رواية نيران أبو ذيبه الفصل الثامن 8 - بقلم علي العراقي

"نـيران أبو ذيبـة "

بقـلم " نـبأ الـسلـطان "

الحـلقه الـ ٧

لا يـمـي وأحضـنك واطـبك الروحـيـن
ولا أنـتـه البعـيـد المـا أـلك جـيــة

لـ عريـان السـيد خـلف ،🖤
...................................................

حيـاة : من تفكد انسان عزيز على كلبك وغالي تضل لا ليلك ليل ولا نهارك نهار مثل العالم والناس ،
ضلت دموعي هماله بفراكه راح بدون ما يودعني ، حاطه بنتي بحضني ليالي حسيتها ثكل نفسها شلت خليتها بفراشها

صديت لفراش خـيون ودموعي نزلت بغزارة ..نبتت اضافري برجلي حتى لا تسمعني الحجية ولا الولد من ابجي ،

ااخخخ يا نار گلبي الما تطفه خيووون يابعد رروحي انتـه ،اكيد تعرف بية اني محتركه روحي عليك ،،لخاطرك الشيخه كتلوك الخاطر الصيت ، ااااه ررربيي اختبارك صعب الي

_نمت على فراشة وخليت راسي على مخدته اشتم عطرة الي باقي على المخده ، واجت بالي كل الذكريات ،ذكريات حبنه وكلشي اتذكر من مرة اجه علينة للبيت

_-خيووون ليش تأخرت ؟؟

_-اسف حبيبتي بس تعرفين انه ضابط ومرات يكون نزولي متأخر وامور العشيرة

_-بس انه اشتاكلك شسوي

_-وانـه بعد يحيـلي ، بس راح اخطبج ماضل شي ،،بس هاي ايدج شبيها ؟ملفوفه

_- اي هاي جنت اكصص بلحلم وهيج صار ؟

_-انتبهي على روحج بويـة

_-اتحبـني

_-نفـس اليصعد وينزل ..

"كلي ما فكرت بية ببناتك لا شافنك لا وعـن عليك ، تذكر من زوجنه شلون العالم حسدتني عليك،

نمت ماحسيت على نفسي من البواجي والنووح كعدت من النوم بعدهم كلهم نايمين بيتنا فارغ تماماٍ من الناس خلصت ايام الفاتحه وكلمن التهى بروحه وبشغله وبعائلتـه

سويتلهم ريوك كعدوا صبحوا عليه الولد والحجية بس ما اكلوا شي بس الجاي شربوا وكاموا

وكعدت الحجية باب الغرفه وحطت شيلتها على وجهه وضلت تبجي وتنعي وانه ابجي على بجيها اريد واحد وياي

للضحى وسمعت صوت تمنيت اخر صوت اسمعه بكل حياتي ، اقبح انسانه شفتها بحياتي كلها وهي أحـلام ، يعني زوجها امير بوادي وهي بوادي أخر

أحـلام :صبحجن الله بلخير يا عمه ،،

قسمه ': هلا يعيني شعجب جيتي اليوم ؟

احلام : شلون حجي هذا يا حجية .شلون ما اجي واشوفكم شمحتاجين ما محتاجين انوب البيت صار خالي

حيـاة : لا مو خالي البيت الحمدلله بية ثلاث زلـم مشوربة اكدر اعتمد عليهم واروح وياهم الاخر نقطه بلعالم

احـلام. : يا عيني بعدج صغيرة وصرتي أرمله خطية والله

قسمـه : احجي عدل ، لا حركت كلبي هسه افرغها كلها بيج !..

أحلام : شبيج حجية عصبية ، تدرين يا حياة اختي جانت عاشكه الشيخ خيون بس ما رادها جان يريدج الج

حيـاة : هو اصلا ما جان يحبها الله يرحمه، بس انتي ردتي تلزكين اختج علية

أحـلام :عشـتوا، اشـو أخيـتي فلكه .كمر الف خطاب اجاها
بس اوف يا الحب ، هسه كولينه شوكت تعرسين

شهكت حياة وبجت لطمت على خدودها
حيـاة : كون الله يموتني ولا هاي السالفه شنو من بشر انتي بس كليلي اشو رجلج درة مال الله يجي يسأل علينه ويروح ما يمر يوم اذا ما يجي علينه

أحـلام : هاااااا، اميرر يجي علليكم خووش بسيطه طلعت خاطه عيننج النكسه على رجلي يبوووووووو،تعالوووا ليه يا عالم يانس حاطها عينها على رجللي بعده ما طلع اربعينه رجلج وولج

كامت الها قسمه وتلوتها بلعوجيه تكسر على راسها موتتها ..طلع غضب على صوت أحـلام

غضب : شكد شفت بحياتي نسوان عايقه بس مثلج يا احلام ما شايف واريد اروح لعمي امير اريد اشوف شلون مبقي عنده هيج مراه

ضلت احلام تسب وتغلط عليهم وفرجت البايع والمشتري على بيت الشيخ خيون والناس اجت تتراكض عبالهم اكو شي صاير بس حسن وكركان فهموا الناس انو ماكو شي ورجعوهم

وحياة كامت تلطم وملخت روحها من جده وجديد على حجي احلام ، من شافتها الحجية هيج والوضع بلبيت متوتر ومشحون طاحت واغمى عليها

شالها غضب بأثنين ايديه يبجي ،، التموا عليها كلهم يبجون يخافون لا تروح من ايديهم فتحت عيونها وحجت بثكل

قسمة : خل اكومن الهاي الحقيرة اكسرها

غضب: فدوة اروحلج حبوبة عوفيها اني اروح واحاجي عمي عليها هاي ما اتوب ابد

حسـن : انسانه عديمت الاخلاق

كركان : هسه احنه بيا حال والكرعه تمشط براس ، احنه متعازيين وبعده تراب ابونه اخضر ودمه لحد هسه حار وهاي تجي دور طلايب شلون الها خلك ياربي هنيالها

حيـاة :اعذريني يمه انه هم زودتها عليج يبعد روحي كلشي ولا انتي والله كلنه نفداج برواحنه

قسمه : لا يمة الله يساعدج ويساعدنه على هلمصيبة شوكت نخلص من شي اسمه احلام ما ادري

كركان : بعد هي احلام ما نخلص منها حتى بلحلم تجيك غدي لزكه

حسـن : كوموا خل نطلع برة خلي حبوبتي ترتاح  .. غضب هسه كلي اشلون نبقى ساكتين وكاعدين ما ناخذ ثار ابونه

كركان : وعلي ليلي ما انامه كلي غضب شنسوي

غضب : تنهد بحسرة طويلة ،، گلي اكو واحد واكف ويانه من عمامي غير امير احجولي .من اخذنه التفك وهدينه على سليمان مو صاروا كلهم بوجوهنه وكالوا انتم غلطانين

حسـن : بس شنسوي كلي

غضب : انه هسه رايح العمي امير حتى اخذة واروح للشيخ عثمان افتهم شلون وليش انجتل ابونه وانتم ضلوا هنا

وصيتهم على البيت وطلعت بوجهي العمي أمير ،تسالمت انه وياه وحجيتله كلشي على أحـلام

أمـير : الله لا يوفقها كضت عمرها شالعه كلبي ومفشلتني ويا الوادم اذا ما اطلكها ما ارتاح هاي

غضب : لا عمي شطلك. فشلة ، بس لا تجي بعد ولا تعتب علينه

أمير :بوية والله فشلان منك اعذرني

غضب : لا عمي والله اعرفنك شنو انته بس اريد منك تفهمني على القتل مال ابوي احجيلي والا اكلك امشينه نروح للشيخ عثمان

انطلقنه انه وعمي البيت الشيخ عثمان وكعدنه بمضيفه نوعآٔ وضعه متحسن بعد الجلطه الي صابته بقتل ابوي ..

نزلت دموع الشيخ عثمان وهو كاعد كدامي حجه

عثـمان : تدري يا غضب انته نسخه من ابوك الله يرحمه جن هو كاعد كدامي

غضب : دنكت راسي ، وكتله الله يرحمه

أمير : بوية وصيت ابوك هاي ان ما نحجيلك واحنه والكفل زينب لا اني ادري بية ولا الي علم راح يصير هيج وتوصل بسليمان يكتله

عثمان : من طلع من يمي ردت منه بس يبات يمي ما قبل ولا سمع مني طلع بوجهه ومن غاب ضليت ساعات اخابر عليه ما يرد بعدين صار يطلع الي مغلق

غضب : كعدوا يحجولي الصار كلة ، واني كلبي بركان بية حممم بركانيه ما ترضى تطفى لا بكلام لا بغيرة بس بقتل سليمان حجولي وصية ابوي كلها ،
سليمان يخليني الحك ابوي بس كل همي صار اهلي وامي واخواني شلون احافظ عليهم
نار گلبي ما طفت لحضة. موت ابوي آثر على الكل وصار عيد للخايف منه وحزن يحبه.  رجعت  للبيت واني ضهري محني وشكلي كبر بهالمدة
لاگتني امي ..

حياة : هلا بعد امك شلونك طلعت واتأخرت ضل بالي عليك وليدي
غضب : بخير دامج يمي

حياة : بجيت وحضنته يمة وليدي اغديلك فدوة

غضب : اسم الله عليج حويتي

حياة : بدموع خيون الثاني لا محال

غضب : ان شاء الله اصيرلج كل شي يمه يس اخذ ثاري من هذا الزنديق الخايس الحقيرر

حياة : شوف يمة كلهم ما يفيدونك اليفيدك دراستك وبس اكبر واتخرج نعوف سالفة الثارات ما اريد اخسرك واخسر روحي ترى وعلي اموت وراك
ابوك بخيت ييمة وعثرة الكتله ما تتعداه بعد يوم سنة سنتين ما معلوم بس وعد كل شي يرجعلك يخيون اريدك تصير زلمة وذيب ابوك ابوك ما مات كل شي بي انطبع بيك شهامته وطولة يمن فدوة لطولك وادبك صير ذيبي يمة وحقك تاخذة ان شاء الله

غضب : عد عيناج يمة بس يمة سليمان هو الكتل ابوي والله سليمان ونار گلبي ما تطفى اله اخذ حك ابوي مربع منه

حياة :    لا لا يمه فدووة اروحلك وين اروح وين انطي وجهي عليك بروح ابوك لا تسوي شي وليدي عليم ام البنين يمع  . لا نظلم بختنا وبخت ابوك يجي يوم وكل شي ينكشف وعيونك شوف اخياتك شلون يباعن لك يمة لخاطرهن لا تضيع روحك وتضيع مستقبلك

اريدك ذيب تاكل عدوك بقوتك وذكائك اريدك تثبت لهاي العالم ان خيون ما مات خيون عدل عنده ولد شال اسمة خوش يحيلي

غضب : بست امي براسها عيوني المركبة الج دسويلنا فاصوليا مشتهيها كلش
حياة: من عيوني
رحت لغرفة حبوبتي
لگيتها نايمة
بست راسها الله يحفظج يالبخت
فزت من النوم

قسمه : يمة غضـيب هلا يبعد هلي هلا يطوايفي هلا يبن روحي

غضب : حضنتها وشميتها شلونج يالبخت

قسمه : شلوني يبعد امك هذا لوني

غضب : الله كريم حبوبة اني شاد حيلي بيج يبعد روحي

قسمة : بدموع فدوة اغديلك وليدي

غضب : حبوبة مو صارلج هواي ما فريتي شعري ولا مسجتيني

قسمة : ههههه يا يمة يا يمة حط راسك بحضني

غضب : خليت راسي بحضنها وبدت تفري بشعري نقطة ضعفي هاي الحركة بسرعة انام
ما اعرف شوكت نمت نومه عميقة

خيون : غضبان.  غضبي بوية اكعد يلا. شني نايم اكعد بعد حيلي تغدا
غضب : بووية انت عدل

خيون : عدل شني شبيك بوية اني شنو ما ميت مابية شي هاي انه كدامك اكعد يلا اكعد

غضب : بوية ليش عفتني

خيون : ما عفتك اني يمك والك لا تشلع گلب امك دير بالك عليهم واهم شي حبوبتك احنا ان شاء الله نلتقي يلا اكعد ولم اخيوانك اني رايح.
غضب : بووية بوية وين رايح بوووية اوكفلي
جدامي ثگلن واصيح وما يسمعني

حياة : دخلت الغرفة وسمعت غضب وهو نايم يصيح بووية اوكف ركضت عليه
اكعد اسم الله الرحمن شبيك يمة غضب شجاك يبعد حيلي بسم الله الرحمن الرحيم ( قل اعوذ برب الفلق من شر ما خلق)  اقرى ايات على راسة كعد مفزوع وينكث مثل السعفة
حياة : سودة بويهي شبيك يبعد امك

غضب : جسمي كله يرجف والهوى كوه اشهكة ريجي يابس ما اكدر احجي يـ يمة ابووي شفت ابوي بس عاافني ورراح ما ااخذني ويا يمه

قسمة : عمت عيني عليك يمااا يبعد روحي وين تريد تروح وتخليني بعدين هذا طيف
هاك هذا ماي اشررب وغسل ويهك

غضب : شربت ماي وامي غسلت ويهي
حياة : سمي بالله يمه كول يا الله يمه اكعد اقراله سورة الفاتحه والزم سبحه سبح اله واهديهم اله يلا يمه واذا تريد
كوم اسبح يبعد امك

غضب : كمت واني رجلية احسهن مورمات و ما يعينني حيلي بايد
يمة خليها بعدين ما بيه حيل

قسمة : شبيك يمة شجاك شحالك هيج صاير ؟..

غضب : حبوبة. ابوي اجاني وكعدني من نومتي وصاني عليكم وبعدين عافني وراح واركض وراه انادي ما يسمعني

قسمة :  ولك غضيبان لا تورم گلبي يمةة على كيفك ويا روحك واخيوتك شلون بيهم اذا انته جبيرهم هيج يمه هسه صرت انته بمكان ابوك المفروض منك يوليدي تصير قوي كدامهم حتى لا يضعون يستمدون القـوة منـك يبعد عمري

غضب : حضنتها وبستها ما عاش اليورم گلبج حبوبة بس اعذريني ما اكدر اسيطر على نفسي ابوي هذا عزيزنه وحبيب كلبي

حياة: منضر غضب خمش گلبي الله يعين گلبك يمة اجذب اذا اكول قوية امثل كدامهم حتى ما اشوفهم ضعاف
مرت ايامنة و فعلا اليگول الخلف ما مات وليداتي بعد حيلي سباع وغضب صار زلمة جامع اخيوانه بحنانة ويعلمهم كل شي كبر بعيني واختلف كل شي بي اطالع الله ثم همَ
.....................

غضب : ثاري لحد هسه ما اخذته من سليمان ولا ارتاح كلبي بس المصبرني والموكفني امي اضل تتوسل بية لا يصيبني شي وعمي امير يكول
' يكتلك بدم بارد انته واخوتك وما يرفله جفن صدك '

وصحيح كلامه ما يرفله

جنه كاعدين كبال النهر اني واخوتي حط راسه على جتفي كركان

كركان : تدري احس نفسي منحووس

غضب : هاي شبيك لا تحجي هيج ما يصح

كركان : ابوي مات وانه ما شايفه وامي تبرت مني وما سألت علية وما تدري شصار ما صار بية حتى ما وصلت الفاتحه الشيخ

حسـن : اذا انته تحجي هيج جـا ، شكول شحجي اطمن روحي ولك اهلي طميتهم بتراب النجف وضليت وحيد ولو ما الله والشيخ خيون جان انه تنهش بلحمي الجلاب
صار النه اب واخ وصديق ما يفرق بيناتنه بشي يحبنا مثل ما يحب غضب واحلى من جان يكول انتم ذيابة ولدي السباع

غضب : انتم اخوتي وسندي لا تحجون هيج وتزيدونها عليه اروحلكم فدوة
.انه مقرر بس انجح ادخل كلية عسكرية

حسـن : انه اوافقك الرأي

كركان : وانه هم وياكم للموت وين ما ترحون ارروح ،

شمر حجارة جبيرة بلماي كركان وطفر عليهم

حسن : هيوو ترى اريد حجه هسه اكوملك افرسك رفس وحك هو علي وروح اهليتي وابوي

غضب حاطه ايده جوه خدة ومكتفي يباوع عليهم شلون يتناكروون

كركان :ولك كبور تلفك خل افهمك

غضب : لا تجيب طاري الموت والكبور شفتهم من حياته

كركان : بعد بعد اكلووني وشرربوني اخذتوني حاصل فاصل شجاكم .. بالي كلة يم احلام طركاعه

غضب : عمي راح يأدبها شعلينه بيها ختولي لا تفكر بهيج ناس اخلاقهم سزز

كركان : جاي افكر شلون عمي امير عايش وياها وهيه مرات احسها رجال مو مراه على ذاك صوتها العالي

حـسن : الله،  احلى شي بلمراه صوتها الناصي

غضب : ترى هاي من اجت للدنيا هيج ما تكدر تغير طبعها تعودت على هيج وماخذه الوادم بحسها وبس تشوفها تلعلع بصوتها عبالها هاي حلوة

تدرون من اجت مسيرة وحجت بلبداية كلت صارت ادمية بس شو هاي انهدت على امي كل حيلها

كركان : تدري هاي مال تسربت لهلها لان ما ينفع وياها الضرب ولا يجيب نتيجه 

رجعنا للبيت من بعد حديث طويل كل همنا نريد نفرغ همومنا وامي من يطلع اربعين تلزم عدتها خطية

اختنك ويضيج النفس من اوصل المضيف ..صار وقت الاذان فتحت الحنفية نزلت دموعي تذكرت من جان عمري ب ٧ سنين جنت ماعرف شي هو يعلمني وجار خلك وياي

اخذت سجاده مالته والسبحه والتربة وحسـن وكركان توضوا وصلينه احنه كلنه بنفس مكان ابوي وهديت اله ركعتين وكعدت اني وامي واخوتي نقراه اله قران

بعدها كعدنه نتعشى كملنه وطلعنا اخذنه كتبنا وكعدنه بلمضيف الي صار حزين من بعد موت ابوي وصار فارغ من الناس من بعد موت ابوي

كعدنا فتحنا الكتب وبلشنا نقرأ ونأشر المهم ونركز وذبينا حيلنا على دراسه حتى اوفي وصية ابوي ..من بعد ساعه متواصله من القراءة والمراجعه ..سمعنا صوت سيارات طلع حسن يريد يشوف منو ..ما طول هواي ورجع النا

حـسن : هـذا سليمان بلباب؟؟؟؟

يتبـع ،،

نـبأ الـسـلطـان ❤️