رواية وضاقت الأرض بي الفصل الرابع والستون 64 - بقلم لبنى الموسوي

#وضاقت_الأرض_بي

للكاتبة #لبنى_الموسوي

انفتح باب البيت بـ هالأثناء
گلبي صار يدگ سريع واگفة بالغرفة اترقب ردة فعلة من يدخل ويشوفني بـ هالمنظر

جريت نفس اقوي روحي بي
غمضت اعد الثواني القدومة انفتحت الباب وطب
للغرفة باوعت علي
صافن بصدمة ويباوع علية من فوگ ليجوة

رسمت ابتسامة كاذبة على وجهي
احاول اخفي بيها ولو جزء من الخوف الحسيت بي ساعتها

سد الباب وتقرب مني
صارت نظراتة تتجول على معالم جسمي وترجع تبحر بأنهار الدموع الي تجمعت بعيوني

گلبي فتح ابواب ضلوعي وغادر صدري مباشرتاً
اي اني رايدتة اعترف
بس ليش كلما يتقرب مني احس وكأنما گاعد انجبر علي وراح يعاشرني بالأكراه

سحب ايدي الچانت ترتعش بوضوح
رفعها الوجهه
قبلها اكثر من مرة واحتضنها بين ايدة
تماماً مثل ما يحتضن الأب ايادي صغيرته ساعة الخوف

- بردانة حبيبتي

هزيت براسي اي
هو صح الجو چان بارد بشكل بس ما حسيت ببرودته

القلق العشت بي بـ هاللحظات
شعل بركان من الخوف داخل روحي
وهالبركان كان كافي حتى يطفئ ثلوج الدنيا ويسكن رياحها

احتضن وجهي بـ ابتسامة
وفوراً نزع سترتة شمرها على اكتافي
بوية عليش متفرعة هيچ شني بايعة رويحتچ يعني

- لا ترى جو الغرفة زين لأن مشغلة التدفئة

- من ساعچ تگلين برد

بعدت نظري عنة فشلانة
اسكتي غسق
بروح امچ اسكتي ترى انتِ مو گد إسحاق واقل كلمة ممكن توگعچ بذكائة

- اي شني ما راح تعشيني اليوم

باوعتلة مصدومة
هذا صدگ يحچي مو حتى كعب لابستلة شسوي بعد حتى توصلة الفكرة

ابتسم ونزع ملابسة
اني هم شمرت سترتة ع الچرباية ونزعت الكعب

باوعت علي
تمدد ع الچرباية وغمض عيونة
اجيت اتعارك ويا بس الحمد لله لزمت اعصابي على اخر لحظة

طلعت من الغرفة ادردم ويا نفسي
وين تريد توصل إسحاااااق مو صارلك يومين تلعب على اعصابي ببرودك هذا

لا وفوگاها يريد اسويلة عشى الأفندي
انتِ هم ثولة چان بدلتي قبل لتطلعين قابل تحمسين بصل بهالفستان غبيييية

وصلت للمطبخ دفرت الباب برجلي
من قوة الضربة رجعت علية انفشخت براسي
دنفتحي اااااااانتِ لا تصيرين مستفزة مثل صاحبچ

اخ يا ربي ااااخ... وعضيت اصبعي حيل
اااني ما عاولي شجعت نفسي بالشافعات تاليها الأخ خرب الأول والتالي

اجيت ابچي إلا شوية
باوعت للثلاجة حايرة هسه شسوي اكل مو والله راح اااطگ من قهري

فجأة اشتميت ريحة مو غريبة
التفتت اكو علاگة ع الميز رحت ركض فتحتها جايب ويا مشاوي

عاد همزين سوة شي بي خير
جهزت الصينية ع السريع وطلعت لگيتة گاعد بالصالة ع الأخبار

مستحيل يشغل التلفزيون ويتفرج غيرها
مرات احسة مو قاضي سياسي گد ما مركز بالأخبار ليل ونهار

حطيت الصينية گدامة ودرت
ردت اروح بدون كلام سحبني من ايدي گعدني بصفة

- اني ما اريد اكل شبعانة

- لا تاكلين وياي اعلة الواهس

- زين بس خلي ابدل هالملابس ع الأقل

- لا تغيرينها خليچ

حچاها وگام للغرفة
ثواني وطلع بـ ايدة سترتة الچان لابسها شمرها علية ورجع گعد بصفي

بدا ياكل واني صافنة على وجهه
رفع نظرة علية من شافني صافنة سوة لگمة وخلاها بحلگي

ظل يوكلني لحد ما معدتي تأذت
خلص العشى گام غسل وصاح فستقة سويلي چاي

اخذت الصينية شمرتها ع الميز
مو مال اغسل مواعين واني بذني الملابس
عود بعد شوية اغير الفستان وارجع انظف المطبخ

سويتلة چاي وطلعت
ماهو بالصالة رحت للغرفة لگيتة ديحچي بالموبايل ويا صخر

سأل عن ود وفصل الخط
قدمت الچاي گدامة وگعدت ع الچرباية
لميت رجلي على جسمي وحضنت نفسي بـ ادية حيل

هه والله يا غسق
قبل شوية چنتي ترجفين خوف مجرد شفتي إسحاق گدامچ

وهسه گاعدة مقابيلة
تتمنين من عندة الكلمة وتنتظري
شوكت يحن عليچ ويحس على دمة ويتمم زواجكم

دقايق وهو مو يمي
يشرب چاي ويتصفح بموبايلة ضجت كلش
لا شنو ضجت دخنت اصلاً

گمت من مكاني للكنتور
طلعت نفس ملابسي وسديت الباب توني دايرة صار إسحاق بوجهي

سحبهن مني شمرهن بالگاع
باوعت علي حاصرني بـ ايدة ما ادري ليش فرحت

دنگ علية باس مقدمة چتفي
گبل غمضت عيوني
اجاني صوتة يحچي بهمس لساعچ خايفة رويحتي

باوعت علي بصدمة
رفع راسة مبتسم وباسني من خدي بوسات مينعدن

معناها وصلة خوفي
واكيد هم عرف سبب هالخوف
زين لعد ليش تعامل وياية هيچ وهو رايدني مثل ما رايدتة واكثر

قاطع تفكيري
ببوسات هادئة وخفيفة على شفايفي
احتضن خصري وقربني علي حطيت ايدي على رگبتة تعمق بالبوسة اكثر

انسجمت ويا بأول ثواني
بادلتة المشاعر بدون خوف بدون خجل بدون حواجز
فجأة بدت تظهر علية الأعراض

قاومتها وراح اظل اقاوم
فتحت عيني اباوعلة ما اريد اغمض واتذكر لمساتهم القذارة واتخيلهم گدامي

ابتعد عني
وكأنه ديخفف من الضغط النفسي العشت بي ساعتها

سحبني للچرباية نومني وطلع من الغرفة
بقيت اباوع ورى
دقيقة ورجع بيدة اللابتوب
ربط الموبايل علي وشغل موسيقى رومانسية وهادئة بشكل

خفض الصوت ع الأخير ورجعلي
تصرفاتة غريبة كلش معقولة ديحاول يساعدني حتى اتخلص من شبح مهيمن المتلبس بعقلي

رجع يبوس بية بحب
وويا كل بوسة يطبعها يحچي كلمة شكل
احبچ بنيتي مريتي صديقتي رويحتي حبيبتي دنيتي وكل ناسي

ركزت ويا كلامة فرحانة
صوت الموسيقى ويا كم الحب العظيم القدمة الية إسحاق اخذني العالم ثاني 

عالم مابي غير هو وبس
بعيد عن كل الذكريات الي تهيج بصدري المواجع كلما مرت على بالي

انسجمت ويا بشكل
بادلتة ذات الحب واللهفة بعيون ما فارقت ملامحة ولا لحظة وحدة 

صار يتجرأ وياية بس بحذر
كل هذا واني سارحة بخيالي ويا وحدة
باوعلي بعيون ذبلانة وهمس بصوت فاتر جداً يشرح بي راحتة للشي الديصير ويانة

- آنه ياهو فستقة

- إسحاق
- وبعد
- حبيبي
- وبعد
- حياتي وكل شي حلو صار وياية
- وبعد
- ابوية الما تذوقت طعم الحنان إلا باحضانة الدافية
- وبعد

باوعت علي مبتسمة
- رجلي وحلالي اليملك حق على كل شبر بجسمي

الأنسان الوحيد الما اخاف ويا
الي قربة بالنسبة الي جنة وبعدة عني نار وجحيم

- وآنه رايد احضى بدخول هالجنة لكوني

حلالچ
زلمتچ الـ الله باركلة بيچ وبارك ليچ بي
نفسچ (ومن اياته ان خلق لكم من انفسكم ازواجاً لتسكنوا اليها وجعل بينكم مودة ورحمة)

بلاية خوف
بلاية توتر وقلق
بلاية تفكير بالماضي عبن الصار وياچ شي والراح يصير هساع شي اخر ما يشبها كلش

هزيت براسي اي
باسني من شفتي بلهفة گبل احتضنت راسة بـ ايدية حيل

چنت بقمة السعادة
لحظات بسيطة بمشاعر عظيمة
عرفتني على رجال غير الرجال العاشرتة بالـ 4 سنين الراحت

رجال يحب بجنون
حنين على البنية البين ايدة مثل حنية الأب على بنتة

طيب بشخصيتة
مثل طيب النظر لأنهار الجنة العذبة والتركيز الشديد بتفاصيل جمالها

حاول بكل ما عندة
لحد ما جبرني ابحر ويا ببحر الحب
وارفرف بحدود ارضة بجناح العصفورة الما تقبل بغير الحرية وطن الها

وبعد المحاولات الطويلة
همس بـ اذني خليچ وياية لتغمضين رويحتي كل هذا حتى لا اتذكر الماضي

وفعلاً ركزت ويا
بس كابوس ذولاك الأنذال
چان اقوى بهواي من حب ولهفة إسحاق ومحاولاتة الغير محدودة

من تقرب مني تذكرتهم
گمت المس بحركاتة صلافة مهيمن وابتسامتة بيها شي من ابتسامة حسن المستفزة

اما لمساتة
هي نفسها لمسات علاء الي لوثت جسمي بذاك اليوم المشؤوم

انعاد شريط الحادثة گدامي
مقيديني ويحاولون ينتزعون شرفي بكل خسة
واني ما عندي غير صوتي المبحوح استنجد بي عسى ولعل احد يمر صدفة ويخلصني منهم

ريحتهم كفخت بخشمي
سيطرت على حاسة الشم عندي
الى ان تلوث عطر إسحاق بيها وصار يخنگني بقذارة

حاولت ابعدة عني ما استجاب
بچيت نزلت دموعي بحرگة بست ايدة وتوسلت بذل كل هالشي ما شفعلي يمة

توجعت بنفس وجع ذيچ الليلة
الوجع الأكل بجسمي سنين مو يوم ويومين ولا شهر وشهرين

صرخت بكل صوتي
بعد ما حسيت علي ارتاح وياية بنفس الراحة الي هم ارتاحوها بية

- الله ياخذك وخررررر عننننني يااااا حقييييير

بعدة ممبتعد استفرغت
على روحي وعلي وع الدنيا كلها
هنا بالذات الموت چان اهون علية من هيچ لحظات

گبل گام من فوگاية
رفع راسي غصيت حتى بخشمي طب
اريد اتنفس ماكو اريد اگلة وخر ما طايقتك ما بية

لا اشوف گدامي ولا احس بشي بعد
دموعي تارسة گلبي قبل عيني والغصة حاجبة الهوى عن صدري ومانعة النفس يدخلة

اتمنى امحي هاليوم من حياتي
ابد ما تفرق شي عن ذيچ الليلة السلبوا بيها مهيمن وجماعتة شرفي

اثنينهن بنفس الوجع ونفس حقارة الشعور
بـ هاليومين چان بيني وبين الموت شعرة وحدة
لكن روحي ابت ان تفارق جسمي وتريحني

سحب الكلينس يمسح بوجهي
احس الحرارة تجمعت بأذني ولزمني وجع مو طبيعي

وجع ما اگدر اوصفة
سيطر بصورة سريعة على عقلي
واكتسح عظام جسمي عظمة عظمة وكأني طالعة من حادث مميت

رجعت استفرغ يريد ياخذني للحمام ماكو
حاول يشيلني تهسرت
صرت ادفرة برجلي حيل خوفاً من ان ارجع واعيش الشعور مرة ثانية

- بوية اهدي
ما گرب صوبچ بس خلني اخذچ للحمام

- وخر عني وخررر وخرررررر
الله ياخذك يا حقير
توسلت بيك ترجيتك حتى ايدك بستها كل هذا وما اااهتميييييت

حچيتها وسحبت الچرچف علية
تغطيت بي بالگوة
كل جسمي ينفض تماماً مثل السعفة الـ لاحتها رياح الخريف العالية

ما تقرب مني
لبس ملابسة وظل واگف گبالي
ابد ما باوعتلة مدنگة وحاضنة جسمي بيدي الترجف

خايفة بشكل
بالضبط نفس الخوف الچنت احس بي بطفولتي لو تفرجت على فلم رعب

فجأة نزل شي على ايدي
ما ادري شنو هو او بالأصح ما اريد اعرف شنو
گبل إسحاق صرخ بية

- غسق گومي خشمچ جرة ددددم

راد يرفعني سحبت ايدي منة
- ضغطچ صعد غسق اترجاچ لا تعانديييين

حچاها وشالني الحضنة
تخبلت ملابسة شي وريحتة مو بس تلعب روحي لا تطلعها من جسمي هماتين

صرت اصرخ حتى ما حاول يسكتني
شگد دفرت بي بس ظل مقاوم ثگل جسمي لحد ما وصلني للحمام

گعدني ع الصبة وفتح الماي
فجأة نزلت چبدة دم من خشمي هو شافها لو تخبل

ذب الماي على راسي وطلع
اريد اگوم اقفل الباب ما اگدر بعدني ما گايمة رجعلي

يمكن انطاني حباية ضغط
بلعتها بالگوة بلعومي متعگد شال الماي راد يذب علية لزمت ايدة وبچيت

- الله يخليك اطلع وعوفني

- هساع راح امشي بس خلني اسبحچ

- اني اسبح بس اطلع ابوس ايدك روووووح

باوعلي بنظرات غريبة
دار وجهه راد يطلع رجع بخطواتة
سحب المفتاح من الباب علمود لا اقفلها على روحي وخلة وراح

سندت جسمي ع الحايط وگمت
سديت الباب ودفعت شكو شي بالحمام عليها حتى القدح وكأني خايفة لا يرجع ويطب علية

درت وجهي رفعت الماي لعبت نفسي
رجعت استفرغ ما ظل بمعدتي غير ماياتها من گد ما استفرغت صارت توجعني

ما انسى ذاك المنظر
اتقيء وخشمي ينزف بحيث بلعت الدم واني احاول اسحب النفس الصدري

اريد ارفع الماي اغسل ما اگدر
ايدي ترجف وجسمي ينفض بشكل مو طبيعي
حسيت بذل كل عمري ما حاسة بي حتى بذيچ الليلة

رفعت راسي صرخت بكل صوتي
يااااااااا الله ساعدني ياااااا رب

عيوني مغوشة
بالگوة لمحت شي بالرف باوعت بنظرات سيطر بيها علية الشيطان

گمت اسند بنفسي مثل الحامل جبل على ظهرة
سحبتة چان سم حشرات
من الرجفة وگع من ايدي بالگاع اني هم وگعت ورى

ما ادري شنو صار
يمكن فقدت الوعي الثواني
لأن محسيت إلا واني متمددة بالگاع والسم بصفي

رفعت راسي بتثاقل
وبعد محاولات تسحب روحي التعبانة من جسمي گدرت اعدل گعدتي

اريد افتح القبق ماكو
ما عندي لا طاقة ولا قوة بـ هاللحظات الريشة احسها اثقال بـ ايدي

حاولت هواي الى ان انفتح
غمضت عيني بيأس
ادعي رب العالمين يسامحني على هالدقايق الچنت بيها بلا وعي

اكو صرخة بية طلعت ليبرة
من قوتها الصدى رجع علية قيد مسامعي
على اثرها اندفعت الباب بقوة وطب إسحاق يركض

گبل دفر السم من ايدي
لزم زندي يخضني حيل حتى يصحيني
غسق شربتي غسسسق حاچيني شررررربتي لو لاااااا

هزيت راسي اشهگ بحرگة
حضن وجهي على صدرة يقرا المعوذات بصوت عالي

بالبداية لعبت روحي ورجعت تقيأت على ملابسة
بس من وصل الأية الكرسي
هدأت بشكل عجيب واستقريت بداخل حضنة بدون اي حركة

ظل يردد ايات قرأنية بصوت عالي
من الراحة يمكن غفيت فتحت عيني اني ع الچرباية وحتى ملابسي ملبسنياها

باوعت ماهو يمي
التفتت ع الفرشة مغيرها وحتى المخاد مو نفسهن

ردت اگوم طب بـ ايده الحليب
ما رفعت عيني علي
بعد ما هدأت شوية راح الخوف وما ظل غير الخجل المسيطر علية

تقرب گعد يمي ورفع وجهي باطراف اصابيعة
بس صارت عيني بعيونة بچيت
مسح دموعي وباس راسي وراها حضني انهاريت اكثر

ما حچة اي شي
خلاني ابچي لحد ما ارتاحيت
بعدت عن حضنة امسح بدموعي ونظري على ايدة ما عندي جرئة اباوع لعيونة

- اسفة إسحاق... رجعت بچيت

- آنه الأسف بوية
وروح شكو غالي اعلة گلبي متوسد تحت الترب ما
گصدت ولا چنت گاصد أأذيچ

ولون اعرف راح يصيرلچ كل هذا
ثقي بالمعبود ما چان گربت صوبچ وغلاتچ عندي

- لتعتذر الغلط بية مو بيك
مو قصدي اتجاوز وارفع صوتي بس مچنت بوعيي

حاولت هواي ما افكر بس فشلت
شفتة بيك ولـ هالسبب غلطت وانهاريت مو بـ ايدي

والله إسحاق مو بـ ايدي
وتراب امي الغالية كل شي صار وديصير وراح يصير وياية مو بـ ايدي مو بـ ااااايدي

حچيتها وانهاريت بالبچي
گبل سحب راسي الحضنة وصار يمسح على ظهري
صرخت من كل گلبي

- الله ينتقم منك مهيمممممننن
الله يراويني بيك يوم اسوء من يوم شجن ع المر العيشتني بي

بس حچيتها شد قبضتة على ظهري
انتبهت على نفسي وانسحبت من حضنة باوعت علي عيونة دم من العصبية

ما ادري اضوج منة لو علي
لو ازعل على نفسي الماكو كلام يواسيها بهاي اللحظة بالذات

سحبت الغطا وتمددت
گام من يمي طفى الضوة ورجع حط ايدة على بطني بس بدون ميطخ جسمي بجسمة

ظل بعيد حاضني بس بـ ايدة
كابوس الي صار وياية اليوم ما فارق مخيلتي على مدار اكثر من ساعتين

جزع الصبر ودموعي ما جفت
من وجع وقهر گلبي
گلت بداخلي راح انام نومة ابدية ما اگوم منها بعد

صحيت الصبح على وجع ياكل بروحي
حلگي يابس وريگي ناشف
اما جسمي يهتز بالبرد رغم صاير بركان من الحرارة

فتحت عيني إسحاق فوگ راسي
بالگوة استوعبت ديسويلي كمادات رجعت نمت عسى ولعل اهرب من الواقع بهاي الطريقة

سمعت حسة ديصحيني
باوعت للساعة صار الظهر واني بعدني نايمة بكل شي ما حسيت

سحبني من ايدي عدل گعدتي وطلع من الغرفة
شوية ورجع بـ ايدة صينية
بيها شوربة واكلات اشكال الوان مبين موصي عليها من المطعم

جبرني اكل وراها انطاني علاج
دگ الجهاز بجيبة
باوع للشاشة ورجع باوعلي غمضت عيني حسيت علي طلع من الغرفة

المرض هاد حيلي ومگاعد يخليني افكر بشي
رجعت للنوم زارتني امي بمنامي
واگفة من بعيد تباوعلي بابتسامة عجيبة فجأة بچت

گمت تمشيت الها
حسيت بثگل مو طبيعي يمنعني اتحرك براحة
باوعت على نفسي حامل ؟!!

رفعت راسي عليها ابچي
مدت ايدها علية مسحت دموعي واختفت من نظري

فزيت من الحلم مرعوبة
ليش ما حچت
ليش هيچ راحت بسرعة واني صارلي اكثر من سنتين مشايفتها بمنامي

طب إسحاق على صوتي
من شافني بـ هالحالة گبل اجة حضني
ظل يمي لحد ما نمت ما حسيت إلا على صوت ود دتضحك بالصالة

ردت اگوم ما گدرت
عشر دقايق وانفتحت الباب طبت شمس بيدها الأكل

- خوفتيني عليچ يولي

- شوكت اجيتي

- العصر
إسحاق اتصل بصخر وجابني يمچ

شصار يمعودة
شمرضچ هيچ بس لا سبحتي وطلعتي مبللة

هزيت براسي اي وبچيت
اجت حضنتني وظلت تسأل شصار وليش دتبچين

ما گدرت احچي
اصلاً ماكو شي ينگال بمثل هالموقف
مسحت دموعي ووكلتني شلون مچان وراها انطتني العلاج

رجعت راسي ع المخدة وغمضت
فجأة تذكرت ود باوعت على شمس بنتي وينها شلون عايفتها وحدها

- لا مو وحدها إسحاق گاعد يمها

- وصخر

- هم موجود
غسق شبيچ احچي ترى اني اختچ

- ما بية شي غير المرض

- شغلتكم صارت

- اي صارت بس بصعوبة

- يعني بسببها وگعتي هيچ وگعة

- هي احد الأسباب

- يلا المهم صارت
واذا ع المرض ان شاء الله باچر تگعدين ما بيچ شي

ظلت بليلتها يمي
هي نامت وياية بالغرفة وصخر يم إسحاق بالصالة

ثاني يوم شوية تحسنت
عرفت من شمس باچر يرجعون للبصرة
گمت من مكاني ذبيت الحجاب على راسي وطلعت للصالة

إسحاق گاعد يباوع اخبار ويا صخر
بس شافني گام بسرعة ها بوية بشري شلون صرتي

- الحمد لله احسن
إسحاق باچر اريد ارجع ويا اخوك ومرتة للبصرة 

- عليش مو آنه اتعطل هنا غسق

- اعرف والله بس صدگني محتاجة ارجع لهناك

- ماشي بوية اعلة راحتچ مثل ما تحبين

بس حچاها رحت للغرفة
طلبت من شمس تجمع غراضي وهم رجعت تسألني شكو وشعندچ جاية وعايفة رجلچ هنا

بالگوة سكتتها
ثاني يوم گعدت حرارتي شوية احسن
طلعت لگيتهم ديتريگون بالصالة گام إسحاق گعدني يمة وجبرني اكل

ربع ساعة وگال صخر استعجلن يلا
رحت غيرت ملابسي دالبس بالحجاب طب إسحاق يباوع علية بحدية

مشاعري ماتت من الليلة الجمعتني بي
من اباوع لعيونة ما اشوف غير بشاعة الموقف الصار بيناتنا

سحب محفظتة من الميز
انطاني فلوس وصاني على نفسي وود بدون ميحچي شي متعلق بينة

بثمانية ونص طلعنا من بغداد
بالطريق الخارجي صخر تعب عندة شقيقة وفجأة هاجت علي

وگف السيارة على صفحة وفرك راسة حيل
بالگوة شمس قنعتة تسوق بمكانة
وافق لأن الطريق خارجي وما بي بشر مجرد وصلنا لحدود البصرة نزلها وساق هو

طبينا للبيت مابي روح
هناء وريحان كلمن بغرفتها وباقي البنات ملتهيات بالشغل بس الحجية وعمة گاعدات بالصالة

صعدت الغرفتي فتحت الباب وطبيت
باوعت عليها ما ادري ليش احس بالراحة هنا يمكن لأن اعتبرها بيتي الوحيد

ظليت بيها للمغرب
سمعت الأذان گمت حتى اصلي اندگت الباب
فتحتها چانت عمة صبيحة باوعت علية بخزرة وگبل دفعتني ليجوة وسدت الباب

- ها عمة شبيچ

- انتِ الشمالچ
الوجه اصفر والعيون ذبلانة والبال شارد بغير مچانة

- مريضة غير

- لالة مو شغلة مرض آنه اعرفنچ عدل

باوعت عليها بـ استسلام
- اي عمة صح هاي حالتي سببها إسحاق

اني ويا صرنا رجال ومرة
بس للأسف دفعت ثمن هالشي صحتي وكسرة نفسي

- اخذچ يعني

- اي

- تعاي لية تعاي

حچتها وسحبتني للچرباية
جبرتني اسولف الها كل شي وراها صارت تنصح بية عسى ولعل اطلع من حالتي هاي

بس للأسف كلام الدنيا كلة ميقنع عقلي
هالعقل المريض بالماضي بمرض خبيث مالة اي علاج غير المعجزة

عافتني بعد ساعة من النصائح
گمت توضيت وصليت داقرا قرأن طبت ود بـ ايدها موبايل ريحان

- ماما هذا بابا يريدچ

بستها من حلگها واخذت الموبايل
ما عافتني ظلت گاعدة بحضني ورافعة رجلها على ايدي ابتسمت وگرصت خدها حيل

- الووو

- ها بوية شلونكم

- الحمد لله بخير

- اكلتي شي نمتي صليتي

- لا ما نمت
بس اكلت وصليت وهسه گاعد اقرا قرأن عود بالليل انام

- غسق بذيچ الليلة آنه....
قاطعتة بسرعة

- إسحاق فدوة
ابد ما اريد احچي بيها هسه اجل كلامك البعدين

- ماشي بوية
ديري بالچ اعلة رويحتچ ونامي عدل ما اوصيچ بعد

- وانت هم

- لون اعتازيتي الشي دگي اعلية يمتة ما چان

- ان شاء الله

سلم وراح
ادري بنفسي اذيتة وياية كلش بس والله مو بـ ايدي

بيومها من التعب نمت اني وود من وكت
الصبح گاعد اتريگ
اجت شمس تعتب لأن إسحاق منطي فلوس الملابس الجهزتني بيها الصخر

- ههههه
يا ولچ هاي شبيچ اني شعلية حتى ما گتلة

- والله عيب قابل بيناتنا هالسوالف

- ميخالف اخذيهن ميصير تردي

- لا والله ولا اخذهم
هاچ... وحطتهن بحضني
اعتبريهن نگوط عرسچ وألف مبروك منة المال ومنچ العيال ان شاء الله

ردت حاولت ما قبلت تاخذهن
صعدت الغرفتي
حطيتهن ع الميز گلت من يجي إسحاق ارجعهن الة

اسبوعين وهو ماكو
بس يتصل يوميا يسأل علينة دقيقة ويسد الخط

خلصت العطلة ورجع الدوام
حسيت بنفسي بديت اتحسن وارجع شوية الطبيعتي بس الأهم من كل هذا صرت اشتاقلة كلش

اول يومين ما داومت
ثالث يوم ريحان گالت اكو عندي مشكلة بالدرجات خلنة نداوم

اتصلنا على ايوب واجانة من الصبح
وصلنا للجامعة راجعت وياها صححنا الدرجات وراها اخذتها القسمها ورجعت الكليتي

ريحان.. حضرت محاضرتين
وطلعت ويا زمليتي للحديقة نرتاح شوي البين ما يخلص الريست

عافتني هناك وراحت تجيب النة لفات
الدنيا ظلمة بعيوني كل شي ما اتنوع مجرد بس حس الطلاب اسمعنة يمي

شوي ووحدة صاحت ريحان
رفعت وجهي ويا مصدر الصوت نعم ياهي وياي

- آنه صديقة غسق
خطية وگعت بالقسم ما ادري شبيها يمكن صار عدها ضعف لو ضغطها هبط

بس سمعت هيچ گمزت مرعوبة
- وين هي هساع ااااحچي

- بشعبتنا والبنات يمها

- اخذيني ليها عفية ولو اسوي اعليچ زحمة

- لا بالعكس ماكو اي زحمة حبيبتي

لزمت ايدي وتمشينا
الدرب شطولة ما يرضا يخلص
وآنه گلبي شاعل نار على غسق الي مدة احسنها مو على بعضها

شوي وسمعت صوت السيارات يمي
هاي شني طلعة برة الجامعة
ماكو جواب فجأة انسحبت الداخل السيارة وانقفلت الباب بالعجل.....

يتبع

لتنسووون ⭐⭐⭐⭐⭐⭐
كل الحب ❤🥀