رواية وعصفت بنا الاقدار الفصل الثلاثون 30 - بقلم Rozaya1122

وعصفت بنا الاقدار... البارت التاسع والعشرون
للكاتبه زهراء ( روزايه)...

( ارجوا الابتعاد عن الغلط ع الابطال لاتحكمون
قبل مانتقدم بالاحداث اترجاكم )

السبع....انا رجل في يوما ما فقدة  ابي وامي وكل عائلتي
اصبحت كالرحال من بلد الى بلد ومن مدينه لاخرى
  انا رجل بلا وطن
الى ان شائت الاقدار في يوما ما؟
والتقيت بها اصبحت وطني وشعبي وملكي وملكتي
زرعت نفسها بداخلي كالزهره اقتحمت حصون وقيود حياتي ببرائتها وعيناها
آه ايتها العينان الصغيرتان كم انا عاشق ومتيم بها
انتزعو زهرتي وانتزعوا معها حياتي
فهل لي قوه وسلطه لأعود واحيى
وتحيى معي عقيقي من جديد !؟

عقيق...أنا حجر العقيق
يصقل ويزيل عنه الغبار فيصبح ذات بريق ولمعان
هكذا انا سوف اكون أسمً على مسمى
سوف  احيى من تحت الحطام وانفض عني غبار الايام
فهما مرت علي شدائد الايام !
سأحيى بالحب والحنان  من جديد...
بقلمta3b_92
....

عقيق.. كلهه انخبصت واني كمت وراه
للغرفه جان نازع التشيرت وجاي يبدل
ملابسه ماجايبهم بس قميص وبنطرون عنده
هنا بالبيت. 

عقيق.. شيكولون شلونه خومامتأذي
السبع.. اصابته موخطره يكولون بزنده
راح اروح لبغداد واشوفه

عقيق.. مااروح اني ترجع موو
السبع.. لا نأجلهه لان اذا طلع لازم احد يمه
راح اخابر ياسين يدزلكم احد مااطلعن من البيت
ودواج اخذي بانتظام...

عقيق.. من توصل خابرني خله ايده
ع خدي وباسني من راسي وكال
ان شاء الله بس التزمي بعلاجج
واذا احتاجيتي شي خابريني ...

راح السبع هو واواب واحنه وحدنه
بليل اجه الشيخ ياسين كال ابات يمكم
وفرشتله خاله بالاستقبال...

بين كل ساعه يخابرني يطمن عليه
ويذكرني بعلاجي الغرفه ماطلعت
منهه بس جاي اتحسن بسبب اهتمامه
وكلامه اليحثني ع القوه...

راحت عليه امتحانات الخارجي
اباوع لكتبي شكد جنت حابه اكمل
دراسه لازم يبقه حلم ناقص ماكو شي
يكمل...

جانت الساعه بحدود ١١ بليل
وحدي بالغرفه تجي فجر تنام يمي
جنت صافنه بالفراغ واني اتذكر حياتي
قبل لا التقي بالسبع اجو ع بالي عمامي
معقوله ماهزهم حنين ع اخوهم وسألوا
عنه عدل لوميت؟!

تغيرت الناس والگلوب صارت قاسيه
لا الاخ يريد اخو ولا الاب يريد ابنه
ناس تاكل بناس من كدما تشبعت ابطونهم
بالحرام..

دك تليفوني السبع يتصل فجر قللت التلفزيون
وكامت طلعت جاوبته
... الووو
... شلونهه عقيقتي ؟!

... زينه انت شلونك ضرغام شلونه
.. اني زين وضرغام كلشي مابي مثل
الحصان كلساع يتعاركله ويه واحد

عقيق.. الحمدلله ع سلامته شوكت
تجون ؟!
السبع.. هو يريد يطلع باجر بس راح
نجبره يظل يوم وبعد باجر نجي

عقيق.. تروحون للقصر لويمنه
السبع.. لا يمكم اكيد يجون جماعته
واحنه مشاحنات ويه جبار خلينه بعيدين

انتم شلونكم خابرت ياسين
كال يمهم خومامحتاجين شي؟!
عقيق.. لاا هو الشيخ يتسوك النه ومنطلع
السبع.. اخذتي دواج؟!
عقيق.. اااي
السبع.. وگليبج شلونه؟!

... زين منتظم واليوم اكلت هوايه
... بالعافيه اهتمي بنفسج كون اجي
الكه خدودج مورده
عقيق.. ان شاء الله تجون بالسلامه

سديته وطلعت للغرفه الثانيه
لكيت رانيا ولبابه كاعدات كتلهم ضرغام
زين وبعد باجر يجون

رانيا رفعت راسهه وكالت الحمدلله
الحمدلله وكامت بشرت خاله
ساهره...

لبابه.. رتبنه الاستقبال ونقلنه جربابه
وفرشناهه بالاستقبال لان الشيخ ياسين
كال جايين بالطريق وجاب لحم كيلوات
وكال ضرغام يحب اللحم سون تشريب..

صارت ب١ الظهر وصلوا كلنه اتلگينا
سلمنه علي الاصابه بزنده ع جهة كتفه
ايده مرفوعه بحامل بركبته ..

اواب ماجاي كالو ظل ابغداد صبينه غده
الشيخ ياسين تغدوا وطلعوا وعقيق جانت
نايمه حته ماتدري بجيتهم والسبع كال
لاتكعدوهه لان علاجهه منوم...

محافظين ع الهدوء لان مريض خطيه
بس جهال رانيا كلساع وكالو انروح انشوف
عمو المريض وشبعتهم تكرص..

صار العصر اجتني رانيا كالت تجين
وياي اريد اسلم علي لوفشله؟!
لبابه.. ليش فشله ترى صرتي من عدنه
وهو ساعدج هواي..

رانيا.. هاي المده الي ابتعدت بيهه عن ضرغام
وراجعت نفسي وتصرفاتي الي اغلبهه خطأ
اتصرف بدون وعي وتفكير والمقابل
يفسر بغير طريقه..

نصيحته وتنبيهه الي خلاني اصحه
ع نفسي ابتعدت نهائيا حته مااشوفه هوايه
من يجي ادخل للغرفه..

بس اكو مشاعر بداخلي من ينذكر اسمه
لو من يجي واشوفه من الشباك احس
كلبي يطرب ع طاريه..

من سمعت بي تصوب تخبلت
هاي الليله مااكدر احجي لاحد صعدت
ع السطح وادعي وابجي ليش اني هلكد
متحركه مشاعري اتجاهه..

زواجي جان تقليدي ماكو حب مجرد عشره
استمر سنتين اني احاول احب زوجي
ع الرغم هو بنفسه يشهد اني ممقصره بواجبي
بس كمشاعر حب ماجربتهه مجرد موده وعشره

بس هسه ويه ضرغام ليش كلشي
بيه ينتفض وبديت اميل اله بكل
مشاعري وجوارحي..

دخلت للاستقبال بعد مادكت الباب
لبابه وماخذلته كوب جاي دخلت كدامي
واني وراهه جان مدد ومرجع ظهره ليوره
من شافني عدل كعدته...

حجيت واني مدنگه الحمدلله ع سلامتك
ابو ليث!! رد عليه وهو ياخذ الكوب من لبابه
الله يسلمج

لبابه.. ضرغام اريد احجي وياك ورانيا شاهده
ضرغام .. اكعدن ليش واكفات احجي
جان يسولف بس ابد مايباوع ع رانيا يخوط
بالجاي..

لبابه.. هاي المدرسه اي انداوم بيهه ابد موزينه
بالسادس واني نجحت للسادس ولادخلت
دورات تقويه ولا شي شلون انجح بيهه

ضرغام.. شبيهه موزينه؟!
لبابه.. كلهه تشكي من مدرسات السادس
وفجر هم ثالث شفت نتائجهم نسبتهم صفر
وحته تعبانه المدرسه واعداد هوايه

ضرغام.. وين انقلكم الوحيده هاي بس
بنات البقيه كلهه مختلطه
لبابه.. خلي ادخل دورات تقويه
ضرغام.. بهذا الوضع لبابه ترى هستونه طلعنه
من مشكله شكبرهه احنه نخاف عليج

زين انقلكم للولايه بس بعيده شلون
ولازم التزام ماترهم اتحملي هاي السنه
اقري ويمج ام سيف تساعدج..

لبابه.. هي اصلا رانيا متحب المدرسه المديره
تشتغل خطابه كلساع تجيهه دكلهه فلان
خطبج حجيتهه واني منطلقه هو نزل الكوب خلاه
ع الطبله ..

ضرغام.. منو يخطبج؟؟
رانيا.. هاااا لاا بس شكم مره كالت اولياء امور
من يجون حجيت بكلبي شكول عليج
لبابه ..

ضرغام.. هاي مدرسة بس بنات وهيج
بالمختلط شلون لبابه اتحملي اني ادبرلج
دورات تقويه من يبدي الدوام ..

لبابه.. ماشي بس محتاجه ملازم اكعد اقره
هاي الفتره وفجر هم تريد للثالث
ضرغام.. ان شاء الله اخذكم اشتروا

رانيا.. كمنه طلعنه صاح ام سيف دقيقه
لبابه كملت طريقهه طلعت واني وكفت
كتله تفضل ؟!

ضرغام.. شلون صارت صحتج؟!
رانيا.. زينه بس اريد اغير الطبيبه صار
فوك ال٦ اشهر ع العلاج وماكو تحسن
دكول اله عمليه

ضرغام.. تروحين انتي وامج لبغداد راجعي
هناك احسن؟!
رانيا.. ياريت والله هنا الطبيبه ماعجبتني
وكل مراجعه نفس العلاج بدون فائده

ضرغام.. الله كريم اخذي راحتج
رانيا.. طلعت من يمه خليت ايدي ع كلبي
يدك سريع رجعت راسي ع الحايط
يم باب الاستقبال ..

فززني صوت فجر وهي دكلي شبيج
غانيا گلبج شبي ؟!
حجيت بتعلثم مابيه شي هيج عندي
تسارع..

فجر.. جان كلبج زين بس اليوم من الصبح
عندج تساغع سبحان الله

رانيا.. ولي ولج ام السان المكسور لا اجيج
اعرف عليمن تلمحين
فجر.. هو انتي اعتغفتي ع نفسج
اني معليه..

رانيا.. امشي ولج يم عقيق هسه
كعدت وعوفيني من اشوفج اتوتر
فجر.. قصدج من تشوفين ضغغام ..

رانيا.. ردت اركض وراهه انهزمت ماتنلام بيه
احس هذا عمري ورجعت مراهقه اريد
اسولف لاحد ينصحني واحجي شعوري

يمكن ضرغام مامخليني اباله بس
اني افكر بي لان طول ماهو يحجي
حته مايباوع بس اني بالي مشغول بي..

عقيق.. انفتح باب الغرفه جنت اصلي اسمع
حركاته بالغرفه عطره اشتميته عرفته
اجه من اجه من بغداد جنت نايمه ومحد كعدني

كملت الصلاة وكمت التفتت لكيته مدد
ومخليه ايده وره راسه ويباوعلي
خليت السجاده ع الميز ونزعت مال الصلاة
وتقربت علي..

بأبتسامه شلونك الحمدلله ع السلامه
فتحلي ايده وكال الله يسلمج تعالي
بحضني...

خجلت ودنگت صاح يله ولج
مشتاگلج مااشتاگيتيلي؟!

عقيق.. ااي اشتاقيتلك جنت نايمه
من اجيتوا محد كعدني
السبع.. سحب ايدي واخذني بحضنه
خله ايده بشعري ويسولف..

اني كتلهم عوفوهه اخذتي دواج ؟!
عقيق.. ااي اخذته بس علاج الصبح مزعج
ينومني
السبع.. نامي شعندج حته جسمج يرتاح..

عقيق.. راح تظل هنا ماتروح للقصر
السبع.. مااروح اريد استقر بمكان وماادري
شلون مااكدر اطلعج وحدج تضوجين وهنا
ماماخذ راحتي متقيد

عقيق.. هوانت بس بليل تجي كل نهارك بالشغل
وبليل كلهه نايمه وخاله هي تريدك تجي
دكول احسن من القص

عقيق.. انت موكلت تاخذني لبغداد
السبع.. خلي ضرغام يصير زين وانروح شهر
بين ماتبدي المدارس
عقيق.. شعلينه بالمدارس؟!

السبع.. اكو مدرسه اهليه راح اسجلج بيهه
اداومين انتي خارجي بس احسن من كعدت البيت
تكملين دراستج ع اتم وجه وهي بفلوسنه

عقيق.. كول والله
السبع.. والله !!!
عقيق.. فرحت حيل يعني راح اداوم مثل لبابه وفجر
والبس صدريه واشيل جنطه
السبع.. كل الي بنفسج تسوي واني وياج

عقيق.. الله يخليك الي جمره بدونك
اضيع مااعرف شلون اشكرك
سحبني من خشمي لاتحجين هيج
انه شعندي غيرج ...

عقيق.. ظليت مخليه راسي ع صدره
وهو يلعب بشعري صاحت خاله ساهره
السبع اجه خطار رفعني من حضنه وكام
كال كومي يم البنات لاتظلين حابسه
نفسج بالغرفه...

طلعت وراه التهيت ويه البنات كلساع
تجي مواقف تمر كدامي بالصار واتعوذ
من الشيطان واركز ع تصرفات السبع
حته ماافكر...

اندك الباب اجه السبع كال اجو جماعة ضرغام
سوولهم جاي صوتهم عالي ضحك وسوالف
خاله ساهره وام رانيا صعدن يم عمه زينب
واحنه جوه..

تقربنه كلنه يم باب الاستقبال نسمعهم
يحجون ع الجيش وع الاعتقالات والخطف
انوب غيروا الموضوع وصار شقه

واحد كال هسه كلولي ضرغام عنده حب
جديد منو هاي الفضحت روحك بالبنج
وتغلط عليهه مبين كلبك مورم

ضرغام.. انجب عاد سدو الموضوع ميت
اني فاقد شمدريني شحجيت

رد علي انه اكلك شحجيت تجر بالحجي
وعبالك سكران وتصيح لااطلعين كدامي
انتي ثوله واني مااتحمل

ضرغام.. كتلك انجب لا اكوملك والله
السبع سكته لا ابتلي بي

السبع.. شو اسكت يمعود مابينه ايده الثانيه
تعطل وتدرون بي خبل...

عقيق.. اصواتهم عاليه ومافهمنه ضرغام
شبي بالبنج لان سكتهم ماقبل يحجون
ظلوا ل١٢ وراحوا...

اني قبلهه رحت للغرفه كعدت اشوف
تلفزيون احاول اطلع نفسي من قفص
الخطف وماافكر صبيت تفكيري بس
بالمستقبل وكلما اتذكر اكول السبع وياي ..

انفتح الباب رانيا كعدت يمي وكالت
تسمحيلي احجي احسبيني اختج الجبيره
وصديقتج؟!

حبيبة انتي موصغيره عمرج ١٩ سنه صرتي
صح عمرج مامناسب للزواج بس القدر شاء
وانتي عليج تتعايشين ويه الوضع حته تكونين
سعيده..

السبع يحبج وماعندج سند بعد رب العالمين
بس هو لتفكرين بعمام ولاخوال موهاي اني كدامج
من توفه بابا لحد هسه حته اختي بعد
ماكامت تتصل بينه بشهر مره..

حافظي ع السبع حته يطلعج من العشتي
الوحيد هو اليكدر يطلعج لا انتي وحدج تكدرين
ولا احنه واني لاحظتج من اجه شويه رجع
الدم بوجهج

هسه تسمعيني وتنفذين علمود تعيشين
بسعاده وتكملين دراسه وهم تنسين المريتي
بي هو عمر واحد نعيشه ..

كومي غيري ملابسج ليش هيج تنامين
بالدشداشه هو زوجج وحلال
عقيق.. استحي منه
رانيا.. لادكولين استحي قابل شلابسه
لبسي تراك خفيف بس مو دشداشه درن
وطويله...

عقيق.. هو مايحجي يدري استحي واني
مااكدر البس فشله من عنده
رانيا.. شنو الفشله ولج غير انتي مرته
تحجين صدك غيرج يتمنن يحاجيهن
شوفي وسن لمن ماتت وهي خاينه رجلهه
بمشاعرهه وايناس لسه تنتظره..

وهو شاب ومرتب وعنده فلوس
بس تلفله وحده سباعيه تاخذه من عندج
وانتي تظلين وحدج
عقيق.. لا هو كال مااعوفج

رانيا.. ياحبيبتي هنيالج ع طيبة گلبج ونيتج
البيضه هو مايعوفج طبعا بس هو رجال
وانتي مرته الى مته عايشين دور الصداقه
غير بينكم الفه ..

عقيق.. رانيا استحي اني احبه السبع
ومن اشوفه افرح ومن يلزمني كلبي
يدك سريع بس مااتخربط وحته من اتخربط
هو يعرف شلون يطيبني

رانيا.. گرصتهه من خدودهه فدوه للتحب
غير زوجج وهو يحبج وهو ماناقصه شي
رجال والنعم من غيرته شفتي شسوه
علمودج وشلون اخذ حقج..

عقيق.. هسه شسوي؟!
رانيا.. كومي طلعي اتراك وفتحي شعرج
واضفري اتذكرت من شفتهم بالممر وهو يشم
ضفيرتهه..

عقيق.. راسي مشوش خاله ساهره تحجي
ورانيا تحجي واكو رغبه بداخلي اريده
يكون الي خاف يعوفني كلساع اريد
احجي الي احس بي وابطل...

ساعه اكول عيب وساعه اكول هو كال
انتي مرتي وساعه اشمئز مجرد ماتخيل
احد يلمسني من اتذكر الصار
راسي يتعب من التفكير ومااوصل لنتيجه...

هالمره قويت حالي وغمضت عيوني
واني اسمع كلام رانيا وهي تدفعني للكنتور
ماعندي لبس فاضح كلشي مستور طلعت
تراك لونه وردي بجامته طويله وربع ردن
متردده البسه لولا..

ذبيته من ايدي وكتلهه ماالبسه استحي
شيكول عليه ؟!
رانيا.. شيكول بالعكس راح يفرح
بتغيرج انتي قويه موضعيفه ليش خايفه

عقيق.. خليت ايدي ع وجهي وكمت ابجي
ماسيطرت ع دموعي اني محتاجه ام
احجيلهه محتاجه بابا ينصحني ويعلمني
الصح..

كعدت بصف الكنتور ابجي ورانيا سحبت
اديه وحضنتني وكالت لاتبجين حبيبتي
اعرف مشاعرج لاتشوفيني جبيره
حالي من حالج احس نفسي ضايعه..

شوو شيخلصنه من السبع مرته
تبجي هسه يطردني ...
عقيق.. ابتسمت واني امسح بدموعي
رانيا.. عوفي هذا التراك وتعالي احجيلي
من شنو خايفه وليش تبجين؟!

عقيق.. اني احب السبع واستحي منه
وماادري هو يحبني لولا؟!

رانيا.. انتي شدكولين يحبج لولا ع القدمه
كله؟! ماكو رجال مايحب ويقدم كل هاي
التضحيات محد جابره جان حماج مثل فجر
وماتودد الج..

هو يحبج ويخاف عليج ويريدج اطيبين
وتكبرين انتي ناعمه واليشوفج اصغر من عمرج
وبهذيج الايام صرتي تخبلين وهسه انتكست حالتج
لازم ترجعين اقوى..

اذا لبستي هذا التراك شعبالج جاي تسوين
اغراء ترى هي بجامه طويله وبدي ربع ردن
بس تغير لنفسيتج وهو راح يفرح بالتغير

ظلي ع حبج وكافحي علموده واستمري
قدمي كلما بوسعج لان السبع يستاهل
وانتي اتزوجتي رجال مشهودله بالوكفات...

عقيق...لاول مره اسمع كلام احد من بعد السبع
خاله ساهره شكد تحجي ومااطبق بس رانيا
ماادري ليش سمعت منهه..

طلعت هي واني بدلت وضفرت شعري
واكفه كدام الميز ضفيرتي سويتهه صفح
شعري بي لون احمر جانت مرت عمي
كل اسبوع تخليلي حنه وياهه دم الغزال
وصار بي لون احمر وظل محافظ ع لونه..

عطر ع الميز اسمه دلع البنات رشيت من
عنده وركضت لفراشي مددت وتغطيت
كلبي يدك سريع حيل افرك باديه وعبالك
مسويه جريمه..

اباوع للساعه ب١٢ ونص وبعده مااجه هو لاحظته
مايجي اله الكل يدخل للغرف ويطفي الاضويه
ع ايده يله وهي اساسا مره وحده جمعتنه
الغرفه...

شفت ضوه الصاله طفه سحبت الغطه تغطيت
انفتح الباب عباله نايمه شافني كاعده ابتسم
كال بعدج مانمتي؟!

عقيق.. لااا جانت رانيا يمي
السبع.. ضرغام عنده الم وجنت يمه
كتله لاتحرك ايدك بس هو كلساع يحركهه

عقيق.. ماعندك ملابس هنا؟!
السبع.. لاعندي جنطه بيهه راح اسبح واجي
لاتنامين كومي خلي دهن للحرك بين مااجي..

عقيق.. طلع يسبح واني ركضت خليت تعقيم
ودهن رغم اختنك من اشوفهه واتذكر بس
اصبر بروحي عقيق السبع وياج صيري قويه...

رجعت بفراشي شويه واجه بيده الخاولي
يفرك بشعره وجنطه بيهه ملابسه وخلاهه
بالكاع وراح للميز فرك اديه وحده بالثانيه
ورجع فرك شعره...

اجه كعد ع جربايه وكال يله خلي اعقم
الحرگ حته انام تعبان جاوبته اني اعقمه
السبع.. رجعنه ع نفس السالفه يله بسرعه
لتأخرينه حته اسولفلج قصه ..

يحجي ودفعني ع كيف ضحكت
لا السبع خلي اتغطه رد بابتسامه يله
اتغطي خلي اجيبلج الدهن..

طلعت مكان الحرگ وغمضت عيوني
حسيته بلمساته ع المكان كزبر جسمي
كال يله كملت خلي اغسل واجي..

ظليت بمكاني مخليه ايدي ع كلبي
يدك سريع شعور غريب بداخلي
رجع دخل وقفل الباب صوت الباب
وترني...

طفه الضوه صار الغرفه ظلمه
اكو ضوه خفيف من جوه الباب
مد ايده جوه راسي وسحبني
بحضني...

سحب ايدي باسهه من بطنهه
وخلاهه ع صدره رفع ضفيرتي
اشتمهه وهمس يم اذني ليش گلبج
سريع..

عقيق.. حجيت بهدوء اقرب للهمس
كتله ماادري وحده
السبع.. غمضي عيونج
عقيق.. غمضت...

اصبعه ع كتفي يحركه بهدوء رغم قشعريره
جسمي بس شعور حلو اصبعه الكبير
يتحرك بحركات دائريه ع كتفي وعظمه
رگبتي واني مغمضه...

عقلي فارغ الى ابعد حد كلشي نسيت
مجرد عشت اللحظه وياه ومركزه
بحركته...

مااحس غير انطبعت بوسه ع ركبتي
عندي اعظام ركبتي طالعه باسني
منهم وظل ماابتعد..

بحركه لا اراديه تحركت ابتعد ورجع
سحبني لحضنه وكال يله نامي
هدي حالج...

ظليت مغمضه واشم بعطره
وايده اداعب خصلات شعري
شعوري حلو حيل ومطمئنه ومأمنه وياه..

غفيت بحضنه وللصبح ع نفس النومه
حته ماتحركت وهو لامني بحضنه
ونايم ع ظهره ...

فزيت وهو صافن بوجهي فركت عيوني
جرني من خشمي وكال صباح الخير
رديت علي صباح النور ليش كاعد من وقت
ابيش الساعه؟!

السبع.. ب٦ عندي شغل لليل يله ارجع
ظلي نايمه ماردت اكعدج اني راح اطلع..
عقيق.. ماتتريك
السبع.. لااا اتريك بالشغل قريب موبعيد
يله رجعي نامي ..

عقيق.. طلع السبع واني نمت ايامي
حلوه رغم المأساة العشتهه بس من يجي
بهاي الساعات كانما يرفعني من قاع اظلم
وابصر النور...

لبابه.. صحنت ضرغام تحسنت
بس بعده ايده رافعهه بس يطلع ويه السبع
ويه اواب بيومهه اجانه جبار واولاده بليل
وتحمدوا لضرغام وراحوا جان السبع ماموجود..

جانت عصريه وماما وخاله وام جراح
اجه السايق عليهن وراحن لعمه نوفه
مسويه عمليه ومناك يرحن لام اواب
كالو مريضه..

سيوفي تركض ورا رانيا صاير وكح حيل
طلع يركض بره وهي تركض وراه وضرغام
كاعد بالحديقه وراه ختل وراه

رانيا.. تعال ماما البس مثل اخوك واطلع العب
سيوف.. مااجي تگرصيني
رانيا.. عضيت اصبعي واكفه ورا ضرغام
لا مااضربك تعال

ضرغام.. شتسويلك ماما؟!
سيوف.. تگرصني شوف عمو ويطلع ايده
هيج تكرصني

ضرغام.. التفت عليه لازمه فانيلة سيوف
وكال ليش هيج عنيفه وين الرقه
وين الانوثه ؟!

رانيا.. اتذكرت من كال صدقة للانثى كتله
وكح ويفشلني من يجي خطار موهذا لسانه
شطوله

ضرغام... روح البس حته اخذك اشتريلك
وصيح اخوك وياك جان يحجي ويباوعلي
ركض سيوف يصيح اخو جان يكول
ليش وجهج اصفر؟!

رانيا.. اكتفيت برد مابيه شي بس بالحقيقه
عندي نزف صار فوك الاسبوع واخذ علاج
ومايفيد..

ضرغام.. شلون مابيج شي وجهج شاحب
ليش مارحتي لطبيبه ترى دمج يخلص

رانيا.. عزززه درت ومشيت حته
مااعرف شجاوب ولو هي عمه ساهره
فاضحتني كل اليجي وكالتله رانيا
عدهه كتله ع الرحم ..

بدلتلهم واخذهم يتمشه اجوني
كل واحد شايل علاكه مشتريلهم
وبيده علاكه اجتني ريحتهه كبد مشوي

خلاه ع الكاونتر وكال اللفه الج اكليهه
هسه كلبي فضحني عبالك كال احبج
مو جاب لفه.!!

كتله شكرا ليش كلفت نفسك
مارد عليه اخذ كلاص مي وطلع
واني جنت جوعانه واللفه حاره
مااعرف شلون اكلتهه بثواني...

اجت فجر كالت اشم ريحه شوماحصلنه
ضحكت كتلهه اكلتهه نسيت انطيج
فجر.. منو جابلج؟!
رانيا.. دنكت وكلت ضرغام

فجر.. بالعافيه لعد ماجابلي اني هم
مغيضه
رانيا.. شلون لفه تخبل مال بعد وحده
لو يجيب خمسه اكلهن حاره وطيبه..

جنه نحجي وناسين وجود رضاوي
الفتان ابو الافلام الهندي والكذب 
طب ضرغام بيده الكلاص خلاه ع الميز
وجان يكمز رضاوي ويكله عمو ماما تريد
بعد لفه دكول ماشبعت؟!

رانيا... اريد اتلاحگ نفسي من الفشله
ماكدرت وسيوف يكله دكول طيبه حاره
وفجر تسويلهم اوك تأشر باصبعهه
وهم يضحكون ...

اشرتله باثنين اديه لا لا كذب
ولك رضاوي وين كلت هيج بس سألتني
فجر كلت طيبه

ضرغام.. بالعافيه لاتبررين بس بابتسامه
حجاهه وكال لاتسون عشه هسه ادزلكم

رانيا.. ماسوينه عشه اعلم وارجع ومايصير
ماما وعيب تنقل حجي مايفيد راح يخبلني
رضاوي سيوفي اهون من عنده..

جابلنه عشه جاهز واخذتله لبابه وكال
مااشتهي الجكاره ماتوكع من ايده
ابد حته اكله قليل...

بليل اجه السبع بس وجهه مگلوب
كعدنه كلنه سوه وهو يسولف ويه
ضرغام ومانسمع شيكول ..

شويه وكال ام جراح وين؟!
ساهره.. نامت تنام من وقت خطيه
النهار كله تنوح..

السبع.. يمكن جراح عايش!!!!

حجاهه وضرغام يباوع ع لبابه
الي كامت وكفت من صدمتهه
وكالت صدك عايش!!

السبع.. اتصل بيه رقم غريب وجنت بالشغل
ماسمعته ومن لگيت مكالمات رجعت اتصلت
بس وره ساعه وجاوبني واحد

كال اني ابو محل ابغداد واجه شاب
استعار تليفوني ومن مارديت كال
اذا اتصل بيك كله انه جراح

الرجال خايف ويكول غلطت انطيته
التليفون خاف وراه شي بس من سمعت
اسم جراح تاكدت موجود

ساهره.. السبع  تحجي صدك وساكت مابشرت
امه راح تموت
ضرغام.. لاتحجين لان خاف مواكيد خاف ملعوب
من احد خطيه تعيش بالامل..

السبع.. ماادري خاف اروح لبغداد وشلون
الكا محل اثنين واكيد مايرجع لنفس المكان
مبين ماعنده خط ولا فلوس جان اشترى وخابر

لبابه.. ماحاسه ع شي  اسمعهم يتناقشون بس
بالي وفكري ويه اسمه معقوله عايش ويرجع
بطوله واشوفه؟!!..

مامنتبهه ع نفسي بس صوت ماما
وهي تحاجيني لبابه اكعدي بخزره
بسرعه كعدت واني احس كل جسمي
يرجف شعور غريب احس كلما
تستقيم حياتي ترجع تنحرف من مسارهه..

شلون انام هاي الليله واني راح اعيش
ع امل رجوعك وخاف اعيش خيبة
الم ثانيه ...

مددت بفراشي واني كلما اغمض
عيني اتخيل شكله صار فوك السنه
ونص ياجراح ماشايفتك وين جنت
وشلون عشت؟! ونفسك جراح
الحنين لوتغيرت؟!

اريد انام ومااكدر التفت اشوف رانيا
كاعده ويمكن ضرغام شاغل بالهه
ارجع التفت مكان فجر فارغ اليوم
نامت يم عقيق لان السبع راح للقصر
الحجيه تريد اتشوفه...

احنه انام وحدنه ماما وخاله والجهال بغرفه
واحنه بغرفه ماكدرت اغفه احس كلبي
مقبط من الصدمات كمت طلعت بره
كعدت ع درجات الحديقه اخذ نفس
وافكر بجراح...

رانيا.. شعور غريب !! لمسه حاره
وادين تخلت ع اكتافي !!!
حركة اصابيع حاره مثل الجمر لامست
رگبتي..

صوته وهو يهمس يم اذني تعبتيني
حيل لا اكدر اتقربلج ولااكدر ابتعد
عنج!!!!

بوسط ذهولي وصدمه واني اباوع
بعيونه ونفسه يلهب بوجهي
دنگ راسه اكثر ورفع راسي من المخده
باثنين اديه وطبع بوسه عميقه
ع شفايفي..

اتلاوه وياه وابعده واكله ضرغام مايصير
ابتعد ومااكدر افلت نفسي من عنده
وهو يرفعني اكثر ويحضني بكل
قوته واني اضرب بصدره مثل الجبل
مايتحرك!!!!....

.
.
.
يتبببببع..... متابعه ممتعه