رواية وعصفت بنا الاقدار الفصل التاسع وسبعون 79 - بقلم Rozaya1122

وعصفت بنا الاقدار... البارت الخامس والسبعون
للكاتبه زهراء ( روزايه)...

‏بَشرني ..
‏بِديت تخاف تخسرني
‏تحِّن
تشتاگ
تفگدني !
......

لبابه.. دفعتهه بايدي وكمت هو مدنك راسه بالمغسله
اجت فجر تركض عليهه تريد تكتلهه بس ظهري بي الم قوي بالاول ماحسيت بس من كمت استقاميت موتني رجعت حانيه ظهري ...

على صوت فجر وهي تصيج ايدج عم لبابه لا اكسرهه
التفت بتعب وعمتي تلزمه من ايده ومروه ابتعدت عني
وركضت اله اجت عيني بعينه ودرتهه بسرعه فجر ماسكتت بسرعه صاحت اذا ماوكفتهه عد حدهه اني اوكفهه لو كاسره ظهرهه هالماتستحي هاي..

باوعلي شافني شلون لازمه ظهري لان ليل والحديقه بيهه شجر ماشافني من وكعت واصلا هو مامنتبه على اليمه من كدما متخربط بعده ممجاوب نطت من يمهه  وكالت شعدجن طالعات لو جايه تشوف طولهه...

هي حجايه منهه هي ضربه على حلكهه بايده الصاحيه
دنكت وصاحت اااخ ولزمت وجهه رفع ايده مره ثانيه
راد يضربهه بس ركضت طبت اني هزيت راسي بأسف
ورجعت للبيت وعفت الهوسه بره ...

اجن البنات ورايه سدينه الباب ومانسمع شي
لمت نفسي ليش ضعفت هواي راح اشوفه بهاي الحاله
خوماكلما اشوفه يضعف كلبي جنت مدنكه ومااحس غير ضربه على راسي من فجر

فجر..موعبالج عود انتي اكبغ مني بس انتي حشاج
زماله وعقل ماعندج اذا شفتج غحتي يمهم اخلي مغوه
تكتلج وحته مانفزعلج موهو هذا الباعج واخذهه وينكسغ
كلبج علي وتغيدين تساعدي

انتي مو محغمه علي شلون تحضني هاااا احجي احجي
وياج شكو مدنگه المفغوض انتي هسه تحجين علينه
وتعلمينه القوه وشلون نحاغب الدنيا واحنه بنات مو انتي
كلبج مسويج مغجوحه ( مرجوحه) ياخذج منا ومنا...

عقيق.. فجر شبيج موهيج تحجين وياهه
فجر..شلون احجي وياهه اصلا اذا ظليتي هيج مااحتغمج (مااحترمج) بعد يالبابه مااحب وحده ضعيفه تذكغين ماما شلون جانت تحجي من دكول تعاملوا ويه كل الناس بعزم واليطعنكم خلو يتمنه يصيغ مثلكم

ماما لو موجوده ماقبلت حته تكعدين هنا وجان خلت جغاح يتمنى يشوف طولج وهاي كل عقلهه تغيد تحضنه وتساعده من ايده يتحمل خلي ااداوي مغوه موانتي..

لبابه.. حقج بكلشي كلتي بس ماجنت بوعي من شفته
كلبي اذاني علي عشت وياه واعرفه هسه تشوفين باجر
مايداوم مايكدر ايده ماراح توكف مايسيطر على عصبهه لو يأذي نفسه لو ياخذ العلاج ويخلي بس نايم

فجر..ظلن هنا غاح اغوح للبيت اشوف شصاغ عندي احساس يكتل مغوه واغيد اتشمت بيهه اللهم لاتجعلني شامته...

عقيق... راحت فجر واني صافنه على لبابه افتح
مواضيع اريدهه تحجي بس هي مخليه الملزمه بحضنهه
وتشخبط وبالهه مويمهه شويه واجت فجر تصيحلهه رانيت ام العلوم...

فجر.. يمه ساهغه الف غحمه على غوحج وينج
ياامي جان علستي مغوه ولجن كلبي باغد اللهم
لاشماته..

طبيت للمطبخ واسمع عمتي تتوسل بي دكله عوفهه وادك بالباب مال غرفه ماما القديمه وصوتهه شعلوه مروه
كسرت خاطري ياحرام تتوسل بي وصوت الضرب شعلوه
مخبل وعدكم الحساب

جهالهه يبجون وعمه تشيل هذا وتسكت هذا وكامت تبجي عمه من كدما اذاهه واني شلت واحد من الجهال
مااعرف منو علاوي ومنو حمودي خطيه يكسرون الخاطر
وهو عبالك حاطله دوشك ويكتل بي ...

طلع اصلا ماشاف كدامه طلع بسرعه ومروه تبجي
وتصيح ماما الحكيلي كلت خاف الله يحسبه ذنب من اشوفهه مااكدر اذا مااكول حيل ظليت شايل ابنهه وعمتي راحتلهه ومن طلعت عمتي كالت موتهه مشوهه وجهه كتلهه عمه لا على المجنون حرج واجيتكم..

ولج لبابه هم جان يكتلج وتغلسين؟؟
لبابه.. لا مايضربني بس مره وحده غلطت بحقه
فجر.. مواول ليله كاتلج ليش تجذبين؟؟
لبابه.. مايكتلني هيج لااا
فجر.. لعد شلون؟؟
لبابه.. فجر كومي منا

عقيق.. سوالف كبار بعدج صغيرونه
فجر.. شوف منو يحجي خاف حاسبه غوحج مغه ( مره)
هسه اكوم اسحلج من كفشتج البرتقاليه هاي
عقيق.. والله بعدج صغيرونه يله كومي سوالف كبار

فجر..نعاله عقيق لاادوسين ابطني لا اطلعلج جبار العندي
اجيتي جنج دجاجتي العوجه هسه كمتي تحجين وطلعلج السان موو ؟؟

عقيق.. كومي وشوفي شسوي بيج اذا اطلعين جبار
العندج اني اطلعلج السبع يله كومي تسحليني اني اسحلج
سحل ..

فجر.. هيج الحجي مو تعاي يمي انتي يرادلج كتله
وجرت عقيق من شعرهه وهي تجر وهاي تجر
عفت الملزمه وكمت اريد افكهن ماكدرتلهن سونهه صدك
عبالك ضراير تكافشن ودفرات فجر لابسه دشداشه ترفعهه وتضرب دفره وهاي تجرهه من كصيبتهه

كمت اصيح. اضرب هاي مااكدرلهه ارجع على عقيق تمرعدني خاف بيه حيل هذني راح يخبلني فجر
دكلهه لاتغلطين لا اشك حلكج وعقيق دكلهه اني اشك
حلكج وكارصه فجر من خدودهه...

فززهن صوت السبع وهو يكلهن الله اكبر شمسوي بدنياي ومنطيني هيج مزعطه عبالي متكهربات وصوتجن ليبره
وانتن متعاركات هسه اذا الزملج العصه واكسرهه عليجن
اكو واحد يكول ليش؟؟

فجر.. صيح بيهه دكلي اشك حلكج
عقيق.. جذابه هي كالتلي اسحلج هنا
فجر.. لاتصدكهه دكلي زعطوطه
عقيق.. والله هي كالتلي جنج دجاجتي العوجه..

السبع.. اسكتن لا اركع راس براس ماتستحن شكبرجن
تصيرن هسه نص ساعه والكاج تضحكن تزاعلن وخلصني
اذا مره ثانيه لگيتجن متعاركات اثنينج اكتلجن

لبابه.. السبع يحجي وعقيق تعيب على فجر
صاحت فجر وادك برجلهه  بالكاع السبع صيح بيهه
لاتعيب عليه

السبع.. ضحك وهو يخزر عقيق سكتن كعد على القنفه
وهن يعدلن بشعرهن ووحده تخزر بالثانيه شويه وكام
للغرفه وراحت وراه عقيق وفجر كعدت تشوف تلفزيون..

السبع.. انكتلتي؟؟
عقيق.. اااي
السبع.. كتله زينه لو هيج؟؟
عقيق..اااي هلست شعري

السبع.. شكد عمرج صار ؟
عقيق..23
السبع.. ماكبرتي موو؟؟
عقيق.. شمسويه
السبع.. موكتلج صايره تخوفين وتعاركين وتكفشين
الله يستر من التالي..

عقيق.. جراح كتل مروه
السبع.. اليوم يوم الكتل عباس كاتل مرته وزعلانه
وعاصم كاتل ايناس لان العركه من وراهه
وجراح كاتل مروه وفجر كتلت عقيق
زين مولازم اني هم انطيج المقسوم...

عقيق.. كوم يله اكتلني
السبع.. ماتخافين
عقيق.. خلي انكمل سالفتنه وانشوف وراهه تكتلني
السبع.. والله كتلتيني بسالفتج الخلصتيهه عليه
للنص وتصيحين كلبي ..

عقيق.. جمره اريد اصير حامل
السبع.. هم رجعنه لنفس الموضوع غير تسوين عمليه
عقيق.. وشوكت تسويلي؟
السبع.. من تخلصين هاي السنه وتنجحين للثاني
اسويلج و8نسافر ووراهه عود نسوي طفل

عقيق.. واذا ماصار؟
السبع.. اتزوج عليج
عقيق.. باوعتله صفح ودرت وجهي
السبع.. شوتباوعين صفج اجي اطير عيونج
عقيق.. اني اطير عيونك اذا اتزوجت يتزوج واني
اكعد انتظر سراي

السبع.. لا نتفق اكلهه عقيق الاولى وشويه حساسه
زياده عن اللزوم يومين بيوم
عقيق.. جمررررره لاتشاقه وياي هيج كلبي اوجعني
السبع.. مااتشاقه احجي صدك
عقيق.. اااخ كلبي يمه كلبي

السبع.. لج كافي تتعقيلين وسحبني من ايدي
وكعت على الجربايه وكام يبوس بركبتي ويدغدغ
بيه واني اضحك ويسد حلكي لايسمعني البنات
تلمست لحيته وكتله تزوج عليه؟؟

السبع.. انتي روحي وعمري شلون ابدلج كل الاماني كدامج فدوه انتي بنيتي وحبيبتي والماكدرلهه صاير
تدلع ووكيحه بس انتي هنا واشر على كلبي وماليه
هذني واشر على عيونه...

بسته من خده تلمس شفتي بطرف اصبعه جان
تصيح فجر عقيق عقيق!! خلتني اكمز مدد
يشوف تلفزيون وطلعت اشوفهه كتلهه اني مو مزاعلتج؟؟

فجر.. انجبي المايعه سويت محروك اصبعه تاكلين
لو اذبه للدجاج
عقيق.. ماحاجيج شلون تكتليني بعده السبع موجود
باجر عكبه اذا ظليت وحدي لاسامح الله تشمريني
بالشارع

فجر.. تف تف من حلكج ابيش طالبته فوكاهه مسويه عمرهه اطول من عمره يله تعالي اكلي واذا مااكلتي
اجي اسحلج وتاكلين غصبا عليج

عقيق.. شو صايره عنيفه
فجر.. لا الزم اذانه اشويهن على الفحم ااااخ
تزوج غوسيه وتغيدين مااصيغ عنيفه
عقيق.. اجيت كعدت يمهه كتلهه هو الخسران

فجر.. خلي يولي يله اكلي وامسحيهه بوجهي
هاي سحله صغيره المره الثانيه كليلي اتحضر
واكتلج كتله مال وحده كلبهه مخزن

عقيق.. والله اني حايط نصيص السبع من يعصب
يرجع عليه وانتي تكتليني بعد اكو غيركم
فجر.. وعلى اساس انتي مامكيفه من يعصب السبع
موانتي ادري بيج فلتانه وحيزبون كاتله روحج يمه
منج عقيق

عقيق.. لايسمعج ولج
فجر.. اكلي اكلي اااخ يا ابو اذان
عقيق.. ودكولين خلي يولي وانتي النهار كله تفكرين بي
فجر.. خلي يولي لاتصدكين بس حجي

لبابه.. ثاني يوم طلعنه للدوام سياره جراح بالباب عرفته
ماراح يداوم وصلت للكليه عندي صديقه وحده اوكف
وياهه بالاستراحه مااختلط هواي جنت مرحله رابعه
ويوزعون البحوث احنه 5 طلاب ببحث الوحيده
بنيه بينهم كلهم ولد سجلوا اسمائنه شويه واجت صديقتي كالت رئيس القسم يريدج...

موبالي ابد هوسه يم باب رئيس القسم بس كلت لسكرتيره دخلتني جان كاعد ومدنك يوقع اوراق من كلت
السلام عليكم رجع نفسه ليوره وذب القلم وكال عليكم
السلام تفضلي

لبابه.. دكتور كالو رئيس القسم يريدج
اسامه.. تفضلي اكو خطأ بأسمج اريد اتاكد منه
لبابه.. اشرلي على الكرسي كعدت وطلع اوراق
كال اسمج مكتوب بالجنسيه شكل وبالبطاقه التموينه شكل منو الصح انريد نتاكد
انطاني الاوراق مكتوب لبابه وبالبطاقه لباب كتله لادكتور
اسمي الحقيقي لبابه هنا غلط اني ابلغ اهلي يعدلو

اسامه.. انتي وين بيتكم؟؟
لبابه.. بابو الخصيب؟؟
اسامه.. هااا اهلا وسهلا شلون تجين موبعيده
لبابه.. عندي خط

ظليت ساكته معقوله هو هيج يسأل الطلاب كلهم كمت وكفت كتله استأذن دكتور ظل يباوعلي وغمض عينه وهز
راسه طلعت بس ماادري شنو من شعور غريب يمكن لان عمري ماشايفه واحد يباوعلي غير جراح

دكتور اسامه يطلع عمره ب30 انيق بشكل وطويل
وجسمه مرتب بشرته سمره وترتيب شعره
من الجوانب مزينهم خفيف حيل وشويه درجه اعلى الباقي شخصيته قويه ورزن حيل هذا الي عرفته عنه
من خلال تواجدي يمه...

التهيت بالبحث وجراح مااشوفه ابد اسمع مروه صوتهه
ومرات اسمع صوت جهالهه يبجون بس ابد مادخلت ذاك
البيت بعد مرتاحين حيل يم السبع وهو ممقصر ويانه...

بيوم منهن رئيس مجموعتنه واحد حقنه مسوي نفسه
كلشي يفتهم كال كل واحد يروح يدبر 7 مصادر اني غير قسمي ماطالعه حجيت لصديقتي وراحت وياي للمكتبه
كدرت اجمع بس 3 كلت من ارجع اخابر ضرغام يعرف
بهيج سوالف ويدبرولي من بغداد لان عنوان البحث جان اول مره يستخدم..

مرن يومين اجه هذا الطالب كال وين المصادر اريد اطبعهم كلهه انطت واني ملتهيه بهمومي وماخابرت ضرغام انطيته بس 3 لو ذبيت علي نفط صح مااتجاوز
بس كام يحجي مايصير لبابه واحنه متحملين كلشي
وانتي بنيه كلشي ماقدمتي وبس احنه نركض وظل يحجي كدام طلاب القاعه اخر شي ختمهه مخلصتهه
بس تصفنين ...

لبابه... اول شي اني مو اختك الصغيره وترفع صوتك عليه وكلمه تصفنين عيب انتقي الفاظك قبل لدكولهه
بعد يومين توكف ادرس اجيال انت رئيس مجموعه
على نفسك موعليه مصادر ماعندي اكتب اسمي وكول مالگت مصادر موجاي ترفع صوتك بنص القاعه

ماحجه شي بس ضرب الباب وطلع وسمعته كال انوب
عليه المطلگات الله ذبهن براسنه دنگت راسي وبدون
شعور نزلت دمعتي بسرعه اكو شكم بنيه يمي يهدن
بيه والطلاب طلعوا وكلمه مطلگه تزرف بكلبي

ماكدرت اسكت ظليت ابجي كله من وراك ياجراح
البعمري يتمنون يحاجوهن وعايشات حياه الجامعه
واني اخاف ارفع راسي لايكولون موخوش بنيه

اني بالقاعه وصديقتي طالعه متعاركه وياه متلاغين بره
دكول من جنت اتعارك واكله عيب عليك ماعندك اخوات
فايت دكتور اسامه واكف يسال شكو ومسولفتله السالفه
دكول انصدم حته ماعرف شيحجي بس كايلهه ليش هي لبابه مطلقه؟؟

بيومهه رجعت دمعتي بعيني بالسياره وابو الخط رجال
جبير وفتح اغنيه محمد عبد الجبار بسج ياعين
كافي تبجين هذوله النسوج العذبوج انسيهم ...

مخليه راسي على الجامه ودموعي تنزل بغزاره
ياريت اشيل كلبي ياريت اطلع من البصره كلهه
صايره تخنكني وخيبه الامل السببهه الي كلش جبيره
اذتني قطعت نياط كلبي والالم ابره ويحفر ابير عميق ...

وصلت للبيت حيلي مهدود جان الباب الفاصل بيناتنه مفتوح واشوف مروه تنظف بالطرمه استغفرت ربي
ابيتي ولزمت مكاني واني ايد ليوره وايد ليكدام...

البنات بعدهن ماجايات بدلت وصليت اندك الباب ام جراح فتحته الهه طبت بوستني ولزمت خدي شبي
وجهج اصفر يابنتي بسرعه شهكت وبجيت وكمت احجيلهه عمه يكلولي مطلقه عيروني واني بعز شبابي

ام جراح.. سوده عليه وعمت عيني قبل عينج التنزل هالدمعه هذا حظج ونصيبج ومابيدج شي يا امي
عبالج مرتاح لا والله انتي تنامين ليلج وهو الماينام
انتي العايشه بحريتج وهو المتعلعل

مو انه ام بس ماينكسر كلبي علي من اتذكر اسوايته
اكله من ايدك لايغرج المظهر الليل اليمر على الناس ماتغمض عينه مايخلي لا غرفه لا استقبال لا طرمه
يفتر بيهن وخايفه يجي يوم يتخبل ياما ناس وناس فثدت عقلهه

تدرين يالبابه اراقب بي مثل الطفل من يتعلم المشي
اخاف تاخذني النوم ويسوي شي ولج البارحه كعدت
اشوفه بالمطبخ فوك ال4 مرات يروح يفر عيون الطباخ
ويريد يتاكد خاف مفتوحات لو هاي الموبايل جداحه شاحنه شكو شي كدامه مبعثر يشيله يشمره بالزبل

ماادري ابني تسودن حته من اجه من الخطف موهيج
هسه حاله نفسيه مدري وهوهواس مدري علامات جنون
جراح الهادىء ابو الضحكه الحلوه انصب العشه ياخذ
خاشوكته يغسل بيهه فوك ال3 مرات بدون شعور
هاي النقطه اذا وكعت على ملابسه يشيله يذبه

لبابه.. ماراجع طبيب
ام جراح.. هو يتحاجه ضرغام مايحاجي والسبع مايحاجي وصفه وحيد عزوته واحزام ظهره عافوا
هلك نفسه بيده حسره عليه احجي حرف نار ويشتعل
وغير مروه مسويلهه جدول يوميه تنكتل وكولي ملت عنت تنكتل وترجع تتلوك ولابسه القصير

لبابه.. هو مو يريد هيج مويكول حلت بعيني
ام جراح.. مو اريد اجمله كدامج بس هيج عرس يعتبر نزوه مايدوم ولا بي راحه حلت بعينه يوم ويومين
وعشره لابد مايجي يوم وينفر منهه ومايفيدهه بعد اللواكه ودروب الدلع

لبابه.. الله يسعده ابرار شلونهه
ام جراح.. زينه الحجي بيناتنه اكو طبيب من اهل بغداد وياهه ومحاجيهه وكايلتله من ينطونه عطله ونرجع للعراق تقدملي كدام اهلي واذا تقدملهه خلي تزوج
مدامه وياهه

لبابه.. تستاهل ابرار اواب شدكول شخباره؟؟
ام جراح.. متزوج الروسيه ويسوي بمعامله الجنسيه
وراح يحصلهه ودكول مو بنيه ايه من الجمال
لبابه.. ابن الشيخ المايقبل نطلع بدون عبا اتزوج وحده
لاستر ولاحجاب

ام جراح... لا هي البنيه لبنانيه بس ولادهه روسيا لان امهه هم روسيه وغير لاعبهه صح كولت امه دكول
غسلت ايدي منه ويجوز يجيبهه ويجي وتطبع على اطباعنه ويعلمهه مو هواي اجن مصريات وسوريات حته
من رومانيا ابن عم ابوي جابهه وهذيج علموهه تحجي
چااا ولعد العراقين بعد...

لبابه.. شويه ارتاحيت من سولفت ويه عمتي بين مااجن
البنات هوسن تغدن واني مااشتهي بليل فتحت كتابي
اقره صوره جراح مرسومه كدامي اختنكت حيل
جان شهر 11 بسنه 2012 وبي بروده وعلى ابواب شته
صعدت ليفوك على اللايت اشتم هوه وهم محد يشوفني
من ابجي...

عادتي الي صار ملجأي الوحي. السطح لان اذا شافتني فجر تظل تحجي كمت وكفت اخذتني رجليه لجهه بيتهم مدري شجاني وباوعت من الحايط ظلمه وليل وبس
ضوه النجوم وبجهه الممر هم بيتهم كله اضويه
واشوفه جراح مدنك على المغسله مثل المتخربط
ومروه حاضنته من ظهره ...

تگدس عليه الاهات والنفس الي اسحبه يأبى يدخل لصدري كلبي ناعور ويأذي نفسه دائره مغلقه ويفتر
داير مداير نفسه...

نزلت راسي وكعدت بالكاع عاضه ايدي وابجي
مااريد صوتي يطلع الشهكه اريد اسيطر عليهه
شهكت الالم والخذلان والخيبه ماتعادلهه شهكه وحسره

شلون اصبر وشلون اقوي حالي واشوف تعبي وتحملي
وصبري بيد الغير ربي ارحمني مااتحمل عايشه بصفه
واشوفه رجعت عليه الافكار واني اتخيل من يتقربلهه
هم يكلهه حبيبتي وعمري هم يكلهه اخاف عليج من نفسي اخاف اذيج جراح هم تبوس اديهه بعد كل تقارب
وانت دكلهه لو شمااسوي مااجازيج على تحملج...

مزنة مطر نيسان ومطرت على خدي
كلبي ريشه وتلاعب بيهه الهوه الغربي
وقلعه من جذوره....

مسحت دموعي وبالاحرى جفت من الهوه نزلت
واني اسحب ذيال الخيبه انزل وصوت السبع
فززني وهو يكول اذا ظليتي بهاي الحاله عمرج
ماتتقدمين خطوه الباعج لاتشتري بأبخس ثمن...

جنت محتاجه بابا حيل اني لو عندي اب وام ويدافعولي ويضموني هم امر بهيج شعور كعدت على الدرجه وضميت راسي ابجي اسمع خطواته وهو يصعد كرفص على الدرجه الكدامي وخله ايده على راسي

وكال والله ايام وتنسين الانسان نساي يموت عزيز عدنه
وننساه بس المفروض تساعدين نفسج اذا تظلين تراقبين
وتذكرين ماراح تكومين وراح تصيرين اكثر من حالته
انه وياج لاتفكرين انتي وحيده وشتردين كولي ابيع
البيت وانشيل منا اذا تشوفين نفسج ماتتحملين

لبابه.. رفعت راسي كتله اي مااكدر اعيش هنا
السبع.. لاتبجين المهم راحتج اني اشوف بيت قريب
على جامعتكم وانشيل يله كومي غسلي وانه عند
وعدي التريدي يصير...

لبابه.. كمت غسلت ومددت بفراشي لازم ابتعد مااكدر بصفي وبيناتنه باب وصوت مروه وجهالهه يزرف اذاني
لو اطلع اشوف سيارته ومرات المحه من بعيد من يجي
مااكدر لازم ابتعد...

رانيا.. اذا اكوملك ابتلي بيك من اكلك اكتب دار تخلي عقلك وياي لا اكوم اجيبلك النعال اكطعه عليك
ام رانيا.. اكو وحده هيج تقري سودنتي الولد
رانيا.. ابن الزفره صارلك شهر بدار اذا وصلنه لقدوري
شتسوي موذاك اخوك يقره ويعرف

رضاوي... اريد ابطل مااحب المدرسه
رانيا.. اكتب لا اموتك مو ابوك شكبر اسمه دارس
وعنده شهاده طالع على عمتك انت
سيوفي.. لا على خاله سهاد
رانيا.. لاعب حلكك انت اقره لا اجيك

اقري بيهن خبلوني وطب ضرغام سلم شافني مخليه
واحد منا وواحد منا كال هااا جنكم معتقلين
اليوم ؟؟

ام رانيا..ماتجيهه يمه من العصر لسه ادك بيهم
خبلتهم الجاهل من الخوف بعد مايعرف يكتب
كومي اني اقريهم وروحي لرجلج

رانيا.. كمت وراه ينزع بملابسه ويحجي شبيج
وياهم صايره اعصاب على كيفج يابه خفي
علينه ماناقصنه اخبالج

رانيا.. اريد انقل رضاوي لغير مدرسه شلع
كلبي كلشي ماكو
ضرغام.. انقلي ترى موهيج الجاهل من يخاف مايستوعب
وهو يخاف منج شبيج وياهم

رانيا.. اني مالي خلك تعبانه
ضرغام.. شبيج تمرعدين ويه الجهال وياي جنج عفريت
رانيا.. اليوم انقهرت مدرسه وياي يوميه تسألني
دكلي ماحبلتي واليوم كدام المدرسات دكلي انتهه وقتج
بعد ماتحبلين..

ضرغام... وانتي على هاي كابه اذا الله ماقاسم
شنسوي انبوك بطلي هالسوالف
رانيا... اني ضايجه طلعني
ضرغام.. مدد وكال تعالي بحضني حضنته
وكتله طلعني ميته قهر..

ضرغام.. عند كلامج
رانيا.. اااي اريد اتونس
ضرغام.. ووراهه
رانيا.. انت ادك على هاي اكلك تعبانه
ضرغام.. مواريد اعدل مزاجج وانتي مايتعدل مزاجج
غير هيج

رانيا.. انسولف ونضحك ودك تليفونه رقم غريب نايمه
على صدره وجاوب صوت بنيه بسرعه سحبته منه
وفتحت مايك وهي تصيح الو كالهه تفضلي منو بس خازرني

... اني اقبال ابو ليث
... هله بيج خير ان شاء الله
... الله عليك ساعدني جاي اموت ماجاي انام ليلي
من الكتل والخدمه

عدل كعدته ووخرني وسد المايك تخبلت لازكه اذني
يمه وهي تبجي كالهه بطلي بجي خلي افتهم بشنو
اساعدج انتي مره متزوجه شبيدي عليج

اقبال.. ابو ليث بس عقد وعلى 3 نسوان والله كرهت
روحي اكو حجي استحي احجي معتبرني صاحبته
مو مرته وعرضه وليل نهار اخدم بيهم مااتحمل بعد
ابوس ايدك ساعدني

ضرغام.. منيلج تليفون
اقبال.. تليفون بنت حماي اخذته الله عليك
ساعدني بس اريداطلع منهم واشتكي عليهم
حته اذا اتخربط محد ياخذني ممنوع عليه الطلعه
ويطعنون بيه يكلولي طلكج لان سمعتج موزينه

ضرغام... سدي سدي راح ادزلج رقم خابريهه هاي ضابط
بنيه مسوؤله عن العنف الاسري بس دكي حتلو ماترد
عليج واني راح اخابرهه بس شغله رسميه لاتخافين
بس لتخلين احد يعرف ...

رانيا... سده منهه واني متخصره وواكفه كال نزلي ايدج
واياج تحجين كلمه اساعدهه لو موتحجين البنيه
متعذبه ورفضي لطلاكهه هو هذا السبب

رانيا.. تحجي صدك؟؟ حنيت
ضرغام..  انجبي رانياااا كبري عقلج هذا شغلنه وهواي
انساعد وتعرفيني ماعندي شي لاتلوصين هسه اخابر يساعدوهه

رانيا.. واكو ضابط بنيه وياكم
ضرغام.. نقيب هم
رانيا... وتخابرهه؟؟
ضرغام.. خفاراتنه كلهه سوه مره متزوجه ورجلهه
ويانه ضابط بطلي هالسوالف لوعندي شي ماتمنعيني

رانيا.. درت وجهي واصبر بروحي حضني
من ظهري وباسني من وره اذني وكال لاتغارين
ماكو حب بعد الاربعين انتي حبيبتي والسخيفه
مالتي يابه انتي حقيره بس احبج مااكدر ودنك باسني
من ركبتي

رانيا.. جاي تتغزل وترضي لو ترزل
ضرغام.. هاي واصل لقمه الغزل هسه ابدي اكتلج
كتله تعبيرا عن مشاعري

رانيا.... سكتت رحت بدلت وطلعنه متعوده على غزله
المعوق لازم يغلط تعشينه بره بس موضوع اقبال
شاغلني ثاني يوم سولفلي كال كلفت البنيه تشوف
حالتهه وحلفلي ماله علاقه...

لبابه.. الجنط والغراض كلهه بره وام جراح
تبجي السبع اجر بيت قريب الجامعه كال منا لمن
تتحسن حالتج سلمنه عليهه واحنه نبجي طلعنه من هذا البيت والسبع انجبر يترك كاعه علمودي...

البيت طابقين بس صغير غرفه الفوك النه والجوه للسبع
يومين احنه انرتب بغراضنه جنت ماخذه اجازه
ومن رجعت داومت نظرات دكتور اسامه غريبه
كمت اشوفه بغير شكل ومرات يجي على بالي لان يجذب النظر رغم جرحي الينزف...

مر اسبوعين على انتقالنه للبيت السبع يمنه حته بليل
ميطلع ومرات يلزم عقيق وفجر يرزلهن وكل مره يجرهن من اذانهن. مايتوبن يتكافشن يصيرن فدمره ويجي يفكهن الاستقبال قاعه حلبه مصارعه الهن...

بيوم منهن جانت جمعه واندك الباب ام جراح بحلكهه
حجي بس ماحجت فرحنه بجيتهه انسولف ونضحك
وياهه وكلما ينذكر اسم جراح اغير الموضوع شويه
تحسنت واحس نفسي اقوى ...

صوت بره وبده يعله صوت ضرغام استغربنه شجابه
حته ام جراح متدري طلعن البنات واني اباوع من شباك
الاستقبال واشوف ضرغام يفك بين السبع وجراح
المتعاركين واخر شي صاح بيهم كالهم افرغ المسدس
براسكم بكل منطقه فاضحينه...

جراح نفس حالته المعتاده يفرفح مثل الطير
يدور داير مدايره نفسه ويلزم راسه وايده ترعش
والسبع يباوعله ببرود وضرغام صافن عليهم

ماسمعت السبع شكال بس صوت جراح منبوح
وهو اساسا صوته بي بحه وعبالك اوتاره متمزقه
من العصبيه وهو يأشر بايده الصاحيه بوجهه السبع
ويكله يخطبوهه مني ولكم هيج صارت يخطبوهه
مني ويكلولي انريد بنت عمك بس حجاهه بگلب ينزف
وحرگه ماشايفتهه عند احد ابد...

.
.
.
يتببببببببع......... متابعه ممتعه

تصميم هديه من متابعه ♥️