رواية نوارس مهاجره الفصل الثالث والعشرون 23 - بقلم zeanab_almusawi

هلوووو
البارت انمسح اليوم
ورجعته واني انسخ انسخ بارت البارحه
بارت اليوم لذلك تشوفون الكتابه صايره كل كلمه مزاعله الثانيه
اسفه على التاخير
ويمكن بكرى ماانشر لان مدالحگ

#نوارس_مهاجره23

#زينب_الموسوي

ايه
من اليوم الي عقدنا طلال تلفونه مغلق
مااعرف اذا متاذي من المباراه
او مهزوم
امه رجعت تتصل بيه
وشكوتنا وحده
ليش ميسال؟ وتلفونه ليش مغلق ؟
ومره اني اختلق الاعذار ومره هيه
مع نفسي افكر انفرض عليه الوضع.... وانهزم

اكيد تفكيري صحيح

شنو الي غيره... اتذكر خطوبتنا الاولى الاتصال بينا ماينقطع ...
يمكن يحس نفسه كبر... واني كبرت
على هذي التصرفات ...
بس الاهتمام ميعرف عمر ...والي يشتاق يسال
ماافكر يتصل ولا مره ...
وموعد الزواج ماحدده
طلعتة بالليل من بيتنا... انطتني شعور مامقتنع بالزواج..
وخلاني كل يوم بفكره
كل يوم اعيش نفس الهواجس

وصلت روان للمدرسه
وطلعت اقدم على شغل بمكاتب
هندسيه
وتواصلت مع
صديقاتي الي انسى اتواصل معاهن
ومرات اتناسى
ورجعت للبيت انظف
واعد البيت لموسم الشتى القادم
لكون ارضية بيتنا خشب... يحتاج افرشها بالشتى ..
خلصت وقتي تتظيف ...
لحد انتبهت ...
صارت الساعه سبعه الليل وروان مراجعه
ماعدها تلفون حتى نتصل بيها ...
قلقت وماردت اقلق ماما
صعدت بالسياره... ورحت للمول
اشوفها يجوز بعدها بالشغل ..
سالت المشرفه عليها
جاوبت
:
اليوم الانسه روان مجتي للعمل اتصلت خبرتنا مريضه
من سمعت كلمة ( اتصلت )
گلبي نغزني معناها عدها تلفون
تركت المحل وگفت بالبوابه اتصلت بملاك
وبدت افكاري تاخذني وتوديني
جاوبتني

: ملاك روان مرجعت للبيت ورحت للمول اليوم ممداومه

: اصخام سوتها صدوك

: تعرفين رقم صديقاتها الجديدات

: لا مااعرفه اني جايه

ايه :
سقت سيارتي ادور قرب المول ...ومحطة الباص ...في تجمع شابات وشباب ينتظرون الباص ...وگفت السياره ونزلت وركزت عليهم ادور بين الوجوه ...مثل المعتوهه مالها اي اثر ...
طلعت على المدرسه... افتر داير مداير المدرسه
نشف ريگي من الخوف ...واردد ادعيه... وابجي
يارب تكون مانهزمت ...يارب
واني بهذي الحاله تذكرت
تلفونها القديم بالدولاب ...يمكن بيه رقم وحده من صديقاتها ...مااعرف بياحاله سقت
وصلت للبيت ...ماما بالصاله تصلي ...وتسبح
خفت عليها تعرف... خففت من مشيتي... انتبهت عليه

ا : روان وين صارت تاخرت

جاوبتها بلا ماانظرلها ...واني اتسحب للغرفه

: يجوز بعدها بالمول

: غلط من عدنا ماخلينا عدها تلفون روحي عليها... وشوفيها وين.. گلبي ماكلني عليها

گصتي تصبب عرگ

: ماما انطيني مجال...
دخلت للغرفه ركض
فتحت الدولاب
شفت الموبايل مموجود ...
والجنطه الصغيره... الي بيها الاوراق بدولاب ماما ...
مفتوحه فتشتها ...
جوازها... وبقية اوراقها كلها ...ماخذتهم...
شمرت كلشي بالدولاب على الارض... ونزلت على ركبي ادور بيهن يمكن متوهمه ...
عقلي ممصدك طفله تخطط وتستغفلنا ...
تذكرت كلامها الصبح من ودعتني عيونها مليانه حيره
تفكيري توقف على صورتها

تركت كلشي وطلعت
رحت على ماما اصيح بلا وعي

: روان انهزمت ...انهزمت

گامت ماما من السجاده وجهها مابقى بيه دم

: شتحجين منو گلج

: تلفونها اوراقها ماكو... واليوم ممداومه

من الصدمه الي صارت بيها ماما... السبحه وگعت من ايدها وجرت نفسها حاولت تبقى واگفه على طولها خانتها القوه والحيل ردت گعدت على السجاده وگالت

ا : خابري الشرطه ...ولج خابريها قبل الليل وين تروح
كله منجن انتي وملاك ...شديتن وياها..، لحد هججتنها

: مو وقت هالحجي
خلي اتصل برعد واشوفه

تذكرت نسيت جنطتي بالسياره وياها الموبايل
فتحت الباب حتى اطلع وماما ورايه گوه تمشي وتكمش بالاثاث حتى توصل
طلعت الموبايل

اتصلت برقمها ... الجهاز مغلق الاتصال الثاني برعد

ميجاوب ...

اكيد خطفها
داحاول اجمع افكاري دخلت ملاك وجهها بلا لون وصوتها ضايع بين الخوف والرجفه

؛ اتصلت بمعلمتها اليوم ممداومه
انهزمت ...وفضحتنا
اويلي يابه تعال شوف بناتك بياحال
شنو من عقل شايله شنو من تخطيط ...
بس لا اكيد هذا تخطيطه هالواطي ...
وروح بابا الا ابهذله واشهره مثل ماشهرنا
يله نخبر يله ولج ايه

: شتگولن شتحجن ضربناها حبسناها وانهزمت
وديني لبيت رعد احاجيه

اخذت ماما لشقة رعد وطلبت من ملاك تنتظر اتصال مني قبل لتخبر الشرطه

روان

مجرد تحركت سياره ايه ....
مدخلت المدرسه.... رحت على مطعم قريب ......اتصلت ....برعد من تلفون المطعم
انتظرت الرد... وگلبي اسمعه يدگ.... ويه كل رنه
خايفه ميجاوب... خايفه انكشف ...
اول مره اخذ قرار بحياتي
واول مره اكره نفسي .،،وحياتي

شي يدفعني اله ...ولحبه ...وحنانه

وشي ثاني يتمنى ابتعد عنه
بين الحيره. والتردد.

جاوب الاتصال

صوته مبين نايم

خايفه اگول اسمي فقط گلت :الوووو

: منين تتصلين

: من المطعم القريب من دوامي
بعد ماارجع
ماتحمل الضرب .. والاهانه

: عشر دقايق واجي عليج

: اذا تتاخر اتصل بتحسين يطلعني من الولايه

: جاي والله جاي

سديت التلفون

انتبهت .. المطعم فيه امريكان

يطلبون دونتس وقهوه

واني بايدي جنطه مدرسيه وعمري مبين طالبه
وقت المدرسه بدا

وهذا اثار. استغرابهم وفتح

مجال لنظرات التساؤل

اختاريت .....الطاوله
وجلست..
وعيني على الساعه.....
اعد الدقايق ...

فكرت اتصل بتحسين الي

ترك الدراسه ..ويسوق... ويشتغل... بمحطه لذلك فكرت

يطلعني لولايه ثانيه
بعدين فضلت انتظر رعد

ضايقتني عيون الناس... وعبالك يعرفون بيه

..انتظرت العشر. دقايق
وصل رعد بسياره غير سيارته
ومنزل فقط اشرلي اصعدي

صعدت بالسياره
وماگدرت ارفع عيني بعينه ...ليكون احتقر تصرفي ...واعتبرني غبيه ...

وهو يقرا الخوف بيه
بدا يزرع. القوه بيه

: روان لاتخافين بيبي ...
....اني وياج .......

: خايفه والله واكثر خوفي على ماما...... يصير بيها
بيها شي اذا عرفت

: اهدي شويه نوصل لمكان واتصلي بيها
وهسه من يشوفون اصرارنا على الزواج يوافقون ... ونرجع اهنا. نعيش ... ونبقى سوى للابد

: اوكي
:اوراقج عندج

: بلي عندي

: اوكي بعد مافي تراجع روان ...
نتزوج ... ونواجه الكل ... وصدگيني بعد ... شهر ... يوافقون على زواجنا ... ونرجع اهنا
بهذا الشهر ... نسافر ... ونعيش احلى شهر .بعمرج .وعمري

روان اني مثلج ... معايش قبل حب وجنونه ...
ومستعد اترك كلشي لعيونج
بس لاتخافين

اكذب اذا اگول زال الخوف بكلماته ... لكن كلماته خلتني اتمسك بجنوني ... وجنونه
واتبع قصة. حب
يمكن ماعندي عمر اكملها

مع احساسي ان خطواته متخبطه ومامدروسه
زاد . خوفي وقلقي

انتبهت يسوق بطء الظاهر ميريد يثير انتباه الناس او يوقفه شرطي بالشارع
ترك الشارع الرئيسي وطلع بالفرعي

وگف باركنگ بمحل تصليح سيارات
حتى يفكر ...
وايده على المقود
اخذ ربع ساعه ...وبعدين حرك السياره وگلي

:خليني اطلعج من الولايه وبعدين نحجز لبيروت

؛ احجز هسه الله يخليك

:اذا حجزنا اثنينا الشرطه تعرف مهزومين . وتتحول. خطف

: لعد رجعني للمدرسه اذا ماعندك حل

قدرتي على التحمل انتهت ..ودموعي صارت تتسابق... وصوتي يعلى عليه ...
واديه راحت على الاستيرن احاول اوگفه.. واصيح ...
:رجعني... رجعني

بعد اديه عن الاستيرن وگف السياره
اندار عليه وصار اعصاب اكثر مني

: روان اهدي ملاك مراح ...تسكت.. وتبلغ عليه

گتلج لاتخافين اني مرتب كلشي ...
هسه اعبرج ...يم اختي ام زهراء

ومراح اترگج لاتظلين...... خوافه...... ومتردده
:هاي داگلج الصراحه راح ارتكب جريمه... واخسر بيها كلشي ...،،،
ومااهتم ومامتردد

؛ اذا جريمه...... ليش قنعتني انهزم
تافف وهو يضيق ذرعنا بيه

: دافهمج الي دنسويه مو سهل
لو تخلين ايدج بيدي.. وتصيرين وياي... وتسيطرين على اعصابج ...لو من هسه گولي تراجعت. وارجعج ....لبيتكم

المخاطره كبيره واي غلط انتي تضيعين واني انحبس

سكت لحظه وبعدين وكمل

: راح اتركج بالسياره كم دقيقه وانزل اجيب عصير
فكري بين ماارجع
لو تريدين ترجعين...
ارجعج وتددلين

واذا تبقين ويايه مراح تندمين

طلع دخل محل قريب......

وبقيت ........افكر

اباوع على الشارع فارغ

وجهت نظري للمحل لمحته يراقبني من الزجاج ل انزل من السياره

اريد ابقى وياه واريد احس بالامان
المخاطره اكبر مني

طلع من المحل بيده كيس
خطواته سريعه انطتني انطباع هو هم خايف من المغامره
دخل وخلى الكيس بيني وبينه

: اخذي هذا عصير وجبس

: انت هم خايف مثلي
ناولني الجبس ..،والعصير

: خايف لتكونين مامستعده وبنص الهروب تتراجعين واصير اضحوكه للناس

: بعدك تحبني لو ندمان

: والله احبج.
وبحياتي ماخالفت القانون وساعدت الناس تلتزم بيه
وجودج بحياتي خلاني اتخطى كل الحواجز وافكر بعقل العاشق وبس
وانقلب على. حياتي
بقرار مابيه رجوع
قراري. نعيش سوى وماانتظر الزمن يفاجأني

فكرت هوايه بفرق العمر.. بينا
فكرت بالقانون... فكرت بمستقبلنا اثنينا... شراح يكون لو كبرتي.. واكتشفتي ...متحبيني
مجرد مراهقه وانتهت
تعرفين نتيجة التفكير شنو

... : شنو

: النتيجه تركت التفكير ورسمت هذي الخطه نكون سوا
وميهمني شيصير
وداسالج لو عندج نفس الاراده وميهمج شيصير
نكمل خطتنا واذا لا. عاذرج

: نكمل اني مااريد غيرك

گتله هذي الجمله ونظرنا لبعض بنفس الوقت
ابتسم هو
واني غمضت عيني ودرت وجهي على الشباك وتحسرت
وگملت كلامي

: خايفه على ماما وبس
اتمنى اتصل بيها وگلها لاتقلق

: خلص نستقر ونتصل بيها وعد مني
وهسه خلينا نفكر سوى

؛ اذا عبرنا الجسر يعرفون حتى الساعه العبرنا بيها انطيني بس مجال افكر الله يخليج
تعالي ويايه للشقه هسه

: شقه شنو

: وتالي وياج لاتخافين مني لازم تثقين بيه
شتتصورين راح استغلج
طبعا من هالگد محجوابراسج

بقينا بنقاش لحد وصلنا الشقه

وگف السياره
بالكراج وگلي انزلي

: ماانزل ابقى بالحديقه

بعصبيه طلع مفتاح الشقه من مجموعة مفاتيح وهو يفهمني

؛ اخذي المفتاح واگعدي للشقه ربع ساعه واجي
لاتفتحين الباب اذا ماتاكدتي اني
فكري بعقلج مو بالخوف مااگدر اظل افتر بيج بالمدينه ويشوفونا

عرفت كلامه صحيح مااگدر ابقى بالسياره ونفتر

اخذت المفتاح وصعدت الدرج

—————-

رعد :
بقيت بسيارتي افتر ... وافكر بالخطوه القادمه

لازم ابحث عن شخص يعبرها كندا... واطمئن عليها
والشخص ميكون من طرفي ...
نانسي مااگدر اثق بيها ...
... او يمكن تعتبرني مخادع

لو اهل روان موافقين على خطوبه
كل هذا ماصار
تصرفنا بغباء كلنا ... وعلى حساب روان ... الي مشافت دنيا
ويمكن تنحرم منها

افكر .... وافكاري وصلتني
لتحسين ...الولد مؤدب... وعلاقتي بيه قويه

رحت للمحطه اليشتغل بيها

انتظرت كم دقيقه بالسياره احاول اصفي افكاري ...
واقرر. ...اگدر اثق بيه

ماعندي خيار ثاني وتحسين كان من يكتب مقال دائما يحب المغامرات وطيشها ...

طلعت من السياره... ومشيت كم خطوه للباب ...انفتح الباب
توجهت عليه بابتسامه ..
وسلمت عليه
عنده كم زبون.. مشغول وياهم ومع ذلك رد عليه

: هلا بيك شرفتنا مستر

: خليك بشغلك. لاتنشغل بيه

الظاهر. الارتباك واضح عليه
عرفت من عيون تحسين تراقبني
انداريت بوجهي ..،
لمشين الگهوه ... خليت الكوب
وضعطت على المشين ...
وابالي الافكار متزاحمه ...
حسيت الكهوه ساخنه على اصابعي الماسكه الكوب ...
انتبهت ورفعت ايدي عن المشين
رجعت قرب تحسين الواگف خلف حاجز زجاجي ضد الرصاص ( لتعرض العاملين للقتل والسرقه ) ويعامل الزبائن بواسطه فتحه صغيره بنفس الزجاج
فرغت المحطه ..، وتوجهلي بالكلام

: اعرف سبب الزياره تريدني ارجع للمدرسه ...

كلامه نبهني اساله هذا السوال ...مع ان ابالي مشغول بترتيب عبور روان

: متگلي ليش تركت المدرسه؟
جاوبني وهو يمازح

: صارت متسوى بعدك ...
واهلي محتاجين مساعدتي

:خلي دوامك ليلي... او مسائي ..لاتترك الدراسه حرامات

: ان شاء الله

استرسل بحديث معي ...
الوقت يمر... لازم تعبر قبل انتهاء دوام المدرسه

هو تحسين من نوع يحجي هوايه... قاطعت حديثه وتجراءت اشرحله الي اريده ...وتاكدت المحطه فارغه مابيه شخص يسمعنا

: تحسين رايد منك خدمه
ومااريد احد يعرف

؛ تفضل مستر

: روان تريد تعبر لكندا تگدر توصلها

: شتسووي بكندا

؛ مااعرف اجتي عندي مهزومه ...من اخواتها... حيل ماذياتها.. وضاغطات ..عليها
وتعرف اني اذا اعبرها تتفسر غير شكل انت صديقها... وتريدك تساعدها

تردد واخذله صفنه باوع على ملامحي وسالني

: مستر احسك قلق وخايف

: مااعرف اريد اساعدها ومااريدك تتورط

؛ اتورط شنو هيه عبرة جسر ...وتخلص فد ساعه يخلص دوامي اروح للبيت ابدل واجي اوصلها

سكت وهو يفكر
وكمل تحقيق

:بس لازم اعرف ليش تريد كندا ...هذي بس لا راح تتخبل ..وترجع لعمامها بالعراق

: لا مااعتقد
انت خلص وبعدين احجيلك الصار

: ساعه ازمان اني مخلص

: ابقى وياك لعد بين متخلص ...مااكدر اروح للشقه وهيه بيها

: هذي مخبله واختها ملاك حيل مسيطره عليها ...
اكيد هذا السبب انهزمت

: مااعرف شنو السبب
؛ اني احجي وياها بالطريق واشوف

بقينا نسولف والزباين داخله طالعه
طلعت انتظر بسيارتي واحسب الدقايق

مرت الساعه مثل السنه
طلعنا هو بسيارته واني بسياره . مر على البيت
واني انتظر بسيارتي

صارت الساعه عشره الصبح
وصلنا يمها بالشقه

روان

الظاهر ورطت نفسي وتصرفت خطا ...
افتر بالشقه لحد دخت... اخاف اقترب من الشباك ...احد يلمحني
وگلبي يعصرني كل ماافكر بماما

اندگت الباب باوعت من الشباك
شفت ...رعد... وتحسين
فتحت الباب
تحسين يضحك
: هلووو تحسين شلونك

: هلو روان ليش مهزومه

: مامهزومه اريد كم يوم اخليهن يعيشن القلق وارجع

هذا. كان ردي لكن رعد حجى وياه بصراحه

: اگعد تحسين داحجيلك

گعدوا اثنينهم مقابيل بعض على القنفات واني الي بقيت واگفه

: شكو. شبيكم هاي گعدت

: الي صار اني خطبت روان ...واهلها مقبلوا
وضربوها ...واختها ضربتني
وفي ناس عراقيين كثير يعرفون ...وتوسطوا بينا حتى يقبلون ومقبلوا
لذلك تركت المدرسه والتدريس والمعهد
وفكرت اخذها بغير دوله... ونتزوج ..
مااجبرك تساعدنا... انت حر اذا متريد توصلها براحتك
بس هذا قرارنا اثنينا ومنتراجع عنه

احتاج دقايق حتى يستوعب الصدمه وهو يباوعني مثل المشلول
وبعدها حجى

: حاولت تخطبها من امها يمكن توافق

: حاولت رفضت.. وصار كم يوم
مشاكل بين الاخوات
وتلفونها اليوم يله اخذته

: صحيح دگيت عليها هوايه متجاوب
والحل شنو اذا اخذتها لكندا انت شلون
: اني ادبر امري المهم هيه توصل اهناك يم اختي قبل نهاية الدوام

: اخذها لكندا ماعندي مانع

: اوكي تروح على هذا العنوان اختي ام زهراء تنتظرك اهناك

ازداد اضطرابي ... وخوفي ..وسالته

؛متروح ويايه؟

:لاتخافين روان كلها كم يوم واجي عليج

يطمني وهو خايف اكثر مني
وبين دقيقه والثانيه ينطيني تعليمات

: اسمعيني الاتصال بينا عن طريق اختي ...انتي ابد لاتتصلين واحضري رقمي
واني الشريحه راح اتلفها

؛ اوكي

باستسلام تام طلعت مع تحسين الي ماترك سؤال مساله اليه بالسياره

: من شوكت يحبج لرعد ...
وشعجب انتي بالذات

؛ شمدريني !
فدوه اسكت لان كلش خايفه

: اذا خايفه ليش انهزمتي من اهلج

: ماادري ليش يمكن عناد ويه اخواتي..، ويمكن ماريد رعد يتركني

: اي لو منتظره لحد يوافقون اخواتج

: لاتلومني كافي اني دالوم نفسي

: لان خايف عليكم
اثنينكم مستر رعد ديغامر وامريكا الي يخالف القانون ويوگع مترحمه
وانتي صغيره مو مال تتزوجين واتركين اهلج

كلامه اختصر الصراع داخلي
فعلا خطا الي داسويه
الجسر على وشك يخلص ونعبر لكندا
سلمنا الجوازات للشباك وانتظرنا ردهم بعد ميدققون

حالي مثل حال هذا الجسر
الكل يعبر عليه
ماعنده اراده غير يبقى بمكانه ويتحمل ....
ماانتبهت على اي شي بالطريق
مع ان عيوني مفتوحه ....
بس الصور وكفت على صورة ماما... من تسمع الخبر
واردد ( سامحيني ماما )

وگفنا على السيطره الحدوديه
طلع من شباك الكشك الحديدي
ضابط هجره يطلب الاوراق الرسميه
انطاه تحسين الاوراق سال
وين رايحين
جاوبه تحسين. (زياره ل اقارب بونزر )

اخذ الاوراق وسد الشباك دققها بالكمبيوتر

انفتح الشباك مره ثانيه ...
وسلمنا الضابط الجوازات وگال
( مرحبا بكم في كندا)
وعبرت حدود كندا
شوارعها انظف... وحتى مدنها ... وتحمل مسحه ريفيه

تحسين استخدم گوكل. الخرائط
حتى نندل البيت
اخته ام زهراء

لحد اقتربنا من بيت كبير وقديم من السقف... والجوانب

اشر تحسين على البيت

: هذا البيت

وگفنا گباله باوعت البردات
مفتوحه... وفي مره تنتظر جوى
مجرد وگفت السياره طلعت مره كبيره ...
بيدها عكازه... لابسه اسود ..
اشرتلنا ننزل

انداريت على تحسين ضحك وعلق ..

عبالك بيت اشباح... وهذي الساحره العجوز

فوك خوفي تحسين يستفزني

: يله انزلي شمنتظره

: تعال ويايه فدوه

نزل ويايه... طول مااني امشي هيه تباوعني... ومركزه عليه
دنكت ..وصعدت الدرجات الاولى لمقدمة البيت
وگفت يمها بلا كلام مني

هيه حجت بصوت ناعم... حنون ...بدد كل مخاوفي

: فوتي حبابه لاتخافين

دخلت للصاله ويايه تحسين
الاثاث قديم... الفرش ...التلفزيون
كولشي قديم
طلعت من الصاله... واكدر المحها بالمطبخ ..
دتحضر ريوگ ..
فتت وياها... اساعدها
ماعترضت ..وكعدت على الكرسي

تحسين ناداني من الصاله ...
راد يروح وهيه ماعارضت روحته ...
اكيد تريد تدخل ويايه بحديث طويل عريض ...
طلعت خلف تحسين وصيته

: تحسين اتصل بماما... وگلها وصلتني لكندا... وراح تتزوج رعد

تحسين كل تفكيره كان برعد

: لج هذا الحجي اذا وصل للشرطه مستر رعد يروح بيها

: گلبي عليها واعرف الي سويته غلط
اخواتي جبرني اسويه

رد وهو ياشرلي ادخل

: المفروض يوافقن بدل هالبهذله كلها

نزل الدرجات واندار كلي

: لاتخافين راح امر على والدتج
ورقمي عندج اي شي تحتاجيه اتصلي زين

هزيت راسي ورديت
: زين

——————————-

ايه
وصلنا لشقه رعد ...طلعت من السياره واخذت ماما ويايه لكن
متگدر تصعد الدرج عفتها جوا .،،واني ركض على الدرج عثرت مرتين ...
لحد وصلت الباب... من قهري ضليت ادگ الباب وادفر بيه برجلي... وكل املي الگاها عنده ...
فتح هوه الباب...
شفت نظرة خوف ويحاول يخفيها بتجاهل الامر
من اول نظره تاكدت هو ورا انهزامه..، ويعرف وين

: اهلا ايه خير خو ماكو شي

بتلك اللحظه اني كارهه روحي والناس والغربه. واحس بالذنب مغطيني من راسي لرجليه
ماردت افتح وياه نقاش

: ماما جوى متگدر تصعد
جاوبني روان وين

: روان وين شنو هالسؤال. واني شمدريني

احجي وياه وعيني بالارض من رده البارد. اجاني احساس
خلاني مااعندي قدره اهاجمه
وتاكدت متفقين على الانهزام هيه وياه

: روان انهزمت اكيد عندك

: هذي شقتي فوتي دوري

: ميحتاج ادور. سلملي عليها
وخلي تعرف احنا. اخواتها وبيت ابوها اقصد بيتنا. مفتوح الها باي وقت تكتشف بيه نذالتك
بقت اجراءات لازم تصير

من ارتباكه سالني اجراءات شنو ؟

انصرفت من وجهه الخبيث
وكملت كلامي

: روان قاصر وبمسووليتنا الشرطه لازم تعرف مفقوده
وحضرتك تعمدت تفضحنا ومو من العدل نسكت وتبقى بعون الناس قديس

تغير موقفه ورجع للنكران

: تحبين اجي وياج للمركز
اوفر عليكم الاجراءات

: براحتك. بكل الاحوال انت راح تجي
سد باب شقته
ونزل على الدرج وهو يسالني

:وين خالتي اريد احجي وياها ؟

نزل على الدرج

نزلت بعده يحجي ويه ماما

: خاله مشفت روان من يوم ضربتني ملاك... تريدون تبلغون الشرطه براحتكم بس ترى مراح يلگون اي دليل ضدي ومتحصلون غير الفضيحه

ماما كلمته باسلوب توسل

:لعد وين راحت متعرف ؟مااتصلت بيك؟ يمه ريحني وگلي والله وكيلك مااحجي كلمه بس اطمئن عليها

استخدم اسلوب التجاهل تماما لتوسلات ماما

: اتصلتوا بمروه يمكن تعرف ؟

؛ اتصلنا متعرف وين ؟

: لعد خبروا الشرطه باختفائها لازم ياخذون علم

: يعني متخاف من الشرطه اذا حققوا يايمه

: وليش اخاف مسوي جريمه اني
جاوبته اني

: الجريمه استاذ يحب طالبته

: اني مو مدرس على الملاك ..مجرد.. متطوع وتركت المدرسه من بدايه العام

: وتالي البنيه تضيع وانتم تتعاركون

:ماما روان عنده. وهو شجعها على الهرب الغايه يفضحنا ويجردها من اي قوه حتى ترضخ ل ارادته المريضه

متشوفين بروده بالاجابه دليل قاطع هيه عنده
لو ميعرف مكانها قلق عليها مثلنا

يله تعالي نخبر عن اختفائها ويتحمل هو المسووليه

دنمشي اني وياها ماما رجعت عليه وگالت كلمات اخيره بوجهه

: رجع بنتي بلا فضايح ...
ولاتبني سعادتك على دموع ام
ترى تعثرك

:واحنا نطلع من البنايه ماما حللت كلامه

: روان عنده عرف يخليها تتركنا علموده... ومتفكر بسمعتنا ...
ياحسافة التربيه بيها
هانت عليها امها لخاطر رعد

صعدنا السياره

و رجعنا مع يقينا يعرف مكانها
وصلنا للبيت

رجعنا مع يقينا يعرف مكانها
بالبيت ملاك ملامحها كلها متغيره عيونها مليانه غضب تفتر بالصاله وتكمش بجسمها من الرجفه الكلام يطلع منها مثل النار اكاد اسمع وياه دگات گلبها الملجوم

ملاك : نخبر الشرطه ونتهمه باخفائها من يراقبوه اكيد يلكون دليل

ايدتها بالبلاغ لان اختفائها مسووليه
: ماكو حل ثاني احنا نفضحنا انفضحنا بين الجاليه من الصبح مراح تلگين خبر غير خبر روان واخواتها

ا : لو موافقات على زواجها ماانفضحنا

: زواجها من واحد ضعف عمرها هذا افتراس مو زواج
ياماما متفكرين بمرضها .. اذا حبلت ... اذا جابت شلون
يعني هو الزواج طاير

اني رايحه ابلغ ايه تعالي ويايه

ملاك
الساعه عشره بالليل دخلنا مركز الشرطه...

في كاونتر كبير... يقف خلفه شرطه اثنين واحد عربي ..

اول مره ندخل مكان شرطه بامريكا ...ورغم ترحيبهم وابتسامتهم بالجميع ...
من وصلنا ارتبكنا نحجي

ابتسم الشرطي وافتهم ارتباكنا وبادر بجمله ...

كيف اساعدكم انساتي ؟

اني الي حجيت بخوف

: اختي مفقوده...
سكتت
وهو يسمعني وترك القلم من ايده وانتظر. اكمل

: هيه طالبه المدرسه اتصلنا بالمدرسه ممداومه

؛ اوكي نحتاج مرور ٢٤ ساعه ...
حتى تنزل بالسستم كمفقوده ..بهذي الاثناء اتصلوا باصدقائها... حاولو تعرفون وين ممكن تروح ...

: انشك باستاذها مستر رعد خاطفها

توقف ينتظر توضيح اكثر وسالني

؛ في دليل على اتهامكم ؟

: الدليل خطبها وهو استاذها ؟

الشرطي عربي جاوب

خطبها غير خطفها...
اخاف انتم متعرفون انكليزي في فرق بين الكلمتين

تعصبت من رده

: نعرف انگليزي.. واريد ضابط امريكي احجي وياه

الشرطي العربي استفزته حجايتي ... لان تعتبر تمييز عنصري ...وجاوبني باستهزاء

:اني امريكي من اصل عربي ...مافي احد بامريكا امريكي بدون اصول ثانيه...
الا الهنود الحمر... وللاسف المركز مابيه هندي احمر

هو يعرف قصدي ، لكن اضهر عدم. اهتمام لذلك انداريت على شخص غير عربي
وحجيت وياه

: ممكن تقبضون على مستر رعد.
انطيته عنوانه واسمه كامل واسم المدرسه الي كان يعمل بيها

جاوبني بهدوء ويحاول يخفف اضطرابي

: اوكي ..الشخص الي متهميه انسان معروف... راح نتصل بيه حالا ..،و اكيد يتعاون معانا ونسجل بلاغ عن فقدان طفله

اشرلنا على كراسي نگعد عليها
گعدنا وطلع من خلف الكاونتر وهو يسجل معلومات عنها
الاسم . العمر . الطول . الملابس

اتصلوا برعد
واحنا ننتظر ونجاوب على اسئلتهم عن عمرها.. عن مستواها الدراسي... عن اصدقائها ...
عن وضعها بالبيت
جاوبنا الاسئله ...
لحد وصل. رعد

مجرد شوفته تستفزنا ...وهو ويضحك... ويمازح الكل ،،وصل ويسلم... ويسال الشرطه عن احوالهم... وعوائلهم ...باختصار استعرض قوته امامنا

رحنا يم مكتب ضابط هو نادانه
عند المكتب الي واگفين احنا والضابط يمه

سلم علينا بكل برود وثقه بالنفس

: كيف الحال انسات في اخبار عن الانسه روان ...

ماردينا عليه

والشرطي يبلغه الاتهام

: الانسات يتهموك بخطف اختهم القاصر روان

هز راسه على اساس متاسف للاتهام

: مااعرف شرد فعلا مصدوم من هذا الاتهام... اني صديق لهذي العائله... ادخل لبيتهم واساعدهم واتصل بيهم
والانسه روان كانت تلميذه عندي... وانقلت لمدرسه ثانيه ومن يومها مالتقيت بيها

لزمت اعصابي وتوجهت بالكلام للضابط

: ابحثوا بسجل مكالماته اكيد تلكون اتصال بينهم

هو راسا طلع تلفونه. وجهه كلامه اليه

: حاضر انسه ملاك
تفضل سيدي هذي الاتصالات

وهو يبحث بالتلفون والضابط ينظر لسجل. المكالمات

هذي اتصالات بيني وبين ملاك ...وبيني وبين روان ...
بيني وبين عدة طلاب ثانيين ...
ضحك وگال للضابط
اتصالات. بيني وبين حضرتك
ورد عليه الضابط بضحكه

وهو باوعنا وكمل

؛الكل اتصل بيه... ويتصل بيه
انتم تعرفوني ..والجاليه تعرفني اساعد الكل

نظروا للاتصالات.. ورجعوا التلفون
اصلا متارك الا كم اتصال بينه وبينها... وبتواريخ قديمه جدا
وفي رسائل يتحدثون عن الدراسه فقط

طلبت من الضابط يطلع تسجيل
الاتصالات من الشركه

وجاوبني شركة الموبايل و الهاتف متنطي تسجيل المكالمات... الا بامر قاضي... وبناء
على دعوه مرفوعه ..وادله قويه

وبادر لرعد بسؤال

: مستر رعد من صباح اليوم لحد الان مالتقيت بروان ...متلقيت اتصال منها

جاوب وهو يهز راسه بالنفي

: نهائيا مافي اي اتصال بينا

بعدهم ديحققون ويسالون وياه دخل تحسين ...
سلم علينا وعلى مستر رعد ...
وتقدم للضابط
الضابط انتبه عليه وسمح اله يحجي

: حبيت ابلغ عائلة روان وجودها بكندا اني وصلتها الصبح ...تگدرون تتاكدون من الحدود... او اتصلوا بشرطه ونزر تتاكد من وجودها

من سمعت كندا. مااگدرت اسكت

: كندا شتسووي اهناك تندل وين العنوان

؛ لا مااعرف نزلت بمحطه ...وراحت وخبرتني امر عليكم ابلغكم بعد. مترجع

ايه متماسكه اكثر مني وسالته سوال ذكي

: كيف عرفت احنا اهنا ؟

؛ مريت على البيت وخبرت الوالده... وگالت انتم بالمركز ومتهمين مستر رعد

: تهجمت على تحسين امام الشرطه
وضربته برجلي حيل على رجليه تاذى ...وبدا يتالم

صاروا الشرطه بينا... ولزموني من اديه.. وقيدوا حركتي

واني احجي باعلى صوت

: هذا وياه ...اقسم بالله وياه ...ومتفقين اخذني للعنوان وين

صار الضابط يحجي وياي

: اي عنف يتسجل ضدج انسه من فضلج ...
احنا نبحث عنها
وراح نخبر شرطه بكندا. واذا
موجوده نتصل بيكم

الكل يباوعني واني اصيح

: مااطلع منا اذا متدزون على اهل تحسين... وتخلونه يعترف بعنوانها ...اختي وين وديتوها

تشجع تحسين بالشرطه وهو يرد عليه

: اني لو خاطفها مجان اجيت وبلغتكم ..،وليش مسويتها مشكله
هسه اتصل بيها واحجي وياها

طلع تلفونه ديتصل

الضابط فهمه

:الاتصال ميقدم ولاياخر. ممكن تكون مجبره على الجواب

الضابط الثاني احنا النا اجراءاتنا ...
وتحقيقاتنا اسمها راح يكون
من ضمن قائمة المفقودين ...
واي تطور نبلغكم بيه ..
وانتم اي معلومات زودونا بيها

تركوا اديه وايه اجتي تلزمني المره الوحيده بحياتي ...تمنيت بيه اتحول قاتله واشوف موته على اديه

هدات ثورتي من حسيت الشرطه بدوا يشكون برعد وتحسين
التصرف كان غباء من تحسين ورعد اثنينهم واكيد يراقبوهم

واخذوهم لغرفه ثانيه
وبعدين صاحونا
والضابط بيده اوراق

: ياانسات تحبوون نكمل الدعوه

؛ نعم مازلنا نتهم رعد وتحسين طالب عنده اكيد متفقين

: خليهم يتاكدون ماعندي اشك
وبعدين انسه ملاك اتصلتي على اختج روان لو بعدج ماخذه منها التلفون ومانعتها تروح للمدرسه حتى متبين اثار الضرب بوجهها
كانت تحجيلي عن العنف الي تستخدميه ضدها واكيد تفكر تنهزم

: انت واحد كذاب وحقير وتعرف كلش زين ليش اخذت التلفون منها ومنعتها من المدرسه
الضابط سمع كلمة عنف تحول صدي
الشرطي يعني : تعترفين حضرتج بالعنف

: مو عنف تاديب لان كانت تراسل وسكتت
خفت من التشهير
لكن رعد اصر يشهر بيهز

: ليش متحجين الحقيقه ونخلص سيدي ملاك انسانه عنيفه
وهاي قبل كم يوم ضربتني وامام المسعفين وهذا اثر الضربه
قاطعته وهو يعرض الضربه امام الشرطه
: كاذب شتحجي انت حرام عليك

:انظر حضرتك هذي الضربه براسي بسلسلة مفاتيح كانت بايدها

اسمع حجيه وتاويله للاحداث
ومااعرف شنو ارد حابك الافاده
وصرت بعين الشرطه مجرد اخت متسلطه تريد تخلص ثار

مااعرفت اجاوب وارد واني اسمع كم هائل من الاسئله عن العنف وهل كانت روان معنفه

حتى اللغه نسيتها. ودخت وتوترت حيل
اريد منفذ من كل هذا
تركت الاسئله وگعدت على كرسي
ابجي وايه يمي لازمتني تخاف انهار او اتهجم على رعد

: خلينا نطلع الخطه محبوكه

: الله لاينطيه حرگ گلبي ودمي

طلعنا بدون منقدم بلاغ مجرد تقرير عن اختفائها
حرگة گلوبنا متعادلها اكبر نار بالدنيا
جحيم شب بعيوني واني انضرله يصافح الضباط ويضحك
اما تحسين فبقوا يسالوه وطلبوا حضور والده
وصلت للسياره احس بعد مااشوف طلبت من ايه تسوق
گعدت على الكرسي وانظرله وهو يتعبقنا وگف قريب منا
وياشرلنا باي
استفزني لدرجة فتحت الزجاج وبصقت بوجهه
ايه خلف المقود وتبجي وتفكر بروان
: شلون ب روان طاحت بيد هذا النذل والله ل يراويها الضيم والقهر وتشوفين

: ومنو گال عده شلون تتاكدين

: عنده وهذا تحسين معبرها وكلها يومين ويلحگها رعد
هو عنده اخت بكندا

:اتصل بروان واشوفها يمكن تجاوب
الاسماء بالجهاز تختفي امام عيوني واديه ترجف بصدري صرخه بدت تكتم على انفاسي

دگيت عليها جاوبت
طلعت مني صرخه واني اسمعها تگول الوووو

: وين انتي ياواطيه ياحقيره كلش راح تموتين على الزواج

: مراح ارد عليج اني انهزمت منج ومن ايه وضيمكم وبعد ماارجع والي يهمني ماما

سدت التلفون بدون متگول راح تتزوج رعد وذكرت جمله تبين احنا كنا نضربها
هو مفهمها لان يعرف التلفونات راح تتراقب

دگيت عليها اريد اخلص قهري
دگيت ودگيت مجاوبت

——————————
روان
روان

الكلام الي گلتها لملاك ...
ام زهراء وصتني اگوله ...
وهيه الي تتصل برعد... اني مااتصل ومتگول اسمي تگول (بام ) اسم زوجته

بيتها موحش وصور اشخاص بكل زاويه وركن
يمكن اولادها واحفادها
التلفزيون على قناة وحده ادعيه وقران
انطتني الرموت وكالت اتفرجي الي يعجبج
اخذته منها
شويه اجاها اتصال
جاوبت افتهم. لاتوصيني
هيه كم ليله

سدت التلفون
وگالت يله حبابه نطلع اني وياج

: وين نروح خالتي

: نغير البيت. لبيت بنتي قريب
هيه الي اتصلت بيه هسه وگالت
البيت فارغ مو تتسين تسدين الباب من تطلعين

: وليش نغير البيت

: هذا الاتفاق مع رعد يمكن احد يبلغ
يله حبابه گومي

طلعت وياها ... هيه تسوق سياره قديمه بس نظيفه

وصلنا لبيت ضخم وكبير وحديقته مرتبه بشكل لافت للنظر
حاولت تفتح الباب مااگدرت المفاتيح عدها اهوايه ومتشوف
فتحت لايت الموبايل حتى تدور المفتاح
فتحته ودخلنا
فتحت الاضويه
وهيه گعدت
واشرتلي
فوتي هذا بيتج والثلاجه مليانه

كنت جوعانه فعلا.
طلعت فاكهه وعصير. وگعدت على كرسي ميز الطعام بالمطبخ اگل
وهيه نامت بغرفه ...
واني ظليت استطلع البيت
غرفه... غرفه
مافي شي يجذب غير الترتيب الزايد
شغلت التلفزيون
لحد گعدت ام زهراء
اتصلت بمطعم وطلبت اكل عربي

...
بالليل گعدت يمي وحجتلي عن حياة رعد... وزواجه ...
وسالتني عن اهلي... واخواتي
اجاوبها ... وترد تسالني

لحد بجيت واني اذكر بابا والحادث ... وماما... وتعبها
اخذتني بحضنها وگالت

: هاي اقدار الدنيا
لاتبجين

وبعدين هيه تحدثت عن حياتها

:شوفي اني تزوجت مرتين الاول مات ...وتركني عمري ٢٥ سنه ...وعندي بنات اثنين ولد واحد ...
بعدها تزوجت مره ثانيه ...
وخلفت منه تلاثه... ومات قبل سنتين... وشگد ماحجيلج عن العذاب الشفته بعمري مراح تصدكين ...
يابنتي انتي بعدج زغيره والدنيا راح تراويج ياما

: واطفالج وين هسه

ضحكت عليه

: وج مو اطفال كبروا... وتزوجوا ...واطفالهم كبروا

: وليش ميجون يعيشون عندج ؟ليش لوحدج ؟

؛ كلمن يريد راحته بيته

واخويه رعد يجي عليه على طول
وهمه يجوون كل فتره

: خالتي من اتزوج ماما راح تسامحني على السويته بيها

: اكيد تسامح ياما اطفالنا خطأوا ...وسامحناهم
گلب الام يسامح

صفنت وعرفت ورا صفنتها سوال صعب

: ليش حبيتي رعد

: ماادري
احجيلج بصراحه... بابا من مات ترك بگلبي فراغ. والم. وخوف
بقيت سنين يوميه اتذكر الحادث ...
وكل مااريد احجي عن الحادث ل احد... ينهي الحديث بكلمة ...(انسي وهاي مجرد احلام )
الا رعد من حجيتله سمعني ل اخر كلمه ورد عليه
(اني موجود كل الي تريديه اكون واكثر. ...روان باباتي )

هل كلمه كانما مرت على جرحي ...وخوفي... ومحته
(باباتي احلى كلمه )
في سبب اقوى من هذا للحب واني احس بيه هو اماني ...وحمايتي.. وسوري
مااكول الي سويته صح ...وافتقد

بيتنا... وماما.. وندمانه على الهروب
بس محد افتهمني وسمعني

—————-

رعد :
غادروا البنات المركز طلعت خلفهم ...
اريد احجي وياهن على روان
قبل لااقترب ملاك
بصقت بوجهي
خرج الامر عن السيطره ..،
وفقدوا الثقه بيه وفقدت الثقه بيهن
لو هسه ادخل ناس بينا وارجعها
راح يبلغون ضدي بالخطف
ومستحيل يقبلون بالخطوبه
————-

وصل ابو تحسين للمركز اني مفهم تحسين على كلشي
وفهمته راح يراقبوه كم يوم واحتمال يمنعون يغادر المدينه ابوه في قمة ثورته وغضبه تلگيته اني حتى اهدي

: اهدء حجي ممسوي شي غلط

: والبنت الي هزمها هذا شيسموه مو غلط
: مجنت اعرف مهزومه گالت زعلانه ويه اخواتي ورايح عند اقاربنا عبرني لكندا وصلتها ورجعت

اصر تحسين على افادته وطلع بكفالة والده
واني ودعت الشرطه الي بعضهم اصدقائي
طلعت بسيارتي راسا

اتصلت ب بزوجتي بام
مناوره حتى أاجل الطلاق وتقسيم الثروه بينا
محتاج للمال لعلاج روان
اذا التامين مغطى مصاريف مرضها

راح تستغرب طلبي واني اللي رافع قضية طلال ومع ذلك جاوبت

: شعجب تتصل

: افكر بدايه جديده اني وياج

: بدايه جديده وانت بولايه ثانيه

: شنو رائيج نحجز لسفره ل اي بلد تريديه... ونحاول نسترجع علاقتنا... ويمكن تنسين الادمان

: مااعرف اذا يسمحولي اغادر المصحه خليني اسال

الحماس ضهر بصوتها وصدگت
وسالتني

:وين تفكر نسافر ؟

: دوله عربيه حتى تعرفين اجوائها... وعادتهم.. ولبسهم افكر لبنان مثلا

: وقضية الطلاق بينا

: بعد منرجع من الاجازه نقرر

:ماعندي مانع نجرب... خاصة اني صار خمسين يوم ...تركت الادمان ومشربت ابد

ضحكت على ادعائها ورديت عليه
: قصدج صار خمسين يوم ومحد لزمج وانتي تشربين... بام اني اعرفج... اكثر فترة تگدرين بلا شرب هيه ساعتين

تراجع حماسها بالسفر من صارحتها بحقيقتها

: يمكن من اسافر اشفى من الادمان

تريدني اني احجز

: احجزي انتي واختاري يوم قريب يعني اليوم او باجر

: واو. فعلا تحمست للسفر

وهيه تحدثني حسيت بدات تنسى الكلمات معناها بعدها تحت تاثير الكحول
انهيت الاتصال وطلعت يم اصدقائي
اعرف الشرطه دتراقب ولازم
انطيهم شوية حركات واتصالات اشغلهم بيها
دخلت مقهى دائما نتواجد بيه نسولف ولازم الهاتف مابقيت شخص من الجاليه مااتصلت بيه اسلم عليه
رغم الوقت متاخر
استخدمت هاتف صديقي اجري اتصال ب ام زهراء

: تلفوني مد يحصل ممكن استخدم تلفونك اتصل باختي

اي تفضل اتصل

اتصلت بيها

: ها شوكت تجي ترى بام راح تموت من البجي

: فهميها يومين مو اكثر. وطلعيها اشتريلها الي تريده مثل اي عروس

: ماادري شگول عليك ورطت روحك وهذي طفله

: لاتلوميني ام زهراء اني الي احس نفسي طفل وداتصرف بلا وعي سيطرت على كل كياني

: ليش مانتظرت تصير ١٨ سنه
وتتزوجها وعلى الاقل تطلگ ذيج

: ام زهراء. اخر فحص سوته
نتيجته كانت زينه وشفتها طلعت فرحانه
لاهيه ولا اختها ناقشوا الدكتوره
يمكن بسبب اللغه مو قويه
لمن ناقشت الدكتوره عن حالتها
سالتها هل شفت من السرطان
جاوبتني ( لا واتوقع يرجع باي وقت ودكتوره خبيره بهذا المرض توقعت يرجع قبل ١٨ )

كلامها خلاني امام حقيقه مر ه
منو يضمن تعيش ١٨

ام زهراء انتي تعرفين حياتي الي مضت
ماعرفت حب ... ولااشتياق
ولاغيره
صدگيني هالبنيه صارت رسول حب بحياتي

ولاتخافين اهلها بالاخير يوافقون
احنا بديربون مو بامريكا
ضحكت ونهت مكالمتها بكلمه

(استعجل لعد )

: اححزي احجزي على بيروت باجر وادفعي كاش لا تستخدمين كردت

عدى اليوم على خير وحزمت الحقائب واخذت كل مااحتاجه

بعدها بيوم ودعت اصدقائي ومدرسيني وكل معارفي
وخبرتهم ان راجع لكليفورنيا

وبعضهم تاثر ويبكي
ومن وصلت لكليفورنيا بام تنتظرني بالمطار
اول لقائنا كان عناق

تفوح منه رائحة السكر
: رائحة السكر واضحه عليج
ليش تدفعين فلوس وتروحين مصاحات اذا متريدين تتعالجين

ردت وهيه تحاول تخوفني بالمحامين
؛ المحامي حذرني من هاي الرحله... والظاهر كلامه صحيح ...تريد تثبت ادماني وتحصل طلاق ..والمتتلكات

رعد
رديت عليها بضحكه عاليه
وجمله
( المحامين شغلهم يخلقون مشاكل وبس ؛

سافرت مع بام لبيروت في رحله
متعبه
يدفعني ل احتمال مشاقها
اللهفه للقاء الحبيبه
بلا خوف من قانون .. وعمر ..، وناس
وصلنا الساعه عشره صباحا
وصلت بام للفندق الي يادوب وگفت خمس دقايق بالغرفه
وطلعت تدور على اقرب وسيله
تحصل بيها مشروب
واني ايضا طلعت ابحث عن شقه للايجار
لان باقي خمس ساعات على وصول روان
ااجرت سياره حتى افتر وادور دخلت مكاتب عديده لحد وجدت شقه
طلبت اشوفها ودوني عليها واسعه... نظيفه.. تطل على بحر
المشكله الاستلام... بعد اسبوع
صرت مجبر احجز بفندق ثاني
واوصيت يزيننون الغرفه بالورد

روان :

بعد يوم كامل خلصته بالفرة بالاسواق والصالونات

حجزتلي ام زهراء لبيروت
وجهزتني مثل اي عروس

خايفه من السفر.. ومن الجاي ..
مااتصور مستعده للزواج ..
وانهزامي كان حتى اكون مع رعد فقط.. ماافكر بنوع العلاقه ...
فقط احتاج وجوده بحياتي
دخلت للمطار هيه وياي
اخذتني بروده بجسمي.. وعقلي مثل التوقف عن العمل
اسئله تدور ابالي
( شسوي اذا وصلت وملگيته ؟
اذا تيهت شلون ؟
اذا كمشوني الشرطه شگلهم )
الاسئله حتى لو بدون اجابه
مراح توقفنا

ام زهراء قرت خوفي

ام زهراء ؛ شوفي هذي البوابه بعد عشر دقايق ينادون الركاب
توكفين اهنا وتنطيهم التذكره والجواز

: واذا عرفوني مهزومه
هزت ايدها من كلامي وهيه توضحلي

: لج ذولي بس يدققون شكلج ويه صورة الجواز معليهم
هذي شركة طيران مو امن
هاج الزمي دبج كتلني شكبره
اكو وحده رايحه تعرس ماخذه دب وياها

فكرت هذي اخر فرصه اتصل بماما
: خاله اگدر اتصل بماما

ا : اتصلي من التلفون العمومي

اتصلت بماما قبل السفر
من هواتف المطار

: شلونج ماما

ردت بصوت مليان عتب مخنوك وحركة محبوسه

؛ شلوني انتي خليتنا لون تعالي شوفي قصتج صارت على كل لسان والناس تلوم اخواتج بحجة ضارباتها وحابساتها
وام موفق تكول انهزمتي مع امريكي وابو تحسين هد على ملاك يگلها اختج ورطت ابني والشرطه مراقبته

كلامها المني وحملتها هيه المسووليه

: لو واگفه ويايه وموافقه على زواجي مصار كل هذا

ا : ارجعي هسه وخلي اسويلج عرس يرفع الراس ويسكت الناس

؛ ارجع حتى ملاك تثبت التهمه عليه وتذبه بالسجن
ملاك مجروحه وتريد تاخذ ثارها باي شكل مافكرت بيه انما فكرت بكرامتها وبس والفت شغلة الكاميرا واصرت تطلعني مستهتره گدامج

طلعت منها اه واوووف
: وين هسه انتي ويامن عايشه

: راح اتزوج واريد اسمع منج كلمة موافقه
ماما الله يخليج لاترديني خليني ارتاح وگولي موافقه

ا ؛يعني اذا ماوافقت متتزوجين

: لا اتزوج بس ماارتاح واظل دمعتي على خدي گوليها يمه الله يخليج

تتزوجين ر
ماخليتها تگول اسمه
: بلي هوه. وارجع من يصير عمري ١٨
وراح ادزلج صور عرسي شگلتي يمه

: شگدر اگول فضيحتنا ماتنسد الا بزواجج
موافقه تزوجي ودزي صورج وصوره من العقد وظلي باتصال ويايه

: الله يطول عمرج وارجع اشوفج ونتواصل انشالله
الله وياج

: الله وياج
—/-//////////

: وصلت روان بالرابعه العصر
التقينا بالمطار ...
اول نظره بينا..، ارسلت ايعاز لقلبي.،، ببدء الاحتفال
وهيه تمشي. وتوگف. وبيدها دب ابيض
تخيلتها سيده على كل ذرة احساس املكها
المسافه امتار معدوده
حسيتها اميال واميال

مشت باتجاهي وكفت تمسح دموعها
تقدمت ركض عليها
رفعت راسها باوعت بعيونها
مافي غير الخوف
ضميتها اهدي خوفها

: الحمد لله على السلامه
نورتي بيروت

دنگت وهيه وجلى من الناس ونظراتهم

: لاتخافين هذي بيروت مدينه بيه كل انواع البشر وكانما عالم مصغر
محد راح ينتبه عليج

ابتسمت ابتسامه خفيفه

تعالي نطلع

: والجنط

: والله نسيت اكيد الجنط مليانه دباديب

ابتسمت وهزت راسها
بمعنى اي

البارت اكثر من ٥٠٠٠ كلمه
يعني اصابعي ورمت فياريت تشجعوني بالتصويت
وشكرا