رواية وضاقت الأرض بي الفصل الثاني والثلاثون 32 - بقلم لبنى الموسوي

#وضاقت_الأرض_بي

للكاتبة #لبنى_الموسوي

ريحان.. نايمة بفراشي وفكري كلة يم جمار
حچاياتة جاي تدگ براسي كلما اغمض خاطر انامن يرن كلامة بـ اذني ويصحيني من جديد

درت وجهي باوعت للساعة بالوحدة
عمري ما سهرانة الهيچ وكت إلا اليوم ولازم انامن بعد

غمضت عيوني
اردد ايات قرأنية خاطر اشغل فكري
سمعت جهازي الأصلي يدگ رفعت راسي رسالة من رقم غريب فتحتها بساع چان مكتوب بيها

- ألف مبروك يا لوعة گلبي تتهنين ان شاء الله

گمت على حيلي مصدومة
ياهو هذا وشني يقصد من هالكلام ؟!!
ظليت اعيد بالرسالة احاول استوعب الحچي شني يعني لوعة گلبي مجاي افهم

نزلت من السرير اروح واجي بالغرفة
اباوع للرقم بتردد عمري ما مسويتها ومجاوبة على رقم غريب لكت هساع آنه بذاتي راح اتصل خاطر اعرف ياهو هذا

اجيت ادگ علي ايدي ترجف
ما متعودة اشوفن نفسي بهالجرئة هاي بس لازم اسويها خاطر اعرف شني القصة وارتاح

انطيت اتصال ورفعتة يم اذني
چنت منتظرة اسمع الرنة بس تفاجأت من گال الجهاز مغلق فصلت الخط بعصبية وشمرت الموبايل بالگاع

شني لازم اسوي هساع
اگولن الإسحاق لو لابوي لو اسكت وامسح الرسالة وتالي احظرة واعتبر شي ما صار

بس اخافن تصيرلي طلابة بسببة
لا لا هو آنه اصلاً راح اغلق هالرقم عبن جمار جابلي جديد عليش اخافن من عندة بعد

دنگت ع الگاع شلت الجهاز
مسحت الرسالة ورحت للمكالمات خليت الرقم بقائمة الحظر وغلقتة خاطر انامن براحة بلاية تفكير

غسق.. ثاني يوم الصبح
گعدت لگيت إسحاق موجود بس مبدل ديطلع

گمت من مكاني بدون ما اسلم
باوع علية بـ ابتسامة وگال صباح الخير
رديت من ورى خشمي بس شنو بالگوة لازمة نفسي علمود لا انفضح گدامة

دخلت للحمام غسلت وطلعت
دالبس حجابي سحبني من زندي علي
باوع بعيوني وگال شمالچ بوية شني تهيسين مريضة

- لا

- چا عليش وجهچ اصفر هيچ

- اي
يعني اقصد يمكن ضغطي نازل

- غسق احچي بوية شني عندچ

باوعتلة ردت احچي بس تراجعت
سحبت ايدي منة داروح رجع لزمني مرة ثانية
ابد مو مال افتح ويا مثل هيچ موضوع حالياً عزة شيگول علية والله واگفة الشغلة

فكرت ويا نفسي
هذا إسحاق يعني مستحيل ينضحك علي بكلمة لو كلمتين لازم اشوفلي حجة مقنعة

لازم ايدي وصافن علية ينتظر الجواب
نزلت راسي حتى لا يكشف الچذب بعيوني وگتلة حلمت بأمي تبچي وگعدت ضايجة

گبل سحب ايدة من عندي
شوية وگال الله يرحمها برحمتة الواسعة رديت يرحم اموتك وخليت وطلعت من الغرفة

نزلت جوة سويتلة الريوگ
شوية ونزل اكل وراها طلعوا الرياجيل وبدينا بشغل البيت

قريب الضهر رحت ويا شمس الغرفتها
بدت تسولفلي ع الموضوع الصار بينها وبين صخر واني اسمعها ساكتة لحد ما خلصت كلامها

- ها شنو مراح تحچين شي

- انتِ يعني مقتنعة بقرارچ هذا ؟!!

- غسق والله صعبة
ابسط شي اني متعودة الأمتحانات كلها نراجع اني وحبيب

هاي من غير الأساتذة يعرفون مستواية
يعني يساعدوني علمود احافظ على معدلي بلكت اكمل دراسات

اني كل سنة اطلع من العشرة الأوائل
بس هالسنة اختلف الوضع لأن كل شي بحياتي تغير حتى نفسيتي واذا انقل يسوء الوضع اكثر واكثر

بينما لو ابقى بجامعتي
استفاد هواي واولها من حبيب لچ والله ما اريد اضيع معدلي ويضيع ويا حلم بابا الچان دوم يطلبة مني

- شنو تكملين دراسات ؟!!

- اي
الله يرحمة چان دائماً يگول
ازعل عليچ شمس لو نزل مستواچ لأن ما اقبل بغير الدكتوراه لتخيبين ظن ابوچ بيچ

- والله حقچ
اني اكثر وحدة تفهم عليچ لأن اثنينة انجبرنة ع الغربة ومحد يعرف الغربة شنو غيرنا

بس هم فكري بصخر
صح هذا مستقبلچ بس انتِ هم مستقبلة يعني حتى ما لحگ يفرح بيچ وتردين تعوفي سنة كاملة

- وروح اهلي فكرت بي
تدرين هاي الروحة من صالحة قبل لا تكون من صالحي

- شلون يعني ؟!!

- باوعي غسق
اني ما ادري شگاعد احس بالضبط

ساعات احبة وساعات اغار علي
وساعات لا احس نفسي بعدني لحد الأن ممتأكدة من مشاعري ولو تقربلي راح ينعاد الصار بية بليلة زواجنا

صخر كلش غالي علية
ما اريد اجرحة وياية ولا اريدة يتقرب مني وهو يحس اني مجبورة علي

اللهفة الاشوفها بعيونة لازم يشوفها بعيوني
ومثل ما يحسسني بحبة اني هم اريدة يحس بحبي وهالشي مراح يصير حالياً

اني گلت لو نبتعد راح اشتاقلة
ويجوز اني نفسي ما اگدر على هذا البعد لأن صدقاً بديت اتعلق بي بحيث ما اگدر انام إلا بحضنة

بس حچتها ابتسمت لأن تذكرت نفسي
باوعتلي وگالت شبيچ رديت لا هيچ كملي مو يمچ السالفة

- خاف دتضحكين علية ولچ

- لا والله مو يمچ شبيچ

- اي
يعني بعدنا هذا راح يزيد حب صخر بداخلي
شلون يعني البنية بفترة الخطوبة يوم عن يوم تحب خطيبها اكثر وتشتاقلة اكثر واكثر

- شوفي هو حقچ
اني ادري شگد صعبة ع البنية لمن بين ليلة ويوم تلگة نفسها ويا رجال غريب بغرفة وحدة والباب مقفول عليهم

اني وانتِ غير عن باقي البنات شمس
نختلف كلش لأن لا عشنا فترة خطوبة ولا اختارينا الرجال الراح يشاركنا باقي العمر بـ ارادتنا

بس الواحد لازم يحچي الحق
إسحاق وصخر زلم ينشد بيهم الظهر
ويمكن رب العالمين دزهم النة كـ تعويض عن الضيم الشفنا بحياتنا صدگيني

المفروض نحمد الله ونشكرة ألف مرة
مو زين ما وگعنا بناس ما بگلبهم رحمة وبدل ما ينتشلونة من الضياع يضيعونة وياهم اكثر واكثر

- صح كل كلامچ صح
لو ما هيچ مچان حبيت صخر بهالسرعة

اني اجيت لهنا مطايقة نفسي
مچنت حابة حتى اعيش ولمن راد يتقربلي حسيت نفسي وحدة وديغتصبوها

فجأة تغيرت نظرتي للحياة
احب واغار واتعصب واشتاق وانتظر الليل شوكت يجي حتى انام بحضنة

من بعد ما خسرت اهلي حسيتة صارلي اهل
لدرجة من حرگوا بيتنا رحت العمي وابنة وواجهتهم بكل شجاعة بس لأن ادري صخر واگف بظهري وميگدرون يمسون شعرة من راسي

اصلاً اني ادري صرت احبة
بس بعد غسق اريد اتلهف علي اكثر
علمود لمن يجي يتقرب مني لاول مرة يحس نفس الأحساس الشفتة اني بعيونة يوم زواجنا

صخر يستاهل وحدة تحبة بجنون
ولأن هو ميريد غيري واختارني دون عن كل البنات اذاً لازم احبة حب يليق بي وبگلبة الطيب

- وينك عمي صخر
تعال اسمع مرتك شتگول عنك من كلام حلووو

- ههههه
ولچ مو وكت شقاچ ساعديني

- الصراحة بالبداية مچنت وياچ
بس هسه وبعد ما سمعت كل هالكلام منچ
اشجعچ على هالقرار كلش ونگدر نعتبره خطوة اولى لحياتكم الجديدة ان شاء الله

- اي عفية واخيراً لگيت واحد يفهمني

- اني دوم فاهمتچ
لأني بنفس طيحان حظچ والحمد لله

- هههههه
ولو بعدني ما اعرف قصتچ بالضبط
بس كافي اني وانتِ خسرنا اهلنا واجينا للغرب نحتمي بيهم من اقرب الناس النة

- دعوفچ من هالحچي
گوليلي شلون اذا وافق صخر تظلين بجامعتچ
يعني اقصد وين راح تبقين طول هالسنة اكيد مو يم خالتچ ورجلها موجود

- هو اني ردت يم خالتي بس صخر ما قبل

- اي حقة
المفروض انتِ اصلاً متفكرين بهذا الموضوع بعد كل شي صار

- اووي والله ما ادري
هو گال انطيني فرصة افكر واذا لگيت حل اوافق

- شتگولين يفكر صدگ
لو يسوي روحة يفكر وبعدين يرفض بحجة ماكو حل

- ههههه
لا اني گتلة الخاطري وما اتصور اهون علي

رفعت المخدة ضربتها بيها
- شوفي الرجال شگد يحبچ وانتِ لاعبة بي طوبة

- ههههه
والله مرات افكر ويا نفسي
شلون حبني كل هالحب وشوكت لحگ واحنة ما صارلنة شهرين متزوجين

- وخلقنا بينهم مودة ورحمة

- ونعم بالله
وصدگ اني هم حبيتة بـ هالشهرين رغم كل ظروفي التعبانة

- امشي لازم نطلع
هسه الحجية تگب بوجهنا وتخليچ تكرهين الساعة الحبيتي بيها صخر واجيتي لهنا

- يبووو شگد تحب الشغل

- الشغل ميموت
بس لو تگدر تلزم لسانها عنة وتعاملنة مثل الاوادم چان احنة خير وبركة

- تدرين شنو
رغم كل عصبيتها ولسانها المنطلق 24 ساعة بس احسها طيبة كلش

- اي اني هم احس هيچ
بس المصيبة مزاجية ما تعرفين شوكت تگلب عليچ
ولو ما استغرب غير ابنها طالع عليها نسخة طبق الأصل سبحان الله

- إسحاق مزاجي ؟!!

- يووو
لا تعرفين احسن

الحجية هيله.. لچن يمگموعات
تجن اعلة شغلچن لا اطبن بالعصا ووين اليوجعچن

- ههههه
هاي شفتي ترزلنة

- ههههه
اي ولچ روحي قبلي سكتيها بين ما اجي

- ليش شعندچ

- اتصل على صخر

- ماشي يلا رايحة بس استعجلي

حچيتها وطلعت من الغرفة
چانت الحجية بالصالة بس شافتني استلمتني رزايل
شوية ولحگتني شمس اخذت المقسوم وياية بلعناها واحنة ساكتين

شمس.. مرت الأيام وصخر ما جاب سيرة جامعتي
ما ظل ع الدوام غير بس اسبوعين ورغم چنت مشغولة ويا ريحان بتحضيرات جهازها بس فكري كلة ويا هالموضوع

معقولة صدگ راح يسويها
ميتحرك ولا يهتم وعلى ساعة يفاجأني بسالفة نقلي ويخليني گدام الأمر الواقع

بيومها ما گدرت حتى اكل من التفكير
لليل اجة صخر انتظرت بفارغ الصبر نخلص هوسة العشى ورحت للغرفة ع السريع

چان گاعد يشتغل
سديت الباب وتقربت منة باوعلي بـ ابتسامة وگال شو جايتني اعلة وكت اليوم

- اريد احچي وياك بموضوع ضروري

- عرفت شني رايدة ما يحتاج تحچين

- يعني شنو فهمني
الدوام باقيلة بس اسبوعين وانت بعدك ساكت ليش

- وياهو گلچ آنه ساكت

بس حچاها ابتسمت
گعدت يمة وميلت راسي على چتفة شنو يعني افهم من كلامك راح تخليني ادوام ببغداد

- لساع جاي ادور اعلة مكان تگعدين بي

- يعني شلون تقصد قسم داخلي

- لا
بس حبيب گال اكو مجموعة من الطالبات مأجرات بيت ليم الجامعة

طلبت منة يشوفلي الموضوع
واذا رهمت وصرتي وياهن اخلي يأجر جارچ
خاطر تظل عينة اعليچ وما اشيلن همچ وانتِ بعيدة عني

- صدگ والله... وحضنتة حيل
شكراً صخر ما اعرف شلون اجازيك على كل شي دتسوي وياية

- آنه زلمتچ جوزي من هالخرابيط

- هههه
واحلى زلمة هم
اصلاً اني ما ادري شنو سويت بحياتي من خير حتى رب العالمين يجازيني بيك

- چا ياهي الگالت آنه انجبرت اعليك گبل مدة

- هاي شبيك
والله ما ادري شلون حچيت هيچ بيومها
بعدين هسه الوضع تغير كلش وشمس ما عادت شمس القديمة

- يعني ؟!!

- يعننني
رفعت ايدة من حضنة وخليت راسي على رجلة

هسه شمس حبت الحياة
وحبت الي حببها بالحياة وصارلها كل شي

اب
اخ
سند
ظهر
اهل
قبل ليكون مجرد زوج والسلام

فترة من الفترات حسيت نفسي وحيدة
انتهت حياتي ويا ما راحوا اهلي وعافوني حتى دراستي مچنت اريد اكملها

بس بعد ما تزوجنا
رجع طموح شمس القديم واصريت اكثر ادرس واصير لحد ما احقق الحلم الچان بابا يشوفة بية وبباقي اخواني

احچي وعيوني علي
فجأة دنگ باس شفتي برقة وگال آنه الچ اهل يابعد كل هلي وناسي

- احبك
اي اي لتباوع هيچ والله العظيم احبك واموت عليك يروحي انت

- شمس

- ها يعيون شمس ودنياها

- تحچين من گلبچ
لو عبن رضيت تدرسين ببغداد

گمت من حضنة اباوعلة بزعل
- شنو يعني تقصد اني مصلحچية موو

- لا آنه ما گلت هيچ
بس قصدي عبن فرحانة طلعت منچ هالحچايات

- اي طبعاً فرحانة
بس بيك صخر مو بغير شي

- جاي تصدميني يوم بعد يوم

- ههههه
ليش مچنت متصورني وكحة مووو... وغمزتلة

- هههه
لا موش قصدي
يلا عوفچ من هالسالفة وتعاي الحضني

- اممم
وشغلچ لعد شلون

- بوية يا شغل هذا
ليش آنه عندي شي اهم منچ بالدنيا

بس حچاها ابتسمت
گمت لميت غراضة وطفيت الضوة ورجعت تمددت بحضنة ظلينة نسولف شوية لحد ما نام قبلي

غسق.. مرت الأيام بهدوء
ماكو شي جديد وإسحاق مثل ما هو ساعة صاحي وساعة مغيم بدون سبب

جمار استعجل بالزواج
چان رايد يستقر ويا ريحان قبل دوامها لذالك ما طولت خطوبتهم غير شهر واحد

طول هاي الفترة
التهيت ويا ريحان بتجهيزاتها
إما جمار فـ الشيخ كلف إسحاق يساعده علمود يلحگ يجهز كل شي بظرف شهر

چانت عمة سكينة
كلما تطلع تاخذ وحدة من عدنة وياها
يا اني يا ثناء يا شمس ومرة وحدة اخذت هناء لأن مچانت تقبل تطلع لو ما جبرنها هي وخالة نجمة

قبل العرس بيوم
واگف إسحاق ع المرايا يرش عطر حتى يطلع دگ جهازة جاوب بـ ابتسامة

- هلا والله بالغالي
الحمد لله بس اعذرني امس ما گدرت اجيك عبن التهيت ويا جمار

شبي ابوي ؟!!
اي صح گال آنه كلفت الضبع خاطر يزفنهم

عليش !!
شني السالفة ايوب اول تالي ترد طلب الابوي

خايب كلها حباية براسيتول ويمشي الحال
اسمع والله آنه مالي غرض ذاك وينة الشيخ وامشي تفاهم ويا هاي عودن اذا دبرتها

شمالك سودنتني
بسك عاد احچي وينك خاطر اجيك ونتفاهم
ماشي ربع ساعة واصيرن يمك

اي اكيدن عندي شغل بس يتأجل لعيونك
ورحم الله ابيك الطيب ألف سلامة خويي ما تشوف شر

سد الخط ورجع للمرايا يمشط بشعرة
صرت ورى باوعلي والتفت ها خيرچ عندچ شي گبل لا اروحن

- اي

- چا ما تحچين

- اذا تسمحلي طبعاً
اريد ابات اليوم جوة بغرفة ريحان

- ليش ؟!!

- يعني مثل ما تعرف باچر زواجها و...

- اي صار معلوم
اعلة راحتچ بوية مثل ما تردين

حچاها وطلع ع السريع
لملمت الغرفة ونزلت يم البنات بقينا نجهز للعرس لحد ما صارت الوحدة

الكل راحوا ينامون
ظلينة اني وريحان نسولف چانت خايفة بشكل
حاولت اهديها على گد ما اگدر لحد ما غفت وعافتني

باوعت للساعة صارت فوگ الـ 2
متمددة بالفراش واتگلب اكثر من نص ساعة
ما ادري تعودت على إسحاق لو على مكاني الهيچ مداگدر انام بسهولة

هواي حاولت علمود اغفى بس لـ 3 واني منايمة
گمت لبست حجابي وصعدت فوگ فتحت باب الغرفة بهدوء لگيت إسحاق نايم

دخلت اتسحب حتى ليحس علية
وصلت للچرباية نزعت حجابي وتمددت بصفة
چان وجها علية شابك ايد بـ ايد ونايم بس ميشوخر الظاهر متعبان اليوم

قربت راسي من ايدة
هسه شيصير لو يفتحها وياخذني الحضنة
تقربت منة اكثر ردت اشتم عطرة بس طخيتة بالغلط گبل فز باوعلي بصفنة وراها سحب راسي ع صدرة

كلش خجلت
إسحاق ذكي متفوتة هيچ سوالف
يعني اكيد عرف اني شعندي صاعدتلة بمثل هالوقت

غمضت عيني بخجل
يلا صار الي صار شافني بعد وانتهى الموضوع
المهم اني هسه نايمة بحضنة مثل ما تمنيت قبل دقايق وكل شي غيرة يهون

دفنت راسي بصدرة عصرني حيل
سحب رجلي بين رجلة وظل يمسح على ظهري
چنت كلش تعبانة وفجأة حسيت بكل هالراحة لذالك گبل نمت

فزيت الصبح بعدني بحضنة
هو بالعادة يگعد لصلاة الصبح معقولة ما صلى اليوم لو صلى بس من رجع ينام حضني

رفعت راسي من صدرة فتح عينة گبل
بعدت نظري عنة ع السريع گتلة صباح الخير ورحت الحمام مالي عين اباوع بوجها بعد موقف البارحة

غسلت وطلعت لگيتة ديحچي بالتلفون
سحبت حجابي لبستة ورحت گعدت ود غيرتلها ونزلنة جوة

ريحان.. اليوم هو يوم زواجي
كل شي بهذا اليوم راح يتغير حتى ريحان

ما اعرف حياتي شلون راح تصير
واذا تغيرت هل راح تتغير للأفضل لو للأسوء 
بس كلي امل برب العالمين وبالتالي بجمار عبن هو اول رجال جبر گلبي يدگ الة ويوافق يشاركة الباقي من عمرة

بيومها النهار صار يركض سريع
رغم كل انشغالاتي بس عقلي ما تشتت عن التفكير بهاي الليلة وظل مركز بكل تفاصيلها

قريب الضهر جهزت نفسي للصالون
شكثر حاولوا ويا مرت عمي خاطر تقتنع يمكيجوني بالبيت حالي حال كل نسوان اخوتي بس ما رضت

اجت عمة سكينة اخذتني آنه وهناء
من وصلنة طلبت من ام الصالون تمكيج هناء هم
حاولت رادت ماكو مُصرة عمة تتمكيجين يعني تتمكيجين

للعصر اجة علينة ابن عمي
تلگني البنات من الباب دخلني للغرفة ولبسني البدلة البيضة

ثناء.. يلا بنات خلي نگفل الها شوية قبل لا انطلعها

شمس.. ههههه
شلون اني ما اعرف

غسق.. استقري بت اوربا
ما سامعة يعني باعراسكم عروستنا حديقة الورد بيهل ماخذها الشباب ومعتني بيها

شمس.. ههههههه
وهاي هم تسميها گفلة بشرفچ
بعدين احنة بـ اعراسنة كلة نجيب فيفي عبدة بغيرها منقبل

هناء.. حمت حمت طفنها يمعودات

ثناء.. هههههه
ولچن كافي هسه تجينا خالتي بالعصا
گاعدات تتشاقن والنسوان ينتظرن العروس بالصالة

هناء.. يلا آنه راح اگفل الها
عين الباردة كل الهلا بيها وعين الحارة الحمزة يطفيها

غسق.. وهاي الرادها وهاي التمناها بت الشيخ لابن الشيخ جبناها

نهلة.. وعيون الغزال عيون چنتنا صلوا ع النبي والصيدة صيدتنا

هناء.. سبع ساعات بالصالون لا تلعب بگذلتها

نهلة.. سون درب لاخت الولد خلنها تلعب جولة

شمس.. جبناها مجهزة هي وشهادتها

هناء.. اوووي تعلمن الكياتة تعلمن

ثناء.. ههههه
وكت شهادة ولچ والله عندچ سوالف

غسق.. لا لا اسمعن هاي
وام العروس نايمة ومنشولة وام العريس ترگع الهلهولة گلللللللللوووووش

ريحان.. هساع تجيچ امي والله هههههه

ثناء.. يلا كافي
بارك الله بيچن ما قصرتن نردها بعرسچن ان شاء الله

غسق.. اول وحدة انتِ

ثناء.. يمة اني ابدل حنظل إلا تخبلت

امل.. نجييييبة

هناء.. هههه شوفن هاي شگد خبيثة

ريحان.. يلا ولچن گومني

هناء.. گومنها خايبات شبيچن البت مستعجلة

شمس.. عزززة
شوف هاي شلون عينها طالعة الله يساعدك صهيب

غسق.. رادت تحچي هناء سكتتها
يلا يلا ارگعن الهلاهل وگومن ريحان ع السريع
ألف الصلاة والسلام عليك يا حبيب الله محمد صلووووووات

هناء.. گللللللللللللللوووووووووش

شمس.. خوش تهلهلين بت نجيمة

هناء.. احسن منچ يالمايعة

غسق.. ههههه
ولچن كافي راح ابچي والله

دفعتهن برة بالگوة
گعدنا ريحان بالصالة وبدت الحفلة قريب الخمسة

حيل تونست بيومها
يمكن لأن اخذت عليهم وخف الخجل شوية بحيث حتى رگص رگصت ويا البنات

بعد الصلاة اجة جمار
اباوع علي ما منطي فرحتة لأحد
اما ريحان تريد تطب ببدلتها من الخوف وهو هم قدر وضعها لذالك ما حچة اي شي وياها

اول ما طلع رحنالها اني وشمس
اباوع عليها ايدها ترجف وحتى لونها تغير رغم المكياج بس گدرت الاحظ هالشي بسهولة

غسق.. شبيچ ريحان اهدي

ريحان.. ريگي يبس ولچن بس لا صعد سكري

شمس.. ادري شجاچ
ترى الشغلة كلش سهلة غمضي فتحي تلگيها صايرة

غسق.. باوعتلها بطرف عيني
لا والله خبرة ست شمس منو يلحگچ بـ هالسوالف

شمس.. اسكتي ولچ مو وكتها
حبيبتي ريحان استرخي وفكري بشي حلو مثلاً اليوم راح تنامين بحضن جمار ولو اشك يخليچ تنامين ههه

غسق.. عود دتهديها
خوفتيها بالاكثر من ثول الثولچ

ريحان.. سكتن خايبات سكتن خلني اركز

شمس.. بشنو تركزين ؟!!
عززززة بس لا دتتخيلين الوضع قبل حدوثة

ريحان.. غسسسق
اخذي هاي من گدامي لا اگومن امرعدها

غسق.. شمس كافي شلون تالي وياچ

شمس.. يلا يلا سكتت
رايحة اجيبلها ماي خطية راح تموت من الخوف

ريحان.. ظليت گاعدة على اعصابي
بعد الصلاة بساعة صارت الزفة طب جمار گعد قريب العشر دقايق وراها طلعوني

صعدني بالسيارة وراح
چانت عمة سكينة گاعدة بالصدر الجو كلش حلو بس من التعب احترينا

صاحت على ايوب يجي يشغلنا التبريد
صعد بالسيارة سلم على عمة وراها گال بدون ميدور وجها علية

- ألف مبروك ريحان

- الله يبارك بيك خوية

- يمتة نمشي ضبع كلش حارة

- هساع عمة
بس خلي جمار يسلم اعلة جماعتة والنسوان يصعدن بالكوسترات وتالي نتحرك ان شاء الله

حچاها ونزل من السيارة
اقل الخمس دقايق اجة جمار اول ما صعد لزم ايدي خلاها بحضنة وهمس بصوت هادئ احبچ ريحان

ابتسمت بلاية ما اجاوبة
چان ابوي واگف قريب على السيارة
شوية وصاح تحرك يالضبع رفع ايدة سلم علي ومشينا

هناء.. طلعت للزفة متأخرة
چانت عباتي ضايعة شگد دورت عليها ماكو
اخير شي لبست عباية امي ورحت همزين عاد آنه وياها نفس الطول

فتحت باب الشارع هدوء
شنو يعني معقولة مشوا وعافوني ؟!!
ضجت كلش اجيت ابچي إلا شوي بعدني ما سادة الباب شفت الولد اجو من بعيد

درت وجهي خاطر اطبن صاحني صهيب
اجوي اخوتة سلموا علية وطبوا ظلينة آنه ويا واگفين بالممر الوحيدنة

- شني الموگفچ هنا

- طلعت علمود الزفة بس ما لحگت

- والله بوية زين من ما لحگتي

- ليش ؟!!

- شني لييش
تنوعتي الچهرتچ بالمرايا گبل لا تطلعين بهذا المنظر

- اذا قصدك ع المكياج فهذا عرس
شني يعني تريد اصخم وجهي بصخام الجدر واطلع للوادم

- لا تعلين حسچ هنااااء

باوعتلة ضايجة
درت وجهي عودن جاي اروح دست على رجلة بالكعب

ظل يصيح وراي بس ما اهتميت
طبيت اركض گعدت يم امي عبن ما يگدر يسوي شي وآنه بصفها

دخل باوع علية بعصبية
نزلت راسي اضحك شگد چنت مقهورة بس تونست على ضوجتة خلي ياكل شوي من الشي السوا بية گبل مدة

غسق.. رجعنا من العرس هلكانين من التعب
اخذت ود وبوجهي صعدت الغرفتها بس غيرت ملابسها نامت بسرعة

طلعت منها رجعت الغرفتي
فتحت الباب چان إسحاق موجود
گاعد يم الميز واللابتوب گدامة بس شافني گال تعاي بساع

- خير

- غسسق وتالي

- زين بس خلي ابدل ع الاقل واجيك

- لا اجلي التبديل البعدين وتعاي جاري بساع

تقربت منة بخوف
شيريد مني شكلة ضاملي مصيبة وراح يطلع الونسة التونستها بعرس ريحان من خشمي

چان اكو قرص ع الميز
طلعة من غلافة وحطة باللابتوب
گام من الكرسي سحبني من ايدي گعدني بمكانة وشغل القرص

شگد رسم عقلي شغلات ممكن اشوفها بي
بس ابد ما تصورت ولا حتى خطر على بالي الشي الچبير الي شفتة ساعتها بداخل هالقرص الصغير.....

يتبع

لتنسوون ⭐⭐⭐⭐⭐⭐