما. كافي من هالموضوع

طلال حجى وهو مدنك وصوته واطي
: لا ليش اني اتفقت وياها بالليل نعقد
اذا ماعندج مانع

سكتت وملاك باركت

: صدوك والله الف مبروك

ايه
رفعت عيني ادور بمعني للجمله
مالگيت غير جمود بعينه الي تباوعني
وتگول عكس مگال لسانه

افتهم ليش داباوع عليه
وسالني
:ليش  ساكته ؟

: اشو مگتولي

ردته هو يرد  لكن ماما سبقت

: شنگلج قابل ترفضين
هو رجلج  من سنين  وهالعقد گدام الناس
نزلت عينها بماعونها
وكملت

:يله كملوا الغدى وروحي وياه
للجامع واتفقوا مع الشيخ
يجي بالليل

سكتنا اني وياه

————————-
روان

ملاك حابستني بالغرفه  ...الاكل تصعده فوك ...
ورفضت اسلم على طلال وسمعتني جمله كرهتني نفسي
( لاتروحين. تتصلخين گدامه وهو يعرف بنات محمد. شريفات  انتي ماطلعتي مثلنا )
وكل ليله تاخذني انام بغرفتها
ولحد تنام متبقي كلمه جارحه متسمعني
هيه تنام واني ابقى مقهوره ودمعي بلا نهايه

كلام رعد جرحها. وبگد جرحها
دتاذيني

بنفس اليوم

صار عقد ايه بالليل ...
طلعت للصاله.. اشوف الناس  يحجون بيه  وخاصه الجوارين

سلمت على طلال

ودخلت للمطبخ وانعزلت بالمطبخ
لحد وصلت  مروه وامها
ومروه راسا سالتني اتصل بيج ليش متردين
استغليت فرصه انشغال ملاك عني
وحجيت بالمطبخ كل الي صار

: من هاي ترك المدرسه وبعد ميدرس بيها

: يعني هوه. ترك التدرسي

: اي تركه لو تشوفين شصار عليه   الطلابدوالطالبات يبجون وياخذون صور وياه
والكادر  گلهم بجوا عليه.. من طلع من المدرسه.. وجمع صوره واشيائه من الصف
واهده المدرسه عود
سلمه لمدرس الموسيقى

نزلت دموعي  ماادري على منو  ولجئت لمروه تساعدني

: گوليلي شسوي ملاك تخبلت عليه
حتى ملابسي اخذت الي ميعجبها   ...وذبته
والله جديده بعد ملابستها
حرگت گلبي ...
والجوارين عبالهم صدگ اني مو زينه  ...واسمعهن يكولن لماما (اشتكوا عليه )  وج اذا يشتكون انفضح. حتى بالتلفزيون

: وهو بعد مشفتيه

: وين اشوفه حتى مدرسه راح تاخذلي اجازه
هو اني اداوم يوميه ومامدبرتها

: لاتبجين الله يخليج
والله لو عندي تلفون ثاني انطيجياه

: اريدج تتصلين بيه. وتبلغيه يسووي حل
بعد مااتحمل نظرات ماما اليه

: اتصل بيه على الفيس لان ماعندي شريحه تدرين انتي

———————————
طلال

حالة ام ملاك.. ومرضها.. وفرحة ايه بجيتي..  متركلي خيار ارفض بيه العقد
تصرفت طبيعي...  ماحبيت اكسر خاطر ايه

الي حرصت يكون العقد جديد بكل تفاصيله ..
وكانها تحاول تصحي الامل داخلي ..

اني بالصاله واباوع عليها هيه
وملاك  حولن مدخل البيت لحديقه ورد طبيعي من حديقتهم
واصطناعي تسوي امهم من مناديل ملونه
واستعانوا بيه اعلگ الاضاءه
لكوني اطول منهم

بعدها. دخلت ايه يمي للصاله

تتصل بصديقاتها.. الماليات ديربون ...
وهيه توصيهن على بدله  راسمتها بخيالها 
وحسب وصفها الي سمعته
تكون طويله...  عدله ... بنفسجي ...

وبعد اتصالات البدله. ... تحولت عليه
سالتني قياس قميصي ؟

ليش دتسالين؟

: حتى اجيبلك قميص تلبسه

: مااريد ايه لاتخبصيني  ترى هو اجراء ماله داعي

تركتني بدون متلح رغبة منها تتركلي مجال  اعكر فرحتها بمزاجي الي بدا يتعكر
ويسالني ( شدتسووي اهنا )

استأنفت  ايهداتصالات الشعر والمكياج ..
تبعها... الكيك ...والعشى

واني گاعد بالصاله وهيه يمي
استغربت هالگد تعرف ناس

: اگلج شوكت لحگتي تعرفين هالناس

ضحكت وهيه تفسرلي
: حبيبي مرتك  كل ديربون ماكله من جوى ايدها  
وانت تعرفني طبعي احب الناس والعشره

بفرحتها حبيت ا نطيه صوره مصغره عن جهنم الي راح تعاشرها 

: اني الي اعرفه عنج عندج ذوق اشو اليوم لا

خافت من كلامي وانخطف لونها

: ماافتهم شنو قصدك

: قصدي اريد انام طالع من الفجر
اخذي تلفونج وروحي اتصلي بغير مكان

: لا تنام اهنا شنو 
تعال ويايه  

مدت ايدها اليه...  وبوجه كله فرح ...
وعيون مليانه بيه وبس ...
گالت تعال ويايه ..
مارفضت  ... واني  اشوف كل احلامها تكون مرتي

فتحت باب غرفتها...غرفة ايه اعرفها من صورتي الي يم  سريرها
مشت للسرير... ورفعت الغطى
وهيه تريدني ادخل تحته ...
دخلت بلا ماانظر الها
تمددت وانداريت بوجهي للجهه الثانيه
غطتني ... وگفت احس بوجودها واگفه تتامل

:  شعندج واگفه  ايه اطلعي دانام

: اتمنى  الفراش ينطق ويگلك
الي تنام بيه ليليه... شگد تحبك

: ادري تحبيني ايه  بس

ماگدرت اكمل حرام البنيه فرحانه
هيه كملت

: بس شنو طلال  لاتخاف من وجودي وياك ... اني وفيتلك وانت ميت بتصوري

: ولاعندي شك بوفائج

انداريت عليها  وهيه تنتظر كلماتي اكمل

: خايف نكره بعض وعشرتنا تتحول جرح

تركت الوگفه وگعدت بجانبي على السرير  وهيه
توعدني تتحمل ورديت عليها

: لاتنسين  هالعهد  واعرفي شي عني
الي مخليني عايش هو ...خوفي على امي ...وانتي
متتحملون موتي 

: اسم الله عليك حبيبي نام ولاتفكر وتقلق
تحجي ويايه وتمرر ايدها على جبيني
اخذت ايدها وبوستها
زادت فرحتها... وسعادتها 
وبقت بجانبي لحد نمت

العصر صوت النسوان وهلاهلهن كعدني
دزيت رساله ل ايه

( اطلع لو لا )
جتي للغرفه  بعد ثواني وهيه لابسه بدله  بنفسجي  ...
ورافعه شعرها ...
شفتها دنگت عيوني وهيه تنتظر كلمةغزل
سالتها منو موجود

جاوبتني وهيه تستوعب صدمتها
: اطلع  للصاله الكبيره في رجال عراقي اسمه ابو كوثر هو يعرفك على الباقيين

: اوكي
داطلع  گالت ( انتظر شويه انطيني قميصك اضربه اوتي)

ماقبلت
جاوبتها ( ماكو داعي )
داطلع مره ثانيه ...
وگفتني وركضت للمرايه
جابت مشط  ورفعت اديها
تمشط شعري
ضحكت من تصرفاتها ...
ردت ( اي فدوه اضحك گدام الناس لا يگولون مغصوب عليها )
: يله فضيها  هسه اطلع

طلعت هيه  ...وگالت شويه انتظر
سدت الباب وبعدها رجعت
انطتني حلقتين بعلبه

: بعد العقد نلبسهم هسه خليهم عندك
اخذتهم منها ...
وداطلع  صاحتني

:شكو شعندج بعد

: ترى الشيخ يعرف احنا عاقدين
فالمهر مقبوض 
ونسيت اگلك الذهب بالعقد الاول
بعته بالعراق لان احتاجيت

ابتسمت  وتركتها وتوجهت للصاله
بيها رجال عراقي عرفته اسمه ابو كوثر
گام بس شافني وبوسني
وعرفني على الجوارين وعلى صاحب مطعم لبناني كانت ايه تشتغل معاه
وعقدنا للمره الثانيه
ماعندي اي احساس ينوصف غير
تخبط وخوف
متاكد احبها.... ومتاكد راح تعاشرني ...وتكرهني ... ويمكن متتقبلني. لو عرفت الصار
لازم تعرف القصه واتركلها القرار ...
تقبل بزواج رهبان ...او تتركني

بعد الحفله طلبت مني نطلع
وتحججت بحجه

: اليوم احد مافي مكان فاتح كلها تستعد للاسبوع الجديد

بدا معدتي تاذيني وذاق البيت بجدرانه.
مافي تفسير  ...ومافي حل ..
ومافي قرار
حتى اني مااعرف شبيه ؟ وكيف راح اكمل  حياتي
ومهزوم من مواجهة واقعي
ومغادرة سجن مازال حابس نفسي بيه

استعديت اطلع... وارجع لشيكاغو

طلعت ويايه.. للحديقه
سالتني...  ليش  داطلع  واسافر لوحدي بدونها

جاوبتها
: دانقل لشقه جديده ...يحتاج وقت ..وعندي مباراه بعد المباراه.. اجي اخذج وفي

تفاصيل لازم نتفق عليها  قبل الزواج

ردت بثقه

: مايهمني اي شي المهم نكون سوا

: مااعرف شگلج ايوته كل خوفي هالزواج يصدمج وماتتحملين الحياة وياي

: اتحملت الحياة بدونك مااحجيلك عنها...  والله لايعيدها
لاتخاف اتحمل شميصير  المهم نكون سوا ...بس حاول تترك المصارعه 

:  هذا شغلي
الامريكان بالسجن فرضوا عليه وبعد السجن شفت نفسي مااگدر اتركه

لحت اكثر وبديت احس بالغثيان
وافكر  بالهروب وهيه مستمره بالحديث

: لازم تتركها  طلال طول... ماانت تلعب هاللعبه معناها بعدهم مسيطرين عليك... وماطلعت من الاطار الي خلوك بيه

: مااگدر  ارتاح  اذا ما اضرب وانضرب  وبدونه اتحول عنيف على نفسي وعلى غيري

رادت تتدلع تتصور الي گدامها طلال

: اذا تحبني حاول تترك هالشغله

لزمت ايدها. من النبض  ودست عليها حيل
الاحتقان صار بوجهها والخوف ملى عيونه واني صاك اسناني

:گتلج هذا شغلي افتهمتي

سكتت وغمضت عيونها متريد تشوف مستر تي
تركت ايدها.
وگتلها ( فوتي جوى)

دخلت ركض واني انهزمت بسيارتي
خلف الاستيرن اضرب بيه بكل قوتي عليه
حاولت طول النهار اجمع بقايا الانسان ...
وشتات الرجل ...
وبلحظه رجعت لظلمة زنزانه
وماطردت هالظلمه الا بالعنف وياها

——————————-
واثق

يوم اثنين اخر ...
انتظر بيه البعدين
الي گالتلي عنها
بدون حتى مااتنظر لوجهي
والي ماعرفت كلمة البعدين
شتعني تسويف ... رفض ... مماطله
لو انتظار
اعتبرتها انتظار ..، وهاي دانتظرها تجي
خليت على الميز ورد طبيعي
مثل ماهيه مخليه بغرفتها
يمكن تنجذب للورد  ويكون موضوع للحديث بينا

فتحت الموبايل بشاشته اتاكد
من شكلي واناقتي
اول مشفت النظارات
خلص انزعها  ملازم اليوم نظارات

و اخفيت كراتين المليانه  توب تحليل
حولتها بغرفه ثانيه

ورجعت لغرفتي  اعد الدقايق والخطوات
من الشباك شفتها  نزلت من السياره
باين عليها الانزعاج من ضربة باب السياره
رجعت للكرسي  وگعدت ادعي الانشغال بسقي الورد
دخلت رفعت عيني
ماشفت بتركيز بدون نظارات
سلمت

مرحبا
رديت
: هلا ومرحبا

قدمت الاوراق راسا غير تاكه اي مجال لاي موضوع ثاني

توكلت على الله بالحديث وياها

: انسه ملاك تفضلي كعدي
ردت بجديه زايده

: مستعجله شويه  ودارت وجهها عني

: اعرف مستعجله بس التوب اليوم شويه يتاخر
لان لسه الدلفري ماوصل
تفضلي گعدي

گعدت امامي والورد كلش قريب منها
بس ماعلقت عليه

لازم اشوف موضوع

: انسه ملاك  بجيتي عليج ‏ ماضيفتيني
بس ارجوج اقبلي ضيافتي

ردها مو يم كلامي

: ليش يتاخر. الدلفري

: عشر دقايق بين منشرب كهوه

گمت اروح للمشين 
بدون نظارات مااركز
بقيت ادور على الاكواب
انحرجت  وهيه زادت  احراجي

من نبهتني
: هذي النظارات على الميز
البسهم حتى تشوف

سكتت انداريت بابتسامه ورجعت اخذ النظارات

وصارت النظارات حديث
: افكر اسوي عمليه واخلص من النظارات

باوعتني وسكتت
حسيت نفسي دا جدف عكس التيار.
كملت بجمله غبيه

: ولو اصدقائي يگولون النظارات حلوه عليك

سكوت تام من جانبها
انطيتها الگهوه. گالت شكرا
گعدت كبالها
: انسه ملاك تتذكرين وعدتيني
تفكرين وتتصلين بيه حتى نتفاهم على الزواج اذا ماعندج مانع

ردت وهيه تهز برجلها
: بعدين ان شاء الله

: اخر. مره هم گلتي بعدين
: اخي دا افكر زين

: طيب بين متفركين اخذي رقمي  ومن توصلين لقرار بلغيني

: ميحتاج من اقرر. اشوفك اهنا وابلغك
جاوبت بغباء
: زين انطيني رقمج اذكرج تفكرين
:
ضحكت  وسكتت بسرعه
ماادري على غبائي. لو على سوء اختياري للكلمات

بعدها صممت اوصللها صوره حقيقيه عني وبشكل جدي

: انسه ملاك اني شخص صريح
ومااعرف الف وادور. وازوگ الكلمات
اني معجبة بيج. وداگ بابج
وانتي واعيه ومثقفه. واكيد تگدرين تميزين الي يناسبج
فكوني صريحه ويايه
كلمة بعدين. بيها امل لو دتصرفيني

باوعتني بتركيز ويمكن اول مره تنتبه على شكلي
وردت
: مدام صريح بيها امل

: رحمه على والديج
وراح اكون صريح اكثر وياج

التوب موجود ومكوم بالغرفه الثانيه
بس ردت فرصه احجي وياج

بحركه ثناء بتعابير وجهها
سلمتتي الورقه
وطلعت اجيب الطلب
.......

ملاك

واثق صديق رعد.
افكر بيه وعلى مهل
مااريد اتصرف بغباء هالمره
واركض ورا كم كلمه مصفطه

————————————————
روان

اخذت التلفون الي تركته ماما على الميز وانشغلت باجواء الفرح بعد العقدد

ودخلت    للحمام وقفلت الباب
اراسل رعد
مفاتح نت صار يومين ومااگدر ادگ عليه
كتبت رساله
( اني روان هذا جهاز  ماما  )
( احاول اتصل بيك مره ثانيه 
مروه راح تتصل بيك فيس ... فهمني شاسوي ) مسحت الرساله
وطلعت من الحمام  ورجعته لمكانه

ردت اصعد بغرفتي انام

ملاك تنطف بالبيت بعد الحفله
وايه گاعده وماسكه ايدها وتتالم 
استوقفتني ملاك

: وين رايحه نامي بغرفتي ممنوع تصعدين فوك

واجهت خوفي منها  ودافعي هو متاكده من براءتي
رديت عليها  بصوت عالي

: فوك غرفتي  ومراح انام الا بيها ...
تريدين تراقبيني راقبي نفسج اول ...
انتي الي جبتي رعد هالبيت ...ودخلتيه بحجة يدرسني

ردي اربكها. وطلعت الكلمات مخربطه منها

:  لمصلحتج ياثوله دخلته

: لا دخلتيه لمصلحتج ...والدليل المعهد اخذتيني مره وحده ...
اما البيت فكل واجب تتصلين بيه ...وتبدين تعرضين مهارتج بالطبخ اله 
نسيتي الناس وحجيها
اشو بس عليه

: اذا اصعد  هسه اذبحج احد يلومني
نزلت الدرج تحديا بيها وگفت گبالها

: احنا مو بالعراق وتذبحيني ...واحمدي ربج مااتصلت بالشرطه وخبرت عن العنف ..،وذبيتج بالسجن

خافت وحاولت تستنجد بايه الماخذه جانب الحياد

: هاي شدتحجي  اشو متقويه علينا

: شسويلج  حاولت وياج متفتهمين

: شفتهم  بالله متفهميني

: افتهمن احب رعد ويحبني
وماغلطت بشي

افتهمي  اني بشر اليه حقوق واذا  حاولتي  تسلبني حق الحكومه بينا

: بسيطه ياروان اخذي حقوقج
بس والله مااوافق على زواجج لو تموتين والتلفون عندي اذب رعد بالسجن  وغصبن ماعليج تمشين عدل

: متگدرين تسووين شي
اهنا يصدكون الطفل
ورعد سمعته بالجاليه وافضاله تشهدله

صعدت الدرج واني ارجف ...
المواجهه صعبه ملاك انسانه قويه ...واختي
مااريد اتمرد عليها  ...لكن متركتلي خيار
اتخبيت اسمع حوارهن  وايه موقفها بدا يتغير
وسمعتها تگلها

: ملاك ترى روان حلفت  بروح بابا وانتي تعرفين تحبه ومتحلف جذب بيه
احنا تسرعنا وفضحنا نفسنا
كافي تعاقبيها بلا سبب

ردت عليها ملاك بلاسبب  وعلاقتها مع رعد مو غلط

خفضت صوتها وهيه تفهمها

:وين الغلط   ياعيني قابل مصايره
انتي لو تسمعين كلامي ونوافق على خطوبتها منه  وبالخطوبه تبين مشاعرها اتجاهه

: انتي شتحجين  ازوجها لهذا النذل الي  وگف گدام الجيران يعد ويصف عليه  مستحيل
كلها سنتين تدخل الكليه وتنساها  هالمتصابي الحقير

استمر نقاشهن  وملاك تزيد غل وحقد على رعد

الاثنين نزلت مبدله حتى اروح للمدرسه ...
ماما... وملاك وايه... يتريگون

ايه صاحتني اتريگ
وعلى اساس هيه توصلني مقبلت

: مااصعد وياج   ولا ويه ملاك
ومراح اكل وياكم... بعد المدرسه اروح للشغل
و غرفتي محد يصعد ويدور
لان اترك البيت واطلب  حصتي منكم
واسكن مع صديقتي الامريكيه نانسي
انتن بحالجن واني بحالي

اعترضت ماما الي بعدها مصدگه اني مذنبه

: تعالي اهنا شنو هالحجي حتى وجودي متحترميه

: اسفه ماما خليهن يحترمني ...وميتدخلن بحياتي ..
ولايظلن يذلني بالاكل... والملابس ..
ترى الدوله دتدفعلي مساعدات
واني اشتغل

: انتي تريدين تموتيني
كل هذا علمود رعد
خلي يجي ياخذج ويخلصنا منج

جاوبت ملاك

: والله لو تموت  مااوافق عليه اذا مااذلها واكسر خشمها بسيطه
ماما هذا يضحك عليها  تصدگين ياخذها
ترك المدرسات والامريكيات ويريد روان المريضه الزعطوطه

: اقتربت من الميز  ومنها بالتحديد
ناولتها گلاص مي بارد وجوابتها
برود
: اشربي مي لاتموتين بحسرة رعد
اعصابج اختي ... لاتخافين ماريد رعد مستغنيه عنه ... راويني شطارتج واخذيه انتي لا مريضه ولازعطوطه

بقت جامده بمكانها ..، ونزلت دموعها
دموعها خلتني اندم على الگلته
بس ضربة ماما اليه وهيه تگلي
(لسانج الزميه لا اگصه)
خلتني اتراجع عن ندمي
طلعت من البيت
نانسي تنتظرني مثل كل يوم بالسياره
نانسي امريكيه بولندية الاصل
وعدها طموح تترك مشيگان
وتسافر ل لوس انجلوس
وتصير عارضة ازياء او ممثله

لكن حاليا متفكر بالسفر لان معتمده على اهلها بالمصاريف

.واني اريد اعيش بلا احتقار
وعارات. وابدي لوحدي
حجيت ل  نانسي  وضعي
وبدون مااذكر  ان رعد مدرسي

طلبت منها توصلني لشقته 

وهيه ماتاخرت ... طلعت بيه راسا

وهيه تسوق واني كلي امل يكون بالبيت
: نانسي انطيني تلفونج اتصل بيه قبل لا اوصل

اشرتلي على جنطتها
طلعته مقفول بلا شحن
: تلفونج بلا شحن وديني افضل

وصلتني وظلت تنتظر

نزلت من السياره ركض على السلم الحديدي
الخلفي حتى الجيران متشوفني

دگيت الباب حيل
فتح الباب
اني بجيت  ونزويت خلف الباب وهوه.  راسا  سد الباب

: بيبي روان اني اسف سببتلج
كل هالمشاكل

وسط البجي كنت اسكت واحجي وياه والومه على الصار

: مكان لازم تجي للبيت وتتعارك مع ملاك وتفرجون العالم عليه

: مااكدرت اتحمل خفت عليج
مروه اتصلت بيه وفهمتني الي ديصير بيج
حاولت اخطبج وسطت ابو كوثر وشيخ الجامع  والدتج وملاك رافضات

بقى هوه يم الباب واني گعدت خلفه على قنفه
:
واني كارهه حياتي ..، البارحه بالعقد جيرانا يحجون عني ويباوعلي تمنيت اصرخ بيهن
واطلعهن

: بيبي مافي غير نطلع من مشيگان  اني وياج ونتزوج وبعدها ابلغ اهلج.

: اخاف اسووي هيج باخواتي وماما

: والي همه سووه  ترضين بيه

التخطيط كان متخبط  لكن دخل راسي 
وطلب اخذ اوراقي  ومن انزل ابلغ نانسي  ان علاقتنا انتهت
وانطاني تلفون اله قديم
ضميته بحنطتي
قبل لا اطلع
گلي كلام اخير

: روان الي راح نسويه مغامره
خطره  اذا ممستعده گولي

ترددت اجاوب  فتح الباب رديت عليه

باجر الصبح اردلك الجواب

رجعت للبيت افكر واعيد التفكير
صعب افارگ ماما 
وبمحاوله اخيره
حاولت استميل ماما او ايه

وقررت انام يم ماما  نزلت وسادتي
وگتلها راح انام بغرفتج ماما 

: لاتحاولين تاثرين عليها
هذا تحدي بيني وبينج ماازوجج رعد لو تموتين

هذا الي سمعتنياه ملاك وسمعتها كلام مماثل

: اهم شي اعصابج تبرد ...
اني صغيره... والفرص امامي هوايه... فكري بنفسج ...
ترى واثق يفوتج

: حجيج ميستفزني تريدين تجريني لنقاش واضربج.
مستحيل عرفت لعبتج

دخلت غرفه ماما وهيه اجتي تمددت بفراشها بعد مااخذت الادويه
  وحجيت وياها الليل كله

ماما اني مو بنتج ليش تسمعيهن ومتسمعيني

ا :خيبتي املي بيج  تتصورين لرجال  عريانه

: وروح بابا مسويتها

: لاتحلفين بروح بابا 
ترى الميت يعلم... وبابا يدري بسوالفج. وهسه كرهج

: وانتي كرهتيني

: نامي واسكتي متستحين تردين على اخواتج وتعييريهن لان مااتزوجن... وضيعن عمرهن يكدن  وياسسن النا بيت وامان

: ميفيد الحجي وياكم انام احسن

: اي نامي

: اريد غطى وين

ام ملاك بالدولاب گومي اخذيه

اعرف الغطى بالدولاب واعرف الجوازات بالدولاب
فتحته اخذت الغطى وتلفوني  والجواز
والسوشل سكيورتي ( رقم الضمان الاجتماعي )
ولفيتهن بالغطى وادعيت النوم
انتظرت. الصبح 
گعدت بدلت
اروح للمدرسه
طلعت بلا مكياج وملابس عاديه
وكوت طويل
بالجنطه خليت كم قطعه واوراقي الرسميه  ونزلت من غرفتي

: ايه توصليني للمدرسه

: بلي اوصلج 
باوعتني وشافت لوني مخطوف

: شبيج اشو صفره

: مريضه مالي خلگ

: دتعالي تريگي يله تعالي لاتصيرين عنيده
احنا لو مانحبج ماخفنا عليج

اخذت اكل من الميز  ...وسوته لفه ..
وگامت يمي ..

: يله اني اصالحج  
باستني براسي  ...وگرصت خدودي ...
وناوشتني اللفه
وملاك تنظرلي بصمت

اكلت اللفه. ومسيطره على دمعي
اريد اتراجع ... واريد انهزم

سكتنا كلنا دقايق
ومن دنطلع

سالتني ايه
: منو يرجعج من المدرسه

: ارجع مع صديقاتي ورا مايخلص شغلي

: اي ساعه ترجعين يعني

: بالسته. ارجع
بوست ماما ...
وباوعت على ملاك گتلها ...
الله وياج ..،ونفس الجمله گلتها
ل ايه باب المدرسه

الله وياج ...انشالله تنسعدين مع طلال

ونزلت ..، صاحت ورايه

روان ...روان... تعالي

خفت عبالي اكتشفت خطتي
رجعت عليها  بخطوات ثگيله
سالتني
: عندج فلوس
سكتت مارديت
طلعت فلوس ٤٠ دولار
وانطتني من زجاج السياره