المشكله الكآلك ذِكر
بـ الجآيه وبـ الرآيحه !
وشمآ عبر بيه الوكت
چنك عفتني البآرحه
تآنيتك بـ حيره وحِزن
آب مختلف ويه الآبن
لآ بي يضل مزآعله
ولآ بي يروح يصآلحه !!
غمضت عيني وصورتك
تنشآف كلش وآضحه !!
..
غزل الحجاميه
.
ريحانه لا دخيل الله ماكدر بعد
الحجيه يمه دكومي اشربي شي وشوفي نفسج اشلون تصيرين
ريحانه ماكو خاله ماكو شربت بس مافاد بطني احسها راح تنفجر اخخ يابه اووف يمه وينج
الحجيه يمه شجاي زين عندج نزيف شفتي نفسج عدل
ريحانه اي خاله ماكو نزيف بس بطني اووف بويه ااخ
الحجيه كومي يمه كومي احجي وي منير كومي
ريحانه لا بعد ماتحمل
هيه حجايه وهيه صرخه صرخت محسيت بشي بعد بطني موتتني احس سجينه وبيها وي صرختي طب منير ولزمني
ريحانه اهاا منير بطني بطنييي راح اموتتت
منير شكوو شكوو ش صاير شبيييج
الححيه يمه بطنها توجعها دكول سجاجين بيها كومي يمه اخذها كوم
عافني بالكاع وطلع واني لازمه بطني والحجيه تسمي وتصلي على محمد طب بيده الصايه مالتي والحجاب لبسنياهن كبل وشالني وطلع
منير يمه راح اخابر اطياف تجيي
الحجيه ياي يمه روحو
يمشي ويحجي وياها صعدني بالسيارة واني لازمه بطني والدنيا ليل نقريبا 11 ونص
بس اجواء رمضان بالشارع بقيت طول الطريق اون وابجي من بطني
ريحانه دخيلك منير راح اموووت بطني موتتني اخخ يابه ولج يمه
منير بس اهدي اهدي انتي اليوم شكلتي
ريحانه شكلت شكلتتتت مكلت شي نفس الي اكلتو اني اكلته
منير هو بس السمج اكلتي شي ورا
ريحانه لا لا مماكله من الفطور اخخخ بطني راح اموووت والله راح امووت
يمشي ويباوعلي ويباوع للطريق واني لازمه بطني بوقتها الوجع الي حسيت بي خلاني اكرة روحي
انوب اجواء رمضان ازدحام بس السيارات من تشوفني تعبانه يفتحون الطريق وصلنه للمستشفى نزلني وبيرعه للطوارئ اول مدخلت للمشفى جريت منير ورحت للحمام مثل المخبله
اتقيئت الاكل الي اكلته كله
وانوب مطببه منير وياي للحمامات مالت الناس ولازمته من ايده
منير دعوفيني يمعودة يمعودة عوفيني خلي اطلع واني ولا جني غسلت وباوعتله
منير اشلون صرتي
ريحانه بقيت ساكته لزمني وطلعني للطوارئ فحصوني
الدكتورة سنو تحسين ماما
ريحانه دكتورة وجع ابطني كلش قوي
الدكتورة انتي حامل
ريحانه اي دكتورة
الدكتورة شكد عليج
ريحانه تقريبا 20 يوم
الدكتورة مسويه سونار فحوصات اول الحمل
ريحانه لا دكتورة ابد
الدكتورة لعد شمنتضرة يوم لازم اتسويهن وهاي الاعراض عاديه باول الحمل تصير عند البعض
ريحانه بس دكتورة الوجع كلش قوي يعني تقيئت يله حسيت بشويه الوجع راح
الدكتورة هو هذا اول ثلاث اشهر هيج اعراضهن اني راح اكتبلج مقويات لانو جسمج كلش ضعيف وهاي هم سبب وانتي لازم تسوين تحليلات وتسوين سونار حتى تبدين تحسبين عدل
ريحانه ان شاء الله
منير يعني دكتورة الطفله مبيها شي
الدكتورة انته زوجها
منير اي
الدكتورة لا مابيها شي بس انته دير بالك عليها اول ثلاث اشهر راح تصير شويه تعب لاتعبين وابتعدي عن الشغل الهواي
منير يصير خير العلاج اجيبه الها من برة
الدكتورة لا موجود بالصيدليه الي جوة
ريحانه شكرا دكتورة
الدكتورة العفو بنتي
رجعني بقيت لازمته من ايده وامشي الوجع شويه خف
وانوب اذكرته من طب وشافني بالكاع
ريحانه اكلك انتي شدراك بيه وكعت
منير سمعتج تحجين وي امي
ريحانه شسمعت
منير سمعتها دكلج صيحي منير وانتي دكليلها لا باعي هاي السالفه ماتتتكرر يعني لو طالع اني ومادري بيج شجان صار بالطفله
ريحانه ممتعودة على هل اهتمام
منير مو بيج ابنتي
ريحانه واني امها
منير دمشي امشي الي يشوفج قبل شويه ميشوفج هسه.. وبعدين شنو هل مكياج الي مخليته بوجهج
ريحانه وين اكو مكياج بس مسكارة وكحل
منير اي يعني الي تطلع تخلي مكياج
ريحانه واني شدراني راح اطلع قابل موقته بطني على هيج وقت تاذيني
منير دمشي امشي
رجعني للبيت والوجع شويه بدة يقل رجعنه بحدود ال 1 باليل
ريحانه خابرت اطياف لو لا
منير لا خرب اشلون نسيت
ريحانه دمشي سريع اخاف خالتي تحتاج شي
منير ماتخافين على امي اكثر مني
ريحانه هسه اني كايله شي فاكه حلكي
بقه يباوعلي وركز بالسواقه
منير اذا بنيه شنو تحبين تسمينها
ريحانه شنوو
منير سمعتي
ريحانه انته مو عاجبك اسم هاجر
منير وانتي شعاجبج
ريحانه مافكرت بالاسم
منير يعني ماعاجبج اسم وكلتي اسمي بنتي هيج من قبل الزواج
ريحانه لا بس يعني اكو اسماء تعجبني مثل ابتهال بتول غدير هيج شي
منير شهل اسماء هاي
ريحانه احله من هاجر وين تريد تهاجر
منير ابتهال وبتول يدعن عليج بالامتحانات من يكبرن اول شي يكوموهن هنه
ريحانه عادي شاطرات على امهن يصيرن
منير وشبي ابوهن مو بعينج
ريحانه كلشي مشايفه منه جتى اكول شاطر لو لا المهم منير اني مشتهيه موطه وشفت محل من اجينه يبيع اشتريلي
منير وقت موطه هسه اتاخرنه
ريحانه مشتهيته صار هوواي مماكلتها من تزوجنه لحد هسه
واني احبها يله من توصل اشتريلي
منير غير مره اني اجيبلج
ريحانه شنو غير مره غير اشتهيتها ولا انوب تطلع بوجه البنيه وعيب اشتريلي
منير هسه خلي نشوفه اني مشفت هيج محل
ريحانه لا اني شفت
بقيت اباوع من الجامه على اجواء رمضان الناس اشلون طالعه ومتونسين هذا الي ..
وي مرته وهذا وي اهله واني حضي منير تزوجت واجه رمضان وممطلعني همزين تمرضت عاد طلعني للمشفى
شفت المحل
ريحانه هذا هذا المحل
منير اي اوكفي
طبك السيارة ونزل حتى مسئلني بنكهة شنو ترديين
بقيت اباوع من الجام بعدين غمضت اعيوني اذكرت اسد علي وسوالفه وياي واشلون من جنت اوصي على موطه ويجيبلي لو من يخبث
يجيبها وياكلها كبالي وماينطيني الله يذكرك بالخير ياسد وينك هسه
شويه وفتح الباب منير جاب الموطه خلاها كدامي
اني اخذتها فتحتها جاي كل النكهات فتحتها وبديت اكل
منير انتضري نوصل واكلي
ريحانه لا مشتهيتها
منير اي عادي وصلنه ترة
ريحانه عفتها كدامي نسدت نفسي ولا يخلي الواحد يسوي شغله براحته
وصلنه للبيت
منير هاج المفاتيح واني رايح اجيب العلاج
ريحانه بقيت اباوع عليه شعجب منطانيا مكال تشرد
ريحانه وشعجب شهل ثقه ماتخاف اشرد
منير وين تشردين يعني هذا بيتج ولا تسوين سحور راح اجيب اجبان سوي بس جاي
ريحانه ماشي
ريحانه اخذت المفاتيح وطبيت بيد الموطه طبيت للحجيه بعدها كاعده خطيه
ريحانه ها خاله اجينه
الحجيه هاي يمه شصار اشلون صرتي
ريحانه لا خاله كالو اعراض طبيعيه هاي لانو بدايت الحمل
الحجيه وانتي هسه شتحسين
ريحانه لا شويه قل الوجع
الحجيه الحمدالله يمه نطتج علاج شي
ريحانه اي ومنير راح يجيبه لانو اكو بيهن لازم هسه اشربهن وكالت اروح للدكتورة اسوي فحوصات وسونار حتى ابدي احسب
الحجيه اي شكو بيها اخذي منير وروحي
ريحانه منير وين لا اكوله واخلي اطياف تاخذني هيه قبل كم يوم كالت بس اني كتلها ماروح معبالي شغله مهمه
الحجيه لا يمه اشلون تعرفين اشوكت دخلتي بشهر صحت الطفل
ريحانه راح اسوي جاي لانو منير كال لا تسوين سحور راح يجيب اجبان
الحجيه سويله بس اله جاي اني ماشربه
ريحانه براحتج وهاي موطه جبنه ويانه تاكلين قبل السحور لو ورة السحور
الحجيه لا عوفيها ورة السحور يمه
ريحانه ماشي
طلعت للمطبخ خليت الموطه بالثلاجه وخليت الجاي على النار غسلت وجهي باوعت للمرايه على المسكارة حتى ممبينه الجذاب غسلت وجهي كلش وهو طب
خله الاجبان على السينك
اني بعدني بالصايه مالتي نزعتها وذبيت الحجاب وهو كبالي اجتي عيوني بعيونه يباوعلي انتبهت لوضعيتي الملابس لازكه على جسمي وهو يباوع عرفت قصد امه من دكلي البسي كدامه واحركي كلبه
باوعتله بعدم اهتمام وطفيت الجاي وطلعت خليت الصايه يم خالتي ورجعت للمطبخ شفته واكف يغسل وجه رفعت شعري ورتبت الصينيه مالت السحور
وطلعت الصمون ورحت
ريحانه يله خاله كملت السحور
الحجيه منير وين
ريحانه دايغسل هسه يجي
كعدنه بدت الحجيه تاكل ومنير ماكو
ريحانه الجاي راح يبرد وينه هذا
الحجيه كومي شوفي ياعيني
كمت لكيته يم باب المطبخ يشرب جكاير من شوكت هاي
ريحانه يله منير تعال اسحر
منير ماشتهي
ريحانه شنو ماتشتهي يله تعال صبيتلك الجاي
ومنتضرينك
بس باوعلي شمر الجكارة وفات كعد يم الحجيه واني مقابيله الدشداشه قصير مالتي يعني اذا اتربع كلشي يبين فكعدت عدل
شمر عليه الصايه مالتي
ريحانه هاي شنو
منير ابدال ماكاعده هيج غطي جسمج
الحجيه يايمه قابل من موجود اني وكلشي ماشوف وانته شايف كلسي منها قابل تغطي روحها على شنو
منير اي يمه كلشي شايف
ريحانه شنوو
منير ماكو شي اكلي اكلي
الحجيه شوف اختك وقت فارغه بي وخليها تاخذ ريحانه للدكتورة تسوي فحوصات
منير باجر اخابرها واشوف
الحجيه اي يمه كون قبل العيد حتى تحسب عدل
منير انشاء الله يمه لو تشوفينها بالمستشفى شسوت بيه
الحجيه شسوت
منير ولج يمه سحبتني وراها عبالك طفل وطببتني للحمام مالت النسوان وخلتني واكف وياها والناس تباوع عليه
الحجيه جان عفتها وطلعت يايمه هيه ماتحس من الوجع
منير يمه ردت اطلع بس هيه مجلبه بيدي
ريحانه حقك انته لو شايف الوجع جان عذرتني
الحجيه يمه هيه المره من تتاذة المن تركض غير لرجلها وهيه بس انته يمها خافت لزمتك انته
ريحانه لا خاله مو هيج بس بس خاله والله وجع قوي شكني شك
منير والله كلشي مابيها طلعتها من الدكتورة بقت اداهر بيه وبالسيارة تريد موطه
ريحانه هيه موطه هسه انته شجبتلي
منير معاجبتج اكوم اخذها
ريحانه بالثلاجه بس ماتاخذها اني مشتهيتها
الحجيه بالعافيه كملي سحورج وكومي اكليها .. يايمه هيه المره تحب تطلب على رجلها واشو ريحانه ولا سمعتها فد يوم تطلب منك شي
منير غير ممحتاجه شي حتى تطلب
الحجيه ماكو مرة ماتحتاج يمه الرجال اذا مايسال مرته شمحتاجه شرايدة ماتكله شمحتاجه وهيج معناتها مقصر وياها يايمه
منير يابه محتاجه شي
ريحانه تره ابد مو هيج ابد يعني
منير شوفي يمه هيه متتحاجه
الحجيه يمه الرجال يكل لمرته محتاجه شي وهمه على مخدتهم
منير اي يمه تدللين
بقه يباوعلي بستهزاء واني اباوع للحجيه بكلبي كتلها مدكليلي شبيج هو احنه شوكت نايمين سوة حتى على مخدتنه يكلي شمحتاجه
كملنه السحور كمت شلت الصينه صاح الجامع بعد نص ساعه للامساك
اخذت الموطه ورحت يم الحجيه
ريحانه يله اشلون موطه تخبل
الحجيه الف عافيه يمه اني ماريد ماشتهيها
ريحانه مو كلتي ورة السحور
الحجيه اي بس يمه بطني نترست مابيه اكله بعد انوب اروح اكلها واتعب
ريحانه براحتج
الحجيه اخذيها وروحي يم رجلج خلي ياكل
ريحانه اخذتها ورحت شفته بالاستقبال يباوع على المسلسل
ريحانه منير خالتي متاكل دكول اتريد انته
منير اي تعاي خليني اكل شويه
بكلبي كتله كبر دكول ماريد خليني اصعد اكلها وحدي
رحت كعدت يمه اباوع على التلفزيون واكل واني بالموطه مو طبيعيه اموت عليها من زمان
درت وجهي عليه فجاة شفته يباوعلي
ريحانه ها خير اكو شي
منير خير الي ياخذج شكو
ريحانه تباوعلي مضيع شي بوجهي
منير لا هيج صفنت
ريحانه اممم
كملت عفت الموطه وشفت خالتي ممحتاحه شي كملت كلشي صليت وصعدت فوك بالغرفه
اخذت ملابس كلت خلي اسبح وطبعا رمضان فد حاررة يموت اخذت ملابس نوم وطبيت للحمام بس ذبيت على نفسي مي وطلعت لانو نضيفه مبيه شي
طلعت باب الغرفه مفتوح
طبيت شفته منير نايمه على الجريايه ويلعب بالتليفون
ردت ارجع
منير وين رايحه
ريحانه راح تنام هنا
منير اي عندج مانع
ريحانه لا على شنو اني راح انزل جوة
منير ليش مو كد المقام متنامين بالغرفه وياي
ريحانه مو هيج السالفه بس انته تنام جوة من اني انام هنا كلت اعوفك تنام وحدك
منير لا الاستقبال مو مريحه كلت اصعد انام هنا
ريحانه اي اخذ راحتك
منير ماطبين لعد
ريحانه طبيت لازمه المنشفه بيدي والملابس قصيرة مالتي فوك الركبه مغطيه نص فخذي
..مدري اشلون بقيت واكفه مشطت على السريع ونشفته كلش وتمدتت على الصفحه الثانيه من الجربايه
منير انتي تتكلبين
ريحانه اكيد يعني
منير شوفي اذا اجاني دفره لو فد شي منج ترة ارجعهن ضعف
ريحانه هوب هوب ترة حامل لا تذب كل قوتك اني اتحرك بس قليل يمكن
منير اني نبهتج بعد
ريحانه درت وحهي منه وغطيت نفسي مع انو الدنيا حارة اصلا
نمت بسرعه لانو تعبانه احس روحي
كعدت الصبح على صوته يطكطك بالغرفه اهووو جنت انام وحدي ماكعد اليوم ازعاج
لكيت نفسي مكشفه غطيت نفسي ورجعت نمتة
ثاني يوم الضهر اجتي اطياف
الحجيه وخوش دكتورة هاي
اطياف اي اني اراجع يمها
ريحانه زين نتاخر لو لا
اطياف لا شنتاخر هو سونار
ريحانه ديله امشي خاله منتاخر
الحجيه الله وياكم يمه
ريحانه صدك رحنه وماتاخرنه بيومها يمكن ساعتين سوتلي فحوصات وسونار كالت عليج 20 يوم انطتني علاج ومشهيات لانو ضعيف وانطتني تعليمات امشي عليها وصتني اخذ بالي من ذيج الشغله ..
بكلبي كتلها لا تخافين دكتورة اصلا مانعيها مني 😂😂
رجعنه اني واطياف كبل سويت الفطور قبل الاذان بنص ساعه كملت
ريحانه خاله راح اصعد اسبح قبل لا ياذن
الحجيه ولج يمه موزين لا تسبحين
ريحانه لا خاله بس اذب على نفسي مي لانو ضجت من جسمي
صعدت اخذت برمودة وبدي وطبيت سبحت على السريع وطلعت بس مشطت شعري حتى منشفته وخليت مسكارة وكحل ورتبت وجهي ونزلت لكيت منير بالمطبخ يسوي بالبن
ريحانه شداتسوي
منير اسوي البن
ريحانه وكفت يمه اكلك خلي بي نعناع كرفس وليمون
منير طلعيهن
ريحانه طلعتنهن ثرمتهن وخليتهن بي ورحت صبيت وهو واكف بالمطبخ
منير ماتنشفين شعرج
ريحانه ستعجلت عفته بدون تنشيف
منير وضهرج كله مبلل
ريحانه لا وين مامبلل
منير مبلل كله لا تعاندين
ريحانه لزمت البدي من فوك مامبلل
ريحانه هياته مامبلل
تقدم عليه واني واكف يمه الطباخ وكف كبالي ومد ايده على ضهري من يم خصري بقيت اباوعله
دنك وكام يحجي وياي
منير ليش تعاندين هذا شنو
ريحانه هاا اي مادري عبالي من فوك قصدك
منير واني اباوع لضهرج من فوك ليش
ريحانه وتباوع لضهري من جوة ليش
منير هو الرحال وين ييباوع لمرته
ريحانه وانته معتبرني مرتك
منير يمكن اعتبرج ليش لا ريحانه بقيت اباوعله تقرب مني ويباوعلي غمض عيونه وتقرب من شفايفي راد يبوسني والاذان حجه
ريحانه اذن اذن وبتعدت منه
هو بقه صافن عليه رفع حاجبه وابتسم ابتسامه خفيفه وطلع
لزمت صدري عزة العزاني جان راح يوم صيام على الفاضي لو بايسني جان فطرت وقبل الاذان بلحضات
رتبت نفسي وصبيت ورتبت السفرة بالغرفه وهو جاب البن واجه كعدت بدون صوت حتى حركتي قليله احسه يباوع عليه
بقيت افطر بدون مابوعله
الحجيه اليوم ساكته ريحانه شعجب
ريحانه لا ماكو شي خاله
كملت الفطور ونفس الروتين كملت شغلي وصعدت فوك منير هماتين اجه نام فوك يحجي وياي بس اني غلس مادري ليش انام اول مايطب يبقه يحوس بعدين يسكت وينام والصبح نفس الطكطكه
..
ريحانه الحمل يخلي الوحده ماتفطر اني جنت افطر بيام الدورة واسوي شيرة انضف جسمي بدون تعب
هسه صايمه ماكدر تعبانه
الحجيه يا يمه سهله اكعدي الضهر قبل ماتسوين الفكور وسوي جسمج
ريحانه هو جنها باجر هيج اسوي والعيد مبقاله شي يومين
الحجيه اي شعندج قابل وعرس فواد لا تنسين اول يوم العيد
ريحانه صدكين ناسيه
الحجيه شلون تنسين حضري نفسج شوفي محتاجه شي لا
ريحانه لا ممحتاجه شي ملابس وعندي ماحتاج شي
الحجيه خير انشاء الله
..
وصدك ثاني يوم رتبت جسمي وبيومها اجتي اطياف النه اخذت فلوس من منير لانو سعد مامنطيها مادري مافهمت
وهم كالت الحنه اول يوم العيد والعرس ثاني يوم
كاعده اشوف بملابس اشوف شنو البس بالعرس وطب منير
نزع قميصه ونام على الجربايه يلعب بالتليفون
ريحانه اكلك منير ماتنطيني تليفوني اخابر اهلي اخابر اطياف من احتاج شي
منير مو هسه
ريحانه شوكت لعد يعني هسه قابل ليش متنطينيا
منير اني انطي الج بعدين
ريحانه عفته ودرت وجهي وبقيت اطلع بالملابس
ريحانه اكلك صدك فواد يسوي حنه وعرس
منير اي اول يوم وثاني يوم العيد
ريحانه اني اروح اول يوم العيد لاهلي
منير ليش
0
ريحانه شنو ليس انتبه انو اني من تزوجت لحد هسه مرايحه لاهلي يعني وهذا عيد لازم اروح
منير اي بس مو اول يوم وثاني يوم خلي على ثالث يوم العيد
ريحانه لا ثاني يوم العيد من الزفه واخذني ابات يمهم
منير اشلون تباتين يعني
ريحانه يعني ابات يمهم اني مشتاقتلهم صار شكد مشايفتهم
منير مو قبل فترة اجوج
ريحانه شوفتهمت منهم اجوي وراحو بسرعه اكله مشتاقتلهمم يعني وين اكو وحده تزوج وهلكد ماتروح لاهلها مو هاي اطياف نفس الفرع وتجي لامها دائما
منير ماشي ماشي لا تلعين اخذج بيومها عود
ريحانه درت وجهي وبقيت اطلع بالملابس
منير شجاي تسوين
ريحانه اشوف شلبس بيوم الحنه والعرس
منير وشقررتي
ريحانه قررت البس هذا الفستان بالحنه وهذا البنطرون والقميص بالعرس لانو زفه وعيب
منير البنطرون والقميص حلوات بس الفستان لا
ريحانه ليش شبي
منير شوفي شلون اصكير وكله فتحات يعني كلها تشوف جسمج
ريحانه واذا هنه نسوان كلهن
منير والنسوان مراح يسولفن يم زلمهن مرت منير هيج لبست وهيج لبست
ريحانه اويي شهل حجي صدك تحجي ممتوقعه هيج تفكيرك
منير المهم كصير كلش العين تجي عليج غيري
ريحانه يصير خير
ضميتهن ..
اخر يوم رمضان والجوامع تحجي والتلفزيون يهنون بمناسبه العيد رحت لمنير بالاستقبال
ريحانه منير خابر اهلي خلي اعايدهم
منير مو هسه باجر
ريحانه لا هسه خليني اول شي اعايدهم
منير مابي شحن التليفون
ريحانه انطيني اني اشحنه
بقه يباوعلي وشمرة عليه فتحته بي شحن باوعتله بستحقار على تمثيل الخبيث ميريدني احجي بتليفونه
خابرت على ابويه مشغول دكيت مره ثانيه هم مشغول
رجعتله التليفون
منير ها
ريحانه شمغول ميجاوب
منير من يدك عود ادزة الج
رحت للمطبخ اشرب مي وهو اجه ورايه يحجي وي ابوي بالتليفون ويعايد بي شويه ونطانيا
ريحانه الوو ها حبيبي كل عام وانته بخير صحه وسلامه ربي يحفضك النه
فارس وانتي بخير باباتي الامان والسرور يفرحج بنتوتج اشلونج شخبارج
ريحانه الحمدالله بخير انته شلونك هبه شلونها
فراس الحمدالله بخير جنت احجي وي اسد علي وانتي خابرتي من سديته شفت المكالمه منج
ريحانه صدك اشلونه اسد علي
فارس بخير الحمدالله عايدني وسئل عليج
ريحانه والله مشتاقتله هواي
فارس هو اكثر بس يسال عليج ومن درة بيج حامل كال اذا ولد تسمي اسد علي
ريحانه اثنين اسد علي بالدنيا مانتحمل
فارس اشلونج عمتج رجلج شلونه وياج
ريحانه الحمدالله بخير اني اجيكم ثاني يوم العيد
فارس هله بيج ياريت تنورينه
ريحانه الله كريم سلملي على هبه
فارس يوصل باباتي
ريحانه يله ياعمري مع سلامه
..
منير على منو تحجون جنتو
ربحانه شنو
منير الي دكولين مشتاقتله
ريحانه اسد علي
منير هاا هو بعدله شكد ويطلع
ريحانه تقريبا 3 اشهر على العيد الجبير هو موجود انشاء الله
عافني وطلع كلت كبر يسال ويعوفني مثل الحيوان وحدي الغي
ثاني يوم الضهر لبست فستان ثاني طويل لون بيجي لامع ومكياج ونزلت شعري خليته مفتوح وعطر واضافري وكلشي كملت ونزلت يم خالتي
بيدي الصايه مالتي والشال
لاكيت منير على الدرج يريد يصعد
بقه يباوعلي
منير هاي شنو
ريحانه شنو
منير هيج راح اطلعين
ريحانه لا هاي الصايه مالتي
منير وجهج
ريحانه شبي
منير المكياج شنو هذا
ريحانه عندك علم ترة النسوان هنه الي يخلن مكياج مو بس اني يعني
بقه يباوعلي عفته ونزلت لخالتي
ريحانه اني كملت كلشي راح اطلعج شيلتج وعباتج الجديدة
الحجيه شكد بعد ونروح
ريحانه نص ساعه تقريبا لانو اطياف كالت يجون من وقت
الحجيه يله يمه طلعيهن
ريحانه انتي شبيج احسج تعبانه
الحجيه لاي يايمه بس كلبي شويه وجعه رجع
ربحانه سلامتج شربتي علاجج مو
الحجيه اي يمه مو نطيتينا بيدج
ريحانه عادي اتاكد اخاف ناسيه
طلعتلها شيلتها لبستيها وعبايتها واجه منير ساعدني كعدناها على الكرسي مالتها لبست الصايه مالتي والشال وطلعنه الفرع بي ناس لانو خطبه ولد واصدقائهم وكذا اني وكفت يم الحجيه
وصلنه طبيت اني وياها تلكتني مريم وناس هواي مبدلات ومكيجات
مريم هله هله بالحبيبه كل عام وانتي بخير صحه وسلامه يارب
ريحانه وانتي بخير من العايدين يارب
سلمت على خالتي وهو نسوان سلمت عليهن بقيت واكفه يم الحججيه
الحجيه نزعتي صايتج يمه
ريحانه لا خاله بعدني
الحجيه دنزعيها ولا تبقين يمي روحي يم البنات
ريحانه تمام
نزعت الحجاب ونزعت الصايه لفيتهن وخليتهن ورة خالتي وكفت يمها كلهن باوعلي اني بتسمت وسكتت اجتي اطياف
اطياف هاي شطالعه تخبلين متوقعتج هيج تلبسين
ريحانه يعني حلوات
مريم باوعي لزهرة وانتي تعرفين حلوات لو لا
ريحانه مبينه من نضرتها يخبلن عليه
مريم عبد الحسود بيها عود 😂😂
بقيت واكفه يم خالتي بعدين جبت كرسي وكعدت البنات يركصن ويسولفن والجهال همين لحد المغرب طفو الاغاني وراح فواد وامه وزهرة واطياف وعمتهم الجبيرة يحنون البنيه ويجون
طولو يمكن ساعتين بقيت اني يم مريم مراحت بسبب ابنها
بقيت اسولف وياها لحد مجوي جابو وياهم لفات وصدك اجني بوقتها جنت ميته جوع كعدت على الكرسي يم خالتي واكل وياها طب منير بيدة قواطي ببسي
اجه وكعد يمي على الكرسي على التجوة مالته ونطاني قوطيه وفتح وحده لامه
ريحانه يعني كل هاي الاماكن الخ على كرسي كعدت و
منير اتحارش ميصير يعني
ريحانه والي يتحارش يتحارش كدام العالم
منير اي اني هيج طبعي
درت وجهي منه وبديت اكل شفت زهرة تباوعله وهو مامركز
ريحانه خطيه عيونها راحت عليك
منير منيه
ريحانه زهرة
دارة وجه باوعلها هيه ابتسمت بوجه خاب من كبر
رجع باوعلي
منير وشسويلها قابل هيه تباوع لو اني وانتي ليش هيج مركزة وياها
ريحانه ياحضي على شنو اركز وياها قوس قزح صايرة
ضحك ضحكه قويه وخله ايدة على جتفي من ورة والبنات يباوعله اشلون كاعد يمي ويسولف كلت هسه ذني عبالهن حاي يتغزل بيه ويشاقه وياه عبالهن فلم هندي هوة
منير بابا البارحه اليوم اول يوم العيد وتاخذين بغيبتها
ريحانه على شنو اخذ غيبتها انته ششوفها باوعلها اصفر واخضر واحمر اشارة مرور
منير بهاي عندج حق بس انتي بارزة بيهن اليوم
ريحانه باوعتله ابتسم وسكتت
شويه وكام طلع يم الولد وشتغلت المعزوفات والركص مالتهن
مريم كومن نصعد من فوك ونباوع
اطياف يمعودة انيم ابني دوخني
ريحانه لا اني ماصعد
مريم دكومي كومي اطياف تبقه يم الحجيه
الحجيه اي يمه كومي وياهن تونسي
كمت وياها صعدنه على السطح بقينه نباوع من الستارة عليهم اشلون يركصون وفرحانين انوب الولد من يركصون اقوة من البنات عبالك كهرباء طكت بيهم
ابن مريم كام يبجي
مريم باعي راح انزله يم ابو واجيج ابقي هنا
ريحانه ماسي مو تتاخرين
مريم لا بس انزله واجي
نزلت هيه واني بقيت اباوع عليهم بلحضه وحده نجريت من جتفي
باوعت سعد ربكم يحبني وجنت لازم حجابي بيدي ذبيته على شعري وعلى جتفي
ريحانه شكووو اكو واحد هيج يسوي
سعد مادري بيج انتي هنا
ريحانه وهسه دريت
سعد وليش هيج متعصبه موزين شفتج هنا
ريحانه لا شنو الزين بيها
بتعدت منه ردت انزل
جرني
سعد وين رايحه تعاي
دفعني على الحايط
ريحانه شكووو شجاي تسوي
سعد مسوي شي بس اريد احجي وياج
ريحانه شتحجي وياي شكو هو حتى تحجي وياي واذا تريد تحجي هاي مو طريقه الواحد يحجي بيها
سعد سبحان الله كلجن نفس الحجي بالبدايه بعدين عاديه اصير حبيب الكلب
ريحانه شقصدك انته
سعد قصدي على نبراس هم هيج حجت بالبدايه بعدين صرت حبيبها وابو بيتها وماتكدر بدوني
ريحانه شنو شتحجي انته
سعد شنو هيه ممسولفتلج انو هيه جانت حبيبتي
ريحانه ممعقوله انته زوج اطياف اشلون تحبك لا ماتسويها نبراس
طلع تليفونه وشوفني ماحدثات هيه ويا وصور ادزله نبراس بالغرفه وي الحجيه نصدمت كلت معقوله هيه صح مره
وكالت انو هيه عدها علاقه وي شخص بس ماخيلتها وي سعد
ريحانه زين اني شنو يخصني ليش جاي تكلي هل حجي
سعد هيج مجرد سوالف
ريحانه ومنو يدري بهل شي
سعد محد
ريحانه مخايف اكول لاحد
سعد عادي يعني قابل منو يصدكج غيرج شافو بعينهم وماصدكوو
ريحانه قصدك منو
سعد منير واطياف وغيرهم هواي
ريحانه مستحيل انته تحجي صدك
سعد قابل اشاقه وياج شبيج انتي اطؤاف بيوم حنتج شافت المحادثات والصور كلهن بس غلست .. ومنير جان دائما يشوفنه سوة بس مايركز
ريحانه يعني اطياف تدري بيك جنت على علاقه وي نبراس زين قبل لا تموت بشكد
سعد قبل لا تموت بسنتين تقريبا وقبل لا تموت بسبوع تعاركنه بسبب الحبوب لانو صارت تشرب هواي والاسعار ختلفت
ريحانه شنو بس على كيفك احجي يعني انته جنت تدري بيها ميته لهل سبب وتدري بيها جانت تشرب
سعد اي جنه نشرب سوة اني الي علمتها عليهن
ريحانه شنو يعني انته السبب
سعد اني شعليه هيه شافتني مره من تشاوفنه اشربهن جربتهن وبقت تطلبهن دائما
ريحانه يعني اني مالي دخل هيه جانت تشرب من قبل
سعد اي وبيوم شافت عندج من نفس النوع بوقتها اني جنت مانعه منها لانو ماتنطيني فلوس وهنه غاليات اخذتهن منج بس اني شفتهن بجنطتها واخذتهن بقت ممنوعه منهن لحد ماتشوفنه قبل لا تموت بيومين واخذت الشريط مني
ريحانه انته شكد حقير اكو واحد يخلي بنيه بعمرها تشرب لا وتمنعها منه همين انته كلب وحقير دفعته وردت افوت جرني من جتفي على الحايط
ولزمني من ركبتي قوي
سعد لج السانج مايعله عليه فهمتي لو لا
ريحانه وخر مني وخررر
بقيت ادفع بيه وهو لازمني من ركبتي تقرب عليه وبلسانه مشه على ركبتي ودفعته قوي بيدي ابتعد مني وضحك اني ركضت نزلت خايفه على مرتعبه على ممصدكه الي حجا اليه
نزلت شفت منير كاعد يم الحجيه
شافني رحت يمهم كام وكعدت اني
بقه يحجي بس اني ممركزة على الحجي
شويه ونزل سعد باوعلنه واخذ منير وطلع
اطياف وين جنتي
ريحانه فوك
اطياف ومريم وين
ريحانه نزلت كالت اودي ابني لابو سمكن راحت تنيمه لعد
اطياف انتي ومنو جنت فوك ....
...
هنا وخلص البارت اتمنى يكون عجبكم اتنضروني باجر نفس الوقت بارت جديد تحياتي ...
غزل الحجامية
..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!