رواية وعصفت بنا الاقدار الفصل الثمانون 80 - بقلم Rozaya1122

وعصفت بنا الاقدار... البارت السادس والسبعون
للكاتبه زهراء ( روزايه)...

انه إليه بكل شبر من گاعي صوت
وبكل كل نخله من نخلاتي طاري
بيَّه شوگ لكل غصن ماصار فاس
وكل وجه صلّت ع خدوده الظهاري
بيَّه لهفه لـ أول بنادم عرفته
بلون وجهي ولمعة إعيوني وسماري
وإنتَ وحدك بيَّ احس خلگ الصحاري
وإنتَ وحدك تجدح بروحي
محبه ودمع الموادع شراري
وإنتَ وحدك بيَّك احس روحي غريبة
....

السبع.. من ايدك مثلا شمتوقع تظل بدون زواج بعدهه صغيره والف واحد يتمناهه بس انته قابل اصحه على روحك انت موبحلم ترى بواقع ماعندك مره سوالف الغيره عوفهن على جهه مايربطك بيهه شي اطلكت منك بعد مالك حق بيهه

جراح.. لاتسوون بيه هيج انه نذل وحقير وخنتهه بس لاتسوون هيج عرضي هاي تدرون بيه شكد احبهه مو يجون يخطبوهه مني السبع بروح ابوك لاتسوي هيج

السبع.. شمسوي رجال جاي خاطبهه وماناقصه شي واصلا احسن منك بالف مره ومن الواجب نسأل ولد عمهه سألت ضرغام كال ماعندي مانع ودزيته عليك بيهه شي ؟؟

جراح.. تريد تشربني من نفس الكاس متعمد ادزه عليه
هو مايدري انه عباله من ولد جبار خليتني مثل بلاع
الموس الله عليكم لاتعذبوني بيهه

ضرغام... اوكف شوف حالك ايدك شلون ترجف شجاك
وانت السبع موهيج تعال اكعد واذا قبلت لبابه لا انت ولاغيرك اله سلطه عليهه حياتهه وهي حره

جراح.. دنك راسه بالكاع ماحجه السبع واكف فوك راسه
وكاله شفتهه شكد صعبه مو؟؟ موعلى ذمتك هي وهيج
صار بيك شحال السويته بيهه من تجي مرتك دكلهه
اني مرته وبالسر وانت دكلهه حلت بعيني وتطلع حامل
شفتهه ياجراح الماترضى على نفسك ابد لاترضى على غيرك...

عقيق.. ضرغام سحب السبع لان صدك عذبه وجراح كاعد بالكاع مارفع راسه بس لازم ايده صوت البجي مال امه والحسره التذبهه شكبرهه لبابه راحت للصاله طبينه وراهه كلنه ساكتين وعمتي بس تبجي...

اجه السبع وضرغام وجراح ظل بره كعدوا وكال السبع
اكيد سمعتن ماكو داعي اعيد من جديد لبابه اكو دكتور
وياج اسمه اسامه صار ايام يجي لشغلي يريد
يتقدملج شنو رأيج مابي قصور ابد حته بيت وحدج
وانسان مثقف ويدري بكل ضروفج القرار الج

ام جراح.. لايمه لاتحجي هيج على كيفك ويه اخيك
تدري بي شيصير بي والله راح يتسودن ماحاسين بي
ماادافعله هو غلط والانسان يغلط مو ملاك بس لاهيج
تختبروا وتعذبوا ...

السبع.. شنعذب شيدري من سوه هيج يعني الله يرضاهه عنده مره وجهال وعايش حياته وهي دموعهه بعينهه وعمرهه يمشي  واليوم يجيهه الزين باجر محد يكلبهه لاتوكفون بطريقهه هي تقرر اذا ماتزوجت ترجع لجراح؟؟ سولفي لبابه

لبابه.. صافنه عليهم مصدومه بالحجي ودكتور اسامه متقدملي لو حاله جراح الشفتهه اريد استوعب كلامهم واستوعب حالتي اني اتزوج غير جراح واعيش وياه واقدمله كلشي مثل ماجنت ويه جراح؟؟

فززني السبع بعصبيه احجي ليش ساكته؟؟بلعت ريگي وكتله شحجي بعدني مامستوعبه السواه جراح اجي ارتبط بغيره شمدريني مايطلع نفسه ؟؟

ضرغام.. لعد هي خياره ونضوكهه يابه اسمه زواج قسمه ونصيب كل واحد ونصيبه اكو خوش زلم وياخذون اسوء
النسوان واكو بالعكس لاتفكرين خاف يطلع هيج وهيج
فكري انتي مستعده ترتبطين وتكونين زوجه لغير شخص؟؟

لبابه... انطوني مجال افكر
ام جراح.. تزوجين يايمه
لبابه.. كلت 4
عقيق.. كاموا طلعوا وحته ام جراح راحت ولبابه صافنه
كعدنه وياهه انريد نعرف بشنو تفكر لازمه راسهه
وتصيح مااعرف شسوي ولاحته تاخذ نصيحه من احد ...

فجر.. اقبلي اذا دكتور ومثقف ويعرف حالتج ومتقبلهه
اقبلي يالبابه رجعه لجراج ماالج ثقي بيه جراح جرح
وماراح يلتئم ...

عقيق..عافتنه وكامت الله يساعدهه ظلينه اني وفجر
وحده صافنه بوجه الثانيه فجأه وكالت اكلج ماتعرفين اخبار ضحى؟؟

عقيق.. شذكرج بيهه من طلعنه من السادس ماادري بيهه
هي مو كعدت مراجعه ماندري بيهه
فجر.. اجت ابالي يمكن عرست شو هيج عندي احساس
عقيق.. وين تعرس موتذكرين من سولفت قصتهه

فجر.. يمعوده الله ماينسى عبده يجوز جابلهه واحد خير يستر عليهه هي طفله بوقتهه ومالهه ذنب
عقيق..شفت العجب هنا بالبصره هناك بالتاجي هم اكو جرائم وعشائر بس موهيج من اجيتكم لسه مايمر شهر بدون مشكله

فجر.. لان الحاكم ظالم من اخذوا الشيخه من جبار شويه
قلت بس طلعت خيانه الزلم يوميه واحد داك الناقصه
عقيق.. السبع وياسين اوفياء شفتي ياسين عنده بس اواب وماتزوج عليهه ابد

فجر.. السبع على عمي بابا مره كال شكد جان جدي الشيخ  يريد يزوجه وينطوا هدايا نسوان هاي سوالف قبل ومايقبل ويكول الوحيده تلبس احسن لبس ومرتبه موعربيه وكل نسوان القصر يغارن منهه حته بابا عنده صوره الهم قديمه حيل
حلوه وناعمه ...

عقيق.. تدرين مااعرف شي عن اهله ولامره مسولفلي عنهم بس ادري انقتلوا
فجر.. مرات الحقيقه تكون مره وواجبنه لو نزوع المر
لو نبلعه ونتجرع مرارته والامانه هم ثگيله من تصير بموقف صعب اذا بحت بالامانه يصير دم واذا سكتت تخون الامانه

عقيق.. شنو قصدج مافهمت
فجر.. احسن لاتفتهمين ولاتسألين السبع عن اهله يضوج
عقيق.. ااي ادري مااحجي
فجر.. وانتي شو ماكو خبر عن اهلج

عقيق.. تدرين ناسيتهم منيلي اهل عمام واحد بالسجن وواحد
مدري وين شارد مطلوب وعمتي مره مخابره السبع واني موبحاجتهم الله يخلي السبع هو من جان بابا عدل محد بحالي من مات يريدني خليهم بعيدين عني....

صار المغرب اجه السبع متسوك وجايب صندوق طماطه
عزلنه المسواك وهو كال خليت ابو عبد بالباب وانه اروح
ويه ضرغام للشط وقفل الباب علينه ...

الطماطه صغار ناعمه واني وفجر كعدنه نغسل وناكل
بدون شعور كولت فجر مهروش وطاح بكروش ناكل
ونسولف وماندري كل وحده شكد اكلت لمن صاحت
بينه لبابه يله كمنه...

وره العشه كعدنه نقره واحس الم ببطني كلت هسه يروح
وشويه شويه زاد كمت خابرت السبع كتله بطني توجعني تعال وره نص ساعه اجه جنت نايمه بالكاع وابجي من الالم معدتي نار وحته كلياتي توجعني...

كام يحجي شبيج موهسه جنج ورد ومااكدر احجي واكله
طيرت نص صندوك الطماطه بدلت واخذني للمستشفى
ضربوني ابر مهدئه لالم ومغذي وابره لعبان نفس صرت زينه

طلعنه بالطريق كتله راح اكلك شبيه ؟؟
السبع.. شكلتي ؟؟
عقيق.. الطماطه الصغار واني وفجر واكلت هواي
السبع.. تحجين صدك ؟؟ عقيق راح تخبليني صغيره
انتي ماتعرفين الشي الغلط الطماطه تسوي املاح
والسانج شطوله وتصيحين ماماكله شي!!

عقيق.. والله كله من فجر هي تاكل وانسولف واكلت هواي
السبع... كالتلج عقيق ذبي روحج بالشط كل مصيبه تذبيهه براس فجر وانتي اسم الله عليج فقيره..

عقيق.. شبيك تصيح عليه قحط هي طماطه
السبع.. ظلي بهذا عقلج ومره ثانيه تخربطي ووني وحدج
ومااخذج
عقيق.. سكتت لان كام يصيح ورزلني وكلساع يلتفت عليه يرزل واسكت بلعتهه وسكتت مثل كل مره ...

رجعنه للبيت فجر كاعده تقره قران ولبابه نايمه
حضرت ملابسي مال الدوام والسبع فاتح القاصه وعنده اوراق يسوي بيهن كل غراضه مطلعهن ومهوس كعدت
بصفه لابس نظاراته ويشتغل ..

كمت اكلب بالاوراق اجه بيدي عقد الزواج مالتنه
وظليت اكلب سندات هواي مال اراضي
وعنده كاع ببغداد دائما افكر بس اتخرج اقنعه ونروح
هناك احس البصره مشاكلهه ماتخلص مدام جبار موجود...

كمت انعس مددت بالكاع بصفه وماادري بروحي غفيت
فزيت وهو يشيلني ويخليني على الجربايه افتح بعيوني
واغمض بس سمعته كال صايره ثگيله اذا تاكلين صندوك
طماطه شلون ماتسمنين...

لبابه.. الصبح رحت للدوام شفت دكتور اسامه ودنگت الموضوع حيل شاغل بالي اكو شي بداخلي مثل العناد واريد اكسر خشم جراح بس اخاف اذي نفسي حته راسي
راح ينفجر من التفكير..

جنت كاعده بالاستراحه ودك تليفوني رقم غريب ماجاوبت شويه واجتني رساله مكتوب اني نور بنت عاصم استغربت شعدهه هاي عوزني قهر

فتحت خط تحجي بصوت ناصي لبابه شلونج؟؟
لبابه.. هلو نور شلونج ماعرفت رقمج
نور.. لبابه مااكدر احجي بگت التليفون من رجلي وخابرتج بس انتي حافظه رقمج اخاف اخابر السبع

لبابه.. شكو نور بيج شي؟؟
نور.. مابيه شي بس جدي الشيخ جاي يكيد مكيده
للسبع يريد يخلص منه وسمعته يخابر بواحد يكله
اكتلوا لاتخلونه وانه مراقبتهم صار مده عدهم شي
هو وزلمه على السبع

لبابه.. فهميني بالتفصيل حته اكلهم
نور.. مثل ماكتلج جدي متخبل لان اخذوا الكاع منه
والشيخه وانه سمعته يريد يدفع فلوس ويكتلون السبع
والله يكتله جدي الشيخ ظالم

لبابه.. شتسمعين خابريني فدوه واني راح اخابر
السبع بس شتسمعين كليلنه وبلكي تعرفين اسمائهم
سديته منهه وكلبي يدك سريع كلشي ولا السبع
بسرعه خابرت على ابو الخط وطلعت عفت المحاضره الاخيره ...

رجعت للبيت خابرت السبع كتله لازم تجي خطيه عباله
بيه شي نص ساعه وهو بالبيت كعدت اسولفله
عن نور وهو ساكت كال الله الحافظ اذا يريد يصير شي
الله يستر مو بني ادم ...

ماحجينه لعقيق بس لفجر وظلينه بقلق خابرت رانيا
سولفتلهه كالت راح احجي لضرغام حته الكل يكون
مستعد على غدر جبار لان معروف عنه يغدر ومايواجه

السبع كعد عقيق من الدوام سوالهه اجازه مرضيه وماخلاهه اداوم بس تسأل ليش وشكو بس كالهه
علمود صحتج الطبيب كال تتهيء للعمليه السبع ماعنده
نقطه ضعف يلزمو منهه غير عقيق اذا يريدون يأذوا
يأذوا بيهه..

مر اسبوع وبليل السبع مايطلع هو يكعد بغرفته واحنه
مهوسين اندك الباب طلع السبع يشوف منو نسمع بس
تفضلوا واحنه مهوسين وحده تشيل البطانيه وحده
تشيل الملازم وشبشب فجر تخلي يم راسهه شكم
مره نحجي عليهه ودكول شبي بالباكيت ..

طبن للصاله واني متفاجئه ايناس ونوال وهيام ومروه
لاول مره اكره الخطار واصلا موخطار عباره عن
جمعيه للعقارب جايبهن عاصم وكعد بالاستقبال هو والسبع واني الحراره صعدت للراسي من المنظر

مروه لابسه جبه مخصره على جسمهه ومخليه مكياج
خفيف وشايله ابنهه وواحد عايفته يم ام جراح
زين بأي حق تجي واني ليش ماطردتهه شلون استقبلهه

اريد اخذ النفس مااكدر ليش عمتي خلتهن يجن
تدري بيه مااتحمل وجودهن راحت عقيق جابتلهن
مي وفجر كاعده تباوعلهن صفح حجت هيام وكالت
اعذرونه متأخرين نبارك للبيت الجديد بس هسه
يله صارلنه مجال

فجر.. اهلا وسهلا بس موجنج جامعه حته اعدائنه وجايبتهم زين انتي تدرين ليش شلنه مناك ؟
هيام.. يايمه لاتحجين بالعداوه كلشي قسمه ونصيب
واحنه جنه بواجب يم اهل نوال امهه مسويه عمليه
وكلنه انريد نجيكم وكالن انروح وياكم

فجر.. وعمتي ام جراح وينهه
هيام.. ماتدري سوده عليه كنالهه ننطي واجب ونجي
وصارت الجيه الكم وعاصم كال عندي شغيله ويه السبع وكناله بدربك اخذنه

لبابه.. ماحجيت ساكته وعقيق جابتلهن عصير
شربن ويسولفن على الجهال نوال حامل وبطنهه جبير
مروه ابنهه بحضنهه ولبابه الي على اساس اختارهه النشمي مطلقه بنصهن...

كامن يتعمدن يفتحن مواضيع زواج وزوجي هيج
وهذا هيج وابني هيج وطفلي يتحرك هيج
اخاف اكوم ويكولون انقهرت واخاف اظل كاعده
وابلع الغصه بصعوبه...

هيام.. بشرينه يمرت السبع ماكو حمل
عقيق.. لاااا
هيام.. شجاج يمه خاف دايسه مااخذج لساده يسولج
گطع چااا تظلين هيج وماعنده خلفه شعره ابيض

فجر..وين هذوله وشيسوون ؟؟
هيام.. شيوخ تعرف بهالسوالف يحبلون النسوان
يسولهن كطع للتابعه والدايسه وحته الماتعرس هم يعرسوهه
فجر... زين ماتاخذين ايناس الهم عمرهه جبير حته تزوج خاف ماتحصل خلفه بعد

هيام.. يا بنيتي بنت شيخ ماكز واحد ماخطبهه
بس غير ابوهه مايقبل وهي هم ماجاي تقتنع
وانتي لبابه ماكو خطيب منا منا سمعنه خطبج الدكتور
مالتج

لبابه.. اجلت الموضوع من اتخرج لان ملتهيه بالدراسه
اتخرج وارجع جواب ... على اعصابي كاعده فرن الموضوع وكامت تحجي مروه الجهال متعبيني
وجراح دوام ومايلحك يساعدني
ونوال ترد عليهه هو جراح عجوزي اسأليني علي
ماينطي من روحه ...

وهذيج جراح هيج سوالي وهيج سوالي
وهيج كالي بحيث كلامهه ملح وينزل على جرحي
صاحت فجر بيهن والله دوختنه جراح وجراح
ترى انعرفه اكثر منجن ربينه وياه ونعرفه شنو جديد
علينه ..

مروه.. شبيج فجر عصبيه هي سوالف عاديه خاف تحسستوا
فجر.. من شنو بسلا من جراح اوكفي خلي اضحك
اسمعي لج اني مااعرف امثل ولا اعرف اجامل واتملق
مثلجن هاي جيتجن مشنهه على غيري

لبابه تستحي وعقيق تستحي اني مااستحي لامتجن
مرت الشيخ وجايات تنفخن سمجن علينه مالنه خلك
سوالفجن الماصخه جراح اختي العافته لان مايستاهل
وانتي ست مروه ماكو داعي لهالنفخ هذا ترى ندري جراح
يكومج بكتله ويكعدج بكتله

رادت تحجي مروه سكتتهه فجر انهدت بيهن فد هده وعوزهه تكتلهن وانتي نوال خاف عبالج نسينه سوالفج
والتختل بالغرف وتشمشمين بملابس جراح مو عرستن
واجيتن اتشوفنه انجازجن

كل وحده بيجن هسه جايه بغايه مروه  نوال غايتج
لبابه لاعيوني ماتنكسر بنت ساهره وانصحج روحي لرجلج سألي هم ينام ليلي وشبي متخبل على لبابه وعوزه
يبجي هنا من سمع راح تنخطب

وانتي نوسه بنت الشيخ غايتج عقيق مووو؟؟ ترى مرت السبع هاي خاف نسيتي اشمريهه بمي وشوفي شيسوي بيج هسه احنه انريد نتعامل بالمثل وياكم

لهنا وكل وحده تلزم الباب وتطلع وروحن كولن للشيخ
طردتنه فجر احنه ماعدنه عمام وانتي مروه بالذات
اذا وصلتي بيتنه بتليفون واحد اخابر جراح اخلي
يوكفج عند حدج ...

هيام.. يا متستحين ياصلفه هيج تحجين ويه وحده
بكد امج مامربايه
فجر.. لاگيمر عرب... لاتجيبين امي على السانج نفسج
انتي الشهدتوا على اصابه السبع وتريدين استقبلج
يله يله زيارتجن خلصت ولحد تجي بعد بيتنه مومضيف
جبار...

عقيق.. فتت بثوبي من الفشله فجر انهدت بحيث يريدن
يحجن مايكدرن منين مايحجن تسكتهن وطلعت هيام تحجي وتصيح حته عاصم طلع وصافن بس من شافت السبع سكتت طلعن واجه السبع كال شبيهن طلعن يرعشن...

حجيناله على فجر ضحك كال سباعيه
اني فشله اطردهن بس ادري اكو
مره سباعيه تطردهن وانتن ظلن فاهيات...

بعدين سمعنه من ام جراح جراح مايدري طالع
ومروه جايه وملاسنته وضاربهه وكل اخباله
يطلعه بيهه بحيث دكول ماشايفه هيج وحده
تحب الكتل والاهانه...

رانيا... طلعت من الدوام اجاني ضرغام اخذني
هاي الايام مالي خلك تعبانه من صعدت كال شبي
وجهج اصفر ؟؟ جاوبته ماادري شبيه مالي خلك
ضرغام.. اخذج للطبيب
رانيا.. لا هسه ارتاح يمكن لان امتحانات وتصحيح اتعب
من الهوسه..

وصلنه للبيت حته مااشتهيت اكل بس صعدت للغرفه
جاي ابدل بعدني ماكملت واحس معدتي گلبت
ركضت للحمام تقيئت والم قوي عندي بمعدتي
بالاول عبالي مستبرده ...

صعد ضرغام لكاني هيج كلساع وكال اخذج
واني اكله مابيه شي اصر بيومهه اله اخذج
خاف عندج تسمم لان بالامتحانات ناكل من بره يجيبن
المدرسات  وناكل ومرات اتخربط...

بدلت ورحنه للمستشفى تحاليل وفحوصات اكو طبيبه
طلبت تحليل حمل جنت مأيسه اصلا ماافكر بهالشي
ومن صاحوا اسمي وكالو حامل رجليه ماشالتني لزمت
بزند ضرغام وهو يحجي ويه الطبيبه كتبتلي علاج
وطلعنه...

صعدت بالسياره دموعي عشره عشره لاهو يحجي ولا اني يمكن اثنينه من اثر الصدمه مانكدر نعبر عن فرحتنه
حرك السياره مسافه ومااتحمل طبكهه على جهه وجر راسي باسه واديه اثنينهم لاول مره اشوفه فقير ومايعرف يعبر عن شعوره غير كلمه مبروك النه...

رجعت للبيت واني ابجي الجهال يكمزون ماما حامل
وماما حاضنتني سبحانك  الهي جان ماعندي ولاذره
امل بالموضوع حته قبل يومين زعلت علي لان كال
عندي شغل ومااكدر اخذج لاربيل وحسيته هو مايريد
طفل ونمت زعلانه...

ولاتقنطوا من رحمه الله وحاشاه لله يخيب
عبد متأمل بكرمه وعطائه الحاجه النمت بليل
ابجي ودموعي تجري مثل الجمر علمودهه
كعدت الصبح وهسه اني ابجي دموع مثل الثلج
من شدة الفرح...

هنا ضرغام طلع وجهه الثاني اخذلي اجازه ممنوع اصعد
وانزل ممنوع تشيلين ثگل حته اذا اكح يكلي
راح يوكع وصاير فدمره يدقق ويراقب بيه بحيث
مرات اعيط بي اكله تحكمك ماينطاق وعنده اوامر تنفذ
اجباري ...

بيوم منهن نايمه بليل ب11 واشتهيت فراوله
وطلع يدور فوك الساعه جابلي علبه بيهه شكم وحده
وجايب وياهه علاكه بيهه مشكل فواكه اكلت الفراوله
واكله شكو جايب هذني يكلي خاف هم تشتهين واني
رجال عسكري دائما على هبة الاستعداد....

فجر..شبيج امبوزه؟؟
لبابه.. تعبت من التفكير السبع كالي على اسامه
ويريد جواب
فجر..وانتي بعدج تفكرين موزين الرجال ساكت ومقدر
حالتج
لبابه... حته مااشوفه هواي بالصدفه ومومثل قبل حته
مايرفع عينه حيل محترم وهو كايل للسبع الوقت الهه
خلي تفكر براحتهه...

بس اريد اسأل اكول ياربي ليش لسه ماطلعت حوبتي
سمعت حته تريد ترجع للدراسه وعوفج عن وضع جراح
هو اصلا يأذي نفسه وهي تتحمل عادي عدهه

فجر...احنه البشر عجولين وانريد كلشي انحصله بسرعه
خاصه من ننظلم من واحد انريد. بين يوم وليله كون
تطلع حوبتنه ونشمت بي ونكول ظالم والله اخذ حقنه
وهالشي غلط الانسان الظالم يمر باربع مراحل
المرحله الاولى( الامهال) "  ان الله يمهل ولا يهمل "
الله ينطي الظالم فرصه لعلى يتوب ويكفر عن ذنبه

المرحله الثانيه (الاستدراج) ربنا كال" سنتستدرجهم  من حيث لايعلمون"  مو معناته تضيق الدنيا علي لا راح يفتح الابواب بوجهه راح شيريد ينطي راح يخلي كل همه الدنيا وتشوفين كل ظالم نكول موذاك عايش ومتونس
والفقير واقع بيهه

المرحله الثالثه ( التزيين)  " وزين لهم الشيطان اعمالهم"
بهاي المرحله يموت بيهه قلب الظالم بعد مايشوف غير بس نفسه وكل افعاله اليسويهه بنظره صح والناس غلط
يزود البطش مالته وتزود الاثام وهو غافل عن ذنوبه

المرحله الرابعه ( الأخذ) وهنا اكو ايه دائما اردهه واني على ثقه تامه بربي مايترك حق ولامظلوم
" لأنصرنك ولو بعد حين" وهاي اخر مرحله وهنا يكون
الحق رجعلج والله راح يضربهم ويشتت شملهم
لان مهلهم وماتابو الله روؤف بالعباد لاتفكرين بالحوبه
تبطي بس ماتخطي ....

لبابه.. دمعت عيني على كلامهه حضنتهه ياربي رغم صغر عمرهه بس احسهه بلسم واداوي الجرح
ومن هذا اليوم وفعلا صار كلما يجي على بالي سالفه
الحوبه اكول هم والله وتركت مراقبتي الهم نهائيا...

عقيق... رجعنه من الدوام واانشوف سيارات بالباب
كومه وزلم وعگل بسرعه طبينه  جوه ومانعرف شكو
لبابه جانت بعدهه مجايه بس جراح موجود وياسين
وازواج عماتهم وصوت عالي وهوسه

سألت جراح شكو ووين السبع؟؟ كال مشكله جبار
مشتكي علينه عود احنه مزورين الكاع وبايكيهه منه
ومدري شلون مرتبهه وتعبنه راح بلاش وعركه بينه وبين السبع وهسه يطالب بالكاع واذا ماكو ينسجن السبع...

عقيق.. صوت عالي وقال وقيل وهوسه وكلبي
يدك سريع خاف تنعاد نفس سالفه السنين راحت
وجبار كدام الشيوخ ضرب السبع وخاف هسه يعيدهه
اجت سياره بالباب والسياره لحزب معروف ويصيحون
اليمس ابو عباس نخلي دمه بطوله

كله هذا صار بين يوم وليله البارحه ماكو شي وهسه
مااعرف الزلم والصياح منين يطلع
السبع تعارك ويه الحزب وطردهم وجبار لازمه ابنه عاصم
ويريد يهد على السبع وبنص الزلم يصيحله
بگتني ياحرامي ابن اخوي حرامي باگني حته ذهب نسوانه باگه من انه بالسجن حجي ماينلبس علي ثوب
والسبع نار ومشتعل لازمه ياسين وجراح يدفع
بي وجبار يستفز بي وهي هاي غايته ...

صاح واحد من الزلم مايصير هالحجي كلنه نعرف ابن فاضل شنو ونعرف شلون كتلته كدامنه وربك ستر
وكتبله عمر جديد وهسه عدت نفس السالفه عندك ثار
ويه ابن اخوك انت عمه المفروض سند اله موهيج...

عقيق.. كلمنه نسمعهه وكلمه لا وماادري شلون جبار متحضر وجايب كل هالزلم والسبع مايدري كلبي نار علي
لايصير عصبي ويرتفع ضغطه طبوا جوه يحجون ومانسمع شي باب الاستقبال خارجي ومن الشباك انبين
انخاف يشوفونه...

ربع ساعه واسمع صوت السبع وهو يصيح اكتلك وروح
ابوي اكتلك ودمك بركبتي اخلي من صغري لسه
باليني بلوه اكتلك واخلص الناس من شرك انفعل حيل
ركضت دنيت البرده شويه اباوع وهذوله رب جبار
حزب معروف بسوالفهم يهددون بالسبع ويكلوله
الك يومين اذا مارجعت الكاع للشيخ نحرك بيتك عليك
وتعرفنه انفذ احنه دوله ماتكدرلنه ..

حجوا هيج وراحوا وهذا الشيخ ابو علاء يريد يهدي
الوضع ويلكه حل جبار يصيح والسبع وجراح يصيحون
همزين ضرغام ماكو جان صارت اسوء طبوا جوه ويقنعون بالسبع ينطي نص الكاع لجبار يعني قسمه رضائيه مو بالقانون...

هنا ومااحس غير فجر لابسه عبايه ومصعده الشال
على وجهه وحته جفوف لابسه وكالت من وفاة
شهد لهذا اليوم الامانه كسرت ظهري واحلامي بيهه
تعاتبني ليش سكتت وماحجيت بس ماردت يجري
دم بس مدام جبار هيج لازم احجي..

كلشي ماعرفت اجر بيهه وابجي شتردين تسوين
اخذيني وياج سحبت نفسهه وطلعت اكو زلم واكفين
بباب الاستقبال وبالطارمه لان مايكفي وهي فاتت
من نصهم ومااعرف شراح تسوي

فجر.. قبل يوم جنت نايمه وفزيت على صوت الاذان
صليت الفجر ومددت لاهو حلم ولا كاعده لان ماجنت غافيه واشوف ابو السبع العمري ماشايفته اجه وعلى نفس نومتي خله ورقه بيدي وكال انطيهه للسبع
لاتخلينه وحيد انطيهه للسبع ..

انتهبت واني ارعش من شدة الاحساس العندي الله
انطاني هذا النور معناتهه راح يصير شي معناتهه
اجه دوري واحجي السر الضامته جنت كلما اريد احجي
وعبالك واحد يمنعني...

جنت على يقين تام راح تصير مشكله ومن رجعنه
وشفت الهوسه تحضرت اليوم موعدهه اليوم السبع
يعرف كل القصه السولفهه بابا وبالدليل حته جبار
ماينكر وراح احجيهه كدام شيوخ وعمام وعشيره
كامله وشيريد يصير بيه خلي يصير المهم اوكف
هذا البطش والظلم الكاع ليتامى احنه ولجراح وللسبع ولضرغام كلهه يتامى ويريد ياكل حقهم وكلما انكول
تاب يفتح دفتر جديد...

دخلت للاستقبال مجال ماكو حته وكفه كلهه زلم
عگال بصف عگال مغطيه وجهي بس عيوني طالعه
جواريب وجفوف لابسه من شافوني كلهه سكتت
والسبع وجراح كاموا يريدون يلزموني وياسين صاح
منهي انتي؟؟؟

حجيت بكسره الراء وكتله فجغ اشوف عيون السبع
شلون انفتحت بعصبيه شلون عرضه واكف بنص
ديوان وزلم كبار واحنه محد سامع صوتنه الي اسمه ابو علاء كال خير بويه طابه بنص الديوان على شنهي...

فجر.. صار 8 سنوات ضبط واني حامله امانه ثگيله
وسر جبير واليوم وهسه وبهاي جمعتكم لازم اكوله
بعدني مامكمله صاح ياسين بنتي اطلعي وانه اجي احجي وياج لاتخافين على السبع تنحل وشفت زلم جبار
شلون متحضرين وناوين على مصيبه والسبع مايطلع منهه

اكثر خطوه جريئه سويتهه بحياتي هاي رغم العواقب
الوخيمه بس جازفت وجنت متوقعه احتمال جبار يسوي مصيري مثل اختي ماردت يتستر الموضوع ردت هاي الزلم التدافع عن جبار كلهه تدري ...

اقوي بروحي اريد احجي بس صوت ضرغام  اخترق مسامعي وهو يكول لاتسكتهه خلوهه تحجي والماحجت اني احجي واليرفع سلاحه من زلم جبار بطلقه كاتم امشيكم بالسره.....

.
.
.
يتبببببببببع......... متابعه شيقه