رواية وضاقت الأرض بي الفصل السادس والعشرون 26 - بقلم لبنى الموسوي

#وضاقت_الأرض_بي

للكاتبة #لبنى_الموسوي

حچاها ومشى
من الخجل اجيت اوگع على وجهي لو ما صوت الرمي صحاني على اخر لحظة

ركضت آنه وعمة سكينة للشباك
شفنا جمار خاتل سد السيارة وملثمين يرمون على بيتنا شامي عامي

استمر الرمي واحنة نتصارخ بمكانة
باوعت على جمار هستوة گام خاطر يصعد بسيارتة اجت بصدرة طلقة وگعتة من طولة بالگاع

گبل انسحبوا بصورة سريعة
طلعنا مفزوعين چان الحارس واگع يم الباب
خطية الظاهر هو هم تصوب

فجأة ردوا يرمون
رفعت راسي لا هذا الضبع جاي يرمي عليهم خاطر يعرف ياهو الدافعهم وشني غايتهم من هالسوايات

مرت عمي تسودنت على ابنها
گاعدة فوگ من راسة هي وهالة يبچن ويملخن برواحتهن وعمة سكينة يمة تحاول توگف النزف من جرحة

شوي وبطل الرمي
اجة ايوب يركض گامت عمتي تلگتة وهي تبچي
يمة دخيلك الحگ الرجال راح يموت

- عمة اخذيهن وفوتي للداخل

ريحان.. ايوب شيلة بساع مو راح يموووت

- الخاطر دين محمد فوتن اليجووووة

اجت عمة سكينة سحبتنا بالگوة
ظلينة واگفين بالباب ما نگدر ندخل ليجوة واحنة نشوف جمار متوسد الگاع ودمة على طولة

سحب ايوب الموبايل من جيبة واتصل باخو
- ها خالد تعالي البستان الشيخ
يخوي موش وكتك فضني وجيب جابر وياك بالعجل

سد الخط وركض على جمار
گعد يمة نزع غترتة ولف بيها صوابة،، بعدة توة گايم اجو اخوانة يركضون

خالد.. صگد مثل ما يگولون داگين دار الشيخ

ايوب.. الوادم جاي تموت وانت تسأل
فوت عيني خاطر ناخذ جمار والحارس للمستشفى

خالد.. چا والنساوين ياهو اليظل جارهن

ايوب.. جابر انت ظل هنانة
آنه ما اتعطل اذبنهم ليغاد واردن عبن اليوم من كل وبد نعرف ياهو التجرأ وسواها مرت الاخرى

حچاها وگام رفع جمار لسيارتة
دار وجها باوع علينة بعدنة واگفين چان يعيط بكل صوتة

- عممممة آنه شگلت
اخذيهم وفوتي للداخل الوضع ما يطمن ااابد

وما اوصيچ هااا
ما اريدن الشيخ يسمع بلي جرة هساع
خلنة يوصل بالسلامة بالاول وتالي يصير خير

اخذتنة عمتي ودخلت
هن مشن ليجوة بس آنة ظليت واگفة اليم الشباچ اباوع على دمة مالي الگيعان

ساعة تقريباً وشفت ايوب رد
ظل واگف برة يحچي ويا جابر تالي اخذة ومشوا الداخل البستان

ظليت بقلق موش طبيعي
عليش راح ليغاد لو بس جاي مطمنة وتالي يروح
ما يصح يخلينة عايشين بهيچ خوف وهو يعرف كلش زين احنة ناطري على نار

شوي وردوا لينة
بس شفتة اجة طلعت اركض فتحت الباب وآنه اعدل بحجابي صار ايوب گبالي

- شني المطلعچ هساع

- فدوة طمني جمار شلونة

- لا تخافين زين
دخلي يلا خاطر تخبرين هلة
وما اريدن اتنوع الطولچ خارج هاي الباب مرت الاخرى

بس حچاها دخلت للبيت
رحت للصالة طمنتهم على جمار وظليت گاعدة جارهم اكثر من ساعتين

صارت الـ 11 ومامش خبر اجانة منهم
گامت عمتي لبست حجابها وراحت للباب سمعتها من بعيد صاحت الأيوب ورجعت للصالة

شوي وصاح يا الله
گالت عمة تعال يمة ذابات اعلة راسهن
بس دخل للصالة گامت مرت عمي تركض تلگتة بدموعها

- خالة الله يحفظك الشبابك
اذا ابني بي شي احچي فدوة لتضم علية

- وحگ الباري مابي إلا العافية
هذا اخوي جارة دگ هساع طمني تجاوز الخطر وگدروا يشيلون الچيلة من جسمة

- اي الف الحمد لله والشكر
زين شوكت نشوفة ما تاخذني الة فدوة العينك

- هساع يوصل الشيخ وبيچ خير وتتدللين

سكينة.. ما خابرتة للتالي

ايوب.. لا عمة
عليش اخابرة وهو بدرب سفر
بس يتدوهن اعلة الفارغ عبنه كل شي ما يگدر يعمل بمچانة

فاتن.. زين بس اتصل شوفهم شوكت يوصلون

ايوب.. اي گبل شوي دگيت اعلة إسحاق
ما ظل شي ساعة ساعة ونص ويوصلون بس هدن ارواحتچن الفات مو بگد الجاي هانت والله

سكينة.. چا عمة فهمني
منين نجيب الهداوة وهم يوميا داگين دار الشيخ بعز النهار

ايوب.. لا عمة اعذريني عبنچ غلطانة
هم ما دگوا دار الشيخ بل دگوا گبورهم بـ ايديناتهم وراح يتوسدوها عگب الچم يوم

سكينة.. لونك يالضبع بظهر ضاري مامش بشر يگدر يمسة بسوء

راد يحچي دگ جهازة
جاوب وطلع برة گبل رحت ورى
چان واگف يحچي بعصبية ما اعرف شبي وكلش خفت لا الموضوع يتعلق بجمار

بقيت اراقبة يروح ويجي ومستمر بالكلام
شوي وسد الخط راح يم اخو ما اعرف شني گالة ومشى

رجعت للصالة
گعدت وياهم وفكري صار يودي ويجيب
اچذب لون گلت حبيت جمار بهالعجل بس يظلة ابن عمي ومن هيچ احسن گلبي هساع راح يوگف من الخوف علي

قريب الوحدة سمعنا الهوسة برة عرفت اهلي اجو
گمت من مكاني بس شني اخوط برجلي خوط عبن جسمي كلة يرجف هم مماكلة شي وهم سكري صعد من الهبطة وفوگاتها ما ضربت الابرة اليوم

غسق.. دخلنا للبصرة الضهر بالوحدة تقريباً
وصلنا للبوابة الرئيسية التابعة البستان الشيخ انصدم إسحاق من شافها مفتوحة والحارس ماكو

ساق بشكل سريع كلش
يمكن راد يدخل ليجوة علمود يشوف شكو قبل لا يوصل الشيخ لأن احنة چنة سابقيهم بمسافة بسيطة

اول ما وصلنا
شفت اثنين رياجيل قريب على البيت
واحد منهم شايفتة بس مداذكر وين نزل إسحاق الجامة وصاح ضبببع گبل تذكرتة هو هذا نفسة ايوب

نزل من السيارة وگال خليچ لا تتحركين
ظلوا يحچون بيناتهم بس ما گدرت اسمعهم لأن واگفين مسافة بعيدة شوية رجعلي

بعدة توة صاعد للسيارة وصلوا اهلة
اخذني للبيت ذبني يم الباب ورجع يمهم لأن صارت هوسة ومن منظر المكان عرفت راجعين متهجمين على بيت الشيخ مثل المرة الماضية

اول ما دخلت تلگوني يبچون
ظليت صافنة ما ادري شصاير وليش هذا حالهن بعدين عرفت منهم جمار والحارس متصوبين بسبب الهجوم

اخذت ود وصعدت الغرفتي
غيرت ملابسي ع السريع علمود انزل يمهم اندگت الباب بـ هالاثناء

صحت تفضل
فتحتها شمس ودخلت
الحمد لله على سلامتكم حبيبتي

- الله يسلمچ
تعالي ليش واگفة بمكانچ

- صخر وينة لعد ؟؟

- برة بعدة يم الشيخ
احچيلي شنو الصار وشوكت هجموا ع البيت هالميخافون الله

- اسكتي غسق
والله مداحس بگلبي من الخوف
بعدنة نايمين والدنيا انخبصت بالرمي متدرين شلون گمت مفزوعة من الفراش وكملت ويانة من تصوب ابن عمهم والحارس

- اي اني هم بأول مرة عشت نفس الخوف

- ليش قبل هم مسويها

- اي بيوم زواجي
هم هجموا من الصباحيات وتصوب إسحاق بوقتها بس الله سترة

- يااا
عود منو هذولة وليش ديهجمون عليهم

- والله محد يعرف
تدرين بعد عشاير وهالشي مثل الزلاطة بالنسبة الهم ولو الشيخ ميستاهل واحد يعتدي على حرمة بيتة

- اي خطية خوش رجال
الله ينتقم منهم خوفوا الاطفال وفجعوا ام جمار بأبنها متدرين شسوت لحد ما اجيتوا

- حقها ام بعد
اي انتِ شلونچ هم اتصل بيچ صخر لمن چنة مسافرين

- اااابد
ولا عبرني الله وكيلچ

- والى متى
ليش مدتتحركين حتى تحلين هالموضوع ترى ميصير تبقون هيچ

- شسويلة غسق
شگد حاولت ويا ميقبل يحچي
خلي على راحتة هو اني روحي طالعة من الدنيا ظلت على صخر يعني

- دمشي خلي ننزل قبل لا يجون وميلگونة جوة

حچيتها وشلت ود من الچرباية
نزلنة جوة چانن بس النسوان گاعدات
رحت للمطبخ جبتلهن مي ورجعت توني دخلت للصالة طبوا الولد بس الشيخ وإسحاق مو وياهم

ظلن عمة سكينة وخالة ام هناء يسألن
شصار وما گدرتوا تعرفون منو سوة هيچي
وكالعادة چان جوابهم ما وصلنة الهم لأن هم يستغلون الأوقات المناسبة للهجوم حتى يلحگون يشردون بدون ميكشفوهم

شمس.. هم يحچون واني عيوني على صخر
ما ادري ليش تجاهلة الي ديستفزني حيل ولا كأني واگفة گدامة حتى ما عبرني بكلمة شلونچ وهو صارلة ايام مسافر

شوية وگام يم نهلة
صفنت عليهم بـ استغراب
صار يحچي وياها بصوت اقرب للهمس
بحيث اني واگفة قريب عليهم وما گدرت اسمع شيحچون

فجأة طلع چفيتة من جيبة وانطاهيا
مسحت دموعها بيها بس بقت يمها ما رجعتها الة
ظل يحچي وياها بالعشر دقايق وراها گام راح لغرفتنا

ما ادري شحسيت بوقتها
كل الأدري بي ضجت بشكل مو طبيعي
يمكن لأن تجاهلني وحچة وياها او يمكن لأن اني مرتة وطبيعي اضوج اذا شفتة يحچي ويا غيري

تقربت من نهلة بهدوء
چانت الچفية بـ ايدها احتاريت بشنو اتحجج حتى اخذها منها

- نهلة

- نعم

- گومي حبيبتي غسلي وجهچ حتى ترتاحين

- ما بية والله

- گومي اني اساعدچ

مديت ايدي سندتها
وديتها للمغاسل اخذت حجابها لزمتة چان تنطيني الچفية ويا

غسلت وجها ورجعت دارت علية
اخذت الحجاب من ايدي لبستة وباوعتلي يمكن شكت بالموضوع

ما اهتميت
على شنو اخجل غير هو رجلي
بس هذا الناقص تظل چفيتة ذكرى يمها والله ياربي

رجعت للصالة عفتهم ورحت الغرفتي
لگيت صخر يم الباب ديريد يطلع وگفت بطريقة
چان يباوعلي ويگول اتنحي عني شوي اردن اولي

- شبيك !!
شو حتى بالچذب ما گتلي شلونچ لـ هالدرجة تكرهني صخر

- بوية ميلي عني لا تشلعين افادي

- ما اوخر
لازم نحچي ونحل هالسالفة لأن صارت بلا ملح

- مو هو هذا التردي لو آنه غلطان

- يعني راح نبقى طول العمر هيچ ؟!!

- شمس الوادم برة
حال الضيم حالها ومشلوشة شلش تظنين هساع الوكت مناسب المثل هالخرابيط !!

باوعتلة وسكتت
دفعني بهدوء من الباب علمود يطلع انتبه ع الچفية
راد ياخذها رجعت ايدي ورى ظهري ع السريع باوعلي مستغرب

- هاي شني الجابها اليمچ

- نهلة انطتنياها

- چا ناوليني

- لا اول اغسلها
شنو ما عندك غيرها علمود اشتريلك

- اكيدن عندي

- بعد شكو

باوعلي بنظرات شك وطلع من الغرفة
رحت للمطبخ والچفية بـ ايدي ردت اغسلها ع الحوض صارت الجداحة گبالي

ليش سويت هالشكل ما ادري
لزمتها من الطرف وشعلت بيها النار قريب متوصل الايدي ذبيتها بنص الحوض وفتحت الماي عليها

غسق.. طول اليوم وهم مخبوصين
قسم منهم انشغل ويا جمار والقسم الثاني ويا الشيخ يحاولون يوصلون للفاعل قبل لا يتمادى اكثر

لليل اخذت ود الغرفتي
راجعين من طريق طويل وتعب
وفوگاها طول النار ما گدرنا نرتاح من الهوسة الي بالبيت

قريب العشرة ونص يلا نامت
گبل نمت وراها ما حسيت إلا الصبح على اصواتهم جوة

لبست حجابي ونزلت
لگيتهم جايبين جمار والكل ملتمين يم راسة
تحمدت الة بالسلامة ورحت للمطبخ لگيت ريحان دتسوي بالريوگ

- صباح الخير

- هلا خية صباح النور

- شفتي جمار ؟؟

- من بعيد البعيد عبن الوادم كلها موجودة

- روحي هسه
لازم تگوليلة الحمد لله ع السلامة
لتخافين مراح تلگين احد يمة هستوني سلمت علي

ريحان.. بس حچتها طلعت
باوعت من بعيد كلهم موجودين بس لاهين عنة بالسوالف

تقربت بهدوء خاطر لا ينتبهون علية
صحت جمار رفع راسة باوعلي بـ ابتسامة خفيفة

- الحمد لله اعلة السلامة ما تشوف شر ان شاء الله

- الله يسلمچ الية

حچاها بهمس عبن اخواني گاعدين جارة
عفتة ورجعت للمطبخ چانت غسق واگفة تشرب مي بس شافتني صفنت بوجهي

- شمالچ تتنوعين هيچي

- اكو شي صار

- لا عليش تسألين !!

- ما ادري
احسچ مو طبيعية

شمس.. صباح الخير

غسق.. صباح النور
يلا همزين گعدتي حتى نتريگ سوة

ريحان.. آنه رايحة اگعد ود

غسق.. خوش واني وشمس نجهز الريوگ

بس حچيتها عافتنة وطلعت
بقيت صافنة وراها مستحيل مصاير شي ذيچ وينها من وجها مبينة السالفة

- اگول شمس

- ها حبيبتي گولي

- ريحان بيها شي ؟؟
شو گاعد احسها مو طبيعية من البارحة لليوم

- اي لعد الي صار شوية

- لا غير هالموضوع
مو قصة خايفة بس ببالها شي دتفكر بي اني متأكدة

- اي صح اكو

- دحچيلي لعد

- بس مو تگولين الاحد حتى الريحان

- بدون متوصيني بس احچي

تقربت مني همست بـ اذني
- جمار اولت البارحة بلليل اعترفلها بحبة

- عزززة صدگ

- اششش ولچ
نصي حسچ ليسمعون وتوگع بيها المسكينة

- زين انتِ شلون عرفتي

- طلعت من غرفتي ضايجة
ما اجاني نوم گلت اروح اگعد وياها لگيتها يم جمار شوية واعترفلها

- والله ادري بي يحبها
اصلاً نظراتة فاضحتة بس هي ولا تحس بي همزين عاد حچاها

- ان شاء الله يكون گدها لأن ريحان تستاهل

- ان شاء الله يارب
كافي سدي الموضوع لا وحدة تسمع وشيخلصنة

اي ما گلتيلي
گدرتي تحچين البارحة ويا صخر لو لا ؟؟

- لا وين
نمت وهو بعدة ما راجع من برة

- حتى إسحاق
نمت وگعدت واني ما شايفته
شديسون والله راح اتخبل

- تلگيهم ملتهين
منا جمار ومنا الحادثة الله يساعدهم

- صدگ الحارس شلونة عندچ اخبارة

- اي الحمد لله مابي شي

- الحمد لله

حچيتها ودرت وجهي ع الباب
شفت ود طبت تركض رحت ع السريع شلتها ابوس بيها

- صباح الخير بنيتي الحلوة

- نيني حبيب ( انطيني حليب)

- هههههه
يعمري چنچ على حليب.. وشميتها من رگبتها حيل

گعدتها ع الكرسي
سويتلها ريوگ والتهيت بالشغل لليل محد من الرياجيل بين

صارت الـ 11 صعدت ود نومتها
وراها رجعت الغرفتي سبحت وطلعت لگيت إسحاق جاي

لا هو حچة ولا اني
چان متمدد ع الچرباية والموبايل بـ ايدة
نشفت شعري ع السريع وطفيت الضوة علمود انام تأخر الوقت

تقربت منة شكلة ديكتب رسالة
ردت اباوع ويامن ديحچي بس ترددت ليروح يكفشني وشيخلصني منة ساعتها

درت ظهري علي وغمضت عيوني
شگد حاولت انام ما گدرت فكري كلة يمة
شديسوي وشبي ساكت هالشكل معقولة الصار بالحلة لسه يدور براسة

گمت عدلت گعدتي گبل باوع علية
- ممكن نحچي

- خير

- شبيك شو مو طبيعي صاير شي

- ما بية

- باوع اذا على سالفة الحلة صدگني ما شفت احد

- شوفي بوية
آنه رجال حكيم واحسب الكل خطوة ألف حساب گبل لا اتحركها

هيچ الله ركبني
وكملت وياي من دخلت للقضاء
من هيچ تشوفيني ساكت هساع عبن هاي الخطوة الأولى عودن لمن اخطي الأخيرة تعرفين الميزان ياهو ساعتها

- تشك بية يعني ؟؟

- آنه حچيت هيچ !!
عليش تجيبين الشبهة النفسچ

- مو هذا تفسير كلامك

- فسري باليحلالچ وهساع عوفيني انامن وراي گعدة

- تعالي ما كملت كلامي

- انتهى الكلام

- لا ما انتهى ولازم هالمرة تسمعيني

- غسسسق
لا تختبرين صبري وياچ عبن ساعتها راح تشوفين مني الما يعجبچ ثقي بالي تعبدي

بس حچاها دار ظهرة ونام
الحرارة صعدت الراسي
بس اريد اعرف معقولة تشك بية من موقف عابر لو وراك شي اني ما اعرفة يا إسحاق !!

اسبوع مر والوضع مثل ما هو
إسحاق ميحچي وياية غير للضرورة وحتى صار يرجع للبيت اغلب الأحيان متأخر بحيث انام وهو ماكو

شمس وصخر على نفس موقفهم
لا هو اليتنازل ويسمعها ولا هي التحاول ويا بشكل جدي لأن اكيد هالشي هو الأفضل بالنسبة الها حالياً

جمار صار احسن ورجعوا البيتهم
إما موضوع الهجوم ورغم شگد حاول الشيخ وولدة علمود يعرفون منو ورى وشنو سببة بس ما گدروا

وهيچ انغلق الموضوع مؤقتاً گدام الكل
بس اني متأكدة كل واحد بيهم ديشتغل بهدوء حتى يكشف الفاعل اليوم قبل باچر

كل هاي الفترة خالة ام هناء ظلت يمنة
واليوم الشيخ قرر يفتح واحد من بيوتة علمود يگعدهم بي

رحت وياهم الصبح
چان البيت كلش مناسب العيشة النفرين
عبارة عن صالة واستقبال ومطبخ وحمام وبالأخير غرفتين وحدة بصف الثانية

طبعاً البيت مچان مفروش
وشكلة هم هستوة طالع من ايد العمال لأن بعدة بترابة وهوسة البناء

واتصور الشيخ سوة هالشكل متقصد
راد يگعدهم بمكان خاص بيهم من كل النواحي حتى الاثاث

كلش فرحت لأن خالة نجمة صارت قريبة مني
ورغم هي اجت للبصرة بظروف قاسية بالنسبة الها بس جيتها شالت من صدري نص القهر الچنت اعيش بي يومية

الصبح كلة ننظف اني وهناء وريحان بي
للضهر يلا خلصنة
رحنا للبيت تغدينة والعصر رجعنا لهناك مرة ثانية وشمس ويانة

جابوا الولد الأثاث
اباوع علي ما شاء الله الشيخ ممقصر بشي اليگول بيت عرسان واكثر بعد

حطوا الغراض برة حتى لتصير هوسة بالبيت
دخل إسحاق گدامهم فتح البيبان وصاح جيبوا غرفة النوم بالاول

دخلوها صهيب وصخر شي ورى شي
كملوا الترتيب بشكل عام وظلت الخفايف علينة گمت ويا البنات دخلت جوة حتى نشوف الاثاث

شمس.. الله شگد حلووو

ريحان.. گولي ما شاء الله خية

غسق.. ها هناوي عجبتچ الغرفة

باوعتلي وابتسمت بحزن
خطية بعده موت ابوها مأثر بيها ورغم كل هذا دتحاول تتماسك الخاطر امها

صهيب.. يلا تحركن مو راح يليل الليل

ريحان.. خوية والله تعبنة ما تخليها اعلة باچر

صهيب.. وهاي احنة يوميا انظل رايحين رادين
گومن فضنا نريد نولي الاشغالنة هو شعدچن قابل

هناء.. يمة عوفهن صگد تعبن اليوم

صهيب.. لا عمة
شني السونة خاطر يتعبن والله شوي كنسن البيت من التربان

إسحاق.. آنه رايح ابوي دز علي
لون اعتازيتوا الشي بس اتصلوا واجيكم

صخر.. الله وياك خوية كل احنة هنا لا يظل بالك

ريحان.. يلا خايبات
گومن نشتغل هذول فوگ راسنة اليوم ما بيها مجال نشرد

صهيب.. چا يلا خفن ايدينچن شوي

راحت شمس ويا ريحان للصالة
واني وهناء رحنا نسوي شغل المطبخ
فتحت الكاونتر هي تغسل المواعين واني ارتب الغراض بي شوية وعاطت بصوت عالي

گمت ع السريع
لگيت الحنفية بـ ايدها والماي ينث علينة
صحت بصوت عالي وينكم واحد يجي يساعدنة طب صهيب يركض شكو شني الصار

- الحنفية طگت بـ ايد هناء

- شني السالفة حتى هاي ما دبرتيها

هناء.. هم شغلهم فاشل آنه شكو

- اي ذبي ثولچ براس غيرچ

- دير بالك ما اسمحلك تتجاوز علية

- لا تعلين صوتچ بوجهي
حچاها بعصبية

- وانت منو حتى تأمرني
والله اصيح ما اصيح هذا الشي راجعلي اذا ما عاجبك الوضع وخر من وجهي مالك سلطة علية ترى

- لچ اااااانت شجاي تحچييين

- هييييي لتصيحك تسمع لو لاااااا

بس حچتها شد قبضة ايدة وضرب الكاونتر
على صوت صياحة الكل اجة يركض
ظلت خالة ام هناء ترزل ببتها وهو يصيح احمدي ربچ انتِ مرة وإلا چان عرفت شلون اربيچ من جدة وجديد

سحبة صخر ليبرة بالگوة
ركض حبيب سد الكاك حتى ينگطع الماي لأن المطبخ تنگع ووگف يسوي بالحنفية

رحت وراهم للغرفة
لگيت هناء تبچي وخالة واگفة ترزل بيها
بقيت بمكاني ما اگدر اتدخل لأن مو بس هناء غلطت حتى صهيب غلط وياها

- يمة عليش جبتينة لهنا
هيچ احسن راح نظل تحت رحمة هذا واوامر ذاك

بس فهميني شعندچ رديتي للبصرة
اذا على الفلوس آنه عندي استعداد اطلع اشتغل من الصبح لليل خاطر ما نعتاز لأي بشر

ما اقبل بالذل تالي عمري
مو عبن مات ابوي راح اليسوة والمايسوة يتحكم بينة ويحسسنة بالمنية

- مع الأسف اعليچ والله
درت وجهي لگيت صخر بالباب
طب للغرفة اعتذر من خالة وراها باوع الهناء

- احنة ما نمن اعلة الغريب
خاطر هساع نمن اعلة لحمنا يبت عمي
كلش عيب بحگنا نسمع هالحچايات منچ انتِ بالذات

وما عاش ولا چان
اليذلن بيكم والشيخ ضاري عايش بالوجود
ولون اخوي غلط بحگچ انتِ هم غلطتي عبن ما يصح تعلين صوتچ اعلة الزلمة لو شما يصير

البت من عدچن مثل الجوهرة
حلوة من برة وهادئة من جوة واي تصرف منها غلط يخدش حيائها وهيچ تضيع لمعتها وقيمتها بذات الوكت

ارفعي راسچ لا تسكتين
آنه غلطان بشي ولون چان ردچ اي غلطان گوليها بوجهي لا تستحين

ام هناء.. لا يمة محشوم من الغلط

صخر.. خوية هناء
لا يتراولچ عبن مات ابيچ راح تصفين وحيدة
لا خوية لا غلطانة

عندچ ولد عم يفدوچ برواحتهم
واذا فرد يوم واحد من عدهم وگف بوجهچ وحاسبچ فهالشي الاجل مصلحتچ مو بغضاً بيچ صدگيني

هناء.. آنه اسفة
ادري بنفسي غلطت بس صهيب زودها وحتى اسأل غسق

- ادري يبعد اخوچ حچالي
وآنه هم نيابة عن اخوي راح اعتذر منچ امسحيها بوجهي

- ما صار شي

- چا يلا گومي اعلة الشغل خاطر نكمل ساعة گبل

- اي تامر

شمس.. چنت واگفة اسمع النقاشهم
من طلع صخر صرت گبالة وحچيت بهمس
ما شاء الله تعرف تحل مشاكل العالم بس مشكلتك ما بيك تشوفلها حل

- المشكلة بيچ موش بية

- وتالي ؟!!
مو ألف مرة اعتذرت منك يعني شوكت ترضى

- شني فايدة الأعتذار والـ بلگلب ظال مثل ماهو

- شنو قصدك ما فهمت ؟!!

راد يحچي دگ جهاز
رفع الخط گال نعم فجأة ملامحة كلها تغيرت وعافني وطلع للحديقة

بقيت اراقبة من بعيد
واگف بالباب يدخن ويحچي بعصبية بعدين سد الخط وراح ما ظل واحد يمنة غير حبيب

رحت ع السريع اخذت موبايلي واتصلت بي
اكثر من مرة ما رد علية ظليت بقلق لليل وهو ما راجع

قريب الـ 12 گاعدة بالغرفة طب ضايج
گمت من مكاني ع السريع وگفت گبالة هاي وينك صخر

- خير

- شنو هو الخير
فجأة عفتني ورحت بدون متحچي شي وراها اتصل وارجع ليورة وحضرتك مترد علية ممكن تفهمني شديصير

- كل شي ماكو

حچاها وراح نزع ملابسة
احچي ويا ولا كأنة ديسمعني من العصبية اجيت ارگع الموبايل براسة إلا شوية

اباوع علي شو هذا لف راسة ونام
شگد ردت عالجت ماكو داير ظهرة علية وعيونة مغمضة اخير شي تعبت وحلفت مالي شغل بي بعد اليوم

غسق.. لليل چنت متمددة حتى انام دخل إسحاق للغرفة باوعت علي وجها ميتفسر مع ذالك ما اهتميت تعودت هو هيچ دائماً ساعاتة براحاتة وكل شوية مزاجة شكل

غير ملابسة وطلع الجنطة
جهز غراضة واني اباوع علي حتى ما تحركت من مكاني ما طول ما طلب مني على شنو اگوم واتعب نفسي بعد

حط الجنطة يم الباب وطفى الضوة
اجة تمدد ودارلي ظهرة ابد ما استغربت لأن اخر مرة نومني بحضنة من چنة بالحلة

ثاني يوم گعدت على صوت حركتة بالغرفة
گمت غسلت ونزلت سويتلة الريوگ داصعد اصيحة شو هذا نزل وطلع بوجها حتى بدون ميسلم علية

هزيت ايدي ورجعت لملمت الريوگ
تستاهلين غسق لأنچ ثولة شكو تگومين وتسويلة سم كملي نومتچ وخلي يحتار بروحة

صعدت فوگ لگيتة حاطلي فلوس ع الميز
دفرتهن بعصبية هو بس هذا الفالح بي إسحاق افندي
عبالك الحياة الزوجية بالنسبة الك تصرف علية واجهزلك ملابسك وووبس

ما ادري ليش كل حركة من إسحاق صارت تغثني
وين غسق القديمة ؟!!
غسق الي چانت ما تهتم الأي شي بـ هالدنيا وعايشة حياتها جسد بدون روح

ليش رجعت اضوج وانقهر واتنرفز
ليش صار شغلي الشاغل بـ هالحياة إسحاق ويومي يتغير حسب اسلوبة وياية شديصير بس اريد افتهم

مر يومين واني ما ادري بي وين راح
ما اتصل ولا حتى سأل عن بنتة وكلما اسأل ريحان تگول محد يعرف عنة شي وحتى جهازة مغلق

باليوم الثالث
چنت نايمة الصبح قريب السبعة انفتحت الباب حيل

فزيت على صوتها
باوعت هذا إسحاق واگف كبالي وشكلة ميتفسر
گمت ع السريع فركت عيوني وگتلة خير صاير شي

رفع ايدة حط الصورة بوجهي
- هذا ياهو تعرفي ست غسق لو لاااا ؟!!...

يتبع

لتنسووون ⭐⭐⭐⭐⭐⭐