رواية وعصفت بنا الاقدار الفصل الثالث وخمسون 53 - بقلم Rozaya1122

وعصفت بنا الاقدار... البارت الواحد والخمسون
للكاتبه زهراء ( روزايه)...

( اعتذر ... اعتذر والله جدا خجلانه منكم تقصيري زاد
واعذاري زادت بس والله متجي عدله اليوم وكع القوري على ايدي اليسره واحتركت ورغم هذا ماعفتكم لان فشلانه منكم وكتبت البارت بمأساه اعذروني لان قصير بس والله صحتي تخوني اعذروني دااخذلكم ومااوافي حقكم يارب اكون كد الثقه واعوضكم التمس منكم عذرا)
....

عقيق.. مستغربه من وجودهه دخلت وياي للصاله بس ام اواب بيهه الخطار بالاستقبال كعدت بصفهه وهي ساكته كتلهه منو جابج وشلون اندليتي؟؟

ضحى.. بالي يمج ماداومتي ورحت للمديره سالت عليج
كالت امهه ميته واخذت عنوانكم من صديقه فجر وابن
عمي جابني لان كالو مريضه انتي واجيت اسال عليج

عقيق.. اباوعلهه هسه احكم عليهه بالزين لو الموزين
غريبه اطوار وكلهه تجنبهه بس صاحبه موقف واجت
برجلهه بهاي اللحظه نزلت دمعتي تذكرت خاله ساهره
والسبع هم الوحيدين الي ينصحوني واثق بيهم

اجت عمه ام جراح قدمتلهه مي حجتلي عن الدروس
الفاتتني سولفتلهه عن السبع احجي وابجي وكتلهه
ادعيله شويه وكامت واني صافنه عليهه ماجاي افهم
شي وليش البنات يحجن عليهه وهي هيج حبابه

رحت لفجر بالغرفه كتلهه ضحى اجت ماخذه العنوان
من بنات صفج وتسلم عليج
فجر.. هاي التك فيوز شدلالهه بينه

عقيق.. شو مبينه حبابه والبناات خبلنهه والله خوش
بنيه شوفي ولا وحده سالت علينه وهاي اليحجن
عليهه احسن منهن
فجر.. عقيق احنه هسه بدون ام وبدون سند اخذي
حذغ مابينه طلايب بعد

عقيق.. شدكولين السبع يطيب ويرجع مثل قبل
فجر.. كلهه تغجع لحياتهه ويطيب بس ماما ماتغجع
غاح انظل وحدنه واني غاح اظل بالبيت وحدي
شلون اتحمل صاغلهه اسبوع بس غوحي غايحه

عقيق.. اني من فقدت بابا فقدت اخر مااملك بهاي الدنيا
بس الله مانساني رزقني بيج اخت وبالسبع وبخاله ساهره
واهل البيت كلكم تحبوني لاتيأسين الله مايترك عبده حزين

السبع دائما يكول الانسان نساي والله انطانه نعمه النسيان
بمرور الايام نتجاوز هذا الحزن صح تبقه الغصه بالگلب بس
راح تمشي حياتنه ماتوكف

فجر.. انتي ماتفهميني غاح اكلج شي بعد وفاه ماما
اكو واحد ظالم حقيغ جباغ ماغاح يسكت وماغاح يعوفنه
بحالنه ابد انتي عندج السبع ولبابه عدهه جغاخ بس اني
ظليت وحدي..

عقيق.. السبع موجود مايعوفج
فجر.. صحيح بس مااحتاج من اليوم اذا جانت ساهغه بعشغ زلم غاح اكون اضعافهه مستعده لكلشي من جباغ
ويمكن مغامغات( مغامرات) تصيغ وحته غاح اتعبون منه..

عقيق.. كاعدين انسولف اجت لبابه كعدت يمنه
كالت راح ننزل انعيش هنا بس غرفتنه فوك مانعوفج
وحدج وبين مايتحسن السبع ترجعن للدوام ..

عقيق.. خلي جراح ياخذني اشوفه
لبابه... مايقبلون يكولون المستشفى بيهه زلم هواي
جماعتهم يطلع للبيت واشبعي شوف منه
عقيق... بس خلي يطلع والله انطي عيوني

لبابه... عفتهن وصعدت للغرفه الايام صعبه البيت
وحش من دونهه دموعي مانشفت ابد روحي احسهه
مثل طواحين الهوه ..

هذا الاسبوع الثالث رانيا رجعت لبغداد اخوهه ماقبل
السبع منتبه بس مايتحرك وبعده بالانعاش فجر رجعت
الدوام بس جسد كلساع تتخربط وصارت ام اواب بمكان
ماما تاخذهه للمدرسه ووصلت بيهه تكعدلهه بباب المدرسه لان يخابرونه متخربطه..

عقيق اداوم متقطع تلح علينه اخذوني للسبع وبعدنه
نكذب عليهه بحجه يمه زلم ضرغام دوامه اسبوع باسبوع
ومن يجي اساسا ماانشوفه يكعد ابيته وبعدهه ناس
تجينه ...

جنت كاعده بحيره وعجز ودموعي تنزل تحرك خدي مجاي استوعب الصار معقوله بعد امي ماكو بعد ماشوفها واسمع صوتها لسه ماشبعت منها ومن سوالفها منو الي بعد عينها المن اشكي واحجي البكلبي منو يسمعني الهي لا عتراض على حكمك بس اريد امي محتاجتها اريد اشم ريحتها ليش راحت وعافتني..

فجر منو الها متعوده هذه كبرها وتنام بحضنج يمه شلون انطاج كلبج تعوفينه تدرين بينه مانعرف ونحتاجج بكلشي. ضلينه وحيدات خلاف عينج  بدون شعور اهذي وحدي وعيني على فجر منتهيه ماتحجي وصافنه بلفراغ تقربت منها وخذتها لحضني حضنتني حيل واديها ترجف خايفه اعرف تفكيرها وشنو اليدور براسها خايفه من الناس ومن جبار، وشلون تكمل حياتها وحدها وامي ماموجوده ...

طببتها للغرفه نيمتها وكعدت يم راسها تشهك بس ماكو دموع فجر مستحيل تتحمل فراك ماما متعلقه بيها كلش صافنه فزز صفنتي صوت نوال وهيه تسلم على عمتي اجت عليه سلمت هيه وامها مابدر مني اي رده فعل احس روحي ضايعه فقدان امي خلاني احس بلنعمه الجنت عايشه بيها وهيه موجوده ومساندتني احس بلامان بوجودها بس هسه ضايعه اباوع بالوجوه مابيها ريحه امي

البيت مليان ناس لان اليوم خميس ونسوي ثواب ونعزم علي كله متكفله شيخ ياسين لان مرته بعدني كاعده يم فجر اجت عمتي كالت جراح يريدج حاولت اكوم ماكدرت احس بألم اسفل بطني سندتني عمتي وطلعت لكيت جراح منتجي على باب من شافني اجه بتجاهي

جراح  ..  شلون صرتي بالي يمج
لبابه...تعبانه وبسرعه بجيت تقرب،لمني لحضنه وهمس
جراح...لاتشلين هم اني يمج وهذه حد يومها وكلنه على نفس الطريق
لبابه....من يكول هيج انهضم بلزايد واني اذكر امي راحت بدون وداع وعافتنه وحدنه جراح اريد امي
جراح...ادعيلها بلرحمه وارتاحي ولاضلين تبجين الدموع مترجع الراح ..

لبابه...بهل اثناء طب ضرغام صاح جراااح وينك يمعود تعال بسرعه عفته وطبيت وجراح طلع بره يم الزلم صارت نوال بوجهي تباوعلنه بعين صلفه  اني تعبانه وجودها وترني  عفتها وطبيت يم فجر نفس وضعها

البيت مافرغ ناس رايحه وناس جايه  ونوال تفتر، بلبيت بس ابرار مانطتها مجال من يطلبون شي ضرغام لو جراح تكلها كعدي اني اسويلهم احس الالم زاد عندي وصار اقوه  ماينحمل حست عليه عمتي سالتني شبيج يمه لبابه كتلها عمه بطني موتتني...

اجت عليه كومتني عمود ارتاح بغرفتي بس وكفت احس برطوبه وشي قوي نزل باوعت بوجهه عمتي كتلها عمه راح يموت ابني فدوه ساعديني لا تخلي يموت ماتحمل افقده هوه بس  البقالي وهوه املي الوحيد الاعيش،عموده ماريد اخسره احجي وابجي...

عمتي ركضت صاحت لجراح واني منهاره ابجي ولزمه بطني ونوال واكفه على جهه تباوعلي بنضره ماعرفت شلون افسرها اسمع صوت جراح صاح يا اااالله  لان البيت مليان نسوان غربه وطب وعمتي وياه لبسه عباتها

جراح....لبابه شصار بشنو تحسين
لبابه....جراح ابني راح يموت
ام جراح....ماكو شي يمه لا تخافين بس خل البسج بسرعه وهسه نروح للمستشفى وان شاء الله ماكو.شي

لبابه... لبست بسرعه وماكدر اخطي خطوه من الالم تقرب جراح شالني ضميت وجهي بصدره وابجي.وضرغام طبب السياره للكراج صعدني وره وعمتي وياي واخذ السويج من ضرغام  وطلعنه للمستشفى دموعي مانشفت بذاك اليوم اول ماوصلنه حالتي فدمره والنزيف زاد...

جابولي كرسي متحرك دخلوني اجت الدكتوره فحصتني واني اون من الوجع كلشي بيه يوجعني ومكسور احتاجيت امي احتاجيتها بهاي الحظه تكون وياي وتدعيلي اول مافحصتني الدكتوره كالت ضروري،نزل الطفل لام ميت ابطنها..

حرت منين اتلكه الصدمات وعلى منو ابجي على امي الراحت وبعد ماشوفها لو على ابني الخسرته لو فجر العفتها وحدها بنص النسوان وحيده لو على روحي المكسوره ومستحيل تصلح تأذيت هواي واصبح كلشي بداخلي هش...

حولوني على غرفه العمليات وتخدير موضعي ونزلو ابني وسحبو روحه من داخل احشائي شكد تألمت وتوجعت بوقتها روحي تأذت قبل جسدي طلعوني لغير غرفه وعمتي وياي جراح واكف بره بلممر من شافني اجه بسرعه بتجاهي واني كاعده بلكرسي نزل لمستواي ولزم ايدي

جراح.... باسني من راسي وكال لاتنقهرين مامقسوم النه
لبابه....ماحجيت وياه ماعندي طاقه حتى احجي خلوني بغرفه وحدي وضربوني ابره مال اوجاع وشدولي مغذي  وعمتي تقره قران على راسي مر تقريبا 3ساعات اجت الدكتوره شافتني كالت تكدرون تطلعوها بس وضعها تعبان ضروري ترتاح طلعنه للبيت والطريق كله دموعي مانشفت..

مرجعه راسي على جامه وعيوني على طريق ماعرف وين راح ياخذني وين يوكف قطاري بيا محطه وين يصفه بيه الوكت من يوم الخليت رجلي بلبصره واني يوميه بحال وكل حال اتعس من القبله اطلع من مطب اطب بغيره كل مااكول خلص رتاحيت تضربني الدنيا ضربه توكني من طولي  رحت اني وابني ورجعت وحدي مااملك شي وحيده لا ام ولا ابن خسرتهم ثنينهم وشنو راح اخسر بعد...

رجعت للبيت مكسوره خاطر وينج يوم جان هسه
تلكيتيني وبجيتي وياي صرت اشبه بالرماد ماعندي
اي احساس ومشاعر حته جراح ماعبر كلمه وحده
غير العوض بالله...

تأثيرهم بالسبع خله الكل على اعصابه من ضرغام
لجراح لياسين كلهم صايرين بارود اقل كلمه يعصبون

اتذكر نظرات نوال شلون جانت بشماته ومااحترمت
المكان والحاله وتضحك هي وايناس ماعندي
طاقه اردهم نمت بغرفه ماما وفجر وعقيق يمي
السواد مخيم علينه وكل وحده بينه بداخلهه غصه..

عقيق... اجه جراح كال السبع يريد يشوفج
بسرعه بدلت وفرحه ممزوجه بحزن بداخلي
رحت وياه امشي بمررات المستشفى واتمنى لويكوم
يتلكاني ويحضني ويكلي مثل كل مره امشي بويه

طبيت للغرفه يمه اواب شافني وطلع ذاك السبع
الضخم ابو صوت الحلو يريد يفر راسه عليه مايكدر
بس عينه ادور واشر باصبعه تعالي...

ازيد من خبر وفاه خاله الموقف اريد اكله شلونك
مااكدر اريد اكله كوم لاتعوفني مااكدر اشهك ونفسي
يتكطع ودنكت على ايده اريد ابوسهه وسحبهه بالم..

خله ايده ع راسي واني مدنكه وحجه بصوت تعبان
لاتبجين كلبج تعبان يابعد كلبي....

زادت شهكاتي واكله كوم لاتعوفني ماتلوكلك النومه
والله ضايعين بدونك انت مودكول سموني السبع
لان اسم على مسمى

السبع.. كافي عقيقي دزيت اشوفج كلبي محترك
عليج مو تزوديهه ايام واطلع بس مااريدج هيج
ازعل عليج

عقيق... كلهم يكذبون عليه محد كال انت هيج
كالو زين وانت بعدك ماتتحرك شنو اليوجعك
كون بيه ولابيك

السبع.. اسم الله عليج صايره خوش تحجين
عقيق..بس صير زين والله مااسكت احجي اشكال
وحته اصير حامل

السبع.. حته ابتسامه مااكدر ابتسم انتي ماتعرفين
بس سالفه الحامل وانتي مخلصتهه عليه صايم
عقيق.. لا وعد بس تطلع حته كلبي يطيب

السبع... ممم ديربالج على نفسج ويله ارجعي
لان جماعتي جاين بالطريق وسلميلي على فجر
خلي تصير سباعيه ولبابه كليلهه الله يعوضج

عقيق.. دنكت علي بسته وطلعت رجعني جراح
للبيت شويه ارتاحيت رغم حالته الصعبه بس
على الاقل شفته بعيني...

فجر... نفس الصار بيه بوفاه شهد كمت احلم بيهم
اكره النوم من كدما يأذيني اشوف ماما وبابا اتمنى
اروح يمهم بس اشوفهم بعيدين وطريقهم موطريقي
ولا حياتهم مثلنه...

كمت انام ومرات افز على راشديات لبابه وعقيق
لان مغمي عليه صحتي حيل خانت بيه ودخلت
بفتره بس الله يدري بيهه شنو وشعانيت ..

بيومهه نمت من وقت تعبانه واحس ركبتي تفتر
وحدهه عبالي هبوط رفعت رجليه وغفيت
نفس الكوابيس والاحلام واحس جسمي
ينتفض هو وعقلي ويرفض يستوعب الصار..

فتحت عيني بثقل وعبالك جبل على راسي
عيوني يلزكن افتحهن بصعوبه ماادري
اني وين بس هذا مومكاني رفعت راسي اكثر
شفت اواب واني نايمه على رجله بس اني وين؟
ومنو جابني هنا وحدي؟؟

.
.
.
يتببببببببع... احبكم