رواية وعصفت بنا الاقدار الفصل الحادي وثلاثون 31 - بقلم Rozaya1122

وعصفت بنا الاقدار... البارت الثلاثون
للكاتبه زهراء ( روزايه)...

تهت في عالم ليس عالمي
لا ماض لي ولا حاضررر
لا اعلم من انا؟؟؟؟؟!واين انا؟؟؟؟؟!!!
ضائع!!تائه!! امشي بلا وجهة
تتلاطم بي امواج الحياة بين اناس لا اعرفهم
اضعت نفسي. .هيكل بشري يمشي ....
خيم الظلام فوق ايام عمري
اتخبط بين مفترقات الحياة
اقاوم بسفينة شراعها مثقوب
رأيت النور يتغلغل الى عالمي المظلم ....
وامل ينبثق وينادي بالعود. 

ها انا اخطو اول خطواتي   كطفل ضاع من يد امه
تملأ الدموع عيناه.  بينما تشق البسمة ووجهه
احاسيس متناقضة خوف فررح !! وشوق
هل يذكروني؟ ؟؟؟! هل يشتاقون لي؟ ؟؟
دموع واهازيج فرررح ….عصافير تغررد بعودتي
وزغاريد تصدح من افواه النساء
هل سيكون هكذا اللقاء
لما اشعر ان هناك جبل قابع فوق قلبي
ام هناك رأي اخر لقدرري؟!
بقلم
maroosh96
.....

رانيا.. فزيت مرعوبه واني رافعه ايدي
بالهوه مثل اليدفع بشخص محد بالغرفه
بس اني !!!

فجر بم عقيق ولبابه بره كمت وكفت
ع حيلي العرگ ماخذني امسح بركبتي
وعبالك حقيقه كلبي يدك سريع ..

فتحت باب الغرفه وطلعت ضوه الاستقبال
بعده مفتوح تعوذت من الشيطان ضرغام
مومن هذا النوع ابد وحته لو فعلا مسويهه
فمايعتبر رجال ويصون الامانه

تخيلت لو الموقف حقيقي وموحلم
شنو ردة فعلي ؟! مستحيل اتقبل هيج
شخص ماكو اي مبرر للحرام بداعي
الحب..

طلعت بره لبابه كاعده وحدهه
الجو حلو والكمر طالع مضوي كعدت
بصفهه خليت ايدي ع كتفهه وهي رافعه
راسهه للسما

رانيا.. بشنو حاسه ؟!
لبابه.. ماادري احساس غريب اذا طلع جراح
عايش ورجع شنو موقفي؟!

رانيا.. تحبي ؟!
لبابه.. احبه اكيد بس اخاف من مستقبلي
وياه اذا رجع جراح موبس الي نوال
هم تنتظره وبعدهه متزوجت وحالتهه مواحسن
من حالتي..

رانيا.. طبعا بغض النظر عن كلشي وعنج انتي
نوال هم حقهه يعتبر حبيبهه ورادهه واعترضوا
وبعدين صارت وانتي دخلتي ع الخط يعني
لاتلوميهه..

لبابه.. طبعا ماالومهه هي اولى مني
هو لومايحبهه ماجان يتوسط حته يخطبهه

رانيا.. موشرط اكو اعجاب واكو موده
اني بنظري جراح يحبج احتمال تاكد
من نفسه هو يحبج وتمسك بيج وبعد
مايدري شلون يعالج الخطأ ..

لبابه.. حته اذا اني احبه شلون اتقبل
يتزوج نوال اكيد ماراح اضحي
بسعادتي حته اعيش الحب ويه جراح

رانيا.. لاتسبقين الاحداث خلي يجي
سالم وان شاء الله تنحل الامور احتمال
الله مخبيلج شي حلو احلى من جراح
ونصيبه..

بعدني اقدم نصائح وفززنه صوت ضرغام
كال شعدجن كاعدات الساعه ب٢ ؟!!

لبابه.. ماجاينه نوم
ضرغام.. كومن كعدن جوه سولفن موهنا
رانيا..كمنه اثنينه دخلنه جوه
وصلت يمه جان يكول خوش عندج نصائح
ماتنصحين رزحج؟!

لبابه دخلت جوه واني حجيت بحديه
بس شنو كلبي خزاني يدك ابلعومي!!

كتله عفوا شقصدك منو كالك محتاجه
نصيحه؟! ماحجه ظل صافن بوجهي
ضيق عينه وبدون ماينتبه رفع حاجبه
بس عيونه مركزه بعيوني ولاول مره
يسود الصمت بيناتنه..

تضارب مشاعر عندي شي يريد
وشي يمنعني شي يذكرني اني
انسانه وعندي مشاعر ومن حقي اكمل حياتي
وشي يكول انتي مطلقه ومامن حقج حسب
المجتمع العايشه بي..

صوته تخلل مسامعي بكل هدوء
ولاكانو هذا المستفز المتعوده على
كلامه الخشن حجاهه وهو يبلع ريگه
وعيني ع تفاحه ادم ..

ضرغام.. تفكرين بمثل تفكيري؟!
رانيا.. بشنو تفكر؟!
ضرغام.. ماادري المهم فكري بمثل ماافكر

رانيا.. غير اعرف شنو تفكيرك
ضرغام... بيج!!

رانيا.. ماعندي جواب ولا اعرف
ادخل بنقاش وياه واصلا احس رجليه
ماتساعدني من الارتباك بسرعه كتله
من رخصتك ودخلت جوه...

جانت ليله صعبه لحد الان اتذكرهه شلون
عشت بصراع بين گلبي وعقلي واحد يريد
وواحد يذكرني بحالتي واطفالي..

ماغاب عن بالي لحظه وحده بكل رمشه
صرت اتخيله عبالك حب قديم وهسه بينت
زهوره ماادري ليش احسه متشعبه جذوره
بداخلي...

فجر.. عقيق كومي ماشبعتي نوم؟!
عقيق.. كاعده بس مدده انتي شوكت كعدتي؟!
فجر.. من زمان وخابغ السبع على ماما كال
اتصل ع عقيق ماكو

عقيق.. رفعت تليفوني لكيت مكالمتين
دكيت علي انطاني رفض ورجع اتصل
فجر طلعت واني فتحت خط بس كلت
الو كال هله هله بنسمتي

عقيق.. صباح الخير جنت نايمه
السبع.. صباح النور خابرت ام شهد ظل بالي
يمج صاير نومج ثگيل

عقيق.. اي ماحسيت العلاج مزعج
انت شوكت ترجع ؟!
السبع.. انه بغداد
عقيق.. شتسوي وشوكت رحت؟!
السبع.. البارحه العصر رحت بالي يم جراح
اكو واحد من جماعته راح التقي بي
بلكي نلگه خيط يوصلنه النه

عقيق.. لعد شوكت تاخذني موكلت نعيش هناك
قبل لاتبدي المدارس
السبع.. حاير والله هواي شغلات براسي
وبعدني ماراسي ع بر بس انه عند وعدي اخذج
لبغداد ولازم انراجع واحتمال اخليج ادرسين هناك
ماادري بس خلي نخلص من سالفه جراح

عقيق.. يعني متجي اليوم
السبع.. لا مااجي باجر الصبح ارجع اخذي
دواج واهتمي بروحج واذا احتاجيتي شي
خابريني..

عقيق.. سديته من عنده وطلعت يم البنات
وضع الكل مخربط ومدري شبيهم
خاله ساهره مخليه ايدهه ع خدهه وصافنه

طب ضرغام بيده كوب جاي وكعد
حجت ام رانيا خاله ابو ليث اريد احجي
وياك ؟!

ضرغاام.. تفضلي
ام رانيا..انريد نرجع لبغداد مامرتاحين هنا
وخايفه خاف يصير شي بعد

ضرغام.. حقج ارجعي مابيهه شي
بس شلون تعيشين بس انتي وبنتج
وبهيج وضع ترى احنه بزمن الطائفيه لا المسلم
ولا المسيحي خلصان

ام رانيا.. احنه مو بأمان هنا وقريبين ع القصر
وكلساع يتخيلي راح يجي شيخكم جبار
الموت واحد موهذا ابو رانيا انهزم من بغداد
ومات هناا..

ضرغام.. خله الكوب ع الطبله وكال احنه
اهل انشاركم بتفكيرنه بس ماانفذ اله نحسم
سالفه جراح حته نعرف نتصرف...

ساهره.. نفسه الكاله السبع اني من رأي احسن
حل حته انتو تستقرون وماتوصلون للقصر

ام رانيا.. شنو الحل؟!
ساهره.. داده البيت البصفنه هذا للبيع
وناوين يشترو وراح يبنون لكل واحد مشتمل
حته يستقرون وبهاي الحاله هم قريبين علينه
وماعلينه شي

ام رانيا.. بس اني اريد ارجع لبغداد مااريد
اظل بالبصره
ضرغام.. ارجعي حجيه بس منو يظل يمكم عندج
احد مابيهه شي رجعي لبيتج

ام رانيا.. عدنه الله ماعندي لا اخ ولا عيال
بس عدنه رب العالمين..
ضرغام.. ونعم بالله بس الله انطانه عقل
ولازم نفكر وندرس الامور صح اذا انتي
تكدرين تعيشين وحدج براحتج اني من باجر انقلكم

ساهره.. شلون وحدج وسام خابرج بتليفون
هاي المسودنه هجت لازم رجال يحميكم
واحنه بعيدين عن القصر ووجود السبع وضرغام
راح يخلينه بامان..

ضرغام.. اتشوفي صح سووي وكلولي
بخدمتكم اني راح اطلع شويه واجي
محتاجين شي؟!

ساهره.. الله وياك بس ماعدنه منظفات
جيبلنه بدربك
رانيا.. جنت بالغرفه واسمع نقاشهم اتجنب
اكعد وياه بنفس المكان كلام ماما صحيح
وكلامه هم صحيح وصايرين بنارين..

لبابه.. بعصريتهه كاعدين ونزلت عمه زينب
كوه تلزم الدرج وتنزل ووراهه ابرار لازمتهه
هاي السنه ونص كبرت عمه عشر سنوات..

كعدت يمنه وهي تاخذ النفس كوه
بس سألتهه ماما شلونج داده خلت شالهه
ع وجهه وبجت!!

ام جراح.. مالي لون ياساهره جراح
وليدي وينه محد بيكم مهتم ولكم بعده
عريس شلون السبع عافه ومادور علي

لبابه.. عمه السبع ماعايفه وضرغام معمم
اسمه بكل مكان بس ماكو ذكر شلون يعوفو؟!

ام جراح.. انه ام انه والده واحس والله ابني
عايش اجاني بالحلم وكلي انه عايش لاتخافين
بس وينه ولج ساهره خاف اموتن وماشايفته

ساهره.. الله يسمع منج وينفتح علينه الباب
وانشوفه بطوله موبس كلبج انكسر كلوبنه
هم انكسرت جراح ابنه موبس ابنج

خلت حجابهه ع وجهه وكامت تنعه
بنعي الامهات ..
خله البيت من اسمك وطرواك
وخله البيت من خشة حذاك
واكف ع راسي ونشدني
ويگلي احوالج يمه ماهي لايگتلي
وچاسج هظم لو ذاكرتني ...

لبابه.. كلنه كمنه نبجي وياهه وهي
تصيح يمه مدلله ورافعه راسي بزودك
وهسه يجراح انهظمنه انه واختك عزيزتك
شلون عفتنه؟!..

عقيق.. ثاني يوم اجه السبع بس مشغول
حيل حته مايبات بالبيت يطمن ع العلاج
ويطلع ودائما هو والشيخ ياسين سوه..

مر اسبوع كامل والوضع طبيعي
ضرغام يمنه ماعافنه بس بالنهار يطلع
وبليل يجي وحته اذا جان موجود محد يشوفه
يظل بالاستقبال...

بيومهه اتصل ع السبع مايرد ظل بالي
يمه طلعت حجيت لخاله كالت خاف
عنده شعل جانت الساعه ب٣ الظهر
تقريبا ..

واندك باب البيت حيل تكسر تكسر
تريد تلحك خاله تطلع ماتكدر ضرغام
ماموجود مدت راسهه من الباب صاحت
منو جاوبهه انه عاصم افتحي ام شهد

ماقبلت خاله تفتح بس هو يدك ويصيح
افتحن يمعودات تالي اخر شي كال
افتحن جرااااح رجع !!

لبابه.. جنت واكفه وره ماما موكلمه سمعتهه
عبالك روحي جانت مسلوبه وهسه رجعتلي
دموعي تجري واني بعدني ماشفته وماتاكدت

فتحت الباب ماما واجه عاصم يركض وياه ابن
عباس والفرحه بعيونهم ويصيحون
سوو مجال بين مايوصلون ...

عمه زينب فوك ركضت عليهه ادك بباب المشتمل
فتحته ابرار الهث واحجي واكلهه جراح
رجع واعيد بالكلمه واكمز كدامهه

البنيه مامصدكه مذهوله وهي صافنه
بوجهي واني اصيح رجع رجع وين عمه
زينب ودموع الفرح تتسابق منو تنزل اول..

صرخت بصوت ابرار وصل ليجوه ماما
جراح اجه ولج ماما اخوي عايش
عمه زينب بالغرفه طلعت بفزعه مامصدكه

انخاف عليهه توكع تنزل من الدرج وتتعثر
وتصيح وينه وينه لاتجذبون عليه
كلبي علمني وينه وحيدي !!

واكفين كلنه بره كلهه تبجي من الفرح بس
هو لسه مااجه عاصم اسلاحه بيده
واجت سياره نزل منهه جبار وزلم مااعرفهم

كلهه واكفه بالباب تنتظر جيته احس
رجليه ماتشيلني كعدت بالكاع وكلبي
فار من عندي وراح هو يتلكا قبل عيني..

الشيخ ياسين واواب واكفين
الامور بين جبار وياسين بس السلام
العيون تمثل الصلح والگلوب ممليه حقد

اجت الحجيه بركات وام اواب ونور
وامهه صارت الطرمه متروسه نسوان والباب
متروس زلم والتليفون كلساع يخابرون
ع السبع ويكلهم وصلنه..

ابرار جانت مخليه ايدهه ع كتفي
ومن الجهه الثانيه فجر واني عيني
ع الباب ويه كل حركه اكول اجه!!

صوت طلقات وصوت هلاهل ارتفعت
عمه زينب طلعت حافيه وتهلهل والدموع
تجري الحجيه بركات تصيح صلوات
گرت عينج يزينب...

اشوفه من بعيد من بين الهوسه حاضن
امه ومدنك عليهه وهي تبجي بعلو صوتهه
وابرار لازمته من ايده ومدنكه ع زنده وتبجي

لحظات ماتنوصف من كمية المشاعر
البيهه يريدون يبعدون عمه زينب ماتقبل
اباوع ع حضنته هيج مثل الطفله وعاصرهه
بكل قوته...

وخروا عمه زينب وكام يسلم ع الواكفين
ماكدرت اباوع ولاكدرت اشوفه ركضت
ليجوه وامسح بدموعي..

هوسه وكلهه تصيح صلوات وتبارك لعمه
بس حال امه ماينوصف كلساع يصير
عدهه اغماء ويشمرون عليهه مي ودكلهم
لاتخلوني اموت خلوني اشبع منه...

حبست نفسي بالغرفه مااكدر اطلع
شلون اسلم علي كدام الكل خاف يفشلني
ويعاملني حالي حال فجر وخاف موجراح
القديم!!!

انفتح الباب بهدوء ورانيا تأشرلي تعالي
ليش مهزومه مو تبجين علي كومي سلمي
هزيت راسي لااا مااكدر خاف مايريدني!!

رانيا.. جنت واكفه بالمطبخ واجه ضرغام
كالي صيحي لبابه للاستقبال كل الزلم بره
بالشارع يريد يشوفهه جراح كومي كحلي
عينج بشوفته

لبابه.. كمت اجر برجليه كلبي يسحبني
حيل وجسمي يرجع ليوره وصلت لباب الاستقبال
فز مني ودخل كدامي..

فتحت الباب جان واكف منتظرني بدون
شعور بدون وعي وادراك ركضت حضنته
وابجي بصوت عالي تخيلت البره سمعوني

اديه تضمني اكثر واكثر واني لازمه
قميصه واشهك واهتز بحضنه من
كميه المشاعر العندي..

رفع راسي بديه وباسني من خدودي ومن راسي
ورجع حضني اريد انطق واكول الحمدلله ع السلامه
ماتتجمع الحروف عندي..

سحبني للقنفه كعدني وهو يمسح بدموعي
هسه رجعت عندي الرؤيا جانت عيوني
مغوشه هذا جراح بس شبه جراح!!

ضعيف الى درجه ماتنوصف
عيونه فايته ليجوه واعظام وجهه
وفكه مبينه صرت مثل ام وادور بابنهه

رفعت ايده اتلمسهه اثرات اشكال والوان
اثرات برگبته دوائر حمر كبار من شافني هيج
بسرعه كام وكال لاتبجين خلي اطلع اكو خطار

مايخلي عينه بعيني ابد بس اباوع ع قبضة
ايده شلون يضغط بقوه وكأنو واكف ع اعصابه
ومتحمل هم جبير..

وصل للباب واني ع وكفتي وامسح
بدموعي التفت عليه ورجع باسني من
راسي ودنك نفسه لمستواي وكال لاتبجين
مامصدگ شفتج خليني اشوف ضحكتج

لبابه.. ابتسمت بوجهه بس عيني ماثبتت من كدما
اركز بكل تفاصيله ترك ايدي وطلع واني طلعت
من الاستقبال...

جابو الدجاج والمطبخ انخبص كالو سوو
عشه للموجودين وباجر يذبحون ذبيحه
لسلامته ..

اشتغل ويه رانيا وام اواب هن لزمن المطبخ
ونور تخبز بالممر بس كل الحديث ع جراح
وشلون متغير وهاي التسأل وين جان ؟!
وشلون صاير ؟!

طلعت بالممر يم نور جانت فجر كاعده
بعيد واطلع بالخيار من العلاليك وعينهه
علينه ...

فجأه وصاحت راح نحترك وكامت تصرخ
بصوت عالي كلهه اجت ع صوتهه ومانحس
غير التنور يطك واشتعلت البواري نار

همزين مبتعدين عنه لان ابتعدنه ع صوت
فجر الشيخ ياسين وعاصم طفوا النار
وكلهه تصيح سلامات وفجر واكفه مصدومه
بمكانهه!!

اباوعلهه من بعيد اعرف يافجر حسيتي
لوشفتي شي كدامج وصرختي وعبالك
هي مصدومه شلون نطقت وصدك صارت
نار..

شفت اواب سحبهه من ايدهه لان جانت
واكفه بنص الممر ساده الطريق وخلاهه
ع جهه..

الولد ماله قصد بس هي ماعدهه هيج
لازمه خياره من هاي الجبيره جان تضربه بيده
بيهه وصاحت وخررر ايدك!!!

همزين كلهه ملتهيه مشيت سريع عليهه
هو صافن بوجهه كالهه ساده الطريق
وحجيت وماسمعتي شنو هالتصرف؟!

فجر... علم نفسك ماعندك الحرام شكو
تلزمني واني غغيبه عنك..

اواب... اعتذر علويه تخوفين صرتي
عيونج صارن حمر..
لبابه... جان يباوعلهه بنرفزه وهي مخنزره
علي جريتهه من ايدهه وطببتهه جوه

اخذتهه للغرفه سديت الباب وحجيت
وياهه فجر شلون عرفتي راح ينفجر
التنور

فجر.. ماادغي فجأه شفت ناغ كدامي
تخيلي يصيغ شي يله عدت سلامات
راح اروح اسبح ..

لبابه.. عافتني ومشت طلعت بره
ماما تفتر ادور ع فجر سولفتلهه
شكالت سكتت بس هزت راسهه وكالت
راح تخبلني..

التهينه بالشغل بالمطبخ لحدماصار العشه
اجه ضرغام الجكاره بحلكه ودنك شال الصينيه
محد دخل بس ضرغام ينطيهه لعاصم ...

لبابه.. رانيا تعبتي روحي ارتاحي
اني اسوي جاي
رانيا.. انتي المفروض متشتغلين اكعدي
اني راح اسوي الجاي واروح اسبح

لبابه.. راح اروح لعقيق لان تستحي
وظلت بالغرفه
رانيا.. تعالي هاج ماعون اكلي وياهه صبيتلهن
هي وفجر

رانيا.. احس ظهري مقسوم بالنص
الم قوي عندي لان تعبت بس عمه ساهره
خطيه هذني حمواتهه يظلن يقلدن بس يشوفن
نقص ...

واكفه ارتب بالاستكانات واخلي شكر
نبهني صوته وهو يكول سوي مجال
خلي الولد يشيلون الاكل

تركت البيدي ودخلت للصاله لحدماكملو
رجعت للمطبخ النسوان تتعشه واني بديت
اصب جاي بعدني اصب دخل هو والسبع
بس السبع من شافني طلع...

كملت الصينيه وانطيتهه اله خله الجكاره
بحلكه وشالهه ايده لامست ايدي
رفعت راسي التقت عيونه ورجع دنگ
وطلع...

كعدت ع الكرسي متألمه منا بطني
ومنا كلبي مدري شبي ومنا احس رجليه
من الوكفه فدمره صايرات دك تليفوني
رساله كمت اخذته من فوك الثلاجه فتحته
واشوف رساله من وسام

كاتب الجمعه اجي اشوف الجهال
حضريهم!!! مااعرف ليش خفت معقوله
يتعنى من بغداد للبصره حته يشوفهم
وهم من جانو بغداد مايكلف نفسه...

طلعوا الزلم والنسوان هم راحت
وكالت ام اواب الصبح اجيكم لان باجر عشه
جبير وجبار يصيح نسوي بالقصر بس السبع
ماقبل كال هو هذا بيت جراح ...

طلعنه بالطرمه نشتغل بس لبابه
ونور ظلت يمنه فجر وعقيق منخليهن
يشتغلن...

اريد ارفع ظهري بعد مااكدر واضغط
ع نفسي بالقوه جانت اكو مواعين بالممر
افتريت اريد اجيبهم دنكت شلتهم
واحس فد شي وكع مني عبالك اسقاط

اباوع بالكاع متروسه دم عبالك بوري
وانفتح كمت اصيح لبابه اجتني تركض طببتني
من الممر للحمام واني اخذني النزف..

غسلت وبدلت وطلعت وماما تخبلت تريدني
بهالليل اروح طبيب وماقبلت كومي عمه
ساهره روحي للاستقبال وكالتلهم...

اجتني تصيح كومي لاتموتين ناخذج
للمستشفى بس رفضت لان ماينطوني
شي...

اخذت علاجي ومددت بفراشي رن تليفوني
رساله فتحتهه من ضرغام كاتب ليش تعاندين
خلي اخذج للمستشفى؟!!

جاوبته مشكور ابو ليث ماتقصر صرت
زينه شويه ورجع دزلي اذا حسيتي بالم
كولي فدوه موحمل خساره بعد...

اركز بكلماته واعيد بالرساله كلساع شنو قصده
هيج مهمه عنده ظل شاغل فكري
رغم المي...

عقيق.. جنت انتظره صار يومين ماشايفته
كاعده ع الجربايه وفتح الباب كمت وكفت
هو بسرعه قفله وفتحلي اديه

رحت حضنته وهو ياخذني للجربايه
وكال تعشيتي ؟! هزيتله راسي
ااي واخذت علاجي..

السبع.. عفيه بالسباعيه اني تعبان حيل
اريد انام وماتكعدوني اله اكعد وحدي
عقيق.. ماشي نام اني هم راح انام
اخذت علاجي ونعست...

مدد وخلاني بحضنه ونمنه حضن بحضن
ع جهه وحده للصبح كلما افز الكا غاط بنوم
عميق لان تعبان...

لبابه... ماشفت جراح بعد ثاني يوم
من الصبح جابو طليان وذبحوهن وعزمو هواي
ناس عماتي كلهن اجن وهوسه البيت ...

ب١٠ تقريبا واجو اهل نوال امهه وابوهه وهي
طبت سلمت وحضنت عمه زينب وتبجي
احساس غريب تملكني بس اقاوم واكول
لاتفكرين..

قبل الغده وبنص الهوسه شفت جراح
من شباك المطبخ صعد للمشتمل مالتهم
عبالك واحد وكالي اصعدي..

صعدت من الدرج الجوه امشي واكول
كون يطلع احساسي كذب كون مايحضنهه
مثلي اني عاقد عليه هي مجرد كلام..

فتحت باب المشتمل ماكو احد ماادري
شلون عندي قوه وامشي لغرفه عمه
واحساسي يكول راح تنصدمين..

الباب مفتوح مامسدود ونوال وجراح
متحاضنين نفس الحضنه مالتي
محاوطهه من خصرهه ورافعهه
من الكاع وهي مشدده اديهه ع رگبتهه

.
.
.
يتببببببببع ....... متابعه شيقه

البارت هديه للمتابعه الحلوه
dhayo_2000
بمناسبه عيد ميلادهه١٠/٢٢ كل عام وانتي بالف خير
حبيبتي عقبال ١٠٠ عام