رواية وضاقت الأرض بي الفصل الخامس والعشرون 25 - بقلم لبنى الموسوي

#وضاقت_الأرض_بي

للكاتبة #لبنى_الموسوي

توني نازلة سمعت التلفون دگ
ذبيت ود ورحت أركض مدري ليش صار عندي احساس هاي خالة ام هناء

رفعت الخط صحت الوو
انصدمت بصوت هناء تناشغ من البچي بحيث متگدر تجمع كلمة على بعضها 
لا ياربي كل شي ولا الي بالي يصير اموت والله

- وچ هناء اااحچي
خالة زينه مووو ؟؟الله يخليچ گولي هي بخير

- غسق غسسق
حچتها بشهگة ورجعت تبچي

- هناء فدوة اهدي
بس خلي افتهم شبيچ مو والله گلبي راح يوگف من الخوف

- ابوووي

- شبي عمو ولچ

- مات غسق ماااات
وامي هاي وينها طايحة بالگاع وآنه الوحيدي ما اعرف شلون اتصرف

- صخام بوجهي ان شاء الله
سدي سدي الخط شوية واتصل عليچ مو متجاوبين

نهيت المكالمة ورحت للمطبخ اركض
شفت ريحان دتشتغل ويا البنات تقربت منها وهمست

- موبايلچ وين ؟؟

- بحجرتي عليش تسألين

- اريد اتصل بـ إسحاق

- اي خية اعلة راحتچ
والرمز مالة مواليد ود مرتين

بس حچتها رحت اركض
الله وحدة اليعلم حالي شلون چان بـ هاللحظات
لأن مستحيل اگدر انسى هالرجال الطيب الـ احتواني ببيتة ايام وليالي وهو يدري وراية مصيبة چبيرة كلش ممكن تأذي بعدين

اخذت جهاز ريحان واتصلت على إسحاق
قريب متخلص المكالمة رد علية بس چانت يمة هوسة مو طبيعية

- نعم خوية

- اني غسق

- ها بوية خيرچ

- ااا شسمة
عمو ابو هناء انطاك عمرة

- لاااا
لا اله إلا الله
يمتة صار هالشي وياهو الخبرچ

- قبل دقيقتين هناء اتصلت
عفية وحدها بالبيت وخالة متخربطة متعرف شلون تتصرف

- ماشي بوية
هساع آنه جاي واحل السالفة

- اي فدوة مو تتأخر عليهم

- الله وياچ

حچاها وسد الخط
رجعت خابرت هناء احاول اهديها بين ما يجي إسحاق عشر دقايق تقريباً وسمعت الباب انفتح

سديت الخط وگمت ع السريع
شفتة دخل هو والشيخ سلموا وكلمن راح الغرفتة اني هم صعدت ورى

اول ما طبيت شفتة فاتح القاصة
حس علية يمة چان يگول اريدن رقم عمة نجمة لو هناء عندچ ؟؟

رحت للكنتور ادور بالجنط
اني متأكدة ضامة الورقة هنا بس بيا جنطة بالضبط مداذكر

طلع الفلوس وراح للحمام
بقيت ادور وين يلا لگيت الورقة رحت داطيهيا اجة هو وگال ها بوية

- هذا لگيتة

- اي جيبي
اخذها مني دگ الرقم بجهازة واتصل

- الو نعم
خوية هناء آنه إسحاق

لا اله إلا الله
خليچ سباعية كل احنة اعلة هذا المنوال وما يدوم غير وجه الباري عز وجل

شني الصار احچيلي
انا لله وانا اليه راجعون
خليچ جارهم وحاولي تصحين الوالدة لا تعوفينها مغمي اعليها

هساع آنه اتصل بصاحبي
لون دگ الباب اعليچ وگال آنه سامر افتحيها غيرة ما تفتحين الأي بشر چان تسمعيني

ان شاء الله خوية
مسافة الطريق هي هيچ هيچ اجراءات المستشفى تاخذ وكت طويل

سد الخط ورجع اتصل بصديقة
- سامر خوية شلونك

رحم الله والديك
اريدن خدمة منك لون اسوي زحمة اعليك

ممنونك
عمتي جارك بالحلة
اليوم توفى زلمتها وهي طاحت من الصدمة وظلت بنيتهم حايرة برويحتها بين امها وابوها

اي يخوي
بس اخذهم للمستشفى لبين ما نجيك عبن تدري المسافة مو هينة منا ليكم

الف رحمة اعلة ذاك الأب الطيب
تامر بس خليك اعلة اتصل وياي موش تگطع

سد الخط وسحب الفلوس من الميز
راد يطلع صحتة لحظة عفية وين رايح ؟!!
دار وجها باوعلي بـاستغراب
وين يعني للحلة غير

- خلي اجي وياك

- وين تجين بوية من كل عگلچ

- فدوة حباب اقبل الله خليك

- يمعودة بسچ موش وكت الملحة

- عفية الله يخليلك بنتك
يعني عمو مات وخالة متخربطة وهناء وحدها كل هذا وتريدني ابقى گاعدة هنا !!

- عودن اوصي امي تاخذچ وياها للفاتحة

- لا هسه
فدوة لتعاند شتخسر لو اخذتني وياك اظل يم هناء ع الاقل

- ما اگدر لا تعاندين
شوي والدنيا تعج بالزلم وين اخليچ ساعتها

- يم خالة وهناء
عفية هم وگفولي بـ اصعب اللحظات لتحرمني ارد ولو جزء من جميلهم

- بسچ عاااااد

حچاها وطلع من الغرفة
گعدت ع الچرباية والدمعة بطرف عيني خايفة كلش لا يصير شي الخالة واني بعيدة عنها

حطيت ايدي على وجهي ابچي
شيصير لو اخذني ويا صارلي ساعة اتوسل بي حتى لو حجر چان حن علية

بعدني احچي انفتحت الباب
رفعت راسي شفتة إسحاق چان يگول
يلا امشي غيري بالعجل ناطرچ جوة لا تتعطلين

بس حچاها طفرت من مكاني
ما ادري ليش ابتسم يمكن لأن شكلي چان يضحك واني ما حاسة على نفسي

لبست اسود ع السريع
واخذت قطعتين الي والإسحاق لأن اكيد راح نبقى هناك لحد متخلص الفاتحة

نزلت جوة لگيتة گاعد بالصالة هو والشيخ
باوعت الود دتلعب ويا الجهال كلش تعلقت بيها بحيث صايرة ما اطيق افترق عنها ولا دقيقة وحدة

ردت اگول الإسحاق خلي ناخذها ويانة
بعدين تذكرت فاتحة وهوسة يعني الاجواء مو مال جهال تروح تنهبط

شلتها بوست بيها لحد ما شبعت
وراها وصيت عمتها عليها
ادري ماكو واحد احن على ود من ريحان لأن هي الي ربتها بس مع ذالك اظل اوصي بيها كلما تبقى يمها ليش ما اعرف

طلعنة بسيارة إسحاق
الطريق كلة وهو على اتصال ويا صديقة علمود يعرف اخبارهم بالمستشفى

والحمد لله خالة گدرت تعديها سلامات
بس ضغطها مرتفع كلش لذالك ظلت هي وهناء بالمستشفى ويا سامر

بعد ساعات من التعب دخلنة السيطرة الحلة
مدينتي الغادرت ارضها مجبورة بعد ما ضاقت بية وهاي اني هسه رجعت دخلت بيها بس كـ ضيفة مو اكثر

ميلت راسي ع الجامة اباوع للشوارع
هنا ريحة امي وصوت ضحكات طفولتي والأيام الحلوة العشتها ويا بت عمي واختي الوحيدة شجن

هنا عمر ضاع
براءة انسرقت بحقد
شرف انسلب بـ ايد اصحابة
وحياة انوخذت من بنية انحكم عليها بالموت وهي عايشة

صحيت على قطرات الدموع بللت خدي
مسحتها بـ ايدي وابتسمت بحزن
ابد لتحنين غسق
واياچ ثم اياچ تنسين المر العشتي بهاي المدينة

اخذت نفس عميق ورجعت الوعيي
بقت عيوني ع الطريق احسب الدقايق علمود نوصل واشوف خالة وهناء حتى اشاركهم بحزنهم مثل ما شاركوني من قبل

بس وصلنة للمستشفى نزل الشيخ قبلنا
قفل إسحاق السيارة واتصل بصديقة سألة عن الغرفة الموجودة بيها خالة ام هناء

اخذني ودخلنة للردهة
چانت خالة متمددة ع السرير وهناء گاعدة يم راسها تبچي بس شافتني گامت تركض الحضني

- حبيبتي الله يصبرچ ويرحم عمو برحمتة الواسعة

- راح ابوي غسق راااح

- انا لله وانا إليه راجعون
الله يعوضة الجنة ويصبركم على فراگة يارب

مسحت دموعها بـ ايدي ورحت يم خالة
چانت هادئة بشكل ما اعرف اذا چان هذا ايمان قوي لو الصدمة بعدها مأثرة بيها

بست راسها وبچيت
- البقاء لله خالة كل احنة على هذا الطريق

هزيت راسها بدون متجاوب
قدم إسحاق الهم التعازي وعافنة وراح
بقيت يمهم بالنص ساعة چان الهدوء سيد الموقف بهيچ دقايق وبس الدموع تشرح البينة

رجع إسحاق گال لازم ندفن قبل ليصير المغرب 
بس حچاها گامت خالة ام هناء من مكانها لبست العباية وراحت بـ اتجاها

- نسبانة اجوي لالة

- اي كلهم موجودين
حتى ابوي واخواني اجوي لا يكنلچ فكر

- چا جاية وياكم

- عمة وين تجين
چا ذني البنيات عدمن يظلن

- ميزان لا تحاول
الگاع تطمني كونها لون رجلي وعشرة عمري يندفن بالتراب وآنه موش جارة

باوع علية بعصبية
اكيد يستصعبها نروح وياهم والزلم تارسة المكان بس انجبر ما عندة غير خيار خصوصاً خالة مُصرة كلش

طلعنة من المستشفى
چانت الدنيا مخبوصة برة عبارة عن زلم بزلم بيهم الاعرفة وبيهم الما اعرفة

صعدنا ويا إسحاق بسيارتة
استغربت من وصلنا لحدود الحلة بعدين افتهمت الشيخ اصر يدفن عمو ابو هناء بمقبرتهم رغم هو غريب عنهم

وصلنة للنجف قريب الغروب
بعدنة بالطريق اذن الأذان اتصل الشيخ بـ إسحاق وگلة نأجل الدفنة اعلة باچر ما يصح ندفن الزلمة بلليل

گبل غير طريقة
اخذنة للفندق حجزلي ويا خالة وهناء بغرفة وحدة وهو راح يم الزلم

الليل كلة ما گدرت انام
الحزن الچان مخيم على خالة حسيته خيم على گلبي وانعاد بذاكرتي نفس الألم السيطر علية من اجاني خبر موت امي

للفجر صلينة چان يدگ إسحاق على هناء
جابوا الريوگ محد من عدنة قبل ياكل شي يادوب بس شربنا مي وطلعنة للوادي

بعد ما وصلنا اخذت زاوية ويا هناء
انهارت وهي تشوف ابوها يندفن گدام عينها وامها متربعة بالگاع وتنعى ايامها ويا

مچان بـ ايدي شي اسوي اخفف بي من وجعها
تركتها تبچي علمود ترتاح لأن ادري ماكو شي يريح الأنسان لمن يفقد عزيز گلبة غير الدموع

فجأة انتبهت الإسحاق
انسحب من بيناتهم واجة بـ اتجاهي
لزمني من ايدي وگال الهناء ظلي بمچانچ لا تتحركين ابد

هزت راسها بمعنى اي
گبل اخذني ومشى بقيت صافنة شنو السالفة وين رايحين من الارتباك حتى اخاف اسألة

مشينا مسافة طويلة
تقريباً چنة بنص المقبرة وهسه وصلنا البدايتها
ما حچة اي شي وبنفس الوقت ظل لازم ايدي وشاد قبضتة عليها بقوة،، حيل استغربت هالتصرف منة

فجأة وگف بفد مكان
ما ادري شنو حچة ويا الدفان لأن صوتة چان ناصي
شوية ومشوا سوة اشرلي تحركي رحت ورى اباوع على قبور العالم

وگفوا يحچون بعدين عافنة الدفان وراح
سحبني إسحاق من ايدي الداخل المقبرة مشينا بنص القبور مسافة بسيطة وراها وگفنا

درت وجهي اشوف المن جايين
هو اني شفت گبر امي گدامي لو انتهيت
نزلت على ركباتي مصدومة حطيت ايدي على اسمها وصرت اناشغ بالبچي

لحظات من العمر ما اگدر اوصفها
بين صدمتي بوجودي يمها بهيچ موقف وبين عتبي عليها لأن راحت وعافتني وحدي مر الوقت سريع

ما ادري شگد طولت هنا
ولا اريد اتركها واروح لو بـ ايدي اخلص الباقي من عمري على قبرها لحد ما الله ياخذ امانتة وارتاح

حطيت راسي قريب من اسمها وهمست
هيچ هانت عليچ بنيتچ وعفتيها ورحتي ؟!!
انتِ مو حلفتيني ما ارجع للبيت حتى لا اموت زين ليش متي بمكاني

معقولة فديتيني بعمرچ !!
معقولة خليتي راسچ ع المخدة يوم الحادث وگلتي ربي من عمري على عمر غسق واجعل يومي قبل يومها

والله حاسة سويتي هالشكل
اي ماكو غيرها وإلا ليش تموتين فجأة وانتِ ما بيچ إلا العافية

اشتاقيتلچ ماما
اشتاقيت اسمع اسمي بصوتچ
اشتاقيت اگعد من النوم واشوفچ گبالي علمود يشرق يومي بنور ابتسامتچ الحلوة

اشتاقيت الكل شي بيچ
حضنچ كلامچ حنانچ خوفچ علية وحبچ البنيتچ الوحيدة حتى الصوت المكينة وانتِ تخيطين بيها هم اشتاقيت اسمعه مرة ثانية

گمت من الگبر امسح بدموعي
صارت عيني على گبر شجن شهگت بحرگة
ما ادري بيهم مدفونين بالنجف لأن هاي اول مرة ازور قبورهم وان شاء الله متكون الاخيرة

تقربت منها وهم حطيت راسي يم اسمها
هاي يروحي شلونچ
هم بعدچ متوجعة من الحرگ لو خلاص ارتاحيتي من هذا العذاب

بس لو تدرين شصار بية من بعدچ
اذا انتِ متي مرة اني باليوم داموت ألف مرة
واذا اخوية اعتدى عليچ بالحلال اخوچ اعتدى علية بالحرام وياريت وحدة جاب جماعتة ويا

اااخ يا شجن شگد ظلمونا
لچ والله الظلم الشفنا اني وانتِ ما صاير
كلش تذبح لمن المنچ وبيچ يسلب شرفچ ويحكم عليچ بالموت وهذا الي صار ويانة بس كل وحدنة من عدنة ماتت بطريقة تختلف عن الثانية

الله ينتقم منهم ان شاء الله
سيف مهيمن ابوية ابوچ اخواني اخوانچ
كلهم يجيهم يوم يتمنون الموت بي وميلگوا مثل ما سووا ويانة ان الله يمهل ولا يهمل

بست گبرها وگمت على حيلي
درت وجهي داشوف منو مدفون بصفهم
چان انصدم بـ اسمي المرحومة غسق مسلم
تاريخ الوفاة 2012/3/17 !!!

جسمي كلة انتفض
يمكن لو بـ ايدي بهاي اللحظة اصرخ بصوت اگعد بي كل اموات وادي السلام حتى بلكت ارتاح ولو شوية

رفعت ايدي بيأس
قريت الفاتحة الأمي وشجن ودعيت رب العالمين من كل گلبي اجي انام بصفهم بـ اقرب وقت علمود يتحول هالگبر من گبر رمزي الحقيقي وارتاح واريحهم وياية بعد

درت وجهي چان انصدم بـ إسحاق واگف وراية
مدري شلون نسيت ليش وشوكت ومنو جابني لهنا بحيث حسيت روحي معزولة عن كل الناس الأعرفهم وكأني كنت بغير عالم،، ذاك العالم الي ما بي غير اهلي وظلمهم الي وبس

باوعلي وگال يلا نمشي ؟!
بس هزيت راسي گبل لزم ايدي وتحركنا
رجعنا للمكان لگيناهم مخلصين الدفنة ورايحين محد موجود غير بس هناء وخالة والشيخ وياهم

گاعدات يم گبر عمو ويبچن بكل ما بيهم
تحركت ع السريع حضنت خالة ام هناء وصرت اناشغ بالبچي وكأني ما اكتفيت

بستها من راسها ولزمت ايدها حيل
خالة فدوة قوي نفسچ ترى اني وهناء ماعدنة غيرچ بهالدنيا

- اخ يمة هساع بس انكسرت

- لتحچين هيچ
خالة ام هناء الاعرفها متنكسر
انتِ قوية وراح تظلين طول عمرچ قوية مثل ما عرفتچ

الشيخ ضاري.. بسچ ينجمة
لا تنوحين اعلي زايد ادعي الربچ يرحمة ترى الميت ما ترجعة الدمعات

إسحاق.. گومي عمة
كافيچ هالحد هم يا الله نمشي خاطر ننصب العزة

حچاها واشرلي بعيونة يعني گوميها
سندتها اني وهناء وبالگوة قبلت تتحرك من يم الگبر

صارت رجعتنا ويا اذان الضهر
ذبنة إسحاق ببيت خالة وراح ورى الزلم علمود الفاتحة

توضيت وصليت وراها عزلت البيت بسرعة
شوية واجوا اهل إسحاق امة وعماتة ونسوان اخوتة كلهن بس ريحان وشمس ما اجن وياهن

خلصت الفاتحة بالضيم
باليوم الثالث قريب التسعة اندگ الجرس
گامت امل حتى تشوف منو شوية ورجعت گالت الزلم بالباب ذبن اعلة راسچن

لبست حجابي ورجعت
لگيتهم گاعدين بالصالة يحچون ويا خالة
باوعت الإسحاق انكسر خاطري علي من التعب احسة بالگوة فاتح عيونة

بالحقيقة الكل چانوا تعبانين
بس هو اكثرهم لأن ادري بي الشغل كلة على راسة ورغم هو مو چبيرهم بس الشيخ معتمد علي بالصغيرة قبل الچبيرة

الشيخ ضاري.. جهزي رويحتچ باچر تمشين ويانة

ام هناء.. وين ؟؟

- للبصرة غير
مالچ مچان هنانة بعد اليوم

- لا شيخنا اعذرني
مچاني هنا موش البصرة وانت اكثر من يعرف هالشي

- نجمة بلالچ هالعناد
ابد لا تترجين مني اتركنچ هنانة انتِ وبنيتچ الوحيدچن يا تجين ويانة يا اجيب البصرة كلها جارچ

طال الجدل بيناتهم اكثر من ساعة
بالبداية چانت خالة رافضة رفض قاطع تعوف الحلة وتستقر بالبصرة وما اعرف شنو سبب هالرفض الغريب بس بالنهاية إلا ما گدر الشيخ يقنعها وقبلت تسافر ويانة

البيت چان كلش صغير والعالم هواي
ظلينة اني وهناء محتارات شلون نرتب نومتهم
بعدين عزلنة الرياجيل بالأستقبال والنسوان قسم منهن بالصالة والقسم الثاني بغرفة هناء

چنت واگفة بالمطبخ اسويلهم چاي اجتني خالة
- يمة غسوقة

- نعم خالة

- زلمتچ كلش تعبان
وچن الموجدين مالهم نومة هساع
من هيچ فوتي اخذي وامشي الحجرتي خاطر ياخذ راحتة ويجرها للفجر 

- يا خالة وانتِ لعد وين تنامين

- المچان واسع لا تشيلين همي

ردت احچي سكتتني
اخر شي ما گدرت اعاندها اخذت الچاي قدمتة الهم وتقربت من إسحاق

- ابو ود

- خيرچ بوية

- تجي تنام بغرفة خالة

- لا اظلن هنانة احسن

- ترى هي گالت مو اني
گوم نام عفية لأن عيونك كلش حمر واخوانك شكلهم مطولين بالسهرة

صفن بوجهي شوية وگام
رجع الچاي بالصينية وگال اخذيلي طريق اغسل
سويتلة طريق غسل واخذتة الغرفة خالة نجمة فرشتلة بالگاع

نزع الدشداشة وظل بالسروال والفانيلة
تمدد بالفراش گبل رحت طفيت الضوة داطلع صاح وين رايحة تعاي اليمي

- شنو

- خلني انامن بالاول تالي امشي

باوعتلة بـ استغراب
اشرلي يمة يعني تعالي نامي واني اصلاً ما فارشة غير بس النفر واحد يعني لو ردت انام لازم انحشر بي

صحاني صوتة راح تظلين صافنة هيچ
تقربت منة نزعت حجابي وتمددت بالگاع گبل سحبني للمندر بحيث صرت بنص حضنة فيت

حط راسة على راسي يلعب بشعري
- شلونچ هالأيام

- الحمد لله

- ارتاحيتي من زرتي گبور اهلچ

- اي شكراً هواي

- لا تشكريني اعلة شي هو واجبي من الاساس

- انت مو تعبان

- اي والله ميت تعب

- يلا لعد نام وارتاح

بس حچيتها غمض عيونة
ظل حاضني لحد ما غفى شگد ردت اسألة شلون اندل گبر امي بس ما گدرت لأن هسه الوقت مو مناسب المثل  هالاسئلة

شوية وگمت من يمة
طلعت يم هناء حتى لتظل وحدها وتگعد تبچي بقيت احچي وياها لحد ما نامت ونمت وراها

گعدت الفجر على صوت الهوسة
صليت وراها جهزت الريوگ ويا البنات وعزلنة البيت حتى نسافر

صارت السبعة ونص
قفلنا الباب وراح إسحاق يسلم المفتاح لابو البيت
گاعدة بالسيارة ما اشوف إلا سيارة دكتور مؤيد فاتت من يمي نزل الجامة وظل يباوع علية بـ استغرب گبل درت وجهي عنة

ظليت ادعي يروح قبل لا تصيرلي مصيبة
شوية ورفعت راسي لگيت إسحاق واگف گبالي وصافن ورى سيارتة معناها شافة من چان واگف هنا

صعد بالسيارة وجها ميتفسر من العصبية
تحرك مسافة بس طلعنة من الفرع گال هذا ياهوو؟!!

- منو

- الچان واگف يتنوع اعليچ

- ما شفت احد

- غسسق

- هاي شبيك
مو اجيت لگيتي مدنگة شلون اشوف يعني

- ماشي بوية ماشي

حچاها وساق سريع
اخذت نفس بخوف ما گدرت اگول هذا الدكتور الچنت اشتغل ببيتة ليروح يشك بيني وبينة شي خصوصاً هو ميعرف بالسووا هالنذل وياية

ريحان.. بعد ما سافروا اهلي
ظليت آنه ومرت صخر بالبيت ويا الجهال للعصر اجت عمة سكينة يمنة وراها بشوي اجني مرت عمي وبتها نهلة

طول سفرهم 4 ايام
وچان ابن عمي جمار يوميا بلليل يجي خاطر يبات يمنة ومن الصبح يروح على شغلة

قبل ليلة من رجعتهم
نيمت ود بغرفتي وطلعت خاطر اشرب مي
لگيت جمار بالصالة گاعد يدخن والكمبيوتر گدامة

تقربت منة بهدوء
صار عندي فضول اشوفة شجاي يسوي
ما فهمت شي عبارة عن ارقام ورموز الظاهر گاعد يشتغل

رفع راسة شافني استغرب
فشلت منة هسه شني يگول جاية تجسس علية
فكرت ويا نفسي وما لگيت غير وآنه اتحجج بالچاي خاطر اخلص من هالموقف

- تريد چاي

- بكيفچ

- نهلة نامت موو

- اي

عفتة ومشيت للمطبخ
سويتلة چاي ورحت انطيتهيا جاي ارجع الغرفتي صاحني درت وجهي بتعجب

- نعم

- تعالي اگعدي خلي نتعرف

- نتعرف شني !!

- يعني احنة صح ولد عم
بس كل شي منعرف عن بعضنا غير الاسماء

گعدت مقابيلة وآنه ما اعرف ليس سويت هالشكل
يمكن لأن صدگ عاجبني اتعرف علي او عندي فضول اعرف شلون چانوا عايشين برة كل السنين الفاتت

- احچيلي عنچ شوية

- اول انت احچي

- اني جمار
ابن عمچ طبعاً قبل كل شي
فتحت عيني ع الدنيا لگيت نفسي ببلد غريب وتعودت على هالعيشة ويا الأيام بحيث واجهت صعوبة من رجعت للعراق

- وين چنت عايش ؟!.

- امريكا
بس ما ظليت بيها غير 10 سنوات وراها انتقلنة للأمارات

هناك صار شغل ابوية
چان من تجار الامارات المعروفين وسوة اسمة بنفسة بدون ميحتاج الأحد بس للأسف هالشي ما دام

خسر والدي تجارتة بين ليلة ويوم
ومن بعد ما چنة اغنى اغنياء الخليج صرنا تحت خط الصفر بحيث غرگنا بالديون

طبعاً ابوية ما تحمل هالشي
مو سهلة علي يخسر كل تعبة برمشة عين ويبقى حاير بالغربة شلون راح يگدر يرجع يوگف على رجلة مرة ثانية

- ومنها مات

- اي
القهر اخذ منة كل حيلة
وگع فترة بسيطة بالفراش اقل الاسبوعين وراها راح وتركنا بالغربة وحدنة

- الله يرحمة ويعينكم

- شكراً
وهسه احچيلي عنچ شوية

- مامش شي ما تعرفة
حياتي واهلي گدامك كتاب مفتوح وتدري بية مريضة بالسكر

- منين اجاچ ؟!

- انصدمت اعلة بت اخوي موش كتلوها گبال عيني

- اي صح الله يساعدكم

- يلا اگوم انامن رايد شي

- لا سلامتچ

درت وجهي خاطر اروح رد صاحني
باوعتلة چان يگوم من مكانة بهدوء لحد ما صار يمي كلش

باوع بعيوني وگال
- احبچ

صفنت علي متفاجأة
ابتسم ابتسامة خفيفة ونفخ على وجهي صحاني من صفنتي

- لتصفنين
تدرين كلش زين اني احبچ ومن زمان هم
ممعقولة ما حسيتي بمشاعري

- من الطلايب التجمعنا يعني

- ههههه
عادي ما محبة إلا بعد عداوة

وللصراحة اني چنت اتقصد استفزچ
مو بـ ايدي كلش احب عصبيتچ ولو انتِ كل شي بيچ ينحب بالنسبة الي

- جمار !!

- روحة

- ما يصير تحچي هيچ

- ليش
ترى الحب لا هو حرام ولا عيب
خصوصاً اذا چان طاهر مثل روحچ وبريء مثل براءة عيونچ الحلوة

ما گدرت اوگف اكثر من هالحد
رحت الغرفتي على السريع طبيت وقفلت الباب
ما چنت متوقعة اسمع هالحچي منة بعد كل المشاكل الجمعت بيني وبينة من دخل البصرة ولليوم

الليل كلة افكر بكلامة
ما انكر بالاول چنت اكرهة بشكل ما ينوصف لكت اخر فترة تغير الكره بداخلي الاعجاب بسيط خصوصاً بعد ما بدا جمار يغير اسلوبة وياي مرة بعد مرة

للفجر صليت ونمت
ورغم جنت سهرانة گعدت بالسبعة عبن موقتة روحي اگعد يومية هيچ وكت

لبست حجابي وطلعت
لگيت جمار گاعد يتريگ وعمة سكينة جالسة تسولف ويا

سلمت عليهم گبل رفع راسة ابتسم بوجهي
باوعتلة فاتحة عيوني شلون يتصرف هيچ وعمة گاعدة جارة بلا انتبهت شتگول علينة

عفتهم ورحت للحمام
غسلت وجهي وطلعت لگيتة مخلص وجاي يروح
راد يطلع فات من يمي وهمس

- تصدگين اذا گتلچ
هذا اول صباح حلو بحياتي لأن صبحت بعيونچ الحلوة احبچ ريحان

حچاها ومشى
من الخجل اجيت اوگع على وجهي لو ما صوت الرمي صحاني على اخر لحظة

ركضت آنه وعمة سكينة للشباك
شفنا جمار خاتل سد السيارة وملثمين يرمون على بيتنا شامي عامي

استمر الرمي واحنة نتصارخ بمكانة
باوعت على جمار هستوة گام خاطر يصعد بسيارتة اجت بصدرة طلقة وگعتة من طولة بالگاع....

يتبع

لتنسووون ⭐⭐⭐⭐⭐⭐