رواية نصف شهر عسل الفصل الأربعون 40 - بقلم غزل الحجامية

❣

وعيوني چن قاصة طفل

دمعه اعلى دمعه اجبرها

يوميه المها من الصبح والمغربيه اكسرها
،
،
،
راحت خالتي بوسط دموع منير واطياف وزهرة ومريم وسعد وكل الناس الي موجودين

دافنه وجهي بيدها وابجي راحت اول امل اليه عرفت بوقتها ليش جنت خايفه بديت اذكر كل سوالفها من تحجي وياي واسمع صوت منير يبجي ويصرخ

بقينه حاضنينها ونبجي ماعرف شسوي لحد ماجه سعد شال منير وطلعه والنسوان يبجن وينعن

اجتني مريم شالتني من ع خالتي وكعدتني ع الكرسي

مريم موزين عليج هيج ريحانه قوي نفسج

باوعت من الباب شفت اسد علي واكف وبيده التليفون يخابر اباوع ع خالتي الي نايمه واطياف مقابيلي تبجي بهدوء

وزهرة الي طلعت وره منير والنسوان الي يبجن

احس راسي يريد ينفجر ماكدرت اسيطر ع نفسي لحد ماوكعت من الكرسي واخر شي شفته وجه اسد علي وهو لازم وجهي بيده

ويريد يشوف شبيه

ماحسيت ع نفسي تخربطت كعدت لكيت نفسي نايمه بالمطبخ واسد علي يكعد بيه والنسوان داير مدايري

كمت وحضنته لاسد علي وهو همين وبقه يهدي بيه النسوان يدرن بي اخوي فماستغربن بقن يصبرن بيه والعياط كل شويه عالي

غلست وكمت لازم اقوي نفسي الراحن هواي بس شسوي كمت دموعي تجري عشرة عشرة وكمت للبيت شفت منير كاعد بالحديقه رحت يمه كعدت مقابيله

لزنت ايده وهو يبجي مثل النسوان
شافني وكام يحجي وياي ويبجي

منير راحت امي ريحانه راحتت راحت الي توصيني عليج راحت راحت واني بقيت وحدي اووف يايمه كسرتي ضهري بروحتجج

راحت امي ريحانه طبيتلها اكعدها حتى اخليها تحجي وياج بس ماقبلت تكعد ريحانه ماقبلت

ماتحملت حجيه كبل لطمت ع رجلي وبجيت ويا وهو يحجي واني احجي

اجتي مريم شالتني وطببتني للمطبخ وبقت تحجي وياي

ع انو اصبر نفسي ومحد للبيت غيري وخلي منير يكوم ولا اضعف

كمت غلست بس دموعي مايوكفن امشي واذكر حجيها

رحت يمها ردت اقرالها قران بس مكدرت احس النزيف رجعلي

رحت للحمام وصدك جان اكو نزيف غسلت وطلعت

شفت اطياف ع كعدتها

نطيتها القران وصارت تقرة يم راسها

واني كاعده يمها واباوعلها وابجي اوف ياخالتي رحتي بوقت ماردتج ترحين بي

كومي خالي جبتلج اسد علي موكتلج اجيبه يتعرف عليج جبته وياي كومي اتعرف عليه

ادري بيج معدله ماتعوفين ضيفج هيج عفتينه ورحتي

كملت اطياف القران غطينه خالتي وطلعنه منها بالهول والنسوان يتصارخن اني مكدرت لزمت بطني وكعدت ع الدرج وابجي بهدوء انتبهت للملابس الي اني لابستهن كمت رجعت للغرفه الي بيها خالتي

بقيت اباوعلها وابجي واحجي وياها نمت يم رجلها وبقيت اعاتب بيها لا ساعه ولا ساعتين لحد ماطبتلي وحده وخلتني اطلع طلعت ملابس سود وياي

طبيت للحمام بدلت وطلعت شفت اسد علي واكف بالحديقه اشرلي

رحتله

اسد علي شدي حيلج الكل محتاجج لاتسوين هيج بنفسج لخاطر ابنج موززين

ريحانه ان شاء الله انته راح تروح

اسد علي اي خابرت امي كالت باجر نجيها لانو يمنه خطار اني اروح وباجر من الصبح اجيبهن انتي محتاجه شي هسه اخذج للدكتور

ريحانه لا بخير مابيه شي روح انته ارتاح

اسد علي ان شاء الله

..خله ايده على جتفي وطلع بقه يباوعلي وطلع

..

رجعت شفت زهرة واطياف كاعدات سوة بالمطبخ ويحجن

اطياف كله من عدنه كله

زهرة يمعودة اسكتي قضاء وقدر امر ربج شتردين نسوي يعني وعمتي جبيرة

اطياف اووف يايمه سامحيني ولا ماستحق اكلج يمه اوووف مني اووف

...

ريحانه بقيت صافنه ع حجيهن شقصدهن يعني رحت بسرعه طبيت للمطبخ وطلعت الادويه مالت خالتي

ردت اشوف ماخذه علاجها لو لا واني اعرف العلاج مالت كل يوميه

طلعت الادويه ع حطتهن ممنطياتها علاجها دموعي صارت مثل الدوش ع خدودي

الله واكبر صدك عود امي مانطيها علاجها وادري بيها البارحه جانت تودع باوعت ع الطباخ ممسويات عشه ولا غده مبين لانو لو مسويات

جان باقي منه باوعت ع سله الزبل علب مالت اكل من بره

لطمت ع خدي يعني من رحت لاهلي من لصبح لحد مارجع منير حتى مطابات يمها اووف ربي شهل ناس

درت وجهي عليهن كبل

ريحانه منو منجن نطت علاج خالتي

.. بقن وحده تباوع للثانيه واطياف تبجي وساكته

.. زهرة اني نطيته الها

ريحانه لا تجذبين العلاج ع حطته ممنطياتها علاجها ولجن حتى غده يمكن ممغدياتها

زهرة انتي شتحجين شبيج خرفيتي شنو قابل حتى ماننطيها علاج وغده هاي بتها واني جنتها

ريحانه بيش ساعه غديتنها

زهرة ها بحدود ال12

ريحانه متاكدات

زهرة اي متاكدات

... عرفتهن جذابات واحلف عليهن بوقتها ممطياتها لا علاج ولا غدة

شويه وطبو سعد ومنير صعدو فوك وزهرة صعدت وراهم واني بقيت كاعده وابجي كمت
سديت الباب عدل عليها واذكر وصيتها اليه وحجيها وياي بهيج مواقف الواحد ميعرف شيسوي بقيت اتصفن بالوجوه

شويه ونزل منير لابس دشداشه سوده وسعد لازمه وراهم بشويه نزلت زهرة وهم لابسه اسود وبيدها دشداشه سودة وطبت للمطبخ لاطياف

وره مانزلو النسوان راحن كلمن لبيتها لانو كالو ورة الفجر ناخذها نغسللها وندفنها وصدك بقت خالتي

ي بالغرفه واني كرهت روحي بسبب النزيف مالتي اريد اصلي واقره قران الها قبل لا ياخذونها

كمت للحمام شفت النزيف متوقف كيفت كبل سبحت وطلعت اتاكدت النزيف متوقف ساعه 2 باليل منير يشرب جكاير يم باب خالتي واطياف مكابلته وصافنه وزهرة صعدت فوك

طبيت اني يم خالتي منير من شافني طب ورايه

اول ماشفتها مغطايه ومغطين وجها كبل نزلت دموعي شلت قرانها وطلعت سورة يس وواقراها ع راسها وي كل كلمه دموعي تنزل

ومنير يم رجلها نايم وصافن عليها

بقيت اقرة بيات القران ودموعي تجري لحد وقت الاذان وسمعنه صوت السيارات الباب مالتنه مفتوح طب اسعد واخوته

اسعد يله خويه خلي ناخذها نغسيلها

تكابلو عليها واني واطياف نصرخ يمها من شالوها نزلت زهرة شافتنه وسكتت وكفت يمنه

واطياف ادك ع صدرها وتبجي

اخذوها ومنير يصرخ مثل النسوان يمها

طلعت بقينه بس اني واطياف وزهرة اني طبيت لغرفتها بقيت صافنه ع فراشها

بس شسوي لازم اقوي نفسي البيت محد اله ومنير منتهي لازم اقوي نفسي هسه والغرفه بيها فلوس منير وفلوس خالتي لازم انتبه

كمت رتبت الغرفه واخذت المفاتيح وقفلتها وطلعت منها بقيت بالمطبخ فرشت البيت ورتبته وحضرت بخور

غطيت التلفزيونات الي بالبيت ضميت كلشي منحتاجه بالمطبخ

شلت الكراسي من الحديقه بس شنو امشي بالكوة يعني بالساعه يله اكدر اتحرك

واطياف كاعده ع الدرج وزهرة صاعده فوك بغرفتها اشويه واطياف لحكت زهرة بقيت اني جوة ارتب بالبيت واحضرة

فاتحه وناس يعني البيت يصير هوسه خليت الغراض الي منحتاجهن بغرفت خالتي حتى اقفلها باوعت للساعه ساعه 7ونص الصبح

ومنايمه اني وبجي احس روحي راحت مني

ل8 وبدن النسوان يجن وزهرة واطياف نزلن

بس اطياف شكلها متغير يعني جانت منتهيه ع امها هسه احسها لا بس كلت يله احسن لازم تقوي نفسها وجهالها احوي وي عمتها كامت غسلتلهم

شويه وطب رجل مريم كال اكو جدورة فوك ع السطح خلي انزلهن يستفاد منها الطباخ

صعد هو ولد ويا نزلوهن وطلعوهن شويه والجادر انصب بالفرع ع طول الفرع

والطبخ يصير بالحديقه مالت جيرانه مايسوونه يمنه لانو النسوان يمنه

من كملو نصب الجادر جابو خالتي طب منير شايل التابوت هو واسعد وياي اثنين ولد النسوان ركضن ع التابوت يعيطن ويبجن ومنير فارش روحه ع التابوت ويبجي

كعدت يم منير وابجي وانحب اوووف ياخاله مو يومج هذا

شالو التابوت وماقبلو اي وحده تروح من النسوان كالو ندفنها بس ام اسعد مقبلت كالت حبايبها هواي ولازم يودعنها

وايعد قبل كللها بس مو كلهن راح اجيب سيارة ع كد 8 نفرات

شويه وطلعو التابوت والصريخ مالتنه والبجي يخلي العدو ينقهر علينه وخالتي خوش مره وحبايبها هواي

طلعو التابوت ورحت اني كعدت بالمطبخ وابجي بهدوء واباوع ع النسوان

ام اسد واطياف وعماته لمنير وكم وحده من الجيران كالن نروح وياها اني ردت اروح بس كلت اشلون وهنا منو للبيت وزهرة ماتعرف شي هنا كلت ماروح واني من شالو التابوت ودعتها

شويه وطب منير اجانب للمطبخ

منير كومي نطيني مليونين

ريحانه اي تدلل

كمت بالكوة فتحت الباب وزهرة تباوعلي طبيت وطب ورايه منير طلعت فلوس وهو يحسب واخذ الفلوس

منير ديري بالج ع الغرفه وخلي المفتاح بيدي راح نحتاج بعد

ريحانه ماشي

اخذ الفلوس وطلع قفلت الخانه وطلعت اني زهرة تلكتني من الباب

زهرة نطيني المفتاح

ريحانه ليش

زهرة شنو اليش انطي اليه اني انطي لمنير من يحتاج فلوس

ريحانه لا حبيبتي لا تعبين نفسج الفلوس امانه يمي ومنير كال خلي المفتاح بيدج ومووقته هل حجي احنه بيا حال شو وخري

ابتعدت منها واني الالم اموتنيطلعو يدفنونها لل12 يله اجوي والجادر بعده مابيه ناس هواي حتى مسوو غده والنسولن يطبن ويروحن والي تروح ترجع وياها كومه نسوان البيت قبط نسوان

كامن يصلن جبت مصلايات ودزيت مريم هم دزت الحهال جابو مصلايات وترب يصلن عليها النسوان لانو هواي

طبيت للمطبخ وطبت ورايه مريم

وبقت تحجي وياي لحد ماكالت

مريم يمعودة هو منو جان مداريها غيرج انتي بتها ماسوت الي انتي سويتي

ريحانه ماله داعي هل حجي مريم الله يرحمها ارتاحت

مريم اي والله صدك ارتاحت وهيه جانت مرتاحه وياج مثل اطياف طلعتلج هيه وزهرة من الصبح للضهر يله اجني من سوكهن

ريحانه شنو هاي شوكت

مريم هو البارحه طلعن بحدود ال 11 ونص ورجعن ساعه 3 ونص حتى سعد اتخبل وراد يجي يكتلها يكول شنو تطلع بدون علمي

ريحانه متاكده طلعن

مريم اي واللله حتى احنه مندرري بيج يم اهلج عبالنه باقيه يمها عمت عيني عليها ماتت بدون ماحد يمها

...

مريم تحجي واني كلبي متكطع يعني صدك لا مغدياتها ولا منطياتها علاج زين منير يدري بهاي سوالفهن ماعتقد

حسبي الله ونعم الوكيل بيهن شويه وطبت هبه وشذى وساميه وياهن كم وحده من جيرانه يم بيت ابوي

وهم طبن يلطمن وياهن وحده تنعي وتقرة والنسوان كلها تلطم

طبتلي اطياف حضنتني وتصبر بيه

وراهم بشويه طبو منير وسعد والولد دافنينها ومنا بده منير يصحه ع نفسه ويكوم

ي الزلم طبت اطياف والنسوان وياها

شذى اكلج شلون ماتت وشوكت

ريحانه والله مادري شوكت بس هو اني مو كتلج هيه جانت تعبانه

شذى خطيه الله يرحمها رتاحت بس اشو بتها مادري اشلونها

ريحانه مصدومه بموتت امها

..

بقن النسوان يجن يورحن وصوت السيارات وهوسه مر اوا يوم بالفاتحه هبه وشذى والنسوان

الي خاجن وياها راحن المغرب قبل العشه وجان بابا واسد علي جاي وياهم بس مكدرو يدخلون يشوفوني من النسوان راحو وهبه كالت باجر نجيج

صبو العشه للنسوان واني التعب اموتني منايمه من البارحه لحد هسه وما ماكله شي من الصبح

منهد العشه الي اتعشيته يم اهلي

كعدت زهرة واطياف ياكلن سوه ويسولفن وبس زهرة تحجي اطياف بس تهز براسها صدك حيايه

كعدت اني بالمطبخ اكل وطب منير وصعد فوك للغرفه وصعدت ورا زهرة كملت اكل وكمت للبيت مريم خطيه وخوات زهرة يساعدني بشيلت الاماعين خليناهن بالحديقه

واجوي الولد اخذوهن نزل منير سابح ولابس دشداشه ثانيه وطلع للجادر مالت الزلم

واني بقيت يم النسوان هاي الي تسولف وهاي الي تنعي وهاي الي ساكته

بقيت اني بنصهن لليل كمت اني ومريم طلعنه الفراشات فرشنه للنسوان وام زهرة وبناتها راحن وكم وحده راحت وياها

بقن نسوان هواي فرشنالهن ونامن ومريم خطيه مقبلت تروح

زهرة اخذت جهالها وراحت هم تسبح وهم تسبح جهالها والصبح تجي

لليل بدت الحركه تقل طب منير صعد فوك وصاحلي

صعدتلها لكيته كاعد ع الجربايه ويحسب بالفلوس وطبت ورايه زهرة

منير ريحانه شكد عندج فلوس حسبتيهن

ريحانه اذا وي افلوس خالتي 3 ملاينن واذا بدونهن مليون

منير جيبي بس المليون افلوس امي ضميهن

ريحانه ماشي

منير وانتي زهرة الفلوس الي مخليهن يمج طلعيهن

زهرة شسوي بيهن

منير شنو شسوي بيهن جادر وناس وفاتحه اليوم اول يوم و4 ملايين صارف تدرين لو لا وبعد باجر واجر الطباخ

زهرة اي قابل نصرف افلوسنه كلهن هم دير بالك انته

منير كتلج طلعي الفلوس الي عندج

.. عفتهم يحجون ونزلت اني فتحت غرفه خالتي طلعت مليون واذكرت حجي خالتي الله يرحمها ع الفلوس الي كالت ضامتهن

كلت اصعد هسه وانزلهن حتى من تجي هبه الصبح انطي الها

بس هسه اذا اصعد يحسون بيه خلي ينامون من اكعد الفجر اصعد انزلهن

وصدك نامو واني هم نمت بس نومه طفل اغمض وافتح

لحد ساعه 6 الفجر الضوه طلع كمت صعدت فوك بدون ماحد يحس وكلها نايمه صعدت للسطح

ع كيفي ورحت يم تانكي المي وصدك شفت الكاشيه الي كالت عليها خالتي

رفعتها وشفت الفلوس والذهب ملفوفات بنايلون ضميتهن جوة ملابسي ونزلت محد بعده كاعد

طبيت لغرفه خالتي خليتهن بدشداشه وبعلاكه وضميتهن حتى من تجي هبه انطيها الها تاخذهن وياها

كمت للمطبخ سويت الجاي للنسوان وشويه وطب اسعد ونزل منير من طب اسعد ورا طبت اطياف وعمتها والنسوان
واسعد جايب طبقات بيض

خلاهن بالمطبخ وطلع يحجي وي منير اني خليتهن ع النار كلت اسلكهن سلك النسوان هواي مو مالت اقليهن

شويه جابو الصمون ومريم وياي خطيه كملنه الريوك وصبينه للنسوان والجاي واني سويتلي لفه وكفت اتريك

..

للضهر واجتي هبه وشذى وراها بشويه طبت ملايه وبدت تقرة والنسوان يلطمن

بهذا الوقت اخذت هبه وطببتهغ للغرفه مالت خالتي وقفلت الباب

هبه دحجي يايمه شكوو

ريحانه مثل ماكتلج خالتي قبل لا تموت وصتني عليهن وكالت ماريد احد يدري وهنه هواي اشو وياهن ذهب وماعرف شسوي

هبه زين انطيهن لابنها

ريحانه اني كتلها هيج اسوي بس هيه ماقبلت كالت لا

هبه اوف يايمه انوب وصيه ميت لازم تتنفذ

ريحانه اي اني حضرتهن اخذيهن وياج

هبه بس اني مجايبه جنطه وياي

ريحانه اني اخليهن بجنطه مني

هبه ماشي

...خليتهن وانطيتها الها وطلعنه اطياف وزهرة يباوعن اول ماطلعنه من الغرفه وعينهن اجتي ع الجنطه بس هبه مابيت شي غريب كعدت يم شذى وسكتت

للعصر الملايه راحت ورا ماتغدن النسوان وباجر بالثالث هم تجي

صبو عشه النسوان والهوسه بدت تخف شويه لليل واني بالمطبخ طبت عليه زهرة

زهرة اليوم شنو انطيتي لمرت ابوج من غرفتت عمتي

ريحانه شنو نطيتها

زهرة اني جاي اسئلج هيه اجتي بدون جنطه وطلعت بجنطه

ريحانه قابل شماخذه يعني وشكو بالبيت حتى انطي الها

زهرة والله هذا الشي تحجي وي نفسج

ريحانه الي المفروض احجي وي نفس ع طلعتجن انتي واطياف من الصبح مجايات اله الضهر

ودكولين نطيناها علاجها بوقتها وانتن اصلا مجنتن بالبيت

زهرة شنو شهل حجي منين جبتي

ريحانه شنو قابل مجذبه واسعد يدري والكل يدري بس خلي تخف الناس ونشوف منير يدري لو لا

بقت تباوعلي وعافتني وطلعت

طلعت وراهغ شفتها واكفه يم اطياف وتحجي وياها واطياف صفنت عليه من طلعت من المطبخ وشكلهن مرتبكات

الله ياخذجن مو بشر حتى الحيونات عدهن رحمه مو مثلجن

طب منير واشرلي اصعد ورا زهرة هل مره ماصعدت

ورانه طبيت بقه يحجي وياي ع فلوس الفاتحه وانو راح يداين من اسعد همين والعشيرة اتساعده

بالبدايه كلت اداني لو منطيته الفلوس ال ه عاد فاتحه خالتي ماتصير ع الروس

بس بعدين كلت لا ثواب ه روحها لو شي احسن من هل شي

كمل حجي وياي عفته وطلعت وسديت الباب لزمت بطني ومشيت حتى انزل الدرج

بثواني حسيت ايد تدفعني من ع الدرج

رجلي انلوت بالدرج وايدي لزمت المحجر بقيت احاول ماوكع لازه المحجر بيدي بس فشلت وكعت الدرج كله ع بطني وكعت بنهايت الدرج

بدون ماشوف شي بس اسمع صوت النسوان من يصيحن واباوع ع الدرج نزلت زهرة ومنير يركضون ع الدرج منير بقه يباوعلي وشالني وركض بيه

...

هنا وخلص البارت اتمنى يكون عجبكم

تحياتي

غزل الحجامية