رواية نوارس مهاجره الفصل الثلاثون 30 - بقلم zeanab_almusawi

#نوارس_مهاجره29
#زينب_الموسوي
الجزء الثاني

ملاك
مصباح يوم عرسي..... تفاصيله متختلف عن تفاصيل اي عرس ثاني.... لكن يختلف  كونه عرسي اني ...
ياما سمعت كلمة يوم الالج  ...واجى اليوم الالي

لقبي حيصير السيده... بدل الانسه
ويكون عندي... زوج  ...واطفال اكمل معاهم  حياتي

الزوج  قد  يكون  مو الي حلمت بيه... وتمنيته 
لكن هو المكتوب اليه.... هو القسمه ...
والاحلام  مهما تكون جميله ....تبقى احلام تنتهي باليقضه... مجرد تفتح عيونك
اما الواقع فهو الي ....تعيشه وعيونك مفتوحه

الصبح  بيتنا   گاعده من الساعه ٨ ... وافتر  بيه ... وبكل ركن  اوگف  اتامل ...
وافكر   مع  نفسي 
ياترى  راح   اگدر  اعيش بعيد  عن بيت اهلي  ...  راح  اتعود   انام  بسرير   غير   سريري ...
واصبح  بلا مااشوف  وجه  امي

وطمنت  نفسي بجواب واقعي
اكيد  صعب   بس  ممكن.
مثل ماغيري  تعود  ... اني  راح اتعود

بالمطبخ  ايه  تعد  الريوك 
وبنفس الوقت  تحضر. وليمة الغدى  للكل
وطلال  المسكين صار تلث ايام
شغلته يجيب طلبات
الي تكتبها  ايه .... اتفرج عليهم
متفاهمين   ل ابعد حد ...
لكن في احساس  داخلي ان هالزواج  خلفه معاناه ...
وايه  اول موصلت  وجها  كان وارم ... 
ماعرفنا  السبب الحقيقي

دخلت اتريك  ... وهيه تجيب بهل المواعين وتخلي گدامي
وتردد نفس الكلمه ( أكلي ...أكلي )

: تريديني  اكل  هذا  كله  شنو ورايه  مجاعه
جابت ماعون اخير .. وگعدت يمي
: مو  مجاعه. بس اكيد  راح تخجلين تاكلين  من  تخلين مكياج  وتلبسين. البدله

:تريدين  الصدوك ... اني مخجلانه  بس خايفه ... ومرتبكه

: شعور  طبيعي  كلنا حسينا بيه

گالت هذي الجمله والي اتذكره ايه مكانت خجلانه ... بالعكس كانت  فرحانه
لذلك حبيت اعرف شنو  وراها ... شنو  السر  التارس عيونها دمع 
وكانت مثل كل مره تتحجج

:السجن ماأثر  على نفسيته
لاتشغلين بالج ....
گامت من الريوك
واخذت الورد  والاصق حتى تزيين الباب  ... ( هذا  تقليد متبع عند العوائل العربيه هو تزيين باب بيت العروس والعريس )
وقبل  لاتبدي العمل  ... ذكرتني بموعد الصالون

: جهزي نفسج  ام كوثر   جايه تاخذج للصالون

: وانتي مترحين ويانا

هزت راسها لا ... وصاحت طلال من البيسمنت  ....
حتى يساعدها  بالاناره  ... والورد

طلعوا همه للباب ...وجتي ماما  يمي ... طلبت اقيس ضغطها
وجهها شاحب
ومن اخذت ضغطها  ... طلع طبيعي  ... گعدت يمي. وظلت تحجي عن روان  وبجت 

: خير  ماما  ليش تبجين
مسحت دموعها. وهيه تخبرني السبب

: اختج  روان حيل مريضه  وماادري شاسووي وياها حتى اقنعها  تجي اهنا

: وليش متقبل. تجي

: تخاف من التحقيق  وياها ويه رجلها 
سكتت  لحظه  وبعيونها حجي افصحت عنه

:افكر   اسافر  اني وطلال  ونجيبها  اهنا..، ورجلها بعدين نشوفله حل

: اوكي خوش فكره  ومااعتقد طلال  يتاخر ...  اصلا صار تلث ايام  ... بس يركض لطلباتنا
مره ويانا ... ومره ويه واثق

: الله يحفظه..  هالولد  احسه ابني 
من. زمان  من اول ماعرفناهم بالعراق

استمر  حديثنا  ... واحنا. مشغولين بترتيب امور العرس
لحد وصلت ام كوثر وبنتها
وهلهلت بالباب
وگالت اني ناذره نذر من تتزوج. ملاك

تجمعنا حولها نريد نعرف النذر
ترددت  تگوله. وصار وجهها احمر وهيه تگول

: ناذره ارگص ..، ومااعرف اركص
ضحكنا كلنا ... سدت ايه الباب الخارجي على طلال الي بقى برى وميعرف شديصير
وسوينا شده ....  نعلمها  الرگص
وماما  تولت مهمه الغناء
بمقاطع غنائيه اثريه ....
تبدي بمقطع ( شجابني للضيم جنت مدللة) ... وتنتهي  بمقطع
( ماريد  العشى زفوني )

الضحكه رنت ....والساعات عدت ...
وذكرى جديده... انطبعت  بگلوبنا
الجمعتها  الغربه

طلعنا  للصالون اني وام كوثر
الي حرصت بيه .  كل شي يكون اختياري  اني من مكياجي ...لتسريحه تلائم  الحجاب

خلصنا اتصلت بايه تدز طلال يرجعنا للبيت
ومن رجعت حبيت اعيش دور العروس

وايه.. وام كوثر.. وام فاطمه تولن  باقي المهمات... يركضن واني اتامر عليهن  حتى الاغاني اني حددتها 

بعد ساعه من الدلال. ايه فاض بيها 

: اكلج ملاك اوامر ثانيه تگوليها. اجرج من حجابج  واذبج برى ..اشو تدللين زايد اليوم

لكن ام كوثر  مااعترضت على دلالي

: خليها تتدلل نتحملها  ساعة زمان وتروح للمزرعه تزرع ..وتحصد

ضحكت ايه  وكملت  صورة مستقبلي الزاهر بتعليق ظريف

: لا هسه الثلج بالصيف نمر عليها نلگها تحش  ريحان ورشاد

: خرب حضي والله طيرتوا واهسي 

: ههههه دنتشاقى عمري
ربي يهنيج

هلاهل ...ورقص ...واغاني شعبيه... واكل
في كل زاويا من زوايه بيتنا ...
استمرت ساعات ...لحد وصلت سيارة الزفه...  واثق ...واصدقائه
صوت الهورنات... والهلاهل 

افقدني الاحساس ...ونسيت كثير من التفاصيل
شفت ماما تبجي. ...مااتذكر بجت بزواج ايه
وشفت طلال  ..لازم ماما ويبوس راسها
وايه واگفه بعيد وتبجي

واثق گعد يمي وسلم عليه
وهو يگعد
باوعته  هو ابتسم واني  جتي عيني على صورة بابا  خلفه  على الجدار
وكانما  ابتسملي ... ورديت عليه بابتسامه وحسره

طشوا  جكليت علينا 

وفي مراه علويه.. هيه الي اخذت ايدي وگفتني... وخلت ايدي بايد واثق
الي سلم على طلال وتباوس وياه... وبعدين باس راس  ماما
واني بست ماما... وايه حضنتني وبجت ...
طلعت من الباب ... واني اباوعهم كلهم
  وصعدت بالسياره ومن الزجاج انتبهت على الزينه بالباب مسويتها ايه من تور ابيض ...ورد احمر ...

وفي رقائق ثلج منتشره على الباب  ..زادت  بمنظرها الزفه جمال ...وسحر 
انطلقت السياره  وسط مجموعه سيارات...  واغاني عراقيه من المسجلات ...والموبايلات

اتذكرت واني اطلع حدود مدينة ديربون..  نفس الشعور من تركت بغداد
المدينتين عزيزات عليه  ويتشابهن  بشي واحد هو اللمه الحلوه... بغداد رغم جروحها حنينه... وتلم الكل
وديربون رغم مدينه غربيه... لمتنا  كلنا  بحنيه
الطريق ساعتين  بدات السيارات ترجع  واحنا كملنا للمزرعه

اني شايفتها بالخطوبه

المزرعه  هيه ارض واسعه بوسطها منزل خشبي كبير....
وحوله حقلين... حقل للخضروات ...والثاني للفواكه وخلف البيت بمسافه بعيده
حضيره لتربيه حيوانات... ودواجن ...
ومنحل صغير ...
وفي شبه منزل منعزل محوليه ...مشتل للورود

وگفت السياره  الي كان يسوقها واثق
ونزل فتحلي الباب ... وانطاني ايده
واني احاول  اطلع طرف بدلتي
ساعدني هوه
وطلعت 
مشينا خطوات  على الثلج
وهو يمسكني بقوه
خايف اوگع ...
لحد

دخلنا  البيت ايضا...  شايفته قبل
في تغيير لبعض الاثاث ...
وفي تحف جديده.. ورد طبيعي

انشغلت  بالنظر  لمحتويات البيت
الجديده والقديمه  ... وانتبهت ان واثق مشغول  بالنظر
اليه  ... ويمد اديه  اليه  ... وتصبح المسافه بينا شبه معدومه ... وصوته يرحب بيه  في بيت  اعد ليكون  مملكتي

: نورتي البيت

؛ البيت بس لو البيت والمزرعه

؛ المقاطعه كلها بعد شتريدين

: شكرا 
فلتت بنفسي من اديه.
بمحاوله. لكسب كم دقيقه اضافيه ..، ومشيت بالبيت وهو يتبعني  ... التفت عليه واني أأشر  على الاثاث

:البيت في تغيير  

هز راسه وبدا ياشرلي واحنا نمر  بكلشي جديد

: اي غيرت هوايه اشياء  وجددت الاثاث ...حتى يصير بيت مدينه ...لان انتي واضح عليج متحبين ااريف

: بصراحه لا  لكن راح اجرب  واشوف

؛ متاكد راح تحبين الحياة اهنا

اول مشفتج عرفت انتي الانسانه الي راح تحول حياتي. لجنه

: شنو الي خلاك متاكد

؛ وانتي. تجيين كل اثنين  كنتي حريصه على  فحص التوب الي تاخذيه قبل لتوقعين  دليل شاطره  ...
وجديه...  وعمليه

: لا عفيه ترى هذي مو صفاتي خاصة الجديه اني احب المرح والضحك

؛ وهذا الي محتاجه بحياتي المرح ...والضحك ... الى جانب القوه .. والحب ...والجمال

:تقصدني  بالجمال

رده  كان كلمات   مع قبله  اولى على خدي
وهو ياكد  على جمالي بلقب
انتي جميلة الجميلات

عجبني اللقب...  والقبله

سولفنا هوايه. هو كان يبين الي انه مو مجرد مزراع  ...وانما انسان
ضجر من الوحده ...والعزله ومحتاج انسانه تكسر هالوحده
واني كنت اطول السوالف لسببين. اخذ عليه وافهمه ...والثاني البس البدله اطول وقت ممكن... البدله البيضه الي اخيرا لبستها  وعلى وشك انزعها.... واني واگفه بالحمام  واباوع عليها
هذي البدله  الي  مجرد نلبسها يعني سمحنا لحياتنا  تتغير  كليا والصبح تبدي تفاصيل جديده
ماتعودنا عليها
ظليت بالحمام واگفه اقنع نفسي اطلع بلي  لبسته من ملابس خفيفه
وانظر لنفسي بالمرايا. واسخر من افكاري الماضيه  الي اخذتني مره عروس ل ثامر ...
ومره عروس لعلاء... ومره لرعد

لكن ابد ماتخيلته اكون عروس لواثق... والوحيد الي ماحلمت بيه  ...
ضحكت واني اگول لنفسي قسمه
نزلت خصل شعري على صدري حتى اغطي الي اگدر عليه
وطلعت ...
عيني جتي على واثق واگف يم الشباك وينظر منه. ابتسم وكلي تعالي
مشيت خجلانه... وهو ينتظر خطواتي تحملني يمه  .... وينظر من خلف عدسات النظارات بكل تركيز ... وبكل  جزء  يگدر  يشوفه مني ... وگفت يمه
خلاني امامه  ... واديه حولي

وهو يرسم لي حلمه

؛ تعرفين ليش اختاريت الغرفه الاعلى تكون غرفتنا

: لا ليش في غرف اثنين اسفل

: باعي من الشباك
شوفي هذي الارض الممتده گدامنا
شفتيها

: بلي شفتها
دنگ يم اذاني
وهو يهمس  كلمات  خلتني احس بايمانه  بحلمه

: هذي ارضنا ملكنا احنا ...
اهنا  راح تكون  جذورنا..  اني وياج
واولادنا... واحفادنا... راح يحجون  عنا  لاجئين عراقيين تزوجوا  وامتلكوا ارض بامريكا
وزرعوها  ... باديهم   ... وعرگهم

تصوري ملك بامريكا

؛ في قبلنا عراقيين امتلكوا بيوت

بفخر  وحماس بين الفرق

: امتلكوا  بيوت بانيها غيرهم
احنا امتلكنا ارض في امريكا وشيدناها وعمرناها  الارض هيه الاساس ...والاصل
ومن اهنا راح تكون عائلتنا السعيده

: ان شاء الله 

وشاء الله ان اكون زوجه في تلك الليله ..

وشاء ...  ان   تكون ليلتي سعيده مع  زوج  لطيف  ...حالم

احتوى  خوفي  باحضان  دافئه ...
واعطاني الامان بغد جميل ...
وبيت مليء بالفرح ...وان كان في اقصى الارض
وجدد  الامل عندي  باولاد وبنات ...واحفاد..  بعد  يأس طويل

—————/——————-
ايه

بعد الزفه
لميت البيت  المليان  مواعين وگلاصات  فلين

شلت  نشرات الاضاءه  الزايده

واستخدمت المكنسه

رتبت البيت  مثل  ماكان
وطول مااني  اشتغل  ادعي
ربي ( ان ملاك  يكون. حضها  عدل  وتنسعد  على الاقل وحده. منا  تكون سعيده )
دخلت لماما   ومعاي صينية اكل ... والادويه
بغرفتها  ...بيدها  القران  وتقرا 
ومع تاثرها  الواضح على  فراق ملاك ... اعتلت  ملامح وجها. لمحة   راحه  ... سببها اعتقادها
ان بناتها   تزوجوا  تلاثتهم ...
ورتاحت من همهم

...  انطيتها  الصينيه  ...
ورتبت افراشها
وگعدت  يمها  بين  متنام  لان  قلقه  على ملاك

ولكوني  البنت   الوسطى  ... دائما  احس  حقي ضايع 

: ماما  اشو عليه ماتاثرتي من تزوجت ؟

: وانتي شمدريج ماتاثرت

: ها هم صدوك
بس اعترفي ملاك بنتج الجبيره والها معزه غير شكل

؛ كلجن نفس المعزه... لكن ملاك كبرت... وايست من زواجها

: الحمد  لله ملاك تستاهل  كل الخير  والسعاده
بقيت وياها نسولف. الى ان بدت تتثاوب ... ودخلت افراشها

: يله روحي نامي رجلج ينتظرج هسه

: متاكده متريديني انام يمج

: دروحي روحي شعندج يمي 

مريت على غرفتي  القديمه 
نزعت ملابس التنظيف  ...
ولبست بيجاما ستن  وردي
ومسحت مكياج الحفله
واستبدلته بمكياج خفيف 
وشعر  مربوط للخلف

نزلت للبيسمنت الي انبات بيه يوميه... اني وطلال وهو اختار البيسمنت ...لان ميريدهم يسمعوه يتقيء بالليل ويسالون ليش ؟
ولاحظت صار يومين ماشكه من معدته

نزلت  الدرج 
متمدد على افراشه ولابس تراك وبيده  التلفون

انتبه على وجودي   .. ترك التلفون. وهو يطلب مني اطفي الضوى
ماطفيته   واجيت قريب منه

: محتاج شي اجيبه الك قبل لا انام  ... اخاف جوعان حبيبي

: لا ممحتاج شي اريد  انام

: ليش راح تنام  بعد وكت ..خلينا نسولف

غطى راسه  وجاوبني

: شنسولف الله يخليج 

كعدت يم وسادته  واني احاول اسحب الغطى منه واتوسل

: اي سوالف الله يخليك
مثلا ليش مبعد افراشك

ست امتار عني.. ولابس تراك احد گالك اني اعظ

شال الغطى. وهو عصبي
وگف  على حيله

: والتراك شبيه بشنو مضايقج

ضحكت واني احاول ابين اله ليش اضوج من التراك

: والله عمري ماسمعت احد ينام يم مرته بتراك 
يلبسون بيجاما... او تشيرت او حتى لا سامح الله ينزعون وينامون

: هذا المضوجج هسه

نزع التشيرت  وشمره على القنفه  ودار  جسمه عني وهو  مستمر بالرد بعصبيه

: نزعنا يابه اهم شي اعصابج

ضحكت عليه .. وعلى حظي
اول مره اشوف جسمه... واحنا متزوجين راح يصير سبع اشهر  ...
ومره شفته بالتلفزيون

انتبهت على ظهره وشم  جديد مشايفته
وگفت  خلفه ...
ولمست ظهره
اندار راسا

: داشوف الوشم مشايفته قبل
اندار شبيك خايف

اندار 
مررت اصابعي على الوشم

: راسم نورس  بعدك تتذكر

هدأ  ... بس وهو مليان حزن

: اتذكر  والدج الله يرحمه جان يسميكم نوارس ...
واني اختاريت نورس وحده وشمتها على جسمي

: ليش تريدني  وشم

دنگ. واطلق انفاسه  وبصوت  حزين  جاوب

: ادري لابد يجي يوم واتركيني. انتي نورس  لابد يوم يطير  ويتركني ويبقى بس الوشم ويايه

تجردت من قميص البيجاما الي البسه ... وانداريت امامه

نظرلي ... بلا حركه منه . ..
ارتميت بحظنه
وكلماتي  نادته بدل گلبي

: هاي اني يمك ... وبين اديك
شنو الي يمنعك .. اذا هلگد تحبني

ثواني مرت ... انتظر منه  الانقاذ
لكرامتي  الي تناسيتها  ... واني اعرض نفسي عليه

حتى نفسه ماحسيته ... جامد ... ميت ....صنم

رفعت راسي  ... وخايفه
الرفض ....

تحرك للارض  اخذ قميصي
وانطانياه ...  مشى  يم الضوى
وطفاه  وراح نام  ... في ابعد مكان عني

هدرت كرامتي ... وسقطت مع قطرات العرق  التي بللت جبيني

تسحبت لفراشي  ... الغصه حارگه  گلبي ... ومحبوسه بلعومي

ارسلت الدمع ... والاه ... بسكوت  ...
وامام شاشة التلفزيون

خلصت الليل اتفرج تلفزيون ...منتظره يصير الفجر حتى يگعد يتقيء ...
وبعدها اصلي... وانام
انتظرت... وانتظرت...
ماگعد
صار الفجر.
صليت ... ودعيت ل اخواتي ونمت ...

واول وحده صحيت اني
لگيته تارك افراشه ...

صعدت للفوك ادوره ... ماموجود بالغرفه ... باوعت من الشباك ... سيارته ماموجوده

اتصلت بيه
مجاوب ... دزلي رساله
( رجعت لشيكاغو ... وانتي براحتج  )

طريقه حديثه ... بالقتل
هيه ان تبعث رساله تنهي بيها
علاقة بشخص  يتصورك حياته

اتجهت ل اعداد الريوك وايقاظ ماما  .. والادعاء  ان طلال سافر بعلمي 
كملت الريوك وب ١١.اتصلت بملاك الي من نبرة صوتها الممزوجه بالضحكه  ..، واضح انها  عروس

: صباح الخير يااحلى عروس

: صباح النور شلونج

: انتي شلونج احجيلي اجواء ليلة العرس شلونها

: قابل متعرفين نفس ليلة عرسج متختلف

ردها. اخذني ليلة عرسي ورديت بلا  وعي

: عزا  ليش شصار ؟

عاطت بيه

: شنو عزا وشصار داكلج ليلة عرس عاديه شبيج

: ها. ماسمعت زين
مبروك حياتي اروح اطمن ماما

: اي طمنيها وسلميلي عليها. لان مشغوله مااگدر اجاوب تلفونات

: حقج عيني حقج روحي انشغلي. باي
: باي

——————————-
رعد

الحمل صعب على روان ...
والوحام اصعب
واليوم يخلص بس نايمه ...
اتركها واروح  للشغل مضطر ..
واوصي جارتنا العراقيه عليها
ومعاناة
الفحص الدوري عن مرض السرطان
الي يسببلها  القلق والخوف
بالاضافه  لتكلفته ٥٠٠ دولار  وبعياده خاصه لان المستشفيات الحكوميه بالدور الي ميوصل الا بعد اشهر اول فحص اجرته سليمه من المرض

فرحنا بالتحليل ...
واخذتها للتسوق ...
وسط السوق  والزحام 
مشينا

وتركت الها تختار  ماتشاء

: يله بيبي اختاري الي تريديه

: مااريد شي ... عفيه رجعني للشقه ..، نفسي تلعب من ريحة السوك
ضحكت عليها واني اسمع كلماتها

:  هذي فوائد الحمل .. اخيرا اكو شي خلاج تكرهين السوك
رجعتها بتكسي ...
وصلت الشقه  ... بدلت ..، ونامت .. النوم عدها صار اهم من الاكل حتى

مر اسبوع على  اخر فحص..
وهيه تدخل الشهر  الرابع

وبليله اشتد عليها الوحام ..والتعب  .. متگدر  حتى توگف ... وترجف
شلتها  ونزلت  للشارع ... ادور تكسي .. الوقت متاخر .. ماحصلت سياره ... مشيت مسافه بيها ... وگفت  يمي سياره ... ودگ هورن. حتى اصعد ... صعدت  روان للخلف
واني يمه
وطلبت منه يستعجل

هوه يسوق واني  مندار عليها 
السايق لبناني ... يعرف طرق مختصره .. وصلنا  لمستشفى

نزلتها. واني  شايلها
شافوها بالممر ... بنات اخذوها
مني ودخلوها  .. صاله وسدن الابواب
وبقيت واكف  امام  الباب  .. وانتظر
... احساسي اكبر من الخوف
ويتجاوز  الرعب
بين الذنب  الي يأنبني
وبين الندم الي  يضربني  بسكين
يقطع  ضميري ...  وكياني

ساعتين  اني واگف بنفس المكان ... واتامل وجوه الي يطلعون منه واسالهم عنها. يردون
(بعدها بالفحص )

مرت ساعتين وعشرين دقيقه
طلعوها  يدفعوها  ... لغرفه صغيره ..، واني اتبعهم
خلوها على السرير.. وطلعوا
بذلت كل جهدي اتماسك  ...وماتنزل دموعي امامها..  واني اشوفها بلا لون
بلا قوه ...
ماگدرت غير  اركع بالقرب من سريرها ... وابجي على كفوفها
النازله من السرير
: روان بيبي ... سلامتج 

ردت بكلمة خايفه رعد ... خايفه حيل

: لاتخافين بيبي  ...اني وياج وماعوفج
بثيت بداخلها الاطمئنان  ...لحد دخلت الدكتوره ... ومعاها نتائج  فحوصات ...
وحجت گدامنا اثنينا

: نسبة كريات الدم البيض عدها قليله... يعني مناعتها منخفضه

: في علاج لهذي الحاله  دكتوره

:  اهنا  العلاج مكلف. ... ومستشفيات  تعاني من كثرة المرضى 

وهيه تقلب الاوراق ... رفعت عينها. وسالتني

:لاحظت جوازها صادر. من امريكا. تگدر تسافر لهناك ؟

: تگدر بس ليش تسافر

: حالتها تدعو للقلق.. وسالتها بغرفة الفحص عرفت  سبق وعالجت من السرطان ..والحمل اضعف مقاومتها.. الافضل تاخذها اهناك ويتابعون حملها من البدايه

روان من سمعت كلام الدكتوره .. صارت تبجي  وتدور على تلفونها  تريد تتصل بامها
وتصيح (  ماما ... ماما )

:اهدي روان  ... الدكتوره مگالت عندج سرطان  ... صح دكتوره

جاوبت وهيه تقترب منها

: الحمد لله ماعدها لكن للاحتياط تعالج اهناك افضل

وجهت كلامها الها
( لاتخافين اهناك يعرفون الحاله اهنا بس بهذله وهناك علاجح على الدوله )

تركتنا  لوحدنا ... صار دوري اشجعها مع ان اني نفسي  محتاج الشجاعه

: روان بيبي حبيبتي .. هسه احجزلج. وتتعالجين. مثل متعالجتي قبل  ... صيري قويه
واتركي الخوف  لخاطري

: شلون اسافر. وانت تبقى اهنا

: لاتفكرين بيه .، مجرد. اصلح ااموري اسافر بعدج

بين عنادها تتركني ... واصراري تسافر  .. ماوصلنا  لقرار
طلعنا من المستشفى
وصلنا للبيت
وجدت فرصة   نومها باحضاني
بيها اقنعها بقراري

امر الفراق لابد منه

طفلتي  وحيدتي تحيط بها اشباح الموت
وتحيطني ...
ليتها تبقى... واكون انا الفداء
ليتها تبقى

——————————
ملاك

اول يوم زواج   الصبح گعدت على اتصال ايه
جاوبتها  وبعدها
غيرت ثيابي ... بفستان صباحي
قصير  ... ابيض  مع دانتيل  اصفر  حول الصدر  ..والخصر

ونزلت من غرفتي.. تصورت واثق خارج البيت ...
لكيته بالمطبخ
اول مشافني انزل.. ابتسم  وهو لازم گلبه  
: صباح الخير   ..، گلبي   راح يوگف من شوفتج

رديت بابتسامه و
: صباح النور.

شفته  منهمك بتحضير الريوگ

: لو مگعدني جان اني سويته للريوك
خلى صحن على الميز.
وباسني بخدي  ورد عليه

؛ انتي عروس. بعدين تگولين شغلني من اول يوم

: ههههه  زين شگد راح ابقى عروس ومااشتغل

باوع على الساعه بايده شويه
وباوعني 
: بعد نص ساعه ورا الريوك

: هههه والله هوايه  شدعوه

الكلام. الي گاله بعدها. ماادري ليش حسيت وقعه ثگيل عليه

: احنا مزارعين لازم نگعد من الصبح
تدرين الساعه شگد گعدت
بالسته

: حيل من وكت احنا نايمين بالوحده

: گعدت شفت الحضيره
تعرفين البارحه الجو بارد خفت الحيوانات تبرد

ملاك اامممم

استمر  يحجي. وبداخلي  احس بالملل لتكون هذي تفاصيل حياتي بعد كم يوم

: وجمعت كم ورده.. وكم بيضه فرش
لريوك عروستي

خلى البيض گدامي
: جربي  وشوفي الطعم شكد يختلف

باوعت اللون يختلف عن اللون المتعودين عليه... اصفر حيل
جربته  امام الحاحه
حسيت اللگمه وكفت بلعومي

بلعتها  غصب  وابتسمت كذب وجاوبت مأيده كلامه
: فعلا الطعم يختلف

: الحليب هذا من المزرعه ايضا

طول مااحنا گاعدين نتريك.. هو يحجيلي عن المزرعه... ومنتجاتها
يحس بالفخر من انجازه  ويحب يحجي بالتفصيل

خلصنا الريوك وبديت اعمالي ..بصفتي زوجه.. ومدبره منزل
اول شي اخذني للمزرعه
لبست جاكيت قصير.. وجينز
وبرجلي  حذاء طويل يلبسوه المزارعين... وعمال الانشاءات

وهو لازم ايدي لان ثلج
فترينا مع بعض وهو يشرحلي
هذي شجر تفاح  هذي مشمش
تثمر بالصيف

وفي شجر عنب متسلق بشكل جميل وتحته اريكه  ايضا بالصيف
تكون  گعدتها  حلوه

واحنا  نتمشى... وطلع  كلب ينبح 
من  الخوف
ختلت وراه

: هاي شنو  كلب  مااحب الكلاب  عفيه وخره عني

: هذا حارس للمزرعه
تعالي اقتربي منه خلي يتعرف عليج حتى مره ثانيه مينبح من يشوفج

: لاتلمس بايدك تلعب نفسي

: هههههه ليش شبيه حيوان مثل باقي الحيوانات

تعصبت  واني  اشوفه. ماسك الكلب. باديه.

: يله نرجع الجو بارد
وحتى تغسل ايديك

: لعد شلون تتعودين على الحيوانات

: ماادري. اني مااحب ااحيوانات
راجعه للبيت تجي ويايه

: حاضر  يله نرجع
راد يلزم ايدي ونمشي مقبلت

: غسل ايدك اول

باوعني وهو مستغرب تصرفي وضحك

: تتعودين  شويه شويه

———————————

رعد

ايام واني اقنع ب روان تسافر وتتركني
ترفض ومصره تبقى ويايه

: روان بيبي  اهنا تتبهذلين ...
وانتي مراح تعوفيني للابد..  كلها شهر اثنين.. اصفي اموري مع بام واجي عليج

: اذا سافرت  راح يحققون ويايه. ويعرفون عنوانك

: بعد متسافرين اغير العنوان اطلع من لبنان لبلد ثاني

بعد  مانفذت الاعذار  عدها  طلعت  عذر  جديد

: ملاك راح تذلني. وتسمعني حجي

: اني اتصل بزوجها واخلي يحجي وياها

: مااكدر بدونك   مااگدر

: واني هم مااگدر  بس صحتج اهم 
والمحامي اهناك يتصل بيج ويفهمج شتگولين
واني راح اشتغل ليل ونهار. وادزلج كل الي تحتاجيه

: ماادري شكول خايفه ليكون سفري بداية فراگ للابد

رعد: لاتصدگين نفترق. وعيونج وغلاتج. نلتقي ونعيش سوا

راح اتصل ب واثق  واحجي  وياه وبعدها  احجزلج اوكي

: لا اني اتصل ب ايه
وهيه تحجزلي

: لا بيبي اني احجز. عندي فلوس

————————-
ايه

بعد  يومين  من سفره ..، دز  رساله بالليل
واني  سهرانه  لوحدي  اتفرج  تلفزيون   فتحتها

بلا ميسلم  كاتب

: شوكت  ترجعين

ماادري شرد عليه ... نسخت رسالته  الاخيره
ودزيتها. اله

اتصل بيه. وهيات نفسي  لمزيد من التناقض  الي راح اسمعه  منه
سلم 
: شلونج
: بخير  ... ليش  تسال شوكت ارجع  ... ناسي گتلي  براحتج

: وراحتج  بعيد  عني

اكثر من هال استفزاز  مااگدر  اتحمل 

: طلال  انت  راح  تخبلني  ماادري اذا  متقصد  او متدري  لكن صدك راح اتخبل

قاطعني

: هاي شبيج  اشو  من يوم زواج ملاك. وانتي متغيره 
اني كتلج  راح اتعالج
گتلج لو. لا
اصر اجاوب وهو يكرر جاوبي گتلج  لو لا

: گتلي 
: يعني منو الغلطان  اني  لو انتي
شيصير  اذا  تنتظرتي 
بلا  متجرحين نفسج وتجرحيني

بكل  كلامه. طلع هو صاحب الحق   واني  الغطانه
سكتت  مع اني مامقتنعه
طلبت منه ابقى  كم يوم

اني باقيه كم يوم يم ماما لحد ملاك تشوف وضعها

: كم يوم شگد يعني

ايه : من ترجع من المباراه تلگاني بشقتك

: اكيد  لو  تغييرين رائيج

: لا مااغير رايي 

ظلينا  نسولف. مثل اي غريبين
يسالني. وين رحتي
وخبرني اتصل بواثق وباركله
ودز  هديه الهم 
واني حجيتله عن غدانا 
بنهاية الحديث  سديت التلفون
ارسلي ملصق  بوسه
شفته ماادري اضحك ماادري ابجي
هوه اني يمه ميبوسني ...

(زواج الملصقات. جديد الظاهر
اختراع  طلال  ...وايه )
هذا  الكتبته  ودزيته

تعبت  ... وتعبت  كل خلية  احساس  داخلي  ...واي شعور  بالانوثه  فقدته ... واهملت  نفسي  ...وحالي
وصار  الانشغال  بالتفكير. بيه اصبح  تحدي. اقاسيه يوميا

واهرب  من تصديق  رسائله ... وعوده  بالعلاج 

واحنا  راجعين  من. المزرعه  اني وماما  وصديقات ملاك
حتى  نبارك  لواثق وملاك
الي  شكت  اليه. من شعور  الوحشه .. والاشتياق  للمدينه
وبدوري  نصحتها. تصبر  واكيد. تتعود
واحنا  راجعين  ... وامام بيتنا
طرد  بريدي  ... نزلت من سيارتي .. وماما  ويايه
اخذت الطرد ... وفتحته  داخل البيت
وجدت. عقد   ماس مع خاتم 
ابيض 
مرسل من طلال. فرجته  لماما
الي فرحت  بيه وهيه  تدفعني اسافر  عنده

:بس ماما. مگلي  راح يودي هديه  ... وهيج شي غالي ميندز
بالبريد
ماما وهيه تساعدني  البسه  تحليلها. كان قريب. من الحقيقه. وبعيد  عنها. ...

: شيسووي  يريدج  تستعجلين  بالرجعه

ماگدرت اصحح  جملتها  واگلها
( يريدني  ابقى صابره  وساكته)

لبست  العقد  واستقر  على جيدي 
وتحسسته  قطعه ...قطعه
وتحسرت  على  اشياء  يهدينياها بلا مااحتاجها
ويبخل عليه باشياء  محتاجتها

صار لازم  اتصل بيه  ... واعتقد كان ينتظر. اتصالي  لذلك جاوب بثقه

: ها. وصلت الهديه

: وصلت ... شكرا حبيبي  ولو مگتلي

: لو گايلج تظلين تدردمين ومتخليني  اشتري  مثل ماسويتي من اشتريت سياره

: غير خايفه عليك ... فلوسك دتجي بتعب  .. وبهذله  ... المفروض نخليها  بشي مفيد

: اعرف قصدج البيت  ... تدللين
اشتريلج بيتين مو واحد

: الله يخليك اليه 

سكتت بانتظار  السؤال  الي اعرفه

: شوكت  تجيين ... باقي لوحدي اهنا. والمباريات تاجلت  لان في  اصلاحات بالقاعه

: مدام هيج تعال انت اهنا.
خطيه ماما  تبقى لوحدها

بعد  اقناع  وافق  يجي كم  يوم

وصل الساعه  عشره  باليل
اول. وصوله. سلم عليه وعلى ماما
ونزل  للبسيمنت  ...
نفس  النومه  بمكانه  ونفس الهروب مني
وين الاشتياق ... ليش يلح نكون سوا ... سالني عن. ملاك وضعها
وجاوبته. زينه
وسالته عن علاجه  .. اختصر  الجواب  بكلمة  ( داعالج  )

هو  عنده طبع  مواعيده المهمه يسجلها. بالمويايل  حتى. ماينساها  ... ومن  نام  فتشت  تلفونه  مابيه موعد  دكتور

وصرت  على  يقين  ماعنده اي مرض 

وبالمقابل. تركت  اي محاوله
للتقرب منه 
تشبعت  بالرفض ... وصحيت من سراب اسمه طلال

أأدي  واجباتي  اله  ...ولماما
وبدون ماانطق كلمه زايده عن الكلام المعتاد

:

واني. منهمكه  باعداد  الولائم
والطبخ. اتصلت. روان 
صوتها  واضح  مريضه

: هلوووو روان شلون صرتي

: مريضه كلش وحولوني لفحص السرطان شهريا

اخذت. التلفون. للبيسمنت  خايفه  ماما تسمع  وجاوبتها

: روان كافي اعناد. ارجعي بسرعه لاتخاطرين بحياتج رعد
رجال يعرف يتصرف
وهسه اخلي طلال يشوف محامي عربي... وتدرين المحامين العرب شغلتهم يحتالون على القانون الامريكي

تبجي. وتجاوبني  بخوف

: راح اجي وخايفه من ماما
وملاك يأذوني

: وروح بابا  محد ياذيج واذا ماعجبج الوضع بيتنا اخذج ويايه لشيكاغو  يله ياعيني انطيني رقم جوازج خلي احجز اليوم

: لا رعد يحجز. واني اتصل بيج انطيج رقم الرحله

: اوكي انتظرج

سديت التلفون  وطلال  سمع المكالمه. وشفته  شال مفتاح السياره

: اخذني على المركز العربي اسال على محامي

: اوكي اني ماعندي شي

: بس افهم ماما وانطيها خبر

ماما گاعده بغرفتها  تصلي گعدت يمها ورا مخلصت

: ماما روان حامل وحالتها خطره
ضربت صدرها

: يمه بنيتي شبيها

: محوليها فحص سرطان
زوجها راح يحجزلها وتجي اهنا
اني باقيه يمكم لحد اشوف وضعها

: يعني تجي لوحدها وذاك النذل راح يتركها

: ماما المهم روان معلينا بيه هوه

گمت داطلع  سألتني ( وين رايحه )

: طالعه اشوف محامي

داطلع تذكرت اوصيها.

:ماما من تجي  لا  تسمعيها كلام جارح عن زوجها وعنها  هاي طفله وحامل ومريضه

: حسبي الله عليه 

: اني رايحه
ادعيلها ماما

اخذني طلال ورحت للمركز العربي
هو مركز كبير يساعد العرب في قضاياهم. ...
گعدت بقاعه كبيره ...انتظر الدور
انتظرت نص ساعه
بعدها نادوني وقعت وطلبت اقابل شخص يفهم بقضايا الزواج
دخلوني على
بنت عراقيه كلدانيه محاميه اسمها ليندا  بالخمسينات من عمرها.  وانتبهت على عدد الشهادات. الي ماخذتها من العراق  وامريكا
رحبت بيه بكلمة
:شلونج  تفضلي بشنو اساعدج

شرحتلها الموضوع كله وجاوبتني

: بالنسبه لروان مافي اي مسؤوليه عليها
وانصحكم. تخلوها تنكر علاقتها برعد

: والطفل شلون  مراح يحولوها فحص

ضحكت من كلامي وفهمتني

: فحص شنو بنتي. هذي لو هيه طالبه الشكوى عليه وتدعي الطفل منه
تجي اهنا تگلهم الطفل من علاقه بشخص مااعرفه.

: في ادله همه متزوجين مثل وجودهم اثنينهم بلبنان
صور عند زوجته ل اختي ابدلة العرس

ليندا : الصور دليل مو قوي اي بنت تلبس بدله تتصور بيها
بس وجودهم بنفس البلد هذي مشكله

: شنو الحل ست

فكرت وهيه تبحث بالكمبيوتر امامها  واصرت على جيتها

: خلي تجي اهنا. ونتابع الامر
وتنكر علاقتها بيه  ...وتدعي كانت معجبه بيه.. وانهزمت منكم حتى اتلاحقه وخاصة هو واصل قبلها
وهناك تعرفت على شخص اقامت وياه علاقه وخلص

كلامها غير مقنع وراح يرجعنا  لكلام الناس. واحاديثهم

: ست هذا الكلام صعب تكوله ننفضح امام العالم

: بكل الاحوال تتفضحون
احنا مدينه عربيه نحب الفضايح

قبل لاطلع منها انطتني اوراق اوقعها حتى اوكلها محاميه وبالاثناء اتصلت روان خبرتني برقم الرحله وتاريخها بعد يومين

والمحاميه عرفت برقم الرحله

؛ راح اكون موجوده وياكم
بالمطار اخاف تتعرض ل اي مسائله

واني اودعها  واسلم عليها. سالتني عن رعد

؛  : اتصل بزوجته مباشرة وحجى وياها فهمه مستعد يتنازل عن كل املاكه مقابل تتنازل عن الدعوه

: مااعرف  اساله
بس ليش هالسؤال

: عندي شك ان الي ديحرك زوجته شخص غيرها شخص يريد يستفاد وياخذ املاك رعد

: نحجي وياه ونفتهم منه

ليندا ؛ انطوه رقمي خلي يتصل بيه

: بسيطه ان شاء الله

طلعنا اني وطلال الي گلي

: اني وياج  بكل خطوه   ... وحتى المصارعه أأجلها  لحد  نشوف حل

: طلال انت مقتنع بكلام المحاميه ان تنكر  زواجها

كلامه  قنعني اكثر من المحاميه
وهو يگلي

:  لا ممقتنع  ..، رعد. لازم يتحمل مسؤوليه  الي سواه جريمه 

شجعني  ان  منكذب على الحكومه

و هو يسوق ...واني اتصلت بملاك افهمها وضع روان
وعرفت  ماما متصله بيها

؛ ادري ماما اتصلت بيه
راح تجي وين تسكن

: تسكن ابيتنا بيت ابوها محمد نسيتي شنو ...البيت اشتريناه من ورث بابا يعني بيتنا كلنا

: مو هذا قصدي  اقصد الناس وحجيهم  ديربون مينظم بيها خبر  ورعد النذل مبين راح يتركها. وينكر الزواج ويرجع ل مرته وحياته بكليفورنيا لان خلصت رحلة الونسه

: بغض النظر عن رعد وعن رائيج بيه هذي اختنا 

: ايه  اول متوصل روان جيبيها للمزرعه  ونبدي فحوصاتها وعلاجها 

: هيه خايفه منج. واني اخاف  واثق ميتحمل وجودها  واكيد ماما راح تجي وياكم

: واثق انسان طيب  وميرفضلي طلب وهو يريد ناس قريبين يمه

: خلي يمر شهر عليكم حرام علينا نحرمه من ايام زواجه

: لاتخافين اصلا هو ثاني يوم نزل للمزرعه وبعد كم يوم يداوم بالدائره

: اوكي لعد اجيبها افضل ماتسمع حجي جارح من الناس وفضولهم  وتطفلهم

وصلنا للبيت ماما محولتها مناحه وتتصل بروان الي صوتها بالبجي  گدرت اسمعه والتلفون بايد ماما

گعد يمها طلال وطلب التلفون من ماما

: حجيه ممكن اسولف ويه رعد
انطيني التلفون

سالته  اني  ليش

اخذ التلفون... واشرلي اصبري

طلال
المكالمه ردت افهم ...رعد شنو
هل فعلا يحبها... ام راد يضحك على طفله ...كم يوم ويتركها على اهلها يبتلون بيها
حتى اعرف منو نساعد... وعليمن نقيم دعوه

اخذت التلفون وتحدثت وياه

:شلونك اخي  وضعك شلونه

: الحمد لله بخير
جنت اتمنى اتعرف عليك بضروف افضل

: ان شاء الله  تجوون اهنا ونتعرف اكثر

وبعد السلام  حاولت اعرف نواياه  بالسوال عن صحة زوجته

:الدكتور بلبنان شنو گال عن وضع زوجتك

؛ بصراحه نصوحني اسفرها ل امريكا  يخافون  من ضهور السرطان عدها

: اخاف هذا مستشفى حكومي وميهتمون بالمريض

: لا يمعود المستشفى الحكومي السرى ميوصل للمريض الا بعد شهر

: طيب وانت متفكر تسلم نفسك

: لحظه شويه انتظر عل خط

: وياك

راح صوته دقيقتين ورجع حجى ويايه

: ها تسمعني. طلعت من الغرفه حتى روان متسمع
بصراحه اني  حاجز بعدها بيوم  بدون متدري
واخواني ينتظروني بالمطار. حتى اسلم نفسي
مااگدر اترك زوجتي تصارع المرض لوحدها

لو  كان  كلامه صحيح  اذا  مهتم بيه  ومقاصد  يتخلى عنها

: طيب ليش متتصل بزوجتك وتتفاهم وياها  تتتازل عن الاملاك مثلا وهيه تتنازل عن القضيه

: اتصلت  ماحصلتها ارقامها كلها متغيره
المحامي نصحني اسلم نفسي

: اخويه بصراحه احنا رحنا لمحاميه عراقيه وشكت ان واحد ديحرك الدعوى ضدك اتصل بيها وافتهم قبل لتورط نفسك وتجي

: انطيني الرقم

انطيته الرقم  وسديت التلفون
وحجيت مع ايه

: ترى مبين يحبها  وحاجز بعدها بيوم يسلم نفسه

: اني هم عندي احساس ان يحبها لكن تصرف بغباء
ويمكن رفضنا لزواجهم دفعه لهذا التصرف

: اذا لازم الكل يوگف وياهم
احنا عشنا الحب وعرفنا جنونه

ايه

ماادري يريد يخبلني بحجيه
الي يسمعه يگول شلون عايش جنون الحب بحيث الجرايد دتكتب عنا

خلصوا اليومين   ... واحنا نرسم خطط ونلغيها
خايفين من الحكومه ... ومن الناس ... ومن مرضها
بيوم ثلاثاء العصر  توجهنا للمطار نستقبل  روان
ماما ...وطلال.. واني

وصلنا قبل الموعد بساعه ماما گعدت على مصطبه  واني وطلال نفتر
وبها الاثناء وصلت المحاميه  الي نصحتنا بالهدوء وعدم جذب الانتباه
وصلت  روان  ... بيدها جنطه صغيره  ...
شفناها  تتوجه علينا الدموع نزلت  منا تلاثتنا  لونها اصفر  ...عيونها غايره. ..وجسمها عظامه مبينه من خلف الثياب
ومن حضناها... اني وماما بجت حسيت اعظامها تصدر صوت

: لج شصاير بيج مجنتي تاكلين شنو

: ساله سل ابن الكلب

اخذ طلال الجنطه منها وهو ينبهنا على كلامنا

: كافي من هالحجي
حمدلله على سلامتج عمو روان

: الله يسلمك شلونك

واحنا نطلع طلال مقبل تروح للمزرعه
: اني اكول ناخذها للبيت هسه ترتاح طريق المزرعه طويل وهيه تعبانه

: افضل خليها بالبيت

المحاميه كانت ويانا سلمت عليها. وتاكدت طلعنا بدون اي تحقيق

اخذناها بالسياره...  وياها جنطتها
الطريق كله اريد امنع دموعي. مااگدرت
وهيه نايمه بحضن ماما الي تمسح على شعرها
——————————
رعد

سافرت.بعيد عني
دموعها وگعت على ايدي واني احاول ابعدها عن حضني
اخر كلمه سمعتها منها
احبك
ورديت عليها
واني اموت عليج بيبي

رجعت للبيت افتر بيه...  وكاتم صرخه داخلي
مشطها على الارض  ...ودولي الدبدوب تاركته على السرير
اخذته بحضني. ...دموعي نزلت عليه ...واني اشوف صورتها حاضنته
وسط دعاء... وبكاء... خلصت ساعاتي انتظر اتصالها تگلي وصلت
اتصل بيه طلال خفت لتكون مريضه

: لا مو مريضه الحمدلله وصلت بس الاتصال يمكن ياثر عليكم منا وجاي اتصل ب ايه
او بيه او ام ملاك

سد التلفون  المفروض اسافر بعدها بيوم المحاميه العراقيه ليندا
نصحتني اسافر لكندا وادخل امريكا سر بدون علم اهلي   او  المحامي  الي بكليفورنيا
حولت سفري لكندا... واستعديت للسفر  على الاقل اكون قريب منها
—————————