رواية وعصفت بنا الاقدار الفصل التاسع والعشرون 29 - بقلم Rozaya1122

وعصفت بنا الاقدار... البارت الثامن والعشرون
للكاتبه زهراء ( روزايه)...

( بارت هديه بمناسبه وصول القصه نصف
مليون .... احبكم)

السبع...بينما اتخبط في شوراع حياتي
لمحت تلك التي اصبحت نبضاتي
صدفة وما اروعها من صدفة
طفلة ضائعة تائهة..تندب فراق سندها بالحياة
لا اعلم كيف اخترقت قلبي .وتربعت على عرشه
رقيقة كأنها نسجت من الغيوم .....
‏كنت أنظر إليها...وكأنها ذلك الشيء الذي يحدث!!
في العمر مرة واحدة ..

عقيق..طفلة انا دون ام تفقد حنانآ.
في مدينه ليست مدينتي..في شوراع وابينة مجهولة
فقدت سندي...فقدت حياتي ..يتيمة قالوا عني!!
جسد مريض..وقلب عليل..ضعت في طرقات الحياة
اسودت الدنيا في عيني..واستسلمت للموت
راجية لحاق ابي ولكن!!
رأيته يشع نوراً داخل عالمي الأسود
كقلادةٍ فضية مرصعة بالألماس
كان وحده جوهرتي الثمينة ...
....

جواد.. ابوس اديك جمره شتريد انفذ
بس ارحمني روحي راح تطلع تدري بيه
انه عبد مأمور..

السبع.. تريد ارحمك؟! كلي من ابدي بيك
من اديك لو اقلع عيونك التمعنن بعرضي
٤ ايام مرتي بين ادين واحد قذر مثلك
وتريد ارحمك

جواد.. اكتلني صير زلمه واكتلني بگلبي
شمنتظر هااا يله صير زلمه ولك وحط
اسلاحك بگلبي..

السبع.. شوف هاي الدنيا شكد واسعه
اشوفهه مثل خرم الابره لاتحاول
تستفزني لان تضر روحك ..

هسه ياجواد كلي وينهه ايدك الزمت
عرضي شووو كلي وينهه ؟! واله اكلك
لاادليني خليني اسكطهن الك اثنينهن

سحب اسلاحه وضرب بكل ايد طلقتين
وجواد يرفس بالكاع من غير التعذيب
الماكله من السبع ع مدار يوم كامل
هو معلك من رجلي وراسه بالكاع

اديه تنزف اثنينهم ويصرخ مثل
صريخ النسوان يستنجد ويطلب الرحمه
مستعد ينفذ كلشي بس يرحمه السبع..

السبع.. الك نص ساعه اما تحجي الي اريد
اسمعه اما اكعد اتفنن بيك اكطعلك اصبع
اصبع وانت تخيل كل ساعه اصبع
عندك عشره يعني راح تعيش الم متواصل
مده عشر ساعات..

جواد .. بروحك ابوك ارحمني لوتكتلني وتخلص
عليه لو تعوفني السبع بروحك اهلك

السبع.. تدري ياجواد انت ربيت وياي وبنصنه
وتعرفني جنت اتمنى تتاخر الحقيقه مال ثار
ابوي حته مااكتل نفس واوكف بين ادين
رب العالمين واني سافك دم بالدنيا

بس تدري هسه النار البگلبي مستعد احرك
هاي القريه على زلم ونسوان وماتبرد
ناري...

عبالك تنتظر ضميري يصحه لان تدري
بيه ماعندي گلب وعندي مخافه الله
فوك كلشي ..

بس هاي عملتكم وكسرتكم الي بعرضي
خليتوني اتخلى حته عن مبادئي وراح اكتل
وراح اعذب شكو واحد اله ايد بالسالفه..

احجي ياجواد منو كتال ابوي؟!
جواد.. والله ماادري بيوم كتلت ابوك انه
ماجنت بالبصره موتذكر الشيخ دزني
لغير مكان

السبع.. جاي اضيع وكت وياك جنت ناوي
اسلمك للشرطه وتنحكم بس ع سوايتك
انه اخذ ثاري بيدي ..

سحب سلاحه وجواد يتوسل وراسه بالكاع
وضربه طلقه بنص گلبه خلته يسكت
بالمكان بنفس الغرفه التعذبت بيهه
عقيق تعذب بيهه اضعاف عذابهه

طلع السبع من البيت جان عاصم واكف بالباب
هو تكفل بكلشي عاصم والسبع رجع
يكمل ثاره..

ساهره.. عزااا العزانه ابوليث ع بختك
ليش ساكت جواد مات الله اكبر شوكت يوكف
الدم

ضرغام.. مدام مسأله عرض ماراح يوكف
لاتصدگين راح تبرد ناره يا ام شهد الرجال
كلشي يتحمل اله واحد يمس عرضه
هاي محد يلومه بيهه

ساهره.. جبار وره السالفه كلهه شنو الفايده
تكتلون بهاي الناس وراس الحيه موجود

ضرغام.. وشنسويله نكتله مانخلص نموت
ورا حقج ماتدرين الحزب مال جبار
مستر بالعكال ويدعم هاي الزمر الكتلت
الشباب وسوت الطائفيه..

ساهره.. الله اكبر ساعه السوده ع اليوم
الخلينه رجلنه بالبصره محد يوكف هالدم
لاشيخ لا قانون

ضرغام.. ياقانون هو القانون يخاف من
العشاير هو عراق لو تايه وصفه بيد
المايخافون من الله..

ساهره.. ابو ليث مااعرف شكول بس
انت بيك شي مو مثل قبل ؟!

ضرغام.. مابيه شي بس هاي الاشهر
من كل سنه صعبه عليه ذكرى وفاة
مرتي واطفالي

ساهره.. الله يصبرك ويرحمهم
برحمته
لبابه.. جنت واكفه بالباب مال المطبخ
وهو كاعد ع درجات الحديقه يدخن..

دخلت ماما جوه وهو دك تليفونه
اخذه وطلع التفتت وراي اشوف رانيا
واكفه بالمطبخ وتباوع من الشباك
وظلت عينهه علي لحدما طلع..

رحت كعدت يم عقيق احاول اخليهه
تحجي ماكو اي صوت تاخذ علاجهه
وتنام ..

شويه ودك تليفون ماما جان ع الشحن
رحت شفت الرقم مكتوب نور بسرعه
رديت ماتخابر اذا مااكو شي..

لبابه.. هلو نور شلونكم صاير شي
نور.. لبابه عمتي وسن ماتت اسمع صوت
عياط وهي تحاول تبتعد حته اسمع
الصوت واضح..

ظليت مخليه التليفون ع اذني ومصدومه
وسن ماتت!!!!
حجت نور هالبابه تسمعيني!!

لبابه.. اسمعج شلون ماتت وشوكت؟!
نور.. قبل ساعه وهاي الگصر مگلوب
عمتي الشيخه ماتت وجدي راح يموت
راح عمي البطل عامر وهسه الشيخه وسن

لبابه.. تحجي وتبجي شكد فطيره عدهه
كلهم ابطال رجعت سالتهه شلون ماتت
شبيهه قابل مريضه؟!

نور.. لا ولج چااا مو قبل شچم يوم السبع
سگطهه ضرب راسهه وشگه وكسر ايدهه
وصار ايام تصيح راسي يوجعني ومحد يكدر
يطلعهه يخافون من السبع وجابولهه الطبيب
للبيت وماصارت زينه

وقبل شويه كالت كومني اريدن اروح
لتواليت جسمهه مكسر ماتكدر تمشي
طبت وبطت ماطلعت اندك الباب عليهه
ماترد فتحنه الباب لگيناهه واكعه طلعناهه
ميته مابيهه روح...

لبابه.. هي تحجي واني صافنه سبحانك
ربي اسمك القوي الحق شلون موته شنيعه
بمكان موطاهر لان اذت هاي اليتيمه..

سديته من نور صاحوهه جانت
ع السطح وتحجي بس اسمع صياح
النسوان مثل وفاة عامر...

اجه ابالي جراح غمضت عيوني
واني استغفر ربي وينك ياجراح
اكثر من سنه صارلك لا ميت ولاعدل
امك راح تموت وخبر ماكو عنك...

طلعت لماما كتلهه وسن ماتت
شلون ايام سوده اخبار الموت
بين كل ساعه نسمع فلان مات
وفلان انقتل...

عمه زينب وابرار اجاهن السايق وراحن
للفاتحه واحنه قفلنه الباب علينه لان
وحدنه...

صارت ب٩ سمعنه دكة الباب بالسويج
كالت ماما هذا ضرغام كمت لبست حجابي
وفتحتله الباب كال ابات يمكم اليوم
سويلي مجال..

فتحتله الاستقبال ودخل هو من يجي
يريد جاي خليت الجاي ع النار واسمعه
يسولف ويه ماما...

اخذت الجاي ورحت كعدت يمهم جان
يحجيلهه عن السبع كالهه جواد مات
والويه جواد بالسجن هو واسعود ...

عاصم ساعد السبع هو دله السبع بمكان
جواد لان مراقب اسعود
محد اعترف ع جبار كالو من ذاتنه شغلة
عداوه ضد السبع وخطفناهه

هذوله راح يحاكمهم القانون وجبار
يجي يوم بس بعد الصار مااعتقد
راح يسوي شي بعد خسر ابنه وبنته
وازلامه من وره غبائه..

ساهره.. واحنه راح انظل هنا خايفه
ع بناتي
ضرغام.. بعد شهر وتبدي المدارس وين تروحون
اني كلت للسبع اذا مرتك صارت زينه
خلي انبيع العدنه ونشتري بيت ببغداد احسن

ساهره.. ياريت نبتعد منا بعد مابينه حمل
سلاح ودم شفتو بعينكم المسكينه شصار
بيهه

ضرغام.. هم تتصلين بام اواب هاي ام علي
شسوولهه
ساهره.. جاي رجلهه وماخذ بناتهه وابنهه وشامرهه
يم اهلهه دكول اخوتهه وابوهه كلساع يجون
يتوسلون بس هاهي راح يطلگوهه

ضرغام.. بس هيج؟!!!!
ساهره.. لعد شيسوون هم كاتلهه رجلهه بس
التسوي هيج يفيد بيهه كتل بيومهه كلت هسه
يزعلون علينه ام سيف حطتهه بالخشبه
وكسرتهه عليهه

ضرغام.. هاااا صدك؟!
ساهره.. والله كوه خلصناهه من عدهه
ضرغام.. زين تسوي عاد سوت الماسوته الزلم

ساهره... ماكو اخبار عن جراح
ضرغام.. اختفه حته التهينه ماندور بس اسمه
موجود بلكي احد يعرفه متصوب فاقد ذاكرته
تجينه منه ايد رجل..

لبابه.. كمت من يمهم موضوع جراح
يأذيني رحت للغرفه لكيت عقيق كاعده
ع فراشهه وفجر واكفه وراهه وتضفر بشعرهه

كملت وكعدت كدامهه اني كعدت بعيد
عنهن وفجر جانت تحاول اطلع عقيق
من حالتهه

فجر.. اني حلمت بيج هواي اشوفج
تتعذبين واكعد ميته بجي عليج الحمدلله
غجعتي

السبع يحبج لوتشوفي شصاغ بي
انت هسه متغيدي وهو يوميه
يخابغ ماما عليج

عقيق... اسمع كلامهه بس ماعندي طاقه
اجاوبهه السبع يحبني ومتعذب عليه
ويكولون اخذ حقي بس ماعندي عين
اخليهه بوجهه

موبس هيج كرهت اسم رجال مجرد
مااسمع صوت واحد ينعاد عليه الصار
رغم حالتي الصحيه تعبانه بس ماشكيت
وماكلت...

اجت خاله كالت حضرت غراضج
وراح يجي السبع ياخذج للبغداد
حته تتعالجين بسرعه حجيت بخوف
لاتعوفيني وحدي تعالي وياي!!

كعدت بصفي ولزمت اديه وكالت عقيق
شوفي هاي الدنيا كلهه ماتوكفلج بس
السبع يوكفلج ويحميج

ادري متأذيه والله اعلم شصار واشفتي
بس صدكي بابنتي محد ينتشلج من الضياع
غيره ..

اذا ثقيتي بي واذا ساعدتي نفسج
وساعدتي راح ترجعين احسن من قبل
بس اذا ظليتي هيج ماراح تتحسنين ابد...

عقيق.. استحي اكلهه ماكو واحد يتقبل
الصار السبع مايشوفني ابد حته من يجي
مايدخل صح يسأل عليه بس مايجيني

مايتصل بيه ولا يريدني ومن تجي
عيني بعينه بسرعه يدير وجهه عرفت
صرت مامرغوبه وحقه وابد ماالومه..

هو الطفل مايقبل ع لعبته تتفسخ
كدامه شحال اني مرته وكدام الناس
كلهه درت انخطفت وهو شافني بوضع
فضيع..

طلعت خاله واني اضغط ع نفسي
اخذ نفس وينقطع مايكمل كلبي
صار مايساعدني صدري ثگيل

حطيت راسي ع المخده واني صافنه
بالسگف واحاجي كلبي اكله اوكف
كافي متمسك بالحياه محد يريدك بعد

قهر!! وحزن !! واكتم بداخلي
وهسه طلع عليه الحادث ماادري شصار
بيه وبعدهه ماحسيت على شي ...

لبابه.. اجيت اريد اكعد عقيق تتعشه اهز بيهه
ماكو جسمهه خشبه وشفايفهه زرك
كمت اعيط عبالي ماتت

اجت ماما متخبله شكد حاولنه نكعدهه
بس مااستجابت النه ابد والله مابينه
حمل خساره بعد كلنه نبجي واكفين فوك
راسهه وهي لا ايد ولارجل..

بين مااجه السبع اخذهه هو وماما للمستشفى
نتصل محد يرد قلقنه اكثر وفوك الساعتين
ردت علينه ماما صوتهه مبحوح وكالت
ادعولهه...

ظلينه ع هذا الحال يومين كلما نخابر
كالو مامنتبهه بعدهه خوف وقلق
كل وحده لازمهه قران وتقره وتدعي

ماما اجت تبدل وتسبح لان تعبت
سولفتنه حالتهه كالت بس وصلنه
اخذوهه من عدنه ومخليهه بالانعاش
كلبهه تعبان...

حاجين حالتهه للطبيب كايلهم المثلهه
بلحظتهه تموت بس عاشت بقدرة قادر
الله كاتبلهه عمر المثلهه بدون اكل ايام
وتعذيب ومريضه تموت بساعتهه

بس الله رفع عنهه وبعده يومهه ماجاي
جانت تقوي نفسهه بس هسه بعد
مابيهه مجال وكعت وكعه مثل مانكول
اخت الموت...

ماما دكول السبع كاعد بالباب حالته
اتعس من حالتهه وضغطه كلساع يرتفع
وضرغام عايف دوامه وواكف وياه...

غسلت ماما وبدلت واجه السبع اخذهه
وكالت راح يجيكم اواب تروحن وياه
للبيت هناك ماتظلن وحدجن لان ضرغام
التحق..

للعصر اجه اواب ويانه خاله ام رانيا
اخذنه لبيتهم امه جابتلنه العشه وكعدت
يمنه لحدماصار موعد النوم وراحت...

ماجايني نوم كمت افتر بالبيت
فتحت باب الاستقبال اتفاجئت بفجر
تصلي هاي من يمته تصلي صلاة الليل!!!

ظليت كاعده انتظرهه لحدماكملت
كعدت بصفي كالت جنت ادعي لعقيق
باوعتلهه وسألتهه!!

انتي شلون عرفتي اسم جواد ماجاي
تدخل بعقلي اكو شي مانعرفه فهميني
اني مواختج!!

فجر.. مااغيد احجي بس هواي سألتوني
ع هاي السالفه وغاح احجيلج شلون عغفت
اسم جواد...

محد كالي اني اشوف موقف لو مكان
لو شخص اعغفه ويوصلني احساس
واني شفت واحد اعغفه اسمه جواد
وكلت الاسم ...

لبابه.. مافهمت شنو يعني؟!
فجر.. انتي يايوم افتهمتي غاسي يوجعني
اني اكعد بيوم وافهمج

لبابه.. شفتهه متألمه سكتت غيرنه الموضوع
كتلهه يكولون خطوبة اواب تفركشت
فجر.. ليش؟!
لبابه... امه كالت لخاله ابوهه ماقابل ينطيهه
بالبصره لان بعيده وكايلهم محجوزه لابن خالهه

فجر.. وهسه !!
لبابه.. امه دكول كناله سكت كال قسمه ونصيب
هو ماعنده علاقه بيهه مجرد ابنيه عاجبته
ومخليهه اباله ..

فجر.. خطيه!! اكلج خلي نخابر ماما ع عقيق
اكيد ماتنام ماما
لبابه.. لاخطيه تفز!!
فجر.. هسه راح تصير الصلاة ماتنام هي كالت
بلكي انتبهت ..

لبابه.. اخذت التليفون مال خاله وخابرت ع ماما
ردت بسرعه كاعده سالتهه شلونهه كالت
انتبهت ورجعت نامت كالو تحت المراقبه حته مايكدرون
يحركوهه يكولون اي جهد يتعبهه..

وظل هذا الحال عشر ايام ضبط ماما مااجت داخله
وياهه واحنه يم الشيخ ياسين وام اواب
موجوده كلساع تجينه وهي تنتبه وترجع يكولون
الطبيب مايخليهه تتحرك...

خابرتنه ماما كالت ارجعن للبيت راح نطلعهه
تحسنت شويه بس كون بدون جهد وكالت
انطيني رانيا احاجيهه..

اخذت التليفون لرانيا مدري شحجت وياهه
من سدته كالت خاله دكول انرتب الغرفه
حته السبع يظل يمهه واحنه نحول لغير
غرفه...

رجعنه الشيخ ياسين بسيارته وظل يمنه
لحدما اجه السبع ماما سانده عقيق
بس صايره شبح عبالك جانت بمجاعه..

مددناهه ع السرير ورانيا رتبت الغرفه
سحبت سريرين وطبگتهم سوه
وفرشت فرشه عليهن بس عقيق حته
ماانتبهت يمكن الالم البيهه مخلي كلشي فاهي
عدهه..

السبع طلع ويه ياسين وتغدينه وهو ماكو
ب٢ اجه ماما حجت وياه وطب للغرفه..

عقيق.. جنت مدده واكل بأضافيري
صايره عندي هاي الحاله موحلوه ماجنت
هيج بحيث طلع لحمهن..

فتح الباب وسده بسرعه لميت رجليه
وادنيت اخذ نفس عالي وهاي اول
مره من يوم النقذني مامتواجهين...

كعد ع الجربايه واني لامه رجليه
ومحاوطتهم باديه اثنينهم واباوع ع رجله
شلون تهتز..

حجه بهدوء وهو مايلتفت عليه
ماتريدين قربي؟؟

ماعرفت شجاوبه اريدك ومااريدك
اريد اهتمامك وخوفك عليه ومااريد
اتذكر الصار..

رفع نفسه ورجع اديه ليوره
ع الجربايه واستند عليهن
والتفت عليه وكال اشتاگيتلج؟!!

بس اباوعله ماارد ولا عندي كلمه اجاوب
بيهه بس عيوني امتلت دموع ودكات
كلبي تخربطت..

السبع.. ترى اكوم اطلع لاتبجين تخليني
اسولف لو ماتريدين تسمعيني؟!

عقيق.. طلعت مني كلمه ومومن عقلي
كلبي انطه ايعاز ونطقتهه كتله لاتروح
وتعوفني ..

عدل كعدته ورجع ظهره ع الجربايه بصفي
وطبطب ع رجله وهو مادهن كال تعالي
خلي راسج هنا واسولفلج..

هزيت راسي برفض مااريد رجع عاد
الطلب بهدوء وكال يله عقيقتي اريد
اسولفلج البداخلي محد يسمعني...

ماتحركت من مكاني مد ايده لزم ايدي
وسحبني دفعته حيل بس ماترك ايدي
خله راسي ع رجله وايده ع شعري
وسحب الغطه غطاني...

نمت بنص الجربايه مكرفصه نفسي
وحركات ايده وهي تمسح ع شعري
احس باصابيعه وهي اداعب فروه
راسي هدئت وغمضت عيوني...

السبع.. لاتتوقعين الصار اثر ع مشاعري
اتجاهج بالعكس زادت حرارة گلبي الج
مانگصت..

ابتعادي عنج ردة فعل خارج عن ارادتي
حملت نفسي المسوؤليه انتي انسانه بريئه
نظيفه ويتيمه وتعرضتي لهذا الشي
بسببي..

انتي عقيقتي الغاليه اضمج بگلبي
مااريد احد حته يكول اسمج اني وياج
خطوه بخطوه اريدج قويه وسباعيه
حته افتخر بيج..

اعرف هالشي صعب عليج وعليه اصعب
وروح ابوي ماباجي غير بس من انكتل ابوي
وهاي عليج نزلت دموعي ...

مرت بايام سوده صغير جنت ويعذبوني وماتوكع
دمعه من عندي بس انتي يانسمتي دنكت راسي
الج وبجيت ...

انفري من الكل بس مني لااا
اني سترج وغطاج ادري بعقلج شيكول
شلون شفتج بهاي الحاله!! انتي حلالي
لاتفكرين هيج صعبه عليه لان انذليتي
واني ماموجود...

تسمعيني عقيق؟!! رديت علي همممممم
سألني تحسين بشي؟! هزيت راسي لاااا

السبع...الطبيب كال عليج محاربه
وراح تتعالجين رجعنه لنقطة الصفر
من جديد بس اريدج وياي وتوعديني
تصيرين قويه...

شويه تحسني اكثر ونروح لبغداد حته شغلي
اعوفه هاي الفتره اظل يمج منا لمن تصيرين
زينه وتتحملين السفر حته انسافر تتعالجين...

عقيق.. رفعت راسي باوعت بعيونه
الشعور الجان عندي بده يتلاشه
جان عبالي مايريدني ونفسه تلعب من عندي
بس هسه هدئت وارتاحيت..

ابتسم بوجهي وكال نبدي من هسه
مستعده؟! سألته شنووو؟!
السبع.. اداوي جروحج واداوين جروحي
عقيق.. شلون؟!

كام للباب قفله واني صافنه علي ليش
قفلته اكو علاكه بالكاع سحبهه خلاهه ع الميز
وطلع منهه معقمات ومراهم ولاصق جروح
واجه يمي..

كال نتفق !!! عندي جروح بظهري
عقميهن الي حته يطيبن واني هم اعقملج
اثنينه متعادلين...

حجيت بخوف شبي ظهرك اني جنت مربعه
بنص الجربايه هو لابس تشيرت نيلي
سحبه من ركبته ونزعه درت وجهي بسرعه

كال چااا شلون تعقمين يله ادليج
وسوي كعد كدامي بس بالفانيله
الداخليه اكتافه عريضات اكو جروح
قديمه حيل باقي اثرهن واكو جدد مال
عركه متضارب...

ايدي ترجف الزم المعقم والقطن اريد
امسح ع كتفه مااكدر وهو كاعد مستقيم
ويكلي يله مو يوجعني..

ماجنت اعرف هذني قديمات وكذب مايوجعنه
بس راد يشاركني الالم ويبعد عني
الخجل...

كمت امسح بالتعقيم عليهن وهو ساكت
وخليتله دهن وكتله كملت بس اني متفاجئه
بنفسي اتجاوبت وياه وحته ايدي الضعيفه
احسهه قويه..

كل انسان عنده منو يقوي واني عندي السبع
مااعرف شلون اوصفه مجرد حديث هادىء
وموقف خلاني رغم المي وجرحي بس
متجاوبه وياه ومتقبلته...

لبس التشيرت كتله هسه ينمسح الدهن
ابتسم وكال لا هاهي اصلا احسه
راح الالم...

يمكن لو مستخدم وياي غير اسلوب جان
انهاريت اكثر بس بهذا اسلوبه حته دكات
كلبي انتظمت وتسمعه بكل وضوح

اجه عليه كال هسه دورج يله مددي
كتله شنووو؟! مابيه شي؟!
السبع.. الطبيب كال جروحج اذا ماتعالجت
خطره لاسامح الله يگصون الجزء المحروك

انتفضت بخوف كتله لا صح يوجعني بس
هن يطيبن وحدهن رد عليه غير هو كال
اهم شي تتعالج جروحهه لان قريبه ع گلبج
واني مصدكته..

كتله اني اعقمهن اعرف وايدي مابيهه
شي!! جاوبني وهو رافع حاجبه المطبور
ويفتح بالمعقم لا ياحلوه هو اتفاق اني اعقم
بيدي..

عقيق.. ماخليك
السبع.. موبكيفج حلوه هاي هم حلالي وهم
امنعيني !!

شوفي اني من اعقمهن اسبوع ويطيبن
واذا ماطابن وره الاسبوع اني معتب ...

عقيق.. ماخليك شنو قابل متزوجين
السبع.. بعد ع الزفه والقاط من اطيبين
انسويهن يله اختاري لو اعقمهن لو بعد
ماابات يمج ارجع للقصر وكلساع اتعارك ويه
جبار ...

عقيق... لاتسوي هيج السبع انت تدري بيه
استحي واني اعرف اعقمهن ليش اله انت

السبع.. لان ماريدج تخجلين مني وينكسر
هذا الحاجز البيناتنه يله ولج احسبيني
طبيب راح اغمض عيوني...

عقيق.. ماااا وهزيت اكتافي
السبع.. اروح فدوه ونذر للدلع شوتعالي
احسن مااصيح ساهره تلزمج...

لاتلزمني بس غمض عيونك
رد عليه غمضت يله مددت وتغطيت وطلعت
الحرك صاير مقدمه صدري بس شفته اختنكت

اكذب ع نفسي من اكول اعقم اصلا
حته من ابدل ادير وجهي وابجي مجرد
مااشوفهن ترجع عليه الحاله وانهار..

حجيت بغصه يله بس لاتباوع
فتح عيونه ويباوع بعيني شاف
الدموع كال چاااا شگلنه موندري
من تشوفيهن تتأذين خليني اعقمهن انتي غمضي
وفكري بشي حلو...

غمضت عيني ايده تخلت ع ايدي وبعدهه
ونزل تشيرتي اكثر واحس ع بروده
التعقيم وهو يكزبر جلدي ..

كمل جهه وانتقل للجهه الثانيه واني مغمضه
وضاغطه ع اسناني كمل وكال كملت
يله فتحي..

فتحت بس ماباوعتله جان يرجع بالغراض
اجه بصفي وكال عندج بعد حرگ بغير
مكان خليتلج تعقيم ودهن ع الميز مرتين
باليوم تخلين...

خجلت حيل يعني شايف كلشي
ومركز ظليت مدنكه العب بسحاب التشيرت
مالتي

رفع شعري من وجهي وباسني من كصتي
وكال انام شويه اني تعبان كتله وين تنام
هنااا!!!؟؟

السبع.. اااي هنا تريدين اروح يم جبار
يله خلي اروح
عقيق.. لااا ماتروح بس احنه مامتزوجين
السبع.. ياطلابه الزواج بويه احنه متزوجين
بس مالابسين قاط...

عقيق.. ببغداد موتنام بالصاله دكول مايصير
السبع.. وين كايل مايصير لاتتبلين عليه
بس اني اريدج تكبرين ...

عقيق.. وهسه كبرتي؟!
السبع.. غمز بعينه اي هسه تاكدت انتي
كبرتي ..

عقيق.. شلون
السبع.. بطريقتي الخاصه
عقيق.. مافهمت قصده بس ابتسمت شبح
ابتسامه بوجهه وكتله خاف عيب من خاله

السبع.. عقيق بطلي اسأله يله تعالي نامي
وخاله ماعليهه انتي مرتي مرتي بعد اعيدهه
واحنه متزوجين بس مالابسين قاط..

عقيق.. خليت ايدي ع حلكي وابتسمت
السبع.. اووويلي بويه فاضل تعال شوف
ابنك

عقيق.. مددت بصفه وهو ساكت حسيت علي
ممرتاح حسيته يضغط ع نفسه حته يبيين
ممهتم بس بالحقيقه هو المايكدر يتجاوز الصار

اني هادئه بفراشي وهو حاول يغفى
وماكدر كام من مكانه واخذ باكيت
الجكاير وطلع...

بلحظتهه عرفت كل اليسوي حته ارجع
طبيعي يدوس ع نفسه وع مشاعره
بسبيل ارجع قويه يشاقيني ويضحك بس
كله مومن كلبه...

ظليت شويه بمكاني حالتي احسن
ويمكن وجوده هو سبب تحسني
كمت لميت شعري وفتحت الباب
طلعت ...

لكيت البنات كاعدات وخاله فتحتلي ايدهه
حضنتني وباستني من شعري
وظلن يسولفن ويضحكن واني ساكته..

سمعنه صوت الباب اندفع حيل والسبع
طب بسرعه من شافنه كال راح يجي
يمكم اواب ضرغام متصوب بمداهمه
وهسه ناقلي للمستشفى!.....

.
.
.
يتبببببببع.... متابعه شيقه