رواية وعصفت بنا الاقدار الفصل الثاني وستون 62 - بقلم Rozaya1122

وعصفت بنا الاقدار... البارت التاسع والخمسون
للكاتبه زهراء ( روزايه)...

( بارت مفاجىء لعيونكم ولتفاعلكم الحلو وبمناسبه
المليونين مشاهده .... استمتعوا بالقراءه )

اوكف يادمع لا تجرح الخدين
ولا تكسر خواطر هي مكسوره
اوكف وانتظر ارد احجي اني وياك
وسمعك قصتي عالناس مشهوره
انه اول بشر ما يعطش بصيف
انه ارتوي بس احضن الصوره
اوكف يادمع لمن اكلك طيح
وارسملي بنزولك صوره مقهوره
صوره طير جااان يطير بين الغيم
شلون يطير هسه وجناحه مكسوره...
....

عقيق...مو بجيت ومو دمع نزل من عيني
قطع جمر تنسحب من كلبي وتنزل على خدي
جمره مثل اسمك وجمره حبك ماتنطفي...

اخذتني لبابه عبالهم راح اتخربط بس جنت
مو بوعيه كلشي بيه يم السبع رفعت راسي ليفوك
ودعيت اذا مقدر على السبع قدر عليه قبله لاتخليني
اعيش يوم واحد وراه...

لبابه.. انخبصنه كلنه اندك على تليفوناتهم محد يرد
ارواحتنه تفرفح عقيق وجهه اصفر ودموعهه
تنزل بسكوت تمسح بيهن وهي تشهك مثل الطفله
ام ست سنوات وفارگت ابوهه

رافعين ادينه ندعي وانريد واحد يطمنه ولو بس
يكول بي روح وبي نفس بس محد خابرنه
ومحد يجاوبنه من كدما دكيت على جراح غلق تليفونه

شويه ونسمع حركه بالباب طلعت ام جراح
تشوف شكو جانو زلم بيهم فد 7 مسلحين
لازمين حراسه على البيت فتحت الباب عمتي وصاحت
يمه الله يرضه عليكم كلولنه السبع وين؟؟

رد واحد منهم حجيه ادعي ربج يوكف بحر الدم
دمه ساح بالكاع واخوته مايعوفون حگه وهسه السبع
بي روح وبينه روح وكدام الشيوخ العم يكتل ابن اخو

لبابه.. واكفين بالباب ونلطم على وجوهنه موهاي كلنه
واكفين ربي اخذ من عمرنه وانطي للسبع هو ابونه
وهو سندنه بالدنيا وعايشين بخيرنه دخيلك ربي
لاتفجعنه بموته لسه جمره امي ماخمدت ...

صار البجي والنوح من كل جهه عقيق لاول مره
اشوفه‍ه هيج بوفاه ماما تخربطت وفقدت
الوعي بس هسه بكامل وعيهه ومكرفصه بالزاويه
وتشهك كل شهكه تطلع منهه احس نياط گلبهه تتكطع

يمكن ساعه مو اكثر وبدت الدنيا تغرب وابو بيتنه
ماندري بي عدل ميت ومحد عنده رحمه ويكول
خلي نگلهن خطيه مرته مريضه بس الظاهر عقل
ماظل عدهم والله يستر من نار ضرغام وجراح

اندفع الباب حيل وهذيج الگولات مال اهل قبل
گولات اهل الجنوب كله على ابن الاخ والحنين
عماتي الكبار رغم جانن عدهن طلعات موحلوه
بس سون العجب من كدما لطمن والجيران التمت علينه

عزاا بهذيج العصريه الطلع بيهه السبع من طوله
ومارجع غير بس العويل وصوت صريخ
النسوان لو عقيق التبجي مابگلبه رحمه ..

لازمه تليفوني وادك على جراح فتح الجهاز
بس دك دك وماكو رجعت مره ثانيه دكيت
جاوبني بصوت عالي هالبابه
لبابه.. جررراح شبي السبع كول الله عليك
عقيق راح تموت

جراح.. موزين الطلقه براسه دخلو لغرفه العمليات
ادعوله ابد لا اطلعن الحراس بالباب ممنوع وحده
منجن توصل الحديقه وعينكم على عقيق
ترى اخر نظره اله لزم ايد ضرغام وكاله عقيق
وماكدر يكمل...

لبابه.. سديته منه وكعدت بنصهن كلهه تبجي
على الاقل احنه مومريضات ونبجي ونلطم بس
عقيق الشهكه لازمتهه وماترمش ولاتحجي بس
الدموع تجري...
....

جبار.. هي شنهي انه جمعتكم هنا حته اعلمكم بسوالف
ابن اخوي اطاول هواي علينه كتل وليدي وحبس بنتي
العود وكل هذا واكول معذور وتالي ماخله احترام لكبرتي

ابو علاء.. ياابو عامر احنه بجمعتنه هاي والشيوخ كاعده
وعفنه ديارنه واجينه هاي كدامك عمامنه من الناصريه
ومن الكوت اجينه على شنهي غير حته انحل موضوع
العداوه البينك وبين اخوك وبينك وبين ياسين ...

جبار.. ياسين عدوي موابن عمي انه وياه من زمان
موصلح والكاع كاعي وياسين ماله شبر بهالكاع
وهسه اكدر اطلعه بطرك العگال

الشيخ.. موهيج الحجي ياابو عامر انت شيخ عشيره
ومعروف والشيخ ياسين شيخ على فخذهم بس انت
تعلمنه الاصول وحسب ماعلمونه اهلنه نتعلم الاصول
من راس الشيخ

جبار.. انه اكلكم هنا عداوتي ماتنتهي ويع ابن اخوي
حاقد عليه صار فوك 35 سنه وشامر بلوه موتت اهله
براسي عمي هاي انه كدامكم اذا عنده دليل عليه بگد
الشعره انه كاتل اخوي العود رگبتي سداده اله ويكوم
وياخذ ثاره بنص ديواني

الشيخ.. هسه احنه نحلهه اليوم لازم تنتهي هالعداوه
والماانتهت عداوتك لا نعرفكم ولاتعرفونه اطلعوا
من عدنه وهاي بعد انتو تصيرون گبلگم ولانوگفلكم
بفصل ولا بثار..

السبع... من رخصتكم الحجي مو مگالب ابو عامر
يحجي العلي وانه احجي العليه وموبس انه
هنا بجمعتنه حته ضرغام وجراح هاي انه كدامكم
اذا مانحلت بالخير يحلهه اسلاحي ..

جبار.. هااا تحجي بالسلاح ياابن فاضل
السبع.. انه مااحجي وياك غير بالسلاح لان انت
عايش على الدم وبالحجي المسايس ماتجي
يا اخو ابوي

جبار.. من عمره 10 سنين لهذا اليوم ماكال
عمي يستنكف يكول عمي الشيخ لو يكول ابو عامر
لو اخو ابوي ترضوهه ياشيوخ اهلنه

السبع.. ماعندي عم كلش زين تدري وموجديده
عليك حته هسه جاي تحجي بهيج موضوع
خلينه بالاساس لاادور غير سوالف...

يا اهل الخير انه ابن فاضل والمالحگ على ابوي
خل يسأل اهله والاكبرمنه ابوي فاضل جان شيخ
عشاير ال....... وماطلعت منه العيبه ومايوم
واحد شكه وكال باطل

بس من بين يوم بليله اشوف ابوي مذبوح
وامي الغريبه منكم واخوتي الصغار واختي
اصبعهه اندفن وراهه تريدون اظل عاقل لو اسكت
عن ثارهم..

انه عمري 10 سنين واتذكر بليلتهه ابوي تعارك ويه
جبار الكدامكم على الفلوس والكاع وبأذني سمعت
تهديده من كاله ماخلي عليك يصبح صبح
وشسوه ذبهه براس عمي علي وعباله اصدگه
عباله انام على اذاني وماادور الصح وين والغلط وين

عمي المرحوم علي بريء وعندي دليل يبرىء عمي
وهذا ضرغام شاهد هو ملتقي بعمي قبل وفاته
وحجاله كلشي بس ماراد يسيح دم بيناتنه
وماحجه منو الكتال

هسه انه كدامكم مو بصلب موضوع ثاري هذا اخذه
لو بعد اسنين لو اخر يوم الي بالدنيا اخذه
وكدامكم انتو الكاعدين انه هسه اريدن حگي
وحگ اخوتي وحگ بنات عمي كل شبر بهاي الكاع
هي ملك لابوي واخذه‍ه جبار

انه الوصي الوحيد لابوي والكاع ورثي شلون
تحولت لجبار انه صغير جنت وقاصر بس
منو وقعله منو دارله الكاع حته جدي المرحوم
مات وره اشهر وظل جبار مالك هاي الكاع كلهه

جبار.. مالك شبر بالكاع كلهه بأسمي وورثي
هاي من ابوي المرحوم هو ابوك اخذهه غصب
مني ومن مات ردت الي..

ضرغام.. يابه عوفك عن السبع امي الهه حصه بورث
ابوهه وينه؟؟؟ انه اسألك عن حصة امي من حقي
اداعي بيهه سنين وانت تصيح ماالكم ومن نريد نحجي
السبع يسكتنه يصيح مو وقته لان يدري وراهه دم

  وهم عوفك عني كول امي مره وانوكل حقهه هم
رحمه على والديك جراح ابن اخوك يعني ابو جراح
ابن الشيخ جريان وهم اله حصه بنص هاي الكاع
وينهه حصه جراح شبر مايملك بيهه

الشيخ.. صدك يا ابو عامر ماكل حگهم
جبار.. مالهم حگ يمي الكاع ابوي دارهه بأسمي
وحته حصص اخواتي دارهم الي چااا هسه
اكعدلكم ابوي الشيخ واكله احجيلهم

ضرغام.. تعرفني زين ياخالي واذا جنت ساكت بسبب
السبع بس بعد السويته ودوسه بيتي وتهديدك الي بمرتي
وعينك عينك دازلك فرخ وورطته ذاك خاس بالسجن
ونكرت عملتك

بس لعبت وياي غلط الجان السبع سكتلك اني مااسكتلك
اجرك للحشم والماحشمتك العشيره اتعامل وياك
بالقانون راد يحجي جبار وسكته ضرغام كاله
لاتحجي اني اجيبهه الك من الاخير

انت متورط بحزب وعندك قضايا تسليب وقتل
ملفك ذاك مشمور على الميز مالتي ومو خوفا منك
راح احوله لاا والله مااريد ادنگ راسي واكول خالي
اليدعي نفسه شيخ...

ابو علاء.. فهمنه السالفه يا ابو ليث وانت ياشيخ
جبار مانريد نسمع منك لان احنه مانقبلهه على رواحنه
يترأسنه واحد ملطخ ايده بالدم الجان عدهم دليل عليك
تعذرنه الشيخه تتحول للأحق منك عبنك ماصنت
اصول اهلنه

ضرغام..اني من حجيت ماجاي اتهمه حجيت متاگد
ودليله عندي ذاك اسمه من ضمن الصكاكين كل العنده
قضيه قتل بسلب عود يجي لجبار بشده فلوس ويدز
من حزبه ينهوا وماكفاه كام يدزلي تهديد لبيتي

وغيرهه وغيرهه كتل طفله بريئه بنت المرحوم علي
وجراح شاهد ومن اجينه بساعتهه واجهنا كال قضيه
شرف وهذا القران المخلي بديوانه دكه 3 مرات وحلف
باطل..

والبنت طلبنه بيهه تقرير طبي وذاك اسمهه ادون بالشرطه
وعيب علينه هسه نحجي بيهه والبت اشرف من الف عكال
يدعي الشيخه وانذبحت كدام اخواتهه الجهال

لو اخو الشيخ ياسين اكو شاهد شافه بذاك الليل
وشهد علي شسوه راح خطف الشاهد ووصل للموت
وماكفاه يدخل سجن شهر وتجي الروس الكبار
اطلعه...

هسه اني كدامكم اكلكم اريد اتحاسب وياه وراهه
عود اتبرى منه كدامكم ولا اعرفه ولايعرفني
كل واحد بينه عنده حق ويه ابو عامر ومدام
جايين حلوهه ورجعوا الحق لأصحابه...

نور... جنه نسمع الهوسه وصوت صياحهم
اشتدالحجي والنقاش ناس ترفع وناس تكبس
جدي الشيخ طلع بره وكام يصيح كام يغلط
على اهل السبع سب ابو السبع وحته ابو جراح

شكد شيوخ واكفه رادو يلزمو وماكدرو
طلع اسلاحه وحطه بصدر السبع ويكله اكتلك
وماتاخذ شبر من الكاع اكتلك ومااخليك تاخذ
الشيخه انت وياسين

محد كدر يلزم جدي الشيخ عبالك شيطان وتربع
براسه اصلا ما انشوفه هذا الشيخ واحد ثاني
مجرم يريدون يلزمو مايكدرون ماادري شلون صار
كلشي بلحظه

السبع ابد مارفع اسلاحه وجان هادىء حيل
حته الشيوخ يحجون ويه السبع ويتعذرون منه
بس ابد ماتجاوز عكس كل مره من يصير عصبي

التفت يحجي ويه ضرغام وماانشوف غير جدي
الشيخ يضرب السبع طلقه اجته براسه ومن وره
وهو على وكفته وكع بحضن ضرغام بس صوت جراح
رج القصر رج وهو يصيح جمررررررره...

حياتنه مأساة من وره ظلمهم جراح طلع اسلاحه
وضرب على جدي الشيخ بس وكعت برجل عمي عباس
لان صار كدامه والشيوخ لزمت جراح

اخذوا السبع والسيارات كلهه راحت وراه
بس الشيخ الجبير  ابو الناصريه كام يصيح
على جدي وكاله اذا طلعت عتبه باب القصر دمك
مهدور انت واولادك حجه هيج ولحكوا السبع

انحبس جدي بالقصر ويكمز بكل مكان ويصيح
ما انطي الشيخه وماانطي الكاع عبالك هوس
بي بالفلوس وصدك لوكالو هيج المزبله تشتم ريحتهه
هيجوا جبار وطلعت حقيقته...

عقيق.. كلبي يالسبع ماحسيت بيه اني
عقيقتك انت وعدتني كتلي مااعوفج
كتلي راح ادرسين وراح تصيرين ام واخذج انسافر
ونسوي عمليه

انت كتلي اخاف عليج من نفسي
واذا نزلت دمعه منج روحي تحترك
انت كتلي تفتحين عينج تشوفيني
تغمضين عينج اني يم راسج

اخذتني رجليه لبيتي انفاسه بكل ركن
موجوده باكيت الجكاير والجداحه مالته
على الكاونتر امشي اتلمس بالحايط هنا وكفنه
وهنا اتشاقينه هنا دغدغني وشالني على ظهره

امشي ودليلي دموعي سويج سيارته يم التلفزيون
لان راح ويه ضرغام اجمع بغراضه شلگه كدامي
اشيله واخلي على كلبي

فتحت الغرفه وشمرت نفسي على الجربايه
اتنفس بمخدته والله هذا عطره والسبع عايش
مايموت هو كال مااعوفج هو كال ماافارگج

عطت بصوت عالي جمرررره لاتعوفني
انت ابوي وانت امي .. انت صديقي وحبيبي
انت زوجي انت المايوم خفت وتقيدت منه
انت الي احجي كلشي بدون ماافكر

لان اذا غلط تنصحني واذا صح تثني عليه
وتمدحني انت الوحيد الماتصنعت كدامه
ولا استحيت انت روحي وعمري وابو بيتي
اذا غبت عني شلون اكمل حياتي انت موتدري اني
وحيده وماعندي بس انت ؟!!

رانيا... رحت وره عقيق لگيتهه نايمه وتبجي وحاضنه
ملابس السبع سحبتهه كوه لاتفاولين علي
كولي يالله السبع مايعوفج وهسه يطيب ويرجعلج
كومي وياي اذا دره بيج هيج حالتج يزعل عليج

كوه كومتهه تكسر الخاطر اخذتهه يم فجر
دك تليفوني ضرغام فتحت خط كال تعالي للبيت
بسرعه ركضت لگيته جاي يريد يبدل طلع سلاحه
وبدل المخزن ملابسه كلهه دم نزعهه
وطب سبح واني واكفتله بباب الحمام انطيته غيرهن

امشي وراه واحجي ضرغام كول السبع يصير
زين؟؟ جاوبني وهو مدنگ يسوي بالمسدس
مايكوم منهه الرصاصه بدماغه تعرفين شنو براسه

رانيا.. ضربت خدي بقوه وجبار العار وينه؟؟
ضرغام.. طلعت دوريه اخذته بس شيفيد اذا راح
السبع رانياااا السبع كل اهلي اذا صار بي شي
شسوي احرك الدنيا على راس جبار اخذ روحه بيدي

رانيا.. كول يالله السبع قوي ويطلع منهه هاي عقيق
راح تموت كلساع اكول راح يوكف كلبهه بس
مدري شبيهه بس تشهك خايفه عليهه لان كل مره
تتخربط هالمره شالته بحيلهه

ضرغام.. تدرين من اخذناه فاقد والنزف اخذه
بس خلو على السديه فتح عينه بس كال لا تعوفون
عقيق وسكت يعني بعز حالته وهو كدام الموت
وفكر بيهه ...

رانيا...اخذ غراضه وطلع ياربي شنو من مأساه
وشنو من مشكله نهايتهه الدم خايفه على ضرغام
خاف يتهور لان منهار فد مره على السبع

جبار بالسجن وعباس ابنه متصوب برجله
السبع ماانتبه وظلينه 3 ايام ضبط
بدت عقيق تفقد اخر ماتملك من طاقه
لحدما وكعت ودخلنه بيهه مستشفى

مانعرف المن نركض للناس التجمعت فوك راسنه
لو على عقيق الخلوهه بالانعاش وكالو ممنوع
حته الزياره مگابلين الغرفه وكاعدين كل واحد بصوب

هو يصارع بروحه وهي مااتحملت فراگه
3 ايام هي ماتاكل ولاتشرب لحدما وكعت من
كيفهه لحدما نقلنالهه بالمستشفى وهي تبجي
والشهكه مافاركتهه ابد.

اسبوع كامل والسبع مامنتبه هاي الشيوخ
الي اجت تحل المشكله سوت بيتنه مقر
وجراح ماطب البيت بس ضرغام شويه اقوه
والشيخ ياسين يمنه وهو يم الخطار

اجه ضرغام كال الطبيب يكول احتمال يدخل
غيبوبه راح نتتظر 72 ساعه ونحدد حالته
وضعه خطر حيل ومانكدر نشخص اي حاله لان
مانعرف الرصاصه ضربت ياعصب يعني حته اذا عاش
امله يكون انسان طبيعي حيل ضعيف. .

زاد الحزن فجر نسخه عقيق الثاني ماترضه
تسكت امي داخله ويه عقيق تفتح عينهه
ويركضون ينطوهه مهدئات نبضهه ضعيف ومايسيطرون
علي ...

جنت ابدل لسيوفي ودك تليفوني امي جاوبتهه
بقلق كالت رانيا تعالولي عقيق موزينه
ركضت للشيخ ياسين كتله وخابر على ضرغام
كاله راح اخذ ام سيف واروح للمستشفى...

بين ماوصلنه لگينه امي تفتر بالباب تصيح
الحگولهه والطبيب يريدكم مايقبل يحجي
ركضت ويه الشيخ اندور على الطبيب شويه
وطببونه لغرفته طلع تقاريرهه وكال مريضتكم
عدهه عجز وماتتحمل حالتهه ونبضهه ضعيف..

دنگت راسي وبجيت ياربي شنو من بلاء
ارحمنه يا الهي مانتحمل فقد العزاز لسه نار
عمتي ماطفت هي وابوي وانوب نفقد شبابنه

ماقبلوا انظل بس مرافق واحد واصلا محد يدخلهه
باوعتلهه من الجامه على الاجهزه وصوت الجهاز يوتر
والواحد يعد ساعات ...

هاي ماانساهه ابد السبع على الاجهزه وعقيق
نفسه مايجمعهم غير صوت الجهاز وهو يسابق
منو بيهم راح يتحمل ويعيش

اكيد حبهم قوي وبينهم ترابط روحي حتلو
فاقدين حتلو بين الحياة والموت بس
لازم گلوبهم رغم ضعفهه حاسه ببعض
گلب السبع معانق گلب عقيق حته واحد
يشد على عزيمه الثاني ...

هذا الاسبوع الثاني بده اجه جراح كال السبع
حرك ايده والطبيب كال حركه الجهه اليسرى
تمام بس ظلت اليمنى ماحركهه بس مافتح عينه
كلبه زين ونبضه طبيعي بس دماغه المتضرر

يوم عن يوم انراقب حاله السبع لحدما صار 15 يوم
سمعنه صوت زلم بره وهم يصيحون صلوات صلوات
ميخالف حتلو بس جسد ويرد علينه

الي عرفناه السبع فقد نظره الضربه جاي على عصب
حساس مسببله عمه وتلف بوحده من خلايا الدماغ
احتمال حته يصير عنده نوبات فقدان ذاكره
يعني ساعه يتذكر وساعه يفقد ...

مانعرف نفرح لو نحزن شفت عماته ماسكتن من البجي
يدعن على جبار وينعن السبع ومايسمنه
غير الحنين ابو المحنه النومه موالك يالسبع

عقيق حته اذا تنتبه تسأل عن السبع وبسرعه كلبهه
يضعف ويصير مراكض الاطباء بفلس عليهه
خلوهه على مهدئات وماتدري بالدنيا شبيهه
وشراح تكولين من تدرين السبع هيج راح يعيش

ماطمنه الطبيب على السبع كال مااطمنكم لان
على لحظه ينزف عنده شريان وماانلحك علي
جانوا كلهم محتارين شلون يكولون اله ترى
انت فقدت بصرك وموبصحتك الكامله...

كالو راح يطلع اليوم جانو خايفين من طلعته
شيگولون وين عقيق سمعت جراح يكول
الطبيب كاله انت هسه رجال كفيف البصر
وعندك فقدان ذاكره جزيء
يكول جان جوابه الحمدلله على كل بلاء ...

سائلهم عن عقيق وكايليله زينه بحيث
الشيخ ياسين عايف الناس وكلساع صاح ام
جراح شلون اذا سأل عنهه وروح ابوي هذا
يوكع ولاجنه سبع الحيد هاي البت هي كل اهله

واليوم طلع السبع الذبايح والهلاهل ترست الشارع
بجينه على حالته شلون كايده جراح ولابس نظارات سود
معتمه بس كشكل حته لاتبين عيونه دخلوا للمضيف
والكل يتحمدله على السلامه وهو يسمع
بس الاصوات ومايميز هذا منو وهذا المن؟!

نص ساعه واجه ضرغام صاح ام جراح
هو وياسين كالولهه يريد يروح لبيته
ويسأل عنهه يريد يشوفهه شفته طلع من الاستقبال
وسانده جراح يدلي بالطريق وياسين وضرغام
الحيره بوجوهم شراح يكلوله عقيق تصارع الموت
وعدهه عجز بالقلب والطبيب كال بس نرفع الجهاز
تموت .....

.
.
.
يتبببببببع............ احبكم