رواية وضاقت الأرض بي الفصل الرابع والتسعون 94 - بقلم لبنى الموسوي

ولدتُ حرة أبية، امرأة تعزف على قيثارة الحياة أنغام الحرية، حتى كبلوها. طارت النوارس حولها، فـ طاردتها الذئاب. إلى أين تهربين؟ التفتُّ إلى عوائهم، فـ نظرتُ حولي خائفة. ها هي السبل قد انقطعت الآن، وضاقت الأرض بي بما رحبت، فـ باتت الحرية مقيدة لا زمان لها ولا مكان.

ها قد كبلوني، اغتصبوني، غسلوا عاري. سيطر عليهم الشجع لـ مالي، حقدهم الدفين جعلهم ينتقمون من براءتي. مات أبي، استغلوا ضعف حالي، أجبروني حتى تأقلمت مع حياتي. فـ إليكم التالي: زواج بلا إنجاب، ثم زواج مع إنجاب راح ضحية لزواج آخر. رجلٌ مجرد من الرجولة، أصبح لعبة بـ أيدي شياطين البشر من أهلهِ. حياة طيبة هُدمت بمكيدة لأناس سيطر الخبث على سريرتهم. قاصرة تزوجت، دميتها جميع ما تملك، فـ كانت هي عروسها البيضاء.

لا تنظروا بـ استغراب، هذه ليست حكاية واحدة، إنها حكايات في رواية واحدة. عندما ضاقت الأرض بي، ضاقت بهن. فـ اجتمعنا كما يجتمع النحل في ذات الخلية، فـ باتت مسكننا. الأرض لم تعد تنفعنا، فـ لتضيق كما تشاء. نحن أيضًا نشاء. نساء قويات إن لم نجد لنا مكانًا في الأرض، فـ قلوبنا كافية لتحتوي بعضها البعض. ننسج منها أرضًا جديدة، كلما ضاقت بنا أرضكم رحلنا لها مودعين آمنين،

قائلين في ختامها: مهما ضاقت بكم دنياكم لا تيأسوا، فـ هناك في مكان آخر نورٌ ينتظركم، قلبٌ يحتضنكم، روحٌ تجعل من نيران من حاربكم جنة لكم، فـ تكون هي مأواكم الأخير حيث لا ضيق بعدها أبدًا. غسق: اليوم كال ماشين للحلة، موعد الجلسة صار. خليت البنات يم هناء وطلعنا من الفجر. وصلنا قريب الـ 11. بوجهنا رحنا للمحكمة، طبينا للقاعة. هاي شديصير هنا يربي ما صدكت عيوني.

الواكفين بالقفص بيت عمي. عمي سالم وولده مهيمن ورضا ومحمد ومؤمل، وأبوية وإخواني سيف ويوسف ومازن. شنو السالفة ؟!! معقولة إسحاق فتح قضية شجن ويا قضيتي يا رب أي يااااا رب. حط إيده إسحاق على ظهري وأشرلي امشي. رفعت راسي عليهم. كلهم عيونهم بـ اتجاهنا، رهبةةةةةة. رهبة ما أكدر أوصفها، أحس وكـ أني داشوف الشيطان كدامي حتى جسمي صار يرجف.

بعدت عيني منهم على السريع. القاضي كاعد مقابيلنا، من شاف إسحاق كدامه هز إله راسه بالتحية وابتسم. انعقدت الجلسة وذكر القاضي الجريمة بالتفصيل. عرف بـ أسماء المتهمين وأخذ أقوالهم. وكالعادة أكيد كلهم نكروا جريمتهم. ماكو واحد صار بيهم رجال لحد هـ اليوم لأن الأعوج راح يظل كل عمره أعوج. وصل المهيمن راد ياخذ أقواله، التفت عليه. باوعتله بـ استهزاء. خلينا نشوف ندمك حقيقي لو بس كلام، هنا راح تثبت صدق ضميرك مهيمن.

رجع القاضي سأله: -ابني احچي، مو سألتك رد على السريع.

-لا سيدي كلامهم كله كذب. هم قتلوها. وأني چنت حاضر وياهم بذاك اليوم. مؤمل ضربها بالسچين وراها اخذها سحل من شعرها للمطبخ طبعًا بعد التعذيب. ورضا خلص عليها. ما كلفه موتها غير جليكان بانزين وجداحة. حركها وإخواني ساعدوا. ما خلوني أتدخل لحد ما نفذوا جريمتهم بالكامل، بعدها رضا كمل تخطيط فعلته. شمر السچينة بالفرن الغازي، ومباشرةً طلع الكل من المطبخ وشغل الغاز حتى تبين الشغلة قضاء وقدر مو جريمة. -أي وبعدين؟

-ماكو بعدين سيدي. التموا الناس لأن بيتنا احترق وطبوا يطفون بي ونقلوا أختي الله يرحمها للمستشفى. -وأنت ما حاولت تبلغ عليهم؟!! -لا سيدي. -سيف مسلم أقوالك، والمغدورة شتقرب لك؟ -بت عمي وخطيبتي سيدي. -سيد لو محكمة؟ -الاثنين. -كمل ابني نسمعك. -أني ما اعرف شي عن الحادث بيومها. دخلت حالي حال الناس. ومن سألنا شصار كالوا طك الطباخ على شجن، وركضت حتى أساعدها وياهم. وراها أختي چانت حاضرة ساعة الحادث. -جريمة. -نعم سيدي؟!!

-جريمة مو حادث، صحح كلامك. -أي سيدي چانت حاضرة الجريمة. واجت حچت إلنا، يعني إليه ولأبوية وإخوتي، وكالتها بالتفصيل مثل ما مذكورة كدام حضرتك هسه. -وأنتم ما حاولتوا تبلغون؟!! -لا سيدي. بس حچاها التفت القاضي على الشرطي الي بالباب: -نادي على الشاهد الأول. صاح بصوت عالي ومرتين على التوالي: زينب محسن. درت وجهي متفاجأة، بس لا هي؟!! چان تطب مرت عمي على الكرسي المتحرك، وأنهار تمشي إلها لحد ما وكفتها كدام القاضي.

القاضي: غادري القاعة بنتي. طلعت أنهار كبل حلفها اليمين وراها سألها: -مقربتك من المجني عليه؟ -بنتي. -تفضلي نسمعچ. أدلت شهادتها مثل ما مطلوب، ما خلت شي مخفي. طلعوها من القاعة، دخلت أنهار شهدت ضدهم. وبس طلعت صاح القاضي: غسق مسلم. باوعت لإسحاق، هز راسه بمعنى كومي. كمت قسمت يمين. بديت أحچي كل شي صار ودموعي تجري، أمسح وحدة تنزل عشرة. آخر شي جابولي ماي.

ما خليت شي بقلبي ما كلته، حتى حقدي عليهم بينته وهم صافنين بوجهي، ما يكدرون يستوعبون هاي الواكفة كبالهم هي نفسها غسق، الحاولوا بكل ما عندهم حتى يعدمون شخصيتها للأبد ويخرسون لسانها. -آخر سؤال كان للقاضي: ليش ما بلغتي؟!! -لا سيدي بلغت. اتصلت وبلغت بدون ما أذكر اسمي. بس هم طمطموا السالفة ويا ضابط عرف وطلعوا منها. -تفضلي استريحي. يلا ابني نادي على الشاهد الأخير.

صاح حسين، لو أني انصدمت. حتى هذا دبره إسحاق، والله عجيب هـ الرجال كل يوم يصدمني أكثر من اليوم القبله. نفسه صاحب الدراجة البلغت من موبايله. وهم شهد بنفس كلامي. وهنا انغلقت الدائرة على بيت عمي وأهلي وإنكارهم ما راح يفيدهم بشي بعد هاللحظة. صاح القاضي: الحكم بعد المداولة. الكل طلعوا. أقل الخمس دقايق ورجعنا للقاعة، عاد القاضي الجريمة وصاح النطق بالحكم.

كلنا وكفنا، ونطق القاضي الحكم بالإعدام شنقًا حتى الموت على ابن عمي رضا. بالسجن المؤبد على ولد عمي محمد ومؤمل. أبوية وإخواني يوسف ومازن وسيف بالحبس الشديد. ومهيمن بالسجن لمدة خمس سنوات. أما عمي سالم طلع براءة، لأن التستر على الجريمة هنا ما يشمله بالقانون بـ اعتبار الجريمة ارتكبت من أولاده. باوعت عليهم والضحكة تارسة وجهي. وأخيرًا تحاسبتوا، وأخيرًا حق الحق وأخذت العدالة مجراها الصحيح.

طلعوهم من القفص. فات أبوية من يمي كمت على السريع. ويا ما يطلع صرت يمه. باوع عليه ابتسمت. إذا تذكرني أني غسق في يوم من الأيام كنت بنتك وأنت دفنتني بـ إيدك. سحبني إسحاق لخارج القاعة. طلعوا ورانا أبوية، إخواني، ولد عمي. شكد صعبة من تاخذ حقك من المنك وبيك، لأن هو ظلمك قبل الغريب. انهاريت بالبچي ومو بـ إيدي. أهلي يا عااااالم. هذوله الي ما رحموني بيوم، ليش لحد الأن قلبي لا زال مُصر يرحمهم ليششششش؟!!!

مد إسحاق إيده للجيبه طلع الچفية. مسحت وجهي والتفتت داحاول أهدي بروحي. صارت مرت عمي كدامي، عفته ورحت إلها ركض. أنهار دايرة ظهرها، بس كلتلها عمة التفتت عليه وحضنتني تبچي. بادلتها الحضن وعيوني على أمها. مقعدة على الكرسي من يوم ما حركوا بنتها كدامها بدم بارد، هالميخافون ربهم. أنهار: ولچ غسق وأخيرًا. والنبي ما صدكت عايشة، أني بحلم لو حقيقة؟ أحچي خلي أسمع صوتچ، أحچي حبابةةةة. حچتها تناشغ من البچي. مسحت دموعها بـ ابتسامة

وكعدت يم رجل مرت عمي: -ما أكدر أقولچ شلونچ عمة. لأن داشوف بعيوني شصاير بيچ، بس كل الأكدر أقوله الچ حق شجن رجع وهيچ راح ترتاح بكبرها. بالعافية عليها راحت شهيدة. أدري أنتِ أم، وأدري محد توجع على مصيبتها بكدچ، بس لازم تقوين روحچ حتى ترتاح شجن. وكعتچ هاي دتأذيها والله. عيشي عمة عيشي وحقها مراح يضيع، لا بالدنيا ولا بالآخرة. هناك راح تحضنيها وبـ لسانچ هذا تطالبين رب العالمين بقصاصهم. بالكوة كالت: وأنتِ شلونچ يمه؟

-عايشة الحمد لله. صح المريت بي مو سهل، بس دائمًا وأبدًا رب العالمين ويايه وهالشي كلش كافي بالنسبة إليه. أنهار: الله ينتقم من مهيمن الحقير. أمي من يوم ما عرفت بالسالفة وهي تدعي عليه. وبس رجلچ اجة وطلب منه نشهد، وافقت بدون تردد، لأن غصتچ أنتِ وشجن مديتخليها ترتاح ولا تتعافى من مرضها الدتشوفيها بي. -رجلي اجة الكم؟!! -أي ولچ غير صدمنا. عيني أنتِ منو؟ أني رجل غسق!!!!

يا غسق يمعود غير ماتت وشبعت موت، كل أسبوع أحنه يمها بالنجف نزورها. تالي كعد سولف السالفة. وكال اشهدوا بقضية بتكم شجن، وأني مستعد آآمن الكم الحماية اللازمة وما أخلي أحد يتعرضلكم بسوء مهما كان. أمي أصلًا وافقت بدون ميقولها، هي بس تريد ترتاح. والنوب عرفت بيچ شكد تعذبتي، تالي حتى أني القاضي راد يحبسني تصدكين. كله لأن تسترت على الجريمة. بعدين من عرف الضغط النفسي والتهديد التعرضت إله من أبوية وإخواني أطلق سراحي. الله يخلي الچ غسق. والله مبين عليه خوش رجال وابن حلال. أحلى تعويض هذا من رب العالمين عن الظلم العشتي بي بحياتچ ويا أهلچ الله ليوفقهم.

-فعلًا يمه حافظي عليه. الي يسوي علمودچ كل هذا وأنتِ الچ ماضي صعب لو ضاع ميتعوض بعد. دتحچي سلم عليهم إسحاق. التفتت باوعتله. كال الهم نوصلكم من دربنا، رفضت مرت عمي بس أصر وما كدرت تعارضه. وصلناهم والطريق كله عيوني عليهم بالمرايا. أحس ما شبعت منهم. ذوله ريحة شجن، بس الله اليعلم شكد ارتاحيت بشوفتهم كدامي اليوم.

وصلناهم، لزموا بينا ما قبل إسحاق. رجعنا للبيت المأجرة. نزلني وراح يجيب غده. نص ساعة ورجع. ما أكلت شي ما أشتهي بعد هاليوم المتعب. صليت وتمددت بالي ظل يم البنات. كمت ع السريع. طلعت جهازي خابرت هناء. حچيت ويا ود واطمأنيت على رقاوي وكبل نمت تعبانة. لليل يلا كعدت. باوعت للساعة عشرة ونص. طلعت للصالة إسحاق نايم. رحت للمطبخ، جايبلي لفات حاطهن ع الميز. أكلت لأن جوعانة ورجعت للغرفة.

هم اتصلت بهناء وصليت. وراها ظليت أتفرج برامج للفجر يلا رجعت نمت. كعدت الصبح على صوته. فتحت عيني. ابتسم: صباح الخير بوية بسچ ما شبعتي نوم، من أمس وأنتِ نايمة. -صباح النور. لا كعدت بس أنت چنت نايم وما حسيت عليه. -كومي نتريك بالعجل عندي شغلة وياچ. كمت غسلت وجهي ورحت للصالة. چان مجهز الريوك. باوعتله وابتسمت، شديسوي هذا بيه حتى أخجل أزعل منه بعد كل شي قدمه إليه.

رحت ع السريع حضنته. بس حط إيده ومسح على ظهري بچيت. ما أدري شبيه؟!!! ليش هيچ تعبانة، غير المفروض أفرح بعد جلسة البارحة. -عليش هالبچي؟ -ما أدري مخنوكة، متشوفني حتى ما كدرت أحچي وياك بالموضوع بعد ما رجعنا من المحكمة. -هساع ترتاحين بس كعدي أكلي. -شكرًا إسحاق.... قاطعني بنترة: بوية بطلي سوالف الأغراب تراني أنزعج منها أزود مما تتصورين. حچاها وسحبني من أيدي للصينية. كعد يوكلني. برد الچاي وهو ما حاط لكمة بحلكه. كلتله: أكل.

كال: مالچ غرض بيه المهم أنتِ تتغذين. خلصنا، كال: روحي غيري بالعجل وتعاي. طبيت للحمام. الحليب شكد ميأذيني، كلبي يأذيني أكثر مو سهل عليه عايفة رقية وهي بـ هالعمر. فرغته شوية وطلعت. دك جهازي. ركضت چان بالصالة. اجة إسحاق كال: هاي هناء. رديت بسرعة: ها هنو، خير خو ما البنات بيهن شي؟ -ما تسلمين عوبة. -وچ والله بالي يمهن، فدوة طمنيني. -رقاوي زينة، لا تخافين جاي أوكلها وماشي الحال. بس هاي ود عفية حاچيها بس تبچي. -يا ليش؟!!

-تكول عافونا وراحوا بعد ما يردون، من الصبح على هالحچايتين ما عدها غيرهن. -وينها يمچ؟ -أي هاي أخذي بلكت تقتنع من تسمع منچ. حچت ود وهي تناشغ: الووو ماما. -يروح أمچ شجاچ. والله ما عفناچ، عدنا شغل يومين ونرجع. مو هاي أختچ يمچ وساكتة متبچي. -لا عفتونا هالنوبة اثنيناتنا... وبچت: -منعوفكم، اكو واحد يعوف روحه؟ غير أنتم روحنا وأعز. ظليت أقنع بيها. بعدين إسحاق أخذ الموبايل، حكى وياها لحد ما قنعت. رحت بدلت وطلعنا بس بالي يمهم.

باوعت للطريق، هاي وين رايحين؟ للمحكمة لو شنو؟! -لا للنجف نزور. -أي عافية، والله كلش محتاجة الزيارة، اجت بوقتها. -تتدللين بويه، چنچ على الزيارة. بسرعة وصلنا لأن المسافة قليلة. زرنا الإمام علي عليه السلام وطلعنا، بس مشينا مسافة عرفت راح يوديني لأمي وشجن. وفعلًا دقايق ووصلنا لهم. سلمت وگعدت يم قبر شجن الله يرحمها. دنگت راسي عليها وبچيت بحرقة، رجعلچ حقچ خيتي، رجع يروح غسق. البارحة الأذوچ تعاقبوا.

البارحة تحققت العدالة الإلهية وانكشف المستور، وكل ساقي ذاق من نفس المر السقى الچ. نامي مرتاحة يا مظلومة. أهلچ تجازوا وجمالچ التشوه بأيدهم راح يرجع، بعد ما يوگفون گدام رب العالمين وينالون عقابهم الي يستحقوه حبيبتي. ما نسيتچ ولا راح أنساچ. صح الحياة تمشي بس عمرنا يوگف يم الناس النحبهم ونخسرهم قبل لا نشبع منهم. تغيرت أني مثل ما چنتي تترجين مني. صرت قوية.

صرت أعرف أدافع عن نفسي إذا ظلمني أحد، وصارت ثقتي بروحي مثل ثقتچ شجونة. تذكرين من سيف ظلمچ شلون وگفتي بوجهه؟ ما ترددتي ولا لحظة. رحتي بلغتي أهلچ بالرغم تعرفين هالشي ممكن يأذيچ. موقفچ هذا صار مصدر قوة إلي. أني هم مثلچ. من انظلمت وگفت بوجههم وحچيت عن معاناتي بس لأني أعرف بنفسي مظلومة وغيري الظالمني. شكرًا حبيبتي. شكرًا على كل نصيحة قدمتيها إلي. شكرًا على خوفچ عليه واهتمامچ بيه من دون الكل. شكرًا على محبتچ المتتعوض.

شكرًا على هالشجاعة الزرعتيها بيه حتى بعد موتچ. شكرًا ولو أشكرچ لحد آخر يوم بعمري هم قليل. بالعافية عليچ الجنة. وإن شاء الله نلتقي فديوم يم ربچ الكريم بوجه أبيض. التفتت على أمي بست گبرها وشهگت: -اشتاقيتلچ يمة. اشتاقيت لحضنچ الي ياما وياما احتاجيتة وما لگيتة. اشتاقيت لحبچ وحنانچ وصوتچ الدافي. اشتاقيت لنصيحتچ. واشتاقيت لأيامي القديمة الچانت أحلى شي بيها أنتِ. أدري بيچ دوم ويايه.

حتى بولادتي ما عفتيني، لذلك ما راح أگولچ أني بخير وصار عندي بنوتة تخبل وعسل مثلچ. بس راح أگولچ أني محتاجتچ وأظل أحتاجچ. أكبر خسارة بحياتي أنتِ. ليش شنو قيمة البنية من دون أمها خصوصًا إذا ما چان عدها أهل غيرها هي وبس. المهم أنتِ مرتاحة لأن ساعتها أني أرتاح. حق شجن رجعلها. وحقي هم راح يرجع وقبل الكل حقچ يا روحي، ذولاك رجلچ وجهالچ نايمين بالسجن. نامي مرتاحة. يجي اليوم النتقابل بيه.

وأتمنى تكونين راضية عليه وما قصرت بحقچ فد يوم. گمت مسحت دموعي وباوعت على إسحاق. چان گاعد يقرأ (يس) بصوت مخفي. طلعت موبايلي حافظتها ملف بالجهاز قريتها وقريت الرحمن وسلمت عليهن. التفتت شفت قبري. تنرفزت بشكل، كلما يصير گدامي أحقد على أبويه وكل أخواني أكثر من حقدي هذا. طلعنا من المقبرة ويا الأذان. رحنا للإمام. صلينا وطلعنا للمطعم أكلنا ورجعنا للشقة.

سألتة عن موعد جلستي گال باچر إن شاء الله، رحت نمت للمغرب فزيت على صوت الهوسة. طلعت من الغرفة هناء وخالة جايات!!! تفاجأت كلش. طلع إسحاق هو الداز عليهن علمود يشهدن بحادثتي لأن شهادتهن تعتبر جدًا مهمة. رحت سلمت على خالة وسحبت هناء بهدوء: -بناتي وين ولچ؟ -يم ثناء وترف، شبيچ قابل عفناهن بالشارع واجينا. -يربي يوميًا باقيات بمكان، ليش ما جبتوهن وياكم؟ -إسحاق ما قبل، باچر كلنا بالمحكمة وين يظلن؟ -أي هم صح. زين منو جابكم؟

صهيب مو؟ -لا شبيچ صخر جابنا. نسيتي صهيب صار إله عشرين يوم ويا أمل بإيران علمود عملية باقر. -أي يمعودة نسيت، راسي صاير منخل من المشاكل. -الله يساعدچ. -ويساعدچ، بشري ما صار شي جديد وياكم؟ -لا هو أسبوع ظل يم أهله عگبها سافر. جاي يتصل يوميًا. أمي ترد عليه شلونكم محتاجين شي ويسد الخط گبل. -هناء لا تخسري صهيب ما يتعوض. -والخلفة ما تتعوض. -بس هو يريدچ الچ، ما يريد الأطفال، ليش ما تفكرين؟ -يجي يوم ويتندم تاليتها يكرهني.

-صهيب ما يسويها. -خية يموت على الجهال، روحه بيهم. ما تدرين شيسوي ويا جهال إخوته، بس هو ما يبين إلي خاطر لا أنقهر وأحس بالنقص. -صح كلامچ هناء. بس أحيانًا يستوجب نكون أنانيين إذا شفنا الطرف الآخر متمسك بينا. -دعوفي هالسالفة خايبة وخلينا هسه بقضيتچ. -أوووف، دتدمرين روحچ بهالعناد. -لا خية لا أدمرها ولا شي، كل شي بالقسمة والنصيب، وآنه هاي قسمتي وراضية بيها. ظلينا بيومها سهرانين للوحدة.

إسحاق جمعنا وصار يلقنا شنو نحچي وشلون نرد على أسئلة القاضي. گالتله خالة هاي أول جلسة؟ گلها أكيدن لا، خمس جلسات گبلها. بس آنه أجلتكم على الجلسة الأخيرة وخلصت الراحن الوحيدي خاطر لا تتبهذلون. بالوحدة ونص گال يلا ناموا، ورانا گعدة من الصبح. نامن خالة وهناء بالصالة. وهو أجه يمي بالغرفة، صار لنا هواي ما نايمين بمكان واحد. تمدد رحت طفيت الضوة. بس نمت بصفة گبل سحبني لحضنه. باس خدي وگال تصبحين على خير، رديت وأنت بخير.

ثاني يوم موعد الجلسة. دخلت للقاعة بنفس خوف الجلسة الراحت. مهيمن وحسن بالقفص. گعدت وعيوني عليهم، سحبني إسحاق من أيدي بنترة: -لا تتنوعين ليهم غسسسق. هزيت براسي أي. نفس القاضي الحكم بيت عمي ديرأس الجلسة. بدت المحاكمة مهيمن اعترف گبل. أما حسن كالعادة ينكر، گمت أني شرحت الحادثة مثل كل مرة بس بدون خوف بدون خجل. شهدن خالة نجمة وهناء على كلامي وراها صاح القاضي الشاهد الأخير. كل الصدمات ما تجي يم صدمتي بدخول رؤى للمحكمة.

ظليت صافنة هاي شجابها وشتسوي اجت؟!!! حچت الصار وياها. وبالأخير انطت موبايلها للقاضي شاف الرقم وبعض من الرسائل الأخيرة الباقي ممسوحات. التفت على حسن وأمرهم يشغلون التسجيل. مكالمات بصوته وياها. ديحاول يهددها لو تقبل بالشرط لو يفضحها بالعشيرة. هنا حسن انتهى. ما ظل عنده غير الاعتراف بلكت هيچ تتخفف عقوبته شوية. وفعلًا اعترف مثل مهيمن. أساسًا اعتراف مهيمن بالجريمة الجماعية وحده كافي حتى يدين حسن بالإدانة الشديدة.

سأل القاضي حسن: -ليش سويت هاللعبة القذرة، ما كفاك الاغتصاب يعني؟ -رد علي حتى أخلص روحي. رجلها قاضي وكل السنين الراحت چان يدور على مهيمن وتوصله الأخبار دائمًا. گلت ويا نفسي: أكيد لو وگع مهيمن بأيده راح يعترف عليه... -وأنت يعني شلون عرفت هو ما يدري بيكم مشتركين بالجريمة؟!!! -بنت أخو بلغتني. والدليل أني گدامه وما حاسبني لو يعرف ما چان سكت. -كمل نسمعك. -ومهيمن قتل صديقي علاء.

فهنا هم ردت أخلص منه وأرتاح من هالكابوس بعد ما يعترف على نفسه ويغطي عليه. وهم أنتقم لصديق طفولتي لأن هو مو أحسن منه حتى يقتله، على الأقل ما اعتدى على عرضه. -أنتم منطي حبوب حسب أقواله؟ -كذب سيدي لأن ماكو شي يثبت كلامه هو أصلاً چان يتعاطى. -عندك شي تريد تضيفه بعد؟ -لا سيدي. گبل إسحاق همس بأذن المحامي. رفع أيده. أشر له القاضي تفضل. گام وگف وحچى بصوت عالي: -أطالب بهدم القبر الرمزي لموكلتي كونها لا تزال حية.

هز راسة القاضي بالموافقة. باوعت لإسحاق. آآآخ هذا يمكن أكثر هم چان غصة بصدري وهسه يلا انزاح عني وارتاحيت. وصار وقت النطق بالحكم. انحكم حسن. بالسجن المؤبد مع اعتباره ظرف مشدد لأن هو موظف حكومي. الاغتصاب كان جماعي. والمجنى عليها باكر وأدى الفعل لإزالة بكارتها. وانحكم مهيمن أيضًا. بالسجن المؤبد مع اعتباره ظرف مشدد لنفس أسباب حسن إضافة عليهن المجنى عليها كانت أقاربه. وبهاي الطريقة كانت عقوبة مهيمن أقوى بهواي. حادثة شجن.

حادثة الاغتصاب. وعنده بعد حادثة قتل علاء راح يتحاكم عليها نهاية هذا الشهر. شهر الواحد من 2019. نفس الشهر الي انقتلت بيه شجن. وبعد سبع سنوات. رجع حقي وحقها حتى يثبت رب العالمين للعالم بأن عدالته ستحق ولو بعد حين. رفعت عيني بعينهم نظرة انتصار بعد تعب سنوات. ومباشرةً غادرت القاعة. صار حنظل بوجهي واگف هو ورؤى، عفت الكل ورحت باتجاهه. هالإنسان الي أول ما شفته تمالكني الخوف. وبعد سنوات طوال.

أثبت إلي هو سندي أكثر من الناس الأحتمي بيهم من هالدنيا وبشرها. تقربت منه مبتسمة بحزن رد الابتسامة: -شكرًا خويه... -لا تشكريني على الواجب. هذا أقل شي أگدر أقدمنه ليچ خاطر تعذريني عن الصار وياچ. -معذور وما قصرت. باوعت لرؤى ترجف من الضعف ووجها صاير خريطة. رجعت نظري على حنظل: -كافي خويه أشهر مرت وأنت تعاقبها، إن الله غفور رحيم وخير الخطائين التوابون. هز راسة وسحبها من أيدها. ديطلع راح إسحاق مدري شحچى ويا ورجع بسرعة.

طلعنا من المحكمة للبيت. خلصت مهمته بعد هنا، اتصل على صاحب البيت سلمه المفتاح ورجعنا للبصرة. وصلنا هناء وخالة لبيتهم ورحنا لبيت الشيخ. چانوا مجتمعين بالصالة. الدنيا ليل وحتى الشيخ موجود، من دخلنا گام باسني من راسي والله خجلت. كلما يشوفني يسوي هالشكل. ما متعودة حقي. أبويه عمره ما باسني حتى بالأعياد، شگد هالرجال كبير وأفعاله أكبر. بست أيده التفت على إسحاق. رجع باوعلي وعيونه تلمع بدموع الفرح گال:

-على الخير بويه، حقچ رد والظلموچ تجازوا. -ما قصرت بويه، فضلك ما أنسى. -الفضل لصاحب الفضل ومن ثم لزلمتچ الواگف جارچ، آنه كل شي ما سويت. -لا سويت هواي. كافي أنت الجمعتني بإسحاق. لأن تدري بس هو اليگدر بيوم من الأيام يرجعلي حقي منهم. -الطيبون للطيبات وأنت تستاهلين الميزان. بس حچاها باس إسحاق أيده. بهالأثناء طلعت ترف من غرفتها ود ورقية وياها، بس شافتنا ود أجهت لحضني تركض: -ماما اشتاگيت ليچ هوااااي.

-وأني اشتاقيتلچ حياتي، شفتي مو گلتلچ راح نرجع. -أي أي.... حچتها بفرحة گبل حضنتها. رجعنا للبيت هلكانة من التعب. بس نومت البنات نمت يمهن بالغرفة حتى ما بيه بعد أگوم لغرفتي، شلون غفيت هم ما أدري. علاقتي بإسحاق ظلت مثل ما هي. ما أدري ليش. خجلان يا ترى من الشي الصار؟!!! لو زعلان ويريد أني الأبادر وأراضيه، ما دأفهم سر سكوته. هناء. قريب الشهر وصهيب بإيران.

كل يوم قبل لا أنام تنترس مخدتي من دموعي لحد ما يظل راسي يوجعني من البچي. واليوم نفس الحالة عشتها. بچيت بقلة حيلة حد ما غفيت، فزيت من الصبح على لمسات تتنقل بين أطراف شفايفي. فتحت عيني، هذا صهيب. بلا شعور گمت حضنته حيل، مشتاقتلهةةةة. بادلني الحضن. شوية وبعدت عنه، رفع وجهي بأطراف أصابعه وگال: "اشتاگيت الرويحتي." "ورويحتك اشتاقتلك." "عليش عيونچ هيچ تعبانة؟ شني خلصتيها بچي؟! هزيت راسي وبچيت. چان مگمبص يم رجلي، گبل گام.

گعد بصفي وسحب راسي لحضنه يمسح علي بهدوء. "ما جاي أفهم عليش تأذيني بيچ. أمي مشكلتچ؟!! وحگ ربچ بسبب طلابتنا الأخيرة عليت حسي اعليها، بس تظلها أمي، أتبرى منها لو شني الأسوي؟ أخذتچ وعزلت وهمينة ما فاد. شني أهجن بيچ؟ آخذچ ونبعد عن البصرة كلها، تردين هيچ؟ حاچيني بوية." "لا هاي مكانك شلون تعوفها؟ "چا أنتِ شايلة همي بالمچان وما شايلة همي بيچ أنتِ. شني يعني موش سهل أعوفن مچاني؟ بس سهلة عليه أعوفنچ؟ شلون تفكرين هناء؟

لچ كل شي ما يجي يم ظفرچ وحگ من زرع حبچ بيه." "بس أنت حقك تريد جهال يسندوك بالكبر." "أنتِ سندي الوحيد، ما أريدن غيرچ." "تحبهم أدري." "أي أحبهم، بس أحبنچ أضعاف حبي ليهم، ولون خسرتچ كل شي ما يجي بعيني بعد." "تزوج بموافقتي أحسن ما تكسرني بالغصب لو بالسر." "گلتها ليچ بيوم زواجنا، وأردن وأگولنها. موش صهيب أبن الشيخ ضاري اليكسر حرمته، وهاي آنه كسرت چلمتي وما فكرت أكسرنچ." "وإذا صارت؟

"موش زلمة لون سويتها، وهاي شواربي تحرم تظل على وجهي طول العمر." "خايفة." "آنه أمانچ، بس ما عليچ من الوادم وأولهم أمي." "تعبت من هسه تعبت." "آنه راحتچ، اليمتة ما تتعبين حطي راسچ هنا... وأشر على صدره. "ولمن تشكين تعبچ لراحتچ ما يظل كل تعب ساعتها." "أنت الكل شي مجهز جواب؟!! "أكيدن عبن هالشي نابع من گليبي. ما مستعد أخسرنچ هناء. وبذات الوقت هالزلمة القوي ينكسر لون لقاچ مستعدة لخسارته."

"ما أريدن أخسرك، بس ما أريدن أصير أنانية." "صيري أنانية. چا آنه همينة أناني بحبچ، عفت كل الوادم لأجلچ بوية، لو أنتِ ربچ وحد." باوعتله وبچيت. سحب العلاگة طلع علبة ساهون. حط بحلگي، ضحكت ودموعي تجري: "ها، شلونها؟ طيبة؟ "مالحة يا طيبة." "تراها حلوة بس غير دموعچ غرگتنة، بسچ عاد شكثر تبچين، مو عيونچ الحلوة صارن دگم." "هههههه." "ها من هسه صرت ما اعجبك أستاذ صهيب؟ "هساع والآخر يوم بعمري ما تعجبني حرمة غيرچ."

"شلون حبيتني وأنت انجبرت بيه؟ "حظي والحمد لله." حچاها وباس إيده وجه وگفه. صحت بيه: "صهييييييب." گبل طگها بضحكة وباس راسي. "أتمازح وياچ رويحتي. غير أنتِ تجيبين التايهة، شلون ما أحبنچ؟ وحگ ربچ أروحن وأرد أبوس إيدين أبوي وراسه عبن جبرني عليچ." "أي لو ما هو ما چان تزوجنا." "يعرف مصلحتي غير. زوجني البت نجمة، وهو أعرف الوادم مني، نجمة وشني تربيتها." "ههههههه راح أنغر عليك ترى." "يلوگ بوية.

يلا گومي غسلي خل وجهچ يبرد شوي، صاير شحالة." بست خده وطلعت. غسلت، جاي أروح للصالة، أمي طلعت من غرفتها لابسة العباية. "ها يمة وين؟ "ماشية لغسق أتفگدها هي وضناها." باوعت للساعة. "يوم لساها بثمانية ونص يجوز نايمة." "لا دگيت عليها صاحية." حچتها وطلعت... ضحكت. خطية مبين راحت علمود صهيب، رغم هو أبد ما يتحسس منها أو يستحي. يعني عادي أحنه قبل هم عايشين ويا أهله مو غريب الوضع علينا. درت وجهي جاي أردن لغرفتي سحبني.

ضحكت ودفعته. "أووووي نززتني، آنه جايتلك عليش هالحركات حبيبي؟ "محترگ جد جد جدي، لا تناقشيني كلششش." "ههههههههه. بس خل ناكل الساهون ما لحگت أحسن بطعمه، شلونة؟ "أنتِ الساهون هنائي. وآنه عاد سكري هابط يعني علاجي يمچ أنتِ وبس." حچاها وباسني بلهفة. كلامه كلش ريحني، ومثل ما يگول راح أصير أنانية بيه وبحبه، وآنه أدري بصهيب ما يكسرني. ريحان... عرس خالد وجابر تأجل أكثر من شهر. صارت مشاكل وي أهل خطيبة جابر واضطرينا نأجله.

تالي تحدد الموعد يوم 2/14 بعيد الحب. الهوسة كلها عليه. خطية ما عدهم أهل حتى الزفة راح تصير ببيتي، وأكيدن هالشي رغبتي قبل لا تكون رغبة أيوب. البنات وياي ما قصرن بشي. خصوصاً حريم أخوي من ثناء لحد ترف، ظنيتني راح أتعب تالي شالن عني كل التعب، الله يعافيهن. صارت الزفة قريب الثمانية. وعبن أيوب يزف خالد وعمته ويا بالصدر، رحت بسيارة إسحاق، أما جابر زفة حنظل. صعدت ليورة يم ود وغسق بالصدر. بدت الزفة شگبرها.

هوسة والسيارات ما تنعد وهالشباب متسودنة واحدهم اليگول قرد كل شوي وناط گدامنة. غسق... خبلونا جماعة العرسان. كل شوية يصيرون يم إسحاق حركات وشحطات، من يمي لزمت گلبي لا يسوون حادث. طول الطريق إسحاق يصيح عليهم. بس أكيد ميفيد. فرحانين وفرحتهم ميعبرون عنها إلا بهالسوالف، بدون ميفكرون بالعالم وبروحهم. خلصت الزفة تقريباً ورجعوا استداروا. قريب منوصل للبيت.

علگوها مرة ثانية، نزل الجامة إسحاق ديحچي وياهم، كسر گدامنا واحد منهم فجأة وبدون مقدمات. فقد إسحاق السيطرة على السيارة. لو يضربه لو يضربنا بالرصيف. حط إيده گدامي أني ورقية وصاح بريحان: "عينچ على وووود." بإيده الثانية فر الستيرن حيل. شحطت السيارة دارها سريع، صارت الضربة من جهته براسه و چتفه. أما أحنه ما صار لنا شي بس أنخضينا من قوة الحركة. باوعت عليه خايفة والبنات يتصارخن. وجهه كله دم.

الزفة وگفت من صوت الحادث، فتح الباب ونزل الشرار يتطاير من عينه. لزمهم رزايل وغلط ما سمعته من إسحاق قبل. آخر شي گلهم: "حسابكم وياي." أجه أيوب يهدي بيه بعدين دنگ عليه وعلى ريحان: "ها خوبن ما صابكم مكروه؟ ريحان... "لا الحمد لله بس أخوي تأذى شوفه خطاية." هز راسه ورجع علي. بالگوة سكتته عنهم گله: "امشي ويا أخوتك." ما قبل. صعد بالسيارة وأشرلهم: "اتحركوا." باوع عليه ورجع راسه على ود وريحان: "بيچن شي بوية خاطر أخذچن للمستشفى؟

غسق... "إسحاق وجهك كله دم." إسحاق... "ضربة عادية لا تشيلين هم، المهم أنتم بخير." حچاها وسحب الكلينس مسح گصته. وصلنا العرسان ورجعنا. من نزلت شفت السيارة ضربتها قوية من جهة إسحاق، زين ما صار له شي أسم الله. دخلت للبيت رقاوي متنحسة وود عيونها حمر. بس بدلت ملابسهن نامن. طفيت الضوة وطلعت، إسحاق واگف گدام المرايا يعقم بالجرح، سحبت الگطن منه. أخذته للچرباية نظفت وجهه زين. دافر راسه لأن يم أذنه مجروح، صرخ: "ها شبيك؟ شيوجعك؟

"متني متشنج." "شو خلي أشوف، انزع قميصك." فتح الدگم انصدمت. المنطقة كلها حمرة، باوعتله بخوف: "إسحاق خاف عندك كسر لا سامح الله؟ "لا بوية. لون عندي كسر تشوفيني گاعد گدامچ هيچ؟!! "لعد ليش هيچ حمرة؟ "رض قوي عبن الضربة صارت على هاي الجهة." طلعت ع السريع. جبت زيت الزيتون ودهنت المنطقة. بس الوحها يصيح: "شلون حظ عود ردت أصالحها اليوم." بالگوة گدر ينام خطية. طفيت الضوة عليه ولميت الهوسة بالغرفة. طلعت غسلت وجهي ورجعت.

نمت گبل بلا عيد حب بلا بطيخ هو أحنه شكول هاي السوالف. ريحان... تأخرنا يم العرسان كلش. قريب الـ 12 يلا ردينا. بس طب أيوب غير ملابسه وتمدد صاح: "طفي الضوة." مسودني هالأشهر. خاطر يشرد من موضوع الخلفة ما يتقرب مني، رغم آنه أعرف كلش زين هو ما يگدر بدوني. تقربت منه كالعادة حاط المخدة على وجهه. سحبتها بعصبية. "گوم لا تشرد بالنوم، أدريك تريدني بس خايف أيوب." "لا بوية تعبان." "أي عادي آنه همينة تعبانة." "چا ما تنامين؟

بس حچاها ابتسمت ودنيت منه. ابتعد يضحك. بسته من خده، گبل سحبني لحضنه. "يعني ما راح تگعدين راحة، شلون وياچ تالي ريحانتي؟ "مشتاگتلك شسوي حبيبي." "وآنه مشتاگ لكل شبر بيچ يرويحة حبيبچ." وهم رجعت أحسب الأيام. أدفع عمري بس أرجع أشيل طفل ببطني. خسارتي لأبني ما نسيتها ولا راح أنساها إلا إذا حبلت نوبة الأخرى. غسق... يومين وإسحاق على العلاج. باليوم الثالث صبح شوية أحسن، صادف 2/17 يعني عيد ميلاده وعيد ميلاد رقاوي الأول.

طلع الصبح گال: "راح أجيب كيكة العيد رقرق." گبل وصيته. "خلي اسم ود وياها حتى لا تتحسس." چان ديطلع بس حچيتها ضحك ورجع باسني من راسي. أول ما سد الباب اتصلت بشمس. سولفتلها العندي. گالت: "راح أشوف بيجات بالبصرة حتى طلبچ للعصر يوصل والكيكة هم ويا الهدية." نص ساعة ورجعت راسلتني واتس اب. دزتلي صور. علبة بيها محبس رجالي وعلامة الميزان وعطر وساعة وقلم ودفتر صغير للمفكرات. دزتلي: "؟؟؟؟؟ رديت: "أي حلوة هو شكو غير هالسوالف."

ضحكت وگالت: "راح أوصي." گمت رتبت روحي. للظهر أجه تغدى ونام ساعتين وطلع، هم زين ويا طلعته اتصلت شمس. گالت: "راح يوصل الطلب وأنطيتهم رقمچ." عشر دقايق واتصلوا. جابوا الهدية مغلفة بشكل يجنن، توني دأطب اتصل عليه مندوب الكيك. أخذتها منه للثلاجة گبل. حطيتها بالطابق الأخير حتى ما تبين. كملت تجهيز روحي. وبعدين سبحت البنات وبدلت الهن، ما سويت عشى كافي الكيك راح يطلع من خشمنا. أجه قريب الثمانية.

جايب أشكال ويا هدايا على ألعاب على زينة. خلة البنات يرگصن من الفرح محتارات بيمن يلعبن. رتبت زينة الصالة وجبت الحلويات السويتهن. رجعت لگیته ديجهز بالميز. جايب كرزات وحلويات جاهزة وچكليت وأنواع النساتل. باوعتله وضحكت: "شدعوة هالگد جايب؟ "عيد ميلاد الغالية غير. كل هذا شوي عليها، خلني أعوضها عن الأيام العاشتها بدوني، ولو ما تتعوض صعب." حسيت كلامه بيه بسمار إلية. مو كلش اهتميت.

هسه راح يبين مهتم لو لا من يخلص عيد ميلاد رقاوي. بدينا نحتفل والبنات فرحتهن ملت المكان. أكلن، رگصن، تونسن. وإسحاق خو نسى نفسه وياهن، أول مرة أشوفه فرحان هالگد. رقاوي هم ما مقصرة. لوگية درجة أولى بحيث مطيرة عقل الرجال من راسه بسوالفها وحركاتها الحلوة. خلصنا الأحتفال أخذتهن للغرفة. اللعابات بإيديهن. ما قبلن أخذهن، بدلت ملابسهن ونومتهن ع السرير وياهن. طلعت إسحاق ديلملم بالصالة. أخذت الغراض من إيده: "عوفهن عنك أني أرتب."

باوعلي وگعد ع التخم. حسيت نظراته بيها سؤال: "وين معايدتي غسق؟ مو اليوم عيد ميلادي؟ فرحت كلش. هو هذا الأريده بالضبط، لازم يسأل حتى أعرفه مهتم لو لا، خو ما أتنازل وحدي. كملت الصالة لميت شعري وأجيت يمه. "ها راح تنام؟ "أي نعسان طفي الضوة من دربچ." رحت طفيته والضحكة على وجهي. دامشي للغرفة. چان يگول: "خوبن حتى الكل عام وأنت بخير شطبتيها براحتچ بوية براحتچ." درت وجهي گتله: "يااااا نسيت. كل عام وأنت بخير عود...

واعذريني لأن التهيت ببنتي ونسيتك. صح ظلمة بس شفته شلون ضاج. دار ظهره نام. رحت للغرفة ع السريع طلعت الكيكة من الثلاجة ورتبت الميز. بدلت ملابس نوم. وظلمت الغرفة بس قبلها حطيتله الهدية ع الجرباية. السلسلة مالته برگبتي دوم. شلتها بستها وطلعت تقربت منه وسديت الروب حتى ليحس بشي وتخرب المفاجأة. -إسحاق، إسحاااق شبيك مو داحچي وياك ليش ما تجاوب؟ -نايم. -والنايم شلون يحچي؟ -عادي رديت أعليچ من الحلم، خليني مرتاح لا تزعجيني.

-گوم الغرفة بيها صوت مدري شنو مثل الوزة. -وزة شني؟ -ما أدري مال كهرباء، أخاف اكو شي يريد يحترگ لأن الصوت كلش قوي. صدگني وگام بسرعة. رحت وراه فتح الباب الغرفة ظلمة بس ضوة الشموع. التفت عليّ، باوعتله من ضوة المطبخ. چان مبتسم بابتسامة خفيفة سحبته من أيده وسديت الباب. -كل عام وأنت روحي وكل حياتي. كل عام وأنت سندي. كل عام وأنت أبويه وأمي وأخويه وكل شي خسرته. كل عام وأنت الرجال الحسديني عليه كل العالم.

كل عام وأنت قوة وعنفوان الغسق. كل عام وأنت الشخص الوحيد اللي ما راح أندم بيوم لأن خليت بي كل ثقتي. عبالك أنسى عيد ميلادك؟ أكيد لا. أني بولادتي وبعز زعلي منك تذكرته تريد هسه وبعد كل شي سويته وقدمته إلي أنسى وأنسىك!؟ شكرًا إسحاق. شكرًا ولتگولي لتشكريني. لأن ماكو غيرك يستحق الشكر من بعد رب العالمين طبعًا. شكرًا على حقي اللي رجعته إليّ. شكرًا على حق شجن. شكرًا على قبري اللي هدمته وقبر أبو علي اللي عمرته بحبك.

شكرًا على الحب اللي قدمته إليّ. شكرًا على وُدّة ورقاوة أحلى هديتين حصلتهن بحياتي وما چان حصلت عليهن لو ما أنت. حط أيده على حلگي ودنگ همس بصوت دافي: -شكرًا إلچ. شكرًا على إسحاق اللي رديتي ليّ بعد ما فگدته سنين. رفع راسه باوعتله مبتسمة. راد يبوس شفتي حطيت أطراف أصابيعي منعته بسرعة. -لحظة بس اسمعني. أريدك توعدني قبل كل شي بعد ما تشك بيّ لو تشوفني بعينك إسحاق. -تخلصت من مرضي رويحتي.

ويا ما تخلصتي أنتِ من الماضي وهيچ صرنا غير غسق وإسحاق اللي ماتوا. سحبته من أيده للكيكة. يلا لعد أتمنى وأطفي الشمعة، لازم تطفيها مو راح تطب بالكيكة. ضحك وغمض عيونه. شوية وطفاها. گتله شنو تمنيت التفت عليّ ولزم إيديه الاثنين بقوة. -تمنيت طفل آخر منچ. خاطر أعيشن وياچ كل يوم بيومه. وأعوّضنچ وأعوّض رويحتي عن كل شي فاتنا بحملچ الأول. أتحمل عصبيتچ بالحمل. تقلب مزاجچ، تعبچ، سهرچ، نساتچ، أحضر ساعة ولادتچ خاطر أهون أعليچ.

كل شي غسق، كل شي فاتني وگصرت بي وياچ أريدن أعوضنه. ابتسمت وبست خده. رحت جبتله الهدية وشغلت الضوة. -كل العمر مو بس كل عام وأنت حبيبي وأبو أطفالي. -وكل العمر وأنتِ نبض هذا... ودگ على صدره. فتح الهدية وابتسم. باوعتله بدلع چان يگول: لا تلعبين بأحوالي يبت الناس. -هههههه ليش شسويت قابل؟ -ما سويتي بس جاي تسطريني بحركاتچ هاي. -أمممممم. بس أنت ميزان وأني أدري بالميزان ما يهزه شي. -أي آنه يسموني الميزان.

بس كل توازن ما يظل عندي جدّام حسنچ فستقة. حچاها وباسني. لهفة سنتين اترجمت بنص ساعة. ويا كل لمسة منه. يثبت حب الميزان للفستقته بس هالمرة حب جديد كله ثقة وعزة نفس غير الفات. هناء.. 2/20 هالتاريخ اللي أجتني بي أحلى مفاجأة. كملنا الغدة وراحت أمي تنام. سويت چاي لصهيب ورحت للغرفة چان گاعد يگلب بالموبايل ويمه ظرف. انطيته الچاي وعيوني عليه. شنو هذا النوب مبين هدية لأن مغلف بإطار؟! ردت أشيله أخذه بالعجل. -ليش هذا مو إلي؟ -لا.

-چا لمن؟! -مال صاحبي موش يمچ السالفة. -هاااا. گعدت ضايجة أموت إذا ما أعرف شنو. شوية وگمت أركض. سحبته راد ياخذه ما خليته فتحت الظرف بي ورقة. طلعتها ع السريع. لزم خاصرتي درت ظهري عليه. صرت أقرا بصدمة أمر إداري بتعيين هناااااء؟! باوعت عليه باس شفتي. لساعني ما مستوعبة السالفة بوستين والثالثة صحاني. -شمالچ رويحتي؟ -شلون ليش يمته ما مصدگة صهيب والله ما مصدگة. -صدگي بوية صدگي.

صار بالسنة أشتغل على الموضوع واليوم تم الحمد لله. هساع صار عندچ شي تلهين رويحتچ بي. ما أريدن بعد أفكار سودة. الحياة حلوة والحب أحلى وآنه وياچ وخل الوادم شما حچوا يحچون راسهم والحايط. -أحبك والله أحببببك. -چا آنه مييييييت حب بيچ يا هنائي. راد يبوسني دگ جهازه. باوعت صخر. فتح الخط الصوت عالي گله تعال البغداد الجماعة جاي يسألون أعليك. نهى المكالمة باوعت عليه. -يا جماعة؟ -طيف أختي.

-هههههههههههه وآنه عبالي منضم الحزب الجماعة. -هههههههه والله أعليچ سوالف. -أخذني وياك. -وين؟ -البغداد. -بوية غير تامرين. الآخر الدنيا همينه أخذچ موش الـ بغداد وبس. ريحان.. بعدني أحسب وما مصدگة فاتتني يومين. إيدي على گلبي. الثالث الرابع بالخامس ما تحملت چنت يم أهلي دگيت على عمة سكينة وأجت بالعجل. رحنا للمختبر القريب. بين ما طلعت النتيجة طلعت روحي. وألف الحمد لله اكو حمل.

رديت طايرة ما عولت يصير الليل ويجي أيوب ياخذني للبيت. أول ما دشيت للغرفة جهزت ورقة التحليل. طب وراي. انتظرته يغير ملابسه دار وجهه مبتسم جاي يحاچيني شلت النتيجة گدامه. -شني هاي؟ -اقرا شني ما تعرف يعني؟ قراها لو هو انقلب وجهه. أدري بي خايف بس عادي يعني أولها وتاليها راح أحبل خوبن ما أظل كل عمري بلاية خلفة. باوع عليّ ورجع باوع للنتيجة. -ها ما تگول شي؟ -صار التردي بالعافية أعليچ. -أبد ما فرحت يعني؟

-آنه خااااايف أعليچ ولچ حسي بيّه حسسسسي. ريحان لون صار ليچ شي ما راح أسامحنچ. أنتِ بالذات. لون تركتيني ومشيتي مثل البقية. ما راح أسامحنچ. عبن كل شي جاي يصير وراح يصير من إيدينچ أنتِ. -مستحيل أتركك. أنت مصدر قوة الريحان والقوي ما يهزمه شي بالحياة. -حچي هذا حچي. -لوعة گلبك اللي ردت من حلگ الموت ليك ما راح تموت وتتركك اطمأن يا عمر ريحان وحياتها أنت. -آااااخ يا لوعة گلبي. چنتي وراح تظلين ملوعته الـ هالضبع المسيچين.

-تشكي يعني من لوعة گلبك؟ -أشكي گليبي الـ گليبي وما أشكي من لوعته بيوم. بس حچاها حضنته. أكيدن يظل خايف بس آنه عكسه. أبد ما چنت خايفة من هيچ حاولت أخفف عنه بكلامي ولو بس شوي. شمس.. شهرين مرن على كلام الشيخ. شهرين وصخر زعلان ما يمر ولا يتصل بس مجرد يدز المصرف بـ إيد رجل أخته مثنى. اليوم طالعة من المستشفى اجاني فرات. هاي مو أول مرة. أجه قبلها أكثر من مرة بعد ما عرف أني ببغداد بس ما چنت أنطي مجال يحچي حرف واحد.

دامشي قطع عليّ الطريق وگفت أريد أشوف شيريد. -ها شلونچ شموسة؟ -شعليك. -أهاااا مو نسيت أعذريني. أدري بيچ شلونچ ما يحتاج أسأل متابع تفاصيل حياتچ أول بـ أول. -شتريد فرات؟! أنت مو خطبت هاي اللي چنت مصادقها وتطلع وياها؟ تلوگلك والله. حل عني ولتراويني وجهك القذر بعد ما عايزة مشاكل. -ههههههه شنو غرتي؟ أي ليش لا، فرات ديبني حياته وأنتِ حياتچ دتتهدم. بس ولا يهمچ.

أني مستعد أفسخ الخطوبة ونتزوج حتى لو عندچ أربع أطفال عادي الأطفال أحباب الله. -لك شدتخربط أني مرررة متزوجة. بعدين بنات العالم مو لعبة عندك اليوم تخطب باچر لا ما عجبني الوضع أريد أفسخ. -عوفچ من بنات العالم. حاچيني يا المتزوجة سي السيد مالتچ وين هااااا وين؟ گتلچ حبيبتي تذكرين. يجي اليوم وترجعيلي مكسورة بس ما صدگتي. حتى تعرفين محد بكل هالدنيا. يفيدچ ويخاف عليچ غير أهلچ المنچ وبيچ لأن الغريب ما يفيدچ بشي. -هه أهلي؟!!

ليش أني لو عندي أهل هذا حالي!! منو أهلي بلا زحمة؟ الطمعوا بشوية فلوس وقطع أراضي وعلمودها چانوا مستعدين يسلبون شرفي؟ لو عمامي لتعاركوا بيناتهم يا سبع منهم ياخذني الأبنة؟ لو أنت يا فرات العار؟ علمود شوية فلوس قتلت روح بريئة مالها ذنب بحقدك؟ عمومًا غلطان يا أبن عم الجيران. أبد ما انكسرت. لأن اني شمس ومستحيل الشمس تنكسر بيوم لتحلممم. ورغم كل شي عندي رجال گَوْل وفعل. رجال شاريني بماي عيونه.

ورغم كل هالزعل لا تخلى عني ولا راح يتخلى ويكسرني علمود والله شنو فرات أفندي يتشمت. وأنصحك لتحاول فرات. مراح يجي اليوم التتشمت بي صدگ. ولا راح تحصلني. أول بالأصح ممكن تحصل فلوسي هسه أروح أسحبلك من البنك كم شدة. أعتبرهن دفع بلاء عني وعن أطفالي. وأشمرهن بوجهك ومن يوگعن بالگاع تركض عليهن مثل الكلب من يركض على قطعة اللحم. هذا أقصى شي تگدر تحصلة مني وروح أهلي. أما شمس وأسمها ومكانتها.

عشم إبليس بالجنة وأنت وإبليس واحد بالنسبة إليه على الأقل. حچيتها ومشيت راد يلزمني سحبت أيدي حيل. گوة وصلت للسيارة. صعدت گبل نزلت الجامة مخنوگة خنگة بس الله يعلم بيها. سقت مسافة بلا شعور نزلت دموعي. هواي حاولت أداريها. بس هسه صدگ حسيت بنفسي تعبت وما عندي طاقة أتحمل هالمسؤولية وحدي. ما أدري شلون وصلت للبيت. بعدني بالباب سمعت صوت جهالي واصل للشارع. فتحتها وطبيت.

لگيتهم داير مداير خالتي بالصالة يبچون وهي گاعدة بنصهم وأيدها على راسها. -السلام عليكم. -وعليكم السلام تعالي سكتي جهالچ ترى تعبت والله. -شبيهم متفهميني؟ -شبيهم يعني يبچون على أبوهم كالعادة. شمرت الجنطة من أيدي ورحت حضنتهم. ردت حاولت. قريب الساعة أقنع بيهم ولا اكو واحد من عدهم سكت. كلش متعلقين بـ صخر. أقصى شي يصبرون عن غيابه أسبوع وراها يتنحسون. وهو عودهم على هالشي.

دللهم ويوميا چان يتصل فيديو وهسه فجأة بدون أي مقدمات اختفى من حياتهم!!! راسي وراس خالتي انفجر. من البچي حتى ميگدرون يجرون النفس بعد. ما تحملت أكثر. گمت أخذت الجنطة ورحت لغرفتي اتصلت بي ما رد. گعدت ع السرير أبچي مثل الجهال. ليش هيچ؟ شلون أنطاك گلبك تسوي بينا هيچ والله مگاعد أصدگ. صوتهم لهنا واصل. طلعت فتحت الباب وصحت بيهم كل صوتي. كاااااااااااااااااااااااااافي. من الخوف بس شهگتهم تنسمع حضنتهم خالتي وصاحت بية.

-تخبلتتتتتتي ووولچ. من الصبح وهم يبچون فوگ راسي ما أگدر يعني أصيح عليهم هاي ساعة ما تحملتي حضرتچ؟ طبيت للغرفة منهارة. أعصابي تلفت ما أتحمل أكثر من هالشي بعد. شلت تلفوني اتصلت بالشيخ. جاوبني واللگمة بحلگه سلمت علي وانتظرته يخلص. -هلا بنيتي هلا. -وبيك أكثر عمو شلونك صحتك شلونها إن شاء الله بخير. -هههههههه. يوميا أدگن أعليچ ويوميا تسأليني ذات السؤال. عمومًا لا تاكلين همي صحتي كلش زينة والحمد لله. -دوم يارب.

عمو اني فكرت بكلامك هواي. موافقة أرجع أستقر بالبصرة ببيت وحدي اني وأطفالي. -أي يا الله وأخيرًا. بس أكمل الغدة وأدگن أعليچ خاطر نتفاهم بالموضوع. -إن شاء الله. سلمت علي وسديت الخط أسمع خالتي تقنع بالجهال. ماكو أقل الدقيقة ودگ جهازي. باوعت صخر. ردت ما أجاوبه مثل ميسوي هو. بس لا اني أريد أخلص من هالمشكلة مو وقت عنادي. رديت بدون ما أحچي گال شلونچ. -الحمد لله بخير. -صدگ تردين تردين للبصرة مثل ما گال أبوي؟!! -مجبورة شسوي.

أطفالك يبچون عليك وأنت ولا يمك. خو ما أخليهم هيچ. اني راح أجيبهم وأجي لأن مهما صار همَ يظلون أبرياء مالهم ذنب بزعلنا. -تنور البصرة بيكم بوية. -شكرًا. -وين همَ افتحي التصوير خاطر أحچي وياهم شوي. طلعت برة بعدها الشهگة لازمتهم من كثر البچي. اتصلت بي وخليت الكاميرا گبالهم. بس شافوا رجعوا يبچون بالگوة سكتهم اقتنعوا بكلامه من گلهم باچر جاي أعليكم. اتصل الشيخ وتفاهمنا بالموضوع. توسلت بخالتي تجي ويايه أبد ما قبلت.

گالت اني انولدت هنا وراح أموت هنا بس أكيد شوكت متحتاجيني تلگيني يمچ. أسبوع تقريبًا ورتبولي الوضع هو والشيخ. أجه علينة يوم الخميس. طب ديسلم على خالتي بس شافوا الجهال گبل ركضوا الحضنة يتصارخون مو يبچون. ظل يبوس بيهم ويعتذر. بعدين أنطاهم ألعاب التهوا بيهن فـ سكتوا شوية. تغدينا سوة وودعنا خالتي. شبعت بچي علينة خطية تعودت علية وع الجهال مو سهلة سنين واني عايشة وياها. وعدها صخر كل أسبوعين يجيبنا ألها. تشكرنا منها وطلعنا.

وصلنا للبصرة بالليل وگف السيارة يم واحد من البيوت. الشيخ خطية چان واگف بالباب استقبلنا بالصلوات. ردت أطب أشرلي صخر. هذا بيت غسق وذاك هناء يعني كلهن يمچ. باوعت زين والله. بيت غسق بصفي بالضبط أما هناء بعد عني بيتين بس. دخلنا سلم الشيخ وراح. البيت كامل من كل شي وماطول ذوق صخر فـ أكيد يعجبني لأن ذوقه يجنن خصوصًا بالديكور. افتريت بالبيت اني والجهال. وراها بدلت الهم حتى ينامون تعبوا من الطريق. راد صخر يگوم بچوا علي.

بدون ما أباوع واني دابدل لجوهرة گتله ظل هنا خطية مشتاقيلك. ما أدري شنو ردة فعله لأن عيوني مو علي. أخذتهم ينامون بچوا. يخافون يعوفوا ويروح هيچ تعلق ما شايفة بـ حياتي كلش متعلقين بـ أبوهم مو شلون مچان. آخر شي گام هو نومهم. طبيت للغرفة تعبانة بس بدلت نمت على وجهي. للفجر شبعت نوم. گعدت لگيته نايم يمهم بالغرفة. وهمَ واحد منا ومنا واثنين على أيده ما أدري شلون متحملهم هيچ. الكل فرح برجعتي.

دوامي نقله صخر ردت ما أداوم بسبب الأطفال بس هو أول واحد عارض هـ القرار. خالة نجمة گالت خليهم يمي. ثناء غسق الحجية كلهم ما قصروا ويايه. رجعت للدوام بالبصرة. وحياتي مشت الحمد لله شهر يلا گدرت أستقر شوية. صخر من يوم ما رجعنا صار يبات يمنا. اني هم ما عارضت. أطفاله محتاجيه ما أگدر أحرمهم منه. ويمكن اني محتاجته أكثر منهم بس الخوف مديخليني أتقدّم خطوة. اليوم العصر گاعدة ألملم بالبيت والجهال ويلعبون يمي. اندگت الباب.

خليت حجابي على راسي وصحت منووو. اجاني صوت مريم آنه عمة. رحت فتحتلها ع السريع تقريبًا يوميا دتجي تظل لليل وتروح تتونس ويانة. طبت سلمت دأسد الباب طبت أمل. باوعتلها متفاجأة. سلمت رديت بثگل گالت ها شني ما راح تگليلي تفضلي. فتحت الباب وأشرت ألها بـ أيدي. طبت بوست الجهال. رحت للمطبخ جهزت العصير والكيك. رجعت لگيت باقر ديلعب وياهم بسته وأنطيته 25 ألف. -لا هاي شني شمس. -مو إلچ السلامته ما صارت فرصة أشوفه بعد العملية.

-رحم الله والديچ. -هزيت براسي بدون ما أجاوبها ظلينا ساكتين. شوية وگالت جايتچ بشغلة وأترجاچ لا ترديني. -خير إن شاء الله. -ردي لصخر خطية ماله ذنب هو. -أمل. -بس أسمعي مني وتالي أحچي التردي. آنه الغلطانة هو ماله ذنب. كل الصار أمي وخواتي ونجاة ونجيبة لعبن بعقلي. بعد أربعين إلياس الله يرحمه اشتعلت الحرب الباردة من جدي أعاليه وأعله فروخي. جدام الشيخ گال فروخنا ما ننطيهم. وجدامي يگول:

تظلين هنا الوحيدچ وفروخچ يردون لأهلهم عبن آنه ما أتحمل مسؤوليتهم. عيشني بـ أيام بس الله اليعلم بيها. تالي اجاني عمي. گال تزوجي أختاريت صخر. عبن هو يحبچ وما راح يجي اليوم اليتنوع ليه بنظرة مرة. بس صار شي عكس كل تصوراتي. أمي وخواتي لامني. شمس ماراح ترضى ويجي اليوم وتخليه يطلگچ لأجلها وصخر ما يرفض ليها طلب. ظلن زن زن زن بـ أذني. وأنتِ تدرين الزن أعله الأذان أمر حتى من السحر. وأكيدن شفت كلامهن صح.

عبن أدري بي شكثر يحبچ وما راح يتردد يعوفني لون أنتِ طلبتي منه هالشي. وأستمر الحال هيچ سنة. منين ما أدورن وجهي يحچن بـ أذني. خصوصًا آنه شفتچ شلون تغيرتي عگب زواجي وعرفت ما راح تظلين ساكتة. وبقن يمشّن بية بلاية عقل. سمعت چلمتهن. وصار الي صار لحد اليوم الراد يطلگني بي بسبب أختي. هنا آنه عرفت برويحتي غلطانة. خواتي موش هيچ. ما يردن مصلحتي بكثر ما يردن خراب بيتي واستقراري ويا فروخي. وعگب ما شفت رجولة صخر.

وتمسكه بشهامته رغم كل شي عملته ويا عرفت الصح أنتم والحولي كلهم غلط. وربچ چنت أتمنى تصير ليه هالفرصة وأجيچ. بس ما أتجرأ. لحد اليوم الصبح أجاني الشيخ وردينا نحچي بالسالفة من عرف گال عليش ناطرة. روحي ليها وأحچي هالحچي كله. وهي تتفهّم. شمس گلبها چبير والدليل رغم كل مشاكلها ويا زلمتها ما رضت يطلّگچ لأجل فروخچ. نطرتچ تردين من دوامچ وما صدگت صار العصر. أجيتچ بطرگ العباية. سامحيني شمس ردي الزلمتچ وراس أبني هذا المريض.

حچتها وطفرت على أبنها تبچي لزمت راسه. -وعافيته المسلوبة منه آنه موش هيچ. ولا تخافين مني. ما طولني أعله أسمه ومستقرة ويا فروخي ما أريدن شي بعد بس لا تخليه يطلگني. التفتت داير مدايرها تمسح بدموعها. شالت القرآن من الميز. حطت أيدها علي وقسمت يمين عظيم يكسر الظهر صخر محرم عليه مثل حرمة أبوي. وربي يحرمني من فروخي وعافيتهم لوني چذبت. ردي شمس. والقرآن خصيم بيناتنا ساعة الأخلف بچلمتي هو الياخذ حگچ مني موش الوادم. ما حچيت شي.

هي هم گبل أخذت أطفالها وطلعت. مدري شصارلي. خلصتها بچي لليل كلما أنسى الموقف أرجع أتذكر وأبچي. أجه صخر بالعشرة. سويت العشى گال شمالچ گتله تعبانة. تعشوا ورحت نومت الجهال بسرعة حتى أختلي بنفسي. رجعت لغرفتي. گعدت ع الچرباية أبچي. صوتي ارتفع بدون ما أحس گبل صخر فتح الباب وطب. من شافني أبچي ركض گعد يمي وسحبني الحضنه. انهاريت أكثر عبالك أريدلي حجة. ظل يمسح على راسي وعاصرني بحضنه لحد ما هدأت. -شمالچ بوية؟

من أجيت ولساع آنه أحسن بيچ شي وأنتِ ما ترضين تحچين ليه. -خايفة مخنوگة ضايجة. كل شي صخر كل شي ماكو شي ديريح گلبي. -أحچي أسمعنچ خاطر ترتاحين شوي. سولفت إله كل كلام أمل. باوعلي مبتسم ومسح دموعي الگااعد تنزل مثل المطر بـ أطراف أصابيعه. -گبل لا تحچي أمل آنه حچيت. گتلچ ما أسويها. حرمة أخوي ما راح تصير ليه حرمة الحين ما يوسدوني بلحدي. وعليش أدور غيرچ وآنه ما أشوفن إلا أنتِ وبس. صار شگد هاجرتني.

ما أگدر يعني أروحن أتزوج مو إلا أمل لا. الحريم خير من الله وألف وحدة تتمنى تصير بمچانچ. ولا تنسين أنتِ دفعتيني أكثر من نوبة. گلتي روح تزوج. بس آنه ما سويتها ولا راح أسويها تعرفين عليش؟!! آنه أجاوب عنچ. أولًا أعرف هالشي ما نابع من هنا.... وأشر على صدري. ولون سويتها تموتين مثل موتتي بغيابچ. وموش صخر. اليرضى يصيب حرمته الي تعذب علمًا حصلها مكروه ويظل واگف يتفرج. ثانيًا والأهم من الـ أولًا.

الدنيا بعيوني مثل سما ربچ الواسعة. لو ما هي ما تمشي الحياة. الشمس والگمرة واحدهم يكمل الآخر أما النجوم وجودها وعدمه واحد عندي. آنه بلياچ أظلم شمس. گمرة بلاية شمس معناتها الحياة توگف. ومامش بشر يحب حياته توگف بالظلمة عبن أحلى شي بدنيانا نور الشمس رويحتي. باوعت علي أبچي گال صح لو لالة. هزيت براسي أي. -بس أنت تخليت عني بـ آخر أيام. -ردت أجبرچ تردين عبن أدريچ مأمنة هناك بسبب جيتي المستمرة أعليكم. -خبيث والله....

حچيتها بشهگة. گبل مسح دموعي وباسني، استسلمت مباشرتاً لأن چنت مشتاقتلة حيل. همس بأذني بعد ما نومني: "مشتاگلچ شمس دنياي. اشتاگيت شوگ المسودن عبن ما ظل عگل براسي عگب عنادچ الحرگتيني بي." ابتسمت والدموع بعيوني. دنگ باسني بلهفة وصارت هالليلة من أحلى ليالي حياتي بعد سنين من العذاب والتفكير. الحمد لله مشت حياتنا وأخيراً. صح خايفة وراح أظل خايفة، بس اعتمدت على شغلتين: الأولى ثقتي بصخر وحبه النادر.

والثانية اليمين العظيم اللي قسمت بي أمل على القرآن بعافية ابنها العليل. واثنينهم يعرفون مو شمس اللي ينضحك عليها وتسكت. غسق: أربع أشهر مرّن على حملي. إسحاق شايلني بالصلوات، توصل بي من يجي للبيت يشيل عني كل شي، حتى دراسة ود. فرق بيني وبين ريحان أسبوع بالحمل. دخلت هي بالرابع وانتظرتني أسبوع، يلا رحنا للسونار. قبل لا أطلع خبصتني ود: "إن شاء الله بنية وإن شاء الله بنية."

بصراحة متفرق عندي، بس لأن حملي صعب وأريد أشوف مستقبلي تمنيت ولد. أخذت ريحان سونار طلع بيها ولد. من الفرحة بچت. "الحمد لله وأخيراً رب العالمين عوضها عن ابنها الراح." صعدت وراها وغمضت. المهم عندي الطفل سالم وكل شي يجي من رب العالمين خير وبركة. سمعت نبضات قلبه. فتحت عيني باوعت للدكتورة: "ها بي شي الطفل؟! "لا بالعكس، ولد وصحته عال العال." سحبت نفس براحة وغمضت.

لو أشكر ربي وأحمده ألف مرة هم ما أوفي حق أفضاله ونعمه المستمرة علية. طلعنا أني وريحان، إسحاق وأيوب ينتظرونا. اثنينهم خايفين مدري شجاهم. صاح أيوب: "ها ريحان، بشري بوية بيچ شي؟ هزت راسها وبچت خطية من الفرحة. أيوب: "احچي عاد عليش تبچين؟ ريحان: "فرحانة راح يجيني ولد أيوب." أيوب: "چا ألف الحمد لله بوية. يلا تعاي أوصلچ خاطر أردّن لإسحاق، عدنه شغل مهم." حچاها وصعدوا بالسيارة. سحبني إسحاق من أيدي صعدني وسد الباب.

أول ما ركب گال: "احچي عليش ساكتة، مو گليبي راح يوگف؟ "راح يجي أخ البناتك حبيبي." هو أني گلتها ما أحس إلا رفع أيدي باسها. ضحكت: "منا العالم شدتسوي يمعود؟ "هم صح، خلي الفرحة للبيت... " وغمزلي. مرت الأيام والأشهر والحمل كلش متعبني. أني لا شيء يم ريحان. خطية سكرها دمّرها، منا لما وصلت للتاسع ماتت باليوم ألف موتة. أول ما دخلت شهرها حددولها عملية. انخبصوا بوقتها.

حتى إسحاق أخذني ورحنا بتنا يمهم بيومها علمود أظل وياها، يدري بيها خايفة. الحمد لله جابت بالسلامة بعد ما وگّعت گلبنا. أيوب سمى أحمد حسب رغبة ريحان. وهيچ انزاح أكبر هم چان محاوطنا طول هاي السنة. أني تأخرت وراها. أكلت شهري كله آخر يوم بالتاسع يلا اجتني الطلوگة. ما عافوني خطية كلهم يمي: عمة صبيحة، سكينة، الحجية، خالة نجمة، حتى البنات. وكلهم كوم وإسحاق كوم ثاني، احتار شيسوي.

خايف علية أكثر من خوفي أني الگاعد أطلگ والوجع مسيطر علية، صدگ حسيتة عوضني. وين ولادتي الأولى ووين هاي؟ هناك أحتاج الكلمة. وهنا بس أريدهم يسكتون ويعوفوني، ماكو محاوطيني من جميع الجهات. والحمد لله جبت بالسلامة. طلعت من المستشفى إسحاق ينتظرنة بالباب. گبل باس راسي گدامهم، أخذ مني يوسف أذّن بأذنه. ورجعنا للبيت، ود طارت فرح بأخوها بس أويلي من غيرة رقاوي. ترف: صارت 2020. كورونا والدنيا مخبوصة، حتى المدارس تعطلت.

وبسبب هالشي جاب حبيب موبايل إلي حتى أدرس عالنت، خصوصاً هالسنة أني وزاري والموضوع صعب علية. ما قصّر وياية بشي. چان يرجع من دوامه تعبان يشرحلي لحد ميغفى على نفسه، شگد أتوسل بي يرتاح ميقبل. علاقتي بي تطورت شوية. عاف سالفة بت أخوية وخلصها، "بوية ارحم عاد" بهواي. حبي إله يكبر يوم بعد يوم. وأحس باهتمامه. بس مع ذلك أبد ما تقدم خطوة باتجاهي رغم أني بيّنت إله رغبتي بي أكثر من مرة. اليوم الظهر طبيت للغرفة تعبانة من شغل البيت.

بعده ما راجع من برة. ظليت أقلّب الكتب بملل، سمعت صوته برة، گبل گمزت للزاوية ختلت مدري ليش. طب للغرفة صاح: "ترف وينچ بوية؟ ما رديت. راح للحمام ما لگاني صاح بصوت عالي: "تررررف! چنت ورى. گبل طلعت ندسته بخاصرته، فز فزة بس الله يعلم بيها. "شمالچ بوية، صدگ تحچين؟ "ههههههه أي." "اللهم طولچ يا روح، هالجاهل اليمتة تكبر ما أعرف." "أني مو طفلة." "جاهل وموش أي جاهل، طگة ونص همينة." "مو جاهلة." "جاهلة."

"مووو جاهلة موووو جاهلةةةةة! حچيتها وتقدمت بَسته من شفته. ظل متصنم لا ياخذ ولا ينطي من الصدمة. حطيت أيدي على رگبته وحضنت خصره حيل، شوية وبادلني البوسة. بس بسرعة صحى على روحه. بعدني يصيح: "شجاي تسوين تسودنتي خوبن ما تسودنتي؟ حچيت ويا نفسي: "يلا هي خربت." "أي تخبلت. أنتَ خبلتني، كم سنة صارلنة سوة وبعدك تصيح جاهلة؟ أني مو جاهلةةةةة! "بعد سنة وأبلغ السن القانوني. شوكت أكبر بنظرك؟

شوكت تشوفني مرة مو بس بت أخوك وبتك وهالسوالف التعبانة؟ ليش تحسسني أنتَ عايش بالخارج؟ ترى البعمري صارن أمهات. لتفهمني غلط مو قصدي البراسك بس لتگول جاهلةةة! ما حچه شي خله وطلع. لليل طب، چنت أقرا. گعد بصفي ما اهتميت. صاح: "ترف! " ما جاوبت. رجع صاح: "مو أحچي وياچ! " وسحب الملزمة من أيدي. "خير شتريد؟ "احچي عدل بوية، ما أحب هالنبرة بصوتچ." "تفضل أسمعك شرايد حبيب؟ "أنتِ شني التردي؟!

"أريدك. أي أريدك، لتباوعلي هيچ، كافي كبرت وأريد أعيش وياك حياة طبيعية وهالشي حقي." "أخافن يجي اليوم التندمين بي. آنه تركتچ تكبرين خاطر تقررين حياتچ مثل ما تردين." حطيت أيدي على حلگه، سكتة بسرعة: "ليش أندم؟!! تتصور أگدر أحصل رجال مثلك، يحبني ويحترمني، والأهم يصيرلي أب وصديق قبل لا يكون مجرد زوج؟ "متأكدة يعني؟ "أحبك أني أحبك، متأكدة شنو؟!! ابتسم، گتله: "لتصير خبيث، احچي خلي أسمعك." گبل نومني عالچرباية.

دنگ علية يباوع لعيوني، أجه يغمى علية، هاي أول مرة يتقرب مني هالشكل. دنگ يم أذني بهمس: "آنه أموتن عليچ، غير أنتِ بنيتي الربيتها على أيديني مثل النبتة وهاي آنه اليوم جاي أحصدها." "أي وبعد؟ "ونطرتها تكبر خاطر تصير أحلى حرمة لية." "هههههه وبعد؟ "وراح أسوي ليها أحلى زفة تلوگ لهالعيون الحلوة." بس حچاها گمزت على حيلي: "صدگ والله؟ "أكيدن آنه مقرر ومن زمان، لون رضيتي بية زلمة أسوي ليچ العرس التتمني."

"يعني راح ألبس بدلة بيضة مثل البنات وعرس وهيچ؟ "هههههههه وآنه لأجل فرحتچ هاي مستعد أسوي ليچ بدال العرس عشرة يرويحتي." بس حچاها حضنته. ماكو ثاني يوم انطا لعمته فلوس حتى تجهزني. أسبوع وأحنه نجاهد، ولا كأنو صارلنة سنين عايشين سوة وگاعدين عقال. اليوم عرسي من أعقل وأنبل رجال شفته بحياتي. أخذوني من الصبح للصالون. وأمي ممصدگة كل شوية وتسأل: "صدگ اليوم عرسچ؟ شمس: نفس مأساة كل عرس، الهوسة بس علية. جوهرة مريضة فصايرة نحسة كلش.

گاعدة يم رجلي وتبچي، شلتها وطلعت للصالة ماكو بس النسوان گاعدات. تمشيت للممر لگيت صخر واگف يم الباب. داير ظهره ويلعب بالموبايل. ضربته على چتفه: "تلزم بنتك لو اليوم تنحرم من حقوقك! دار ظهره، صهيب گوة لازم الضحكة بس واضحة علي. لو بإيدي أطّم روحي بمكاني. المصيبة يتشابهون وجه وگفة، وهذا هم مثل أخوه لابس نيلي، بلا أني شلون أميّز من الظهر. "آسفة خويه والله آسفة، عبالي صخر." حتى ميگدر يحچي من الضحكة الحاصرته.

مد أيده أخذ جوهرة. رجعت أغم بروحي، فشلة متنسى راح تظل يمه: "وصمة صار عليچ شمس الثولةةةة! لاگتني هناء تضحك: "هاي شبيچ تسودنتي؟ سولفت الها الصار. بدل متواسيني خربت ضحك علية، گلتلها: "لو تموتين ما أمكيجچ اليوم! " وعفتها ورحت. طبيت للغرفة، طيف دتشتغل بيهن. اجت بطلب من حبيب. علاقتها بالشيخ مو كلش بس أحسن من قبل، عالأقل بالمناسبات صارت تجي لهنا. ترف: رجعنا من الصالون، الهوسة شگدها. عود كورونا.

أحلى شي گاعدات النسوان ياكلن لگمة ويصعدن الكمامة، منظرهن يخرب ضحك. صدگ ورغم كل الظروف تونست بيومها كلش. أحلى زفة صارت. صورنا ورجعنا للبيت، أخذوني للغرفة شوية وطلعوا لأن طب حبيب. عود أني الچنت سباعية. تالي صرت مثل الفارة يمه، لا أخذ ولا أنطي بعد. سد الباب وتقرب مني يضحك. هزيت براسي: "شكو؟ چان يگول: "وينها التصيح آنه موش جاهل؟ "أي مو جاهلةةة! "چا يلا راويني الترفة، شني ناوية تعمل خاطر تثبت أنوثتها لزلمتها بمثل هاليوم؟

ما سويت شي غير البوسة، بيها انطيته الضوء الأخضر حتى ياخذني وأصير مرته. تعامل وياية بيومها بكل هدوء. صدگ حسيتة أب، يخاف علية من كل لمسة وكل حركة. وقبل ليسوي أي شي يسألني أخاف دأتوجع أو أعارض قربه. والحمد لله صرت مرته. رغم جمال أخلاقه ورجولته بالسنين الراحت. بس بعد اليوم اكتشفت بي إنسان أحلى بألف مرة من الإنسان العاشرتة بالسابق. هناء: العصر گاعدة أني وأمي نتفرج تلفزيون، اندگ الباب. گمت صحت: "منو؟ ردت مريم: "آنه عمة."

تعودت كلما تروح أمها لبيت جدها تجي يمي. مرات تروح لبيت الشيخ. ومرات يم شمس. بس أكثر شي يمي لأن أني أونسها، نوگف نطبخ نرتب الملابس وهي تموت على هالسوالف. "ها عمة شلونچ؟ "بخير حبيبتي، شنو ماما راحت لبيت جدچ؟ "أي وگالت اليوم أبات عبن حبوبتي مريضة شوي." "أممم يعني راح تباتين يمي؟ "أي ونسوي كنافة، أنتِ وعدتيني من النوبة الراحت." "هههههه مو تدللين. كنافة وبيتزا وكل شي تحبي، يلا تعاي من هسه نبدي." جاي نشتغل اجت شمس.

صدگ بيومها تونسنا عبن شمس هم عدها واهس بهاي السوالف مثلنا. شمس: رجعت من يم هناء بالليل. ما سويت عشى. اتصلت على صخر گتله: "أكلنا ببيت أخوك مراح أسوي شي." گال: "چا آنه أكل يم أهلي وأجيكم." للعشرة ونص يلا أجه. ظل يلعب ويا الجهال لحد ما تعبهم وناموا. أجه للغرفة چنت متمددة. حضني وظليت أسولف إله شصار اليوم ويا مريم يم هناء وهو يسمعني ويضحك. نايمين الفجر، الباب تكسر مو اندگ. گام صخر مخروع. طلع بعد ما رجع،

ظليت ألوب بمكاني: "شصار ويا يربي؟ هناك وأسمع صوت الأطفاء. وصياح وهوسة. والدنيا مخبوصة برة، لبست عباتي وطلعت أركض، شفت طفل بالشارع سألته: "شصاير؟ "بيت عواد احترررررگ! هو گال هيچ لو أني تخبلت. بيت عواد يعني أمل، يا الله بايتة يم أهلها هي وولدها. من الخوف ظليت أبچي وأني ما أعرف شديصير. وفعلاً خوفي بمحله. بصيف أب 2020 احترگ بيت أهل أمل بتماس كهربائي بسبب التبريد. وانفجعنا أكبر فاجعة ممكن تمر علينا. أمل وولدها ماتوا.

ما ظل من أطفال إلياس غير بس مريم يتيمة الأب والأم، راحوا وعافوها وحدها. ومو بس أحنه انفجعنا. حميد هم انفجع بهالمصيبة لأن ابنه وأحفاده ماتوا بهالحادث، ما ظل أي بشر من أهل أمل. بحيث حميد انجلط وگعد عالكرسي ولليوم ما تعافى. الصدمة چانت كلش چبيرة. ما گدرنا نتجاوزها بسهولة خصوصاً الشيخ والحجية على أثرها اثنينهم وگعوا بالفراش أيام. طلبت من صخر يجيب مريم أني أداريها. رفض بسرعة.

گال: "أبوي انطاها لصهيب، همين عبن ما عنده جهال وهمينة هناء تجرب احساس الأمومة وياها." غسق: 2020 أسوأ سنة مرت علينا إحنا بالذات. رغم كل مساوئها العامة، بس موت أمل وجهالها چان فاجعة متنوصف على كل بيت الشيخ. وگدرنا نتجاوزها ونعيش، صح بصعوبة بس الحياة تمشي وهذا قانونها للأسف. بداية 2021 سوّالي إسحاق هوية النقابة وبديت أداوم بالمحكمة. ودة كبرت وصارت تعتني بإخوانها، وأني هم ما أتأخر ساعتين تلاثة وأرجع علمودهم.

وهيچ استقرت حياتنا الحمد لله. شمس تداوم بالمستشفى وبعدها على أطفالها الأربعة وعلاقتها بصخر أحسن ما يكون. مريم إجت هدية من السما لصهيب وهناء، عوضتهم حرمان الأطفال. وصارت تصيح الهم بابا وماما بحيث هناء تحبها وكأنها ربتها من الطفولة. الحجية وبعد خسارتها الجهال إلياس وصدمتها الچبيرة بيهم تغيرت كلش، خصوصًا بسبب مريم. من شافت هناء شلون تداريها وهي تصيحلها ماما سكتت عنها وعن موضوع الأطفال.

ترف وحبيب عصافير بيت الشيخ ضاري، حياتهم أحلى ما يكون. بس لحد الآن ممقررين يسوون أطفال علمود دراستها. أيوب طاير بريحان صارت إله أهل قبل لتكون زوجة. عوضته غياب أمه وأخته وترست بيته بالحب والحنان. لوعة گلبه بعد هاي وصارت أم أطفاله شلون ما يفرح بيها. جمار ما عدنا أخباره. بعد سجن أمه ومرته وخطوبة ريحان، اختفى هو وابنه. وطبعًا ريحان فرحت لأن متريد شي يذكرها بالماضي. كلمن ظلم نال جزاء ظلمه. فاتن ونهلة وعامر لسه بالسجون.

أهلي وولد عمي وكل الظلموني أخذوا العقاب اليستحقوه. حميد مقعد ع الكرسي بعد خسارة ولده. رؤى لحد الآن مثل السجينة. لا تطلع لا تطب. معيشها حنظل بحرب نفسية حتى العرس حبيب مخلاها تحضر بيومها. من غير أمها إلي منعهم هي وإخوانها منها. بحيث هاي السنة الثالثة لا شايفتهم ولا شايفيها، وكلما واحد يفتح ويا الموضوع يسكتّه بصوته العالي. نجاة ونجيبة أبوهم ما قصر وياهم. نجاة من الضرب سمعت صار برجلها إعاقة تكزل عليها.

ونجيبة حابسها بالبيت، مثل ما أطفالها تحرموا عليها اتحرمت عليها شمس رب العالمين. عرفت بعدين نجاة السبب بكل المشاكل، حتى سالفة الفلوس. يوم النباگن من غرفتي هي چانت وراها، علمود يتهمني إسحاق لأن تعرف علاقتنا بذيچ الفترة چانت متوترة بشكل. وما اهتميت للموضوع. الصدمات إلي تلقيتهن بحياتي أكبر من أن أهتم الهيچ موضوع بسيط من وجهة نظري. طيف لسه ما تجاوزت أزمتها.

أي تحب الشيخ وتتمنى تتقرب منه بس المشكلة متگدر تنسى حياتها الماضية رغم هواي حاولت وياها. أما إسحاق فتعجز الكلمات عن وصف هالرجال. الشخص الإحتواني بعز ضياعي. وصارلي وطن يوم الغربتني الدنيا وأب يوم إلي تبرى مني أبويه الواگعة من ظهره. ورغم كل شي ظل مثل ما هو ما تغير. شهم ورجال بمعنى الكلمة. ما فديوم عيرني بالماضي ولا حملني منية أفضاله عليه. بالعكس دائمًا من أشكرَه يگول ما سويت إلا الواجب.

والأهم من هذا مثل ما تخلصت من كابوس الماضي، هو تخلص من كابوس الخيانة. أطب أطلع موبايل أختلط، لا فد يوم حاسبني ولا شك بيه ولو حتى لو بالكلام. هاي أحنا مثال بسيط عن نساء العراق الأبيات. غسق، شمس، ريحان، هناء، ترف. أثبتنا لكل العالم أحنا قويات بلا سند، وعمر الشرف ما ينباع بحجة الظروف. كنا ولا نزال شامخات. فـ رغم عواء الذئاب تبقى الطيور تحلق باسم الحرية. وكل واحدة منا سـتردد دائمًا وأبدًا:

أن ضاقت الأرض بي، فسماء الحب واسعة وأنا امرأة بنت جناحها من حديد تسقطكم ولا تسقط.