رواية نيران أبو ذيبه الفصل السادس 6 - بقلم علي العراقي

"نـيـران أبو ذيبـه "

" نـبأ السلـطان

الحـلقه الـ ٥

أرى الحزن لا يجدي على من فقدته ولو كان في حزني مزيد لزدته تغيرت الأحوال بعدك كلها فلست أرى الدنيا على ما عهدته عقدت بك الأيمان بالنجح واثقاً فحلّت يد الأقدار ما قد عقدته وكان اعتقادي أنك الدّهر مسعدي فخانتني الأيام فيما اعتقدته أردت لك العمر الطّويل فلم يكن سوى ما أراد الله لا ما أردته ..
.............. 

حيـاة: أحنه كلنه تحت جناحك واستمد قوتي منك تدري بية انته السند الوحيد الي والناس كلها حاسدتني

خيـون: ويلوموني على حبـجٰ ..
اندكت الباب

حياة: تعال ماما ..
دخل غضـب للغـرفه ..گال // يابة احنـه كملنه صلاه نريد عشا

حيـاة:روح حبيبي هسه اجي وراك

غضب :اذا مابيج حيل انه نسوي مكانج

حيـاة:لا حبيبي ، تروح تحرك البيت مو بس ألاكل .

غضـب :انـه رايـح ،

خيـون : تعال وليدي نكعد انه وياك بين ما تكمل امك

غضب : بوية اني احبنك

خيون : واني اموت بيك وليدي

غضب : بس انت بعد عفتني صاروا اعز مني
كركان :مثل ماهو ابوك هو ابونه
حسـن : ماكـو واحد أعز من واحد كلنه نحب ابونه

خيون : ههههه لا حبيبي كلكم ضنة روحي وليداتي وونستي ماكو بينكم فرق وانت ابوهم بعدي صير زلمة وانا ابوك

غضب : عد عيناك اني بوية
صبت أمي الاكل وكعدنا حول السفره احنه وحبوبتي قسمه ومداهرتها ويا كركان وحسن

قسمه : يمه غضيب شو ساگت ما تحجي

غضب : والله يا حبوبة ، انه حاس بأحساس مو حلو

خيون: خير ان شاء الله

حيـاة: لا تخلي بالك هاي شغلات يمه،

كملنا عشانا كعدنا بلديوان جان أكو خطار ما طولوا بكعدتهم ومشوا

التفت الي ابوي وكال

خيون : احسك مو على بعضك بوية

غضب : يا شيخ والله انه حاس راح يصير شي يزعجنا

خيون : صلي على محمد وخلي ايدك اليمنى على كلبك واقرا سورة الم نشرح ، ويروح هاي تفكيرات من بالك

غضب : مددت رجلية بلمضيف وسويت مثل ما كال ابوي .غمضت عيوني ما حسيت على نفسي الا وانه نايم كعدني حسـن

حسـن: كوم لاك شكو نايم هنا

غضب :شوية واجي روح ،،

كمت من مكاني ابوي واني فرحان ابوي نعمة يحتوينا بحبه وعطائه النا وامي الجنة العايشين بين جناحاتها ما جنت ادري زهرة صباي عن قريب تنطفي وتهفت جانت كل لحضة بيها طعم خاص بين يوم وليلة انقلبت الموازين

فـي سنـه 2004 بشـهر الـ 12

گان الجو بارد برودت الجو قارصه  و ممطر وصوت الرعد مخيف الى درجه مرعب كئيب مخلوط بين الحزن والكآبة  واحساسي يزيد أن  راح تصير مصيبة جبيرة والله يحلها

بيني وبين اردد يارب كون احساسي يطلع غلط ، بس القدر يلعب واحساسي مو حلو ، حسيت گللبي يريد ينشلع

بسنه الـ 2004 تغير شكلي وصرت أكبر من الشكل انه واخوتي حسن وكركان بكلشي يعتمد ابوي علينه

كاعدين بالمضيف ابوي عنده ضيوف ما نسمع الا صوت رمي وصياح عالـي
نهـض أبـوي من مكـانه طلع واحنه كلنه طلعنه وراه ..

جبار : شيييخ خيون..  على طول حسة يحجي بعصبية
وينكم بوية اطلعوا بيت الشيخ

خيـون : سترك الهي شنـي  هاي

غضـب :  طلعنا نركض شفنة الشيخ جبار واخوانه بسياراتهم وجبار كاطع ايد بنت اخوه ويفر بيها حاسب الي مسوي نصر وفخر اله
كلنا اخترعنة من المنظر منظر تشمئز النفس منه
جبار : يوول يابة هذا عاري بايدي ذبحتها يخيون خزتني طميت عاري
خيون : هاااي شني  شسويتوا ولكم انت ابوها ولك ليششش غيرتك وين يا ناقص الغيرة ولكمم الله اكبر عليكم ليشش شسوت هالطفله هاي اكعد حاجيها افتهم السالفه جـا احنه بس نسمع بسالفه نروح نذبح

جبار: شاردة ويا واحد

خيون : الله لا ينطيكم لا دنيا ولا آخرة وللك وتفتخر جايني شاحط دم هالطفلة ووين وديتوها

جبار : هاي بالبدي مال السيارة
من سمع الشـيخ خيـون ركض  للبدي  مال السيارة لكى البنية ناحرينها من الوريد للوريد

خيون : لا اله الا الله عليكم ولكمم شسوي بيكم شسوي مفتخرين هيج بدال ما تسترونها واكييد تشرد اكيد لا آب بي حظ ولا عمام بيهم حظ يبيت الشيخ والبخت يوول طموا حالكم بدالها شحطة دمها هاي ما تتعداكم والله وبالله اليتقررب منها انعل والدي وافرغ الميادة براسة ( سلاح البرنو اسمها ميادة) 
جبار : خيوون ولك شتحجي هاي خزتنه وشردت ويا رفيجها  امشينه نطمها بـ(........)

خيون : تاكل تبن لا انعل والديك والعباس اخو زينب هسة انحرك عالقبله وما يرفلي جفن يا عار

جبار: تمون العلية سويته وبموافقة ابوها هو اول واحد نحرها

خيون : خزي وعار عليكم وعيبة بحقكم ولكم شرفكم هاي ششفتوا عليها والله صاعدة بسيارة والله شاردة منين شردت منين من طيحان حظكم من ظيمكم
غضبب بوية عاون عمامك نزلوا الجثة

غضب : ابوي فار بدمه وضغطة صعد عيونه حمرن حيل كلت هسة يصيبه مكروه كالي ننزل الجثة من السيارة وفعلا نزلناها ودخلناها للبيت وغطيناها
......................
حياة: اسمع الهوسة والعرفته كالعادة فلان ذبح فلانه وطم عارة عايشين بالجهل وسفك الدم ما اعرف هالبنية منو متت قهر وبجي ما اكدر اطلع بس اسمع الهوسة مال الزلم برى
الى متى احنه بقى هيج يعني من تشرد البنيه من بيت اهلها لازم اكو سبب قوي يخليها تشرد

من البدايه الاهل ما يعرفون يحتون اطفالهم لو كان الاب يكعد ويا  بنته و ابنه ويصير صديق الهم ويسمع الهمهوم ومشاكلهم ويتعامل ويحلها بدون عصبية

بس احنه لا يدور الزله على اطفاله وزوجته. حتى الزوجه من تنحرف دائما الناس تلومها بس ما يعرفون الضروف المرت بيها وهذا كله السبب من رجل لان ما عرف يحتويها ويكسبها اله

واذا الرجل أقدم على قتل زوجته بسبب عصببة شطانيه او تهور شيطاني من يسألوا يطعن بشرفها ويكول الهم مصاحبه لكيتها ويا فلان

...........

حجـه بعصـبية وعيونه يطاير منها الشرار ...
خيون : اسمعوني زين انعل والدي اليطر ثنيتي بعد يلا راووني عرض اجتافكم الله يلعنكم

جبار : ما اروح اذا ما اطم عاري بايدي

خيون : احط هاي براسك واطشرة لك ما يرفلي جفن وروح ابوي يلااا مناا حسابكم بعدين ،، ولكم جان اجيتوا وسترنا عليهم وخلانهم يعقد عليها يعني الا تذبحونها والك بيها طولت شارب امشي من وجهي يلا

غضـب : راحوا  كلهم من بعد ما طردهم أبوي  واحنا رجعنة للمضيف

حياة   :  دخلوا البنية للحوش واني انخمش گلبي ركضت اني وخالتي فتحنه الغطى عنها بعدها طفله والدم مالي وجهه وايدها اليمنى مكطوعه بس اريد افهم هاي ابوها شلون انطى كلبه هيج يفعل بيها

حياة : يمة صخام ويهي يممة الله لا ينطيكم الله لا يوفقكم ولكم شكول شكول نبجي ونلطم على البنية خالةة نحروج يخالة كصوا ايدج الما يخافون الله مثلوا بيج ييمة ولج شذنبج ولج صخام الصخمني ابجي واصيح بحرگة گلب بنية طفلة هيج تسوون بيها ليش ولكم ليش شنو السوته الله اكبر

شوية واجه   وجان يدخل الشيخ خيون :
ها بوية صوتج منا عالم ووروحي لأم هشام خل تجي تفحص البنية  خل نفهم السالفه وبعدين اعلمهم هالعارات

حياة : ولك خيون ليش هيج شنو من بشر شذنبها هاي

خيون : مو وكت هالكلام يلا بسرعة ركض
حياة : لبست عباتي وطلعت اركض  واني دموعي على خدي المنظر ما يروح من بالي دكيت باب بيت أم  هشام تجي تفحص البنية والدموع عشرة عشرة اول مرة انفجع هيج هاي مثل بنيتي وامها مثل اخيتي

جبت ام هشام اجينا  نركض سمعنا صريخ وبواجي دخلنه ولكينه ام البنية

حنونه : يمةة ولج حياة بنيتي بريئة بنيتي راحت من ادية تبجي وتلطم
لا اله الا الله الله يفجعكم مثل ما فجعتوني ولج ابوهاا ما رفلة جفن ولج اعمامها ولجج شحجي وشكوول بنيتي شحطوها مثل الدياية

حياة : المرة تبجي وتملش بشعرها ماكو حجاية تصبر عزيز گلبك وضناك بحضنج ومذبوح مثل الطير بدون رحمه
حياة : بعد روحي خية  حنونة  هاي ام هشام خليها تفحصها  والشيخ خيون ياخذ حكج وحك بنيتج والله ما تتعداهم حوبتها وحوبتج

حنونة : يمة بنيتي يشكون بشرفج ييمه ولكم والله بريئة يا عالم بريئة ماتت باطل عند اهل الباطل الله يفجعكم

حياة : والله ندري والله بريئة نريد نثبت برائتها ودليل ضدهم وتصير عيبة وعار بحقهم بس اهدي يا بعد حيلي
بعد كلام وتصبيرات طويله قبلت وما تنلام ضناها يشكون بشرفها
بدت ام هشام تشوف شغلها
وكل شي يستمع الها گلوبنه قبل اذانتتنا تصغي الها والعيون عشرة عشرة
ام هشام : بدموع بعد عيني عينج يمه تهموج باطل وشرفج محد ماسة
حنونة : بدموع تهلهل گللييششش يمةة تمنيت ازفج بأيدي تمنيت ابجي من اشوف النيشان مو ابجي على ذبحج
..............

غضب : نسمع الصياح والبجي وابوي مغضب واليحاجي   يفلش راسة بالصخرية نار تطحن بگلبي شلتها بين ادية مثل الطير المذبوح

بعد تقريبا ساعة سمعنا هلاهل عرفنا البنية بريئة وتهمتها جذب بس شنو الفائدة البنية راحت من ايدين امها الكتلت روحها وراها وما تنلام الله لا يفجع شخص بهيج شي. دنيا صارت ليل واشبه بالبلاء جو يرعد
اباوع على أبوي دموعه نزلت مسحهن بسرعه بغترته ما يريد واحد يشوف كسرته

خيون : ب لا حول ولا قوة الا بالله العلي العظيم ربي لا تبتلينا بما ابتليت غيرنا وارحمنا واغفر لنا انت إرحم الراحمين.
غضب بوية خلي يغسلونها ويجفنونها من الجفن الضامه كول لإمك خليها تجفنها بجفني

غضب : رحت ركض لأمي وكتلها الطلبة مني ابوي
مر الليل اشبه بالموت وقت بطيء ممل بتعب وبجي ونياح
سهرانين  رحنا احنه وابوي جبنا تابوت وطلعنا بلبنيه للمغتسل

حنونه : هاا خوية كتلوها بدم بارد

خيون : لا حول ولا قوة الا بالله يلا خوية شدي حيلج يخسون وعد علية ومن هالشارب حق بنبتج اني سدادة وانعل والديهم واشلع عرجهم واسويهم عبرة لمن اعتبر الله تعالى يكول ( وبشر الصابرين الذي اذا اصابتهم مصيبة قالوا إنا لله وانا اليه راجعون) نكول انا لله وانا اليه راجعون وبنيتج طير من طيور الجنة

حنونة : لا اله الا الله الله ينتقم منهم

غضـب : اخذناها للنجف دفنّاها رجعنة للبيت وحيلنا مهدود
........

اليوم التالي

خيون : غضب بووية تعال وياي هذولة الهتلية ولا واحد منهم رف گلبة غم لهيج زلم

غضب : بوية تروحلهم المن يطبهم مرض شعلينا بيهم همه الخسرانين بالتالي حوبتها ما تضيع انت اكبر من تنزل راسك الهم بوية همه يجونك مذلولين اذا مو اليوم باجر وصدكني يجون
خيون : انت هيج تشوف
غضب : اي بويةوداعتك وصدكني يجون

خيون : خوش بعد عيني هذا هو ذيبي اخيوانك وين

غضب : مخلفهم وناسيهم هناك وين يرحون
خيون : وشبيك شنو ماخذين نص من كليتك
غضب : السموحة بوية اسف بس منضر البنية خلالي عقدة وكلبي ناغزني والله ادري راح تصير مشكلة اكبر من هاي ما نريد ننفج انت تدري حياتك مهددة والوضع مو تمام اذا رحت من ادينه ياهو يفيدنا الله وكيلك من الصبح نعيش بالريگان

خيون : هههههه افا وانا ابوك انت زلمتي حبيبي لا يضل بالك اليجي من الله انعم الله

غضب : فدوة رحتلك بوية

خيون : وين صرت يمعود

امير : ها يخوي روحوا كدامي اني شوية واجي وراكم
خيون : شسالفتك دومك متعطل يلا رايحين

غضب : ها بوية وين

خيون : معزومين بوية.

غضب : لبست دشداشتي وخليت عطر ومسك وغترتي
حياة : معرس ان شاء الله

غضب : اي اريد وحده صاكة مثلج حوحو

حياة : هههههههه سفلي

غضب : ما اغشج اني  ..هااا الحلوة شلونج
قسمة : هلا بعد حبوبتك يلا ابوك يصيحك
ادعيلي حبوبة
قسـمه : بحفظ الله بعد عيني

غضب :  طلعنا اني وابوي

خيون : هاك انت سوق
غضب : اخذت السيارة واسوق بدال ابوي وصلنا لبيت الشيخ (عثمان) 
خيون : السلام عليكم
الكل وعليكم السلام
غضب : السلام عليكم
الشيخ عثمان: هلا بالذيب هلا بعد عمك

دخلت وكعدت مسافة عن ابوي بطبعي ما اكعد بصف ابوي ولا مقابيله

عثمان : تعال ذيبي اكعد يمي يبا مشتاقيلك وين هالكطعة

غضب : يبا شاهد الله مشتاقلك اني بس لاهي بهالدنيا وما كاعدين. نفتر من مكان لمكان ودراسة

يتبـع ..

نبـأ السـلطان 🌚🌝