رواية وعصفت بنا الاقدار الفصل الثامن والعشرون 28 - بقلم Rozaya1122

وعصفت بنا الاقدار... البارت السابع والعشرون
للكاتبه زهراء ( روزايه)...

تمرضت تآلمت وهل اتشافى....؟
سققطت في بير عميق وهل سوف اقف
"اين انت يامنقذي ..؟
لااريد شيئآ من قوتك فقط القليل من القماش لااستر جسمي.
والقليل من الدواء ل اداوي نفسي قليل من صبرك في هذا السنين لاصبر على آلمي...........!!

وبعد كل هذا اختارك اما اختارك!! يعذبوني ليرونك محطم
لم يعلمو ان  انكسارك انكساري.....!!
لااعلم شيئآ من الذي جرى كل شي مر من امام ناظري...
مسرعا خاطف احلامي والهوى..
يا قدري ألا تعلم من انا
وحيدآ... يتيمآ.. مريضآ
الاا ماكفاك ظلما يازمني.......
اي جراح اداوي قلبي العليل ام جسمي الهزيل....
اما نفسي الباتت لاتريد من الحياة سوة الرحيل....
بقلم المتابعه Riyam Hassan
....

ياسين.. كتلمن يابويه وين ضرغام
عنه؟!
اواب.. اسعود انطه العنوان ومن راحوا
العنوان غلط وماكو ومن رجع لگه جبار مهزم
اسعود ونكر يكله وحده انهزم..

وزلم جبار رفعت السلاح ع السبع
وصارت بينهم هوسه وصوب اثنين مدري
ماتو مدري لا بويه خابر اهل الناصريه يجون
يوكفون هذا الدم ترى السبع مايسكت

وراح تروح بيهه ناس مالهه ذنب
الظالم يعبر منهه والبريء يوكع بيهه
لازم تدخل العشائر وتوكفهه

ياسين.. ضرغام وين شلون يعوفه
وحده
اواب.. ضرغام اتعس من السبع اثنينهم
عيونهم طافره شتوكف منهم منا لباجر اذا
مالكاهه حته لمرت عمي طه يطب يكتلهه..

ياسين.. خل يطر الفجر واخابر اهل الناصريه
خل يكولون شيخ ياسين ماصان الامانه
بس لايروح بيهه السبع..

التفت ع ماما وكالهه اواب وزلمنه
هنا لاتخافن سدن الباب
وان شاء الله خير ...

لبابه.. دخلنه ليجوه فجر كاعده بالصاله
رانيا وامهه كاعدات بس الجهال نايمه
ماما كعدت ولزمت ايد فجر وكالتلهه
وين رحتوا..

فجر.. اخذني ضرغام للبستان هو واواب
واكفين وكالو مري من يم القصر حته
يشوفوج بعدني ماوصلت للقصر
واجه واحد يركض عليه يريد يلزمني..

والسبع فوك القصر وضربه طلقه ضرغام
راح علي واواب اجه اخذني وظلينه نباوع
من بعيد بعدين اجه ضرغام كال متصوب
وكايل جبار كال الزمو فجر ومهزم اسعود

وماادري اني رجعت والسبع كام يضرب
وضرغام خابر ع اواب كاله خلي يجي
ابوك ماجاي يكدر يمنعه..

ساهره... ماما فجر اني امج ليش متحجيلي
وين تعرفين جواد وشتشوفين ؟!

فجر.. لاتسأليني اشوف كلشي عقيق
بخطر عقيق راح تموت جاي اشوفهه
محد ينقذهه ..

خلت اديهه ع عيونهه وبجت روح الطفوله
بداخلهه كامت تبجي وتصيح اريد عقيق
خلي ينقذوهه لاتموت!!

حضنتهه ماما تهدي بيهه وخلت راسهه
ع رجلهه وهي كلساع تروح عينهه للبعيد
يصير بس بياض وتصيح عقيق!!

لفت انتباهي حركه شفايفهه تقربت
يمهه اريد اسمع شتحجي شنو من كلمات
سمعتهه تقره ايات قرانيه..

"كذلك نري ابراهيم ملكوت السماوات و الارض و ليكون من الموقنين "
"ان الابرار لفي نعيم على الارائك ينظرون"
هاي الايات سمعتهن بوضوح وهي تردد بيهن

صار الفجر وكلنه كمنه للصلاة الكل دعه
الله يرجعهه سالمه ويقر عين السبع
برجعتهه..

ماما ماكعدت من طلع الفجر فتحت الباب
وطلعت اكو زلم بالباب واواب واكف صاحته
اجه عليهه كالتله راح تخابرون شيوخكم

اواب.. ماقبل السبع كال ماريد صيتهه يطش
بالعشاير
ساهره.. وهذوله ماتوا لو بس صوبهم
اواب.. بس متصوبين ..

حجاهه وراح صارت ب٧ الصبح اجه السبع
وضرغام وياسين كالو فتحو الاستقبال
فتحته ماما واحنه نترقب شكو..

شويه وجابو ام علي اجه وياهه اواب
ام علي رجلهه طه اخو الشيخ ياسين
يشتغل بغير محافظه وكل الصار هو ماموجود..

دخلنه كلنه ماما تتوسل بيهه ودكلهه ابوس
ايدج كولي وينهه يتيمه ومريضه وصار ٤ ايام
بدون علاج هسه ماتت...

ام علي.. اله اروح لاهلي واسويهه كعده عشاير
وياكم بليتوني بلوه حاطيلكم زعطوطه
تتهمني وانه بنت ناس

السبع.. تمنيتج رجال جان عرفت شلون
اجاوبج التفت ع ياسين مرت اخوك هاي
وبعدهه مصره ماعندي سلطه عليهه انت
عندك خابر رجلهه يجي يشوف حل وياهه

مرتي وين ؟! تعرف شنو مريضه؟! اكلك
مريضه ماتكدر تعوف علاجهه يوم واحد
هاي امانه رب العالمين واني ماصنتهه

ياسين وروح ابوي وروح اختي الماحلف
بيهه اهجم البيوت ع راس الزلم اذا اليوم
مالگيتهه عمري ماريده اكتل وافوت سجن

جان يحجي بحرگه عيونه حمر يحجي
بعصبيه ويأشر بيده ويدك بالكاع
وياسين مدنگ راسه مايعرف شيجاوب!!

اواب.. عمه ام علي عوفج منهم كلهم اني
جاي احاجيج عندج بنات اثنين مالي علاقه
بابنج احاجيج ع بناتج

اني ابن عمهن مووو؟! اعتبري تهديد
اذا ماحجيتي سبب فعلتج هسه بيدي
ازوجهن وتعرفين المن وحق الله لايوكف
بوجهي لا ابوي ولا اهلج..

اختاري لو تحجين ونتلاحك البنيه
لو بناتج ضحيه تدرين المن انطيهن
وتعرفيني اسويهه؟!

ام علي.. تهددني مالك حق تمسهن بكد
الشعره.
اواب.. ظلي انتي هنا محترميج لان مره
ولان بكد امي واني اريد اشوف منو
يمنعني..

كام وكف وياسين اشرله براسه
كاله اخذهن وحته ابنهه اخذه
خابر اهلهه خلي يجون ياخذوهه ..

تخبلت من كالو هيج كامت تتوسل ابوس
ايدك شيخ اني مالي علاقه بناتي
مالهن ذنب بس اواب سواهه صدك
وراح اخذ بناتهه وابنهه ومدري وين وداهم

تخبلت هي بنص الشارع واكفه وتصيح
وتتوسل بياسين وام اواب
والسبع مايكدر حته يباوعلهه كلساع يفرك
وجهه ويستغفر..

كامت تصيح احجي والله احجي بس
تنطوني الامان !!
من كالت هيج السبع تخبل ماعنده واحد
يذب حركته غير بياسين

لزم الشيخ من ياخته ويريد يضربه
وياسين ساكت ويكله فرغ نارك
فرغهه بالماصان الامانه

لسه اتذكر حال السبع ام علي لو رجال
يقطعهه وصل وينشرهه بالهوه
انهار فدمره وماما طببت ام علي جوه...

ام علي.. اني مااعرف شراح يسوون بيهه
وداعه ابني كالو بس نخوف السبع بيهه
حته يتنازل عن بستان ابو..

اجتني وسن بنت الشيخ جبار ودفعتله فلوس
وانطتني صره ذهب وكالت بس يتنازل السبع
نرجعهه وهي بامان ..

ياسين.. ياحرام الزاد ابطنج يا عيبة
العيبة ع هيج عار جبتي النه غرت الفلوس
بيمن مأذيج السبع ؟!

اواب.. السبع مامأذيهه مرت عمي تخطط
سوت هاي اللعبه حته يسحبون الشيخه منك
لان تعتبر كدام الشيوخ انت مو اهل للامانه
وحته عمي طه يصير شيخ وهي تطمح تصير
مثل مرت جبار تأمر وتنهي

ظلت مدنگه بالكاع ومبين كلام اواب صحيح
صاح السبع احجي وين؟!
ام علي.. ماادري انه مااعرف جواد ولاشايفته
انه بس ساعدت وسن وطبوا لبيتكم الحجي
عند بنت جبار..

لبابه.. بعدهه تحجي وطلع السبع يركض
ضرغام وراه وشيخ ياسين مدنگ وام اواب
دموعهه تنزل ومصدومه تگلهه حيه ابيتي..

ام علي صاحت بام اواب ودكلهه موبيتج
موشايفه روحج مرت الشيخ واني دخيله
عندج يله شتسوالج انتي وشيخج هاي السالفه..

كام ياسين بعصبيه وكال كومي لدارج
لابارك الله بيج ولابالساعه الشفنه وجهج
بيهه حليبج موطاهر ناكره المعروف..

ماكامت ظلت كاعده بعين صلفه
اواب اخذ ابو لان مبين تخربط واحنه
نباوعلهه مصدومين مانعرف شنسوي..

وهي كلساع وكالت لاتباوعن هيج
شمدريني ناوين غير شي اجيتن
واخذتن البيت وانه صار ١٧ سنه بنص العيال
ومن حجيت كالو بيت مرت السبع وهي
فرخه بكد زري..

جانت تحجي بصلافه وماما صافنه عليهه
بس مانحس غير رانيا بيدهه خشبه جبيره
وعريضه وهدت عليهه ماخلتهه دكوم

كامت تضرب بيهه وهي جوه ايد رانيا
متكدر تتحرك كعدت ع رجليهه ونيمتهه بالكاع
وكامت تعض بيهه وتضرب

ام اواب تسحب برانيا وخاله تتوسل تعوفهه
وهاي عبالك ضرتهه حرگة كلبهه وشكو نار بگلب
رانيا فرغتهه بام علي خلت الدم يطلع من حلكهه

وكامت تشحط بيهه للطرمه وكالتلهه
هاي كتله وبعد انتظري الباقي خلي
ارتاح بس هذيج بسرعه انهزمت..

ماما لزمت رانيا تلوم بيهه فشله وعيب
واحنه خطار عليهم
رانيا.. ياخطار خاله زلم ماتكدر تكتلهه لان
تتحشم اله يكولون اكتلنهه عود خلي يحشمني
رجلهه..

ام اواب ساكته طلعت مصدومه
ورانيا الخشبه بيدهه وتضرب بيهه
بالكاع وتحجي هدوني عليهه ماخليتوني
اشلع لحمهه هالحشره هاي..

بوسط خوف وقلق والحجيه اجت يمنه
وكالت حبسوا ام علي بغرفتهه واواب مدري
وين ماخذ بناتهه وابنهه وعود يجي رجلهه
يحاسبهه..

عدهم اخلاق عاليه رغم هي غلطانه
بس الزلم ماتكدر تمد ايدهه عليهه لان
بعصمه رجلهه حته ماحجوا كلمه غلط

ظلت الحجيه يمنه تواسي بينه
وكلساع وكالت خابرن عليهم
بس محد يرد...

عقيق.. روحي اشوفهه تحوم فوكاي
جسمي بالكاع بس روحي احسهه
مثل الطير ويرفرف ...

ع وضعي وع نومتي رجليه
احسهم تملخوا من كدما مفتوحات كل هاي
الايام كلساع يغمى عليه وارجع انتبه من المي
البارد ..

اسمع اصواتهم اسمع بوضوح ويمكن
الله يحبني وخلاني اسمع حديثهم
صح جسمي خشبه بس روحي
جانت تحثني ع النهوض..

اسمع صوت الصغير يكله خالي تورطنه
وذاك يجاوبه اي ولك تورطنه انه ماتوب من السبع
قبل ٧ سنين خيسني بالسجن وهسه راح
ياخذ روحي

... سمعت الحجي الوصل مدري شلون عرف
بينه
... السبع ذكي وابن عمته ضرغام بظهره
واحنه منو ويانه جبار اليعوفنه ويتبره من عدنه
باول طگه

...غلطت ياابني ماجان المفروض انطخ بالسبع
وانوب ويامن ويه مرته وهاك شوفهه انتظرهه
تموت وصارت روح بزون

... خلي نكتلهه خالي بطلقه ونخلص
ونشرد برواحنه
... مانكتلهه هي مريضه تموت ماتظل
متشوفهه تعالج هسه نحمي نفسنه بيهه
عاد هي بدينه..

... واذا لزمنه السبع
... مايندل المكان واسعود منطي عنوان غلط
وجبار مهزم اسعود اذا حسينه بخطر نفلت
ونسافر بساعتهه..

... اسالك خالي
... اسال ولك
.. ليش اعتديت عليهه بيدك ليش مااعتديت
مثل الزلم
... مواكلك السبع اذا لكاني يثرمني وصل
قبل ٧ سنين عليمن انسجنت ؟!

اعتديت ع وحده من ذاك الصوب واجه ابوهه
حجه للسبع وضمهه الي لحدمالزمني وحدي
شسوالي ولك خلاني عاجز مثل بيه تمثيل
وخلاني بحسره النسوان..

... چااا هسه يعلكنه فلقه ع هاي الدكه
كون تموت خالي خلي نعوفهه ونطلع تموت
وحدهه محتركه ومايمهه اكل تموت ماطول..

عقيق.. اسمع حديثهم يم راسي
الصوره مرسومه كدامي شلون اني
نايمه بهيج وضع عاريه وكدام اثنين
زلم صار ٤ ايام..

دك تليفون واحد منهم فتح خط ويحجي
بس سمعت كفر وفشر بكلام بذيء
وسده وكاله كوم كوم عوفهه ع وضعهه
ولم الغراض خلينه نشرد السبع جاي..

ذاك يسال شلون خالي خاف يلزمونه؟!
ويرد علي خلي انلحك نشرد ونسافر
هذا اسعود خابرني جبار كايله كول لجواد
ينهزم السبع اندل مكانه...

عقيق.. مجرد ماسمعت هاي الكلمات
عبالك روحي جانت محتاجه هيج كلام
كلبي صار ينبض بقوه اريد افتح عيني
واكلهم افتحوا الحبال حته لايشوفني
السبع بهيج وضع

بس ماكدرت خاف يعرفوني كاعده
ويكولون سمعتنه ويخلصون عليه
لاول مره امثل ومثلت اني مغمي عليه
حته دفرني برجله يتاكد واني ماتحركت
رغم الالم..

من سمعت الباب انسد فتحت عيني
هسه شفت الضوه من يوم ساعه عذابي
اني مغمضه مااريد اعيش الصوره يعذبون
بيه واني مغمضه..

ماكدر اتحرك بس كلبي ينبض بقوه
مثل الماطور وعنده سباق اذاني
توش معقوله هيج عندي قوه ومتمسكه
بهيج حياة بائسه ومامتت؟!!

مااعرف شكد يمر الوقت وشلون يمر
بس مثل عقارب ساعه ابيت مهجور..

احس شي ينزل مني مااعرف ادررت
لو شنو كلساع احس بشي ينزل
واني مااكدر ارفع راسي..

هوايه مر الوقت كلش هوايه
تأخرت يالسبع تأخرت عن كلشي
مااكدر حته اباوع بوجهك..

اقره ايات وتسبيح واني انتظر مصيري
المجهول معقوله ماراح يجي وراح
اظل هنا اتفسخ وحدي..

تمنيت مايجي وتمنيت اموت
لاول مره ادعي ربي ياخذني
اتوسلت بدموع وحلفته بدمعه كل يتيم
ياخذ روحي قبل لايوصل السبع ويشوفني...

كمت اسمع حركه لان جان هدوء
كمت اهز براسي وابجي مااريد
احد يدخل مااريد احد ينقذني..

سمعت صوت ضرغام وهو يحاجي
واحد ويكله بيا غرفه احجي لا
اخذ روحك وذاك يكله هنااا ابو ليث هنااا...

صاح ضرغام جمررره راح اطلع
اني واواب نحمي وانت ادخل للغرفه
بس اخذ حذر ...

الباب يندفع وينضرب حيل
واحد يكله اضرب القفل طلقه ويرد علي
السبع لا خاف وره الباب ...

حلكي مسدود اريد اصيح واكله من تفوت
غمض عيونك لاتشوف واريد اكله لاتفوت
اني بوضع موحلو...

انفتح الباب حيل واني مغمضه عيوني
بقوه اريد اخفي عيوني لداخل الجمجمه
هيج شعور قاسي عندي..

ادين مثل الجمر لزمتني
لزمت راسي بقوه ويصيح عقيق فتحي
عيونج عقيق تسمعيني فتحي اني السبع!!

عباله ميته حسيت بحرگه گلبه
حسيته منهار مدري شلون فتحت عيني
وعبالك صرت مااسيطر ع ايعازات دماغي
الامر استلمه گلبي..

بس فتحت عيني اجت عيني بعينه
ع وضعي وضم راسي حيل بصدره
واني اشهك بدون دموع..

فتح حلكي وشمر الوصله وهو ساكت مايحجي
كلمه وحده ماسمعت منه
كام وكف يدور بالغرفه لكه المكص كص الحبل
ورجع فتح رجليه بس ظلن ع وضعهن مااكدر
اسدهم ...

قرب رجليه وحده لثانيه
بهدوء وهو رافع راسه يباوع
لوجهي ماعرفت اوصف حالته بهذيج
اللحظه ...

كمت اصرخ من الالم والحرك بافخاذي
من ينسدن شاغت روحي خله ايده
جوه ركبتي ورفعني شويه شويه
لان جسمي متكسر وجاي اتألم..

سحبني للحايط خلاني ارتجي ع الحايط
وكعدني ع الفراش واني ماتسترني قطعه
وحده مصدومه من وضعي لا انطي
رد فعل ولا اعرف اسوي شي بس اشهك...

كرفص كدامي ولزمني من اكتافي وضمني
لصدره حيل وحجه بصوت مخنوك اهدي
اهدي خلصت!!

حسيته حاير ومايعرف شيسوي
شلون يلمني وشلون يتصرف
اصلا مصدوم من الشافه وبعده ممستوعب ...

كام وكف وهو يفرك بوجهه وطلع بره
ورجع بس طب ماتحمل رجع طلع
وصاح بصوت عالي لك ضرغاااااااااام...

هنا وكعت دموعي جانت بس شهكات بس
هسه لا كامن يمطرن ع خدي انت ماتحملت
منظري لعد اني شلون عشت ٤ ايام بالالم
وتحت التعذيب..

رجع دخل وكرفص كدامي خله راسه
ع راسي انفاسه تلهب بوجهي
مثل بركان وثار واني اشهك واريد اكله
عذبوني بس ماجمع الكلمات..

كاعده ع فراش علي شرشف رفع
الشرشف ولمني بي غطاني واني ع كعدتي
حته اديه غطاهم وباسني من راسي وهو
ساكت..

شويه وصاح ضرغام جمره كام طلع وجاب
علاكه كام يلبسني ع كيفه لان منين مايلزمني
اصرخ بالم وجرحي ينلچم..

من كمل لزمني من وجهي وخر شعري
من وجهي وكام يبوس بكب وجهي
بخدودي وبراسي وبعيوني وبفكي
بوسات هواي مثل الام من تبوس ابنهه..

طلع اخر شي شال ولبسني شلون
ماجان وشالني بحضنه وطلع
همسلي يم اذني ضمي راسج
بصدري لتشوفين احد...

صعدني بالسياره وصعد بصفي وضرغام
يسوق اكو سياره مدري منو بيهه طلعت
كدامنه ضرغام يخابر وينطي عنوان البيت
يمكن بلغوا عليهم..

ايده محاوطتني وراسي ع صدره
حجه ويه ضرغام كاله اخذني للبيت
مالتك مااريد احد يجي كلهم لگيناهه
بس لاتخلي احد يجي للبيت..

ضرغام ساكت بس هز راسه استحي ارفع
راسي عيني بالكاع محتاجه علاجي
بس مااكدر احجي طاقه ماعندي وخجلانه
بشكل ماينوصف...

وصلنه للبيت سندني ونزلني بهدوء
مااكدر امشي الم موطبيعي عندي
طببني ليجوه ورجع طلع لضرغام
وره شويه رجع..

قفل الابواب كلهه واجه عليه جنت
كاعده بالكاع ومرجعه راسي ليوره
ع الحايط كعد كدامي وسحبني لحضنه
العجيب ساكت مايكدر يحجي حسيت
العبره خانكته..

اني هم مجرد جثه يحركني منا يرجعني
منا حجه بهدوء وكال كومي خليني اغسلج
هزيت راسي برفض وبجيت..

مسح دموعي باصابيعه وكال لاااا
لتبجين وداعت هاي دموعج اخذ حقج
لو اخر يوم بعمري اني حلالج لاتستحين
كومي خلي اغسلج واعقم جرحج وانروح
للطبيب..

عندي نفور موطبيعي من كال اغسلج
وذكر جرحي وراح يشوفني ويلمسني دفعته
حيل ارتدت ليوره ماحجه شي ...

رجع لزم اديه وكال عقيق محد يدري
ولااحد راح يعرف بالصار كومي خليني
اعالجج واني ارهمهه من يمي انتي تثقين
بيه موووو !!؟؟

هزيت راسي اااي اثق كال چاااا كومي
ساعديني وساعدي نفسج انتي مومرتي
تريدين اجيبلج وحده من البنات مايصير
تظلين هيج؟!

عقيق.. مااريد
السبع.. يله كومي حته انروح للطبيب
كومي بنيتي ثقي بيه !!

ظليت مدنگه وساكته اريد ابعده
ويرجع كلبي يسحبه الي
ماعندي غيره ابد هذا الانسان حته مااكدر
انفر منه ..

كومني امشي للحمام سحبت طبله
صغيره وكال اكعدي بين ماجيب اهدومج
دليته بالكنتور جاب ملابس وخاولي واجه...

فتح المي وكال اسبحي ع راحتج ومن تكملين
صيحيني كمت اسبح ودموعي اختلطت ويه
المي..

ينزل المي ع جسمي تشوغ روحي
من الالم صدري مجلغ وافخاذي ماكدر
اسدهن ابجي واغسل احس نفسي
مونظيفه...

اكو دم برجليه كمت انفض براسي
مااريد اتذكره هذيج الايد القذره
شسوت بيه..

كملت وكمت لازمه الحايط بدلت
ع كيفي وفتحت الباب كاعد بالصاله
كدام الحمام والجكاره بيده بسرعه طفاهه
واجاني..

اخذني للغرفه مال خاله كعدني ع الجربايه
جفف شعري بيده ورفعته بدون ماامشطه
احس فروه راسي تصيح الغوث كل جزء بيه
اله نصيب من الالم...

مددني بالفراش ومدد بصفي
ايده بشعري ويباوعلي رفعت راسي
التقت عيونه دمعت عيني واني اشوف
نظره ماعرفت افسرهه..

تفاجأت وانصدمت واني اشوف السبع
يخلي راسه ع راسي وبجه!!

اشوف انسان ماله مثيل اكول مستحيل
بيوم يبجي بس هسه السبع ع راسي
ودموعه تنزل ع كصتي واختلطت
دموعنه سوه...

كام يحجي كله بسببي انتي عرضي
انتي مرتي هيج حالتج بين ادين الغربه
والسبع يشتم الهوه عار عليه..

اخاف عليج من نفسي اريدج بكل وقت
اشتاقلج بكل ثانيه من اول يوم الشفتج
واشوفج تكبرين كدام عيني واني مستعد
اضحي بروحي علمودج

اسنين صار واني مااكدر انسه منظر اختي
وهسه انتي شلون اعيش شلون انتقم
شسوي بالأذوج اني شسوي بروحي
تأذيتي بسببي...

عقيق.. لاتبجي انت السبع اني تأذيت
بس انت مالك علاقه هم موخوش
ناس اني مسامحتك..

السبع... اشششش لاتحجين كليلي كلبج
شلونه خلي اجيبلج علاجج عفته بالصاله
كام جابه وانطاني الحبايه ورجع لمكانه..

لزم ايدي وباسني من بطن ايدي
وكال غمضي عيونج وهمس يم اذني
كال سوولج شي؟!

عقيق.. هزيت راسي شفته كوه مصبر
ع نفسه بس مايريد يبين الي لان شافني
هدئت ...

سحب تليفونه وكال راح اغسل واجي
اكتبيلي هناا شسوولج وعوفي التليفون
واجيبلج اكل واجي..

طلع واني لزمت التليفون مااعرف شكتب
كتبت سطرين ودموعي تنزل وعفت التليفون
وحجيتله مختصر...

شويه واجه جايب ماعون لفتين
وماعون فواكه وكلاص مي
خلاهن ع الجربايه وكومني خله الصينيه
ع رجليه وكال اكلي ...

كمت اكل لان جوعانه صار ايام مماكله
ميته عطش حلكي يابس حته بلعومي
يابس ...

كملت وظليت كاعده واسمع ضربه قويه
وصوته مافهمت شكو بسرعه نسيت الالم
وكمت واشوفه كاعد بالصاله ومدنك راسه

ضارب الحايط بيده مكسر اكو غراض بالصاله
راسه مايكدر يرفعه دموعه تنزل وعبالك
هسه ماتو اهله..

فقد اعصابه عافني وطلع ليبره اريد
اطلع وراه ماكدر اخاف من ردة فعله
وخاف يتحسس لان اشوفه...

كعدت بالصاله دموعي تجري الم
بروحي وبداخلي بكل مكان احس
بالالم تعبانه حيل اريد اغمض واكعد
الكه كلشي منتهي....

تاخر بره بالنص ساعه يله اجه
كال كومي اخذج للمستشفى بس مايباوع
بوجهي احساس موحلو وغريب صار عندي

اني مااستاهل هيج حياة ومااستاهل اليصير
بيه اكيد ماراح اتقبل السبع ولاهو يتقبلني
كلما ترمش عيني  اتذكر المنظر وابجي..

فركت كلبي بقوه وبدلت اباوع لنفسي
بالمرايه اني ليش عايشه ليش مامتت
هو خطيه شنو ذنبه ياخذ وحده مكشوف
عليهه..

حسيت نفسي متخربطه وعيوني
كوه افتحهم صعدت وياه بالسياره
وهو ساكت نزلنه بمستشفى اهلي
بعدني امشي بالممر ووكعت

فتحت عيني كاعد يمي وصافن عليه
يريد يحجي مايكدر كوه يطلع الكلمه
ويكلي شتحسين؟!

ماجاوبته عبالك هسه بينت ردت فعله
كام وكف وكال راح تجي ام شهد يمج
لان سويتلج دخوليه حالتج ماتسمح
اطلعين...

سكت وطلع وكف بالباب واني ساكته
دموعي تتسابق وحدي مااعرف
بعد شنو المضموم وشراح اشوف ايام..

اجت خاله ساهره حضنتني وشويه
واجت ام جراح ماحجيت شي بس كلهه
عبالهه بسبب ضعف كلبي

سالتني سوولج شي؟! بس قبلهه السبع
كال اي وحده تسالج كولي بس خطفوني
ومحد سوالي شي لتحجين اي تفاصيل...

لبابه.... رغم وصلنه خبر عقيق
وكالو كلبهه تعبان لان تاركه علاجهه
بس هدوء ام علي محبوسه
وبيت ياسين ماكو صوت يمهم

اجه ضرغام جاب مسواك هذا الشخص
غريب كلما اشوفه حزين اكثر حته
متغير وضعفان وعبالك عايش بحرب

اواب يجي ع خاله ام رانيا صارت بمكان
ماما لان داخله ويه عقيق يشوفنه
شمحتاجين ويروح...

خابرتنه عمه زينب وحجتلنه كالت وسن
السبع شاك راسهه ومخيطي ومكسوره ايدهه
ورجلهه راح يطلكهه ونكرت ومااعترفت

بس الساعدهم هذا الراد يخطف فجر من لزمو
اعترف ع اسعود وضرغام نابش اسعود نبش
ومندلين العنوان

بس كل هذا ومادخلوا جبار بالموضوع
محد اعترف علي حاليا هدوء وكل واحد
رجع لحياته طبيعي وجواد مدري وين اختفه
واسعود هم مختفي حته جبار مايندله

يمكن ضرغام الماخذه لان السبع محتار
بحالة عقيق وضرغام يركض وراهم
وحسب كلام عمه زينب سامعته من ضرغام
كايلهه تحاكمهم المحكمه بس السبع يريد
ايد جواد يكول اله ابترهه اله..

انريد انشوف عقيق بس كالو اله تطلع
من المستشفى صارلهه اسبوع واليوم
راح تطلع رجعنه لبيتنه نظفنه من الصبح
وننتظرهه تجي..

نزلت وماما ساندتهه عبالك نفس اليوم
الي اجتي بي رجعت صغرت وصايره
جلد ع عظم بوسناهه وحضناهه وهي ماانطت
اي ردة فعل..

نامت بفراشهه واحنه يمهه سالت ماما موكلتوا
زينه شبيهه حته ماترمش؟!
ساهره.. ماندري عبالك هسه صحت مدري استوعبت
خطفتهه قبل يومين نايمه وفزت تصرخ
وتضرب بنفسهه وانطوهه مهدء وسكتت

مدري شبيهه ماتحجي اذا شافت السبع
تتخبل هيج لزمهه يريد يكومهه كامت تصيح
وتدفع بي ...

الطبيب يكول بحاله صدمه وعدهه
انهيار عصبي الي علينه نساعدهه ونخليهه
توكف ع رجليهه...

لبابه... اباوعلهه ماتحجي ولا تباوع علينه
يجي السبع يحاجيهه دايره وجهه حته
هو حالته تبجي الصخر يكول عوفوهه
لاتضغطون عليهه..

اجانه الشيخ ياسين ومرته والحجيه
ماقبلت تشوف احد وماما شرحتلهم
حالتهه وتفهموا وضعهه شويه وطلعوا...

مرن عشر ايام الوضع ماكو شي
بيومهه اجه السبع وكال لماما حضروا غراض
عقيق كلهه راح اخذهه تعيش ابغداد...

كال بس شويه تتحسن حالتهه اخذكم
هناك تستقرون بعد مالكم مكان بالبصره
منا لمن اخذ ثاري منهم واحد واحد وارجع
حقي وحق ابوي...

ع اساس باجر ياخذهه حته
حضرنه غراضهه وهي ماتدري
لان حدهه للحمام وترجع وماتحجي
ابد...

ثاني يوم ننتظر شوكت يجي ياخذهه
صارت ب١٢ وتاخر ماكو خابرت ماما
ماكو مايجاوب

رجعت دكت ع ضرغام ظل بالنه يمه
كالهه السبع لزم جواد وجماعته
وماندري بي وين لان اخذهم وكال اريدهم
وحدي ....

.
.
.

يتبببببببع...... متابعه شيقه