رواية وضاقت الأرض بي الفصل الحادي والثلاثون 31 - بقلم لبنى الموسوي

#وضاقت_الأرض_بي

للكاتبة #لبنى_الموسوي

دار وجها عني رجعت صرت گدامة
- ترى والله العظيم ميصير هيچ تعاملني

يعني حتى لو غلطانة
گول يابة انتِ هيچ وهيچ مو تبقى ساكت واني اضرب صفنات بس علمود اعرف شمسويتلك وتزعل علية

بعدني احچي ويا
فجأة سحب ورقة من جيب جنطتة الصغير
ضربها بـ ايدي كل قوتة وگبل دفعني ليورة انرگع ظهري بالميز

باوعتلة صافنة
العبرة خانگتني اريد ابچي بس ما اگدر
ظلت عينة بعيوني خازرني بالدقيقة تقريباً وراها عافني وطلع من الغرفة

تمشيت للچرباية گعدت وجريتها حسرة
رفعت الورقة شنو بيها؟! معقولة مكتشف شي جديد وديحاسبني علي بهاي الطريقة

فتحتها والخوف مسيطر على كل جوارحي
بس ما دام هالشعور لأن الچان موجود بـ هالورقة من اعظم واسمى الأمنيات الي تمنيتها بحياتي قرار نقلي من جامعة بابل لجامعة البصرة

باوعت بصدمة فاقت استيعابي
شنو يعني معقولة إسحاق نقلني وخلاص راح يخليني ارجع للدوام من جديد

فركت عيوني اتأكد من محتوى الورقة
اي والله هذا قرار رسمي بالنقل وتاريخة البارحة بالضبط

درت وجهي سحبت الحجاب
شمرتة على راسي اريد اطلع طب إسحاق شايل بـ ايدة ود

باوعتلة بـ ابتسامة رد النظرة بخزرة
ما گدرت احچي بس اشرتلة ع الورقة عافني وراح للچرباية گعد يلعب ويا بنتة

تقربت منة متفاجأة
هسه شفهم من ضوجتة هاي اذا زعلان شلون ينقلني
گعدت يمة گتلة ابو ود رفع راسة باوعلي

- احچي الله يخليك
گول شي لتظل ساكت وتخليني حايرة

- شني الرايدتة

- شنو يعني راح تخليني اداوم ؟!

- اي
كل شي يصير ومامش بشر ضامن عمرة
من هيچ شهادتچ هي سلاحچ عگب عيني خاطر لا تتبهذلين بـ هالدنيا الوحيدچ

- اسم الله عليك لتحچي هيچ
الله يطول بعمرك البنتك واهلك.. باوعتلة بتردد والي هم

سكت ما حچة شي
گتلة اني اسفة مو قصدي العب بـ اوراقك
باوعلي بطرف عينة زين والله يعني تعرفين شني عاملة

- اسفة مرة ثانية
كل الموضوع صارن گدامي وگلبت بيهن يعني مجرد فضول لا اكثر

- غسق آنه ما احبن هالسوالف
عندچ شي تردين تعرفين حاجة تعاي سأليني موش تفتشين بغراضي من وراي مثل الحرامية

- ادري بنفسي غلطانة ميحتاج تحچي
بس والله اوعدك هاي راح تكون اول واخر مرة بعد ما اعيدها المهم لتزعل مني

- ما صار شي
يلا امشي جهزي الريوگ خاطر اكل وانامن

- متگدر تصبر لحد ما اغير الود ملابسها

- اي اعلة راحتچ بوية

لبست حجابي عدل واخذتها من ايدة
درت وجهي داطلع تراجعت
احس بنفسي فرحانة كلش لو شما اسوي ما اگدر اعبر عن احساسي بـ هاللحظة تحديداً

باوعتلة چان نازع الدشداشة ديروح للحمام
ركضت بـ اتجاها حضنتة حيل واني اصيح شكراً والله شكراً

من كل گلبي اشكرك على كل شي سويتة الية
شوية ورفع ايدة مسح على ظهري بهدوء صارت ود بيناتنة تكركر بفرحة

ثواني وانتبهت على نفسي
بعدت عنة خجلانة اسفة ابو ود اني بس ردت....
قاطعني من گال إسحااااق

- شنو ما فهمت ؟!!

- اسمي إسحاق موش ابو ود
اي نعم هالأسم احب ما يكون اعلة گلبي لكت ما احبن اسمعنة منچ انتِ بالذات

صفنت بوجها صدمة على خجل
حسيت بـ ايدة دتتحرك گدام عيوني نفضت راسي وباوعتلة

- فضيني عاد تراني ميت جوع

- لعد هاك الزم ود خلي اسويلك ريوگ

- شني بطلتي ما تغيريلها

- اي صدگ نسيت انطينياها

باوعلي يضحك وهز راسة
خجلت كلش مدري شجاني فجأة ضربني الثول
طلعت من الغرفة ع السريع لو اظل يمة بعد دقيقة وحدة افضح روحي بـ هالغباء العندي

بدلت الود بسرعة ونزلت سويتلة ريوگ
رجعت لگيتة ديمشط بشعرة انتظرتة يكمل وراها طفيت الضوة وطلعت علمود ينام

للعصر چنت گاعدة يم البنات سمعتة صاحني
خليت ود يم ريحان وصعدت چان مبدل وفاتح القاصة صرت ورى نعم صحتني

- اي جهزي روحچ تجين وياي

- وين ؟!

- للسوگ
تشترين شي الچ والبنيتچ خاطر تلبسي بعقد ريحان

- بس اني عندي

- امشي بوية لا تفتين گلبي
ومن دربچ تشوفين شي مستور تلبسي للدوام

- زين ود اخذها وياية لو شنو

- لا بقيها يم عمتها بس عودن تأكدي من قياساتها

حچاها وطلع من الغرفة
بدلت ع السريع ونزلت وصيت ريحان على ود وطلعنا

بالبداية اشتريت فستان قصير الي والها
وراها اشتريت صايات للدوام وتعمدت ما اخذ تنانير
لأن ادري بيهم هنا شلون يفكرون فـ گلت احترم نفسي من اول احسن ما يجيني الحچي بعدين

رجعنا للبيت قريب التسعة
بدلت ع السريع ونزلت اساعد البنات بالعشى
صارت بـ 11 اخذت ود نومتها ورجعت الغرفتي لگيت إسحاق گاعد يشتغل بـ الاوراق

تمددت بفراشي اباوع علي
تذكرت اليوم من حضنتة مدري منين اجتني الجرئة وسويتها بس والله شعور حلو

هسه شكو بيها لو يجي يحضني وينام
صارلة اكثر من اسبوعين غايب وحارمني من حنانة
داحچي ويا نفسي صفنت بتعجب هاي شدتمسلتين غسق صدگ چذب !!!

درت وجهي وغمضت
ما اعرف شنو هالتناقض الگاعدة اعيش بي حالياً

من جهة كلش يعجبني حضنة واشتاق العطرة
ومن جهة ثانية بس يقترب مني اخاف بشكل وكل جسمي يصير يرجف مجرد ميلمسني بـ ايدة
زين والحل شنو ؟!!

عصرت راسي حيل احاول ابعد التفكير عنة
ورى دقايق حسيت علي طفى الضوة واجة تمدد بمكانة

بقيت على نومتي منطيتة ظهري
بس ما انكر بداخلي دانتظر شوكت يحضني
خصوصاً هو چان مسافر صارلة اكثر من اسبوعين يعني اقلها لازم يشتاق ولو ربع شوقي الة مو إلا بگدي

شو هذا ما تحرك ولا صدر منة اي رد فعل
ضجت كلش اريد انام ما اگدر بقيت الوب بمكاني اخير شي ما صار إلا ما درت وجهي علي

چان نايم وحاط ايدة على عيونة
حس علية تحركت باوعلي واشر على صدرة تعاي

خجلت كلش
معقولة عرف مدانام بسبب هالشي يبوو اذا صدگ معناها انفضحتي غسق

بعدني افكر سحبني على صدرة
- بسچ نامي مو زين هالكثر تفكرين دماغچ يتعب

- بس اني مدافكر

- اي صح
نامي بوية نامي

رفعت راسي علي
- شتقصد ما فهمت؟!! ترى والله اني م...

- لا تحلفين ديري بالچ

- ابو ود
باوعلي بخزرة... العفو اقصد إسحاق

- خير

- انت ليش هالگد غامض

- شلون يعني

- ما ادري
بس مزاجك يتغير بين لحظة والثانية وبدون سبب

- وتعرفين تفسرين المزاج همينة حلوووو

- لا صدگ مگاعد اتشاقى ترى

- زين بلاية زحمة اعليچ
ما تشوفيلي مزاجي شلون لونة هساع احمر اخضر برتقالي

- ما ادري
بس شكلك ضايج مو مثل العصر

- عليش كل هذا عبن ما حضنتچ

باوعتلة فاتحة عيني
ما گدرت انطق ولا كلمة فجأة سحبني وشمرني ع الچرباية

صار فوگاية يباوعلي مبتسم
بعدني ممستوعبة الديصير ما احس إلا دنگ علية وسحب شفتي الشفتة

ما ادري شنو حسيت
رغم باسني برقة بس لعبت نفسي منة بشكل مو طبيعي بحيث اجيت اگلب معدتي إلا شوية

فجأة بعد عني وگال
امشي غسلي وجهچ وتعاي خاطر تنامين
گمت ع السريع للحمام طبيت وقفلت الباب صرت اباوع النفسي بالمرايا

شنو هذا الصار والله مداصدگ
ليش تقرب مني وليش ابتعد فجأة معقولة حس اني ممتقبلتة ؟!!

دنگت اشمر المي على وجهي
ممنتهبة على نفسي شلون داغسل بحيث بللت حتى ملابسي

طلعت اخذت تراك بدلت ورجعت يمة
اول ما تمددت سحبني الحضنة ظل يمسح على شعري مثل الديحاول يهديني بس ما حچة ولا كلمة

غريب هالشعور
اتأذه لو يقترب مني بس ارتاح بحضنة وكأنة شخص ثاني زين ليش غير المفروض الشعور واحد بالحالتين

غمضت عيوني أحاول انسى الصار
حسيت علي لزم ايدي وصار يلعب بأطراف اصابيعي ويحرك الحلقة بهدوء

نسيت كل شي وظليت مركزة بحركاتة
چان يتصرف بغرابة والهذا السبب شد انتباهي ويا وبقيت احاول افهم شديقصد من هالتصرفات

فوگ النص ساعة وهو على هالحالة
لازم ايدي ويمسح على شعري بنفس الوقت لحد ما غفيت

گعدت الصبح مچان موجود
غسلت ونزلت ع السريع لگيت الهوسة تارسة البيت لأن اليوم عقد ريحان

للعشرة خلصنة الشغل
اجتمعنا بغرفة ريحان وكالعادة بدن يتعاركن علمود يلزمن سرة يم امل مرت إلياس

بالعادة تشتغل وهي ساكتة
بس هالمرة طگت روحها چانن مجموعات فوگ راسها دفعتهن ووگفت بنص الغرفة

- اسمعني ولچن
آنه مو كوافيرة الخلفوچن وما اعرف بنفسي

الي تريد اشتغل الها تدفع
وكل وحدة سعرها يفرق عن الثانية يعني حسب الشعر وطولة ومتانتة

هناء.. غير تستقر خبيرة التجميل

- چا مو كون الحچي هيچي إلا ما اشتغلچ

- لا عفية لا
الله يخليچ مكيجيني شلون ترضين اطلع للوادم صخلة

ريحان.. ههههه
خرب عقلچ هناء والله عندچ سوالف

هناء.. هههه
والله جاية تهددني كل ظنها ميتة ع المكياج

غسق.. ديلا انهوا هالنقاش
اني ما اريد تمكيجيني اعرف امكيج نفسي بنفسي

شمس.. واني هم

نهلة.. واني وياكم

ثناء.. هاي خلصتي من 3 بعد شتردين

امل.. وانتِ ما تصفين وياهن وتخلصيني

ثناء.. لا يمعودة وين اعرف اتمكيج

شمس.. اني امكيج والله شغلي حلو جربي وشوفي

امل.. جربي ما خسرانة شي
عاد اخلص من العروس يظلن بس خواتي وبنات عمي

ثناء.. يلا لعد اني شمس تمكيجني

غسق.. ظلن يشتغلن بالمكياج للعصر
بيومها الولد ما اجو ع الغدة لأن يعرفون البيت متروس بالنسوان

صعدت فوگ بدلت الود ونزلت انطيتها للحجية
باوعت الهناء گاعدة يم امها تقربت سحبتها من ايدها ورجعت الغرفتي

- هاي وين جايبتني

- عود صدگ متردين تخلين مكياج

- اي يمعودة شعندي حاطة

- لا شلون يصير
اولاً انتِ توچ مخطوبة ثانياً هذا عقد حماتچ ميصير تظلين هيچ هسه عبالهم شو شصاير بيناتكم وحاضرة على اعصابچ

رادت تحچي سكتتها
اخذت ملابسي غيرت بالحمام ونزلنة يم شمس هي ابتلت بمكياجنا هالمرة بدل عن امل

صارت الگعدة وريحان بعدها بالغرفة
رحت داشوفها شلون طالعة وصدقة ع النزاكة الشايلتها هالبنية عكس اخوانها كلهم عدهم ضخامة وحدية بالملامح إلا هي ناعمة وملامحها بريئة

تقربت منها بـ ابتسامة
- هاي شطالعة فدوة هنيالة الجمار

- گلبي راح يوگف غسق

- ههههه
حقچ بس اهدي شوية ترى مجرد عقد خلي الخوفة اليوم العرس

- اي صح
هساع شني اگومن لالة

- هسه اوگفي بس خلي اسأل امي

درت وجهي داروح اسأل الحجية طبت ام جمار
باوعت الريحان وصارت تجر صلوات وهلاهل اخير شي طلعتها هي ونهلة للصالة

نص ساعة وتم العقد
بنات عمهم ذبن لحم بالرگص والحجية كل شوية تصيح عليهن علمود خالة ام هناء توة رجلها ميت بس ولا سمعن منها وخبصن الدنيا خبص

نجاة عينها علية ما شالتها ابد
كلش اضوج من نظراتها احسها مقيدتني من غير الهمس المشتغلتني بي هي واختها نجيبة

گمت من گدامهن لأن نرفزني
ظليت واگفة يم ريحان بعدين استلمت التصوير من شمس لأن تعبت لحد ما اجة العريس

ريحان.. صار وكت طبت جمار
گلبي صار يدگ مثل الطبول رغم اليوم موش عرسنا لكت ما اعرف عليش خايفة هالكثر

اجت عمة سكينة عدلتني
شوي وسمعتة يصيح يا الله گبل دنگت اخافن اتنوع بعيونة وآنه بهالمنظر عبن هاي اول المرة انكشف علي

حسيت علي گعد جاري
تقرب من يمي وهمس باوعيلي ريحان
ما گدرت ارفع عيني اجت عمة سكينة جايبة الذهب گومني من ايدي

جاي يلبسني بالگلادة
ما احس إلا باسني من رگبتي اجيت اوگع لو ما غسق كضتني من ورى

باوعلي مبتسم وكمل باقي الذهب
رجعنا گعدنا سمعتة همس بصوت ناصي ما مصدگ صرتي حلالي ريحان

طول ما هو گاعد آنه مرتبكة
احسة متونس على التوتر المعيشني بي بحيث كل شوية ويضحك على تصرفاتي الما محسوبة

ما عولت بس يطلع
شوي واجت نهلة بـ ايدها شي مغلف
سألتها شني هاي ردت من تفتحي راح تعرفين على شنو مستعجلة

لليل خلصت الهوسة
رحت للغرفة ع السريع خاطر ابدل گبل لا يجون اخوتي

اول ما طبيت فتحت الغلاف
چان جايبلي موبايل جديد وكل شي بي حتى الخط والرصيد ومسجل على رقمة حبيبي

ابتسمت من تصرفاتة
سبحان الله يوم عن يوم جاي احبة اكثر
وآنه الچنت ما اطيع اشوفنة گبال عيني وانغث من اقل حچاية منة

هناء.. بعد ما خلص العقد
ردنا نرجع ما رضت مرت عمي ولزمت بينة على العشى

واگفة ويا البنات نشتغل بالمطبخ طب صهيب
سلم عليهن ما اهتميت ولا حتى درت وجهي شوي واجة يمي گال امشي وياي محتاجچ

بقيت بمكاني
تحرك خطوتين ورجعلي صاح آنه شني حچييت
بـ هالاثناء طبت عمة سكينة گالت عليش صوتكم عالي

- تعاي عمة عندي كلام وياچ

- اي عمة گول

سحبها وطلعوا من المطبخ
شوي ورجعت جرتني من ايدي باوعتلة بـ استغراب
چان تگول اششش ولا چلمة خليچ خوش بت احسن ما اتسودن اعليچ

حچتها ودفعتني بغرفة صهيب
چان واگف يضحك بس طلعت راح قفل الباب وراها
گلبي راد يوگف من الخوف هذا على شني ناوي عززة

ردت احچي رفع ايدة سكتني
راح للميز طلع كومة اوراق شمرهن على السرير وگال شوفي شغلچ

باوعتلة رافعة حاجبي
- هذا يا شغل سلامات عيني

- امشي رتبي هاي الأوراق
حسب الحروف الأبجدية وما تطلعين منا إلا تخلصيهن

- هه لا والله

- چنچ ما راضية

- طبعاً ما راضية هذا شغلك موش شغلي

بس حچيتها تقرب مني
رجعت ليورة گبل سحبني من ايدي الحضنة

- تردين اشوفن شغلي يعني

بلعت ريگ بتردد
- شني تقصد

- تشوفين شغلچ لو آنه اشوفن شغلي وياچ

افتهمت قصدة گبل صحت لا آنه اشتغل
بس حچيتها عافني وراح گعد ع السرير يضحك

ما اعرف شني هالاوراق
هو يشتغل بالمحاسبة وآنه اتسودن من الرياضيات
اشرلي على الورقة فوگ مكتوب كل رقم يمة حرف گال رتبيهن اعلة الحروف هذني

گعدت يمة وبديت اشتغل
كومة ميخلصن ولازم كل حرف يطابق الرقم الويا
ادري بي جاي ينتقم مني بهالطريقة بس آنه الة بسيطة

هسه ما اگدر اتصرف والباب مقفول علينة
بس ما اتسمى هناء اذا ما رديتها الة اول ما اطلع منا

بقيت ارتب بيهن فوگ الساعة
المصيبة شكلة اتفق ويا عمة سكينة من هيچ محد صاحنة ع العشى شگد خبيث هالولد

تعبت كلش
رگبتي هاجت علية وما اگدر استمر اكثر
باوعتلة بتوسل ساعدني عفية للصبح ما يخلصن هيچ

- اشتغلي وانتِ ساكتة

- صهييب

- عيونة

- شمالك انت ما تفهمني

- اشتغلي اشتغلي

شمرت الأوراق علي وگمت بعصبية
- والله هذا شغلك موش شغلي تسمع لو لاااا

درت وجهي جاي اروح للباب لزمني
باوعتلة بخزرة عوف ايدي اريد اااااطلع

- ما تطلعين منا إلا تخلصيهن

- تعبت ما بية انت كملهن

- بس الاتفاق اتفاق

- شني يعني

- يعننننني
دام انتِ ما شفتي شغلچ آنه راح اشوفن شغلي وياچ

حچاها وسحب راسي علي
باس شفتي حيل اجيت ادفعة قيد ايدي ليورة وعصرها بـ ايدة

بقيت اتصارع ويا
فجأة هديت ما اعرف شني صارلي دخت كلش وبعد ما بية اقاوم اكثر

بس بعد عني صحيت
- ااانت شلون تتجرأ وتسوي هيچ

- يعني ما فاد ولساعة لسانچ طويل

تقرب مني حطيت ايدي على شفتي
- دير بالك تعيدهاا

حچيتها وصرت ارجع ليورة
انضربت بالباب فتحتها وشردت سمعتة يضحك من بعيد

ريحان.. دخلت الغرفتي
بعد ما خلصنة من هوسة العشى والخطار

سمعت الجهاز يدگ هزاز
تقربت من الميز هذا جمار ويا ما شلتة خلصت المكالمة

باوعت بصدمة داگ علية عشرين مرة
توني فاتحة التلفون رجع دگ مرت الاخرى جاوبتة بساع

- الوو

- هاي وينچ حياتي

- چنت اشتغل توني تنوعت الجهاز يدگ

- بعدهم الخطار يمكم

- لا مشوا

- اممم
تدرين ردت اجي اشوفچ بس خجلت من اخوانچ

- چا همزين ما اجيت

- ليش

- استحي جمار
شني كلها مرة وحدة چنك ناوي تموتني اعلة ايدك

- اسم الله يومي قبل يومچ

- لا تحچي هيچ عمرك طويل ان شاء الله

- تدرين شطالعة اليوم
مثل الگمر وبعد احلى خو ريحتچ يبوو صدگ ريحان ترد الروح للجسم

- وانت ما تستحي تسوي هالحركات چدام الوادم

- مرتي يابة مرتي شحدة اليفتح حلگة بكلمة

سكتت شوية چان يگول يلا
- شني

- گوليها

- جمار

- الله عليچ كافي
انام واصحى على حلم هاللحظة وانتِ بس تگدرين تحققي الي

غمضت عيني بخجل
صحت احبك وسديت الخط بساع
دگ مرت الاخرى رفضتة وغلقت الجهاز والله ولا اگدر احچي ويا خليها الباچر احسن

شمس.. دخلت الغرفتي ميتة تعب
چان صخر گاعد يشتغل سحبت اللابتوب من گدامة ونمت على رجلة

- تعبانة

- سلامتچ حبيبتي
حچاها وحط ايدة على راسي يمرخ بي

- صخر الدوام راح يبدي بعد اقل من شهر

- اي اعرف
آنه كلفت إسحاق يسعالچ بالنقلة لا تاكلين هم الشي

گمت من حضنة بسرعة
- شنو نقل اني ما اريد انقل عفية

- چا شلون تداومين

- ما ادري بس ما اريد انقل

- شمس لا تسودنيني
البصرة وين وبغداد وين حتى ما اگدر اخذچ واردچ يوميا

- صخر

- بسچ لا تكملين

- حبيبي الله يخليك اسمعني

- لون عندچ حچي براسة حظ اسمع وآنه الممنوع
لكت آنه اعرف ما وراچ غير طيحان الحظ من هيچ سدي الموضوع كلش

- لا ما اسدة
ولازم تسمعني ميصير تفرض رأيك علية

- لا اله إلا الله
حچاها وگام من الچرباية يفرك بوجها

- يلا ارطني شني الرايدتة بالضبط
ولو آنه اعرف كلش زين لوين راح توصلين بحچاياتچ

- اني اريد اداوم ببغداد
كليتي وزملائي خمس سنوات اني وياهم تعودت بعد ما اگدر ع السنة الاخيرة ارجع النقطة الصفر

- چا شلون ترحين وتردين ما فكرتي

- لا طبعاً فكرت
اگعد يم خالتي هي سنة تخلص شلون مچان

- ههههه
يم خالتچ گلتيلي
ورجلها عاد شلون طايق وجودچ خاطر يتحملچ سنة كاملة

- شنو دتعيرني ؟!!

- اكيدن لا
بس جاي احاول افتح عيونچ اعلة الشغلات المُصرة تتجاهليها عبنها تتضارب ويا مصالحچ

- هسه انت ليش تصيح
احنة ترى دنتفاهم مو نتعارك تعال اگعد خلي نحچي بهدوء

- شمس سدي السالفة احسن

- صخر شوف
اني لحد الان داحاول اسايرك حتى تمشي حياتنا بدون مشاكل بس لهنا وكافي اني مراح اكمل غير بجامعتي وانتهى الموضوع

- بلا شني السايرتيني بي ممكن افهم

- هواي شغلات
ابسط شي من بعت سيارتي
والله لأن ما اقبل تسوقين هنا ومع ذالك سكتت لأن انطيتك الحق انت ابن شيوخ وصعب مرتك تصعد السيارة گدام العالم

بس جامعتي لا
دبرها شلون مچان المهم اكمل ببغداد
ولتنسى اخوك وياية يعني مراح اكون وحدي هناك

دار وجها بدون ميجاوبني
گمت من مكاني حضنتة من خاصرتة وحچيت بهمس

- الخاطر شمس لو مالها خاطر يمك

- شمس بلاها هالحركات

- يلا حبيبي يلا فدووة گول اي

- خليني افكر شوي موش لعبة السالفة

- اي اخذ راحتك المهم بالاخير توافق

حچيتها ودرتة علية
لزمت وجها بـ ايدي وبستة من شفتة بحركة سريع

باوعلي مصدوم
چانت هاي اول مرة اتجرأ ويا حدنة الحضن وبس يوميا

ردت اروح لزم ايدي
باوعتلة اضحك گال عيديها ابتسمت بمكر

- يعني راح توافق

- لا تصيرين استغلالية

- عليش حبيبي شني مسوية قابل

- ههههه
حلوة منچ هاي

- اي شوف
الخاطرك حتى كلامي تغير عاد انت سوي هالشغلة الخاطري

- ماشي اوعدچ لون دبرت اوافق

- اي هسه تمام

قربت وجهي منة دابوسة سحبني علي
اخذ شفتي بين شفتة وصار يتفنن بالبوسة اريد افلت نفسي منة ماكو

بس الغريب عجبني الشعور
مو مثل اول مرة انجمعنا بيها چنت ما طايقة وجودة بالغرفة وهسه صرت ما انام إلا بحضنة وبين ايدي

عفتة براحتة زين منة صابر علية
شوية شوية صار يتجرأ بلمساتة بعدتة عني اضحك

- صخر وين ترى احنة بعدنة مخطوبين

- يا هالخطوبة الگشرة الما ناوية تخلص
شني يابة العالم تتزوج وتخلف واحنة بنفس المچان نراوح

- هههههه
دصبر اول وتالي نعرس قابل راح اطير

- صابر بوية شني عندي غير هالصبر

- خلصت شغلك ترى اني طفيت

- نامي قابل كاضچ وما اعرف

- لتصير خبيث
تدري ما اگدر انام إلا بحضنك

- چا شلون تردين تعوفيني سنة

- اي عادي
بدل ما انام بحضنك انام على صوتك ها اها

- شاطرة بوية
عندچ حل فوري الكل مشكلة ومحد طايح بيها غيري

- والله مشكلتك ليش تتزوج وحدة ذكية

- تورطنا والحمد لله

- هههه اصلاً احلى ورطة
ويلا امشي اريد انام كافي حچي

حچيتها ودفعتة للچرباية
رفعت ايدة نمت على صدرة وحضنتة حيل لحد ما نمت

غسق.. چنت متمددة انام
حسيت على إسحاق طب للغرفة

نزع ملابسة وراح للحمام
سمعت جهازة ديدگ شامرة ع الميز البصف الچرباية

رفعت راسي بهدوء
شفت الأسم م ر و 30 ما ادري وين قاريتة
عصرت مخي اي والله بيوم العقد من چان متصوب دگ هالرقم علي وحچة بعصبية

سمعت صوتة اقترب سويت روحي نايمة
بعدة جهازة يدگ شالة وطلع برة فوگ العشر دقايق يلا رجع

انسحنت روحي سحن
يعني ليش ما حچة هنا معناها اكيد هاي بنية وخاف لا اسمع لذالك جاوبها بعيد عني

بقيت على نفس نومتي
صاح غسق گاعدة ما جاوبتة لأن متأكدة بس احچي ما اسيطر على اعصابي وافضح روحي بكل سهولة

شوية ونام
اما اني ظليت الوب مثل الطير المذبوح كأنما البيني وبين إسحاق حب سنين مو ايام معدودة وهيچ غرت علي

ريحان.. نايمة بفراشي وفكري كلة يم جمار
حچاياتة جاي تدگ براسي كلما اغمض خاطر انامن يرن كلامة بـ اذني ويصحيني من جديد

درت وجهي باوعت للساعة بالوحدة
عمري ما سهرانة الهيچ وكت إلا اليوم ولازم انامن بعد

غمضت عيوني
اردد ايات قرأنية خاطر اشغل فكري
سمعت جهازي الأصلي يدگ رفعت راسي رسالة من رقم غريب فتحتها بساع چان مكتوب بيها

- ألف مبروك يا لوعة گلبي تتهنين ان شاء الله....

يتبع

لتنسوون ⭐⭐⭐⭐⭐