رواية وعصفت بنا الاقدار الفصل الثاني وخمسون 52 - بقلم Rozaya1122

وعصفت بنا الاقدار... البارت الخمسون
للكاتبه زهراء ( روزايه)...

احس بعدك مشت
حاولت اصبر وتاني وماعشت
جنها مو روحي القويه الماتطيح !
جني وركات الخريف الصوفرت .
.....

فجر... اريد مساحه وامسح بيهه دماغي من اي حدث
اشوفه حته لايتحقق اريد الكل يصدگني ومايكولون تتخيل اريد اعيش حالي حال الناس مااشوف اي شي ولا اريد احلم ويتحقق..

حلمت اكو حفله ابيتنه ولبابه لابسه احمر وترگص
واني كاعده بالزاويه لابسه بدله مال سهرات واباوع
بعيني بس كلهه ملتهيه عني ومحد يشوفني لان حايرين
بلبابه تجذب النظر برگصهه ...

ادور على عقيق ماشفتهه بس البيت هوسه وعمه
ام جراح هي القايمه بواجب الخطار ادور على ماما ماشفتهه من ضمن الحضور شفت هيام وخديجه وام ياسين شفت ام اواب اكو فرحه بوجهه وكلساع تكوم هي ولبابه يهزن  ويكعدن...

فزيت من نومتي مرعوبه ماما بين عيوني يمكن هي لحظات علما استوعبت الحلم وكمزت من فراشي اصرخ اريد ماما هذا الحلم موحلو الرگص موزين الاحمر بالحلم موزين

ابجي واتوسل بجراح اكله خابرهم لايجون احساس
يفوق البشاعه مسيطر عليه بس محد يصدگني محد
يسمعني يكلولي نص الليل هسه الصبح انخابرهم
اريد احاجي السبع واكله ضم ماما لاتجي خاف يصير شي...

يقنعون بيه وعبالهم حلم عادي لان ماسولفته رجعوني
للغرفه وظلت عمه يمنه عقيق لازمه ايدي ودكلي
اني هم مرات احلم هذا كابوس هزيت راسي برفض
وكتلهه خابري السبع !!!

عقيق.. باوعت على الساعه ب3 الفجر خاف يفز عباله
اكو شي واذا اخابره شنو اكله؟
فجر.. لايجون ماادري اي شي كولي فجر حلمانه موزين
عقيق.. اخذت التليفون وطلعت للصاله دكيت طولت الدكه يله رد صوته مال واحد مهبوط

السبع.. عقيق شكو شصاير؟؟ بيج شي؟؟
عقيق.. لاماكو شي لاتخاف بس فجر كالت خابري
حلمانه حلم موزين
السبع.. انعل حظج ياعقيق انتي وفجر عبالي صاير
شي ماتتحملين للصبح

عقيق.. شعليه اني هي فجر بس تبجي دكول لايجون
حلمهه موحلو وبس تصيح ماما
السبع.. ماكو شي لاتخافن باجر كلساع اخابركم وطريق
البصره حافظه لاتخافن طمنيهه ونامن

عقيق.. انكرب گلبي من ملامح فجر مااقتنعت ابد وطلعت
بره واني مانمت كلساع اباوعلهه لو تصلي لو تدعي
لحدماصار الصبح وكعدت كلهه..

لبابه.. اعرف فجر احساسهه واحلامهه بالمكان بس اقنع
بنفسي واكول لا مايتحقق قريب الصبح يله غفيت بس جراح نايم هم عنده دوام وهم علاجه مايحب السهر...

حسيت على صوته وهو يكعدني فتحت عيني ب7
غطيت راسي كتله خليني نايمه
جراح.. كومي اليوم عندج دوام خليني اوصلج وشفتلج
خط حته ترجعين وياه
لبابه.. ليش ماكتلي البارحه حته ممحضره ملابس
جراح.. نسيت يله بدلي على راحتج حتلو نتاخر نض ساعه

لبابه... كمت من الفراش رحت للحمام غسلت عمه مسويه
ريوك فجر وعقيق وجوهن ماتبشر بخير تريكن وطلعن
اجاهن الخط واني رحت بدلت تاخرت حيل وجراح عنده
دوام بس ساكت سمعته خابرهم كالهم اتاخر شويه اجمعوا المعاملات بس اجي اوقعهن...

وكفت كدامه كتله كملت باوع على طولي شويه بطني مبينه واني ممشتريه ملابس حوامل كال ماعندج غيره
هزيت راسي لااا بس اليوم من تجي ماما نطلع نشتري..

سكت ماحجه كال يله انزلي سلمت على خاله ظلت وحدهه وطلعنه وصلني للكليه كمل كلشي وعافني وراح دخلت محاضره جان قسمي تربيه رياضيات اصلا اموت منه شلون راح اصير مدرسه ماادري...

اكو بنات اثنين جانن وياي بالمدرسه اخر محاضره
ماعدنه والخط يجيني ب2 كلت خلي اخابر جراح
اكله يخابرني يجيني من وقت ادك ميجاوب ظل بالي
قلقت ومنا حلم فجر وحالتهه..

طلعت رقم ماما اتصلت بيهه يطلعلي مغلق اني الصبح
خابرتهه وكالت خلي البنات يتريكن مويرحن بدون  ريوك
وتوصياتهه ماما امشي على كيفج ولاتكمزين على الدرج..

صابني القلق اكثر طلعت رقم السبع اتصل هم مغلق
جنت كاعده بدون شعور كمت وكفت وواحد انتزع كلبي
وشمره بعيد ودمعه قلق وخوف نزلت بسرعه وعبالك
جانت متحضره...

ظليت ادك على جراح هواي فوك 5 المكالمات جاوبني
هالبابه بسرعه كتله جراح تعال اخذني كلبي يوجعني
وماما تليفونهه مغلق

جراح.. على كيفج جايج بالطريق
لبابه.. صوته ماعجبني ابد اريد اضرب راسي بالحايط
حته لا افكر بافكار سيئه نص ساعه ودك عليه كال اطلعي
طلعت امشي سريع فتحت الباب وصعدت التفتت علي
فدوه ماما رجعت؟؟

جراح... ماادري جنت بالدوام هسه انروح للبيت
لبابه.. جذب ملامحه توحي بغير شي كلما احجي يكلي
جنت بالدوام قريب مانوصل لشارعنه جانت سيارات
هواي وزلم كلهه كبار ..

ماكو داعي يحجون هاهي ماما بيهه شي واذا موماما
السبع اتلفت يمنه ويسره واحنه نفوت بين السيارات
ماشفت واحد اعرفه كلهه غربه باب بيتنه مفتوح
كله وهاي الزلم ماتنجمع غير بس الفاتحه والعرس...

كمت ابجي واعيط جراح شكو ماما بيهه شي؟؟
شال تليفونه خابر على امه كالهه اطلعي بسرعه
نزلني واني اجر بايدي اريد اركض من نصهم ادور
على امي شلون ماتلگتني وعافتني...

عمه حالهه ماتنوصف خدودهه حمر والعيون مورمه
صرخت بعلو صوتي ماما اجيت اني كومي تلگيني
انتي التوكفين بالباب تبوسينه قبل لا نطلع ومن نرجع

طبيت للبيت وعساني ماطبيت بعدج يايمه كلهه النسوان
مجتمعه بس انتي ماكو انتي الحريصه الماتعوفين بيتج
شلون بيتج هيج فارغ ادور على فجر اسمع عياطهه
راج الغرفه رج...

فقدت ماادري شسويت شنو شكيت وشنو ضربت
شحجيت وشصرخت يايمه وينج يالمعدله يالمرتبه
يالصبوره تحملتي الظلم وانتي بعز شبابج...

شلون عفتينه اني واختي لا عفتي وحده من ريحتج
لاخاله ولا حبيبه يالتسوين الحبايب والكرايب
منو يعلمنه منو ينصحنه ولج يووووم شلون رحتي
بدون وداع....

لازمتني عمه حته لا اذي نفسي واسمع صوت نسوان
يكولن خطيه بنياتهه بعدهن زغار الله يرحمهه
خوش مره معدله  ركضت لغرفتهه ريحتهه ترست خشمي
فجر كاعده بالكاع وضامه راسهه بالجربايه
تشتم بمكانهه وتصيح اريد امي...

ايدي ترجف اريد احضن فجر مااكدر اريد ايد ماما
تلمنه من نخاف ومن نبجي نخلي راسنه على صدرهه
ودكول اني وياكم اصير بمية رجال اذا واحد مسكم
مدام امكم عايشه محد يطخلكم طرف..

هسه رحتي ياامي شراح يصير بفراكج شلون نعيش
بوسط الوحوش وانتي جنتي مثل الحمامه وادافع
عن صغارهه..

بعد ساعات طويله بديت استوعب وبديت اركز على
الموجودين ام اواب مخليه فجر على رجلهه
ام ياسين كاعده يم رجلين فجر وتغطي بيهن بعباتهه

راسي بحضن ابرار وعمه ام جراح يم النسوان
صوت المله تنوح وتبجي الصخر ابجي بس مايطلع
دمع بس حراره تجوي خدي من دكول ياالحبايب
احس كلبي يصيح ارحموني...

دارت عيني على الغرفه وين عقيق؟؟ وشلون
ماتو بس سمعت حادث حادث بس من الصدمه
ماسألت !!

ام اواب.. الله يصبرج يابنتي انتي الجبيره خلاف
امج وهاي اخيتج صغيره من تشوفج هيج تنهار
هذا حد يومهه لابكيفج ولابكيفنه راحت وعافت وراهه
اثر طيب مااذت احد وربتكم احسن تربيه ..

لبابه.. شلون ماتت؟ وين السبع ؟ لادكولين بي شي
وين عقيق؟؟
ام اواب.. السبع بالمستشفى هم حالته خطره ولج
مالنه حمل فراك العزاز وكامت تبجي

السبع مخابر ضرغام الصبح كايله السياره مالتي
عطلت وام شهد تريد ترجع دكول بناتي وحدهن
شكد مقنعهه تبقه بين مايصلح السياره ماقابله بالهه
يمجن

السبع كايل لضرغام راح اجر سياره وارجع والسياره
انت دز واحد من جماعتك يصلحهه ووديهه يم واحد
من ربعهم رايح السبع مأجر سياره تكسي وراجعين..

بالدرب وكيه حمل ضاربتهم والضربه من جهه المرحومه
والسايق والسبع موزينين بالمستشفى ومصيبتنه
مصيبه راحوا بطولهن الحلو ورجعت المعدله بالتابوت...

لبابه.. بجيت واشهك وعقيق وينهه؟؟
السبع.. سوده عليه مااتحملت من سمعت وكعت بسرعه
واخذهه عاصم للمستشفى وياسين صاح عليه
كال مااريد وحده من نسوان جبار تظل يمهه وخابرت
اختي راحت يمهه مايطلعوهه بالانعاش بس تفتح ينطوهه ابره يكولون تعبانه حيل...

اجت عمه كومتني بصعوبه كالت كومي بدلي يايمه
وصيري قويه بيت امج فارغ لاتعوفنه تدرين بيهه
غراضهه وحاجاتهه عزيزه وحاجت ام اواب راح اصعدهه
ترتاح وعينج على فجر...

فجر بعدهه بملابس المدرسه ماكدرت اعوفهه دنكت عليهه فجوره تعالي وياي نبدل وننزل ماحاجتني
فكهه يرجف والدموع شلال ...

ام اواب.. عوفيهه يمي هسه اني ابدلهه روحي لغرفتج
لبابه.. صعدت ويه عمه ويه كل حركه اشوفهه كدامي
صوتهه باذاني وهي تصيح لبابه لاتركضين على الدرج
لو من تعصب على فجر دكلهه ولج حيزبون اكوملج

لقب فجر زنبلك جان افلام كارتون قديم وتلقب
فجر بي واني لقبي الفاهيه كلشي يطلع من حلكهه
حلو مايوم مدت ايدهه علينه ومايوم عشت شعور
الوحده وهي موجوده ...

رحت للحمام غسلت بس مااكدر اوكف عيوني
الشهكه لازمتني بطني مأذيتني طلعت للغرفه
طلعت ملابسي السود اااخ ياامي جنتي دكولين
صغار انتن مايصلح تلبسن اسود

جانت حته ملابسنه الداخليه ماتخلينه نشتري اسود
دكول البنيه مايصير تلبس اسود حته من اتزوجت
تتخبل اذا شافت قطعه سوده عندي...

بدلت وادور على شال اسود اريد البسه انفتح
الباب جراح بس شفته بجيت سد الباب واجه حضني
كمت ابجي بصوت واصيح راحت ماما جراح ظلينه
يتامى...

حضني حيل ويهدي بيه كل الكلام مايكدر يطفي
الجمر البگلبي سحبني من ايدي كعدنه على الجربايه
وكال صيري قويه كلنه على هذا الطريق والموت حق
اليوم امج باجر انه وانتي ...

لبابه.. مسحت دموعي كتله والسبع شلونه؟؟
جراح.. يمه جماعته وضرغام وضعه حرج لسه مامنتبه
وعنده نزف براسه حته اذانه تنزف الضربه حيل
قويه ...

لبابه.. عقيق لاتعوفوهه هاي امانة السبع وماما تحبهه؟
جراح.. يمهه اخت ام اواب واواب يمهه بنفس المستشفى
كال كلساع امرلهه بالانعاش كلبهه تعبان الله يعدي
هاي المصيبه خاف يفتح عينه السبع ويسأل عليهه..

لبابه.. راح انزل يم فجر مصدومه وحته ماتحجي
جراح.. انه راح انزل بره يم ياسين بس صيري
قويه فدوه وفكري بالبطنج لخاطر امج..

سحبت ايدي من عنده ونزلت جوه جانت الساعه ب3 ولسه ماجابوهه من المستشفى صارت ب4 ضبط والنسوان البره كامن يصرخن فجر فزت وكفت على طولهه وصاحت ماما...

مااكدر اوصف الالم كله انعاد من جديد الله لايشوفكم
مكروه ولايفجعكم بعزيز الله يحفظلكم ابائكم وامهاتكم
ويحفظلكم كل غالي عدكم..

من طلعوهه من البيت فجر تخبلت صوتهه منبوح وتركض حافيه وراهن للشارع بطني حيل اذتني وعبالك
يشاركني بالالم وعيني عليهه شلون بدت تختفي
الوداع يا امي راح تشوفين شهد وبابا العمت عيونج عليهم...

صحت عمه اريدهه تلزم فجر بنص الزلم بس شفت
اواب وكف كدامهه وطببهه ويصيح على امه تعالي اخذيهه مجرد ماالتفت وكعت فجر بالكاع...

شالنهه النسوان واني اركض وراهن طببناهه بالغرفه
وهي فاقده عبالك خشبه حته ايدهه زركه
والنسوان ملتمات فوك راسنه صاحت ام اواب بدون
زحمه اطلعن راح يفوت اواب ..

طلعن كلهن وبقت امه وخديجه دخل اواب يشوفهه
ضربهه راشدي ومدري شخله باصبعهه وماتحركت
نكعناهه بالمي ويضرب بخدهه هواي يله انتبهت

هي على الجربايه وهو بالكاع كاعد ويكلهه اخذي
نفس تهفي بيدهه ماتكدر تتنفس الجو بارد وهوه
بس شح الهوه عليهه ظلينه نهفي الهه واواب يضغط
عليهه اخذي شهيق زفير يله شويه تحسنت

طلع اواب وكمنه اني وياهه بنص النسوان مله تفوت
ومله تطلع ايام الفاتحه ادك براسنه لا خاله ولا حبيبه
عدنه ظلينه وحيدات ومالنه معين غير الله..

ثاني يوم  من الصبح اجت رانيا وخاله ماما بالنسبه لرانيا صديقتهه موعمتهه جانت اكثر من حالتنه بس هي سباعيه كامت للبيت جان بيد هيام وربعهه هي لزمته وحته قفلت غرفة ماما لان جانت بالعزايم امي ماتعوف
غرفتهه مفتوحه...

خلصت الفاتحه وعقيق طلعوهه باخر يوم ابيتهه من راحت الهوسه جابوهه يمنه حيل تعبانه ومن شافتنه
زادت حالتهه ام اواب ويانه ماعافتنه بليل اصعد لغرفتي
صايره تراب..

اكعد بالكاع ابجي لحدما احس كلبي يريد يوكف
بيوم الراحت الناس وصار البيت فارغ وبس فاتحين
شمعه بمكانهه انتهيت اتمنى لو رايحه وياهه
لوميتين كلنه سوه حته ماننفجع واحد بالثاني..

جنت كاعده بالكاع ومرجعه راسي على الجربايه
بطني موتتني وروحي مطحونه راسي منفوخ حته
عيوني توجعني انفتح الباب جراح من شافني هيج
اجه عليه كومني بصعوبه...

بس يتركني اوكع الكاع تفتر بيه صدري احمر من
كدما الحسره شكبرهه بكلبي ادك بقبضة ايدي
حته دكم الدشداشه مكطعه فتح الكنتور طلعلي تراك
وبدلي مابيه حيل حته ارفع. ايدي..

اخذني بحضنه ويحاول يهديني صارت حته النومه
اتمناهه بس اغمض عيني افز على صوتهه وعبالك
تحاجيني لبابه اهتمي بنفسج واختج...

السبع وضعه للاسوء ماانتبه ابد اجه ضرغام كال حته
محد يشوفه النزف مايوكف وعقيق ازيد منه
انكذب عليهه نكلهه منتبه بس مايطلعوا ماتدري
بالباقي...

رانيا... نامت فجر واني كاعده يم عقيق
عقيق.. كلبي يوجعني حيل اخذوني اشوفه
رانيا.. لا ميقبلون بس زلم بس ضرغام كال منتبه
لاتخافين قوي يطلع منهه
عقيق.. رانيا اذا صار بي شي اموت حسيت فاقده
امي خاله احبهه حيل ودللتني والسبع موزين
والله اموت منو الي من دونهم

رانيا.. كولي يالله هسه يصير زين وتفرحين
برجعته ولو بعد عمتي ماكو فرحه يله حبيبتي نامي
تعبتي خلي اكوم اشوف الابواب مقفوله ...

عفتهه وكمت نهايه شهر 12 بارده ثلج الليل
طويل وتعبانين من الفاتحه كلهه ب11 نامت
ضرغام جان بالاستقبال فتحت الباب ماكو فارغ
رحت للمطبخ لكيته يشرب مي...

ضرغام.. ليش مانمتي؟
رانيا.. عقيق هستوهه نامت وردت اتاكد من الابواب
مقفوله
ضرغام.. باجر التحق اني وملابسي مالحكت اوديهن للكوي تكدرين تكويهن
رانيا.. وينهن جيبهن هسه اكويهن

ضرغام.. هسه اجيبهن اكوي بالاوتي مالتي خاف يحتركن
رانيا.. بعدك على هاي السوالف نوعيه التايت ماتبدله
والغسول والعطر
ضرغام... اذا لزگت بشي هاهي مثل مالزكت بيج

رانيا.. منو يكول لازك بيه يجوز عندك وحده منا منا
ضرغام.. ااي عندي وحده ثوله درجه اولى لو احترك
كدامهه دكلي شبيك
رانيا.. منو اني؟
ضرغام.. لا العندي

رانيا.. اعرف عليه بس بنظرك ثوله بس الكل يكول
سباعيه
ضرغام.. يقشمروج ماشفت السباعيه ابد
سويلي جاي بين مااروح اجيبهن

رانيا ...جبت الميز خليته بالمطبخ وخليت القوري
على النار اجه جاب ملابسه والاوتي بديت اكوي
وهو كاعد يدخن يباوعلي صار الجاي صبيتله
وانطيته الكوب..
ضرغام.. اخوج العار شلونه؟؟؟؟

رانيا.. مااحاجي وماما اتفقت ويه وسام بعد ماينطي
نفقه اله مال كل شهرين ينطيهن النه ومن يسأل
حسام كناله كطعهه وراح لوسام كاله ماانطي بعد

ضرغام.. هو ليش مايتزوج
رانيا.. شمدريني مالنه علاقه بي
ضرغام.. ودوامج زين؟
رانيا.. الحمدلله..
اكلك ضرغام شلون بفجر راح تظل وحدهه بهذا البيت شكبره؟؟

ضرغام.. ماادري ياسين يكول خلي جراح ينزل جوه
تظل غرفه جراح فوك بس ينزلون يمهه
رانيا.. اتمنى اظل يمهه بس منو يخليني
ضرغام.. يمهه لو يمي؟؟

رانيا.. انت وجريت نفس ااخ منك
ضرغام..  اااخ مني خوش والله طلع مني
رانيا.. راح انظل هيج
ضرغام.. ماادري عندج حل كولي ماكو سدي حلكج

رانيا... انت ليش هيج عصبي دائما شجاك
ضرغام.. لان ماعندي حل وانتي ادورين حلول وموضوع
ينرفزني وعقلج يخليني اطلع من طوري وفوك
كل هذا احبج

رانيا.. والله غزلك معوق هسه اني شفتهمت رزلتني
لو مدحتني ؟؟
ضرغام.. اني ماارزل حته الانجبي مالتج معناتهه احبج

رانيا... سكتت ماحجيت كملت الستره رحت علگتهه
بالصاله اسمعه اخذ نفس وكال اااخ
لمه عجايز عالنعش حسباتي من يلتمن
بس بصوت خافت...

رانيا... هستوني اريد احجي اجت ام جراح كعدت
تسولف وياه كملت الباقي ورحت علكتهن اشتميت
عطره ومديت اديه بجيوبه مدري شدور بس لا ارادي
متعلمه اي شي من ملابسي وملابس اطفالي ادورهن

اجت بيدي ورقه ملفوفه مال واحد معقجهه
فتحتهه بيهه طلقه ومكتوب القتل القتل
الدم وملطخه بدم ..

فزيت بخوف بسرعه رجعتهه وخليت ام جراح
طلعت وركضتله ضرغام ضرغام شنو هاي الورقه
جكارته بحلكه رفعلي حاجبه وكال وين موليه
ادورين؟؟

رانيا.. منو مهددك احجي ضرغام؟؟
ضرغام.. اوكفي لاتخزريني كمت اخاف
رانيا.. ضرغام احجي منو يهددك وشيردون منك؟
ضرغام.. هتيله

رانيا.. تحجي صدك ضرغام يهددوك لاتطلع
ضرغام... بويه شابع تهديد كل ازباله ذبو بالسجن
يهددونه موبس اني كل الضباط الوياي
رانيا.. ليش ؟
ضرغام.. هاي بعد احنه استخبارات ومقسمين
واني على التحقيق هذوله العدهم جرائم وتدعمهم
جماعات يهددون ضابط التحقيق والقاضي حته الشرطي
مايخلص منهم لو تصير ويه الباطل لو نكتلك

رانيا.. واذا صار عليك شي تريدني اموت؟
ضرغام.. اسم الله عليج من الموت مايصير شي
هذوله يمسلتون عبالهم لسه نحقق وهو راح
انشمر بسجن الحوت

رانيا.. شلون كلام يخوف شبيك جنك واحد صكاك
ضرغام.. شحجيت غير العدهم جرائم قويه يسجنوهم
بالحوت ترى اني رجال تحقيق كلشي مااسوي
رانيا... اوعدني تنتبه على نفسك
ضرغام.. مااوعدج...

رانيا.. ياااااا
ضرغام.. وجعاااا
رانيا.. الصوج موبيك اني الخايفه عليك
ضرغام.. خافي على روحج وكومي نامي
وديربالج على نفسج الفجر اروح ...

رانيا.. مد ايده لمحفظته طلعهه وحسب فلوس وكال
خليهم عندج ماقبلت اخذهم الجكاره بيده كال
تاخذيهن لووو واشرلي بيهه ابتسمت كتله جذاب
ماتسويهه كال اي والله جذاب بهاي صدك؟؟

اخذتهن ورحت للغرفه ضميتهن ونمت
بفراشي كلنه لحسام اسبوع ونرجع بس مانرجع
اله نطمن على السبع وبعده خطار يجيهم بحكم
شيوخ وناس على السبع وناس للفاتحه...

عقيق.. ثاني يوم العصر كل الي اساله عن السبع
يكول منتبه وزين بس كلبي يكول غير شي
حته ضرغام ماكو وكالو التحق لان ضروري عدهم واجب
وتفتيش ...

جنت كاعده بنص النسوان مال القصر عمات السبع
وهيام وخديجه ويحجن فلان هيج وفلان هيج
اجت عمه ام جراح كالت عقيق اجت صديقتج
تريد تشوفج استغربت اني ماعندي صديقه..

كمت لبست شالي وطلعت جانت واكفه بالباب ولابسه
عبايه راس من حاجتهه عمه فوتي بنيتي منا شارع
من التفتت واشوفهه ضحى جايه ووحدهه
استغربت جيتهه وشدلالهه ابيتنه؟؟ وشلون اجت
واساسا دوامنه صباحي حته خط ماكو !!!!

.
.
.
يتبببببببع.... متابعه ممتعه
اعتذر عن مشاهد الحزن حاولت اختصرهه الكم
كفاكم الله من كل شر ... احبكم