رواية وعصفت بنا الاقدار الفصل الحادي وستون 61 - بقلم Rozaya1122

وعصفت بنا الاقدار... البارت الثامن والخمسون
للكاتبه زهراء ( روزايه)...

گلب باوراق عمرك ناس راحو ناس اجو..
ناس رايدهم يظلون ومشوا...
اكو ناس تعوفهم ترتاح منهم
وناس ظلتهم حمل...
واكو ناس طيوفهم تكعد براسك
مثل خرخاشه بحجل......
....

عقيق.. شنوخاله شتحجين
ام رانيا..والله يابنتي هاي المعروف عنهم
فجر.. مالج دخل عقيق راح يتزوجهه نسيبج ضغغام

رانيا.. عابت لهالحلك ضرغام موابن عم ابوهه يعتبر غريب عنهه
فجر.. يله لاتزعلن يتزوجهه جغاح
لبابه.. عوذه من هاللسان

عقيق.. ظليت مثل الدجاجه التريد تبيض افتر وكلبي
نار قبل بابا يحجيلي عن العادات ويكول التسوي غلط
يزوجهه بسترون عليهه بس ماجنت اعرف الغلط شنو حدي عبالي تطلع بالشارع لو تتعارك

عيني على الباب وحته غرفه ماحضرت شنو احضر
غرفه خاف صدك يتزوجهه علمود مايقتلوهه
لا لا مايسويهه السبع هو كال انتي تمشين بدمي

رانيا.. عقيق اكعدي وجهج مخطوف صدكتي السبع يتزوجهه
عقيق.. اذا يقتلوهه خاف يحميهه مثل ماحماني ماعندي احد
رانيا.. مايسويهه تعالي اكعدي انتي عقيقته الحلوه مايبدلج

فجر.. يجوز يسويهه السبع يحمي الكل موحمه ابغاغ  وانتي وبنات القصغ.
عقيق.. فجر لاتحجين هيج كلبي يوجعني
فجر.. يله ميخالف عود ازعلي يمي ويوم يمج ويوم يمهه
عقيق.. فجر لاتحجين وضربت رجلي بالكاع دمعتي بطرف عيني اذا سواهه السبع ازعل علي..

فجر.. بس اتزعلين هذا حدج
عقيق.. لامايتزوج هسه زواجنه تم جان متحمل وماسواهه
فجر.. يعني شنو؟؟ جنتو مامتزوجين

رانيا.. ولج عقيق انتي فضيحه اسكتي وانتي فجيران
عوفي البنيه بطلي شقاج السبع مايعوفهه ويحبهه
هسه على جيه وانتن اداهرن وحده بالثانيه

عقيق.. شويه واجه ابن رانيا كالو اجه السبع كمت اول
وحده وكفت بالطرمه انفتح الباب دخلت ابنيه شايفتهه
مرتين من انروحلهم اسمهه وداد وجهه ازرك على احمر
تمشي محنيه من الكتل والتعذيب ايدهه ملفوفه برگبتهه
وحجابهه مخربط

ام جراح اخذتهه ليجوه واني فتت من يم السبع باوعتله
صفح ورحت لبيتنه اجه وراي كعدت بعصبيه على الكرسي وهو واكف يشرب مي..

السبع.. بيج شي؟
عقيق.. لع
السبع.. كولي لاااا مو لع
عقيق.. بكيفي
السبع.. بكيف منو ؟؟ وتقرب صار بصفي خله
ايده على كتفي وضغط علي ..

عقيق.. اااوي وخر ايدك
السبع.. مو جنج صايره عرمه
عقيق.. جمره ايدك توجعني وخرهه
السبع.. مره ثانيه لاتباوعين هيج اني مو ابنج

عقيق.. بسرعه بجيت اول مره يحاجيني هيج
كمت من يمه ركضت للغرفه وسديت الباب عليه
وكمت ابجي  دك الباب عقيق افتحي الباب

ماجاوبته بس ابجي وهو يدك بهدوء
بعدين كال اخر مره اكول افتحي اذا مافتحتي
ازعل عليج كمت فتحته ورجعت لمكاني

السبع.. شفتي نفسج شلون باوعتي كدام ضرغام وجراح
صح اني وياج بالبيت الج مطلق الحريه بس كدام احد
لااا

عقيق.. شلون باوعتلك مالي قصد يجوز طلعت مني
بدون ماانتبه
السبع.. بيج شي
عقيق.. شبيك انت تحاجيني من وره خشمك ترى مواني
صاحبه المشكله حته تذب حرگتك بيه

السبع.. بويه اسكتي وهاي ابوس راسج بس اسكتي
عليمن هالدموع تكت حاجي كايل تلگيتيني ترعدين

عقيق.. ليش كلت حضري الغرفه وخاله ام رانيا كالت
يجوز السبع يتزوجهه ونور كالت راح يكتلوهه
وانت اكيد راح تزوجهه حته جبار ميأذيهه

السبع.. فدوه لهذا العقل جبتج عمرج 17 سنه وهسه راح تصيرين 22 وهذا العقل بمكانك راوح لاكبر ولا حاول
يتوسع وشيكلولج تصدكين

عقيق.. يعني مااصدك موهاي جبتهه وياك
السبع.. يعني ماكو حل بس الزواج ؟؟
عقيق.. شمدريني..

السبع.. عقيق كبري عقلج ولاتصدگين بأي احجايه تنكال
مو النقاش تحولي قصه براسج من انطيتج وعد وكتلج
مااذيج يعني اطمئني لا راح اذيج لا بگول ولابفعل

لاتشوفيني هيج وياي عبالج اتقبل اي مره ترى سنين
بنات القصر اشكال الوان كدامي وكلهن حلوات ومارفت عيني على وحده ومن حبيتج واتزوجتج خلاص انتهه
انه مومن هذا النوع نفسه دنيه على النسوان سواء بقصد ولابغير قصد حته اذا مجرد حمايه مااسويهه

عقيق.. كول والله
السبع.. عقيق صار ساعه شلغي
عقيق.. لاتصيح عليه كول والله واعوفك
السبع.. والله اذا اكوملج اطلع قهر كلبي بيج

عقيق.. شتسوي تضربني جذاب ماتسويهه
السبع.. لا اله الا الله تعاي يمي خلي احاجيك
عقيق.. كول والله مااسويهه واجي
السبع.. تعاي اكولهه بأذانج

عقيق.. تقربت علي هو جان واكف يم الميز كتله
يله كول والله بسرعه لزم اديه رفعهم ليفوك
وصفني على الحايط وباسني بقوه اريد اخذ نفس
مااكدر ابتعد واني اتنفس بصعوبه

السبع.. اذا عدتي هاي النظره مالتج من صدك ازعل
عليج وراح اريحج والله مااسويهه لاهسه ولابعدين
يله صيري حبابه وتعالي وراي للبيت..

عقيق.. طلع واني امسح بحلگي فرحه خفيه بداخلي
السبع سبعي ومثل اسمه ماراح يكسرني بيوم
كمت اكمز بالغرفه واصيح احبه احبه ياربي
اموت علي ...

عدلت حجابي ورحت وراه للبيت الجبير كلهه موجوده
دخلت للغرفه مخليات البنيه وداد وبس تشهك من البجي
وهم كاعدين بالصاله

لبابه.. اسكتي حبيبتي لاتخافين وراج زلم يحموج
حتلو غلطتين الله يغفرلج
وداد.. والله ماسويت شي محد يصدگني جدي يريد
يذبحني حته ضرب ابوي والله انه ماسويت شي..

ام جراح.. كومي فجر اطلعي
فجر.. ليش؟
ام جراح.. سوالف كبار ومال متزوجات يمه اطلعي
انريد نفتهم منهه
فجر.. يعني المامتزوجه مغاح تزوج بعدين
وانتي عمه شتتوقعين صديقتي عقيق واني لحدالان
طفله بغيئه

ام جراح.. دهر فر السانج الف رحمه على روحج ساهره
لو هنا جان عرفت شلون تكومج كومي ياصخيمه
انريد نفتهم

فجر.. خلي تكوم عقيق واكوم
رانيا.. لج عقيق متزوجه انتي بعدج ميصير يافجوره
فجر.. كومن عقيق واكوم واذا ماكامت وين ماتغوحن
الحكجن

ام جراح.. عمي صدك جذب كبل البنت تستحي من خيالهه هسه فجر تخلينه احنه النستحي وهي
جنهه عيون صگر كومي يمه عقيق خلصينه منهه

عقيق.. كمت بسرعه طلعت وطلعت وياي رحنه للمطبخ
كتلهه ليش ماخليتيني افتهم شصاير
فجر..لااا قابل اظل وحدي احوص حوصي وياي

عقيق.. امداج فجر جماعتج اول سنه كليه
فجر.. اووي عيني يالجبيغه
عقيق.. هسه شلون نعرف شكو؟
فجر.. نسأل لبابه امشي انسوي كاستغ جعت
عقيق.. موكلتي سويتي رجيم
فجر.. اليوم سماح باجغ ابدي مواليوم اكو مشكله
تنحل والتزم

لبابه.. كعدت عمتي تحقق وياهه وهي بس تبجي
ام جراح.. احجيلي بنتي ماكو احد هاي مرت ضرغام وهاي مرت جراح وهم يحموج
وداد.. مامسويه شي والله وكامت تبجي

لبابه.. شكد حاولنه نعرف وماحجت بس تبجي
وتصيح اني بريئه مامسويه شي نور خابرتنه بالخفيه
دكول جبار كتل امهه بالعكال وطردهه لاهلهه
وطارد عاصم من القصر لان يفرفح على بنته

كومتهه صعدتهه لغرفتي انطيتهه من ملابسي وطبت سبحت اديهه ورجليهه مجلغه دكول اخذوني يسحلون بيه للشط بالليل وابوي كال اكتل روحي اذا كتلتوهه وعافوني

وجبار كال لازلامه ناخذهه بليل نذبحهه ونغسل عارهه
واليسال نكول تمرضت وماتت حته ماتطلع حجايه
على بيت الشيخ

كلبي اذاني اتذكرت شهد المظلومه اااخ ياشهد
معقوله دمج راح هدر وحوبه ماعندج وماطلعت
لسه وجبار يسرح ويمرح...

نومتهه بغرفه ابرار ونزلت للصاله جراح وضرغام والسبع وعمتي كاعدين رحت سويتلهم جاي واجيت كعدت
سألني السبع ماحجتلج شي؟؟

لبابه.. لا بس كالت جبار متفق ويه ازلامه يكتلهه ويكول تمرضت وعاصم متخبل عليهه
السبع.. خلي يولي هذا يهوبز وحده بس لازم نعرف منهه
منو الضاحك عليهه

ام جراح.. يمه انتو هم اولادي منو يكول البت ملعوب بيهه يجوز تلفيق من جبار
السبع..اكو شهود شايفيهه ابيت الماطور القديم ومالازمي شارد واكعه بيد جبار وعلى اساس جاي واحد وكايلهم
هاي صار فوك الشهرين تجي باستمرار وخايف يحجي

ضرغام.. اخذوهه للفحص
ام جراح.. ياستار خاف تطلع ماكو شي وتتازم حالتهه
ضرغام.. لعد احسن تنكتل على الاقل اذا عدهه تقرير
طبي مابيهه شي هذا حمايه الهه

ام جراح.. هسه انتو من جبتوهه شتسوون بيهه
وشنو تفكيركم
السبع..انتي مو شفتي الوضع هناك لوعايفيهه تموت
على الاقل الغلطان وياهه خلي يسترهه

لبابه.. كمت اخذت تليفوني وخابرت نور اريد افتهم
منهه جاوبتني وهي تبجي طمنتهه على اختهه
وبدت تحجيلي
نور.. لبابه والله اختي فقيره صار مده وضعهه موتمام
من اسالهه دكول مابيه شي بس مخلصتهه بجي وماتاكل
حته امي شكد حاولت وياهه ماتحجي

شو فجاه جابهه عمي عباس يسحل بيهه يكول
لكيتهه ويه واحد بغرفه الماطور وشارد الولد
واجه واحد شهد عليهه يكول شهرين صارلهه تلتقي
بي مرات هي تطلع تفتر بالبستان بس مو وحدهه ايناس وياهه وهسه ايناس نكرت .

لبابه.. ومن اجه السبع شكال جبار
نور.. جدي الشيخ تعارك هو والسبع بس السبع طلع اسلاحه وكاله اكتلك وراهه اذا كتلتهه وبطل جدي
واخذوهه كوه كالو تعترف يمنه وهسه جدي شايش
علينه ...

لبابه.. طمنتهه على اختهه وسديته منهه كعدت على الجربايه افرك براسي لازمني الصداع انفتح الباب جراح
اليوم صعدت لغرفتي كعد بصفي حجيتله شكالت نور
سكت كال ناخذهه للفحص ونتاكد

لبابه.. واذا طلعت صدك بيهه شي
جراح.. ماادري قابل نكتلهه انشوف ويامن ويتزوجهه
قبل بيت الشيخ ينحلف براسهن هسه تاهت
صار بيت الشيخ حدث ولاحرج

لبابه.. تكوم تسبح؟
جراح.. اي حضريلي ملابسي عندي طلعه
لبابه.. وين؟
جراح.. راح اكلج وين؟ تعبان حيل واحس اعصابي مشحونه خابرت الطبيب اخذت موعد اريد اروحله

لبابه.. اجي وياك
جراح.. شتسووين؟
لبابه.. ماادري احب اطلع وياك
جراح.. ماتصدكين بيه اروح لطبيب؟
لبابه..لا لا موهيج بس اريد افتر وياك شويه
واذا متريد بكيفك

جراح.. كومي بدلي بين مااسبح بس ماادخلين وياي
لان اكو شغلات ماحاجيهه الج
لبابه.. ماادخل انتظرك بره بس توعدني تحجيلي
يجوز اني احسن من الطبيب

جراح.. رفع خصله من شعري وكال ماتتحملين
التسمعي الطبيب غريب مايتأثر بيه انتي حبيبتي
تتأثرين وتحزنين خلي الحزن عند واحد بينه مواثنينه

لبابه.. كوم يله بين ماابدل كرصني من خدي
وكام اني كمت فتحت الكنتور صافنه شلبس
اختاريت بنطرون وقميص طويل اسود
بدلت ونزلت جوه شفت فجر خاف محتاجه شي
وكلت لخالتي راح اطلع...

رانيا.. اكوي بقميصه وهو مدد على الجربايه
سألته شراح تسوون؟؟
ضرغام.. ماادري الحل الانسب ناخذهه للفحص
وعود وراهه انشوف شنسوي

رانيا.. خاف يتزوجهه السبع لوجراح
ضرغام.. ماكو هيج لازم يتزوجهه الضحك عليهه
واذا موالضحك عليهه يتزوجهه ابن عمهه موابن عم ابوهه

رانيا.. وليد ابن عباس طلع من السجن
ضرغام.. لااا اخذ الحكم العام حته يتأدب
رانيا.. والله انت قاسي
ضرغام ..موقاسي بس لازم يصيرله درس حته يعرف
شحصل من جبار مو ورطه وعافه

رانيا...ضرغام شوكت نرجع
ضرغام.. موهسه فد اسبوع لازم انشوف حل
لمشكله جبار واكو شغلات نسويهه ونرجع
شنو ضجتي؟؟

رانيا.. لااا بس اختنك هنا خاف تصير مشاكل
ضرغام.. ذكريني بليل احجيلج سالفه
رانيا.. ضرغاااااااام
ضرغام.. ووجع عقلج ماعنده غير هالسالفه
كتلج احجيلج ماكتلج اطبق

رانيا..مو اعرف سوالفك
ضرغام.. كومي لللج اذا اريد اخذ اذن منج
رانيا.. طبعا تاخذ لان اني مو مكينه
ضرغام.. لا مداريج خاف تعطلين من وقت ومابيه
حيل اتزوج الثالثه

رانيا.. ضرغام الله عليك قبل لا نتزوج هم عندك وحده
يعني شلون صبرت كل هاي السنين
ضرغام.. البگلبه حزن مايلتفت لهيج اشياء واني جنت
كاره الدنيا وجان بنظري ماكو مره تدخل كلبي بعد المرحومه بس انتي اجيتي تتموعين فوك راسي

رانيا..تذكر شكد جنت منحرف
ضرغام.. شعليه انتي مشتهيه ومستحيه
رانيا.. ضرغام راح اموتك كل بلاويك تذبهن براسي
ضرغام.. يله موتيني لو بس حجي لا استغفر الله
صار يومين خوش تبدعين

رانيا.. عطت بصوت ضرغام السانك السانك
عفته وطلعت يمه عبالك رشاش ولا يسكت
فلتت بريشاتي احسن ماارفع رايه الاستسلام...

بليل نومت الجهال وكعدت يم ماما سولفنه شويه
لحدما نامت ورحت للغرفه لگيته يشوف فلم اجنبي
خليت راسي على رجله وكتله شنو السالفه الردت تحجيهه؟؟

ضرغام.. توعديني ماتحجين؟
رانيا.. مااحجي والله سرك سري
ضرغام.. قبل كلشي اريدج تساعديني وتحجين ويه لبابه
رانيا... بشنو؟؟

ضرغام.. رحت ويه جراح للطبيب من اجو لبغداد
صح متأذي نفسيا بس العلاج مشتغل عنده واكو جانب
نفسي متعالج بس اكو جانب مال علاقته الزوجيه
مايطمن

رانيا.. ليش؟؟
ضرغام.. حسب كلام الطبيب كاله ماراح تتعالج من
هاي الحاله وهي طبيعتك هيج اما تكعد وتفهم زوجتك
اما تعوفهه اذا ماتتحملك

رانيا... بس فهمني يعني هسه انت هم مريض موهم تتخبل عليه
ضرغام.. طيح الله حظج ولج شوكت تعرفين تحجين
يعني اني مطلعج تونين عمي حقج لازم اعلي الفولتيه
لان ماعاجبج

رانيا.. انت عقلك منحرف منحرف يعني اقصد
وضع جراح لهدرجه لبابه متتحمله
ضرغام.. كل وحده وطاقتهه وحبهه لنوع معين
يجوز لبابه مومن هالنوع وماجاي تتقبل جراح
وللاسف لازم تتقبله اريد تكعدين وياهه وتفهميهه
كلشي اريدهه تسمع منج احسن من ماتسمع من جراح
ويتعاركون. ..

رانيا.. ظلينه نحجي بخصوص هالموضوع وافكر
شلون اساعد لبابه ودائما عقلهه محدود ماتحب
حته تفكر واطور اله واحد ينصحهه كلش فقيره
وهادئه مرات اصفن عليهم هي وجراح اكول نفس
الهدوء والصفات بس مشاكلهم ماتخليهم يرتاحون..

لبابه... بالاول رحنه للطبيب هو دخل واني ظليت بغرفه الانتظار الطبيب ماياخذ هواي بس عشر مراجعين
طول هواي تقريبا 45 دقيقه يله طلع اخذ العلاج
من الصيدليه وكال امشي نفتر شويه...

لزم ايدي وكال انروح نتمشه قريب الشط
هزيت راسي واني مبتسمه بوجهه الهدوء
مسيطر شويه وكال اريد احجيلج شي تكدرين
تسمعيني للنهايه؟!!

اكو مصطبات محط للعشاق والحبايب كعدنه عليهن
وبده يحجيلي من بدايه حديثه لنهايته واني
تجيني نغزات تسلب روحي وطلب مني هسه بهاي
اللحظه اتخذ قرار..

جراح.. لبابه ماامدحلج بنفسي بس والله العظيم وروح
ابوي بحياتي مامجرب اتقرب من مره ولاحته علاقتي بنوال مافكرت اعيش واجرب احساس ابسط شي هاي الحضنه والبوسه مامجربهم اول تجربه الي بليله عرسنه

انه احجيهه الج اعرف نفسي حالي حال كل رجال
طبيعتي هادىء حيل وافضل الرومانسيه على كلشي
بس وضعي اختلف بعد الخطف راح انطيج فد موقف وانتي حكمي يظل عقل براسي ومااتاثر؟!!

3 ايام ضبط عشتهن يجيبون بنات اكو برضاتهن واكو يخطفوهن لو بنات دكاتره لو ابوهه فلان طائفه
ياريت بس اغتصاب كدامنه جانو اقصى درجات التعنيف
اساسا عدهم غرف خاصه بهالشي جان اللون الاحمر
يوترني يظل الضوه الاحمر مفتوح كدامي ويجبرك
تباوع

اكو واحد اصلا رجال عامي اتذكر موقفه رفض يباوع
لبنيه مسيحيه انه رجال عسكري واعرف اساليب الارهابين دخلنه دورات وعلمونه كلشي بس هذا من اهل
الله كام يصيح ويغلط عليهم وشكد ماحاولو يضربوا
مافتح عينه وباوع..

تاليتهه شنو ؟؟ ضربوا ابره خلته يفقد مايدري بنفسه
ويصبح مسير وفتحوا كاميرا وصورو وهو يعتدي
على البنيه مثل وحشيتهم ومن انتبه شوفوا الفيديو
وماطول يومين ومن كدما انهار وكاموا يصيح ليل نهار
كتلوا كدامنه

هاي نقطه من لاشي شفته كدامي والله وروح ابوي
انه موهيج والله العظيم موهيج جانوا اصدقائي من يحجون على هيج اشمئز مستحيل افكر اتعامل ويه الانسانه الي احبهه بهاي الوحشيه وهذا الصار بيه
طبع مكتسب وادفع نص عمري حته اتخلص منه

الطبيب كالي انت تعالج نفسك اي علاج لهاي الحاله
ماكو لان العلاج والمهدئات ماتفيد تزود حالتك
بس لازم الشريك يساعدك انه حجيتلج حته لادكولين
غشيتني ولو ادري بنفسي راح اتعامل وياج هيج والله
مااورطج ولا اتمسك بيج

لبابه.. لزمت ايده جراح ماما الله يرحمهه كالتلي
الزواج عشره وموده وتضحيه قبل لايكون حقوق
وواجبات ..

اكدر اعيش العمر كله بدون هالحقوق بس المهم
انت طيب وسالم وحبنه البعض كفيل يخلينه
نحارب لاجله لا تصور من تعاركنه وحجيت اني
ذابحه نفسي على هالشي بس نتيجه تراكمات
وحجيت بدون وعي واني ضجت من الرساله
واندفعت نتيجه الغيره

جراح.. انه مااقبلهه على نفسي بعد صغيره وحقج
هذا وواجبي ادي الج على اتم وجه
لبابه.. لاتحجي هيج تحسسني زواجنه بس علمود
هالشغله اني وياك بكل خطوه نشتري كتب تخص هالموضوع وشلون نعالجه والمطلوب مني اسوي
اتحمل مره ومرتين منا لمن تخف الحاله عندك

جراح شفت ببغداد صح عندك عنف بس موبهذيج
الوحشيه يعني اذيتني بس لان عايش وياي باحساسك
جان الالم شي ثانوي عكس الصار قبل لاتفكر هيج ابد
هذا الموضوع حجينه بي هنا وينسد هنا اني مااعوفك
بس توعدني ندرس عن الموضوع ونتساعد حته
تصير زين

جراح.. ضرغام يدري لان راح وياي للطبيب واحتمال
رانيا تحاجيج انه هذا الموضوع يوترني لاتحجين
بي لاحد
لبابه.. لاتشيل هم رانيا حنينه علينه مثل ماما ودائما نصائحهه من جانبك اذا حاجتني اني اسد الموضوع
اكلهه تفاهمنه بهالخصوص ...

جراح.. احبج حيل .. احب طيبة كلبج وهدوئج
من اول يوم من حميتج صرتي كلشي بالنسبه
الي امي دكلي الله يساعد التاخذك هدوئك يشلع
الگلب لان حته مااعرف شلون اتغزل مثلهم

لبابه..انت ضابط بس عكسهم مولان زوجي
بس صدك انت مو ملعب ولاعندك هاي السوالف

ظلينه شويه ورجعنه للبيت رغم حجالي والموقف صعب
بس فرحانه لان شاركني بهمومه رادت رانيا تحاجيني
بس كتلهه ادري وسديت الموضوع وهي نصيحتهه
جانت اتحملي يستاهل جراح ...

اما سالفه وداد على حالهه السبع ساكت عنهه
ومايقبل ينفتح موضوعهه وجبار مااجانه ابد
وضرغام التحق وعاف رانيا يمنه ماناوين
يرجعون اله تنحل السالفه...

عقيق... جمره شوكت تظل وداد هنا خطيه بس تبجي
على امهه
السبع ..العصر ناخذهه للفحص ووراهه نقرر
عقيق.. شو ضرغام مااجه

السبع.. متعارك بالمركز واحد من الشرطه مدري
شمتلاغي وياه وضرغام معتدي علي وذاك جايب
عمامه ويريد كعده

عقيق.. عزززه شنو مغتصبه
السبع.. اسم الله على عقلج لو سامعج ضرغام
خزيتينه ولج الاعتداء بس هالمنظور اليضربوا هم يتسمه
اعتداء 

عقيق.. شمدريني موكلت يسويهه كعده عبالي هيج
استغفر الله والله حجيتهه بدون فهم
السبع.. اكبري عقيق خلي دماغج واسع ويفسر
الامور موكلشي يجي بلسانج تحجي

عقيق.. ضجت مني
السبع.. ليش اضوج بس نبهتج
عقيق.. تحبني؟؟
السبع.. لا لا لا كومي من يمي اذا سألتي هالسؤال
من صدك اكتلج

عقيق.. كمت واني زعلانه شجا هو سؤال
صح الصبح سألته اول مافتح عينه بس يكدر
يكول اي قحط  عفته وطلعت يم فجر.

العصر ام جراح اخذت وداد للفحص بدون علم جبار
ورجعت المغرب وجهه يضحك كالت الحمدلله
البنيه مابيهه شي وكالت للسبع كالهه خلي تحجي
السالفه وداد احسن مااسلمهه لجبار..

كعدت وداد حجت السالفه بالكامل كرايب هيام
واحد حقير مره لازمهه بالبستان بس ممعتدي عليهه
وظال يهدد بيهه هي ماتعرف زغيره وعبالهه يسوي شي
دكول يدز عليه لغرفه الماطور يسوي شغلات موحلوه
بس الظاهر متحرس بيهه لحدما لازميهه ومهدده اذا جابت اسمه يكلهم لكيتهه ويه واحد ويذبحوهه وهي خافت وسكتت ...

جان السبع يسمع منهه من كملت كال يصير خير
وره يومين خابرت نور فرحانه كالت السبع لازم
هذا الحقير ومسوي فرجه للقريه دكول اجه ابو
يبوس بادين عاصم يكله مروتك لايكتله السبع
شترودن اسوي واساسا السبع كايله بايگ من حلالنه
ماذكر سالفه التحرش...

السبع اخذ وداد ورجعهه ومهدد جبار اذا مديت
ايدك عليهه تعرف شسوي وانسدت السالفه
واجه الولد خطبهه ورفض السبع ينطيهه لان يكول
جبار رايح جابره حته يخطبهه الولد مايريدهه
وهاي راح تظل ماتنسعد ويعيرهه بحجه سترت عليج

فجر.. سجلت دورات تقويه للسادس واكو خط بس بنات
انروح ونجي سوه بس مستواي موشي ولا الي واهس
اقره والمواد صعبه واني عندي مشكله بالرياضيات...

جان المدرس مال الرياضيات رجال جبير وياخذنه
بالبيت احنه 12 ولد وبنات واكو واحد بنطرونه قماش
كامز طول المحاضره هو يذب حجي ويباوع بس يطلع
المدرس على اقل شي وهو مد راسه جنه قرد

من خلصت المحاضره وطلعنه كتب الرقم وشمره
بس دست علي ورحت للخط منا اكره الرياضيات
ومومنا هذا المسلوع

ليش مابيوم اجت وحده ويانه كدام البنات كالت هذا محمد يكول عندي علاقه بفجر هنا تخبلت تحلفت بس
اشوفه اتفل بنص وجهه

من داومنه جان جامع الولد ومن فتت من يمهم
يكلهم والله البارحه للصبح نتخابر ويضحكون
ضميتهه بكلبي وسكتت وجنت ناويه احجي للسبع
ليش مابالطلعه جان واحد منهم يطخني بجتفي
كتله ماتشوف حاشك نفسك

رد عليه يله عيني لاتصيرين شريفه لوماانتي ومحمد
كله لقائات ابيتهم شنو رأيج تغيرين والله عندي
فلوس وشتردين انطيج...

ماحجيت لان بنص بيت المدرس بس من طلعنه هو فرع
نوصل بي للشارع جانو يمشون كدامنه اني وبنيه انروح
للخط كلما تتلكاني طابوكه اشيلهه لمن جمعتهن بيدي
وكعتلهم دك بالحجار الي اجت براسه والي بعينه
هو الفرع دربونه انحصروا مثل الجلاب..

كلما يرفع راسه اشمره بوحده حته صديقه المسالم حصل وحده بظهره اثنينهم محمد وهذا الكال عندي فلوس
عود خلي افلوسك تشفعلك ركضوا وهم يسبون بيه
بس بردت كلبي بيهم....

حجيت لعقيق بس محد يدري بالسالفه ليش ماثاني
يوم يدز عليه السبع رزلني طلعت هاي الفاره
ماتضم حجايه دكلي نسيت سألني شلونهه فجر بالدروس
وحجيت كلشي...

عقيق... اليوم السبع كال عندي كعده وماكال شكو ووين
بس الي ادري بيهه كعده بالقصر بالمضيف بس على
شنو ماادري وكلهم ضرغام وجراح والشيخ ياسين
كلساع يخابر وبينهم اتفاق ...

راحوا كلهم واحنه ظلينه وحدنه كاعدين
انسولف بالصاله ودك التليفون مال لبابه
اسمع لبابه صاحت شبي الله عليك كول شبي
احموا انتو جراااح جراااح وماكو صوت

كلنه ركضنه عليهه شكو وهي تبجي
وتباوعلي هنااا حسيت السبع بي شي
اول ماطلع وصل للباب ورجع باسني من راسي
واشتمني من رگبتي وكال ادعيلي بس حسيته موطبيعي

وكفت كدامهه بعيون ممليه دموع كتلهه
السبع بي شي؟؟ شهكت بعبره وكالت ماادري
بس كال جبار ضرب السبع طلقه اقفلوا عليكم
راح ادزلكم حارس

عقيق.. هي اسم طلقه بس بالحقيقه صابت
كلبي ماوكعت ولاتخربطت بس رجليه مشت
لبيتنه واني اتذكر تصرفاته اليوم شكد صلى
وشكد قره قران سمعته باذني وهو يكول اللهم
نسألك حسن الخاتمه

جمره لاتعوفني لوتاخذني وياك لو ترجعلي
اتراكمت عليه شكو حركهه سواهه بهاي الفتره
حسيت بي متغير واكعد نص الليل الكا يصلي
شكد يوصيني ويعلمني حته قسه عليه من اغلط

رجفت اديه ودك كلبات دكات متتاليه
صار حمل ثگيل براسي وكأنو اجر بصخره
جبيره !!!
كلبي احسه مثل فتات الزجاج النفس الي اخذه
يجرحني !!!

.
.
.
يتبببببببع....... متابعه شيقه