رواية وضاقت الأرض بي الفصل الحادي عشر 11 - بقلم لبنى الموسوي

#وضاقت_الأرض_بي

للكاتبة #لبنى_الموسوي

انطيتها الطفلة وذبيت الحجاب على راسي
صاحت ريحان تفضل

بس حچتها
اندفرت الباب حيل بحيث نزيت من مكاني
وطب واحد صاح بية بكل صوته

- ياهي انتِ ومنهو المسلطچ علينننننة

باوعت علي بتردد
- اااااني

- اي ياهي گولي

ريحان.. خوية شمالك اعله البت

- اااانتِ لا تحشرين رويحتچ بشي ما يخصچ

باوع علية ورجع كرر سؤالة
- منهو المسلطچ علينة سمعيني حسسسچ

التمن النسوان على صوته العالي
بقيت بموقف ما اتمنى حتى العدوي موقف عبارة عن ذل وأهانة وانكسار

الحجية هيلة.. شمالك وليدي صگد تحچي
عيب ضيفتك هاي شلون تعلي صوتك اعليها وهي بنص دارك

- لا يمة مو ضيفة
ابوي ناوي يسويها منه وبينه واحنه لا نعرف اصلها ولا فصلها منين وشلون

- شنهو قصدك يحنظل

- خلني اعرف سالفة الحرمة اول تالي عودن اشرح قصدي

واگفة اسمع نقاشهم وعيوني تمطر
ما عندي شي احچي ولو يسأل ألف مرة ميلگة عندي جواب الأسئلتة

رجع يصيح علية من جديد
حسيت نفسي مثل الطفل اليتيم الديرزلة المدير گدام المعلمين والطلاب

صار عصبي بسبب صمتي
بدا صوته يرتفع وأمة تحاول تسكت بي اما الباقين صافنين باستغراب بلكي يفتهمون شنو ديصير هنا

فجأة انهز المكان بصوت الشيخ
الكل دار وجها بخوف لأن محد چان متوقع جيته بهيچ وقت بس ما ادري شنو الي جابة يمكن حظي الي نصفني لأول مرة بكل حياتي

الشيخ ضاري.. انت شلون تتجرا وتعلي حسك اعله البت

حنظل.. احاول اعرف منها الما عرفته منك يبوي

- الما عرفته مني مراح تعرفة من غيري إلا بموتي
تسسسسمع

- ليييش
عرفني ليييش حتى اسكت لا تعاملني مثل الجاهل

- مالك غرررررض
بهذي الدار الحچاية الأولى والاخيرة الي
مامش كلمة تصعد اعله كلمتي ولا حس ينرفع فوگ حسي

- محد يتجرا ويحچي غيرها
بس احنة ما عدنا صغار بوية وما يصح تعاملنة مثل الحريم المالها كلمة

- آنه لو اعاملكم مثل الحريم
ما چان وديت اعليك واعلى اخوتك الخاطر ابلغكم بقراري

- هاي حضرتك گلتها
وديت عليكم الخاطر ابلغكم مو اخذ شوركم يعني اكو فرق بين الاثنين

- حنظل لا تصير ازلمة براس ابوك
خل لسانك بحلگك خاطر لا تشوف مني شي ما يلوگ للشيب التارس هامتك

- وليش اسكت اعله الشر
جايب وحدة ما نعرفها من يا گاع طلعت وبكل سهولة تريد تزرعها بنص دارك

- حسسسسك لا تعلي علييييييية

حچاها ورجع للباب لزم بيها
الكل طفروا علي سندوا قبل لا يوگع
طبوا صهيب وحبيب بـ هلأثناء يركضون على صياح النسوان

صهيب.. شنهو الصار

ريحان.. خوية انده للدكتور ابوووي راح يموووت

الحجية هيلة.. گرت عينك يبچري وأول فرحتي
والله العظيم بسابع سما اذا طاح ابوك بلاية گومة بس رب العالمين يكضني عنك

حبيب.. عينوني حنظل صهيب خلنه نودي لحجرتة

اخذوا من يمي وطلعوا
رحت سديت الباب ورجعت گعدت بفراشي
صرت ابچي بحرگة وادعي يگوم بالسلامة وميصيرلة شي بسببي

ساعات مرت والبيت مخبوص
بقيت بمكاني ما اگدر اطلع اطمان علي وما عندي غير الدعاء الي ما وگع من لساني ولا دقيقة وحدة

شفت ريحان طبت للغرفة گمزت من مكاني
- ها بشري شلون صار

- لا تخافين حبيبة مرت سلامات

- اي الف الحمد لله والشكر

- شني سالفة حنظل وياچ

- اخوچ هذا ؟!!

- اي اخوي الچبير

- ساعديني ريحان
اريد اتصل بخالة ام هناء ضروري

- هساع وبهيچي وضعية ؟!!

- گتلچ ضروري

- چا امشي وياي

طلعنة سوة چانوا الولد گاعدين بالصالة
باوعت الحنظل خزرني گبل نزلت عيوني منة نظراته تأذي اكثر ما هي تخوف

اخذت ريحان الأرضي وسحبته مسافة عنهم
دگت الرقم شوية وسمعتها تحچي ويا هناء سلمت عليها وراها انطتني السماعة وراحت

- الو هناء

- هلا غسوقة شلونچ

- الحمد لله
اشتاقيتلكم كلش

- واحنه هماتين
شلونچ هناك مرتاحة ان شاء الله

- على الله
اگول خالة يمچ اريدها

- وهي تريدچ هاي وينها وياچ

ام هناء.. ها يمة غسوقة شلونچ

- خالة فدوة

ما احس إلا واحد مد ايدة وفصل الخط
درت وجهي لگيتة صهيب جر السماعة من اذني وطبگها بعصبية

- ليش سديت الخط

- شجاي تصخمين شمالچ تسودنتي
ناوية تحچين العمتي وتخلين ابوي بالوجه الاسود گدامها بعد ما اتنخت بي

- لازم اروح لأن

- اششش لا تكملين
هذا الدار ما تمشين منه إلا اذا الشيخ امر بهالشي

- ما شفت شصار قبل شوية

- كل احنه تنوعنه
ولا تفكرين لا آنه ولا اخوتي راضين بلي جاي يصير او متقبلين وجودچ المفاجئ بيناتنا

العقل ما يحملها
وحدة غريبة تقتحم حياتنا بلاية سبب وبلاية تبرير والمفروض من عدنه نتقبل وجودها واحنه ساكتين

الفرق هنانة بسيط كلش
احنه ما نگدر نوگف بوجه الشيخ ولا نتجرأ ونعارض قرارة لكت حنظل وكونه چبيرنة گدر يسويها

فـ يا بت الناس
هودي شوي وخلي السالفة تمر على خير ما ناگصين وجع راس ومشاكل ويا ابوي تالي عمرنا

حچاها ورفع ايدة رجع الخط
گبل دگت هناء جاوب هو ولأن صوت الأرضي چان عالي سمعت كلامة ويا هناء

صهيب.. الوو نعم

هناء.. الوو منو وياي

- صهيب

- هااا
آنه هناء بت عمتك نجمة

- اهلاً وسهلاً

- اهلاً بيك
وين غسق امي تريد تحاچيها

- اي هاي وينها جاري
منساع فصل الخط عبن الأرضي عطلان وآنه اجيت صلحته الها

- اي عرفت لأن نخابر عليكم ومانحصل

انطاني السماعة وهمس بصوت ناصي
- لا تنسين شني رطنت وياچ گبل شوي مفهوم

هزيت راسي واخذتها من ايدة
مجبورة اسمع كلامة لأن مستحيل ارجع للحلة بعد كل شي صار

بقيت احچي ويا خالة ام هناء وصهيب فوگ راسي
بالبداية شكت بوضعي وظلت تتوسل شبيچ ما بيچ بس بلأخير قطعت شكها باليقين لمن حلفتلها حتى تصدگني

نهيت الأتصال ورجعت الغرفة ريحان
مخنوگة والدنيا طالعة من عيني واني افكر ويا نفسي
شراح تشوفين بعد اكثر من كل هذا يا غسق

الليل كله ما گدرت انام ودموعي تارسة عيوني
ثاني يوم الضهر گاعدة ع السجادة اقرا قرأن كالعادة علمود ارتاح والتهي عن التفكير طبت علية ريحان

- گومي حبيبة ابوي يندهلچ

فتحت عيوني فرحانة
- شنو يعني صار احسن

- اي الحمد لله

صدقت وبست القرأن ع السريع
گمت وياها لگيته گاعد بالصالة ويا الحجية سلمت علي وتقربت بسته من راسة

- الحمد لله ع السلامة شيخنا

- الله يسلمچ بنيتي
تعاي لية اگعدي بجاري عندي حچايتين وياچ

گعدت قريب منه چان يگول
- الصار امس ما اريدنچ تذكري اليوم

- شيخنا ممكن...
قاصعني بسرعة وهو يگول خلني اكمل
- العفو تفضل اسمعك

- اريدنچ قوية بنيتي
اليحب يعيش بهالدنيا من كل وبد يحارب لأجل يحظه بعيشة حرة كريمة

اي الدنيا مو عادلة وآنه اعرفنها كلش زين
هواي علمتني والباگي من عمري مو اكثر من الي عشتة

من هيچ آنه حفظتها
وصار عگلي يختلف عن عگل اي واحد جاي تشوفي گدامچ بـ هالدار

مامش بشر يفهم عليچ گدي
وآنه الوحيد الأكدر أأمن الچ عيشة سوية بعيد عن الظلم الشفتي بحياتچ بس ساعديني

- شنو المطلوب مني ؟!!

- لا تجادليني بقرار اتخذة بحگچ
وأي شي تشوفي من اي بشر بـ هالدار تبلعي وانتِ ساكته من هالساع لحين ما يتقبلون وجودچ بيناتهم

والأهم من كل هذا
ما تسولفين سالفة تخص حياتچ المشت لأي مخلوگ ولو چان هالمخلوگ آنه بذات نفسي

- ان شاء الله

- عفية بنيتي السباعية
وهسه گومي ويا اخيتچ ريحان
ولا تخجلين من شي هذا دارچ گبل لا يكون دارها 

- رحم الله والديك شيخنا

استأذنت منهم ورجعت للغرفة
ما ادري على شنو ناوي ولا اعرف شلون راح ابقى بهذا البيت وبأي صفة بس مجبورة امشي ورى واني مغمضة لأن ما عندي غير حل

لليل متمددة بفراشي ومغمضة افكر بالمجهول
حسيت الباب انفتح عرفتها ريحان
بقيت على نومتي ما تحركت شوية وگالت غسق نايمة

- لا

- چا ما تگومين نسولف شوي

- شنحچي يعني

- سولفي عنچ
مثلاً ياهي انتِ وهلچ وين وشني الجابچ اعلينه

- ميعجبني احچي بـ هالموضوع

- وآنه احب اعرف

- الشيخ ميقبل احچي شلون ترديني اكسر كلمتة

- لا اذا هيچي بلاها احسن

باوعتلها ورجعت غمضت چان تگول
- گومي وياي نشم هوى مو احسن من هاي الحبسة

- وين

- امشي وانتِ تعرفين

گمت ذبيت حجابي على راسي وطلعت وياها
چان البيت هدوء لأن الكل نايمين فتحت ريحان الباب وطلعنة للحديقة

هي بالأسم حديقة بس بالواقع جنة
الخضار تارس المكان والهوى بيها يرد الروح
ركضت گعدت ع المرجوحة واشرتلي تضحك تعاي ليش واگفه يمچ

تمشيت واني اباوع داير مدايري
چان الماي مفتوح ع الزرع بس شي بسيط
شلت الصوندة حطيتها بـ ايدي صار الماي ينزل من بين اصابيعي

صفنت ويا روحي
الزرع بدون هذا الماي يموت
زين الانسان بدون اهل يگدر يعيش لو هم يموت مثل هالزرع بالضبط

صحاني صوت ريحان
- غسق شمالچ عليش ضاربة دالغة

ذبيت الصوندة من ايدي وگمت
- لا هيچ بس عجبني منظر الزرع كلش

- رجعي الماي للساجية

- شنو يعني ما فهمت ؟!!

- هذا المجرى الي بنص الزرع جاي تشوفي

- اي

- اتركي الماي يجري بي حتى يتوزع اعليهن بالتساوي

- هاا فهمتچ

خليت الصوندة بالمجرى ورحت گعدت يمها
بقينة صافنين ع السما وهي تحرك المرجوحة ببطئ بحيث من الهدوء الچان عام ع المكان اجيت اغفى إلا شوية لو ما صوتها صحاني

- غسق

- نعم

- هم تشتاگين لأمچ

انعصر گلبي من سؤالها
غمضت بحسرة ودموعي بللت خدي طبعاً اشتاق الها

- چا شلون حاملة فراگها

- غصباً عني

- والله مامش شي بالدنيا يجبرني اعوفن امي وامشي

- امي ميتة ريحان

بس حچيتها باوعتلي بصدمة
درت وجهي عنها ورجعت اباوع للسما چان تگول
اسفة مااعرف بيها ميتة الله يرحمها

- ويرحم امواتچ

- ودراستچ چا شلون

- راحت بعد

- مااعرف شني المفروض ينحچه بهيچي موقف
عبن مااعرف السبب الدفعچ تتركين دراستچ واهلچ وتجين لدار الغرب

بس الله وابوي يحلون الچ المشكلة ان شاء الله لو شما چانت 

- ان شاء الله
وانتِ تدرسين لا

- اي
آنه سادس وهساع جاي اراجع للأمتحانات

- اي صح شفتچ تقرين البارحة
بس ما توقعتچ هالگد صغيرة ولو انتِ ناعمة

- هههههه
آنه الود ودي ما اكبر اصلاً بعد ما تنوعت اعله الدنيا ومصايبها

دنحچي سمعنا احد يگح ورانة
درت وجهي شفتها وحدة من البنات بس لحد الأن ما تعرفت عليهم زين

ثناء.. گحيت علمود لا تخترعون مني

صفنت عليها شو هاي متحچي مثلهم
گعدت يمنه بعد ما سوتلها ريحان مجال شوية وگالت چنت ضايجة وطلعت اشتم هوى ما ادري بيكم هنا

ريحان.. هلا بيچ حبيبة

غسق.. منو هاي ريحان عرفيني عليها

ثناء.. اني زوجة حنظل اخوها الچبير

باوعتلها مصدومة
- بس انتِ حيل صغيرة عبالي بت اخوها مو مرتة

ريحان.. اي هي بعمر بنتة

غسق.. عززززززة

ثناء.. هههههه
شبيچ ليش انصدمتي

غسق.. لا بشرفچ
ولو هسه ريحان تزعل علية بس شلون قبلتي بي وهو بگد ابوچ

ثناء.. لا مو بگد ابوية
ترى ابوية شايب كل الموضوع الفرق بيناتنا 24 سنة

غسق.. اي هواي
شنو الجابرچ تاخذين واحد اكبر منچ هالگد وفوگاها متزوج وجهالة بطولچ

ريحان.. امي وامها خية
طبخنها سوة ودبسوهم واحد بلاخر

غسق.. ليش هم اقارب

ريحان.. اي ثناء بنيت خالتي

غسق.. لعد شو متحچي مثلكم

ريحان.. خالتي متزوجة ببغداد
يعني هالتشوفيها گدامچ بغدادية موش بصراوية هههه

غسق.. ها مو اگول
اي وحدة منچن تكمل شلون صارت القسمة

ريحان.. تنوعي حبيبة
الموضوع كلة عناد بعناد بس يظل كل شي بالقسمة

غسق.. شلون فهميني

ريحان.. اخوي حنظل متزوج بنيت عمي
يمكن ما تعرفينها چبيرة كلش حتى اكبر منه بسنتين

غسق.. لحظة وحدة وحدة
ثناء شگد عمرچ انتِ وحنظل شگد عمرة

ثناء.. اني 24 سنة وهو 48

غسق.. معناها مرتة الاولى عمرها 50 سنة هسه

ريحان.. عليچ نوررر

غسق.. اي وشصار بعدين

ريحان.. هاي الله ما يگحمها
وحدة عرمة وصاحبة مشاكل راوت امي واخوي النجوم بعز الضهر

امي جزعت منها
رادت تخلي ابوي يعزل الهم ما رضا حنظل

اخوي كلش حباب
لا تشوفي تعارك وياچ امس لكت والله مامش بشر بطيبتة وحنيتة بالدنيا خصوصاً اعله اهل دارة

غسق.. زين ليش ما قبل

ريحان.. ما هان علي يترك امي وابوي وهو چبيرهم
وبذات الوكت چانت نجيبة يعني مرتة اقصد صغيرة ولاهية بطلايب اهلها وما تحتام (تهتم) حتى الفروخها

من هيچي ما آمن يتركهم بـ ايدينها
اقلها هنانة كلنة موجودين وعينة عليهم يصير ميصير والصراحة آنه اشوفن الحگ ويا

غسق.. وبعدين شصار

ريحان.. الدنيا تتغير ونجيبة ما تتغير
ظلت اعله نفس عيوبها وكل شي ما فاد وياها
حار اخوي شني يسوي حتى يروضها لكت بلاية رجى عبن الاعوج يظل طول عمره اعوج

هي هم من شافتة ساكت تخبلت فرد نوب
هو مو ضعف منة سكت الها لكت ما يريد يجيب المشاكل الأبوي ويا عمي تالي عمرهم

لا اگلچ ولا تگليلي
طگت حوصلة امي منها ومن وضع اخوي
مشت البيت خالتي ببغداد يومين وردت گالتلة اريد ازوجنك

غسق.. ثناء

- اي ثناء

- وشسوة هو

- چا غير طار 
عبن اجته من الله حتى يكسر نجيبة 

- وهي شسوت

- اول ما رضت
وظلت تتوسل بي راح اتغير وبس تنوع
تالي من شافت ما بي رجى يرجع عن قرارة سكتت وردت العواجها

غسق.. وانتِ ثناء شلون وافقتي

ثناء.. امي جبرتني
لحد ليلة العرس اني دموعي على خدي واتوسل بيها حتى تفركش هالزواج بس اني قسمتة وهو قسمتي والقسمة ما منها مهرب

- يا سودة علية
وتالي شلون گدرتي تعيشين ويا انسان متحب

ريحان.. ياهي هاي الما تحبة ههههه

ثناء.. يا ما احبة
غير اموت ع التراب اليمشي علية هسه

فتحت عيوني عليها ولا ارادياً صحت يااااا
چان تضحك وتباوع الريحان

ثناء.. شبيچ حبيتة بعدين

غسق.. شوكت يعني بعدين

ثناء.. من ليلة العرس تقريباً

غسق.. هههههه
هذا غير حب سريع الاشتعال

ثناء.. اي مو ما چنت اعرفة
بس هو بطيبتة وحنيتة گدر يحتويني ويجبرني احبه من اول يوم اعاشرة بي
حسسني  وكأنو طفلة ولگت حضن ابوها

ريحان.. مو گتلچ اخواني مامش بشر بالدنيا يوازيهم

غسق.. وهم تغارين من مرته

ثناء.. اموت مو بس اغار
مع ذالك اضم غيرتي بگلبي حتى لا اضوجه وياية خصوصاً اني اعرف شنو هي وشنو اني بالنسبة اله

- صار عدكم اطفال

- اي اني ولد وبنية
وهذيچ بچرها بنية بگد ريحان واربع ولد

- ما شاء الله
هاي مشاكل وهالگد مخلف لو متصافين شچان سوة

- ههههه
ولچ شبيچ مو عرب يتباهون بالخلفة الزايدة خصوصاً خلفة الولد

- يمعودة والولد شيجيبون لأهلهم غير المصايب اسأليني اني

- اي صح
هسه حنظل يومية معرس عليه لأن يريد اطفال بس اني مستحيل اسوي هم اثنين ومخبليني هالدور ازيدهم

- بربچ ريحان
ابوچ شگال النفسة من سما اخوچ حنظل 

ريحان.. ههههه
خايبة شمالچ غير الوادم من شبابة يصيحون الة ضاري ابو حنظل عاد هو ما قصر اول ما خلف ولد سما حنظل

ثناء.. ولچ لتعيبين على اسم رجلي

يجوز انتِ ضجتي منه
لان صار خلاف بيناتكم البارحة بس والله حنظل مو مثل متتصوري والأيام تثبتلچ اذا بقيتي هنا

- لا يمعودة ليش اضوج منه ترى حقة بكل شي يسوي

- صدگ انتِ شنو سالفتچ

- يبووووو
خلي اگوم انام اشرفلي

- ههههه
هاي شبيها ريحان

ريحان.. خية عوفچ من سالفتها ابوي ما يرضى تحچي عنها لاحد

- ها ما ادري والله

غسق.. يلا متنامون تأخر الوقت

ريحان.. اي امشينة نعست آنه

هستونه دنگوم نزينة على صوت قريب الباب
رفعت راسي شفت حنظل صاح المرتة شجاي تسوين هنانة

عافتنة وراحت تحچي ويا
تقربت من ريحان وهمست بصوت ناصي

- خاف يضوج لأن شافها گاعدة وياية

- لا خايبة شني السالفة

باوعت عليهم ديتناقشون بس شكلة عصبي
شوية وراحت ويا
طبينة اني وريحان چان صوته واضح ديتعارك وياها

فتت للغرفة وسديت الباب
مچان لازم اطلع ولا احچي ويا احد منهم
حقهم ميأمنون ليش منو اني حتى ادخل بيناتهم واعرف عن حياتهم كل شي

بسرعة تمددت بفراشي
اجت ريحان حچت وياية مجاوبتها
بقيت اتگلب فوگ الساعتين يلا گدرت انام

ثاني يوم
دز علية الشيخ حتى اگعد وياهم
انتبهت علي يحاول يخليني اختلط بيهم شگد ميگدر

ورغم هو يعرف الكل ما راغبين الوجودي
بعد ما عرفوني دخيلة مو بت عمتهم مثل ما اعتقدوا اول مشافوني بس مع ذالك يحاول يخليهم يتعودون على وجودي او بلأصح ينجبرون علي

گعدت بالزاويا وريحان تقرا يمي
كل شوية يجي واحد يزور الشيخ بحساب چان مريض ويگوم للمضيف يستقبل الخطار شوية ويرجع يمنه

للمغرب دخل واحد منهم
لحد الان ما اگدر اميز ان چان صخر او صهيب إلا بعد ما اخذلي صفنة قريب الدقيقة على شكلهم

باوعت اكو شخص غريب ويا اول مرة اشوفة
سلم ع الموجودين وگعد بيناتهم الضاهر اخوهم او واحد من الاقارب لأن ما طب من باب المضيف مثل باقي الخطار

الشيخ ضاري.. اي يجمار شني صار بموضوعنا

جمار.. كل شي جاهز مثل ما طلبت بالضبط شيخنا

صخر.. يابة انت تعرف بحجي حميد شسوة

الشيخ ضاري.. اي اعرف ليظل فكرك ويا

صخر.. چا يابة شناطر ما تگلي

حنظل.. جاي يسوي اعله نار هادية بس انطر شوي

صهيب.. هذا عينة گوية ماينعرف زينة من شينة ويومية اله راي شكل تتصورون هيچي امور تنفع ويا واحد مثل حميد

حنظل.. تنفع صهيب تنفع

الحجية هيلة.. من كون طرگاعة توگع على راسك يحميد ونفتك منك ومن شرك

حبيب.. هاي هي انتهت
ماطول الحجية هيلة دعت علي معناتها طاح حظة

الشيخ ضاري.. هههههه
هو انت خوفك من امك ودعواتها مجربها بالمچان

الحجية هيلة.. هسه يظنوني داعية اعليك فرد مرة

رؤى.. حبوبة هو انتِ لون داعية علي چان ما تلگي گاعد بيناتنا

بقوا يتشاقون بيناتهم
رغم اعدادهم وكبر عائلتهم بس لمست بيهم حب مچنت المسه لمن اگعد بنص اهلي

مر يوم بعد يوم والوضع مثل ما هو
بديت اتعرف عليهم اكثر وصرت اميز اشكالهم واسمائهم

صح اكو شغلات مجهولة وغيرها مخفية
بس هالشي طبيعي لأن ابقى غريبة عليهم ومستحيل اعرف عنهم كل شي بين ليلة ويوم

چانت خالة ام هناء تتصل بية بأستمرار
وكلما اسألها لشوكت ابقى هنا وشنو الحل الراح يقدمة الي الشيخ تجاوبني اصبري الصبر حلو يمة

جزعت واني احاول الگة حل النفسي
ومستغربة سكوت الشيخ كل هالمدة رغم هو وعدني ايام ويحل الموضوع وهاي اني صارلي اكثر من اسبوع يمهم وماكو شي تغير ولا اكو امل بالتغيير

گاعدة العصر يم الشيخ دگ جهازة
انطاني گلاص الچاي وطلعة من جيبة بس باوع للشاشة گام من مكانة

الشيخ ضاري.. ها يالضبع اخوك الميزان شني قضيتة
چا گوم اسبقني اعله المضيف جاي خلافك آنه

دار وجها علية بعدت نظري عنه ع السريع
گال آنه رايح لون يسأل احد اعليه يلگاني بالمضيف
وخلة وطلع

بس راح اني هم گمت من مكاني
ما اگدر اگعد بنصهم وهو مموجود اصلاً گعدتي هنا كلها الخاطرة

رحت للمطبخ الكل چانوا ديشتغلون
ردت اساعدهم حتى الهي روحي بس ما قبلت ريحان

اخذتني وطلعنة للحديقة
الدنيا مغرب والهوى هستوة دتصير بي نسمة حلوة

جابت ريحان حب
گعدنه بالمرجوحة والجهال ديلعبون گدامنة صارت عيني على بت اخوها الما عرفت سالفتها شنو للأن

- ريحان

- ها حبيبة

- شنو اسمها بت اخوچ هاي

- ياهي منهن

- هاي المتعلقة بيچ

- ها قصدچ ود

- الله اسمها حلو كلش

باوعتلي وابتسمت
ظلت عيوني ع البنية ما اعرف ليش من دون الاطفال كاسرة خاطري

يمكن لأن احسها تشبهني
بلا اهل ومجبورة تبقى تحت رحمة هذا وهذاك في سبيل تعيش

بعدني صافنة عليها سمعت احد صاح من بعيد
لتندعم اثووووول
درت وجهي اني وريحان نفسة الرجال الاجاهم هذاك اليوم بس نسيت اسمة

- منو هذا

- ابن عمي جمار

- شبي يصيح لعد

- شو ياهو من الفروخ نزل النص الشارع

جمار.. ريحان صدگ تحچين

- خير شمالك
اظن من الاوصل تسلم بلاول

- شعندچ گاعدة هنا اذا ما تخلين عينچ ع الجهال

- والله ما خلفتهم ونسيتهم آنه
عدهم امهات وهن اولى من يمي يديرن بالهن اعله فروخهن

- شبيچ انتِ
شو صايرة مدري شلونچ

- انت الي شمالك
بس تشوفني تعاركني كاتله احد من هلك ومااعرف بروحي

- هذا كله بس لأن گتلچ ديري بالچ على جهال اخوتچ
مو امير اجه ينمرد جوة سيارتي لو ما ستر الله

- آنه گاعدة بالحديقة
شلون ادير بالي عليهم وهم برة بالعگد

- كافي بس دوختيني
هاچ الزمي هذا الظرف سلمي لأخوچ صخر
بداخله الحساب مال حجي حميد گوليلة جمار مرلك للمضيف ما لگاك واتصل عليك مغلق

- صار
امر ثاني استاذ جمار

- لا بس ديري بالچ ع الجهال وبطلي حجج

حچاها وراح
گامت ريحان دفرت طرف المرجوحة برجلها وعاطت
ابتسمت على شكلها وهي عصبية

- هههههه
شبيچ هيچ تحچين ويا

- اكرها اموتن من شوفة خلقتة
كلما صد لية حسسني ثولة وگاعدة كبالة ليش مااعرف

- بس هو ما گال شي غير خايف ع الجهال

- لچ خايبة ما تعرفي
هذا فرد واحد شايف روحة عبن چان عايش بالخارج

- هههه
لا انتِ تتحسسين زايد ما شفت بي هالشي

- شو اسكتي انتِ الاخرة

عافتني وطبت بعصبية
بقيت اضحك عليها يعني الولد ما صدر منه شي بس مع ذالك ضاجت بسبب جيته الهم

لليل گاعدة بالغرفة اندگت الباب
صحت تفضل چان يطب الشيخ گبل گمت من مكاني

- العفو شيخنا ما ادري هذا انت

- گربي صوبي بنيتي

تقربت منه وعيوني بالگاع
حسيت علي سد الباب وباوعلي رفعت راسي چان يبتسم ويگول

- اجه الوكت خاطر يعقد اعليچ....

يتبع

لتنسوووون ⭐⭐⭐⭐⭐⭐