رواية وضاقت الأرض بي الفصل العاشر 10 - بقلم لبنى الموسوي

#وضاقت_الأرض_بي

للكاتبة #لبنى_الموسوي

طب الولد سمعت صوتة
گال شيخنا حرمة بالباب تنشد عليك
رد علي
- ما گالت ياهي وشنهي نشدتها

دفعت الباب وطبت
- بت مريدي يشيخ ضاري

هو وهيبتة
وگعدتة بشموخ وسط المضيف
ما گدر إلا ما يطفر من مكانة اول مشافها گبالة

- نجمة هاي انتِ

- اي آنه بشحمي ولحمي
اجيت من الحلة للبصرة گاصدتك وادريك ماترد صاحب حاجة

- افا عليچ
انتِ بس أمري والتردي يجرالچ من گبل لا يرد الحچي الزردومچ

- بيها مجال نتحچة الوحدنة

- حتى الحريم يطلعون يعني

- اي بس موش الحوشك يضاري

- عليوي وليدي تعالي

- امرك شيخنا

- انده اعله حبيب
بلغة والدك يريدك بأمر مستعجل

- صار

طلع الولد يركض
اشر الخالة تگعد وگعد مقابيلها
بقيت واگفة عيني علي ما ادري ليش حسيت بي شي مميز يشبة الحسيته بخالة ام هناء بأول يوم شفتها بي

رفع راسة باوع علينة
- منو البنيات ذني

- هاي هنيوة بنيتي
وهاي غسوقة هماتين حسبت بنيتي واچثر والأمر الگاصدتك بي يعنيها

- شلونچن بنياتي

هناء..  الحمد لله شيخنا بخير اذا انت بخير

- وانتِ يابة

- الحمد لله برحمة الله

- يستاهل الحمد

اندگت الباب بهلأثناء
دخل ولد شاب اسمراني وطويل كلش بي شبه من الشيخ عرفتة ابنة

حبيب..  امرك يابة

- دش سلم على عمتك نجمة

تقرب سلم وباسها من راسها
بعد عنها وعيونة ع الشيخ چان تباوعلة خالة ام هناء وتبتسم

- والله وصرت زلمة يحبيب
انتَ ما تعرفني بس انة اعرفك عدل

- لا عمة شلون ما اعرفچ
صحيح ما تشاوفنا من مدة بس اول ما صديت صوبچ عرفتچ عبن ما ناسي وجهچ النوراني

- ههههه
دهر صابك حبيب بلوة مثل ابوك ما ينگدرلك

الشيخ ضاري.. هههههههه
خلف الله عليچ يبت مريدي مقبولة منچ

- اتغشمر وياك
يلة مشيهن ويا وليدك ما ظل صبر لازم احچي العندي

- وليدي اسمعني عدل
هذني بنيات عمتك نجمة تاخذهن وتمشي غاد للبستان ما ترد بيهن إلا ما انده عليكم آنه

- ليش مو لدارنا يبوي

- لا للبستان
ولا تخلي احد يصد عليهن تراهن امانتك يالنشمي

- لا توصي حريص شيخي

اشر النة وطلع قبلنة
باوعت الخالة ابتسمت بوجهي وهزت راسها بمعنى روحي اخذت هناء وطلعنة ورى

هناء.. غطي وجهچ كلها زلم هنا

- وشلون اشوف امشي

- ارفعي من الطرف وانتِ تشوفين ميرادلها روحة للقاضي

دار الولد علينة
- امشن خوية شمتانيات

هناء.. اي جايين

مشينة مسافة طويلة وراها دخلنة البستان چبير
شفت هناء كشفت وجها سويت مثلها وبقيت اباوع دايري مدايري مو بستان جنة من الجمال البي

هناء.. حييييل شلون متغير هالبستان

حبيب.. ليش انتِ جاية لهنا من گبل

- اي بس چنت جاهل صف رابع ابتدائي

- چا اكيد يتغير عگب هالسنين

- اي صحيح
خلنة نفتر شوية هنا والله مشتاگة التراب البصرة

- يتدللن بنات عمتي
يلة امشن افرنچن بي شبر شبر

ظلينة نفتر بالبستان
چان چبير كلش بس على گد مچان حلو ولا حسيت بشي لا بالتعب ولا بالوقت ولا حتى بالملل

صافنين على اشجار البرتقال
وحبيب يشرح الهناء شلون يزرعوها وشوكت
منسمع إلا صوت خشن صاح

- شگاعد تصخمون هنا ؟!!
نزيت من مكاني من الهبطة الأكلتها والكل نز وياية

حبيب.. هاي انتَ صهيب شبلاك فززتنا

صهيب.. ياهو ذني الوياك

- بنيات عمتي نجمة اكيد تعرفها

- وشيصخمن جارك 

هناء.. هوب هوب شني هلأسلوب هذا

- هوب بعينچ لچ
من تتحچين ويا الزلم تحترمين نفسچ مااايعة

رادت تجاوبة لزمت ايدها حيل
- هناء كافي مو وكت مشاكلكم هسه

- متشوفي شلون يحچي

- عوفي هذا الولد يجاوبة
ليش تكرهين روحچ وانتِ خطار يمهم

باوعتلي وسكتت
ظل حبيب يحچي ويا واحنه واگفين مسافة عنهم اخير شي سألت هناء

غسق.. اگول هو الشيخ شيصير من امچ

- ابن عمها

- ياااا
والله عبالي اخوها

- لا مو خوان بس حسبت الخوان

- زين هذا عرفتة ابنة
الثاني منو ؟؟

- ياهو؟!!
تقصدين هذا المجعوص

- اششش ولچ ليسمعچ

- ويسمع قابل ارجف منة

- كافي هنااء
گولي يلا منو هذا

- يمكن ولدة الثاني
بس غدي ولا يشبه ابو واخو شايف روحة

- ههههه
وتالي وياچ اليوم

التفت علينة شافنة نضحك
صاح بخزرة خير ضحكنة وياچن
ردت هناء لا سوالف بنات مو يمك السالفة

- حبيب انة رايح لأبوي
ظل جارهن منا لما ارجعلك ولتتحركون من مچانكم

- تامر خوية

بقت هناء تباوع ورى
بس راح التفتت على حبيب وگالت
- شبي هذا مسودن

- لتحچين على اخوي ما ارضى

- ما شفتة شسوة

- خايف عليچن غير
غيرتة ما تسمح يشوف حريمة بنص الزلم ويسكت

- اي بس ماكو احد هنا

- لا اكو
الفلح تارسين البستان لكت انتِ لاهية عنهم ما شفتي حاجة

- وهسه شراح نسوي

- ننطر هنا مثل ما گال
باوع للشجرة وضحك هساع صار واجب اضيفكم

اباوع علي صار يتسلق الاشجار بكل سهولة
جمع الفواكه وصاح على واحد من العمال گلة اغسلهن وجيب صحن وياك

شوية ورجع بـ ايدة الفواكه
فرش بالگاع وصاح اتفضلن ولو المجلس مو گد مقامچن يبنيات عمتي

هناء.. ههههه
شوفي الذوق مو اخو بس يزمخ بينة

حبيب.. شمالچ انتِ
لويش ماتشبهين اختچ تنوعي عليها من اجت لساع حسها ما نسمع

- هههههه
هي اختي فقيرة بس آنه هم فقيرة ترى

- الأمام علي سلام الله علي شني يگول

- شني يگول ؟!!

- لو كان الفقر رجلاً لقتلته

- هههههه
يعني لو آنه زلمة چان كتلتني

- مو بس كتلتچ
چان طريتچ بالگاع من هاللسان الشايلتة كفيلچ محمد

- ههههه
چا من هيچ خن نحچي جد شوية

- اسمعنچ

- سؤال
لويش حچيك ميشبه حچي امي وابوك وانت انولدت وعشت بالبصرة 

- مامش شي يبقى اعلة حالة
بعدين اهل امس مو مثل اهل اليوم وضيفي عليهن آنه ادرس طب ببغداد

- احلف بالله

- لويش موش بعينچ

- لا العفو بس اتفاجأت
يعني ما توقعتك طالب كلية مو النوب طب

- وهاي وينچ عرفتي

- يا مرحلة

- كلها سنة واتخرج ان شاء الله

- بالتوفيق

- شكراً
وانتن طالبات لالة

- آنة خريجة تربية
وغسق مرحلة ثانية قانون

- ملعبنة القانون

- شلون يعني

- خلها تسأل هي موش انتِ

هناء.. احچي غسق
لويش ساكتة سمعينة حسچ

غسق.. هاي اني اسمعكم

حبيب.. ههههه
تدرين كل ضني خرسة لأن مالچ حس

غسق.. ههههه
لا بس ما عندي شي اگولة

- وتضحكين همينة
بيها الخير ان شاء الله

هناء.. ما گلت شني قصدك
تراني الفضول ياكل ويشرب وياي

- مو
بعدة يحچي صاح اخو من بعيد بصوت عالي

صهيب.. حبيييييب
جيب البنيات وامشينة ابوي دز خبر ينده عليكم

حبيب.. اي جاين

هناء.. لوين نروح

- نرد للمضيف غير

- واخوك ويانة

- عوفي اخوي بحالة واليرحم والديچ

- اااي
هسه آنه شگلت قابل

- صيري مثل اخيتچ خرسة وكرمينا بخفى حسچ

باوعتلي وضحكت
- سمعتي صار ينضرب بيچ المثل من اول يوم

صهيب.. فضوووووني

غسق.. امشي ولچ
واترجاچ لتتلاسنين ويا مناقصنة مشاكل حتى هنا

- الخاطرچ بس

- شكراً

شلنة الغراض ورجعنا للمضيف
صار حبيب يمشي ويا اخو واحنة وراهم وكل شوية يلتفت صهيب يباوع علينة ويرجع الطريقة

وصلنة للمضيف چان الولد واگف بالباب
بس شافنة گال هاي البت تطب وانتم انطروا شوي
باوعتلهم صافنين بوجهي مستغربين الموضوع مثلي بالضبط

عفتهم ودخلت
چان الشيخ گاعد ويا خالة ام هناء بس شافني گام بسرعة اخذ وجهي بـ ايدة وباسني من راسي

- من هالساع انتِ بحمايتي
بحماية الشيخ ضاري وابن امة وابو اليگرب صوبچ او يمس منچ شعرة وحدة

- رحم الله والديك شيخنا

ام هناء.. بنيتي غسوقة
الشيخ ضاري وعدني وعد حر ثلثة ايام ويحلچ السالفة

جاعدين وياچ بالبصرة آنه وهنيوة
هساع اخذچ وامشي لخواني وما اردن لحوشي اذا ما آمن عليچ هنانة

الشيخ ضاري.. شني منچ هاي
والخلگ هالكون بسبعة ايام ما تطلعين گاعي إلا وانتِ گاصدة دارچ بالحلة

- لا شيخنا
رحم الله والديك ومتگصر
لكت آنة من زمن ما شايفة ولد ابوي وواجب اتفگدهم هم وعيالهم

- هم والعيال وعيال العيال يجون اليمچ صگد چذب

- لا تكض بية خلني امشي يضاري

- افا عليچ تكسرين چلمتي تالي عمر

- لا وآنة اگدر 

- چا من كونچ قرتتي
وگبل لا تتراجعين عن چلمتچ خلني نمشي

صاح بصوت
عليوووي
طب يركض امر شيخي

- صهيب وحبيب وين

- ليغاد ينطرونكم

- يله امشينا

طلعنا ويا الشيخ
چانت هناء واگفة يم حبيب وطهيب متكتر بالزاويا بس شاف ابو طفر من مكانة

- ها بوية شني

- اخذ عمتك وبنياتها للحوش
امشي اشوفن الضبع واردن ما اطول ساعة زمن

ام هناء.. شصايبة خير

- متخستك من ايام
لكت هساع تعافى شوي لا يظل فكرچ يمة

- وصل سلامي الحار الة ولأهل حوشة 

- ان شاء الله

صهيب.. يله عمة امشينة

- صار يبعد عمتك

اخذونة الولد ورحنة ما اعرف وين
عافنة صهيب يم حبيب شوية ورجع راكب سيارة فتح الباب وصاح اصعدوا

ركبنا السيارة ومشينا مسافة خمس دقايق تقريباً
وراها طبينا المكان كلة اشجار وبين مسافة ومسافة اكو بيوت صغيرة اخير شي بيت كلش چبير اشبه بالقلعة

اشر النة انزلوا
نزلت اباوع دايري مدايري بكل حياتي مشايفة هيچ شي غير بس بالمسلسلات

دا امشي واباوع للمكان
ما احس إلا انضربت حيل
درت وجهي متفاجأة لگيت روحي بنص حضن صهيب

باوعلي وگال
- الله شمالچ ركزي بممشاچ شوي

ام هناء.. اعذرها وليدي
اخذها المچان هاي اول مرة تشوف هيچي سوالف

- لا عمة شني السالفة
يله تفضلوا للداخل ويا حبيبب جاي خلافكم

- زاد فضلك

چان الموقف غريب كلش
عمري ما حسيت مثل هيچ احساس
صرت اكره شكو رجال بالدنيا وبمجرد طخيت بي حسيت نفسي اريد اتقيأ لا ارادياً بس بالگوة لزمت روحي گدامهم

دخلنا للبيت عبارة عن نسوان واطفال
بس لفت انتباهي وجود مرة چبيرة بالعمر بنص الصالة مرجية ظهرها ع الكرسي وگاعدة مثل النسر تنطي اوامر للموجودين شيلوا حطوا سووا لتسوون

چانت ملتهية عنة
شوية وميلت راسها اتجاهنا بس شافت خالة گدامها گامت من مكانها متفاجأة

الحجية هيلة.. هاي انتِ نجمة

ام هناء.. اي آنه بشحمي ولحمي
شلونچ يهيلة

- حي الله من زارنا
تفضلي تفضلي ليش واگفة بمچانچ

- يزيد فضلچ ويعلي مگدارچ

طببتنة جوة مكان مثل المضيف
گعدنة وبدت خالة تسولف ويا هاي المرة واني وهناء وحدة صافنة بوجه الثانية

ملينة كلش
جابن السوالف من عهد العثمانين لحد سقوط النظام بحيث احس راسي هاج علية

باوعت الهناء واشرتلها
اجت گعدت يمي شاورتها بصوت ناصي

- راح تطول هالسوالف بعد

- ههههه
بنات عم والهن عمر ما متشاوفات وعندچ الحساب

- يعني هاي اخت الشيخ

- لا حرمتة بس هم تصير بت عمة

دنسولف دخلت طفلة صغيرة
دمعتها بعينها والمصاص مدمر حتى ملابسها مو بس وجها حضنت المرة وصارت تبچي

الحجية هيلة.. شبيچ حبوبة ياهو كدر خاطرچ

حچت بتكسير
ميم بادت مساستي ودبتني ( مريم باگت مصاصتي وضربتني)

- اليوم اشعل شيب ابو مريم
ولچ رحيااااااااان

ريحان.. نعم يمة

- ما تشوفين بت اخوچ
ليش فروخ عمها يكدرون خاطرها ومحد مهتم

- جاي اشتغل يمة
بعدين هي چانت تلعب حوالية فجأة عافتني ومشت ويا مريم

- چا تعاي جاري
سلمي على عمتچ نجمة واخذي بت اخوچ غسل وجها وبدلي خلگاتها

باوعت للبنية تقربت على خالة ام هناء
بوستها وباست راسها چان تضحك وتگول هاي من يمتى فرع غصن ريحانتة

الحجية هيلة.. چا غير انتِ مشيتي وما تنوعتي بظهرچ ولا گلتي عندي اهل اشوف شنهي بيهم ما بيهم

- تعرفين السبب يهيلة

- گومي حبوبة
امشي ويا عمتچ تغسل وجهچ

اخذت الطفلة ودارت وجها
رادت تطلع رجعت باوعت علينة وتقربت منة بابتسامة

- تعالن وياي ليش جالسات وحيدچن

ام هناء.. گومن يمة
امشن وي بت عمچن هي موش غريبة

بالبداية مردت اگوم لان ضايجة على مستغربة
بس هناء جبرتني لمن جرتني من ايدي وگومتني غصباً عني

طلعنة برة نفس الهوسة
التمن النسوان علينة ويا هي تسألني منو انتِ تجاوبهم هناء اختي وتضيع الموضوع

للعصر واني ممفتهمة شي منهم
ما شاء الله چانو هواي كلش والضاهر هذا بيت العائلة وكل الولد عايشين بي هم وزوجاتهم واطفالهم

قريب الخمسة سمعت صوت الشيخ صاح يا الله
طفرن النسوان لبسن الحجاب شوية وطب هو وصهيب باوعلي وابتسم

- منورة السلف بنيتي

- منور بوجودكم

- چا وين امكم

ريحان.. داخل بوية ويا عمتي نجمة

عافنة وراح للمضيف يمهن
تعبت كلش باوعت الهناء واشرتلها اريد اغسل چان تصيح على هاي البنية

هناء.. اگول عيوني

ريحان.. ها حبيبة امري

- بيها مجال نغسل شوي

- اي تتدللون
انطت الطفلة الوحدة من البنات واخذتنة وياها

طبيت للحمام وبقت هناء تنتظر بالباب
ذبيت الحجاب من راسي
غسلت وجهي وصدري صار شكلي گبالي بالمرايا بچيت

الى متى ياربي
شگد بعد لازم اتبهذل ولشوكت تنتهي هاي الغربة وترحمني من هذا العذاب

بقيت ابچي بصوت مخنوگ
تعبانة من روحي
حتى النفس صار ثگيل على صدري ولو بيدي اگطعة واموت

اندگت الباب هناء
مسحت دموعي وطلعت باوعتلي عرفت چنت ابچي بس ما حچت شي لأن البنية واگفة

طبت تغسل وما تأخرت
دقيقة ورجعنا للصالة مر الوقت بملل
صلينة والتهوا بالعشة للسبعة ونص تقريباً چنت گاعدة يم هناء وصهيب گاعد گبالنة

سمعت رجال گال السلام عليكم
رفعت راسي مصدومة واحد يشبه صهيب بشكل فضيع لو مو تسريحة شعرة مستحيل اميز بيناتهم

هناء.. شفتي الي شفتة

- اي

- هسه يا هو منهم صهيب العكرة
حتى اعرف ارزل بيمن گبل لا اچفص بالسالفة

- هههههه
شبيچ ويا الولد ترى والله حباب

- خاف حباب خاف
اسكتي لا اطلع ضيمي براسچ المصفح

صهيب.. شو تنحي اردن افوت

هناء.. اي هذا وينة گدرت اميزة من الأسلوب

- العفو شني رطنتي

غسق.. تحچي وياية مو وياك لتهتم

باوعت للولد چانت عيونة علينة
شاف هناء تتناقش ويا صهيب اجة باتجاهنا مستغرب

صخر.. السلام عليكم

صهيب..  هلا خوية وعليكم السلام

- خير منهو هالبنيات

- بنيات عمتك نجمة
هناء ام لسان وغسق ما خلگ ربك الها ولا ربع لسان

- ههههه
اهلاً وسهلاً نورتن البصرة

هناء.. البصرة منورة بعمي الشيخ وبيك
حچتها وباوعت الصهيب هز ايدة وعافنه وراح

مدوا السفرة على طول الصالة
ما اشتهيت اتعشى گاعدة خالة يمي وتگرص بية حتى تجبرني اكل اخير شي عفتها ورحت اغسل

مدنگة ع المغسلة سمعت صوتها وراية
مسحت دموعي ودرت وجهي عليها باوعتلي وگالت

- بسچ يمة مو كافيچ حزن

- شراح يصير خالة
الكل هنا عبالهم اني بنتچ شلون لو عرفوا الحقيقة

- هي هاي الحقيقة
انتِ بنيتي الماشالتها بطني لكت گلبي شالها

- وانتِ صرتيلي ام الله شاهد
بس خالة خلي نحچي واقع شوية لان بديت اختنگ من المكان والي بي

- يمة حچيت ويا الشيخ بقصتچ

قاطعتها بسرعة
- يعني عرف كل شي

- اكيدن يعرف
چا شلون تردي يساعدچ وهو جاهل بالمصيبة الوگعت اعله راسچ

- يعني الكل راح يعرفون

- لالة ييمة
حتى الحرمتة ما گال
لكت فهمها انتِ دخيلة بسبب كونة چبيرة نشبت بين فروخ عمچ وهلچ

- وبعدين

- اصبري بنيتي
الرجال وعدني يشوفلچ حل وآنه ادري بضاري گد الچلمة اليحچيها

- شعندي غير الصبر خالة جبت عمري صابرة ع الدنيا ومصايبها

- وأن الله مع الصابرين

- ونعم بالله

سحبتني من ايدي ورجعتني للصالة
باوعت جايين رياجيل اثنين غرب ما شفتهم طول اليوم

گعدت مستغربة
شلون اعيش بين كل هالزلم ؟!!
ومعقولة يطلعون احسن من العرفتهم قبل وسودوا حياتي بحقارتهم

للعشرة گامن البنات يفرشن للنوم
شوية واجت ريحان گالت

- گومن وياي تنامن بحجرتي
خاطر تاخذن راحتچن اكثر من غرفة الضيوف

اخذت ملابسي من يم خالة ورحت
دخلت للحمام غيرت دشداشة سودة ولبست الصاية فوگاها

دا اطلع صار واحد منهم گدامي
باوعت بخوف مو بـ ايدي صايرة اخاف حتى من خيالي اذا مر بصفي

إلياس.. العفو ماعرف انتِ هنانة

تنحى للحايط سوالي مجال
فتت ع السريع وهمزين لگيت هناء گبالي

هناء.. ها ها شبيچ

- اريد انام تعبت

- يلا امشينة الغرفة ريحان

رحت للغرفة ويا هناء لگيت البنية تفرش للنوم
ساعدناها بالفرش وطلعت جابت مي وراها طفت الضوة وتمددنة

هناء.. هواي عندچ اخوان ما شاء الله

- اي ستة

- الله يحفظهم

- شكراً حبيبة

- وخوات عندچ

- لا آنه الوحيدة لأمي وابوي

- آنه عندي 3 وكلهن متزوجات بالبصرة

- اي اعرفهن
بس هاي اختچ ما اعرفها

- اي اول مرة تعتب البصرة

- شو ما حچيتي اي چلمة ولويش متگبعة

غسق.. مرتاحة هيچ
بس حچيتها جرت الحجاب من راسي

- ذبي هو آنه اختنگت شحال انتِ

صفنت علية چان تگول
الله شني هالشعر الحلو كل هذا ومتگبعة

هناء.. عوفيها ترى بسرعة تخجل

- ههههه اي مبين عليها

هناء.. اگول عندچ اخوان يتشابهون كلش

- ياهو صهيب وصخر قصدچ

- اي

- شگاية توم ذولي

- ياااا والله گلبي حسني لأن الشبه مو طبيعي
بس بالشكل طبعاً إما الأسلوب ااااابد

عفتهم يحچون ودرت وجهي
تمددت انام وكالعادة شكو شي حقير صار وياية مر على بالي

كتمت صوت بچيتي لحد ما اختنگت
محتاجة امي هواي ومشتاقتلها اكثر

ما اتمنى شي بالدنيا غير حضنة منها
حضنة وحدة وراها خلي تروح مرتاحة وتخلص من هالدنيا وناسها

ما اعرف شلون غفيت
حسيت الفجر على صوت الأذان شفت ريحان توها دتفتح الباب حتى تطلع من الغرفة

غسق.. صباح الخير

ريحان.. هلا حبيبة صباح النور

- اريد اتوضى علمود اصلي

- اي امشي وياي

گمت ذبيت حجابي على راسي وطلعت
لگيت الكل گاعدين عبالك الدنيا نهار سلمت عليهم ورحت توضيت

دخلت للغرفة لگيت الطفلة تحوس
انتبهت عليها البارحة نامت يم عمتها واستغربت لأن ما شفت لا امها ولا ابوها وهي هم مذكرت احد بيهم

بس صليت گعدت تبچي
رحت شلتها وصرت ادگ على ظهرها بلكت ترجع تنام ماكو

- بس حبيبتي بس

باوعتلي وبچت ازيد
صارت تصيح عمة وتشهگ اريد اطلع اصيحلها عمتها ما اگدر اخير شي طبت على صوتها تركض

ريحان..  لا عمة لا

غسق.. مدتقبل تسكت بـ ايدي

- اي مو تستغرب

- امها وين لعد

باوعتلي وسكتت
وراها اخذت الطفلة وطلعت من الغرفة بقيت صافنة سألت شي مچان لازم اسألة؟!!

صارت السبعة الكل گعد
گامت هناء لبست حجابها راحت غسلت وراها رجعت اخذتني وطلعنة للصالة

للعصر اجن بنات خالة ام هناء
وهم كالعادة الكل يسأل عني منو هاي وخالة تسكتهم بطريقتها بدون متنطي بية

مرت الايام مثل ما هي
چنت اگعد بيناتهم بجسمي وبس
لا اسأل ولا اجاوب ولا حتى اشاركهم الحديث

ثالث يوم اتصل عمو ابو هناء عليهم
هواي حاولت ويا خالة علمود تبقى بس ما گدرت إلا ما تخضع الرغبتة ونرجع للحلة

چنت گاعدة بالغرفة
اقرا قرأن وهناء تلملم بالملابس طبت علية ريحان

- گومي حبيبة ابوي يريدچ

- اني ؟!!

- اي هو وعمتي نجمة

صدقت ورحت وياها
دخلت للمضيف چان گاعد هو ومرتة وخالة ام هناء وياهم بس شافني اشرلي اگعد يمة

الشيخ ضاري.. بوية انتِ تعرفين اليوم خالتچ رادة لاهلها

- اي واني وياهم غير

- لا طبعاً
شعندچ تعنيتي للبصرة اذا ناوية تردين

صفنت بوجها چان يگول
- آنة وعدتكم تنحل السالفة بثلثة ايام لكت ما صارت

الشخص الناطرة مارد لساع
لذا راح تظلين هنانة تاج اعله راسي قبل راس اهل الدار منا لما تدبر ويحلها الباري

باوعت الخالة ونزلت دموعي
- شلون اظل وحدي والله ما اگدر

الشيخ ضاري.. مو وحيدچ
آنة وياچ ابوچ المايخاف اعله بزرة بگد مايخاف عليچ من هالساع

ام هناء.. يمة والله ردت اخذچ واردن
لكت الشيخ مارضى وگال غسق من هالساع بحمايتي ومسعولة (مسؤولة)  مني

آنه ما اگطع وياچ
كل ساع اخابر اعله الأرضي لحد ما تملين من يمي

ضميت عبرتي وسكتت
ظلوا يحچون وياية هي والشيخ على امل يخففون من تعبي والقهر الي بصدري بس چذب اذا گدروا يسووها

صارت الـ 11 واجة الوقت حتى افارگ الأنسانة الوحيدة الوگفت وياية وصدگتني لمن خذلوني كل الناس وأولهم اهلي

حضنتها ابچي بصوت عالي
طفل وديفارگ امة جسد وديودع روحة نبتة ودتفارغ گاعها هيچ احساسي واكثر چان بوقتها

ام هناء.. بسچ يمة
شلون اروحن مرتاحة وانتِ هذا حالچ

- راح اشتاقلكم

- اجيچ
وروحه المريدي الغالي ما اتعطل واليمتة ما تعتازيني تلگيني بجارچ

هناء.. بس حبيبتي
آنه وصيت ريحان وامي وصت عمي الشيخ عليچ واكيد مراح يقصرون وياچ

غسق.. اني استحي اتصل
الله عليكم اتصلوا بية دوم مو تعوفوني

ام هناء.. اكو ام تترك ضناها
لا توصين اميمتچ على بنيتها يغسق

شمرت نفسي بحضنها ورجعت ابچي
طول وداعنة قريب الساعة اخير شي راحوا لأن تأخروا كلش وسايق الشيخ ينتظرهم بالباب

يومين مرت بالضيم
كل شي بالبيت صار يخنگني واولها الغربة
شگد حاولت ريحان تحچيني بس منجحت وصرت اخلص يومي يا بالصلاة يا بالنوم حتى اشرد من الواقع وغربتة

فد يوم گاعدة بالغرفة اقرا قرأن
طبت ريحان وبـ ايدها الطفلة تبچي وهي تحاول تقنع بيها حتى تقبل تاكل

غسق.. شبيها

ريحان.. وچ عيني تعبت
لا ترضى تنام لا ترضى تهيد عجزت وياها

غسق.. شو جيبيها
اخذتها من ايدها اهز بيها واسوي حركات بوجهي حتى تسكت

شوية وگامت تضحك
اني هم ضحكت على ضحكتها
چان تشمر ريحان نفسها ع السرير وتصيح واخيراً رررررربي

- هههههه
الله يساعدچ مبين طالعة روحچ منها

- كلشششششش
لكت احبها مو بـ ايدي

- مراح تگولين وين اهلها

باوعتلي وسكتت
ردت اگعد اندگت الباب قوي

انطيتها الطفلة وذبيت الحجاب على راسي
صاحت ريحان تفضل

بس حچتها
اندفرت الباب حيل بحيث نزيت من مكاني
وطب واحد صاح بية بكل صوته

- ياهي انتِ ومنهو المسلط علينننننة....

يتبع

لتنسووون ⭐⭐⭐⭐⭐⭐