رواية نوفيلا الوقوع في الغرام الفصل الأول 1 - بقلم هند الحجار

_أيوا يعني انتوا خاطفيني هتعملوا بيا أي افهم بس! كنت قاعدة في عربية كبيرة لونها أسود بصلي واحد منهم وقال بزعيق: _انتي مبتعرفيش تسكتي من ساعة ما ركبناكي العربية وانتي نازلة رغي رغي. قولتلك هتعرفي كل حاجة أما تقابلي الكبير بتاعنا. قولت وأنا باكل الساندوتش اللي كان معايا: _أنا معرفش يا خوي انت معصب نفسك ليه وانت شبه حسين فهمي كدا. ما تخليك زي صاحبك اللي سايق العربية ده شوفت هادي وجميل إزاي. صاحبه

بصلي بابتسامة لطيفة وقال: _تسلميلي يا قمراية أنا فعلاً اسمي هادي. ضحكت ليه وقولت: _اسم على مسمى سبحان الله. مديت إيدي ليه بالأكل وقولتله: _تاكل؟ اتكلم وهو بيسوق: _شكراً يا قمر لسه واكل. كان بيبصلنا التاني وعنيه بتطلع شرار. اتكلم وهو بيحاول يكتم غيظه وقال: _هادي إحنا خاطفينها يا حبيبي مش رايحين نفسحها اتلم شوية. اتكلم هادي وهو بيبتسم: _والله دي شكلها لطيف يا لؤي. أول ما سمعت الاسم ضحكت وقولت:

_كمان اسمك لؤي والله ما باين عليك. بصلي وقال: _وحياة ربنا أنا لولا الكبير عاوزك حية لكنت قتلتك وارتحت منك. بصيت بطفولية وقولت: _شوفت يا هادي صاحبك عاوز يقتلني يرضيك؟ اتكلم وهو بيبصلي: _مليكيش دعوة بيه هو كدا غلس. اتكلمي معايا أنا بس. ضحكت وطلعت للؤي لساني. راح مطلع المسدس ووجهه لدماغي: _وحياة ربنا شكل موتك على إيدي. بلعت ريقي واتكلمت بخوف: _في إيه بس يا عم لؤي اهدى كدا. اللي انت عاوزه هيحصل يا باشا. قال ببرود:

_مسمعش صوتك لحد ما نوصل فاهمة؟ _عيوني ليك يا بابا والله ولا هنطق بولا كلمة. نزل المسدس من عليا وحطه في جيبه وأنا ساكتة وبدعي ربنا إنه يعدي الموضوع ده على خير. _يارب كان لازم أخرج في الوقت ده أشتري شوكولاتة. ياريتني كنت سمعت كلامك يا ماما. دي آخرة فعلاً اللي مبيسمعش كلام أمه. بيغرق. واديني وقعت في واحد تركي والتاني هندي باين وشعره سايح كدا. يا ترى الكبير عامل إزاي؟

هاار أسود ليبيعوا أعضائي ويموتوني. أنا عارفة إن حظي. هي آخرتها هموت. كنت بكلم نفسي وبقول الكلام ده. لؤي بصلي وهو بيبرقلي. أما هادي فكان بيضحك. بصيت للؤي وحطيت إيدي على بوقي: _اهو اتكتمت خلاص. الجو كان هادي وأنا الصراحة كنت تعبانة أوي. والوقت كان 12 بالليل. لقيتني نمت من التعب. بعد شوية سمعت صوت حد وهو بيصحيني بهدوء. فتحت عيوني لقيت هادي: _قومي يلا يا هند وصلنا. قولت بنوم: _سبيني شوية بس صغيرة. اتكلم وهو بيضحك:

_لؤي هيجي يقتلني ويقتلك. قومي بقاا. فتحت عيوني علطول وقولت وأنا بدور عليه: _إلا هو فين صحيح؟ قال بهدوء: _دخل جوا القصر. يلا بقاا. طلعت معاه لقيت نفسي في جنينة كبيرة. ده إيه ده أنا في الجنة ولا إيه؟ إيه الحلاوة دي كلها. قولت وأنا ماشية مع هادي: _بقولك إيه ما تخطفوني عندكم علطول. هادي ضحك عليا وقال: _لا ما انتي شكلك مطولة معانا. قولت وأنا فرحانة: _الله أنا بحب الحاجات دي أوي. هادي قال: _طب أهدي عشان الكبير عصبي أوي.

_هو صحيح مين الكبير اللي عاوزني ده؟ انتوا هتموتوني ولا إيه؟ ابتسم وقال بلطف: _إحنا مش بنموت حد على فكرة. اطمني. كنت محتارة أنا فين ومين الكبير اللي عاوزني ده؟ وأنا هنا بعمل إيه؟ وإيه الحياة اللي أنا فيها دي كلها. _يعني إيه تليفونها مقفول؟ ما تعمل حاجة يا محمد. البت راحت فين؟ والله أما أشوفك يا هند لأموتك. لأن أنا قولتلك متنزليش في الوقت ده. وإنتي طول عمرك قاطعة قلبي ومبتسمعيش الكلام.

_متقلقيش يا ماما أنا هنزل أدور عليها. ولو كدا هبلغ القسم. هنلاقيها إن شاء الله. اتكلمت الأم بحزن: _يارب. روحتي فين بس يا بنتي. قدام باب القصر. كان مليان حرس كتير وفي كل مكان وكل واحد ماسك سلاح. قولت بخوف: _يلهوي إيه ده؟ بني آدمين دول ولا ديناصورات؟ هادي اتكلم وهو بيمسك إيدي: _متخافيش. تعالي. وفجأة باب القصر انفتح لوحده قدامي. _يا حلاوة! ولاد الباب اتفتح لوحده.

دخلت جوة انبهرت بالجمال اللي أنا ماشية فيه. إيه ده بجد السلم كأنه معمول من دهب. ده أنا أكيد بحلم والله. شوفت لؤي واقف جنب واحد واقف بظهره. قولت: _وحشتني والله يا لؤي. انت كنت فين يا راجل؟ كان ساكت ومش بيضحك. قولت لهادي بهمس: _ده صاحبك ده كئيب أقسم بالله. هادي اتكلم بنفس الهمس: _بس عشان الكبير بيسمع دبة النملة. فجأة دور وشه ليا وقال: _ازيك يا هند. عاملة إيه؟ بصيت بصدمة كبيرة. و......